| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. புத்தமங்ஸூபமஸுத்தவண்ணனா
3. Puttamaṃsūpamasuttavaṇṇanā
63. வுத்தனயமேவாதி ஹெட்டா² ஆஹாரவக்³க³ஸ்ஸ பட²மஸுத்தே வுத்தனயமேவ. லாப⁴ஸக்காரேனாதி லாப⁴ஸக்காரஸங்கா²தாய அட்டு²ப்பத்தியாதி கேசி. லாப⁴ஸக்காரே வா அட்டு²ப்பத்தியாதி அபரே. யோ ஹி லாப⁴ஸக்காரனிமித்தங் பச்சயேஸு கே³தே⁴ன பி⁴க்கூ²னங் அபச்சவெக்கி²தபரிபோ⁴கோ³ ஜாதோ, தங் அட்டு²ப்பத்திங் கத்வா ப⁴க³வா இமங் தே³ஸனங் நிக்கி²பி. யமகமஹாமேகோ⁴தி ஹெட்டா² ஓலம்ப³னஉபரிஉக்³க³மனவஸேன ஸதபடலஸஹஸ்ஸபடலோ யுக³ளமஹாமேகோ⁴.
63.Vuttanayamevāti heṭṭhā āhāravaggassa paṭhamasutte vuttanayameva. Lābhasakkārenāti lābhasakkārasaṅkhātāya aṭṭhuppattiyāti keci. Lābhasakkāre vā aṭṭhuppattiyāti apare. Yo hi lābhasakkāranimittaṃ paccayesu gedhena bhikkhūnaṃ apaccavekkhitaparibhogo jāto, taṃ aṭṭhuppattiṃ katvā bhagavā imaṃ desanaṃ nikkhipi. Yamakamahāmeghoti heṭṭhā olambanaupariuggamanavasena satapaṭalasahassapaṭalo yugaḷamahāmegho.
திட்ட²ந்தி சேவ ப⁴க³வதி கத்த²சி நிப³த்³த⁴வாஸங் வஸந்தே, சாரிகம்பி க³ச்ச²ந்தே அனுப³ந்த⁴ந்தி ச. பி⁴க்கூ²னம்பி யேபு⁴ய்யேன கப்பஸதஸஹஸ்ஸங் ததோ பி⁴ய்யோபி பூரிததா³னபாரமிஸஞ்சயத்தா ததா³ மஹாலாப⁴ஸக்காரோ உப்பஜ்ஜதீதி வுத்தங் ‘‘ஏவங் பி⁴க்கு²ஸங்க⁴ஸ்ஸபீ’’தி. ஸக்கதோதி ஸக்காரப்பத்தோ. க³ருகதோதி க³ருகாரப்பத்தோ. மானிதோதி ப³ஹுமதோ மனஸா பியாயிதோ ச. பூஜிதோதி மாலாதி³பூஜாய சேவ சதுபச்சயாபி⁴பூஜாய ச பூஜிதோ. அபசிதோதி அபசாயனப்பத்தோ. யஸ்ஸ ஹி சத்தாரோ பச்சயே ஸக்கத்வா ஸுஅபி⁴ஸங்க²தே பணீதபணீதே உபனெந்தி, ஸோ ஸக்கதோ. யஸ்மிங் க³ருபா⁴வங் பச்சுபட்ட²பெத்வா தெ³ந்தி, ஸோ க³ருகதோ. யங் மனஸா பியாயந்தி ப³ஹுமஞ்ஞந்தி, ஸோ ப³ஹுமதோ. யஸ்ஸ ஸப்³ப³மேதங் பூஜாவஸேன கரொந்தி, ஸோ பூஜிதோ. யஸ்ஸ அபி⁴வாத³னபச்சுட்டா²னஞ்ஜலிகம்மாதி³வஸேன பரமனிபச்சகாரங் கரொந்தி, ஸோ அபசிதோ. ப⁴க³வதி பி⁴க்கு²ஸங்கே⁴ ச லோகோ ஏவங் படிபன்னோ. தேன வுத்தங் ‘‘தேன கோ² பன ஸமயேன…பே॰… பரிக்கா²ரான’’ந்தி (உதா³॰ 14; ஸங்॰ நி॰ 2.70). லாப⁴க்³க³யஸக்³க³ப்பத்தந்தி லாப⁴ஸ்ஸ ச யஸஸ்ஸ ச அக்³க³ங் உக்கங்ஸங் பத்தங்.
Tiṭṭhanti ceva bhagavati katthaci nibaddhavāsaṃ vasante, cārikampi gacchante anubandhanti ca. Bhikkhūnampi yebhuyyena kappasatasahassaṃ tato bhiyyopi pūritadānapāramisañcayattā tadā mahālābhasakkāro uppajjatīti vuttaṃ ‘‘evaṃ bhikkhusaṅghassapī’’ti. Sakkatoti sakkārappatto. Garukatoti garukārappatto. Mānitoti bahumato manasā piyāyito ca. Pūjitoti mālādipūjāya ceva catupaccayābhipūjāya ca pūjito. Apacitoti apacāyanappatto. Yassa hi cattāro paccaye sakkatvā suabhisaṅkhate paṇītapaṇīte upanenti, so sakkato. Yasmiṃ garubhāvaṃ paccupaṭṭhapetvā denti, so garukato. Yaṃ manasā piyāyanti bahumaññanti, so bahumato. Yassa sabbametaṃ pūjāvasena karonti, so pūjito. Yassa abhivādanapaccuṭṭhānañjalikammādivasena paramanipaccakāraṃ karonti, so apacito. Bhagavati bhikkhusaṅghe ca loko evaṃ paṭipanno. Tena vuttaṃ ‘‘tena kho pana samayena…pe… parikkhārāna’’nti (udā. 14; saṃ. ni. 2.70). Lābhaggayasaggappattanti lābhassa ca yasassa ca aggaṃ ukkaṃsaṃ pattaṃ.
