| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ரோஹிதஸ்ஸஸுத்தவண்ணனா
6. Rohitassasuttavaṇṇanā
107. ஏகோகாஸேதி சக்கவாளஸ்ஸ பரியந்தஸஞ்ஞிதே ஏகஸ்மிங் ஓகாஸே. பு⁴ம்மந்தி ‘‘யத்தா²’’தி இத³ங் பு⁴ம்மவசனங், ஸாமஞ்ஞதோ வுத்தம்பி ‘‘ஸோ லோகஸ்ஸ அந்தோ’’தி வசனதோ விஸிட்ட²விஸயமேவ ஹோதி. ‘‘ந ஜாயதி ந மீயதீ’’தி வத்வா புன ‘‘ந சவதி ந உபபஜ்ஜதீ’’தி கஸ்மா வுத்தந்தி ஆஹ ‘‘இத³ங் அபராபரங்…பே॰… க³ஹித’’ந்தி. பத³க³மனேனாதி பத³ஸா க³மனேன. ஸங்கா²ரலோகஸ்ஸ அந்தங் ஸந்தா⁴ய வத³தி உபரி ஸச்சானி பகாஸேதுகாமோ. ஸங்கா²ரலோகஸ்ஸ ஹி அந்தோ நிப்³பா³னங்.
107.Ekokāseti cakkavāḷassa pariyantasaññite ekasmiṃ okāse. Bhummanti ‘‘yatthā’’ti idaṃ bhummavacanaṃ, sāmaññato vuttampi ‘‘so lokassa anto’’ti vacanato visiṭṭhavisayameva hoti. ‘‘Na jāyati na mīyatī’’ti vatvā puna ‘‘na cavati na upapajjatī’’ti kasmā vuttanti āha ‘‘idaṃ aparāparaṃ…pe… gahita’’nti. Padagamanenāti padasā gamanena. Saṅkhāralokassa antaṃ sandhāya vadati upari saccāni pakāsetukāmo. Saṅkhāralokassa hi anto nibbānaṃ.
த³ள்ஹங் தி²ரங் த⁴னு ஏதஸ்ஸாதி த³ள்ஹத⁴ன்வா. ஸோ ஏவ த³ள்ஹத⁴ம்மோதி வுத்தோ. தேனாஹ ‘‘த³ள்ஹத⁴னூ’’தி. உத்தமப்பமாணேனாதி ஸஹஸ்ஸதா²மப்பமாணேன. த⁴னுஸிப்பஸிக்கி²ததாய த⁴னுக்³க³ஹோ, ந த⁴னுக்³க³ஹமத்தேனாதி ஆஹ ‘‘த⁴னுக்³க³ஹோதி த⁴னுஆசரியோ’’தி. ‘‘த⁴னுக்³க³ஹோ’’தி வத்வா ‘‘ஸிக்கி²தோ’’தி வுத்தே த⁴னுஸிக்கா²ய ஸிக்கி²தோதி விஞ்ஞாயதி, ஸிக்கா² ச எத்தகே காலே ஸமத்த²ஸ்ஸ உக்கங்ஸக³தோ ஹோதீதி ஆஹ ‘‘த³ஸ த்³வாத³ஸ வஸ்ஸானி த⁴னுஸிப்பங் ஸிக்கி²தோ’’தி. உஸப⁴ப்பமாணேபீதி வீஸதியட்டி²யோ உஸப⁴ங், தஸ்மிங் உஸப⁴ப்பமாணே பதே³ஸே. வாலக்³க³ந்தி வாளகோடிங். கதஹத்தோ²தி பரிசிதஹத்தோ². கதஸரக்கே²போதி விவடஸரக்கே²பபதே³ஸத³ஸ்ஸனவஸேன ஸரக்கே²பகதாவீ. தேனாஹ ‘‘த³ஸ்ஸிதஸிப்போ’’தி. ‘‘கதஸிப்போ’’தி கேசி. அஸந்தி ஏதேனாதி அஸனங், கண்டோ³. தாலச்சா²யந்தி தாலச்சா²தி³ங், ஸா பன ரதனமத்தா, வித³த்தி²சதுரங்கு³லா வா.
