| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
7. ஸப்³ப³பரிஞ்ஞாஸுத்தவண்ணனா
7. Sabbapariññāsuttavaṇṇanā
7. ஸத்தமே ஸப்³ப³ந்தி அனவஸேஸங். அனவஸேஸவாசகோ ஹி அயங் ஸப்³ப³-ஸத்³தோ³. ஸோ யேன யேன ஸம்ப³ந்த⁴ங் க³ச்ச²தி, தஸ்ஸ தஸ்ஸ அனவஸேஸதங் தீ³பேதி; யதா² ‘‘ஸப்³ப³ங் ரூபங், ஸப்³பா³ வேத³னா, ஸப்³ப³ஸக்காயபரியாபன்னேஸு த⁴ம்மேஸூ’’தி. ஸோ பனாயங் ஸப்³ப³-ஸத்³தோ³ ஸப்பதே³ஸனிப்பதே³ஸவிஸயதாய து³விதோ⁴. ததா² ஹேஸ ஸப்³ப³ஸப்³ப³ங், பதே³ஸஸப்³ப³ங், ஆயதனஸப்³ப³ங், ஸக்காயஸப்³ப³ந்தி சதூஸு விஸயேஸு தி³ட்ட²ப்பயோகோ³. தத்த² ‘‘ஸப்³பே³ த⁴ம்மா ஸப்³பா³காரேன பு³த்³த⁴ஸ்ஸ ப⁴க³வதோ ஞாணமுகே² ஆபாத²மாக³ச்ச²ந்தீ’’திஆதீ³ஸு (சூளனி॰ மோக⁴ராஜமாணவபுச்சா²னித்³தே³ஸ 85) ஸப்³ப³ஸப்³ப³ஸ்மிங் ஆக³தோ. ‘‘ஸப்³பே³ஸங் வோ, ஸாரிபுத்தா, ஸுபா⁴ஸிதங் பரியாயேனா’’திஆதீ³ஸு (ம॰ நி॰ 1.345) பதே³ஸஸப்³ப³ஸ்மிங். ‘‘ஸப்³ப³ங் வோ, பி⁴க்க²வே, தே³ஸெஸ்ஸாமி, சக்கு²ஞ்சேவ ரூபஞ்ச…பே॰…. மனஞ்சேவ த⁴ம்மே சா’’தி (ஸங்॰ நி॰ 4.23-25) எத்த² ஆயதனஸப்³ப³ஸ்மிங். ‘‘ஸப்³ப³த⁴ம்மமூலபரியாயங் வோ, பி⁴க்க²வே, தே³ஸெஸ்ஸாமீ’’திஆதீ³ஸு (ம॰ நி॰ 1.1) ஸக்காயஸப்³ப³ஸ்மிங். தத்த² ஸப்³ப³ஸப்³ப³ஸ்மிங் ஆக³தோ நிப்பதே³ஸவிஸயோ, இதரேஸு தீஸுபி ஆக³தோ ஸப்பதே³ஸவிஸயோ . இத⁴ பன ஸக்காயஸப்³ப³ஸ்மிங் வேதி³தப்³போ³. விபஸ்ஸனாய ஆரம்மணபூ⁴தா தேபூ⁴மகத⁴ம்மா ஹி இத⁴ ‘‘ஸப்³ப³’’ந்தி அனவஸேஸதோ க³ஹிதா.
7. Sattame sabbanti anavasesaṃ. Anavasesavācako hi ayaṃ sabba-saddo. So yena yena sambandhaṃ gacchati, tassa tassa anavasesataṃ dīpeti; yathā ‘‘sabbaṃ rūpaṃ, sabbā vedanā, sabbasakkāyapariyāpannesu dhammesū’’ti. So panāyaṃ sabba-saddo sappadesanippadesavisayatāya duvidho. Tathā hesa sabbasabbaṃ, padesasabbaṃ, āyatanasabbaṃ, sakkāyasabbanti catūsu visayesu diṭṭhappayogo. Tattha ‘‘sabbe dhammā sabbākārena buddhassa bhagavato ñāṇamukhe āpāthamāgacchantī’’tiādīsu (cūḷani. mogharājamāṇavapucchāniddesa 85) sabbasabbasmiṃ āgato. ‘‘Sabbesaṃ vo, sāriputtā, subhāsitaṃ pariyāyenā’’tiādīsu (ma. ni. 1.345) padesasabbasmiṃ. ‘‘Sabbaṃ vo, bhikkhave, desessāmi, cakkhuñceva rūpañca…pe…. Manañceva dhamme cā’’ti (saṃ. ni. 4.23-25) ettha āyatanasabbasmiṃ. ‘‘Sabbadhammamūlapariyāyaṃ vo, bhikkhave, desessāmī’’tiādīsu (ma. ni. 1.1) sakkāyasabbasmiṃ. Tattha sabbasabbasmiṃ āgato nippadesavisayo, itaresu tīsupi āgato sappadesavisayo . Idha pana sakkāyasabbasmiṃ veditabbo. Vipassanāya ārammaṇabhūtā tebhūmakadhammā hi idha ‘‘sabba’’nti anavasesato gahitā.