பட²மாஹாரவண்ணனா
Paṭhamāhāravaṇṇanā
அஸ்ஸாதி ப⁴க³வதோ. த⁴ம்மஸபா⁴வசிந்தாவஸேன பவத்தங் ஸஹொத்தப்பஞாணங் த⁴ம்மஸங்வேகோ³. து⁴வபடிஸேவனட்டா²னஞ்ஹேதங் ஸத்தானங், யதி³த³ங் ஆஹாரபரிபோ⁴கோ³, தஸ்மா ந தத்த² அபச்சவெக்க²ணமத்தேன பாராஜிகங் பஞ்ஞபேதுங் ஸக்காதி அதி⁴ப்பாயோ. ஆஹாராதி ‘‘பச்சயா’’திஆதி³னா புப்³பே³ ஆஹாரேஸு வுத்தவிதி⁴ங் ஸந்தா⁴ய ஆஹ ‘‘ஆஹாரா’’திஆதி³. இதா³னி தத்த² கத்தப்³ப³ங் அத்த²வண்ணனங் ஸந்தா⁴ய ‘‘ஹெட்டா² வுத்தத்த²மேவா’’தி வுத்தங்.
Assāti bhagavato. Dhammasabhāvacintāvasena pavattaṃ sahottappañāṇaṃ dhammasaṃvego. Dhuvapaṭisevanaṭṭhānañhetaṃ sattānaṃ, yadidaṃ āhāraparibhogo, tasmā na tattha apaccavekkhaṇamattena pārājikaṃ paññapetuṃ sakkāti adhippāyo. Āhārāti ‘‘paccayā’’tiādinā pubbe āhāresu vuttavidhiṃ sandhāya āha ‘‘āhārā’’tiādi. Idāni tattha kattabbaṃ atthavaṇṇanaṃ sandhāya ‘‘heṭṭhā vuttatthamevā’’ti vuttaṃ.
ஆதீ³னவந்தி தோ³ஸங். ஜாயாதி ப⁴ரியா. பதீதி ப⁴த்தா. அபெக்கா²ஸத்³தா³ சேதே பிதாபுத்தஸத்³தா³ விய, பாளியங் பன ஆ-காரஸ்ஸ ரஸ்ஸத்தங் ஸானுனாஸிகஞ்ச கத்வா வுத்தங் ‘‘ஜாயம்பதிகா’’தி. ஸம்மா ப²லங் வஹதீதி ஸம்ப³லங், ஸுகா²வஹந்தி அத்தோ². ததா² ஹி தங் ‘‘பதே² ஹிதந்தி பாதெ²ய்ய’’ந்தி வுச்சதி. மக்³க³ஸ்ஸ கந்தாரபரியாபன்னத்தா வுத்தங் ‘‘கந்தாரபூ⁴தங் மக்³க³’’ந்தி. து³ல்லப⁴தாய தங் உத³கங் தத்த² தாரேதீதி கந்தாரங், நிருத³கங் மஹாவனங். ருள்ஹீவஸேன இதரம்பி மஹாவனங் ததா² வுச்சதீதி ஆஹ ‘‘சோரகந்தார’’ந்திஆதி³. பரராஜூனங் வேரிஆதீ³னஞ்ச வஸேன ஸப்படிப⁴யம்பி அரஞ்ஞங் எத்தே²வ ஸங்க³ஹங் க³ச்ச²தீதி வுத்தங் ‘‘பஞ்சவித⁴’’ந்தி.
Ādīnavanti dosaṃ. Jāyāti bhariyā. Patīti bhattā. Apekkhāsaddā cete pitāputtasaddā viya, pāḷiyaṃ pana ā-kārassa rassattaṃ sānunāsikañca katvā vuttaṃ ‘‘jāyampatikā’’ti. Sammā phalaṃ vahatīti sambalaṃ, sukhāvahanti attho. Tathā hi taṃ ‘‘pathe hitanti pātheyya’’nti vuccati. Maggassa kantārapariyāpannattā vuttaṃ ‘‘kantārabhūtaṃ magga’’nti. Dullabhatāya taṃ udakaṃ tattha tāretīti kantāraṃ, nirudakaṃ mahāvanaṃ. Ruḷhīvasena itarampi mahāvanaṃ tathā vuccatīti āha ‘‘corakantāra’’ntiādi. Pararājūnaṃ veriādīnañca vasena sappaṭibhayampi araññaṃ ettheva saṅgahaṃ gacchatīti vuttaṃ ‘‘pañcavidha’’nti.
க⁴னக⁴னட்டா²னதோதி மங்ஸஸ்ஸ ப³ஹலப³ஹலங் தூ²லதூ²லங் ஹுத்வா டி²தட்டா²னதோ. ‘‘தாதி³ஸஞ்ஹி மங்ஸங் க³ஹெத்வா ஸுக்கா²பிதங் வல்லூரங். ஸூலே ஆவுனித்வா பக்கமங்ஸங் ஸூலமங்ஸங். விரளச்சா²யாயங் நிஸீதி³ங்ஸு க³ந்துங் அஸமத்தோ² ஹுத்வா. கோ³வதகுக்குரவததே³வதாயாசனாதீ³ஹீதி கோ³வதகுக்குரவதாதி³வதசரணேஹி சேவ தே³வதாயாசனாதீ³ஹி பணிதி⁴கம்மேஹி ச மஹந்தங் து³க்க²ங் அனுபூ⁴தங்.
Ghanaghanaṭṭhānatoti maṃsassa bahalabahalaṃ thūlathūlaṃ hutvā ṭhitaṭṭhānato. ‘‘Tādisañhi maṃsaṃ gahetvā sukkhāpitaṃ vallūraṃ. Sūle āvunitvā pakkamaṃsaṃ sūlamaṃsaṃ. Viraḷacchāyāyaṃ nisīdiṃsu gantuṃ asamattho hutvā. Govatakukkuravatadevatāyācanādīhīti govatakukkuravatādivatacaraṇehi ceva devatāyācanādīhi paṇidhikammehi ca mahantaṃ dukkhaṃ anubhūtaṃ.
