| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. ராஹுலோவாத³ஸுத்தவண்ணனா
5. Rāhulovādasuttavaṇṇanā
416. ஏவங் மே ஸுதந்தி ராஹுலோவாத³ஸுத்தங். தத்த² விமுத்திபரிபாசனீயாதி விமுத்திங் பரிபாசெந்தீதி விமுத்திபரிபாசனீயா. த⁴ம்மாதி பன்னரஸ த⁴ம்மா. தே ஸத்³தி⁴ந்த்³ரியாதீ³னங் விஸுத்³தி⁴காரணவஸேன வேதி³தப்³பா³. வுத்தஞ்ஹேதங் –
416.Evaṃme sutanti rāhulovādasuttaṃ. Tattha vimuttiparipācanīyāti vimuttiṃ paripācentīti vimuttiparipācanīyā. Dhammāti pannarasa dhammā. Te saddhindriyādīnaṃ visuddhikāraṇavasena veditabbā. Vuttañhetaṃ –
‘‘அஸ்ஸத்³தே⁴ புக்³க³லே பரிவஜ்ஜயதோ, ஸத்³தே⁴ புக்³க³லே ஸேவதோ ப⁴ஜதோ பயிருபாஸதோ பஸாத³னீயே ஸுத்தந்தே பச்சவெக்க²தோ இமேஹி தீஹாகாரேஹி ஸத்³தி⁴ந்த்³ரியங் விஸுஜ்ஜ²தி. குஸீதே புக்³க³லே பரிவஜ்ஜயதோ ஆரத்³த⁴வீரியே புக்³க³லே ஸேவதோ ப⁴ஜதோ பயிருபாஸதோ ஸம்மப்பதா⁴னே பச்சவெக்க²தோ இமேஹி தீஹாகாரேஹி வீரியிந்த்³ரியங் விஸுஜ்ஜ²தி. முட்ட²ஸ்ஸதீ புக்³க³லே பரிவஜ்ஜயதோ உபட்டி²தஸ்ஸதீ புக்³க³லே ஸேவதோ ப⁴ஜதோ பயிருபாஸதோ ஸதிபட்டா²னே பச்சவெக்க²தோ இமேஹி தீஹாகாரேஹி ஸதிந்த்³ரியங் விஸுஜ்ஜ²தி . அஸமாஹிதே புக்³க³லே பரிவஜ்ஜயதோ ஸமாஹிதே புக்³க³லே ஸேவதோ ப⁴ஜதோ பயிருபாஸதோ ஜா²னவிமொக்கே² பச்சவெக்க²தோ இமேஹி தீஹாகாரேஹி ஸமாதி⁴ந்த்³ரியங் விஸுஜ்ஜ²தி. து³ப்பஞ்ஞே புக்³க³லே பரிவஜ்ஜயதோ பஞ்ஞவந்தே புக்³க³லே ஸேவதோ ப⁴ஜதோ பயிருபாஸதோ க³ம்பீ⁴ரஞாணசரியங் பச்சவெக்க²தோ இமேஹி தீஹாகாரேஹி பஞ்ஞிந்த்³ரியங் விஸுஜ்ஜ²தி. இதி இமே பஞ்ச புக்³க³லே பரிவஜ்ஜயதோ பஞ்ச புக்³க³லே ஸேவதோ ப⁴ஜதோ பயிருபாஸதோ பஞ்ச ஸுத்தந்தக்க²ந்தே⁴ பச்சவெக்க²தோ இமேஹி பன்னரஸஹி ஆகாரேஹி இமானி பஞ்சிந்த்³ரியானி விஸுஜ்ஜ²ந்தீ’’தி (படி॰ ம॰ 1.185).
‘‘Assaddhe puggale parivajjayato, saddhe puggale sevato bhajato payirupāsato pasādanīye suttante paccavekkhato imehi tīhākārehi saddhindriyaṃ visujjhati. Kusīte puggale parivajjayato āraddhavīriye puggale sevato bhajato payirupāsato sammappadhāne paccavekkhato imehi tīhākārehi vīriyindriyaṃ visujjhati. Muṭṭhassatī puggale parivajjayato upaṭṭhitassatī puggale sevato bhajato payirupāsato satipaṭṭhāne paccavekkhato imehi tīhākārehi satindriyaṃ visujjhati . Asamāhite puggale parivajjayato samāhite puggale sevato bhajato payirupāsato jhānavimokkhe paccavekkhato imehi tīhākārehi samādhindriyaṃ visujjhati. Duppaññe puggale parivajjayato paññavante puggale sevato bhajato payirupāsato gambhīrañāṇacariyaṃ paccavekkhato imehi tīhākārehi paññindriyaṃ visujjhati. Iti ime pañca puggale parivajjayato pañca puggale sevato bhajato payirupāsato pañca suttantakkhandhe paccavekkhato imehi pannarasahi ākārehi imāni pañcindriyāni visujjhantī’’ti (paṭi. ma. 1.185).