அனபி⁴ஜானந்தி ‘‘இமே த⁴ம்மா குஸலா, இமே அகுஸலா, இமே ஸாவஜ்ஜா, இமே அனவஜ்ஜா’’திஆதி³னா ‘‘இமே பஞ்சக்க²ந்தா⁴, இமானி த்³வாத³ஸாயதனானி, இமா அட்டா²ரஸ தா⁴துயோ, இத³ங் து³க்க²ங் அரியஸச்சங், அயங் து³க்க²ஸமுத³யோ அரியஸச்ச’’ந்தி ச ஆதி³னா ஸப்³பே³ அபி⁴ஞ்ஞெய்யே த⁴ம்மே அவிபரீதஸபா⁴வதோ அனபி⁴ஜானந்தோ அபி⁴விஸிட்டே²ன ஞாணேன ந ஜானந்தோ. அபரிஜானந்தி ந பரிஜானந்தோ. யோ ஹி ஸப்³ப³ங் தேபூ⁴மகத⁴ம்மஜாதங் பரிஜானாதி, ஸோ தீஹி பரிஞ்ஞாஹி பரிஜானாதி – ஞாதபரிஞ்ஞாய, தீரணபரிஞ்ஞாய, பஹானபரிஞ்ஞாய. தத்த² கதமா ஞாதபரிஞ்ஞா? ஸப்³ப³ங் தேபூ⁴மகங் நாமரூபங் – ‘‘இத³ங் ரூபங், எத்தகங் ரூபங், ந இதோ பி⁴ய்யோ. இத³ங் நாமங், எத்தகங் நாமங், ந இதோ பி⁴ய்யோ’’தி பூ⁴தப்பஸாதா³தி³ப்பபே⁴த³ங் ரூபங், ப²ஸ்ஸாதி³ப்பபே⁴த³ங் நாமஞ்ச, லக்க²ணரஸபச்சுபட்டா²னபத³ட்டா²னதோ வவத்த²பேதி. தஸ்ஸ அவிஜ்ஜாதி³கஞ்ச பச்சயங் பரிக்³க³ண்ஹாதி. அயங் ஞாதபரிஞ்ஞா. கதமா தீரணபரிஞ்ஞா? ஏவங் ஞாதங் கத்வா தங் ஸப்³ப³ங் தீரேதி அனிச்சதோ து³க்க²தோ ரோக³தோதி த்³வாசத்தாலீஸாய ஆகாரேஹி. அயங் தீரணபரிஞ்ஞா. கதமா பஹானபரிஞ்ஞா? ஏவங் தீரயித்வா அக்³க³மக்³கே³ன ஸப்³ப³ஸ்மிங் ச²ந்த³ராக³ங் பஜஹதி. அயங் பஹானபரிஞ்ஞா.
Anabhijānanti ‘‘ime dhammā kusalā, ime akusalā, ime sāvajjā, ime anavajjā’’tiādinā ‘‘ime pañcakkhandhā, imāni dvādasāyatanāni, imā aṭṭhārasa dhātuyo, idaṃ dukkhaṃ ariyasaccaṃ, ayaṃ dukkhasamudayo ariyasacca’’nti ca ādinā sabbe abhiññeyye dhamme aviparītasabhāvato anabhijānanto abhivisiṭṭhena ñāṇena na jānanto. Aparijānanti na parijānanto. Yo hi sabbaṃ tebhūmakadhammajātaṃ parijānāti, so tīhi pariññāhi parijānāti – ñātapariññāya, tīraṇapariññāya, pahānapariññāya. Tattha katamā ñātapariññā? Sabbaṃ tebhūmakaṃ nāmarūpaṃ – ‘‘idaṃ rūpaṃ, ettakaṃ rūpaṃ, na ito bhiyyo. Idaṃ nāmaṃ, ettakaṃ nāmaṃ, na ito bhiyyo’’ti bhūtappasādādippabhedaṃ rūpaṃ, phassādippabhedaṃ nāmañca, lakkhaṇarasapaccupaṭṭhānapadaṭṭhānato vavatthapeti. Tassa avijjādikañca paccayaṃ pariggaṇhāti. Ayaṃ ñātapariññā. Katamā tīraṇapariññā? Evaṃ ñātaṃ katvā taṃ sabbaṃ tīreti aniccato dukkhato rogatoti dvācattālīsāya ākārehi. Ayaṃ tīraṇapariññā. Katamā pahānapariññā? Evaṃ tīrayitvā aggamaggena sabbasmiṃ chandarāgaṃ pajahati. Ayaṃ pahānapariññā.