யஸ்மா பன ஸாஸனே ஸம்மாபடிபஜ்ஜந்தஸ்ஸ பி⁴க்கு²னோ ஆஹாரபரிபோ⁴க³ஸ்ஸ ஓபம்மபா⁴வேன தேஸங் ஜாயம்பதிகானங் புத்தமங்ஸபரிபோ⁴கோ³ இத⁴ ப⁴க³வதா ஆனீதோ, தஸ்மாஸ்ஸ நானாகாரேஹி ஓபம்மத்தங் விபா⁴வேதுங் ‘‘தேஸங் ஸோ புத்தமங்ஸாஹாரோ’’திஆதி³ ஆரத்³த⁴ங். தத்த² ஸஜாதிமங்ஸதாயாதி ஸமானஜாதிகமங்ஸபா⁴வேன, மனுஸ்ஸமங்ஸபா⁴வேனாதி அத்தோ². மஸுஸ்ஸமங்ஸஞ்ஹி குலப்பஸுதமனுஸ்ஸானங் அமனுஞ்ஞங் ஹோதி அபரிசிதபா⁴வதோ கா³ரய்ஹபா⁴வதோ ச, ததோ ஏவ ஞாதிஆதி³மங்ஸதாயாதிஆதி³ வுத்தங். தருணமங்ஸதாயாதிஆதி³ பன ஸபா⁴வதோ அனபி⁴ஸங்கா²ரதோ ச அமனுஞ்ஞாதி கத்வா வுத்தங். அதூ⁴பிததாயாதி அதூ⁴பிதபா⁴வதோ. மஜ்ஜ²த்தபா⁴வேயேவ டி²தா. ததோ ஏவ நிச்ச²ந்த³ராக³பரிபோ⁴கே³ டி²தாதி வுத்தங் கந்தாரதோ நித்த²ரணஜ்ஜா²ஸயதாய. இதா³னி யே ச தே அனபனீதாஹாரோ, ந யாவத³த்த²பரிபோ⁴கோ³ விக³தமச்சே²ரமலதா ஸம்மோஹாபா⁴வோ ஆயதிங் தத்த² பத்த²னாபா⁴வோ ஸன்னிதி⁴காராபா⁴வோ அபரிச்சஜனமத³த்தா²பா⁴வோ அஹீளனா அவிவாத³பரிபோ⁴கோ³ சாதி உபமாயங் லப்³ப⁴மானா பகாரவிஸேஸா, தே ததா² நீஹரித்வா உபமெய்யே யோஜெத்வா த³ஸ்ஸேதுங் ‘‘ந அட்டி²ன்ஹாருசம்மனிஸ்ஸிதட்டா²னானீ’’திஆதி³ வுத்தங். தங் காரணந்தி தங் தேஸங் ஜாயம்பதீனங் யாவதே³வ கந்தாரனித்த²ரணத்தா²ய புத்தமங்ஸபரிபோ⁴க³ஸங்கா²தங் காரணங்.
Yasmā pana sāsane sammāpaṭipajjantassa bhikkhuno āhāraparibhogassa opammabhāvena tesaṃ jāyampatikānaṃ puttamaṃsaparibhogo idha bhagavatā ānīto, tasmāssa nānākārehi opammattaṃ vibhāvetuṃ ‘‘tesaṃ so puttamaṃsāhāro’’tiādi āraddhaṃ. Tattha sajātimaṃsatāyāti samānajātikamaṃsabhāvena, manussamaṃsabhāvenāti attho. Masussamaṃsañhi kulappasutamanussānaṃ amanuññaṃ hoti aparicitabhāvato gārayhabhāvato ca, tato eva ñātiādimaṃsatāyātiādi vuttaṃ. Taruṇamaṃsatāyātiādi pana sabhāvato anabhisaṅkhārato ca amanuññāti katvā vuttaṃ. Adhūpitatāyāti adhūpitabhāvato. Majjhattabhāveyeva ṭhitā. Tato eva nicchandarāgaparibhoge ṭhitāti vuttaṃ kantārato nittharaṇajjhāsayatāya. Idāni ye ca te anapanītāhāro, na yāvadatthaparibhogo vigatamaccheramalatā sammohābhāvo āyatiṃ tattha patthanābhāvo sannidhikārābhāvo apariccajanamadatthābhāvo ahīḷanā avivādaparibhogo cāti upamāyaṃ labbhamānā pakāravisesā, te tathā nīharitvā upameyye yojetvā dassetuṃ ‘‘naaṭṭhinhārucammanissitaṭṭhānānī’’tiādi vuttaṃ. Taṃ kāraṇanti taṃ tesaṃ jāyampatīnaṃ yāvadeva kantāranittharaṇatthāya puttamaṃsaparibhogasaṅkhātaṃ kāraṇaṃ.
நிஸ்ஸந்த³பாடிகுல்யதங் பச்சவெக்க²ந்தோபி கப³ளீகாராஹாரங் பரிவீமங்ஸதி. யதா² தே ஜாயம்பதிகாதிஆதி³பி ஓபம்மஸங்ஸந்த³னங். ‘‘பரிபு⁴ஞ்ஜிதப்³போ³ ஆஹாரோ’’தி பத³ங் ஆனெத்வா ஸம்ப³ந்தி⁴தப்³ப³ங். ஏஸ நயோ இதோ பரேஸுபி. அபடிக்கி²பித்வாதி அனபனெத்வா. வட்டகேன விய குக்குடேன விய சாதி விஸதி³ஸூதா³ஹரணங். ஓதி⁴ங் அத³ஸ்ஸெத்வாதி மஹந்தக்³க³ஹணவஸேன ஓதி⁴ங் அகத்வா. ஸீஹேன வியாதி ஸதி³ஸூதா³ஹரணங். ஸோ கிர ஸபதா³னமேவ கா²த³தி.
Nissandapāṭikulyataṃ paccavekkhantopi kabaḷīkārāhāraṃ parivīmaṃsati. Yathā te jāyampatikātiādipi opammasaṃsandanaṃ. ‘‘Paribhuñjitabbo āhāro’’ti padaṃ ānetvā sambandhitabbaṃ. Esa nayo ito paresupi. Apaṭikkhipitvāti anapanetvā. Vaṭṭakena viya kukkuṭena viya cāti visadisūdāharaṇaṃ. Odhiṃ adassetvāti mahantaggahaṇavasena odhiṃ akatvā. Sīhena viyāti sadisūdāharaṇaṃ. So kira sapadānameva khādati.
