Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā)

    2. ஸப்³பா³ஸவஸுத்தவண்ணனா

    2. Sabbāsavasuttavaṇṇanā

    14. ஏவங் மே ஸுதங்…பே॰… ஸாவத்தி²யந்தி ஸப்³பா³ஸவஸுத்தங். தத்ராயங் அபுப்³ப³பத³வண்ணனா – ஸாவத்தீ²தி ஸவத்த²ஸ்ஸ இஸினோ நிவாஸட்டா²னபூ⁴தா நக³ரீ, யதா² காகந்தீ³ மாகந்தீ³ கோஸம்பீ³தி ஏவங் தாவ அக்க²ரசிந்தகா. அட்ட²கதா²சரியா பன ப⁴ணந்தி ‘‘யங்கிஞ்சி மனுஸ்ஸானங் உபபோ⁴க³பரிபோ⁴க³ங் ஸப்³ப³மெத்த² அத்தீ²தி ஸாவத்தீ². ஸத்த²ஸமாயோகே³ ச கிங் ப⁴ண்ட³மத்தீ²தி புச்சி²தே ஸப்³ப³மத்தீ²’’தி வசனமுபாதா³ய ஸாவத்தீ².

    14.Evaṃme sutaṃ…pe… sāvatthiyanti sabbāsavasuttaṃ. Tatrāyaṃ apubbapadavaṇṇanā – sāvatthīti savatthassa isino nivāsaṭṭhānabhūtā nagarī, yathā kākandī mākandī kosambīti evaṃ tāva akkharacintakā. Aṭṭhakathācariyā pana bhaṇanti ‘‘yaṃkiñci manussānaṃ upabhogaparibhogaṃ sabbamettha atthīti sāvatthī. Satthasamāyoge ca kiṃ bhaṇḍamatthīti pucchite sabbamatthī’’ti vacanamupādāya sāvatthī.

    ‘‘ஸப்³ப³தா³ ஸப்³பூ³பகரணங், ஸாவத்தி²யங் ஸமோஹிதங்;

    ‘‘Sabbadā sabbūpakaraṇaṃ, sāvatthiyaṃ samohitaṃ;

    தஸ்மா ஸப்³ப³முபாதா³ய, ஸாவத்தீ²தி பவுச்சதி.

    Tasmā sabbamupādāya, sāvatthīti pavuccati.

    கோஸலானங் புரங் ரம்மங், த³ஸ்ஸனெய்யங் மனோரமங்;

    Kosalānaṃ puraṃ rammaṃ, dassaneyyaṃ manoramaṃ;

    த³ஸஹி ஸத்³தே³ஹி அவிவித்தங், அன்னபானஸமாயுதங்.

    Dasahi saddehi avivittaṃ, annapānasamāyutaṃ.

    வுத்³தி⁴ங் வேபுல்லதங் பத்தங், இத்³த⁴ங் பீ²தங் மனோரமங்;

    Vuddhiṃ vepullataṃ pattaṃ, iddhaṃ phītaṃ manoramaṃ;

    அளகமந்தா³வ தே³வானங், ஸாவத்தி²புரமுத்தம’’ந்தி.

    Aḷakamandāva devānaṃ, sāvatthipuramuttama’’nti.