தி³ட்டி²விஸுத்³தி⁴கங்கா²விதரணவிஸுத்³தி⁴யோபி ஞாதபரிஞ்ஞா. மக்³கா³மக்³க³படிபதா³ஞாணத³ஸ்ஸனவிஸுத்³தி⁴யோ கலாபஸம்மஸனாதி³அனுலோமபரியோஸானா வா பஞ்ஞா தீரணபரிஞ்ஞா. அரியமக்³கே³ன பஜஹனங் பஹானபரிஞ்ஞா. யோ ஸப்³ப³ங் பரிஜானாதி, ஸோ இமாஹி தீஹி பரிஞ்ஞாஹி பரிஜானாதி. இத⁴ பன விராக³ப்பஹானானங் படிக்கே²பவஸேன விஸுங் க³ஹிதத்தா ஞாதபரிஞ்ஞாய தீரணபரிஞ்ஞாய ச வஸேன பரிஜானநா வேதி³தப்³பா³. யோ பனேவங் ந பரிஜானாதி, தங் ஸந்தா⁴ய வுத்தங் ‘‘அபரிஜான’’ந்தி.
Diṭṭhivisuddhikaṅkhāvitaraṇavisuddhiyopi ñātapariññā. Maggāmaggapaṭipadāñāṇadassanavisuddhiyo kalāpasammasanādianulomapariyosānā vā paññā tīraṇapariññā. Ariyamaggena pajahanaṃ pahānapariññā. Yo sabbaṃ parijānāti, so imāhi tīhi pariññāhi parijānāti. Idha pana virāgappahānānaṃ paṭikkhepavasena visuṃ gahitattā ñātapariññāya tīraṇapariññāya ca vasena parijānanā veditabbā. Yo panevaṃ na parijānāti, taṃ sandhāya vuttaṃ ‘‘aparijāna’’nti.
தத்த² சித்தங் அவிராஜயந்தி தஸ்மிங் அபி⁴ஞ்ஞெய்யவிஸேஸே பரிஞ்ஞெய்யே அத்தனோ சித்தஸந்தானங் ந விராஜயங், ந விரஜ்ஜந்தோ; யதா² தத்த² ராகோ³ ந ஹோதி, ஏவங் விராகா³னுபஸ்ஸனங் ந உப்பாதெ³ந்தோதி அத்தோ². அப்பஜஹந்தி விபஸ்ஸனாபஞ்ஞாஸஹிதாய மக்³க³பஞ்ஞாய தத்த² பஹாதப்³ப³யுத்தகங் கிலேஸவட்டங் அனவஸேஸதோ ந பஜஹந்தோ. யதா² சேதங், ஏவங் அபி⁴ஜானநாத³யோபி மிஸ்ஸகமக்³க³வஸேன வேதி³தப்³பா³. புப்³ப³பா⁴கே³ ஹி நானாசித்தவஸேன ஞாததீரணபஹானபரிஞ்ஞாஹி கமேன அபி⁴ஜானநாதீ³னி ஸம்பாதெ³த்வா மக்³க³காலே ஏகக்க²ணேனேவ கிச்சவஸேன தங் ஸப்³ப³ங் நிப்பா²தெ³ந்தங் ஏகமேவ ஞாணங் பவத்ததீதி. அப⁴ப்³போ³ து³க்க²க்க²யாயாதி நிப்³பா³னாய ஸகலஸ்ஸ வட்டது³க்க²ஸ்ஸ கே²பனாய ந ப⁴ப்³போ³, நாலங் ந ஸமத்தோ²தி அத்தோ².
