| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. புப்³பே³ஸம்போ³த⁴ஸுத்தவண்ணனா
2. Pubbesambodhasuttavaṇṇanā
115. அயங் பத²வீதா⁴துங் நிஸ்ஸாய தங் ஆரப்³ப⁴ பவத்தோ அஸ்ஸாதோ³. ஏவங் பவத்தானந்தி ஏவங் காயே பபா⁴வஸ்ஸ பவேத³னவஸேனேவ பவத்தானங். ஹுத்வா அபா⁴வாகாரேனாதி புப்³பே³ அவிஜ்ஜமானா பச்சயஸாமக்³கி³யா ஹுத்வா உப்பஜ்ஜித்வா புன ப⁴ங்கு³பக³மனதோ உத்³த⁴ங் அபா⁴வாகாரேன. ந நிச்சாதி அனிச்சா அத்³து⁴வத்தா, து⁴வங் நிச்சங். படிபீளனாகாரேனாதி உத³யப்³ப³யவஸேன அபி⁴ண்ஹங் பீளனாகாரேன து³க்க²ட்டே²ன. ஸபா⁴வவிக³மாகாரேனாதி அத்தனோ ஸபா⁴வஸ்ஸ விக³ச்ச²னாகாரேன. ஸபா⁴வத⁴ம்மா ஹி அப்பமத்தங் க²ணங் பத்வா நிருஜ்ஜ²ந்தி. தஸ்மா தே ‘‘ஜராய மரணேன சா’’தி த்³வேதா⁴ விபரிணமந்தி. தேனாஹ ‘‘விபரிணாமத⁴ம்மா’’தி. ஆதீ³னங் வாதி பவத்தேதீதி ஆதீ³னவோ, பரமகாபஞ்ஞதா. வினீயதீதி வூபஸமீயதி. அச்சந்தப்பஹானவஸேன நிஸ்ஸரதி ஏதேனாதி நிஸ்ஸரணங்.
115. Ayaṃ pathavīdhātuṃ nissāya taṃ ārabbha pavatto assādo. Evaṃ pavattānanti evaṃ kāye pabhāvassa pavedanavaseneva pavattānaṃ. Hutvā abhāvākārenāti pubbe avijjamānā paccayasāmaggiyā hutvā uppajjitvā puna bhaṅgupagamanato uddhaṃ abhāvākārena. Na niccāti aniccā addhuvattā, dhuvaṃ niccaṃ. Paṭipīḷanākārenāti udayabbayavasena abhiṇhaṃ pīḷanākārena dukkhaṭṭhena. Sabhāvavigamākārenāti attano sabhāvassa vigacchanākārena. Sabhāvadhammā hi appamattaṃ khaṇaṃ patvā nirujjhanti. Tasmā te ‘‘jarāya maraṇena cā’’ti dvedhā vipariṇamanti. Tenāha ‘‘vipariṇāmadhammā’’ti. Ādīnaṃ vāti pavattetīti ādīnavo, paramakāpaññatā. Vinīyatīti vūpasamīyati. Accantappahānavasena nissarati etenāti nissaraṇaṃ.
ஸாயங் நிபன்னா ஸப்³ப³ரத்திங் கே²பெத்வா பாதோ உட்ட²ஹாம, மாஸபுண்ணக⁴டோ விய நோ ஸரீரங் நிஸ்ஸந்தா³பா⁴வதோ.
Sāyaṃ nipannā sabbarattiṃ khepetvā pāto uṭṭhahāma, māsapuṇṇaghaṭo viya no sarīraṃ nissandābhāvato.
பு²ஸிதமத்தேஸுபீதி உத³கஸ்ஸ பு²ஸிதமத்தேஸுபி.
Phusitamattesupīti udakassa phusitamattesupi.
அதினாமெந்தி காலங். ஏவங் வுத்தனயேன பவத்தா புக்³க³லா ஏதா பத²வீதா⁴துஆத³யோ அஸ்ஸாதெ³ந்தி நாம அபி⁴ரதிவஸேன தத்த² ஆகங்கு²ப்பாத³னதோ.
Atināmenti kālaṃ. Evaṃ vuttanayena pavattā puggalā etā pathavīdhātuādayo assādenti nāma abhirativasena tattha ākaṅkhuppādanato.
