| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. ததியவக்³கோ³
3. Tatiyavaggo
1. புக்³க³லஸுத்தவண்ணனா
1. Puggalasuttavaṇṇanā
132. ‘‘நீசே குலே பச்சாஜாதோ’’திஆதி³ அப்பகாஸனபா⁴வேன தமதீதி தமோ, தேன தமேன யுத்தோதி தமோ புக்³க³லோ வுச்சதி, தங்யோக³தோ புக்³க³லஸ்ஸ தப்³போ³ஹாரோ யதா² ‘‘மச்சே²ரயோக³தோ மச்சே²ரோ’’தி. தஸ்மா தமோதி அப்பகாஸனபா⁴வேன தமோ தமபூ⁴தோ அந்த⁴காரோ விய ஜாதோ, அந்த⁴காரத்தங் வா பத்தோதி அத்தோ². வுத்தலக்க²ணங் தமமேவ பரம்பரதோ அயனங் க³தி நிட்டா² ஏதஸ்ஸாதி தமபராயணோ, தமபராயணதங் வா பத்தோதி அத்தோ². ஞாயேனபி தமக்³க³ஹணேன க²ந்த⁴தமோவ கதி²தோ, ந அந்த⁴காரதமோ. க²ந்த⁴தமோதி ச ஸம்பத்திரஹிதா க²ந்த⁴பவத்தியேவ த³ட்ட²ப்³பா³. ‘‘உச்சே குலே பச்சாஜாதோ’’திஆதி³ பகாஸனபா⁴வேன ஜோதேதீதி ஜோதி, தேன ஜோதினா யுத்தோதிஆதி³ ஸப்³ப³ங் தமே வுத்தனயேனேவ வேதி³தப்³ப³ங். இதரே த்³வேதி ஜோதிதமபராயணோ ஜோதிஜோதிபராயணோதி இதரே த்³வே புக்³க³லே.
132. ‘‘Nīce kule paccājāto’’tiādi appakāsanabhāvena tamatīti tamo, tena tamena yuttoti tamo puggalo vuccati, taṃyogato puggalassa tabbohāro yathā ‘‘maccherayogato macchero’’ti. Tasmā tamoti appakāsanabhāvena tamo tamabhūto andhakāro viya jāto, andhakārattaṃ vā pattoti attho. Vuttalakkhaṇaṃ tamameva paramparato ayanaṃ gati niṭṭhā etassāti tamaparāyaṇo, tamaparāyaṇataṃ vā pattoti attho. Ñāyenapi tamaggahaṇena khandhatamova kathito, na andhakāratamo. Khandhatamoti ca sampattirahitā khandhapavattiyeva daṭṭhabbā. ‘‘Ucce kule paccājāto’’tiādi pakāsanabhāvena jotetīti joti, tena jotinā yuttotiādi sabbaṃ tame vuttanayeneva veditabbaṃ. Itare dveti jotitamaparāyaṇo jotijotiparāyaṇoti itare dve puggale.
வேணுவெத்தாதி³கேஹி பேளாதி³காரகா விலீவகாரகா. மிக³மச்சா²தீ³னங் நிஸாத³னதோ நேஸாதா³, மாக³விகமச்ச²ப³ந்தா⁴த³யோ. ரதே²ஸு சம்மேன ஹனநகரணதோ ரத²காரா சம்மகாரா வுத்தா. ‘‘பு’’ இதி கரீஸஸ்ஸ நாமங், தங் குஸெந்தி அபனெந்தீதி புக்குஸா, புப்ப²ச²ட்³ட³கா. து³ப்³ப³ண்ணோதி விரூபோ. ஓகோடிமகோதி ஆரோஹாபா⁴வேன ஹெட்டி²மகோடிகோ, ரஸ்ஸகாயோதி அத்தோ². தேனாஹ ‘‘லகுண்ட³கோ’’தி. லகு விய க⁴டிகா விய டே³தி பவத்ததீதி ஹி லகுண்ட³கோ, ரஸ்ஸோ. கணதி நிமீலதீதி காணோ. தங் பனஸ்ஸ நிமீலனங் ஏகேன அக்கி²னா த்³வீஹிபி வாதி ஆஹ ‘‘ஏகக்கி²காணோ வா உப⁴யக்கி²காணோ வா’’தி. குணனங் குணோ, ஹத்த²வேகல்லங், ஸோ ஏதஸ்ஸ அத்தீ²தி குணீ. க²ஞ்ஜோ வுச்சதி பாத³விகலோ. ஹெட்டி²மகாயஸங்கா²தோ ஸரீரஸ்ஸ பக்கோ² பதே³ஸோ ஹதோ அஸ்ஸாதி பக்க²ஹதோ. தேனாஹ ‘‘பீட²ஸம்பீ’’தி. பதீ³பே பதீ³பனே ஏதப்³ப³ங் நேதப்³ப³ந்தி பதீ³பெய்யங், தேலகபல்லாதி³உபகரணங். வுத்தந்தி அட்ட²கதா²யங் வுத்தங்.