அக³தி⁴தஅமுச்சி²தாதி³பா⁴வேன பரிபு⁴ஞ்ஜிதப்³ப³தோ ‘‘அமச்ச²ராயித்வா’’திஆதி³ வுத்தங். அப்³ப⁴ந்தரே அத்தா நாம அத்தீ²தி தி³ட்டி² அத்தூபலத்³தி⁴, தங்ஸஹக³தேன ஸம்மோஹேன அத்தா ஆஹாரங் பரிபு⁴ஞ்ஜதீதி. ஸதிஸம்பஜஞ்ஞவஸேனபீதி ‘‘அஸிதே பீதே கா²யிதே ஸாயிதே ஸம்பஜானகாரீ ஹோதீ’’தி எத்த² வுத்தஸதிஸம்பஜஞ்ஞவஸேனபி.
Agadhitaamucchitādibhāvena paribhuñjitabbato ‘‘amaccharāyitvā’’tiādi vuttaṃ. Abbhantare attā nāma atthīti diṭṭhi attūpaladdhi, taṃsahagatena sammohena attā āhāraṃ paribhuñjatīti. Satisampajaññavasenapīti ‘‘asite pīte khāyite sāyite sampajānakārī hotī’’ti ettha vuttasatisampajaññavasenapi.
‘‘அஹோ வத மயங்…பே॰… லபெ⁴ய்ய’’ந்தி பத்த²னங் வா, ‘‘ஹிய்யோ விய…பே॰… ந லத்³த⁴’’ந்தி அனுஸோசனங் வா அகத்வாதி யோஜனா.
‘‘Aho vata mayaṃ…pe… labheyya’’nti patthanaṃ vā, ‘‘hiyyo viya…pe… na laddha’’nti anusocanaṃ vā akatvāti yojanā.
‘‘ஸன்னிதி⁴ங் ந அகங்ஸு, பூ⁴மியங் வா நிக²ணிங்ஸு, அக்³கி³னா வா ஜா²பயிங்ஸூ’’தி ந-காரங் ஆனெத்வா யோஜனா. ஏவங் ஸப்³ப³த்த².
‘‘Sannidhiṃ na akaṃsu, bhūmiyaṃ vā nikhaṇiṃsu, agginā vā jhāpayiṃsū’’ti na-kāraṃ ānetvā yojanā. Evaṃ sabbattha.
பிண்ட³பாதங் வா அஹீளெந்தேன தா³யகங் வா அஹீளெந்தேன பரிபு⁴ஞ்ஜிதப்³போ³தி யோஜனா. ஸ பத்தபாணீதி ஸோ பத்தஹத்தோ². நாவஜானியாதி ந அவஜானியா. அதிமஞ்ஞதீதி அதிக்கமித்வா மஞ்ஞதி, அவஜானாதீதி அத்தோ².
Piṇḍapātaṃ vā ahīḷentena dāyakaṃ vā ahīḷentena paribhuñjitabboti yojanā. Sa pattapāṇīti so pattahattho. Nāvajāniyāti na avajāniyā. Atimaññatīti atikkamitvā maññati, avajānātīti attho.
‘‘தீஹி பரிஞ்ஞாஹி பரிஞ்ஞாதே’’தி வத்வா தாஹி கப³ளீகாராஹாரஸ்ஸ பரிஜானநவிதி⁴ங் த³ஸ்ஸெந்தோ ‘‘கத²’’ந்திஆதி³மாஹ. தத்த² ஸவத்து²கவஸேனாதி ஸஸம்பா⁴ரவஸேன, ஸபா⁴வதோ பன ரூபாஹரணங் ஓஜமத்தங் ஹோதி. இத³ஞ்ஹி கப³ளீகாராஹாரஸ்ஸ லக்க²ணங். காமங் ரஸாரம்மணங் ஜிவ்ஹாபஸாதே³ படிஹஞ்ஞதி, தேன பன அவினாபா⁴வதோ ஸம்பத்தவிஸயகா³ஹிதாய ச ஜிவ்ஹாபஸாத³ஸ்ஸ ‘‘ஓஜட்ட²மகரூபங் கத்த² படிஹஞ்ஞதீ’’தி வுத்தங். தஸ்ஸாதி ஜிவ்ஹாபஸாத³ஸ்ஸ . இமே த⁴ம்மாதி இமே யதா²வுத்தபூ⁴துபாதா³யத⁴ம்மா. தந்தி ரூபக²ந்த⁴ங். பரிக்³க³ண்ஹதோதி பரிக்³க³ண்ஹந்தஸ்ஸ. உப்பன்னா ப²ஸ்ஸபஞ்சமகா த⁴ம்மாதி ஸப்³பே³பி யே யதா²னித்³தா⁴ரிதா, தேஹி ஸஹப்பவத்தாவ ஸப்³பே³பி இமே. ஸரஸலக்க²ணதோதி அத்தனோ கிச்சதோ லக்க²ணதோ ச. தேஸங் நாமரூபபா⁴வேன வவத்த²பிதானங் பஞ்சன்னங் க²ந்தா⁴னங் பச்சயோ விஞ்ஞாணங். ‘‘தஸ்ஸ ஸங்கா²ரா தேஸங் அவிஜ்ஜா’’தி ஏவங் உத்³த⁴ங் ஆரோஹனவஸேன பச்சயங். அதோ⁴ஓரோஹனவஸேன பன ஸளாயதனாதி³கே பரியேஸந்தோ அனுலோமபடிலோமங் படிச்சஸமுப்பாத³ங் பஸ்ஸதி. ஸளாயதனாத³யோபி ஹி ரூபாரூபத⁴ம்மானங் யதா²ரஹங் பச்சயபா⁴வேன வவத்த²பேதப்³பா³தி. யாதா²வதோ தி³ட்ட²த்தாதி ‘‘இத³ங் ரூபங், எத்தகங் ரூபங், ந இதோ பி⁴ய்யோ, இத³ங் நாமங், எத்தகங் நாமங், ந இதோ பி⁴ய்யோ’’தி ச யதா²பூ⁴தங் தி³ட்ட²த்தா. அனிச்சானுபஸ்ஸனா, து³க்கா²னுபஸ்ஸனா, அனத்தானுபஸ்ஸனா, நிப்³பி³தா³னுபஸ்ஸனா, விராகா³னுபஸ்ஸனா, நிரோதா⁴னுபஸ்ஸனா, படினிஸ்ஸக்³கா³னுபஸ்ஸனாதி இமாஸங் ஸத்தன்னங் அனுபஸ்ஸனானங் வஸேன. ஸோதி கப³ளீகாராஹாரோ. திலக்க²ண…பே॰… ஸங்கா²தாயாதி அனிச்சதாதீ³னங் திண்ணங் லக்க²ணானங் படிவிஜ்ஜ²னவஸேன லக்க²ணவந்தஸம்மஸனவஸேன ச பவத்தஞாணஸங்கா²தாய. பரிஞ்ஞாதோ ஹோதி அனவஸேஸதோ நாமரூபஸ்ஸ ஞாதத்தா தப்பரியாபன்னத்தா ச ஆஹாரஸ்ஸ. தேனாஹ ‘‘தஸ்மிங் யேவா’’திஆதி³. ச²ந்த³ராகா³வகட்³ட⁴னேனாதி ச²ந்த³ராக³ஸ்ஸ பஜஹனேன.