    தஸ்ஸங் ஸாவத்தி²யங். ஜேதவனேதி எத்த² அத்தனோ பச்சத்தி²கஜனங் ஜினாதீதி ஜேதோ, ரஞ்ஞா வா அத்தனோ பச்சத்தி²கஜனே ஜிதே ஜாதோதி ஜேதோ, மங்க³லகம்யதாய வா தஸ்ஸ ஏவங்னாமமேவ கதந்தி ஜேதோ, ஜேதஸ்ஸ வனங் ஜேதவனங். தஞ்ஹி ஜேதேன ராஜகுமாரேன ரோபிதங் ஸங்வத்³தி⁴தங் பரிபாலிதங், ஸோ ச தஸ்ஸ ஸாமீ அஹோஸி. தஸ்மா ஜேதவனந்தி வுச்சதி, தஸ்மிங் ஜேதவனே. அனாத²பிண்டி³கஸ்ஸ ஆராமேதி எத்த² ஸுத³த்தோ நாம ஸோ க³ஹபதி மாதாபிதூஹி கதனாமவஸேன. ஸப்³ப³காமஸமித்³தி⁴தாய பன விக³தமலமச்சே²ரதாய கருணாதி³கு³ணஸமங்கி³தாய ச நிச்சகாலங் அனாதா²னங் பிண்ட³மதா³ஸி, தேன அனாத²பிண்டி³கோதி ஸங்க²ங் க³தோ. ஆரமந்தி எத்த² பாணினோ விஸேஸேன வா பப்³ப³ஜிதாதி ஆராமோ, தஸ்ஸ புப்ப²ப²லாதி³ஸோபா⁴ய நாதிதூ³ரனச்சாஸன்னதாதி³பஞ்சவித⁴ஸேனாஸனங்க³ஸம்பத்தியா ச ததோ ததோ ஆக³ம்ம ரமந்தி அபி⁴ரமந்தி அனுக்கண்டி²தா ஹுத்வா நிவஸந்தீதி அத்தோ². வுத்தப்பகாராய வா ஸம்பத்தியா தத்த² தத்த² க³தேபி அத்தனோ அப்³ப⁴ந்தரங்யேவ ஆனெத்வா ரமேதீதி ஆராமோ. ஸோ ஹி அனாத²பிண்டி³கேன க³ஹபதினா ஜேதஸ்ஸ ராஜகுமாரஸ்ஸ ஹத்த²தோ அட்டா²ரஸஹி ஹிரஞ்ஞகோடீஹி கோடிஸந்த²ரேன கீணித்வா அட்டா²ரஸஹி ஹிரஞ்ஞகோடீஹி ஸேனாஸனானி காராபெத்வா அட்டா²ரஸஹி ஹிரஞ்ஞகோடீஹி விஹாரமஹங் நிட்டா²பெத்வா ஏவங் சதுபஞ்ஞாஸஹிரஞ்ஞகோடிபரிச்சாகே³ன பு³த்³த⁴ப்பமுக²ஸ்ஸ ஸங்க⁴ஸ்ஸ நிய்யாதி³தோ. தஸ்மா ‘‘அனாத²பிண்டி³கஸ்ஸ ஆராமோ’’தி வுச்சதி. தஸ்மிங் அனாத²பிண்டி³கஸ்ஸ ஆராமே.

    Tassaṃ sāvatthiyaṃ. Jetavaneti ettha attano paccatthikajanaṃ jinātīti jeto, raññā vā attano paccatthikajane jite jātoti jeto, maṅgalakamyatāya vā tassa evaṃnāmameva katanti jeto, jetassa vanaṃ jetavanaṃ. Tañhi jetena rājakumārena ropitaṃ saṃvaddhitaṃ paripālitaṃ, so ca tassa sāmī ahosi. Tasmā jetavananti vuccati, tasmiṃ jetavane. Anāthapiṇḍikassa ārāmeti ettha sudatto nāma so gahapati mātāpitūhi katanāmavasena. Sabbakāmasamiddhitāya pana vigatamalamaccheratāya karuṇādiguṇasamaṅgitāya ca niccakālaṃ anāthānaṃ piṇḍamadāsi, tena anāthapiṇḍikoti saṅkhaṃ gato. Āramanti ettha pāṇino visesena vā pabbajitāti ārāmo, tassa pupphaphalādisobhāya nātidūranaccāsannatādipañcavidhasenāsanaṅgasampattiyā ca tato tato āgamma ramanti abhiramanti anukkaṇṭhitā hutvā nivasantīti attho. Vuttappakārāya vā sampattiyā tattha tattha gatepi attano abbhantaraṃyeva ānetvā rametīti ārāmo. So hi anāthapiṇḍikena gahapatinā jetassa rājakumārassa hatthato aṭṭhārasahi hiraññakoṭīhi koṭisantharena kīṇitvā aṭṭhārasahi hiraññakoṭīhi senāsanāni kārāpetvā aṭṭhārasahi hiraññakoṭīhi vihāramahaṃ niṭṭhāpetvā evaṃ catupaññāsahiraññakoṭipariccāgena buddhappamukhassa saṅghassa niyyādito. Tasmā ‘‘anāthapiṇḍikassa ārāmo’’ti vuccati. Tasmiṃ anāthapiṇḍikassa ārāme.

