Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. புத்தஸுத்தங்
7. Puttasuttaṃ
87. ‘‘சத்தாரோமே , பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே சத்தாரோ? ஸமணமசலோ, ஸமணபுண்ட³ரீகோ, ஸமணபது³மோ, ஸமணேஸு ஸமணஸுகு²மாலோ.
87. ‘‘Cattārome , bhikkhave, puggalā santo saṃvijjamānā lokasmiṃ. Katame cattāro? Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
‘‘கத²ஞ்ச , பி⁴க்க²வே, புக்³க³லோ ஸமணமசலோ ஹோதி? இத⁴, பி⁴க்க²வே, பி⁴க்கு² ஸேகோ² ஹோதி பாடிபதோ³ 1; அனுத்தரங் யோக³க்கே²மங் பத்த²யமானோ விஹரதி. ஸெய்யதா²பி, பி⁴க்க²வே , ரஞ்ஞோ க²த்தியஸ்ஸ முத்³தா⁴வஸித்தஸ்ஸ ஜெட்டோ² புத்தோ ஆபி⁴ஸேகோ அனபி⁴ஸித்தோ மசலப்பத்தோ; ஏவமேவங் கோ², பி⁴க்க²வே, பி⁴க்கு² ஸேகோ² ஹோதி பாடிபதோ³, அனுத்தரங் யோக³க்கே²மங் பத்த²யமானோ விஹரதி. ஏவங் கோ², பி⁴க்க²வே, புக்³க³லோ ஸமணமசலோ ஹோதி.
‘‘Kathañca , bhikkhave, puggalo samaṇamacalo hoti? Idha, bhikkhave, bhikkhu sekho hoti pāṭipado 2; anuttaraṃ yogakkhemaṃ patthayamāno viharati. Seyyathāpi, bhikkhave , rañño khattiyassa muddhāvasittassa jeṭṭho putto ābhiseko anabhisitto macalappatto; evamevaṃ kho, bhikkhave, bhikkhu sekho hoti pāṭipado, anuttaraṃ yogakkhemaṃ patthayamāno viharati. Evaṃ kho, bhikkhave, puggalo samaṇamacalo hoti.
‘‘கத²ஞ்ச, பி⁴க்க²வே, புக்³க³லோ ஸமணபுண்ட³ரீகோ ஹோதி? இத⁴, பி⁴க்க²வே, பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, நோ ச கோ² அட்ட² விமொக்கே² காயேன பு²ஸித்வா விஹரதி 3. ஏவங் கோ², பி⁴க்க²வே, புக்³க³லோ ஸமணபுண்ட³ரீகோ ஹோதி.
‘‘Kathañca, bhikkhave, puggalo samaṇapuṇḍarīko hoti? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, no ca kho aṭṭha vimokkhe kāyena phusitvā viharati 4. Evaṃ kho, bhikkhave, puggalo samaṇapuṇḍarīko hoti.
‘‘கத²ஞ்ச, பி⁴க்க²வே, புக்³க³லோ ஸமணபது³மோ ஹோதி? இத⁴, பி⁴க்க²வே, பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, அட்ட² ச விமொக்கே² காயேன பு²ஸித்வா விஹரதி. ஏவங் கோ², பி⁴க்க²வே, புக்³க³லோ ஸமணபது³மோ ஹோதி.
‘‘Kathañca, bhikkhave, puggalo samaṇapadumo hoti? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, aṭṭha ca vimokkhe kāyena phusitvā viharati. Evaṃ kho, bhikkhave, puggalo samaṇapadumo hoti.
‘‘கத²ஞ்ச, பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி? இத⁴, பி⁴க்க²வே, பி⁴க்கு² யாசிதோவ ப³ஹுலங் சீவரங் பரிபு⁴ஞ்ஜதி, அப்பங் அயாசிதோ; யாசிதோவ ப³ஹுலங் பிண்ட³பாதங் பரிபு⁴ஞ்ஜதி, அப்பங் அயாசிதோ; யாசிதோவ ப³ஹுலங் ஸேனாஸனங் பரிபு⁴ஞ்ஜதி, அப்பங் அயாசிதோ; யாசிதோவ ப³ஹுலங் கி³லானப்பச்சயபே⁴ஸஜ்ஜபரிக்கா²ரங் பரிபு⁴ஞ்ஜதி, அப்பங் அயாசிதோ. யேஹி கோ² பன ஸப்³ரஹ்மசாரீஹி ஸத்³தி⁴ங் விஹரதி, த்யஸ்ஸ 5 மனாபேனேவ ப³ஹுலங் காயகம்மேன ஸமுதா³சரந்தி, அப்பங் அமனாபேன; மனாபேனேவ ப³ஹுலங் வசீகம்மேன ஸமுதா³சரந்தி, அப்பங் அமனாபேன; மனாபேனேவ ப³ஹுலங் மனோகம்மேன ஸமுதா³சரந்தி, அப்பங் அமனாபேன; மனாபங்யேவ ப³ஹுலங் உபஹாரங் உபஹரந்தி, அப்பங் அமனாபங். யானி கோ² பன தானி வேத³யிதானி பித்தஸமுட்டா²னானி வா ஸெம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா, தானி பனஸ்ஸ ந ப³ஹுதே³வ உப்பஜ்ஜந்தி. அப்பாபா³தோ⁴ ஹோதி. சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவங் கோ², பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி.
