| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. ராஜந்தேபுரப்பவேஸனஸுத்தங்
5. Rājantepurappavesanasuttaṃ
45. 1 ‘‘த³ஸயிமே , பி⁴க்க²வே, ஆதீ³னவா ராஜந்தேபுரப்பவேஸனே. கதமே த³ஸ? இத⁴, பி⁴க்க²வே, ராஜா மஹேஸியா ஸத்³தி⁴ங் நிஸின்னோ ஹோதி. தத்ர பி⁴க்கு² பவிஸதி. மஹேஸீ வா பி⁴க்கு²ங் தி³ஸ்வா ஸிதங் பாதுகரோதி, பி⁴க்கு² வா மஹேஸிங் தி³ஸ்வா ஸிதங் பாதுகரோதி. தத்த² ரஞ்ஞோ ஏவங் ஹோதி – ‘அத்³தா⁴ இமேஸங் கதங் வா கரிஸ்ஸந்தி வா’தி! அயங், பி⁴க்க²வே, பட²மோ ஆதீ³னவோ ராஜந்தேபுரப்பவேஸனே.
45.2 ‘‘Dasayime , bhikkhave, ādīnavā rājantepurappavesane. Katame dasa? Idha, bhikkhave, rājā mahesiyā saddhiṃ nisinno hoti. Tatra bhikkhu pavisati. Mahesī vā bhikkhuṃ disvā sitaṃ pātukaroti, bhikkhu vā mahesiṃ disvā sitaṃ pātukaroti. Tattha rañño evaṃ hoti – ‘addhā imesaṃ kataṃ vā karissanti vā’ti! Ayaṃ, bhikkhave, paṭhamo ādīnavo rājantepurappavesane.
‘‘புன சபரங், பி⁴க்க²வே, ராஜா ப³ஹுகிச்சோ ப³ஹுகரணீயோ அஞ்ஞதரங் இத்தி²ங் க³ந்த்வா ந ஸரதி – ‘ஸா தேன க³ப்³ப⁴ங் க³ண்ஹாதி’. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, து³தியோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rājā bahukicco bahukaraṇīyo aññataraṃ itthiṃ gantvā na sarati – ‘sā tena gabbhaṃ gaṇhāti’. Tattha rañño evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, dutiyo ādīnavo rājantepurappavesane.
‘‘புன சபரங், பி⁴க்க²வே, ரஞ்ஞோ அந்தேபுரே அஞ்ஞதரங் ரதனங் நஸ்ஸதி. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ததியோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rañño antepure aññataraṃ ratanaṃ nassati. Tattha rañño evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, tatiyo ādīnavo rājantepurappavesane.
‘‘புன சபரங், பி⁴க்க²வே, ரஞ்ஞோ அந்தேபுரே அப்³ப⁴ந்தரா கு³ய்ஹமந்தா ப³ஹித்³தா⁴ ஸம்பே⁴த³ங் க³ச்ச²ந்தி. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன . ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, சதுத்தோ² ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rañño antepure abbhantarā guyhamantā bahiddhā sambhedaṃ gacchanti. Tattha rañño evaṃ hoti – ‘na kho idha añño koci pavisati, aññatra pabbajitena . Siyā nu kho pabbajitassa kamma’nti. Ayaṃ, bhikkhave, catuttho ādīnavo rājantepurappavesane.
‘‘புன சபரங், பி⁴க்க²வே, ரஞ்ஞோ அந்தேபுரே பிதா வா புத்தங் பத்தே²தி புத்தோ வா பிதரங் பத்தே²தி. தேஸங் ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, பஞ்சமோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rañño antepure pitā vā puttaṃ pattheti putto vā pitaraṃ pattheti. Tesaṃ evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, pañcamo ādīnavo rājantepurappavesane.
‘‘புன சபரங், பி⁴க்க²வே, ராஜா நீசட்டா²னியங் உச்சே டா²னே ட²பேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ச²ட்டோ² ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rājā nīcaṭṭhāniyaṃ ucce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, chaṭṭho ādīnavo rājantepurappavesane.
‘‘புன சபரங், பி⁴க்க²வே, ராஜா உச்சட்டா²னியங் நீசே டா²னே ட²பேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ஸத்தமோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rājā uccaṭṭhāniyaṃ nīce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, sattamo ādīnavo rājantepurappavesane.
‘‘புன சபரங், பி⁴க்க²வே, ராஜா அகாலே ஸேனங் உய்யோஜேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, அட்ட²மோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rājā akāle senaṃ uyyojeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, aṭṭhamo ādīnavo rājantepurappavesane.
‘‘புன சபரங், பி⁴க்க²வே, ராஜா காலே ஸேனங் உய்யோஜெத்வா அந்தராமக்³க³தோ நிவத்தாபேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, நவமோ ஆதீ³னவோ ராஜந்தேபுரப்பவேஸனே.
‘‘Puna caparaṃ, bhikkhave, rājā kāle senaṃ uyyojetvā antarāmaggato nivattāpeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, navamo ādīnavo rājantepurappavesane.
‘‘புன சபரங், பி⁴க்க²வே, ரஞ்ஞோ அந்தேபுரங் ஹத்தி²ஸம்மத்³த³ங் அஸ்ஸஸம்மத்³த³ங் ரத²ஸம்மத்³த³ங் ரஜனீயானி ரூபஸத்³த³க³ந்த⁴ரஸபொ²ட்ட²ப்³பா³னி, யானி ந பப்³ப³ஜிதஸ்ஸ ஸாருப்பானி. அயங், பி⁴க்க²வே, த³ஸமோ ஆதீ³னவோ ராஜந்தேபுரப்பவேஸனே. இமே கோ², பி⁴க்க²வே, த³ஸ ஆதீ³னவா ராஜந்தேபுரப்பவேஸனே’’தி. பஞ்சமங்.
‘‘Puna caparaṃ, bhikkhave, rañño antepuraṃ hatthisammaddaṃ assasammaddaṃ rathasammaddaṃ rajanīyāni rūpasaddagandharasaphoṭṭhabbāni, yāni na pabbajitassa sāruppāni. Ayaṃ, bhikkhave, dasamo ādīnavo rājantepurappavesane. Ime kho, bhikkhave, dasa ādīnavā rājantepurappavesane’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. ராஜந்தேபுரப்பவேஸனஸுத்தவண்ணனா • 5. Rājantepurappavesanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. விவாத³ஸுத்தாதி³வண்ணனா • 1-8. Vivādasuttādivaṇṇanā
