| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. புண்ணியஸுத்தங்
3. Puṇṇiyasuttaṃ
83. அத² கோ² ஆயஸ்மா புண்ணியோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா புண்ணியோ ப⁴க³வந்தங் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ யேன அப்பேகதா³ ததா²க³தங் த⁴ம்மதே³ஸனா படிபா⁴தி அப்பேகதா³ நப்படிபா⁴தீ’’தி?
83. Atha kho āyasmā puṇṇiyo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā puṇṇiyo bhagavantaṃ etadavoca – ‘‘ko nu kho, bhante, hetu ko paccayo yena appekadā tathāgataṃ dhammadesanā paṭibhāti appekadā nappaṭibhātī’’ti?
‘‘ஸத்³தோ⁴ ச, புண்ணிய, பி⁴க்கு² ஹோதி, நோ ச உபஸங்கமிதா; நேவ தாவ ததா²க³தங் த⁴ம்மதே³ஸனா படிபா⁴தி. யதோ ச கோ², புண்ணிய, பி⁴க்கு² ஸத்³தோ⁴ ச ஹோதி உபஸங்கமிதா ச, ஏவங் ததா²க³தங் த⁴ம்மதே³ஸனா படிபா⁴தி.
‘‘Saddho ca, puṇṇiya, bhikkhu hoti, no ca upasaṅkamitā; neva tāva tathāgataṃ dhammadesanā paṭibhāti. Yato ca kho, puṇṇiya, bhikkhu saddho ca hoti upasaṅkamitā ca, evaṃ tathāgataṃ dhammadesanā paṭibhāti.
‘‘ஸத்³தோ⁴ ச, புண்ணிய, பி⁴க்கு² ஹோதி உபஸங்கமிதா ச, நோ ச பயிருபாஸிதா…பே॰… பயிருபாஸிதா ச, நோ ச பரிபுச்சி²தா… பரிபுச்சி²தா ச, நோ ச ஓஹிதஸோதோ த⁴ம்மங் ஸுணாதி… ஓஹிதஸோதோ ச த⁴ம்மங் ஸுணாதி, நோ ச ஸுத்வா த⁴ம்மங் தா⁴ரேதி… ஸுத்வா ச த⁴ம்மங் தா⁴ரேதி, நோ ச தா⁴தானங் த⁴ம்மானங் அத்த²ங் உபபரிக்க²தி… தா⁴தானஞ்ச த⁴ம்மானங் அத்த²ங் உபபரிக்க²தி நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி… அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி, நோ ச கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா… கல்யாணவாசோ ச ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா, நோ ச ஸந்த³ஸ்ஸகோ ஹோதி ஸமாத³பகோ ஸமுத்தேஜகோ ஸம்பஹங்ஸகோ ஸப்³ரஹ்மசாரீனங், நேவ தாவ ததா²க³தங் த⁴ம்மதே³ஸனா படிபா⁴தி.
‘‘Saddho ca, puṇṇiya, bhikkhu hoti upasaṅkamitā ca, no ca payirupāsitā…pe… payirupāsitā ca, no ca paripucchitā… paripucchitā ca, no ca ohitasoto dhammaṃ suṇāti… ohitasoto ca dhammaṃ suṇāti, no ca sutvā dhammaṃ dhāreti… sutvā ca dhammaṃ dhāreti, no ca dhātānaṃ dhammānaṃ atthaṃ upaparikkhati… dhātānañca dhammānaṃ atthaṃ upaparikkhati no ca atthamaññāya dhammamaññāya dhammānudhammappaṭipanno hoti… atthamaññāya dhammamaññāya dhammānudhammappaṭipanno ca hoti, no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā… kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, no ca sandassako hoti samādapako samuttejako sampahaṃsako sabrahmacārīnaṃ, neva tāva tathāgataṃ dhammadesanā paṭibhāti.
‘‘யதோ ச கோ², புண்ணிய, பி⁴க்கு² ஸத்³தோ⁴ ச ஹோதி, உபஸங்கமிதா ச, பயிருபாஸிதா ச, பரிபுச்சி²தா ச, ஓஹிதஸோதோ ச த⁴ம்மங் ஸுணாதி, ஸுத்வா ச த⁴ம்மங் தா⁴ரேதி, தா⁴தானஞ்ச த⁴ம்மானங் அத்த²ங் உபபரிக்க²தி, அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி, கல்யாணவாசோ ச ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா, ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹங்ஸகோ ஸப்³ரஹ்மசாரீனங் – ஏவங் ததா²க³தங் த⁴ம்மதே³ஸனா படிபா⁴தி. இமேஹி கோ², புண்ணிய , த³ஸஹி த⁴ம்மேஹி ஸமன்னாக³தா 1 2 ஏகந்தபடிபா⁴னா 3 ததா²க³தங் த⁴ம்மதே³ஸனா ஹோதீ’’தி 4. ததியங்.
‘‘Yato ca kho, puṇṇiya, bhikkhu saddho ca hoti, upasaṅkamitā ca, payirupāsitā ca, paripucchitā ca, ohitasoto ca dhammaṃ suṇāti, sutvā ca dhammaṃ dhāreti, dhātānañca dhammānaṃ atthaṃ upaparikkhati, atthamaññāya dhammamaññāya dhammānudhammappaṭipanno ca hoti, kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, sandassako ca hoti samādapako samuttejako sampahaṃsako sabrahmacārīnaṃ – evaṃ tathāgataṃ dhammadesanā paṭibhāti. Imehi kho, puṇṇiya , dasahi dhammehi samannāgatā 56 ekantapaṭibhānā 7 tathāgataṃ dhammadesanā hotī’’ti 8. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-3. வாஹனஸுத்தாதி³வண்ணனா • 1-3. Vāhanasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. வாஹனஸுத்தாதி³வண்ணனா • 1-8. Vāhanasuttādivaṇṇanā
