| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
2. து³தியவக்³கோ³
2. Dutiyavaggo
1. புஞ்ஞகிரியவத்து²ஸுத்தவண்ணனா
1. Puññakiriyavatthusuttavaṇṇanā
60. து³தியவக்³க³ஸ்ஸ பட²மே புஞ்ஞகிரியவத்தூ²னீதி புஜ்ஜப⁴வப²லங் நிப்³ப³த்தெந்தி, அத்தனோ ஸந்தானங் புனந்தீதி வா புஞ்ஞானி, புஞ்ஞானி ச தானி ஹேதுபச்சயேஹி கத்தப்³ப³தோ கிரியா சாதி புஞ்ஞகிரியா. தா ஏவ ச தேஸங் தேஸங் ஆனிஸங்ஸானங் வத்து²பா⁴வதோ புஞ்ஞகிரியவத்தூ²னி. தா³னமயந்தி அனுபச்சி²ன்னப⁴வமூலஸ்ஸ அனுக்³க³ஹவஸேன பூஜாவஸேன வா அத்தனோ தெ³ய்யத⁴ம்மஸ்ஸ பரேஸங் பரிச்சாக³சேதனா தீ³யதி ஏதாயாதி தா³னங், தா³னமேவ தா³னமயங். சீவராதீ³ஸு ஹி சதூஸு பச்சயேஸு அன்னாதீ³ஸு வா த³ஸஸு தா³னவத்தூ²ஸு ரூபாதீ³ஸு வா ச²ஸு ஆரம்மணேஸு தங் தங் தெ³ந்தஸ்ஸ தேஸங் உப்பாத³னதோ பட்டா²ய புப்³ப³பா⁴கே³ பரிச்சாக³காலே பச்சா² ஸோமனஸ்ஸசித்தேன அனுஸ்ஸரணே சாதி தீஸு காலேஸு வுத்தனயேன பவத்தசேதனா தா³னமயங் புஞ்ஞகிரியவத்து² நாம.
60. Dutiyavaggassa paṭhame puññakiriyavatthūnīti pujjabhavaphalaṃ nibbattenti, attano santānaṃ punantīti vā puññāni, puññāni ca tāni hetupaccayehi kattabbato kiriyā cāti puññakiriyā. Tā eva ca tesaṃ tesaṃ ānisaṃsānaṃ vatthubhāvato puññakiriyavatthūni. Dānamayanti anupacchinnabhavamūlassa anuggahavasena pūjāvasena vā attano deyyadhammassa paresaṃ pariccāgacetanā dīyati etāyāti dānaṃ, dānameva dānamayaṃ. Cīvarādīsu hi catūsu paccayesu annādīsu vā dasasu dānavatthūsu rūpādīsu vā chasu ārammaṇesu taṃ taṃ dentassa tesaṃ uppādanato paṭṭhāya pubbabhāge pariccāgakāle pacchā somanassacittena anussaraṇe cāti tīsu kālesu vuttanayena pavattacetanā dānamayaṃ puññakiriyavatthu nāma.
ஸீலமயந்தி நிச்சஸீலஉபோஸத²னியமாதி³வஸேன பஞ்ச, அட்ட², த³ஸ வா ஸீலானி ஸமாதி³யந்தஸ்ஸ ஸீலபூரணத்த²ங் பப்³ப³ஜிஸ்ஸாமீதி விஹாரங் க³ச்ச²ந்தஸ்ஸ பப்³ப³ஜந்தஸ்ஸ மனோரத²ங் மத்த²கங் பாபெத்வா ‘‘பப்³ப³ஜிதோ வதம்ஹி ஸாது⁴ ஸுட்டூ²’’தி ஆவஜ்ஜெந்தஸ்ஸ ஸத்³தா⁴ய பாதிமொக்க²ங் பரிபூரெந்தஸ்ஸ பஞ்ஞாய சீவராதி³கே பச்சவெக்க²ந்தஸ்ஸ ஸதியா ஆபாத²க³தேஸு ரூபாதீ³ஸு சக்கு²த்³வாராதீ³னி ஸங்வரந்தஸ்ஸ வீரியேன ஆஜீவங் ஸோதெ⁴ந்தஸ்ஸ ச பவத்தா சேதனா ஸீலதீதி ஸீலமயங் புஞ்ஞகிரியவத்து² நாம.
