| Library / Tipiṭaka / તિપિટક • Tipiṭaka / પરિવાર-અટ્ઠકથા • Parivāra-aṭṭhakathā |
ખન્ધકપુચ્છાવારો
Khandhakapucchāvāro
પુચ્છાવિસ્સજ્જનાવણ્ણના
Pucchāvissajjanāvaṇṇanā
૩૨૦. ઉપસમ્પદં પુચ્છિસ્સન્તિ ઉપસમ્પદક્ખન્ધકં પુચ્છિસ્સં. સનિદાનં સનિદ્દેસન્તિ નિદાનેન ચ નિદ્દેસેન ચ સદ્ધિં પુચ્છિસ્સામિ. સમુક્કટ્ઠપદાનં કતિ આપત્તિયોતિ યાનિ તત્થ સમુક્કટ્ઠાનિ ઉત્તમાનિ પદાનિ વુત્તાનિ, તેસં સમુક્કટ્ઠપદાનં ઉત્તમપદાનં સઙ્ખેપતો કતિ આપત્તિયો હોન્તીતિ. યેન યેન હિ પદેન યા યા આપત્તિ પઞ્ઞત્તા, સા સા તસ્સ તસ્સ પદસ્સ આપત્તીતિ વુચ્ચતિ. તેન વુત્તં ‘‘સમુક્કટ્ઠપદાનં કતિ આપત્તિયો’’તિ. દ્વે આપત્તિયોતિ ઊનવીસતિવસ્સં ઉપસમ્પાદેન્તસ્સ પાચિત્તિયં, સેસેસુ સબ્બપદેસુ દુક્કટં.
320.Upasampadaṃpucchissanti upasampadakkhandhakaṃ pucchissaṃ. Sanidānaṃ saniddesanti nidānena ca niddesena ca saddhiṃ pucchissāmi. Samukkaṭṭhapadānaṃ kati āpattiyoti yāni tattha samukkaṭṭhāni uttamāni padāni vuttāni, tesaṃ samukkaṭṭhapadānaṃ uttamapadānaṃ saṅkhepato kati āpattiyo hontīti. Yena yena hi padena yā yā āpatti paññattā, sā sā tassa tassa padassa āpattīti vuccati. Tena vuttaṃ ‘‘samukkaṭṭhapadānaṃ kati āpattiyo’’ti. Dve āpattiyoti ūnavīsativassaṃ upasampādentassa pācittiyaṃ, sesesu sabbapadesu dukkaṭaṃ.
તિસ્સોતિ ‘‘નસ્સન્તેતે વિનસ્સન્તેતે, કો તેહિ અત્થો’’તિ ભેદપુરેક્ખારાનં ઉપોસથકરણે થુલ્લચ્ચયં, ઉક્ખિત્તકેન સદ્ધિં ઉપોસથકરણે પાચિત્તિયં, સેસેસુ દુક્કટન્તિ એવં ઉપોસથક્ખન્ધકે તિસ્સો આપત્તિયો. એકાતિ વસ્સૂપનાયિકક્ખન્ધકે એકા દુક્કટાપત્તિયેવ.
Tissoti ‘‘nassantete vinassantete, ko tehi attho’’ti bhedapurekkhārānaṃ uposathakaraṇe thullaccayaṃ, ukkhittakena saddhiṃ uposathakaraṇe pācittiyaṃ, sesesu dukkaṭanti evaṃ uposathakkhandhake tisso āpattiyo. Ekāti vassūpanāyikakkhandhake ekā dukkaṭāpattiyeva.
તિસ્સોતિ ભેદપુરેક્ખારસ્સ પવારયતો થુલ્લચ્ચયં, ઉક્ખિત્તકેન સદ્ધિં પાચિત્તિયં, સેસેસુ દુક્કટન્તિ એવં પવારણાક્ખન્ધકેપિ તિસ્સો આપત્તિયો.
Tissoti bhedapurekkhārassa pavārayato thullaccayaṃ, ukkhittakena saddhiṃ pācittiyaṃ, sesesu dukkaṭanti evaṃ pavāraṇākkhandhakepi tisso āpattiyo.
તિસ્સોતિ વચ્છતરિં ઉગ્ગહેત્વા મારેન્તાનં પાચિત્તિયં, રત્તેન ચિત્તેન અઙ્ગજાતછુપને થુલ્લચ્ચયં, સેસેસુ દુક્કટન્તિ એવં ચમ્મસંયુત્તેપિ તિસ્સો આપત્તિયો. ભેસજ્જક્ખન્ધકેપિ સમન્તા દ્વઙ્ગુલે થુલ્લચ્ચયં, ભોજ્જયાગુયા પાચિત્તિયં, સેસેસુ દુક્કટન્તિ એવં તિસ્સો આપત્તિયો.