    எத்த² ச ‘‘ஜேதவனே’’தி வசனங் புரிமஸாமிபரிகித்தனங். ‘‘அனாத²பிண்டி³கஸ்ஸ ஆராமே’’தி பச்சி²மஸாமிபரிகித்தனங். கிமேதேஸங் பரிகித்தனே பயோஜனந்தி. புஞ்ஞகாமானங் தி³ட்டா²னுக³திஆபஜ்ஜனங். தத்ர ஹி த்³வாரகொட்ட²கபாஸாத³மாபனே பூ⁴மிவிக்கயலத்³தா⁴ அட்டா²ரஸ ஹிரஞ்ஞகோடியோ அனேககோடிஅக்³க⁴னகா ருக்கா² ச ஜேதஸ்ஸ பரிச்சாகோ³, சதுபஞ்ஞாஸ கோடியோ அனாத²பிண்டி³கஸ்ஸ. இதி தேஸங் பரிகித்தனேன ஏவங் புஞ்ஞகாமா புஞ்ஞானி கரொந்தீதி த³ஸ்ஸெந்தோ ஆயஸ்மா ஆனந்தோ³ அஞ்ஞேபி புஞ்ஞகாமே தேஸங் தி³ட்டா²னுக³திஆபஜ்ஜனே நியோஜேதி.

    Ettha ca ‘‘jetavane’’ti vacanaṃ purimasāmiparikittanaṃ. ‘‘Anāthapiṇḍikassa ārāme’’ti pacchimasāmiparikittanaṃ. Kimetesaṃ parikittane payojananti. Puññakāmānaṃ diṭṭhānugatiāpajjanaṃ. Tatra hi dvārakoṭṭhakapāsādamāpane bhūmivikkayaladdhā aṭṭhārasa hiraññakoṭiyo anekakoṭiagghanakā rukkhā ca jetassa pariccāgo, catupaññāsa koṭiyo anāthapiṇḍikassa. Iti tesaṃ parikittanena evaṃ puññakāmā puññāni karontīti dassento āyasmā ānando aññepi puññakāme tesaṃ diṭṭhānugatiāpajjane niyojeti.

    ஸப்³பா³ஸவஸங்வரபரியாயங் வோ, பி⁴க்க²வேதி கஸ்மா இத³ங் ஸுத்தமபா⁴ஸி? தேஸங் பி⁴க்கூ²னங் உபக்கிலேஸவிஸோத⁴னங் ஆதி³ங் கத்வா ஆஸவக்க²யாய படிபத்தித³ஸ்ஸனத்த²ங். தத்த² ஸப்³பா³ஸவஸங்வரபரியாயந்தி ஸப்³பே³ஸங் ஆஸவானங் ஸங்வரகாரணங் ஸங்வரபூ⁴தங் காரணங், யேன காரணேன தே ஸங்வரிதா பித³ஹிதா ஹுத்வா அனுப்பாத³னிரோத⁴ஸங்கா²தங் க²யங் க³ச்ச²ந்தி பஹீயந்தி நப்பவத்தந்தி, தங் காரணந்தி அத்தோ². தத்த² ஆஸவந்தீதி ஆஸவா, சக்கு²தோபி…பே॰… மனதோபி ஸந்த³ந்தி பவத்தந்தீதி வுத்தங் ஹோதி. த⁴ம்மதோ யாவ கொ³த்ரபு⁴ங் ஓகாஸதோ யாவ ப⁴வக்³க³ங் ஸவந்தீதி வா ஆஸவா, ஏதே த⁴ம்மே ஏதஞ்ச ஓகாஸங் அந்தோ கரித்வா பவத்தந்தீதி அத்தோ². அந்தோகரணத்தோ² ஹி அயங் ஆகாரோ. சிரபாரிவாஸியட்டே²ன மதி³ராத³யோ ஆஸவா, ஆஸவா வியாதிபி ஆஸவா. லோகஸ்மிஞ்ஹி சிரபாரிவாஸிகா மதி³ராத³யோ ஆஸவாதி வுச்சந்தி. யதி³ ச சிரபாரிவாஸியட்டே²ன ஆஸவா, ஏதேயேவ ப⁴விதுமரஹந்தி. வுத்தஞ்ஹேதங் ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸீ’’திஆதி³ (அ॰ நி॰ 10.61). ஆயதங் வா ஸங்ஸாரது³க்க²ங் ஸவந்தி பஸவந்தீதிபி ஆஸவா. புரிமானி செத்த² நிப்³ப³சனானி யத்த² கிலேஸா ஆஸவாதி ஆக³ச்ச²ந்தி, தத்த² யுஜ்ஜந்தி, பச்சி²மங் கம்மேபி. ந கேவலஞ்ச கம்மகிலேஸாயேவ ஆஸவா, அபிச கோ² நானப்பகாரகா உப்பத்³த³வாபி. ஸுத்தேஸு ஹி ‘‘நாஹங், சுந்த³, தி³ட்ட²த⁴ம்மிகானங்யேவ ஆஸவானங் ஸங்வராய த⁴ம்மங் தே³ஸேமீ’’தி (தீ³॰ நி॰ 3.182) எத்த² விவாத³மூலபூ⁴தா கிலேஸா ஆஸவாதி ஆக³தா.

