| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. பொத்த²கஸுத்தங்
8. Potthakasuttaṃ
100. ‘‘நவோபி , பி⁴க்க²வே, பொத்த²கோ து³ப்³ப³ண்ணோ ச ஹோதி து³க்க²ஸம்ப²ஸ்ஸோ ச அப்பக்³கோ⁴ ச; மஜ்ஜி²மோபி, பி⁴க்க²வே, பொத்த²கோ து³ப்³ப³ண்ணோ ச ஹோதி து³க்க²ஸம்ப²ஸ்ஸோ ச அப்பக்³கோ⁴ ச; ஜிண்ணோபி, பி⁴க்க²வே, பொத்த²கோ து³ப்³ப³ண்ணோ ச ஹோதி து³க்க²ஸம்ப²ஸ்ஸோ ச அப்பக்³கோ⁴ ச. ஜிண்ணம்பி, பி⁴க்க²வே, பொத்த²கங் உக்க²லிபரிமஜ்ஜனங் வா கரொந்தி ஸங்காரகூடே வா நங் 1 ச²ட்³டெ³ந்தி.
100. ‘‘Navopi , bhikkhave, potthako dubbaṇṇo ca hoti dukkhasamphasso ca appaggho ca; majjhimopi, bhikkhave, potthako dubbaṇṇo ca hoti dukkhasamphasso ca appaggho ca; jiṇṇopi, bhikkhave, potthako dubbaṇṇo ca hoti dukkhasamphasso ca appaggho ca. Jiṇṇampi, bhikkhave, potthakaṃ ukkhaliparimajjanaṃ vā karonti saṅkārakūṭe vā naṃ 2 chaḍḍenti.
‘‘ஏவமேவங் கோ², பி⁴க்க²வே, நவோ சேபி பி⁴க்கு² ஹோதி து³ஸ்ஸீலோ பாபத⁴ம்மோ. இத³மஸ்ஸ து³ப்³ப³ண்ணதாய வதா³மி. ஸெய்யதா²பி ஸோ, பி⁴க்க²வே, பொத்த²கோ து³ப்³ப³ண்ணோ ததூ²பமாஹங், பி⁴க்க²வே, இமங் புக்³க³லங் வதா³மி. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திங் ஆபஜ்ஜந்தி, தேஸங் தங் ஹோதி தீ³க⁴ரத்தங் அஹிதாய து³க்கா²ய. இத³மஸ்ஸ து³க்க²ஸம்ப²ஸ்ஸதாய வதா³மி. ஸெய்யதா²பி ஸோ, பி⁴க்க²வே, பொத்த²கோ து³க்க²ஸம்ப²ஸ்ஸோ ததூ²பமாஹங், பி⁴க்க²வே, இமங் புக்³க³லங் வதா³மி. யேஸங் கோ² பன ஸோ 3 படிக்³க³ண்ஹாதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங், தேஸங் தங் ந மஹப்ப²லங் ஹோதி ந மஹானிஸங்ஸங். இத³மஸ்ஸ அப்பக்³க⁴தாய வதா³மி . ஸெய்யதா²பி ஸோ, பி⁴க்க²வே, பொத்த²கோ அப்பக்³கோ⁴ ததூ²பமாஹங், பி⁴க்க²வே, இமங் புக்³க³லங் வதா³மி. மஜ்ஜி²மோ சேபி, பி⁴க்க²வே, பி⁴க்கு² ஹோதி…பே॰… தே²ரோ சேபி, பி⁴க்க²வே, பி⁴க்கு² ஹோதி து³ஸ்ஸீலோ பாபத⁴ம்மோ, இத³மஸ்ஸ து³ப்³ப³ண்ணதாய வதா³மி. ஸெய்யதா²பி ஸோ, பி⁴க்க²வே, பொத்த²கோ து³ப்³ப³ண்ணோ ததூ²பமாஹங், பி⁴க்க²வே, இமங் புக்³க³லங் வதா³மி. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திங் ஆபஜ்ஜந்தி, தேஸங் தங் ஹோதி தீ³க⁴ரத்தங் அஹிதாய து³க்கா²ய. இத³மஸ்ஸ து³க்க²ஸம்ப²ஸ்ஸதாய வதா³மி. ஸெய்யதா²பி ஸோ, பி⁴க்க²வே, பொத்த²கோ து³க்க²ஸம்ப²ஸ்ஸோ ததூ²பமாஹங், பி⁴க்க²வே, இமங் புக்³க³லங் வதா³மி. யேஸங் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங், தேஸங் தங் ந மஹப்ப²லங் ஹோதி ந மஹானிஸங்ஸங். இத³மஸ்ஸ அப்பக்³க⁴தாய வதா³மி. ஸெய்யதா²பி ஸோ, பி⁴க்க²வே, பொத்த²கோ அப்பக்³கோ⁴ ததூ²பமாஹங், பி⁴க்க²வே, இமங் புக்³க³லங் வதா³மி.