அபரேபி பன்னரஸ த⁴ம்மா விமுத்திபரிபாசனீயா – ஸத்³தா⁴தீ³னி பஞ்சிமானி இந்த்³ரியானி, அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞாதி, இமா பஞ்ச நிப்³பே³த⁴பா⁴கி³யா ஸஞ்ஞா, மேகி⁴யத்தே²ரஸ்ஸ கதி²தா கல்யாணமித்ததாத³யோ பஞ்சத⁴ம்மாதி. காய பன வேலாய ப⁴க³வதோ ஏதத³ஹோஸீதி. பச்சூஸஸமயே லோகங் வோலோகெந்தஸ்ஸ.
Aparepi pannarasa dhammā vimuttiparipācanīyā – saddhādīni pañcimāni indriyāni, aniccasaññā, anicce dukkhasaññā, dukkhe anattasaññā, pahānasaññā, virāgasaññāti, imā pañca nibbedhabhāgiyā saññā, meghiyattherassa kathitā kalyāṇamittatādayo pañcadhammāti. Kāya pana velāya bhagavato etadahosīti. Paccūsasamaye lokaṃ volokentassa.
419. அனேகானங் தே³வதாஸஹஸ்ஸானந்தி ஆயஸ்மதா ராஹுலேன பது³முத்தரஸ்ஸ ப⁴க³வதோ பாத³மூலே பாலிதனாக³ராஜகாலே பத்த²னங் பட்ட²பெந்தேன ஸத்³தி⁴ங் பத்த²னங் பட்ட²பிததே³வதாயேவ. தாஸு பன காசி பூ⁴மட்ட²கா தே³வதா, காசி அந்தலிக்க²கா, காசி சாதுமஹாராஜிகா, காசி தே³வலோகே, காசி ப்³ரஹ்மலோகே நிப்³ப³த்தா. இமஸ்மிங் பன தி³வஸே ஸப்³பா³ ஏகட்டா²னே அந்த⁴வனஸ்மிங்யேவ ஸன்னிபதிதா. த⁴ம்மசக்கு²ந்தி உபாலிஓவாத³- (ம॰ நி॰ 2.69) தீ³க⁴னக²ஸுத்தேஸு (ம॰ நி॰ 2.206) பட²மமக்³கோ³ த⁴ம்மசக்கு²ந்தி வுத்தோ, ப்³ரஹ்மாயுஸுத்தே (ம॰ நி॰ 2.395) தீணி ப²லானி, இமஸ்மிங் ஸுத்தே சத்தாரோ மக்³கா³, சத்தாரி ச ப²லானி த⁴ம்மசக்கு²ந்தி வேதி³தப்³பா³னி. தத்த² ஹி காசி தே³வதா ஸோதாபன்னா அஹேஸுங், காசி ஸகதா³கா³மீ, அனாகா³மீ, கீ²ணாஸவா. தாஸஞ்ச பன தே³வதானங் எத்தகாதி க³ணனவஸேன பரிச்சே²தோ³ நத்தி². ஸேஸங் ஸப்³ப³த்த² உத்தானமேவாதி.
419.Anekānaṃ devatāsahassānanti āyasmatā rāhulena padumuttarassa bhagavato pādamūle pālitanāgarājakāle patthanaṃ paṭṭhapentena saddhiṃ patthanaṃ paṭṭhapitadevatāyeva. Tāsu pana kāci bhūmaṭṭhakā devatā, kāci antalikkhakā, kāci cātumahārājikā, kāci devaloke, kāci brahmaloke nibbattā. Imasmiṃ pana divase sabbā ekaṭṭhāne andhavanasmiṃyeva sannipatitā. Dhammacakkhunti upāliovāda- (ma. ni. 2.69) dīghanakhasuttesu (ma. ni. 2.206) paṭhamamaggo dhammacakkhunti vutto, brahmāyusutte (ma. ni. 2.395) tīṇi phalāni, imasmiṃ sutte cattāro maggā, cattāri ca phalāni dhammacakkhunti veditabbāni. Tattha hi kāci devatā sotāpannā ahesuṃ, kāci sakadāgāmī, anāgāmī, khīṇāsavā. Tāsañca pana devatānaṃ ettakāti gaṇanavasena paricchedo natthi. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ராஹுலோவாத³ஸுத்தவண்ணனா நிட்டி²தா.
Rāhulovādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. சூளராஹுலோவாத³ஸுத்தங் • 5. Cūḷarāhulovādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. ராஹுலோவாத³ஸுத்தவண்ணனா • 5. Rāhulovādasuttavaṇṇanā
