| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૫. રહોસઞ્ઞકત્થેરઅપદાનવણ્ણના
5. Rahosaññakattheraapadānavaṇṇanā
હિમવન્તસ્સાવિદૂરેતિઆદિકં આયસ્મતો રહોસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો એકસ્મિં બુદ્ધસુઞ્ઞકાલે મજ્ઝિમદેસે બ્રાહ્મણકુલે નિબ્બત્તો વુદ્ધિમન્વાય સકસિપ્પેસુ નિપ્ફત્તિં પત્વા તત્થ સારં અપસ્સન્તો કેવલં ઉદરં પૂરેત્વા કોધમદમાનાદયો અકુસલેયેવ દિસ્વા ઘરાવાસં પહાય હિમવન્તં પવિસિત્વા ઇસિપબ્બજ્જં પબ્બજિત્વા અનેકતાપસસતપરિવારો વસભપબ્બતસમીપે અસ્સમં માપેત્વા તીણિ વસ્સસહસ્સાનિ હિમવન્તેયેવ વસમાનો ‘‘અહં એત્તકાનં સિસ્સાનં આચરિયોતિ સમ્મતો ગરુટ્ઠાનિયો ગરુકાતબ્બો વન્દનીયો, આચરિયો મે નત્થી’’તિ દોમનસ્સપ્પત્તો તે સબ્બે સિસ્સે સન્નિપાતેત્વા બુદ્ધાનં અભાવે નિબ્બાનાધિગમાભાવં પકાસેત્વા સયં એકકો રહો વિવેકટ્ઠાનેવ નિસિન્નો બુદ્ધસ્સ સમ્મુખા નિસિન્નો વિય બુદ્ધસઞ્ઞં મનસિ કરિત્વા બુદ્ધારમ્મણં પીતિં ઉપ્પાદેત્વા સાલાયં પલ્લઙ્કં આભુજિત્વા નિસિન્નો કાલં કત્વા બ્રહ્મલોકે નિબ્બત્તિ.
Himavantassāvidūretiādikaṃ āyasmato rahosaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ekasmiṃ buddhasuññakāle majjhimadese brāhmaṇakule nibbatto vuddhimanvāya sakasippesu nipphattiṃ patvā tattha sāraṃ apassanto kevalaṃ udaraṃ pūretvā kodhamadamānādayo akusaleyeva disvā gharāvāsaṃ pahāya himavantaṃ pavisitvā isipabbajjaṃ pabbajitvā anekatāpasasataparivāro vasabhapabbatasamīpe assamaṃ māpetvā tīṇi vassasahassāni himavanteyeva vasamāno ‘‘ahaṃ ettakānaṃ sissānaṃ ācariyoti sammato garuṭṭhāniyo garukātabbo vandanīyo, ācariyo me natthī’’ti domanassappatto te sabbe sisse sannipātetvā buddhānaṃ abhāve nibbānādhigamābhāvaṃ pakāsetvā sayaṃ ekako raho vivekaṭṭhāneva nisinno buddhassa sammukhā nisinno viya buddhasaññaṃ manasi karitvā buddhārammaṇaṃ pītiṃ uppādetvā sālāyaṃ pallaṅkaṃ ābhujitvā nisinno kālaṃ katvā brahmaloke nibbatti.
૩૪. સો તત્થ ઝાનસુખેન ચિરં વસિત્વા ઇમસ્મિં બુદ્ધુપ્પાદે કુલગેહે નિબ્બત્તો કામેસુ અનલ્લીનો સત્તવસ્સિકો પબ્બજિત્વા ખુરગ્ગેયેવ અરહત્તં પત્વા છળભિઞ્ઞો હુત્વા પુબ્બેનિવાસઞાણેન અત્તનો પુબ્બકમ્મં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. વસભો નામ પબ્બતોતિ હિમવન્તપબ્બતં વિના સેસપબ્બતાનં ઉચ્ચતરભાવેન સેટ્ઠતરભાવેન વસભોતિ સઙ્ખં ગતો પબ્બતોતિ અત્થો. સેસં સબ્બત્થ ઉત્તાનત્થમેવાતિ.
34. So tattha jhānasukhena ciraṃ vasitvā imasmiṃ buddhuppāde kulagehe nibbatto kāmesu anallīno sattavassiko pabbajitvā khuraggeyeva arahattaṃ patvā chaḷabhiñño hutvā pubbenivāsañāṇena attano pubbakammaṃ saritvā sañjātasomanasso pubbacaritāpadānaṃ pakāsento himavantassāvidūretiādimāha. Vasabho nāma pabbatoti himavantapabbataṃ vinā sesapabbatānaṃ uccatarabhāvena seṭṭhatarabhāvena vasabhoti saṅkhaṃ gato pabbatoti attho. Sesaṃ sabbattha uttānatthamevāti.
રહોસઞ્ઞકત્થેરઅપદાનવણ્ણના સમત્તા.
Rahosaññakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૫. રહોસઞ્ઞકત્થેરઅપદાનં • 5. Rahosaññakattheraapadānaṃ