‘‘Tīhi pariññāhi pariññāte’’ti vatvā tāhi kabaḷīkārāhārassa parijānanavidhiṃ dassento ‘‘katha’’ntiādimāha. Tattha savatthukavasenāti sasambhāravasena, sabhāvato pana rūpāharaṇaṃ ojamattaṃ hoti. Idañhi kabaḷīkārāhārassa lakkhaṇaṃ. Kāmaṃ rasārammaṇaṃ jivhāpasāde paṭihaññati, tena pana avinābhāvato sampattavisayagāhitāya ca jivhāpasādassa ‘‘ojaṭṭhamakarūpaṃ kattha paṭihaññatī’’ti vuttaṃ. Tassāti jivhāpasādassa . Ime dhammāti ime yathāvuttabhūtupādāyadhammā. Tanti rūpakhandhaṃ. Pariggaṇhatoti pariggaṇhantassa. Uppannā phassapañcamakā dhammāti sabbepi ye yathāniddhāritā, tehi sahappavattāva sabbepi ime. Sarasalakkhaṇatoti attano kiccato lakkhaṇato ca. Tesaṃ nāmarūpabhāvena vavatthapitānaṃ pañcannaṃ khandhānaṃ paccayo viññāṇaṃ. ‘‘Tassa saṅkhārā tesaṃ avijjā’’ti evaṃ uddhaṃ ārohanavasena paccayaṃ. Adhoorohanavasena pana saḷāyatanādike pariyesanto anulomapaṭilomaṃ paṭiccasamuppādaṃ passati. Saḷāyatanādayopi hi rūpārūpadhammānaṃ yathārahaṃ paccayabhāvena vavatthapetabbāti. Yāthāvato diṭṭhattāti ‘‘idaṃ rūpaṃ, ettakaṃ rūpaṃ, na ito bhiyyo, idaṃ nāmaṃ, ettakaṃ nāmaṃ, na ito bhiyyo’’ti ca yathābhūtaṃ diṭṭhattā. Aniccānupassanā, dukkhānupassanā, anattānupassanā, nibbidānupassanā, virāgānupassanā, nirodhānupassanā, paṭinissaggānupassanāti imāsaṃ sattannaṃ anupassanānaṃ vasena. Soti kabaḷīkārāhāro. Tilakkhaṇa…pe… saṅkhātāyāti aniccatādīnaṃ tiṇṇaṃ lakkhaṇānaṃ paṭivijjhanavasena lakkhaṇavantasammasanavasena ca pavattañāṇasaṅkhātāya. Pariññāto hoti anavasesato nāmarūpassa ñātattā tappariyāpannattā ca āhārassa. Tenāha ‘‘tasmiṃ yevā’’tiādi. Chandarāgāvakaḍḍhanenāti chandarāgassa pajahanena.
பஞ்ச காமகு³ணா காரணபூ⁴தா ஏதஸ்ஸ அத்தீ²தி பஞ்சகாமகு³ணிகோ. தேனாஹ ‘‘பஞ்சகாமகு³ணஸம்ப⁴வோ’’தி. ஏகிஸ்ஸா தண்ஹாய பரிஞ்ஞா ஏகபரிஞ்ஞா. ஸப்³ப³ஸ்ஸ பஞ்சகாமகு³ணிகஸ்ஸ ராக³ஸ்ஸ பரிஞ்ஞா, ஸப்³ப³பரிஞ்ஞா. தது³ப⁴யஸ்ஸபி மூலபூ⁴தஸ்ஸ ஆஹாரஸ்ஸ பரிஞ்ஞா மூலபரிஞ்ஞா. இதா³னி இமா திஸ்ஸோபி பரிஞ்ஞாயோ விபா⁴கே³ன த³ஸ்ஸேதுங் ‘‘யோ பி⁴க்கூ²’’திஆதி³ ஆரத்³த⁴ங். ஜிவ்ஹாத்³வாரே ஏகரஸதண்ஹங் பரிஜானாதீதி ஜிவ்ஹாய ரஸங் ஸாயித்வா இதி படிஸஞ்சிக்க²தி ‘‘யோ யமெத்த² ரஸோ, ஸோ வத்து²காமவஸேன ஓஜட்ட²மகரூபங் ஹோதி ஜிவ்ஹாயதனங் பஸாதோ³. ஸோ கிங் நிஸ்ஸிதோ? சதுமஹாபூ⁴தனிஸ்ஸிதோ. தங்ஸஹஜாதோ வண்ணோ க³ந்தோ⁴ ரஸோ ஓஜா ஜீவிதிந்த்³ரியந்தி இமே த⁴ம்மா ரூபக்க²ந்தோ⁴ நாம. யோ தஸ்மிங் ரஸே அஸ்ஸாதோ³, அயங் ரஸதண்ஹா. தங்ஸஹக³தா ப²ஸ்ஸாத³யோ த⁴ம்மா சத்தாரோ அரூபக்க²ந்தா⁴’’திஆதி³வஸேன. ஸப்³ப³ங் அட்ட²கதா²யங் ஆக³தவஸேன வேதி³தப்³ப³ங். தேனாஹ ‘‘தேன பஞ்சகாமகு³ணிகோ ராகோ³ பரிஞ்ஞாதோவ ஹோதீ’’தி. தத்த² தேனாதி யோ பி⁴க்கு² ஜிவ்ஹாத்³வாரே ரஸதண்ஹங் பரிஜானாதி, தேன. கத²ங் பன ஏகஸ்மிங் த்³வாரே தண்ஹங் பரிஜானதோ பஞ்சஸு த்³வாரேஸு