    Sabbāsavasaṃvarapariyāyaṃ vo, bhikkhaveti kasmā idaṃ suttamabhāsi? Tesaṃ bhikkhūnaṃ upakkilesavisodhanaṃ ādiṃ katvā āsavakkhayāya paṭipattidassanatthaṃ. Tattha sabbāsavasaṃvarapariyāyanti sabbesaṃ āsavānaṃ saṃvarakāraṇaṃ saṃvarabhūtaṃ kāraṇaṃ, yena kāraṇena te saṃvaritā pidahitā hutvā anuppādanirodhasaṅkhātaṃ khayaṃ gacchanti pahīyanti nappavattanti, taṃ kāraṇanti attho. Tattha āsavantīti āsavā, cakkhutopi…pe… manatopi sandanti pavattantīti vuttaṃ hoti. Dhammato yāva gotrabhuṃ okāsato yāva bhavaggaṃ savantīti vā āsavā, ete dhamme etañca okāsaṃ anto karitvā pavattantīti attho. Antokaraṇattho hi ayaṃ ākāro. Cirapārivāsiyaṭṭhena madirādayo āsavā, āsavā viyātipi āsavā. Lokasmiñhi cirapārivāsikā madirādayo āsavāti vuccanti. Yadi ca cirapārivāsiyaṭṭhena āsavā, eteyeva bhavitumarahanti. Vuttañhetaṃ ‘‘purimā, bhikkhave, koṭi na paññāyati avijjāya, ito pubbe avijjā nāhosī’’tiādi (a. ni. 10.61). Āyataṃ vā saṃsāradukkhaṃ savanti pasavantītipi āsavā. Purimāni cettha nibbacanāni yattha kilesā āsavāti āgacchanti, tattha yujjanti, pacchimaṃ kammepi. Na kevalañca kammakilesāyeva āsavā, apica kho nānappakārakā uppaddavāpi. Suttesu hi ‘‘nāhaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemī’’ti (dī. ni. 3.182) ettha vivādamūlabhūtā kilesā āsavāti āgatā.

    ‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;

    ‘‘Yena devūpapatyassa, gandhabbo vā vihaṅgamo;

    யக்க²த்தங் யேன க³ச்செ²ய்யங், மனுஸ்ஸத்தஞ்ச அப்³ப³ஜே;

    Yakkhattaṃ yena gaccheyyaṃ, manussattañca abbaje;

    தே மய்ஹங் ஆஸவா கீ²ணா, வித்³த⁴ஸ்தா வினளீகதா’’தி. (அ॰ நி॰ 4.36); –

    Te mayhaṃ āsavā khīṇā, viddhastā vinaḷīkatā’’ti. (a. ni. 4.36); –

    எத்த² தேபூ⁴மகஞ்ச கம்மங் அவஸேஸா ச அகுஸலா த⁴ம்மா. ‘‘தி³ட்ட²த⁴ம்மிகானங் ஆஸவானங் ஸங்வராய ஸம்பராயிகானங் ஆஸவானங் படிகா⁴தாயா’’தி (பாரா॰ 39) எத்த² பரூபவாத³விப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா. தே பனேதே ஆஸவா யத்த² யதா² ஆக³தா, தத்த² ததா² வேதி³தப்³பா³.

    Ettha tebhūmakañca kammaṃ avasesā ca akusalā dhammā. ‘‘Diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti (pārā. 39) ettha parūpavādavippaṭisāravadhabandhādayo ceva apāyadukkhabhūtā ca nānappakārā upaddavā. Te panete āsavā yattha yathā āgatā, tattha tathā veditabbā.