‘‘Kathañca, bhikkhave, puggalo samaṇesu samaṇasukhumālo hoti? Idha, bhikkhave, bhikkhu yācitova bahulaṃ cīvaraṃ paribhuñjati, appaṃ ayācito; yācitova bahulaṃ piṇḍapātaṃ paribhuñjati, appaṃ ayācito; yācitova bahulaṃ senāsanaṃ paribhuñjati, appaṃ ayācito; yācitova bahulaṃ gilānappaccayabhesajjaparikkhāraṃ paribhuñjati, appaṃ ayācito. Yehi kho pana sabrahmacārīhi saddhiṃ viharati, tyassa 6 manāpeneva bahulaṃ kāyakammena samudācaranti, appaṃ amanāpena; manāpeneva bahulaṃ vacīkammena samudācaranti, appaṃ amanāpena; manāpeneva bahulaṃ manokammena samudācaranti, appaṃ amanāpena; manāpaṃyeva bahulaṃ upahāraṃ upaharanti, appaṃ amanāpaṃ. Yāni kho pana tāni vedayitāni pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā, tāni panassa na bahudeva uppajjanti. Appābādho hoti. Catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, bhikkhave, puggalo samaṇesu samaṇasukhumālo hoti.
‘‘யஞ்ஹி தங், பி⁴க்க²வே, ஸம்மா வத³மானோ வதெ³ய்ய ஸமணேஸு ஸமணஸுகு²மாலோதி, மமேவ தங், பி⁴க்க²வே, ஸம்மா வத³மானோ வதெ³ய்ய ஸமணேஸு ஸமணஸுகு²மாலோதி. அஹஞ்ஹி, பி⁴க்க²வே, யாசிதோவ ப³ஹுலங் சீவரங் பரிபு⁴ஞ்ஜாமி, அப்பங் அயாசிதோ; யாசிதோவ ப³ஹுலங் பிண்ட³பாதங் பரிபு⁴ஞ்ஜாமி, அப்பங் அயாசிதோ; யாசிதோவ ப³ஹுலங் ஸேனாஸனங் பரிபு⁴ஞ்ஜாமி, அப்பங் அயாசிதோ; யாசிதோவ ப³ஹுலங் கி³லானப்பச்சயபே⁴ஸஜ்ஜபரிக்கா²ரங் பரிபு⁴ஞ்ஜாமி, அப்பங் அயாசிதோ. யேஹி கோ² பன பி⁴க்கூ²ஹி ஸத்³தி⁴ங் விஹராமி தே மே மனாபேனேவ ப³ஹுலங் காயகம்மேன ஸமுதா³சரந்தி, அப்பங் அமனாபேன; மனாபேனேவ ப³ஹுலங் வசீகம்மேன ஸமுதா³சரந்தி, அப்பங் அமனாபேன; மனாபேனேவ ப³ஹுலங் மனோகம்மேன ஸமுதா³சரந்தி, அப்பங் அமனாபேன; மனாபங்யேவ ப³ஹுலங் உபஹாரங் உபஹரந்தி, அப்பங் அமனாபங். யானி கோ² பன தானி வேத³யிதானி பித்தஸமுட்டா²னானி வா ஸெம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா, தானி மே ந ப³ஹுதே³வ உப்பஜ்ஜந்தி. அப்பாபா³தோ⁴ஹமஸ்மி. சதுன்னங் கோ² பனஸ்மி ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ அகிச்ச²லாபீ⁴ அகஸிரலாபீ⁴, ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி.
‘‘Yañhi taṃ, bhikkhave, sammā vadamāno vadeyya samaṇesu samaṇasukhumāloti, mameva taṃ, bhikkhave, sammā vadamāno vadeyya samaṇesu samaṇasukhumāloti. Ahañhi, bhikkhave, yācitova bahulaṃ cīvaraṃ paribhuñjāmi, appaṃ ayācito; yācitova bahulaṃ piṇḍapātaṃ paribhuñjāmi, appaṃ ayācito; yācitova bahulaṃ senāsanaṃ paribhuñjāmi, appaṃ ayācito; yācitova bahulaṃ gilānappaccayabhesajjaparikkhāraṃ paribhuñjāmi, appaṃ ayācito. Yehi kho pana bhikkhūhi saddhiṃ viharāmi te me manāpeneva bahulaṃ kāyakammena samudācaranti, appaṃ amanāpena; manāpeneva bahulaṃ vacīkammena samudācaranti, appaṃ amanāpena; manāpeneva bahulaṃ manokammena samudācaranti, appaṃ amanāpena; manāpaṃyeva bahulaṃ upahāraṃ upaharanti, appaṃ amanāpaṃ. Yāni kho pana tāni vedayitāni pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā, tāni me na bahudeva uppajjanti. Appābādhohamasmi. Catunnaṃ kho panasmi jhānānaṃ ābhicetasikānaṃ diṭṭhadhammasukhavihārānaṃ nikāmalābhī akicchalābhī akasiralābhī, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharāmi.
‘‘யஞ்ஹி தங், பி⁴க்க²வே, ஸம்மா வத³மானோ வதெ³ய்ய ஸமணேஸு ஸமணஸுகு²மாலோதி, மமேவ தங், பி⁴க்க²வே, ஸம்மா வத³மானோ வதெ³ய்ய ஸமணேஸு ஸமணஸுகு²மாலோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸங்விஜ்ஜமானா லோகஸ்மி’’ந்தி. ஸத்தமங்.
‘‘Yañhi taṃ, bhikkhave, sammā vadamāno vadeyya samaṇesu samaṇasukhumāloti, mameva taṃ, bhikkhave, sammā vadamāno vadeyya samaṇesu samaṇasukhumāloti. Ime kho, bhikkhave, cattāro puggalā santo saṃvijjamānā lokasmi’’nti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. புத்தஸுத்தவண்ணனா • 7. Puttasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. புத்தஸுத்தவண்ணனா • 7. Puttasuttavaṇṇanā