அபி⁴விஸிட்டே²ன ஞாணேனாதி அக்³க³மக்³க³ஞாணேன. ருக்கோ² போ³தி⁴ ‘‘பு³ஜ்ஜ²தி எத்தா²’’தி கத்வா. மக்³கோ³ போ³தி⁴ ‘‘பு³ஜ்ஜ²தி ஏதேனா’’தி கத்வா. ஸப்³ப³ஞ்ஞுதஞ்ஞாணங் போ³தி⁴ ஸம்மா ஸாமஞ்ச ஸப்³ப³த⁴ம்மானங் பு³ஜ்ஜ²னதோ. நிப்³பா³னங் போ³தி⁴ பு³ஜ்ஜி²தப்³ப³தோ. தேஸந்தி நித்³தா⁴ரணே ஸாமிவசனங். ஸாவகபாரமீஞாணந்தி ஸாவகபாரமீஞாணங் யாதா²வதோ த³ஸ்ஸனவத்து².
Abhivisiṭṭhena ñāṇenāti aggamaggañāṇena. Rukkho bodhi ‘‘bujjhati etthā’’ti katvā. Maggo bodhi ‘‘bujjhati etenā’’ti katvā. Sabbaññutaññāṇaṃ bodhi sammā sāmañca sabbadhammānaṃ bujjhanato. Nibbānaṃ bodhi bujjhitabbato. Tesanti niddhāraṇe sāmivacanaṃ. Sāvakapāramīñāṇanti sāvakapāramīñāṇaṃ yāthāvato dassanavatthu.
அகுப்பாதி படிபக்கே²ஹி அகோபேதப்³போ³. காரணதோதி அரியமக்³க³தோ. ததோ ஹிஸ்ஸ அகுப்பதா. தேனாஹ ‘‘ஸா ஹீ’’திஆதீ³. ஆரம்மணதோதி நிப்³பா³னாரம்மணதோ நிப்³பா³னாரம்மணானங் லோகியஸமாபத்தீனங் அபா⁴வதோ.
Akuppāti paṭipakkhehi akopetabbo. Kāraṇatoti ariyamaggato. Tato hissa akuppatā. Tenāha ‘‘sā hī’’tiādī. Ārammaṇatoti nibbānārammaṇato nibbānārammaṇānaṃ lokiyasamāpattīnaṃ abhāvato.
வித்தா²ரவஸேனாதி ஏகேகதா⁴துவஸேனாதி வத³ந்தி, ஏகேகிஸ்ஸா பன தா⁴துயா லக்க²ணவிப⁴த்தித³ஸ்ஸனவஸேன. யந்தி ஹேதுஅத்தே² நிபாதோ, யங் நிமித்தந்தி அத்தோ². அஸ்ஸாதே³தி ஏதேனாதி அஸ்ஸாதோ³, தண்ஹா. அயங் பத²வீதா⁴துயா அஸ்ஸாதோ³தி எத்த² அயங்-ஸத்³தோ³ ‘‘பஹானபடிவேதோ⁴’’தி எத்தா²பி ஆனெத்வா ஸம்ப³ந்தி⁴தப்³போ³ ‘‘அயங் பஹானபடிவேதோ⁴ படிவிஜ்ஜி²தப்³ப³ட்டே²ன ஸமுத³யஸச்ச’’ந்தி. ஏஸ நயோ ஸேஸஸச்சேஸுபி. யாதி யதா²வுத்தேஸு அஸ்ஸாதோ³ ஆதீ³னவோ நிஸ்ஸரணந்தி இமேஸு தீஸு டா²னேஸு பவத்தா யா தி³ட்டி²…பே॰… யோ ஸமாதி⁴, அயங் பா⁴வனாபடிவேதோ⁴ மக்³க³ஸச்சந்தி வுத்தனயேனேவ யோஜேதப்³ப³ங்.
Vitthāravasenāti ekekadhātuvasenāti vadanti, ekekissā pana dhātuyā lakkhaṇavibhattidassanavasena. Yanti hetuatthe nipāto, yaṃ nimittanti attho. Assādeti etenāti assādo, taṇhā. Ayaṃ pathavīdhātuyā assādoti ettha ayaṃ-saddo ‘‘pahānapaṭivedho’’ti etthāpi ānetvā sambandhitabbo ‘‘ayaṃ pahānapaṭivedho paṭivijjhitabbaṭṭhena samudayasacca’’nti. Esa nayo sesasaccesupi. Yāti yathāvuttesu assādo ādīnavo nissaraṇanti imesu tīsu ṭhānesu pavattā yā diṭṭhi…pe… yo samādhi, ayaṃ bhāvanāpaṭivedho maggasaccanti vuttanayeneva yojetabbaṃ.
புப்³பே³ஸம்போ³த⁴ஸுத்தவண்ணனா நிட்டி²தா.
Pubbesambodhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. புப்³பே³ஸம்போ³த⁴ஸுத்தங் • 2. Pubbesambodhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. புப்³பே³ஸம்போ³த⁴ஸுத்தவண்ணனா • 2. Pubbesambodhasuttavaṇṇanā