    ஏதே ஹி வினயே தாவ ‘‘தி³ட்ட²த⁴ம்மிகானங் ஆஸவானங் ஸங்வராய, ஸம்பராயிகானங் ஆஸவானங் படிகா⁴தாயா’’தி த்³வேதா⁴ ஆக³தா. ஸளாயதனே ‘‘தயோமே ஆவுஸோ ஆஸவா, காமாஸவோ ப⁴வாஸவோ அவிஜ்ஜாஸவோ’’தி (அ॰ நி॰ 6.63) திதா⁴ ஆக³தா. அஞ்ஞேஸு ச ஸுத்தந்தேஸு அபி⁴த⁴ம்மே ச தேயேவ தி³ட்டா²ஸவேன ஸஹ சதுதா⁴ ஆக³தா. நிப்³பே³தி⁴கபரியாயே – ‘‘அத்தி², பி⁴க்க²வே, ஆஸவா நிரயகா³மினியா, அத்தி² ஆஸவா திரச்சா²னயோனிகா³மினியா, அத்தி² ஆஸவா பெத்திவிஸயகா³மினியா, அத்தி² ஆஸவா மனுஸ்ஸலோககா³மினியா, அத்தி² ஆஸவா தே³வலோககா³மினியா’’தி (அ॰ நி॰ 6.63) பஞ்சதா⁴ ஆக³தா. ச²க்கனிபாதே – ‘‘அத்தி², பி⁴க்க²வே, ஆஸவா ஸங்வரா பஹாதப்³பா³’’திஆதி³னா நயேன ச²தா⁴ ஆக³தா. இமஸ்மிங் பன ஸுத்தே தேயேவ த³ஸ்ஸனாபஹாதப்³பே³ஹி ஸத்³தி⁴ங் ஸத்ததா⁴ ஆக³தாதி. அயங் தாவ ஆஸவபதே³ வசனத்தோ² சேவ பபே⁴தோ³ ச.

    Ete hi vinaye tāva ‘‘diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāyā’’ti dvedhā āgatā. Saḷāyatane ‘‘tayome āvuso āsavā, kāmāsavo bhavāsavo avijjāsavo’’ti (a. ni. 6.63) tidhā āgatā. Aññesu ca suttantesu abhidhamme ca teyeva diṭṭhāsavena saha catudhā āgatā. Nibbedhikapariyāye – ‘‘atthi, bhikkhave, āsavā nirayagāminiyā, atthi āsavā tiracchānayonigāminiyā, atthi āsavā pettivisayagāminiyā, atthi āsavā manussalokagāminiyā, atthi āsavā devalokagāminiyā’’ti (a. ni. 6.63) pañcadhā āgatā. Chakkanipāte – ‘‘atthi, bhikkhave, āsavā saṃvarā pahātabbā’’tiādinā nayena chadhā āgatā. Imasmiṃ pana sutte teyeva dassanāpahātabbehi saddhiṃ sattadhā āgatāti. Ayaṃ tāva āsavapade vacanattho ceva pabhedo ca.

    ஸங்வரபதே³ பன ஸங்வரயதீதி ஸங்வரோ, பித³ஹதி நிவாரேதி பவத்திதுங் ந தே³தீதி அத்தோ². ததா² ஹி ‘‘அனுஜானாமி, பி⁴க்க²வே, தி³வா படிஸல்லீயந்தேன த்³வாரங் ஸங்வரித்வா படிஸல்லீயிது’’ந்தி (பாரா॰ 77), ‘‘ஸோதானங் ஸங்வரங்ப்³ரஊமி, பஞ்ஞாயேதே பிதீ⁴யரே’’தி (ஸு॰ நி॰ 1041) ச ஆதீ³ஸு பிதா⁴னட்டே²ன ஸங்வரமாஹ. ஸ்வாயங் ஸங்வரோ பஞ்சவிதோ⁴ ஹோதி ஸீலஸங்வரோ ஸதிஞாண க²ந்தி வீரியஸங்வரோதி. தத்த² ‘‘இமினா பாதிமொக்க²ஸங்வரேன உபேதோ’’தி (விப⁴॰ 511) அயங் ஸீலஸங்வரோ. பாதிமொக்க²ஸீலஞ்ஹி எத்த² ஸங்வரோதி வுத்தங். ‘‘சக்கு²ந்த்³ரியே ஸங்வரமாபஜ்ஜதீ’’திஆதீ³ஸு (தீ³॰ நி॰ 1.213) ஸதிஸங்வரோ. ஸதி ஹெத்த² ஸங்வரோதி வுத்தா. ‘‘ஸோதானங் ஸங்வரங் ப்³ரூமி, பஞ்ஞாயேதே பிதீ⁴யரே’’தி அயங் ஞாணஸங்வரோ. ஞாணஞ்ஹெத்த² பிதீ⁴யரேதி இமினா பிதா⁴னட்டே²ன ஸங்வரோதி வுத்தங். ‘‘க²மோ ஹோதி ஸீதஸ்ஸ…பே॰…, உப்பன்னங் காமவிதக்கங் நாதி⁴வாஸேதீ’’திஆதி³னா (ம॰ நி॰ 1.24-26) பன நயேன இதே⁴வ க²ந்திவீரியஸங்வரா ஆக³தா. தேஸஞ்ச ‘‘ஸப்³பா³ஸவஸங்வரபரியாய’’ந்தி இமினா உத்³தே³ஸேன ஸங்க³ஹிதத்தா ஸங்வரபா⁴வோ வேதி³தப்³போ³.

