6. புஞ்ஞகிரியவத்து²ஸுத்தங்

6. Puññakiriyavatthusuttaṃ

36. ‘‘தீணிமானி, பி⁴க்க²வே, புஞ்ஞகிரியவத்தூ²னி. கதமானி தீணி? தா³னமயங் புஞ்ஞகிரியவத்து² ¹, ஸீலமயங் புஞ்ஞகிரியவத்து², பா⁴வனாமயங் புஞ்ஞகிரியவத்து². இத⁴, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² பரித்தங் கதங் ஹோதி, ஸீலமயங் புஞ்ஞகிரியவத்து² பரித்தங் கதங் ஹோதி, பா⁴வனாமயங் புஞ்ஞகிரியவத்து²ங் ² நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா மனுஸ்ஸதோ³ப⁴க்³யங் உபபஜ்ஜதி.

36. ‘‘Tīṇimāni, bhikkhave, puññakiriyavatthūni. Katamāni tīṇi? Dānamayaṃ puññakiriyavatthu ³, sīlamayaṃ puññakiriyavatthu, bhāvanāmayaṃ puññakiriyavatthu. Idha, bhikkhave, ekaccassa dānamayaṃ puññakiriyavatthu parittaṃ kataṃ hoti, sīlamayaṃ puññakiriyavatthu parittaṃ kataṃ hoti, bhāvanāmayaṃ puññakiriyavatthuṃ ⁴ nābhisambhoti. So kāyassa bhedā paraṃ maraṇā manussadobhagyaṃ upapajjati.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² மத்தஸோ கதங் ஹோதி, ஸீலமயங் புஞ்ஞகிரியவத்து² மத்தஸோ கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா மனுஸ்ஸஸோப⁴க்³யங் உபபஜ்ஜதி.

‘‘Idha pana, bhikkhave, ekaccassa dānamayaṃ puññakiriyavatthu mattaso kataṃ hoti, sīlamayaṃ puññakiriyavatthu mattaso kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā manussasobhagyaṃ upapajjati.

‘‘இத⁴ பன, பி⁴க்க²வே , ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங் உபபஜ்ஜதி. தத்ர, பி⁴க்க²வே, சத்தாரோ மஹாராஜானோ தா³னமயங் புஞ்ஞகிரியவத்து²ங் அதிரேகங் கரித்வா, ஸீலமயங் புஞ்ஞகிரியவத்து²ங் அதிரேகங் கரித்வா, சாதுமஹாராஜிகே தே³வே த³ஸஹி டா²னேஹி அதி⁴க³ண்ஹந்தி – தி³ப்³பே³ன ஆயுனா, தி³ப்³பே³ன வண்ணேன, தி³ப்³பே³ன ஸுகே²ன, தி³ப்³பே³ன யஸேன, தி³ப்³பே³ன ஆதி⁴பதெய்யேன, தி³ப்³பே³ஹி ரூபேஹி, தி³ப்³பே³ஹி ஸத்³தே³ஹி, தி³ப்³பே³ஹி க³ந்தே⁴ஹி, தி³ப்³பே³ஹி ரஸேஹி, தி³ப்³பே³ஹி பொ²ட்ட²ப்³பே³ஹி.

