| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૮. રાહુલોવાદસુત્તવણ્ણના
8. Rāhulovādasuttavaṇṇanā
૧૨૧. યે ધમ્મા સમ્મદેવ ભાવિતા બહુલીકતા વિમુત્તિયા અરહત્તસ્સ સચ્છિકિરિયાય સંવત્તન્તિ, તે સદ્ધાદયો સમ્ભારા વિમુત્તિપરિપાચનિયાતિ અધિપ્પેતા. પરિપાચેન્તીતિ પરિપાકં પરિણામં ગમેન્તિ. ધમ્માતિ કારણભૂતા ધમ્મા. વિસુદ્ધિકારણવસેનાતિ વિસુદ્ધિકારણતાવસેન, સા પન સદ્ધિન્દ્રિયાદીનં કારણતો વિસુદ્ધિ. યથા નામ જાતિસમ્પન્નસ્સ ખત્તિયકુમારસ્સ વિપક્ખવિગમેન પક્ખસઙ્ગહેન પવત્તિટ્ઠાનસમ્પત્તિયા ચ પરિસુદ્ધિ હોતિ, એવમેવં દટ્ઠબ્બાતિ દસ્સેન્તો ‘‘વુત્તં હેત’’ન્તિઆદિમાહ.
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
અસ્સદ્ધાદયોપિ પુગ્ગલા સદ્ધાદીનં યાવદેવ પરિહાનાય હોન્તિ, સદ્ધાદયો પારિપૂરિયાવ, તથા પસાદનિયસુત્તન્તાદિપચ્ચવેક્ખણા, પસાદનિયસુત્તન્તા નામ સમ્પસાદનીયસુત્તાદયો. સમ્મપ્પધાનેતિ સમ્મપ્પધાનસુત્તન્તે. સતિપટ્ઠાનેતિ ચત્તારો સતિપટ્ઠાને. ઝાનવિમોક્ખેતિ ઝાનાનિ ચેવ વિમોક્ખે ચ ઉદ્દિસ્સ પવત્તસુત્તન્તે. ગમ્ભીરઞાણચરિયેતિ ખન્ધાયતનધાતુપટિચ્ચસમુપ્પાદપટિસંયુત્તસુત્તન્તે.
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
કલ્યાણમિત્તતાદયોતિ કલ્યાણમિત્તતા સીલસંવરો અભિસલ્લેખકથા વીરિયારમ્ભો નિબ્બેધિકપઞ્ઞાતિ ઇમે કલ્યાણમિત્તાદયો પઞ્ચ ધમ્મા, યે ‘‘ઇધ, મેઘિય, ભિક્ખુ કલ્યાણમિત્તો હોતી’’તિઆદિના ઉદાને (ઉદા॰ ૩૧) કથિતા. લોકં વોલોકેન્તસ્સાતિ આયસ્મતો રાહુલસ્સ તાસઞ્ચ દેવતાનં ઇન્દ્રિયપરિપાકં પસ્સન્તસ્સ. તતો યેન અન્ધવનં, તત્થ દિવાવિહારાય મહાસમાગમો ભવિસ્સતીતિ. તથા હિ વક્ખતિ ‘‘એત્તકાતિ ગણનાવસેન પરિચ્છેદો નત્થી’’તિ.
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
રુક્ખપબ્બતનિસ્સિતા ભૂમટ્ઠકા, આકાસચારિવિમાનવાસિનો અન્તલિક્ખટ્ઠકા. ધમ્મચક્ખુન્તિ વેદિતબ્બાનિ ચતુસચ્ચધમ્માનં દસ્સનટ્ઠેન.
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
રાહુલોવાદસુત્તવણ્ણના નિટ્ઠિતા.
Rāhulovādasuttavaṇṇanā niṭṭhitā.
લોકકામગુણવગ્ગવણ્ણના નિટ્ઠિતા.
Lokakāmaguṇavaggavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૮. રાહુલોવાદસુત્તં • 8. Rāhulovādasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. રાહુલોવાદસુત્તવણ્ણના • 8. Rāhulovādasuttavaṇṇanā