ராகோ³ பரிஞ்ஞாதோ ஹோதீதி ஆஹ ‘‘கஸ்மா’’திஆதி³. தஸ்ஸாயேவாதி தண்ஹாய ஏவ தண்ஹாஸாமஞ்ஞதோ ஏகத்தனயவஸேன வுத்தங். தத்தா²தி பஞ்சஸு த்³வாரேஸு. உப்பஜ்ஜனதோதி ரூபராகா³தி³பா⁴வேன உப்பஜ்ஜனதோ. லோபோ⁴ ஏவ ஹி தண்ஹாயனட்டே²ன ‘‘தண்ஹா’’திபி, ரஜ்ஜனட்டே²ன ‘‘ராகோ³’’திபி வுச்சதி. தேனாஹ ‘‘ஸாயேவ ஹீ’’திஆதி³. இதா³னி வுத்தமேவத்த²ங் ‘‘யதா²’’திஆதி³னா உபமாய ஸம்பிண்டே³தி. பஞ்சமக்³கே³ ஹனதோதி பஞ்சஸு மக்³கே³ஸு ஸஞ்சரித்தங் கரொந்தேன மக்³க³கா³மினோ ஹனந்தோ ‘‘மக்³கே³ ஹனதோ’’தி வுத்தோ.
Pañca kāmaguṇā kāraṇabhūtā etassa atthīti pañcakāmaguṇiko. Tenāha ‘‘pañcakāmaguṇasambhavo’’ti. Ekissā taṇhāya pariññā ekapariññā. Sabbassa pañcakāmaguṇikassa rāgassa pariññā, sabbapariññā. Tadubhayassapi mūlabhūtassa āhārassa pariññā mūlapariññā. Idāni imā tissopi pariññāyo vibhāgena dassetuṃ ‘‘yo bhikkhū’’tiādi āraddhaṃ. Jivhādvāre ekarasataṇhaṃ parijānātīti jivhāya rasaṃ sāyitvā iti paṭisañcikkhati ‘‘yo yamettha raso, so vatthukāmavasena ojaṭṭhamakarūpaṃ hoti jivhāyatanaṃ pasādo. So kiṃ nissito? Catumahābhūtanissito. Taṃsahajāto vaṇṇo gandho raso ojā jīvitindriyanti ime dhammā rūpakkhandho nāma. Yo tasmiṃ rase assādo, ayaṃ rasataṇhā. Taṃsahagatā phassādayo dhammā cattāro arūpakkhandhā’’tiādivasena. Sabbaṃ aṭṭhakathāyaṃ āgatavasena veditabbaṃ. Tenāha ‘‘tena pañcakāmaguṇiko rāgo pariññātova hotī’’ti. Tattha tenāti yo bhikkhu jivhādvāre rasataṇhaṃ parijānāti, tena. Kathaṃ pana ekasmiṃ dvāre taṇhaṃ parijānato pañcasu dvāresu rāgo pariññāto hotīti āha ‘‘kasmā’’tiādi. Tassāyevāti taṇhāya eva taṇhāsāmaññato ekattanayavasena vuttaṃ. Tatthāti pañcasu dvāresu. Uppajjanatoti rūparāgādibhāvena uppajjanato. Lobho eva hi taṇhāyanaṭṭhena ‘‘taṇhā’’tipi, rajjanaṭṭhena ‘‘rāgo’’tipi vuccati. Tenāha ‘‘sāyeva hī’’tiādi. Idāni vuttamevatthaṃ ‘‘yathā’’tiādinā upamāya sampiṇḍeti. Pañcamagge hanatoti pañcasu maggesu sañcarittaṃ karontena maggagāmino hananto ‘‘magge hanato’’ti vutto.
ஸப்³யஞ்ஜனே பிண்ட³பாதஸஞ்ஞிதே ப⁴த்தஸமூஹே மனுஞ்ஞே ரூபே ரூபஸத்³தா³த³யோ லப்³ப⁴ந்தி, தத்த² பஞ்சகாமகு³ணராக³ஸ்ஸ ஸம்ப⁴வங் த³ஸ்ஸேதுங் ‘‘கத²’’ந்திஆதி³ வுத்தங். ஸதிஸம்பஜஞ்ஞேன பரிக்³க³ஹெத்வாதி ஸப்³ப³பா⁴கி³யேன கம்மட்டா²னபரிபாலகேன பரிக்³க³ஹெத்வா. நிச்ச²ந்த³ராக³பரிபோ⁴கே³னாதி மக்³கா³தி⁴க³மஸித்³தே⁴ன நிச்ச²ந்த³ராக³பரிபோ⁴கே³ன பரிபு⁴த்தே. ஸோதி காமகு³ணிகோ ராகோ³.
Sabyañjane piṇḍapātasaññite bhattasamūhe manuññe rūpe rūpasaddādayo labbhanti, tattha pañcakāmaguṇarāgassa sambhavaṃ dassetuṃ ‘‘katha’’ntiādi vuttaṃ. Satisampajaññena pariggahetvāti sabbabhāgiyena kammaṭṭhānaparipālakena pariggahetvā. Nicchandarāgaparibhogenāti maggādhigamasiddhena nicchandarāgaparibhogena paribhutte. Soti kāmaguṇiko rāgo.