Tissoti vacchatariṃ uggahetvā mārentānaṃ pācittiyaṃ, rattena cittena aṅgajātachupane thullaccayaṃ, sesesu dukkaṭanti evaṃ cammasaṃyuttepi tisso āpattiyo. Bhesajjakkhandhakepi samantā dvaṅgule thullaccayaṃ, bhojjayāguyā pācittiyaṃ, sesesu dukkaṭanti evaṃ tisso āpattiyo.
કથિનં કેવલં પઞ્ઞત્તિમેવ, નત્થિ તત્થ આપત્તિ. ચીવરસંયુત્તે કુસચીરવાકચીરેસુ થુલ્લચ્ચયં, અતિરેકચીવરે નિસ્સગ્ગિયં, સેસેસુ દુક્કટન્તિ ઇમા તિસ્સો આપત્તિયો.
Kathinaṃ kevalaṃ paññattimeva, natthi tattha āpatti. Cīvarasaṃyutte kusacīravākacīresu thullaccayaṃ, atirekacīvare nissaggiyaṃ, sesesu dukkaṭanti imā tisso āpattiyo.
ચમ્પેય્યકે એકા દુક્કટાપત્તિયેવ. કોસમ્બક-કમ્મક્ખન્ધક-પારિવાસિકસમુચ્ચયક્ખન્ધકેસુપિ એકા દુક્કટાપત્તિયેવ.
Campeyyake ekā dukkaṭāpattiyeva. Kosambaka-kammakkhandhaka-pārivāsikasamuccayakkhandhakesupi ekā dukkaṭāpattiyeva.
સમથક્ખન્ધકે છન્દદાયકો ખિય્યતિ, ખિય્યનકં પાચિત્તિયં, સેસેસુ દુક્કટન્તિ ઇમા દ્વે આપત્તિયો. ખુદ્દકવત્થુકે અત્તનો અઙ્ગજાતં છિન્દતિ, થુલ્લચ્ચયં, રોમટ્ઠે પાચિત્તિયં, સેસેસુ દુક્કટન્તિ ઇમા તિસ્સો આપત્તિયો. સેનાસનક્ખન્ધકે ગરુભણ્ડવિસ્સજ્જને થુલ્લચ્ચયં, સઙ્ઘિકા વિહારા નિક્કડ્ઢને પાચિત્તિયં, સેસેસુ દુક્કટન્તિ ઇમા તિસ્સો આપત્તિયો.
Samathakkhandhake chandadāyako khiyyati, khiyyanakaṃ pācittiyaṃ, sesesu dukkaṭanti imā dve āpattiyo. Khuddakavatthuke attano aṅgajātaṃ chindati, thullaccayaṃ, romaṭṭhe pācittiyaṃ, sesesu dukkaṭanti imā tisso āpattiyo. Senāsanakkhandhake garubhaṇḍavissajjane thullaccayaṃ, saṅghikā vihārā nikkaḍḍhane pācittiyaṃ, sesesu dukkaṭanti imā tisso āpattiyo.
સઙ્ઘભેદેભેદકાનુવત્તકાનં થુલ્લચ્ચયં, ગણભોજને પાચિત્તિયન્તિ ઇમા દ્વે આપત્તિયો. સમાચારં પુચ્છિસ્સન્તિ વુત્તે વત્તક્ખન્ધકે એકા દુક્કટાપત્તિયેવ. સા સબ્બવત્તેસુ અનાદરિયેન હોતિ. તથા પાતિમોક્ખટ્ઠપને. ભિક્ખુનિક્ખન્ધકે અપ્પવારણાય પાચિત્તિયં, સેસેસુ દુક્કટન્તિ દ્વે આપત્તિયો. પઞ્ચસતિકસત્તસતિકેસુ કેવલં ધમ્મો સઙ્ગહં આરોપિતો, નત્થિ તત્થ આપત્તીતિ.
Saṅghabhedebhedakānuvattakānaṃ thullaccayaṃ, gaṇabhojane pācittiyanti imā dve āpattiyo. Samācāraṃ pucchissanti vutte vattakkhandhake ekā dukkaṭāpattiyeva. Sā sabbavattesu anādariyena hoti. Tathā pātimokkhaṭṭhapane. Bhikkhunikkhandhake appavāraṇāya pācittiyaṃ, sesesu dukkaṭanti dve āpattiyo. Pañcasatikasattasatikesu kevalaṃ dhammo saṅgahaṃ āropito, natthi tattha āpattīti.
ખન્ધકપુચ્છાવારવણ્ણના નિટ્ઠિતા.
Khandhakapucchāvāravaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ખન્ધકપુચ્છાવારો • Khandhakapucchāvāro
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / પુચ્છાવિસ્સજ્જનાવણ્ણના • Pucchāvissajjanāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / પુચ્છાવિસ્સજ્જનાવણ્ણના • Pucchāvissajjanāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / પુચ્છાવિસ્સજ્જનાવણ્ણના • Pucchāvissajjanāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / પુચ્છાવિસ્સજ્જનાવણ્ણના • Pucchāvissajjanāvaṇṇanā
