| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ராஹுலோவாத³ஸுத்தவண்ணனா
8. Rāhulovādasuttavaṇṇanā
121. யே த⁴ம்மா ஸம்மதே³வ பா⁴விதா ப³ஹுலீகதா விமுத்தியா அரஹத்தஸ்ஸ ஸச்சி²கிரியாய ஸங்வத்தந்தி, தே ஸத்³தா⁴த³யோ ஸம்பா⁴ரா விமுத்திபரிபாசனியாதி அதி⁴ப்பேதா. பரிபாசெந்தீதி பரிபாகங் பரிணாமங் க³மெந்தி. த⁴ம்மாதி காரணபூ⁴தா த⁴ம்மா. விஸுத்³தி⁴காரணவஸேனாதி விஸுத்³தி⁴காரணதாவஸேன, ஸா பன ஸத்³தி⁴ந்த்³ரியாதீ³னங் காரணதோ விஸுத்³தி⁴. யதா² நாம ஜாதிஸம்பன்னஸ்ஸ க²த்தியகுமாரஸ்ஸ விபக்க²விக³மேன பக்க²ஸங்க³ஹேன பவத்திட்டா²னஸம்பத்தியா ச பரிஸுத்³தி⁴ ஹோதி, ஏவமேவங் த³ட்ட²ப்³பா³தி த³ஸ்ஸெந்தோ ‘‘வுத்தங் ஹேத’’ந்திஆதி³மாஹ.
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
அஸ்ஸத்³தா⁴த³யோபி புக்³க³லா ஸத்³தா⁴தீ³னங் யாவதே³வ பரிஹானாய ஹொந்தி, ஸத்³தா⁴த³யோ பாரிபூரியாவ, ததா² பஸாத³னியஸுத்தந்தாதி³பச்சவெக்க²ணா, பஸாத³னியஸுத்தந்தா நாம ஸம்பஸாத³னீயஸுத்தாத³யோ. ஸம்மப்பதா⁴னேதி ஸம்மப்பதா⁴னஸுத்தந்தே. ஸதிபட்டா²னேதி சத்தாரோ ஸதிபட்டா²னே. ஜா²னவிமொக்கே²தி ஜா²னானி சேவ விமொக்கே² ச உத்³தி³ஸ்ஸ பவத்தஸுத்தந்தே. க³ம்பீ⁴ரஞாணசரியேதி க²ந்தா⁴யதனதா⁴துபடிச்சஸமுப்பாத³படிஸங்யுத்தஸுத்தந்தே.
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
கல்யாணமித்ததாத³யோதி கல்யாணமித்ததா ஸீலஸங்வரோ அபி⁴ஸல்லேக²கதா² வீரியாரம்போ⁴ நிப்³பே³தி⁴கபஞ்ஞாதி இமே கல்யாணமித்தாத³யோ பஞ்ச த⁴ம்மா, யே ‘‘இத⁴, மேகி⁴ய, பி⁴க்கு² கல்யாணமித்தோ ஹோதீ’’திஆதி³னா உதா³னே (உதா³॰ 31) கதி²தா. லோகங் வோலோகெந்தஸ்ஸாதி ஆயஸ்மதோ ராஹுலஸ்ஸ தாஸஞ்ச தே³வதானங் இந்த்³ரியபரிபாகங் பஸ்ஸந்தஸ்ஸ. ததோ யேன அந்த⁴வனங், தத்த² தி³வாவிஹாராய மஹாஸமாக³மோ ப⁴விஸ்ஸதீதி. ததா² ஹி வக்க²தி ‘‘எத்தகாதி க³ணனாவஸேன பரிச்சே²தோ³ நத்தீ²’’தி.
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
ருக்க²பப்³ப³தனிஸ்ஸிதா பூ⁴மட்ட²கா, ஆகாஸசாரிவிமானவாஸினோ அந்தலிக்க²ட்ட²கா. த⁴ம்மசக்கு²ந்தி வேதி³தப்³பா³னி சதுஸச்சத⁴ம்மானங் த³ஸ்ஸனட்டே²ன.
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
ராஹுலோவாத³ஸுத்தவண்ணனா நிட்டி²தா.
Rāhulovādasuttavaṇṇanā niṭṭhitā.
லோககாமகு³ணவக்³க³வண்ணனா நிட்டி²தா.
Lokakāmaguṇavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ராஹுலோவாத³ஸுத்தங் • 8. Rāhulovādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ராஹுலோவாத³ஸுத்தவண்ணனா • 8. Rāhulovādasuttavaṇṇanā