Sīlamayanti niccasīlauposathaniyamādivasena pañca, aṭṭha, dasa vā sīlāni samādiyantassa sīlapūraṇatthaṃ pabbajissāmīti vihāraṃ gacchantassa pabbajantassa manorathaṃ matthakaṃ pāpetvā ‘‘pabbajito vatamhi sādhu suṭṭhū’’ti āvajjentassa saddhāya pātimokkhaṃ paripūrentassa paññāya cīvarādike paccavekkhantassa satiyā āpāthagatesu rūpādīsu cakkhudvārādīni saṃvarantassa vīriyena ājīvaṃ sodhentassa ca pavattā cetanā sīlatīti sīlamayaṃ puññakiriyavatthu nāma.
ததா² படிஸம்பி⁴தா³யங் (படி॰ ம॰ 1.48) வுத்தேன விபஸ்ஸனாமக்³கே³ன சக்கு²ங் அனிச்சதோ து³க்க²தோ அனத்ததோ விபஸ்ஸந்தஸ்ஸ ஸோதங், கா⁴னங், ஜிவ்ஹங், காயங், மனங். ரூபே…பே॰… த⁴ம்மே, சக்கு²விஞ்ஞாணங்…பே॰… மனோவிஞ்ஞாணங். சக்கு²ஸம்ப²ஸ்ஸங்…பே॰… மனோஸம்ப²ஸ்ஸங், சக்கு²ஸம்ப²ஸ்ஸஜங் வேத³னங்…பே॰… மனோஸம்ப²ஸ்ஸஜங் வேத³னங். ரூபஸஞ்ஞங்…பே॰… த⁴ம்மஸஞ்ஞங். ஜராமரணங் அனிச்சதோ து³க்க²தோ அனத்ததோ விபஸ்ஸந்தஸ்ஸ யா சேதனா, யா ச பத²வீகஸிணாதீ³ஸு அட்ட²திங்ஸாய ஆரம்மணேஸு பவத்தா ஜா²னசேதனா, யா ச அனவஜ்ஜேஸு கம்மாயதனஸிப்பாயதனவிஜ்ஜாட்டா²னேஸு பரிசயமனஸிகாராதி³வஸேன பவத்தா சேதனா, ஸப்³பா³ பா⁴வேதி ஏதாயாதி பா⁴வனாமயங் வுத்தனயேன புஞ்ஞகிரியவத்து² சாதி.
Tathā paṭisambhidāyaṃ (paṭi. ma. 1.48) vuttena vipassanāmaggena cakkhuṃ aniccato dukkhato anattato vipassantassa sotaṃ, ghānaṃ, jivhaṃ, kāyaṃ, manaṃ. Rūpe…pe… dhamme, cakkhuviññāṇaṃ…pe… manoviññāṇaṃ. Cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ. Rūpasaññaṃ…pe… dhammasaññaṃ. Jarāmaraṇaṃ aniccato dukkhato anattato vipassantassa yā cetanā, yā ca pathavīkasiṇādīsu aṭṭhatiṃsāya ārammaṇesu pavattā jhānacetanā, yā ca anavajjesu kammāyatanasippāyatanavijjāṭṭhānesu paricayamanasikārādivasena pavattā cetanā, sabbā bhāveti etāyāti bhāvanāmayaṃ vuttanayena puññakiriyavatthu cāti.
ஏகமேகஞ்செத்த² யதா²ரஹங் புப்³ப³பா⁴க³தோ பட்டா²ய காயேன கரொந்தஸ்ஸ காயகம்மங் ஹோதி, தத³த்த²ங் வாசங் நிச்சா²ரெந்தஸ்ஸ வசீகம்மங், காயங்க³ங் வாசங்க³ஞ்ச அசோபெத்வா மனஸா சிந்தெந்தஸ்ஸ மனோகம்மங். அன்னாதீ³னி தெ³ந்தஸ்ஸ சாபி ‘‘அன்னதா³னாதீ³னி தே³மீ’’தி வா தா³னபாரமிங் ஆவஜ்ஜெத்வா வா தா³னகாலே தா³னமயங் புஞ்ஞகிரியவத்து² ஹோதி. வத்தஸீஸே ட²த்வா த³த³தோ ஸீலமயங், க²யதோ வயதோ கம்மதோ ஸம்மஸனங் பட்ட²பெத்வா த³த³தோ பா⁴வனாமயங் புஞ்ஞகிரியவத்து² ஹோதி.
