| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૨. પુણ્ણકત્થેરઅપદાનવણ્ણના
2. Puṇṇakattheraapadānavaṇṇanā
૨૯. દુતિયાપદાને પબ્ભારકૂટં નિસ્સાયાતિઆદિકં આયસ્મતો પુણ્ણકત્થેરસ્સ અપદાનં. તત્થ હિમવન્તે યક્ખસેનાપતિ હુત્વા પરિનિબ્બુતસ્સ પચ્ચેકબુદ્ધસ્સ આળહનકરણમેવ નાનત્તં. સેસં પાઠાનુસારેન સુવિઞ્ઞેય્યમેવ.
29. Dutiyāpadāne pabbhārakūṭaṃ nissāyātiādikaṃ āyasmato puṇṇakattherassa apadānaṃ. Tattha himavante yakkhasenāpati hutvā parinibbutassa paccekabuddhassa āḷahanakaraṇameva nānattaṃ. Sesaṃ pāṭhānusārena suviññeyyameva.
૪૫. તતિયાપદાને હિમવન્તસ્સાવિદૂરેતિઆદિકં આયસ્મતો મેત્તગુત્થેરસ્સ અપદાનં. તત્થ હિમવન્તસમીપે અસોકપબ્બતે સો તાપસો હુત્વા પણ્ણસાલાયં વસન્તો સુમેધસમ્બુદ્ધં દિસ્વા પત્તં ગહેત્વા સપ્પિપૂરણં વિસેસો. સેસં પુઞ્ઞફલાનિ ચ સુવિઞ્ઞેય્યાનેવ. અપદાનગાથાનં અત્થો ચ પાકટોયેવ.
45. Tatiyāpadāne himavantassāvidūretiādikaṃ āyasmato mettaguttherassa apadānaṃ. Tattha himavantasamīpe asokapabbate so tāpaso hutvā paṇṇasālāyaṃ vasanto sumedhasambuddhaṃ disvā pattaṃ gahetvā sappipūraṇaṃ viseso. Sesaṃ puññaphalāni ca suviññeyyāneva. Apadānagāthānaṃ attho ca pākaṭoyeva.
૭૨. ચતુત્થાપદાને ગઙ્ગા ભાગીરથી નામાતિઆદિકં આયસ્મતો ધોતકત્થેરસ્સ અપદાનં. તત્રાપિ બ્રાહ્મણો હુત્વા ભાગીરથીગઙ્ગાય તરમાને ભિક્ખૂ દિસ્વા પસન્નમાનસો સેતું કારાપેત્વા બુદ્ધપ્પમુખસ્સ ભિક્ખુસઙ્ઘસ્સ નિય્યાદિતભાવોયેવ વિસેસો. પુઞ્ઞફલપરિદીપનગાથાનં અત્થો નયાનુસારેન સુવિઞ્ઞેય્યોવ.
72. Catutthāpadāne gaṅgā bhāgīrathī nāmātiādikaṃ āyasmato dhotakattherassa apadānaṃ. Tatrāpi brāhmaṇo hutvā bhāgīrathīgaṅgāya taramāne bhikkhū disvā pasannamānaso setuṃ kārāpetvā buddhappamukhassa bhikkhusaṅghassa niyyāditabhāvoyeva viseso. Puññaphalaparidīpanagāthānaṃ attho nayānusārena suviññeyyova.
૧૦૦. પઞ્ચમાપદાને હિમવન્તસ્સાવિદૂરેતિઆદિકં આયસ્મતો ઉપસિવત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં પહાય ઇસિપબ્બજ્જં પબ્બજિત્વા હિમવન્તે પદુમુત્તરં ભગવન્તં દિસ્વા તિણસન્થરં સન્થરિત્વા તત્થ નિસિન્નસ્સ ભગવતો સાલપુપ્ફપૂજં અકાસીતિ અયં વિસેસો, સેસમુત્તાનમેવ.
100. Pañcamāpadāne himavantassāvidūretiādikaṃ āyasmato upasivattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharāvāsaṃ pahāya isipabbajjaṃ pabbajitvā himavante padumuttaraṃ bhagavantaṃ disvā tiṇasantharaṃ santharitvā tattha nisinnassa bhagavato sālapupphapūjaṃ akāsīti ayaṃ viseso, sesamuttānameva.
૧૬૧. છટ્ઠાપદાને મિગલુદ્દો પુરે આસિન્તિઆદિકં આયસ્મતો નન્દકત્થેરસ્સ અપદાનં. અયં કિર પદુમુત્તરસ્સ ભગવતો કાલે કરવિકસકુણો હુત્વા મધુરકૂજિતં કરોન્તો સત્થારં પદક્ખિણં અકાસિ. અપરભાગે મયૂરો હુત્વા અઞ્ઞતરસ્સ પચ્ચેકબુદ્ધસ્સ વસનગુહાદ્વારે પસન્નમાનસો દિવસસ્સ તિક્ખત્તું મધુરેન વસ્સિતં વસ્સિ. એવં તત્થ તત્થ ભવે પુઞ્ઞાનિ કત્વા અમ્હાકં ભગવતો કાલે સાવત્થિયં કુલગેહે નિબ્બત્તો નન્દકોતિ લદ્ધનામો સત્થુ સન્તિકે ધમ્મં સુત્વા પબ્બજિત્વા વિપસ્સનં વડ્ઢેત્વા અરહત્તં પાપુણિ. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો મિગલુદ્દો પુરે આસિન્તિઆદિમાહ. તત્થ પચ્ચેકબુદ્ધસ્સ મણ્ડપં કત્વા પદુમપુપ્ફેહિ છદનમેવ વિસેસો.
161. Chaṭṭhāpadāne migaluddo pure āsintiādikaṃ āyasmato nandakattherassa apadānaṃ. Ayaṃ kira padumuttarassa bhagavato kāle karavikasakuṇo hutvā madhurakūjitaṃ karonto satthāraṃ padakkhiṇaṃ akāsi. Aparabhāge mayūro hutvā aññatarassa paccekabuddhassa vasanaguhādvāre pasannamānaso divasassa tikkhattuṃ madhurena vassitaṃ vassi. Evaṃ tattha tattha bhave puññāni katvā amhākaṃ bhagavato kāle sāvatthiyaṃ kulagehe nibbatto nandakoti laddhanāmo satthu santike dhammaṃ sutvā pabbajitvā vipassanaṃ vaḍḍhetvā arahattaṃ pāpuṇi. So aparabhāge attano pubbakammaṃ saritvā somanassajāto pubbacaritāpadānaṃ pakāsento migaluddo pure āsintiādimāha. Tattha paccekabuddhassa maṇḍapaṃ katvā padumapupphehi chadanameva viseso.
૧૮૩. સત્તમાપદાને પબ્ભારકૂટં નિસ્સાયાતિઆદિકં આયસ્મતો હેમકત્થેરસ્સ અપદાનં. તત્થાપિ ઇસિપબ્બજ્જં પબ્બજિત્વા હિમવન્તે વસન્તો પિયદસ્સિં ભગવન્તં ઉપગતં દિસ્વા રતનમયં પીઠં અત્થરિત્વા અટ્ઠાસિ. તત્થ નિસિન્નસ્સ કુમ્ભમત્તં જમ્બુફલં આહરિત્વા અદાસિ. ભગવા તસ્સ ચિત્તપ્પસાદત્થાય તં ફલં પરિભુઞ્જિ. એત્તકમેવ વિસેસો.
183. Sattamāpadāne pabbhārakūṭaṃ nissāyātiādikaṃ āyasmato hemakattherassa apadānaṃ. Tatthāpi isipabbajjaṃ pabbajitvā himavante vasanto piyadassiṃ bhagavantaṃ upagataṃ disvā ratanamayaṃ pīṭhaṃ attharitvā aṭṭhāsi. Tattha nisinnassa kumbhamattaṃ jambuphalaṃ āharitvā adāsi. Bhagavā tassa cittappasādatthāya taṃ phalaṃ paribhuñji. Ettakameva viseso.
૨૨૪. અટ્ઠમાપદાને રાજાસિ વિજયો નામાતિઆદિકં આયસ્મતો તોદેય્યત્થેરસ્સ અપદાનં. તત્થ રાજાસિ વિજયો નામાતિ દહરકાલતો પટ્ઠાય સબ્બસઙ્ગામેસુ જિનતો, ચતૂહિ સઙ્ગહવત્થૂહિ જનં રઞ્જનતો અલ્લીયનતો વિજયો નામ રાજા અહોસીતિ અત્થો. કેતુમતીપુરુત્તમેતિ કેતુ વુચ્ચન્તિ ધજપટાકા. અથ વા નગરસોભનત્થાય નગરમજ્ઝે ઉસ્સાપિતરતનતોરણાનિ, તે કેતૂ નિચ્ચં ઉસ્સાપિતા સોભયમાના અસ્સા અત્થીતિ કેતુમતી. પૂરેતિ ધનધઞ્ઞેહિ સબ્બજનાનં મનન્તિ પુરં. કેતુમતી ચ સા પુરઞ્ચ સેટ્ઠટ્ઠેન ઉત્તમઞ્ચેતિ કેતુમતીપુરુત્તમં, તસ્મિં કેતુમતીપુરુત્તમે. સૂરો વિક્કમસમ્પન્નોતિ અભીતો વીરિયસમ્પન્નો વિજયો નામ રાજા અજ્ઝાવસીતિ સમ્બન્ધો. ઇત્થં ભૂતં પુરઞ્ચ સબ્બવત્થુવાહનઞ્ચ છડ્ડેત્વા હિમવન્તં પવિસિત્વા ઇસિપબ્બજ્જં પબ્બજિત્વા વસન્તો સુમેધભગવન્તં દિસ્વા સોમનસ્સં ઉપ્પાદેત્વા ચન્દનેન પૂજાકરણમેવ વિસેસો.