Veṇuvettādikehi peḷādikārakā vilīvakārakā. Migamacchādīnaṃ nisādanato nesādā, māgavikamacchabandhādayo. Rathesu cammena hananakaraṇato rathakārā cammakārā vuttā. ‘‘Pu’’ iti karīsassa nāmaṃ, taṃ kusenti apanentīti pukkusā, pupphachaḍḍakā. Dubbaṇṇoti virūpo. Okoṭimakoti ārohābhāvena heṭṭhimakoṭiko, rassakāyoti attho. Tenāha ‘‘lakuṇḍako’’ti. Laku viya ghaṭikā viya ḍeti pavattatīti hi lakuṇḍako, rasso. Kaṇati nimīlatīti kāṇo. Taṃ panassa nimīlanaṃ ekena akkhinā dvīhipi vāti āha ‘‘ekakkhikāṇo vā ubhayakkhikāṇo vā’’ti. Kuṇanaṃ kuṇo, hatthavekallaṃ, so etassa atthīti kuṇī. Khañjo vuccati pādavikalo. Heṭṭhimakāyasaṅkhāto sarīrassa pakkho padeso hato assāti pakkhahato. Tenāha ‘‘pīṭhasampī’’ti. Padīpe padīpane etabbaṃ netabbanti padīpeyyaṃ, telakapallādiupakaraṇaṃ. Vuttanti aṭṭhakathāyaṃ vuttaṃ.
ஆக³மனவிபத்தீதி ஆக³மனட்டா²னவஸேன விபத்தி ஆக³மோ எத்தா²தி கத்வா. புப்³பு³ப்பன்னபச்சயவிபத்தீதி பட²முப்பன்னபச்சயவஸேன விபத்தி. சண்டா³லாதி³ஸபா⁴வா ஹிஸ்ஸ மாதாபிதரோ பட²முப்பன்னபச்சயா, பட²முப்பத்தியா வா பச்சயா, தேஹேவஸ்ஸ விபத்தி ஏவ, ந ஸம்பத்தி. பவத்தபச்சயவிபத்தீதி பவத்தே ஸுக²பச்சயவிபத்தி. தாதி³ஸே நிஹீனகுலே உப்பன்னோபி கோசி விப⁴வஸம்பன்னோ ஸியா, அயங் பன து³க்³க³தோ து³ரூபோ ஹோதி. ஆஜீவுபாயவிபத்தீதி ஆஜீவனுபாயவஸேன விபத்தி. ஸுகே²ன ஹி ஜீவிகங் பவத்தேதுங் உபாயபூ⁴தா ஹத்தி²ஸிப்பாத³யோ இமஸ்ஸ நத்தி², புப்ப²ச²ட்³ட³கஸிலாகொட்டனாதி³கம்மங் பன கத்வா ஜீவிகங் பவத்தேதி. தேனாஹ ‘‘கஸிரவுத்திகே’’தி. அத்தபா⁴வவிபத்தீதி உபதி⁴விபத்தி. து³க்க²காரணஸமாயோகோ³தி காயிகசேதஸிகது³க்கு²ப்பத்தியா பச்சயஸமோதா⁴னங். ஸுக²காரணவிபத்தீதி ஸுக²பச்சயபரிஹானி. உபபோ⁴க³விபத்தீதி உபபோ⁴க³ஸுக²ஸ்ஸ வினாஸோ அனுபலத்³தி⁴. ஜோதி சேவ ஜோதிபராயணபா⁴வோ ச ஸுக்கபக்கோ².
Āgamanavipattīti āgamanaṭṭhānavasena vipatti āgamo etthāti katvā. Pubbuppannapaccayavipattīti paṭhamuppannapaccayavasena vipatti. Caṇḍālādisabhāvā hissa mātāpitaro paṭhamuppannapaccayā, paṭhamuppattiyā vā paccayā, tehevassa vipatti eva, na sampatti. Pavattapaccayavipattīti pavatte sukhapaccayavipatti. Tādise nihīnakule uppannopi koci vibhavasampanno siyā, ayaṃ pana duggato durūpo hoti. Ājīvupāyavipattīti ājīvanupāyavasena vipatti. Sukhena hi jīvikaṃ pavattetuṃ upāyabhūtā hatthisippādayo imassa natthi, pupphachaḍḍakasilākoṭṭanādikammaṃ pana katvā jīvikaṃ pavatteti. Tenāha ‘‘kasiravuttike’’ti. Attabhāvavipattīti upadhivipatti. Dukkhakāraṇasamāyogoti kāyikacetasikadukkhuppattiyā paccayasamodhānaṃ. Sukhakāraṇavipattīti sukhapaccayaparihāni. Upabhogavipattīti upabhogasukhassa vināso anupaladdhi. Joti ceva jotiparāyaṇabhāvo ca sukkapakkho.
த³ஸஹி அக்கோஸவத்தூ²ஹீதி லக்க²ணவசனங் ஏதங் யதா² ‘‘யதி³ மே ப்³யாதி⁴தா ஹொந்தி, தா³தப்³ப³மித³மோஸத⁴’’ந்தி, தஸ்மா த³ஸஹி அக்கோஸவத்தூ²ஹி, தத்த² வா யேன கேனசி பரிபா⁴ஸதீதி அத்தோ². ஏகக்³க³சித்தோதி தா³னங் தா³துங் அபெக்கி²ததாய ஸமாஹிதசித்தோ.
Dasahi akkosavatthūhīti lakkhaṇavacanaṃ etaṃ yathā ‘‘yadi me byādhitā honti, dātabbamidamosadha’’nti, tasmā dasahi akkosavatthūhi, tattha vā yena kenaci paribhāsatīti attho. Ekaggacittoti dānaṃ dātuṃ apekkhitatāya samāhitacitto.
புக்³க³லஸுத்தவண்ணனா நிட்டி²தா.
Puggalasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. புக்³க³லஸுத்தங் • 1. Puggalasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. புக்³க³லஸுத்தவண்ணனா • 1. Puggalasuttavaṇṇanā