தஸ்மிங் ஸதீதி கப³ளீகாராஹாரே ஸதி. தஸ்ஸாதி பஞ்சகாமகு³ணிகராக³ஸ்ஸ. உப்பத்திதோதி உப்பஜ்ஜனதோ. ந ஹி ஆஹாராலாபே⁴ன ஜிக⁴ச்சா²து³ப்³ப³ல்யபரேதஸ்ஸ காமபரிபோ⁴கி³ச்சா² ஸம்ப⁴வதி. உபனிஜ்ஜா²னசித்தந்தி ராக³வஸேன அஞ்ஞமஞ்ஞங் ஓலோகனசித்தங்.
Tasmiṃ satīti kabaḷīkārāhāre sati. Tassāti pañcakāmaguṇikarāgassa. Uppattitoti uppajjanato. Na hi āhārālābhena jighacchādubbalyaparetassa kāmaparibhogicchā sambhavati. Upanijjhānacittanti rāgavasena aññamaññaṃ olokanacittaṃ.
நத்தி² தங் ஸங்யோஜனந்தி பஞ்சவித⁴ம்பி உத்³த⁴ம்பா⁴கி³யஸங்யோஜனங் ஸந்தா⁴ய வுத்தங். தேனாஹ ‘‘தேன ராகே³ன…பே॰… நத்தீ²’’தி. தேனாதி காமராகே³ன. எத்தகேனாதி யதா²வுத்தாய தே³ஸனாய. கதே²துங் வட்டதீதி இமங் பட²மாஹாரகத²ங் கதெ²ந்தேன த⁴ம்மகதி²கேன.
Natthi taṃ saṃyojananti pañcavidhampi uddhambhāgiyasaṃyojanaṃ sandhāya vuttaṃ. Tenāha ‘‘tena rāgena…pe… natthī’’ti. Tenāti kāmarāgena. Ettakenāti yathāvuttāya desanāya. Kathetuṃ vaṭṭatīti imaṃ paṭhamāhārakathaṃ kathentena dhammakathikena.
பட²மாஹாரவண்ணனா நிட்டி²தா.
Paṭhamāhāravaṇṇanā niṭṭhitā.
து³தியாஹாரவண்ணனா
Dutiyāhāravaṇṇanā
து³தியேதி து³தியே ஆஹாரே. உத்³தா³லிதசம்மாதி உப்பாடிதசம்மா, ஸப்³ப³ஸோ அபனீதசம்மாதி அத்தோ². ந ஸக்கோதி து³ப்³ப³லபா⁴வதோ, ததா² ஹி இத்தீ² ‘‘அப³லா’’தி வுச்சதி. ஸிலாகுட்டாதீ³னந்தி ஆதி³-ஸத்³தே³ன இட்ட²ககுட்டமத்திகாகுட்டாதீ³னங் ஸங்க³ஹோ. உண்ணனாபீ⁴தி மக்கடகங். ஸரபூ³தி க⁴ரகோ³ளிகா . உச்சாலிங்க³பாணகா நாம லோமஸா பாணகா. ஆகாஸனிஸ்ஸிதாதி ஆகாஸசாரினோ. லுஞ்சித்வாதி உப்பாடெத்வா.
Dutiyeti dutiye āhāre. Uddālitacammāti uppāṭitacammā, sabbaso apanītacammāti attho. Na sakkoti dubbalabhāvato, tathā hi itthī ‘‘abalā’’ti vuccati. Silākuṭṭādīnanti ādi-saddena iṭṭhakakuṭṭamattikākuṭṭādīnaṃ saṅgaho. Uṇṇanābhīti makkaṭakaṃ. Sarabūti gharagoḷikā . Uccāliṅgapāṇakā nāma lomasā pāṇakā. Ākāsanissitāti ākāsacārino. Luñcitvāti uppāṭetvā.
திஸ்ஸோ பரிஞ்ஞாதி ஹெட்டா² வுத்தா ஞாதபரிஞ்ஞாத³யோ திஸ்ஸோ பரிஞ்ஞா. தம்மூலகத்தாதி ப²ஸ்ஸமூலகத்தா. தே³ஸனா யாவ அரஹத்தா கதி²தா ஸப்³ப³ஸோ வேத³னாஸு பரிஞ்ஞாதாஸு கிலேஸானங் லேஸஸ்ஸபி அபா⁴வதோ.
Tisso pariññāti heṭṭhā vuttā ñātapariññādayo tisso pariññā. Tammūlakattāti phassamūlakattā. Desanā yāva arahattā kathitā sabbaso vedanāsu pariññātāsu kilesānaṃ lesassapi abhāvato.
து³தியாஹாரவண்ணனா நிட்டி²தா.
Dutiyāhāravaṇṇanā niṭṭhitā.
ததியாஹாரவண்ணனா
Tatiyāhāravaṇṇanā
அங்கா³ரகாஸுந்தி அங்கா³ரராஸிங். பு²ணந்தீதி அத்தனோ உபரி ஸயமேவ ஆகிரந்தீதி அத்தோ². தேனாஹ ‘‘நரா ருத³ந்தா பரித³ட்³ட⁴க³த்தா’’தி. நராதி புரிஸாதி அத்தோ², ந மனுஸ்ஸா. ப⁴யஞ்ஹி மங் விந்த³தீதி ப⁴யஸ்ஸ வஸேன கரொந்தோ ப⁴யங் லப⁴தி நாம. ஸந்தரமானோவாதி ஸுட்டு² தரமானோ ஏவ ஹுத்வா. போரிஸங் வுச்சதி புரிஸப்பமாணங், தஸ்மா அதிரேகபோரிஸா புரிஸப்பமாணதோ அதி⁴கா. தேனாஹ ‘‘பஞ்சரதனப்பமாணா’’தி. அஸ்ஸாதி காஸுயா. தத³பா⁴வேதி தேஸங் ஜாலாதூ⁴மானங் அபா⁴வே. ஆரகாவஸ்ஸாதி ஆரகா ஏவ அஸ்ஸ.