224. Aṭṭhamāpadāne rājāsi vijayo nāmātiādikaṃ āyasmato todeyyattherassa apadānaṃ. Tattha rājāsi vijayo nāmāti daharakālato paṭṭhāya sabbasaṅgāmesu jinato, catūhi saṅgahavatthūhi janaṃ rañjanato allīyanato vijayo nāma rājā ahosīti attho. Ketumatīpuruttameti ketu vuccanti dhajapaṭākā. Atha vā nagarasobhanatthāya nagaramajjhe ussāpitaratanatoraṇāni, te ketū niccaṃ ussāpitā sobhayamānā assā atthīti ketumatī. Pūreti dhanadhaññehi sabbajanānaṃ mananti puraṃ. Ketumatī ca sā purañca seṭṭhaṭṭhena uttamañceti ketumatīpuruttamaṃ, tasmiṃ ketumatīpuruttame. Sūro vikkamasampannoti abhīto vīriyasampanno vijayo nāma rājā ajjhāvasīti sambandho. Itthaṃ bhūtaṃ purañca sabbavatthuvāhanañca chaḍḍetvā himavantaṃ pavisitvā isipabbajjaṃ pabbajitvā vasanto sumedhabhagavantaṃ disvā somanassaṃ uppādetvā candanena pūjākaraṇameva viseso.
૨૭૬. નવમાપદાને નગરે હંસવતિયાતિઆદિકં આયસ્મતો જતુકણ્ણિત્થેરસ્સ અપદાનં . તત્થ સેટ્ઠિપુત્તો હુત્વા સુવણ્ણપાસાદે વસનભાવો ચ પઞ્ચહિ કામગુણેહિ સમઙ્ગી હુત્વા વસનભાવો ચ સબ્બદેસવાસીનં સબ્બસિપ્પવિઞ્ઞૂનઞ્ચ આગન્ત્વા સેવનભાવો ચ વિસેસો.
276. Navamāpadāne nagare haṃsavatiyātiādikaṃ āyasmato jatukaṇṇittherassa apadānaṃ . Tattha seṭṭhiputto hutvā suvaṇṇapāsāde vasanabhāvo ca pañcahi kāmaguṇehi samaṅgī hutvā vasanabhāvo ca sabbadesavāsīnaṃ sabbasippaviññūnañca āgantvā sevanabhāvo ca viseso.
૩૩૦. દસમાપદાને હિમવન્તસ્સાવિદૂરેતિઆદિકં આયસ્મતો ઉદેનત્થેરસ્સ અપદાનં. તત્થ હિમવન્તસમીપે પદુમપબ્બતં નિસ્સાય તાપસપબ્બજ્જં પબ્બજિત્વા વસન્તેન પદુમુત્તરસ્સ ભગવતો પદુમપુપ્ફં ગહેત્વા પૂજિતભાવોવ વિસેસો. સેસં સબ્બત્થ ઉત્તાનમેવાતિ.
330. Dasamāpadāne himavantassāvidūretiādikaṃ āyasmato udenattherassa apadānaṃ. Tattha himavantasamīpe padumapabbataṃ nissāya tāpasapabbajjaṃ pabbajitvā vasantena padumuttarassa bhagavato padumapupphaṃ gahetvā pūjitabhāvova viseso. Sesaṃ sabbattha uttānamevāti.
એકચત્તાલીસમવગ્ગવણ્ણના સમત્તા.
Ekacattālīsamavaggavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi
૨. પુણ્ણકત્થેરઅપદાનં • 2. Puṇṇakattheraapadānaṃ
૩. મેત્તગુત્થેરઅપદાનં • 3. Mettaguttheraapadānaṃ
૪. ધોતકત્થેરઅપદાનં • 4. Dhotakattheraapadānaṃ
૫. ઉપસીવત્થેરઅપદાનં • 5. Upasīvattheraapadānaṃ
૬. નન્દકત્થેરઅપદાનં • 6. Nandakattheraapadānaṃ
૭. હેમકત્થેરઅપદાનં • 7. Hemakattheraapadānaṃ
૮. તોદેય્યત્થેરઅપદાનં • 8. Todeyyattheraapadānaṃ
૯. જતુકણ્ણિત્થેરઅપદાનં • 9. Jatukaṇṇittheraapadānaṃ
૧૦. ઉદેનત્થેરઅપદાનં • 10. Udenattheraapadānaṃ