Ekamekañcettha yathārahaṃ pubbabhāgato paṭṭhāya kāyena karontassa kāyakammaṃ hoti, tadatthaṃ vācaṃ nicchārentassa vacīkammaṃ, kāyaṅgaṃ vācaṅgañca acopetvā manasā cintentassa manokammaṃ. Annādīni dentassa cāpi ‘‘annadānādīni demī’’ti vā dānapāramiṃ āvajjetvā vā dānakāle dānamayaṃ puññakiriyavatthu hoti. Vattasīse ṭhatvā dadato sīlamayaṃ, khayato vayato kammato sammasanaṃ paṭṭhapetvā dadato bhāvanāmayaṃ puññakiriyavatthu hoti.
அபரானிபி ஸத்த புஞ்ஞகிரியவத்தூ²னி – அபசிதிஸஹக³தங் புஞ்ஞகிரியவத்து² வெய்யாவச்சஸஹக³தங் பத்திஅனுப்பதா³னங் அப்³ப⁴னுமோத³னங் தே³ஸனாமயங் ஸவனமயங் தி³ட்டி²ஜுக³தங் புஞ்ஞகிரியவத்தூ²தி. ஸரணக³மனம்பி ஹி தி³ட்டி²ஜுக³தேனேவ ஸங்க³ய்ஹதி. யங் பனெத்த² வத்தப்³ப³ங், தங் பரதோ ஆவி ப⁴விஸ்ஸதி.
Aparānipi satta puññakiriyavatthūni – apacitisahagataṃ puññakiriyavatthu veyyāvaccasahagataṃ pattianuppadānaṃ abbhanumodanaṃ desanāmayaṃ savanamayaṃ diṭṭhijugataṃ puññakiriyavatthūti. Saraṇagamanampi hi diṭṭhijugateneva saṅgayhati. Yaṃ panettha vattabbaṃ, taṃ parato āvi bhavissati.
தத்த² வுட்³ட⁴தரங் தி³ஸ்வா பச்சுக்³க³மனபத்தசீவரபடிக்³க³ஹணாபி⁴வாத³னமக்³க³ஸம்பதா³னாதி³வஸேன அபசாயனஸஹக³தங் வேதி³தப்³ப³ங். வுட்³ட⁴தரானங் வத்தபடிபத்திகரணவஸேன, கா³மங் பிண்டா³ய பவிட்ட²ங் பி⁴க்கு²ங் தி³ஸ்வா பத்தங் க³ஹெத்வா கா³மே பி⁴க்க²ங் ஸம்பாதெ³த்வா உபஸங்ஹரணவஸேன ‘‘க³ச்ச² பி⁴க்கூ²னங் பத்தங் ஆஹரா’’தி ஸுத்வா வேகே³ன க³ந்த்வா பத்தாஹரணாதி³வஸேன ச வெய்யாவச்சஸஹக³தங் வேதி³தப்³ப³ங். சத்தாரோ பச்சயே த³த்வா புப்ப²க³ந்தா⁴தீ³ஹி ரதனத்தயஸ்ஸ பூஜங் கத்வா அஞ்ஞங் வா தாதி³ஸங் புஞ்ஞங் கத்வா ‘‘ஸப்³ப³ஸத்தானங் பத்தி ஹோதூ’’தி பரிணாமவஸேன பத்திஅனுப்பதா³னங் வேதி³தப்³ப³ங். ததா² பரேஹி தி³ன்னாய பத்தியா கேவலங் வா பரேஹி கதங் புஞ்ஞங் ‘‘ஸாது⁴, ஸுட்டூ²’’தி அனுமோத³னவஸேன அப்³ப⁴னுமோத³னங் வேதி³தப்³ப³ங். அத்தனோ பகு³ணத⁴ம்மங் அபச்சாஸீஸந்தோ ஹிதஜ்ஜா²ஸயேன பரேஸங் தே³ஸேதி – இத³ங் தே³ஸனாமயங் புஞ்ஞகிரியவத்து² நாம. யங் பன ஏகோ ‘‘ஏவங் மங் த⁴ம்மகதி²கோதி ஜானிஸ்ஸந்தீ’’தி இச்சா²ய ட²த்வா லாப⁴ஸக்காரஸிலோகஸன்னிஸ்ஸிதோ த⁴ம்மங் தே³ஸேதி, தங் ந மஹப்ப²லங் ஹோதி. ‘‘அத்³தா⁴ அயங் அத்தஹிதபரஹிதானங் படிபஜ்ஜனூபாயோ’’தி யோனிஸோமனஸிகாரபுரேசாரிகஹிதப²ரணேன முது³சித்தேன த⁴ம்மங் ஸுணாதி, இத³ங் ஸவனமயங் புஞ்ஞகிரியவத்து² ஹோதி. யங் பனேகோ ‘‘இதி மங் ஸத்³தோ⁴தி ஜானிஸ்ஸந்தீ’’தி ஸுணாதி, தங் ந மஹப்ப²லங் ஹோதி. தி³ட்டி²யா உஜுக³மனங் தி³ட்டி²ஜுக³தங், ‘‘அத்தி² தி³ன்ன’’ந்திஆதி³னயப்பவத்தஸ்ஸ ஸம்மாத³ஸ்ஸனஸ்ஸ ஏதங் அதி⁴வசனங். இத³ஞ்ஹி புப்³ப³பா⁴கே³ வா பச்சா²பா⁴கே³ வா ஞாணவிப்பயுத்தம்பி உஜுகரணகாலே ஞாணஸம்பயுத்தமேவ ஹோதி. அபரே பனாஹு ‘‘விஜானநபஜானநவஸேன த³ஸ்ஸனங் தி³ட்டி² குஸலஞ்ச விஞ்ஞாணங் கம்மஸ்ஸகதாஞாணாதி³ ச ஸம்மாத³ஸ்ஸன’’ந்தி . தத்த² குஸலேன விஞ்ஞாணேன ஞாணஸ்ஸ அனுப்பாதே³பி அத்தனா கதபுஞ்ஞானுஸ்ஸரணவண்ணாரஹவண்ணனாதீ³னங் ஸங்க³ஹோ, கம்மஸ்ஸகதாஞாணேன கம்மபத²ஸம்மாதி³ட்டி²யா . இதரங் பன தி³ட்டி²ஜுக³தங் ஸப்³பே³ஸங் நியமலக்க²ணங். யஞ்ஹி கிஞ்சி புஞ்ஞங் கரொந்தஸ்ஸ தி³ட்டி²யா உஜுபா⁴வேனேவ தங் மஹப்ப²லங் ஹோதி.
Tattha vuḍḍhataraṃ disvā paccuggamanapattacīvarapaṭiggahaṇābhivādanamaggasampadānādivasena apacāyanasahagataṃ veditabbaṃ. Vuḍḍhatarānaṃ vattapaṭipattikaraṇavasena, gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ sampādetvā upasaṃharaṇavasena ‘‘gaccha bhikkhūnaṃ pattaṃ āharā’’ti sutvā vegena gantvā pattāharaṇādivasena ca veyyāvaccasahagataṃ veditabbaṃ. Cattāro paccaye datvā pupphagandhādīhi ratanattayassa pūjaṃ katvā aññaṃ vā tādisaṃ puññaṃ katvā ‘‘sabbasattānaṃ patti hotū’’ti pariṇāmavasena pattianuppadānaṃ veditabbaṃ. Tathā parehi dinnāya pattiyā kevalaṃ vā parehi kataṃ puññaṃ ‘‘sādhu, suṭṭhū’’ti anumodanavasena abbhanumodanaṃ veditabbaṃ. Attano paguṇadhammaṃ apaccāsīsanto hitajjhāsayena paresaṃ deseti – idaṃ desanāmayaṃ puññakiriyavatthu nāma. Yaṃ pana eko ‘‘evaṃ maṃ dhammakathikoti jānissantī’’ti icchāya ṭhatvā lābhasakkārasilokasannissito dhammaṃ deseti, taṃ na mahapphalaṃ hoti. ‘‘Addhā ayaṃ attahitaparahitānaṃ paṭipajjanūpāyo’’ti yonisomanasikārapurecārikahitapharaṇena muducittena dhammaṃ suṇāti, idaṃ savanamayaṃ puññakiriyavatthu hoti. Yaṃ paneko ‘‘iti maṃ saddhoti jānissantī’’ti suṇāti, taṃ na mahapphalaṃ hoti. Diṭṭhiyā ujugamanaṃ diṭṭhijugataṃ, ‘‘atthi dinna’’ntiādinayappavattassa sammādassanassa etaṃ adhivacanaṃ. Idañhi pubbabhāge vā pacchābhāge vā ñāṇavippayuttampi ujukaraṇakāle ñāṇasampayuttameva hoti. Apare panāhu ‘‘vijānanapajānanavasena dassanaṃ diṭṭhi kusalañca viññāṇaṃ kammassakatāñāṇādi ca sammādassana’’nti . Tattha kusalena viññāṇena ñāṇassa anuppādepi attanā katapuññānussaraṇavaṇṇārahavaṇṇanādīnaṃ saṅgaho, kammassakatāñāṇena kammapathasammādiṭṭhiyā . Itaraṃ pana diṭṭhijugataṃ sabbesaṃ niyamalakkhaṇaṃ. Yañhi kiñci puññaṃ karontassa diṭṭhiyā ujubhāveneva taṃ mahapphalaṃ hoti.