‘‘Evamevaṃ kho, bhikkhave, navo cepi bhikkhu hoti dussīlo pāpadhammo. Idamassa dubbaṇṇatāya vadāmi. Seyyathāpi so, bhikkhave, potthako dubbaṇṇo tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ ahitāya dukkhāya. Idamassa dukkhasamphassatāya vadāmi. Seyyathāpi so, bhikkhave, potthako dukkhasamphasso tathūpamāhaṃ, bhikkhave, imaṃ puggalaṃ vadāmi. Yesaṃ kho pana so 4 paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ, tesaṃ taṃ na mahapphalaṃ hoti na mahānisaṃsaṃ. Idamassa appagghatāya vadāmi . Seyyathāpi so, bhikkhave, potthako appaggho tathūpamāhaṃ, bhikkhave, imaṃ puggalaṃ vadāmi. Majjhimo cepi, bhikkhave, bhikkhu hoti…pe… thero cepi, bhikkhave, bhikkhu hoti dussīlo pāpadhammo, idamassa dubbaṇṇatāya vadāmi. Seyyathāpi so, bhikkhave, potthako dubbaṇṇo tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ ahitāya dukkhāya. Idamassa dukkhasamphassatāya vadāmi. Seyyathāpi so, bhikkhave, potthako dukkhasamphasso tathūpamāhaṃ, bhikkhave, imaṃ puggalaṃ vadāmi. Yesaṃ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ, tesaṃ taṃ na mahapphalaṃ hoti na mahānisaṃsaṃ. Idamassa appagghatāya vadāmi. Seyyathāpi so, bhikkhave, potthako appaggho tathūpamāhaṃ, bhikkhave, imaṃ puggalaṃ vadāmi.
‘‘ஏவரூபோ சாயங், பி⁴க்க²வே, தே²ரோ பி⁴க்கு² ஸங்க⁴மஜ்ஜே² ப⁴ணதி. தமேனங் பி⁴க்கூ² ஏவமாஹங்ஸு – ‘கிங் நு கோ² துய்ஹங் பா³லஸ்ஸ அப்³யத்தஸ்ஸ ப⁴ணிதேன, த்வம்பி நாம ப⁴ணிதப்³ப³ங் மஞ்ஞஸீ’தி! ஸோ குபிதோ அனத்தமனோ ததா²ரூபிங் வாசங் நிச்சா²ரேதி யதா²ரூபாய வாசாய ஸங்கோ⁴ தங் உக்கி²பதி, ஸங்காரகூடேவ நங் பொத்த²கங்.
‘‘Evarūpo cāyaṃ, bhikkhave, thero bhikkhu saṅghamajjhe bhaṇati. Tamenaṃ bhikkhū evamāhaṃsu – ‘kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññasī’ti! So kupito anattamano tathārūpiṃ vācaṃ nicchāreti yathārūpāya vācāya saṅgho taṃ ukkhipati, saṅkārakūṭeva naṃ potthakaṃ.
‘‘நவம்பி, பி⁴க்க²வே, காஸிகங் வத்த²ங் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச; மஜ்ஜி²மம்பி, பி⁴க்க²வே , காஸிகங் வத்த²ங் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச; ஜிண்ணம்பி, பி⁴க்க²வே, காஸிகங் வத்த²ங் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச. ஜிண்ணம்பி, பி⁴க்க²வே, காஸிகங் வத்த²ங் ரதனபலிவேட²னங் வா கரோதி க³ந்த⁴கரண்ட³கே வா நங் பக்கி²பந்தி.
‘‘Navampi, bhikkhave, kāsikaṃ vatthaṃ vaṇṇavantañceva hoti sukhasamphassañca mahagghañca; majjhimampi, bhikkhave , kāsikaṃ vatthaṃ vaṇṇavantañceva hoti sukhasamphassañca mahagghañca; jiṇṇampi, bhikkhave, kāsikaṃ vatthaṃ vaṇṇavantañceva hoti sukhasamphassañca mahagghañca. Jiṇṇampi, bhikkhave, kāsikaṃ vatthaṃ ratanapaliveṭhanaṃ vā karoti gandhakaraṇḍake vā naṃ pakkhipanti.