Aṅgārakāsunti aṅgārarāsiṃ. Phuṇantīti attano upari sayameva ākirantīti attho. Tenāha ‘‘narā rudantā paridaḍḍhagattā’’ti. Narāti purisāti attho, na manussā. Bhayañhi maṃ vindatīti bhayassa vasena karonto bhayaṃ labhati nāma. Santaramānovāti suṭṭhu taramāno eva hutvā. Porisaṃ vuccati purisappamāṇaṃ, tasmā atirekaporisā purisappamāṇato adhikā. Tenāha ‘‘pañcaratanappamāṇā’’ti. Assāti kāsuyā. Tadabhāveti tesaṃ jālādhūmānaṃ abhāve. Ārakāvassāti ārakā eva assa.
அங்கா³ரகாஸு விய தேபூ⁴மகவட்டங் ஏகாத³ஸன்னங் அக்³கீ³னங் வஸேன மஹாபரிளாஹதோ. ஜிவி…பே॰… புது²ஜ்ஜனோ தேஹி அக்³கீ³ஹி த³ஹிதப்³ப³தோ. த்³வே ப³ல…பே॰… கம்மங் அனிச்ச²ந்தஸ்ஸேவ தஸ்ஸ வட்டது³க்கே² பாதனதோ. ஆயூஹனூபகட்³ட⁴னானங் காலபே⁴தோ³ ந சிந்தேதப்³போ³ ஏகந்தபா⁴வினோ ப²லஸ்ஸ நிப்பா²தி³தத்தாதி ஆஹ ‘‘கம்மங் ஹீ’’திஆதி³.
Aṅgārakāsu viya tebhūmakavaṭṭaṃ ekādasannaṃ aggīnaṃ vasena mahāpariḷāhato. Jivi…pe… puthujjano tehi aggīhi dahitabbato. Dve bala…pe… kammaṃ anicchantasseva tassa vaṭṭadukkhe pātanato. Āyūhanūpakaḍḍhanānaṃ kālabhedo na cintetabbo ekantabhāvino phalassa nipphāditattāti āha ‘‘kammaṃ hī’’tiādi.
ப²ஸ்ஸே வுத்தனயேனேவாதி தத்த² ‘‘ப²ஸ்ஸோ ஸங்கா²ரக்க²ந்தோ⁴’’தி வுத்தங், இத⁴ ‘‘மனோஸஞ்சேதனா ஸங்கா²ரக்க²ந்தோ⁴’’தி வத்தப்³ப³ங். ஸேஸங் வுத்தனயமேவாதி. ‘‘தண்ஹாபச்சயா உபாதா³னங், உபாதா³னபச்சயா ப⁴வோ’’தி வசனதோ மனோஸஞ்சேதனாய தண்ஹா மூலகாரணந்தி ஆஹ ‘‘தண்ஹாமூலகத்தா மனோஸஞ்சேதனாயா’’தி. தேனாஹ ‘‘ந ஹீ’’திஆதி³. கேசி பன யஸ்மா மனோஸஞ்சேதனாய ப²லபூ⁴தங் வேத³னங் படிச்ச தண்ஹா உப்பஜ்ஜதி, தஸ்மா ஏவங் வுத்தந்தி வத³ந்தி.
Phasse vuttanayenevāti tattha ‘‘phasso saṅkhārakkhandho’’ti vuttaṃ, idha ‘‘manosañcetanā saṅkhārakkhandho’’ti vattabbaṃ. Sesaṃ vuttanayamevāti. ‘‘Taṇhāpaccayā upādānaṃ, upādānapaccayā bhavo’’ti vacanato manosañcetanāya taṇhā mūlakāraṇanti āha ‘‘taṇhāmūlakattā manosañcetanāyā’’ti. Tenāha ‘‘na hī’’tiādi. Keci pana yasmā manosañcetanāya phalabhūtaṃ vedanaṃ paṭicca taṇhā uppajjati, tasmā evaṃ vuttanti vadanti.
ததியாஹாரவண்ணனா நிட்டி²தா.
Tatiyāhāravaṇṇanā niṭṭhitā.
சதுத்தா²ஹாரவண்ணனா
Catutthāhāravaṇṇanā
அனிட்ட²பாபனவஸேன தங்ஸமங்கீ³புக்³க³லங் ஆக³ச்ச²தீதி ஆகு³, பாபங், தங் சரதி ஸீலேனாதி ஆகு³சாரீ. தேனாஹ ‘‘பாபசாரி’’ந்தி.
Aniṭṭhapāpanavasena taṃsamaṅgīpuggalaṃ āgacchatīti āgu, pāpaṃ, taṃ carati sīlenāti āgucārī. Tenāha ‘‘pāpacāri’’nti.
ராஜா விய கம்மங் பரமிஸ்ஸரபா⁴வதோ. ஆகு³சாரீ புரிஸோ விய…பே॰… புது²ஜ்ஜனோ து³க்க²வத்து²பா⁴வதோ. ஆதி³ன்னப்பஹாரவணானி தீணி ஸத்திஸதானி விய புது²ஜ்ஜனஸ்ஸ ஆதுரமானமஹாது³க்க²பதிட்ட²ங் படிஸந்தி⁴விஞ்ஞாணங். தேனாஹ ஸத்தி…பே॰… து³க்க²ந்தி.
Rājā viya kammaṃ paramissarabhāvato. Āgucārī puriso viya…pe… puthujjano dukkhavatthubhāvato. Ādinnappahāravaṇāni tīṇi sattisatāni viya puthujjanassa āturamānamahādukkhapatiṭṭhaṃ paṭisandhiviññāṇaṃ. Tenāha satti…pe… dukkhanti.
தம்மூலகத்தாதி படிஸந்தி⁴விஞ்ஞாணமூலகத்தா இதோ பரங் பவத்தனாமரூபஸ்ஸ.
Tammūlakattāti paṭisandhiviññāṇamūlakattā ito paraṃ pavattanāmarūpassa.
சதுத்தா²ஹாரவண்ணனா நிட்டி²தா.
Catutthāhāravaṇṇanā niṭṭhitā.
புத்தமங்ஸூபமஸுத்தவண்ணனா நிட்டி²தா.
Puttamaṃsūpamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. புத்தமங்ஸூபமஸுத்தங் • 3. Puttamaṃsūpamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. புத்தமங்ஸூபமஸுத்தவண்ணனா • 3. Puttamaṃsūpamasuttavaṇṇanā