‘‘Idha pana, bhikkhave , ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā cātumahārājikānaṃ devānaṃ sahabyataṃ upapajjati. Tatra, bhikkhave, cattāro mahārājāno dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, cātumahārājike deve dasahi ṭhānehi adhigaṇhanti – dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா தாவதிங்ஸானங் தே³வானங் ஸஹப்³யதங் உபபஜ்ஜதி. தத்ர, பி⁴க்க²வே, ஸக்கோ தே³வானமிந்தோ³ தா³னமயங் புஞ்ஞகிரியவத்து²ங் அதிரேகங் கரித்வா ஸீலமயங் புஞ்ஞகிரியவத்து²ங் அதிரேகங் கரித்வா தாவதிங்ஸே தே³வே த³ஸஹி டா²னேஹி அதி⁴க³ண்ஹாதி – தி³ப்³பே³ன ஆயுனா…பே॰… தி³ப்³பே³ஹி பொ²ட்ட²ப்³பே³ஹி.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā tāvatiṃsānaṃ devānaṃ sahabyataṃ upapajjati. Tatra, bhikkhave, sakko devānamindo dānamayaṃ puññakiriyavatthuṃ atirekaṃ karitvā sīlamayaṃ puññakiriyavatthuṃ atirekaṃ karitvā tāvatiṃse deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா யாமானங் தே³வானங் ஸஹப்³யதங் உபபஜ்ஜதி. தத்ர, பி⁴க்க²வே, ஸுயாமோ தே³வபுத்தோ தா³னமயங் புஞ்ஞகிரியவத்து²ங் அதிரேகங் கரித்வா , ஸீலமயங் புஞ்ஞகிரியவத்து²ங் அதிரேகங் கரித்வா, யாமே தே³வே த³ஸஹி டா²னேஹி அதி⁴க³ண்ஹாதி – தி³ப்³பே³ன ஆயுனா…பே॰… தி³ப்³பே³ஹி பொ²ட்ட²ப்³பே³ஹி.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā yāmānaṃ devānaṃ sahabyataṃ upapajjati. Tatra, bhikkhave, suyāmo devaputto dānamayaṃ puññakiriyavatthuṃ atirekaṃ karitvā , sīlamayaṃ puññakiriyavatthuṃ atirekaṃ karitvā, yāme deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா துஸிதானங் தே³வானங் ஸஹப்³யதங் உபபஜ்ஜதி. தத்ர , பி⁴க்க²வே, ஸந்துஸிதோ தே³வபுத்தோ தா³னமயங் புஞ்ஞகிரியவத்து²ங் அதிரேகங் கரித்வா, ஸீலமயங் புஞ்ஞகிரியவத்து²ங் அதிரேகங் கரித்வா, துஸிதே தே³வே த³ஸஹி டா²னேஹி அதி⁴க³ண்ஹாதி – தி³ப்³பே³ன ஆயுனா…பே॰… தி³ப்³பே³ஹி பொ²ட்ட²ப்³பே³ஹி.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā tusitānaṃ devānaṃ sahabyataṃ upapajjati. Tatra , bhikkhave, santusito devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, tusite deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா நிம்மானரதீனங் தே³வானங் ஸஹப்³யதங் உபபஜ்ஜதி. தத்ர, பி⁴க்க²வே, ஸுனிம்மிதோ தே³வபுத்தோ தா³னமயங் புஞ்ஞகிரியவத்து²ங் அதிரேகங் கரித்வா, ஸீலமயங் புஞ்ஞகிரியவத்து²ங் அதிரேகங் கரித்வா, நிம்மானரதீதே³வே த³ஸஹி டா²னேஹி அதி⁴க³ண்ஹாதி – தி³ப்³பே³ன ஆயுனா…பே॰… தி³ப்³பே³ஹி பொ²ட்ட²ப்³பே³ஹி.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā nimmānaratīnaṃ devānaṃ sahabyataṃ upapajjati. Tatra, bhikkhave, sunimmito devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, nimmānaratīdeve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘இத⁴ பன, பி⁴க்க²வே, ஏகச்சஸ்ஸ தா³னமயங் புஞ்ஞகிரியவத்து² அதி⁴மத்தங் கதங் ஹோதி, ஸீலமயங் புஞ்ஞகிரியவத்து² அதி⁴மத்தங் கதங் ஹோதி, பா⁴வனாமயங் புஞ்ஞகிரியவத்து²ங் நாபி⁴ஸம்போ⁴தி. ஸோ காயஸ்ஸ பே⁴தா³ பரங் மரணா பரனிம்மிதவஸவத்தீனங் தே³வானங் ஸஹப்³யதங் உபபஜ்ஜதி. தத்ர, பி⁴க்க²வே, வஸவத்தீ தே³வபுத்தோ தா³னமயங் புஞ்ஞகிரியவத்து²ங் அதிரேகங் கரித்வா, ஸீலமயங் புஞ்ஞகிரியவத்து²ங் அதிரேகங் கரித்வா, பரனிம்மிதவஸவத்தீதே³வே த³ஸஹி டா²னேஹி அதி⁴க³ண்ஹாதி – தி³ப்³பே³ன ஆயுனா, தி³ப்³பே³ன வண்ணேன, தி³ப்³பே³ன ஸுகே²ன, தி³ப்³பே³ன யஸேன, தி³ப்³பே³ன ஆதி⁴பதெய்யேன, தி³ப்³பே³ஹி ரூபேஹி, தி³ப்³பே³ஹி ஸத்³தே³ஹி, தி³ப்³பே³ஹி க³ந்தே⁴ஹி, தி³ப்³பே³ஹி ரஸேஹி, தி³ப்³பே³ஹி பொ²ட்ட²ப்³பே³ஹி. இமானி கோ², பி⁴க்க²வே, தீணி புஞ்ஞகிரியவத்தூ²னீ’’தி. ச²ட்ட²ங்.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā paranimmitavasavattīnaṃ devānaṃ sahabyataṃ upapajjati. Tatra, bhikkhave, vasavattī devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, paranimmitavasavattīdeve dasahi ṭhānehi adhigaṇhāti – dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi. Imāni kho, bhikkhave, tīṇi puññakiriyavatthūnī’’ti. Chaṭṭhaṃ.