இமேஸங் பன ஸத்தன்னங் புஞ்ஞகிரியவத்தூ²னங் புரிமேஹி தீஹி தா³னமயாதீ³ஹி புஞ்ஞகிரியவத்தூ²ஹி ஸங்க³ஹோ. தத்த² ஹி அபசாயனவெய்யாவச்சானி ஸீலமயே, பத்திஅனுப்பதா³னஅப்³ப⁴னுமோத³னானி தா³னமயே, த⁴ம்மதே³ஸனாஸவனானி பா⁴வனாமயே, தி³ட்டி²ஜுக³தங் தீஸுபி. தேனாஹ ப⁴க³வா –
Imesaṃ pana sattannaṃ puññakiriyavatthūnaṃ purimehi tīhi dānamayādīhi puññakiriyavatthūhi saṅgaho. Tattha hi apacāyanaveyyāvaccāni sīlamaye, pattianuppadānaabbhanumodanāni dānamaye, dhammadesanāsavanāni bhāvanāmaye, diṭṭhijugataṃ tīsupi. Tenāha bhagavā –
‘‘தீணிமானி, பி⁴க்க²வே, புஞ்ஞகிரியவத்தூ²னி. கதமானி தீணி? தா³னமயங்…பே॰… பா⁴வனாமயங் புஞ்ஞகிரியவத்தூ²’’தி (அ॰ நி॰ 8.36).
‘‘Tīṇimāni, bhikkhave, puññakiriyavatthūni. Katamāni tīṇi? Dānamayaṃ…pe… bhāvanāmayaṃ puññakiriyavatthū’’ti (a. ni. 8.36).
எத்த² ச அட்ட²ன்னங் காமாவசரகுஸலசேதனானங் வஸேன திண்ணம்பி புஞ்ஞகிரியவத்தூ²னங் பவத்தி ஹோதி. யதா² ஹி பகு³ணங் த⁴ம்மங் பரிவத்தெந்தஸ்ஸ ஏகச்சே அனுஸந்தி⁴ங் அஸல்லக்கெ²ந்தஸ்ஸேவ க³ச்ச²ந்தி, ஏவங் பகு³ணங் ஸமத²விபஸ்ஸனாபா⁴வனங் அனுயுஞ்ஜந்தஸ்ஸ அந்தரந்தரா ஞாணவிப்பயுத்தசித்தேனாபி மனஸிகாரோ பவத்ததி. ஸப்³ப³ங் தங் பன மஹக்³க³தகுஸலசேதனானங் வஸேன பா⁴வனாமயமேவ புஞ்ஞகிரியவத்து² ஹோதி, ந இதரானி. கா³தா²ய அத்தோ² ஹெட்டா² வுத்தோயேவ.
Ettha ca aṭṭhannaṃ kāmāvacarakusalacetanānaṃ vasena tiṇṇampi puññakiriyavatthūnaṃ pavatti hoti. Yathā hi paguṇaṃ dhammaṃ parivattentassa ekacce anusandhiṃ asallakkhentasseva gacchanti, evaṃ paguṇaṃ samathavipassanābhāvanaṃ anuyuñjantassa antarantarā ñāṇavippayuttacittenāpi manasikāro pavattati. Sabbaṃ taṃ pana mahaggatakusalacetanānaṃ vasena bhāvanāmayameva puññakiriyavatthu hoti, na itarāni. Gāthāya attho heṭṭhā vuttoyeva.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 1. புஞ்ஞகிரியவத்து²ஸுத்தங் • 1. Puññakiriyavatthusuttaṃ