Tattha cittaṃ avirājayanti tasmiṃ abhiññeyyavisese pariññeyye attano cittasantānaṃ na virājayaṃ, na virajjanto; yathā tattha rāgo na hoti, evaṃ virāgānupassanaṃ na uppādentoti attho. Appajahanti vipassanāpaññāsahitāya maggapaññāya tattha pahātabbayuttakaṃ kilesavaṭṭaṃ anavasesato na pajahanto. Yathā cetaṃ, evaṃ abhijānanādayopi missakamaggavasena veditabbā. Pubbabhāge hi nānācittavasena ñātatīraṇapahānapariññāhi kamena abhijānanādīni sampādetvā maggakāle ekakkhaṇeneva kiccavasena taṃ sabbaṃ nipphādentaṃ ekameva ñāṇaṃ pavattatīti. Abhabbo dukkhakkhayāyāti nibbānāya sakalassa vaṭṭadukkhassa khepanāya na bhabbo, nālaṃ na samatthoti attho.
ஸப்³ப³ஞ்ச கோ²தி எத்த² ச-ஸத்³தோ³ ப்³யதிரேகே, கோ²-ஸத்³தோ³ அவதா⁴ரணே. தது³ப⁴யேன அபி⁴ஜானநாதி³தோ லத்³த⁴ப்³ப³ங் விஸேஸங் து³க்க²க்க²யஸ்ஸ ச ஏகந்தகாரணங் தீ³பேதி. அபி⁴ஜானநாதீ³ஸு யங் வத்தப்³ப³ங், தங் வுத்தமேவ. தத்த² பன படிக்கே²பவஸேன வுத்தங், இத⁴ விதா⁴னவஸேன வேதி³தப்³ப³ங். அயமேவ விஸேஸோ. அபிச அபி⁴ஜானந்தி உபாதா³னக்க²ந்த⁴பஞ்சகஸங்கா²தங் ஸக்காயஸப்³ப³ங் ஸரூபதோ பச்சயதோ ச ஞாணஸ்ஸ அபி⁴முகீ²கரணவஸேன அபி⁴ஜானந்தோ ஹுத்வா அபா⁴வாகாராதி³பரிக்³க³ஹேன தங் அனிச்சாதி³லக்க²ணேஹி பரிச்சி²ஜ்ஜமானவஸேன பரிஜானந்தோ. விராஜயந்தி ஸம்மதே³வஸ்ஸ அனிச்சதாதி³அவபோ³தே⁴ன உப்பன்னப⁴யாதீ³னவனிப்³பி³தா³தி³ஞாணானுபா⁴வேன அத்தனோ சித்தங் விரத்தங் கரொந்தோ தத்த² அணுமத்தம்பி ராக³ங் அனுப்பாதெ³ந்தோ. பஜஹந்தி வுட்டா²னகா³மினிவிபஸ்ஸனாஸஹிதாய மக்³க³பஞ்ஞாய ஸமுத³யபக்கி²யங் கிலேஸவட்டங் பஜஹந்தோ ஸமுச்சி²ந்த³ந்தோ. ப⁴ப்³போ³ து³க்க²க்க²யாயாதி ஏவங் கிலேஸமலப்பஹானேனேவ ஸப்³ப³ஸ்ஸ கம்மவட்டஸ்ஸ பரிக்கீ²ணத்தா அனவஸேஸவிபாகவட்டகே²பனாய ஸகலஸங்ஸாரவட்டது³க்க²பரிக்க²யபூ⁴தாய வா அனுபாதி³ஸேஸாய நிப்³பா³னதா⁴துயா ப⁴ப்³போ³ ஏகந்தேனேதங் பாபுணிதுந்தி ஏவமெத்த² அத்தோ² த³ட்ட²ப்³போ³.
Sabbañca khoti ettha ca-saddo byatireke, kho-saddo avadhāraṇe. Tadubhayena abhijānanādito laddhabbaṃ visesaṃ dukkhakkhayassa ca ekantakāraṇaṃ dīpeti. Abhijānanādīsu yaṃ vattabbaṃ, taṃ vuttameva. Tattha pana paṭikkhepavasena vuttaṃ, idha vidhānavasena veditabbaṃ. Ayameva viseso. Apica abhijānanti upādānakkhandhapañcakasaṅkhātaṃ sakkāyasabbaṃ sarūpato paccayato ca ñāṇassa abhimukhīkaraṇavasena abhijānanto hutvā abhāvākārādipariggahena taṃ aniccādilakkhaṇehi paricchijjamānavasena parijānanto. Virājayanti sammadevassa aniccatādiavabodhena uppannabhayādīnavanibbidādiñāṇānubhāvena attano cittaṃ virattaṃ karonto tattha aṇumattampi rāgaṃ anuppādento. Pajahanti vuṭṭhānagāminivipassanāsahitāya maggapaññāya samudayapakkhiyaṃ kilesavaṭṭaṃ pajahanto samucchindanto. Bhabbo dukkhakkhayāyāti evaṃ kilesamalappahāneneva sabbassa kammavaṭṭassa parikkhīṇattā anavasesavipākavaṭṭakhepanāya sakalasaṃsāravaṭṭadukkhaparikkhayabhūtāya vā anupādisesāya nibbānadhātuyā bhabbo ekantenetaṃ pāpuṇitunti evamettha attho daṭṭhabbo.