Daḷhaṃ thiraṃ dhanu etassāti daḷhadhanvā. So eva daḷhadhammoti vutto. Tenāha ‘‘daḷhadhanū’’ti. Uttamappamāṇenāti sahassathāmappamāṇena. Dhanusippasikkhitatāya dhanuggaho, na dhanuggahamattenāti āha ‘‘dhanuggahoti dhanuācariyo’’ti. ‘‘Dhanuggaho’’ti vatvā ‘‘sikkhito’’ti vutte dhanusikkhāya sikkhitoti viññāyati, sikkhā ca ettake kāle samatthassa ukkaṃsagato hotīti āha ‘‘dasa dvādasa vassāni dhanusippaṃ sikkhito’’ti. Usabhappamāṇepīti vīsatiyaṭṭhiyo usabhaṃ, tasmiṃ usabhappamāṇe padese. Vālagganti vāḷakoṭiṃ. Katahatthoti paricitahattho. Katasarakkhepoti vivaṭasarakkhepapadesadassanavasena sarakkhepakatāvī. Tenāha ‘‘dassitasippo’’ti. ‘‘Katasippo’’ti keci. Asanti etenāti asanaṃ, kaṇḍo. Tālacchāyanti tālacchādiṃ, sā pana ratanamattā, vidatthicaturaṅgulā vā.
புரத்தி²மஸமுத்³தா³தி ஏகஸ்மிங் சக்கவாளே புரத்தி²மஸமுத்³தா³. ஸமுத்³த³ஸீஸேன புரத்தி²மசக்கவாளமுக²வட்டிங் வத³தி. பச்சி²மஸமுத்³தோ³தி எத்தா²பி ஏஸேவ நயோ. நிப்பபஞ்சதந்தி அத³ந்த⁴காரிதங். ஸம்பத்தேதி தாதி³ஸேன ஜவேன க³ச்ச²ந்தேன ஸம்பத்தே. அனோதத்தேதி எத்தா²பி ‘‘ஸம்பத்தே’’தி பத³ங் ஆனெத்வா ஸம்ப³ந்தோ⁴, ததா² ‘‘நாக³லதாத³ந்தகட்ட²ங் கா²தி³த்வா’’தி எத்தா²பி. ததா³தி யதா³ ஸோ லோகந்தக³வேஸகோ அஹோஸி, ததா³. தீ³கா⁴யுககாலோதி அனேகவஸ்ஸஸஹஸ்ஸாயுககாலோ. சக்கவாளலோகஸ்ஸாதி ஸாமஞ்ஞவஸேன ஏகவசனங், சக்கவாளலோகந்தி அத்தோ². இமஸ்மிங்யேவ சக்கவாளே நிப்³ப³த்தி புப்³ப³பரிசரியஸித்³தா⁴ய நிகந்தியா. ஸஸஞ்ஞிம்ஹி ஸமனகேதி ந ரூபத⁴ம்மமத்தகே, அத² கோ² பஞ்சக்க²ந்த⁴ஸமுதா³யேதி த³ஸ்ஸேதி. ஸமிதபாபோதி ஸமுச்சி²ன்னஸங்கிலேஸத⁴ம்மோ.
Puratthimasamuddāti ekasmiṃ cakkavāḷe puratthimasamuddā. Samuddasīsena puratthimacakkavāḷamukhavaṭṭiṃ vadati. Pacchimasamuddoti etthāpi eseva nayo. Nippapañcatanti adandhakāritaṃ. Sampatteti tādisena javena gacchantena sampatte. Anotatteti etthāpi ‘‘sampatte’’ti padaṃ ānetvā sambandho, tathā ‘‘nāgalatādantakaṭṭhaṃ khāditvā’’ti etthāpi. Tadāti yadā so lokantagavesako ahosi, tadā. Dīghāyukakāloti anekavassasahassāyukakālo. Cakkavāḷalokassāti sāmaññavasena ekavacanaṃ, cakkavāḷalokanti attho. Imasmiṃyeva cakkavāḷe nibbatti pubbaparicariyasiddhāya nikantiyā. Sasaññimhi samanaketi na rūpadhammamattake, atha kho pañcakkhandhasamudāyeti dasseti. Samitapāpoti samucchinnasaṃkilesadhammo.
ரோஹிதஸ்ஸஸுத்தவண்ணனா நிட்டி²தா.
Rohitassasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ரோஹிதஸ்ஸஸுத்தங் • 6. Rohitassasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ரோஹிதஸ்ஸஸுத்தவண்ணனா • 6. Rohitassasuttavaṇṇanā