‘‘ஏவமேவங் கோ², பி⁴க்க²வே, நவோ சேபி பி⁴க்கு² ஹோதி ஸீலவா கல்யாணத⁴ம்மோ, இத³மஸ்ஸ ஸுவண்ணதாய வதா³மி. ஸெய்யதா²பி தங், பி⁴க்க²வே, காஸிகங் வத்த²ங் வண்ணவந்தங் ததூ²பமாஹங், பி⁴க்க²வே, இமங் புக்³க³லங் வதா³மி. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திங் ஆபஜ்ஜந்தி, தேஸங் தங் ஹோதி தீ³க⁴ரத்தங் ஹிதாய ஸுகா²ய. இத³மஸ்ஸ ஸுக²ஸம்ப²ஸ்ஸதாய வதா³மி. ஸெய்யதா²பி தங், பி⁴க்க²வே, காஸிகங் வத்த²ங் ஸுக²ஸம்ப²ஸ்ஸங் ததூ²பமாஹங், பி⁴க்க²வே, இமங் புக்³க³லங் வதா³மி. யேஸங் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங் , தேஸங் தங் மஹப்ப²லங் ஹோதி மஹானிஸங்ஸங். இத³மஸ்ஸ மஹக்³க⁴தாய வதா³மி. ஸெய்யதா²பி தங், பி⁴க்க²வே, காஸிகங் வத்த²ங் மஹக்³க⁴ங் ததூ²பமாஹங், பி⁴க்க²வே, இமங் புக்³க³லங் வதா³மி. மஜ்ஜி²மோ சேபி, பி⁴க்க²வே, பி⁴க்கு² ஹோதி…பே॰… தே²ரோ சேபி, பி⁴க்க²வே, பி⁴க்கு² ஹோதி…பே॰… புக்³க³லங் வதா³மி.
‘‘Evamevaṃ kho, bhikkhave, navo cepi bhikkhu hoti sīlavā kalyāṇadhammo, idamassa suvaṇṇatāya vadāmi. Seyyathāpi taṃ, bhikkhave, kāsikaṃ vatthaṃ vaṇṇavantaṃ tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ hitāya sukhāya. Idamassa sukhasamphassatāya vadāmi. Seyyathāpi taṃ, bhikkhave, kāsikaṃ vatthaṃ sukhasamphassaṃ tathūpamāhaṃ, bhikkhave, imaṃ puggalaṃ vadāmi. Yesaṃ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ , tesaṃ taṃ mahapphalaṃ hoti mahānisaṃsaṃ. Idamassa mahagghatāya vadāmi. Seyyathāpi taṃ, bhikkhave, kāsikaṃ vatthaṃ mahagghaṃ tathūpamāhaṃ, bhikkhave, imaṃ puggalaṃ vadāmi. Majjhimo cepi, bhikkhave, bhikkhu hoti…pe… thero cepi, bhikkhave, bhikkhu hoti…pe… puggalaṃ vadāmi.
‘‘ஏவரூபோ சாயங், பி⁴க்க²வே, தே²ரோ பி⁴க்கு² ஸங்க⁴மஜ்ஜே² ப⁴ணதி . தமேனங் பி⁴க்கூ² ஏவமாஹங்ஸு – ‘அப்பஸத்³தா³ ஆயஸ்மந்தோ ஹோத², தே²ரோ பி⁴க்கு² த⁴ம்மஞ்ச வினயஞ்ச ப⁴ணதீ’தி. தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘காஸிகவத்தூ²பமா ப⁴விஸ்ஸாம, ந பொத்த²கூபமா’தி 5. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. அட்ட²மங்.
‘‘Evarūpo cāyaṃ, bhikkhave, thero bhikkhu saṅghamajjhe bhaṇati . Tamenaṃ bhikkhū evamāhaṃsu – ‘appasaddā āyasmanto hotha, thero bhikkhu dhammañca vinayañca bhaṇatī’ti. Tasmātiha, bhikkhave, evaṃ sikkhitabbaṃ – ‘kāsikavatthūpamā bhavissāma, na potthakūpamā’ti 6. Evañhi vo, bhikkhave, sikkhitabba’’nti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. பொத்த²கஸுத்தவண்ணனா • 8. Potthakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. பொத்த²கஸுத்தவண்ணனா • 8. Potthakasuttavaṇṇanā