யோ ஸப்³ப³ங் ஸப்³ப³தோ ஞத்வாதி யோ யுத்தயோகோ³ ஆரத்³த⁴விபஸ்ஸகோ ஸப்³ப³ங் தேபூ⁴மகத⁴ம்மஜாதங் ஸப்³ப³தோ ஸப்³ப³பா⁴கே³ன குஸலாதி³க்க²ந்தா⁴தி³விபா⁴க³தோ து³க்கா²தி³பீளனாதி³விபா⁴க³தோ ச. அத² வா ஸப்³ப³தோதி ஸப்³ப³ஸ்மா கக்க²ளபு²ஸனாதி³லக்க²ணாதி³தோ அனிச்சாதி³தோ சாதி ஸப்³பா³காரதோ ஜானித்வா விபஸ்ஸனாபுப்³ப³ங்க³மேன மக்³க³ஞாணேன படிவிஜ்ஜி²த்வா, விபஸ்ஸனாஞாணேனேவ வா ஜானநஹேது. ஸப்³ப³த்தே²ஸு ந ரஜ்ஜதீதி ஸப்³பே³ஸு அதீதாதி³வஸேன அனேகபே⁴த³பி⁴ன்னேஸு ஸக்காயத⁴ம்மேஸு ந ரஜ்ஜதி, அரியமக்³கா³தி⁴க³மேன ராக³ங் ந ஜனேதி. இமினாஸ்ஸ தண்ஹாகா³ஹஸ்ஸ அபா⁴வங் த³ஸ்ஸெந்தோ தங் நிமித்தத்தா தி³ட்ட²மானக்³கா³ஹானங் ‘‘ஏதங் மம ஏஸோஹமஸ்மி, ஏஸோ மே அத்தா’’தி இமஸ்ஸ மிச்சா²கா³ஹத்தயஸ்ஸபி அபா⁴வங் த³ஸ்ஸேதி. ஸ வேதி எத்த² ஸ-இதி நிபாதமத்தங். வே-தி ப்³யத்தங், ஏகங்ஸேனாதி வா ஏதஸ்மிங் அத்தே² நிபாதோ. ஸப்³ப³பரிஞ்ஞாதி ஸப்³ப³பரிஜானநதோ, யதா²வுத்தஸ்ஸ ஸப்³ப³ஸ்ஸ அபி⁴ஸமயவஸேன பரிஜானநதோ. ஸோதி யதா²வுத்தோ யோகா³வசரோ, அரியோ ஏவ வா. ஸப்³ப³து³க்க²முபச்சகா³தி ஸப்³ப³ங் வட்டது³க்க²ங் அச்சகா³ அதிக்கமி, ஸமதிக்கமீதி அத்தோ².
Yo sabbaṃ sabbato ñatvāti yo yuttayogo āraddhavipassako sabbaṃ tebhūmakadhammajātaṃ sabbato sabbabhāgena kusalādikkhandhādivibhāgato dukkhādipīḷanādivibhāgato ca. Atha vā sabbatoti sabbasmā kakkhaḷaphusanādilakkhaṇādito aniccādito cāti sabbākārato jānitvā vipassanāpubbaṅgamena maggañāṇena paṭivijjhitvā, vipassanāñāṇeneva vā jānanahetu. Sabbatthesu na rajjatīti sabbesu atītādivasena anekabhedabhinnesu sakkāyadhammesu na rajjati, ariyamaggādhigamena rāgaṃ na janeti. Imināssa taṇhāgāhassa abhāvaṃ dassento taṃ nimittattā diṭṭhamānaggāhānaṃ ‘‘etaṃ mama esohamasmi, eso me attā’’ti imassa micchāgāhattayassapi abhāvaṃ dasseti. Sa veti ettha sa-iti nipātamattaṃ. Ve-ti byattaṃ, ekaṃsenāti vā etasmiṃ atthe nipāto. Sabbapariññāti sabbaparijānanato, yathāvuttassa sabbassa abhisamayavasena parijānanato. Soti yathāvutto yogāvacaro, ariyo eva vā. Sabbadukkhamupaccagāti sabbaṃ vaṭṭadukkhaṃ accagā atikkami, samatikkamīti attho.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 7. ஸப்³ப³பரிஞ்ஞாஸுத்தங் • 7. Sabbapariññāsuttaṃ