    Saṃvarapade pana saṃvarayatīti saṃvaro, pidahati nivāreti pavattituṃ na detīti attho. Tathā hi ‘‘anujānāmi, bhikkhave, divā paṭisallīyantena dvāraṃ saṃvaritvā paṭisallīyitu’’nti (pārā. 77), ‘‘sotānaṃ saṃvaraṃbraūmi, paññāyete pidhīyare’’ti (su. ni. 1041) ca ādīsu pidhānaṭṭhena saṃvaramāha. Svāyaṃ saṃvaro pañcavidho hoti sīlasaṃvaro satiñāṇa khanti vīriyasaṃvaroti. Tattha ‘‘iminā pātimokkhasaṃvarena upeto’’ti (vibha. 511) ayaṃ sīlasaṃvaro. Pātimokkhasīlañhi ettha saṃvaroti vuttaṃ. ‘‘Cakkhundriye saṃvaramāpajjatī’’tiādīsu (dī. ni. 1.213) satisaṃvaro. Sati hettha saṃvaroti vuttā. ‘‘Sotānaṃ saṃvaraṃ brūmi, paññāyete pidhīyare’’ti ayaṃ ñāṇasaṃvaro. Ñāṇañhettha pidhīyareti iminā pidhānaṭṭhena saṃvaroti vuttaṃ. ‘‘Khamo hoti sītassa…pe…, uppannaṃ kāmavitakkaṃ nādhivāsetī’’tiādinā (ma. ni. 1.24-26) pana nayena idheva khantivīriyasaṃvarā āgatā. Tesañca ‘‘sabbāsavasaṃvarapariyāya’’nti iminā uddesena saṅgahitattā saṃvarabhāvo veditabbo.

    அபிச பஞ்சவிதோ⁴பி அயங் ஸங்வரோ இத⁴ ஆக³தோயேவ, தத்த² க²ந்திவீரியஸங்வரா தாவ வுத்தாயேவ. ‘‘ஸோ தஞ்ச அனாஸனங் தஞ்ச அகோ³சர’’ந்தி (ம॰ நி॰ 1.25) அயங் பனெத்த² ஸீலஸங்வரோ. ‘‘படிஸங்கா² யோனிஸோ சக்கு²ந்த்³ரியஸங்வரஸங்வுதோ’’தி (ம॰ நி॰ 1.22) அயங் ஸதிஸங்வரோ. ஸப்³ப³த்த² படிஸங்கா² ஞாணஸங்வரோ. அக்³க³ஹிதக்³க³ஹணேன பன த³ஸ்ஸனங் படிஸேவனா பா⁴வனா ச ஞாணஸங்வரோ. பரியாயந்தி ஏதேன த⁴ம்மாதி பரியாயோ, உப்பத்திங் நிரோத⁴ங் வா க³ச்ச²ந்தீதி வுத்தங் ஹோதி. எத்தாவதா ‘‘ஸப்³பா³ஸவஸங்வரபரியாய’’ந்தி எத்த² யங் வத்தப்³ப³ங், தங் வுத்தங் ஹோதி.

    Apica pañcavidhopi ayaṃ saṃvaro idha āgatoyeva, tattha khantivīriyasaṃvarā tāva vuttāyeva. ‘‘So tañca anāsanaṃ tañca agocara’’nti (ma. ni. 1.25) ayaṃ panettha sīlasaṃvaro. ‘‘Paṭisaṅkhā yoniso cakkhundriyasaṃvarasaṃvuto’’ti (ma. ni. 1.22) ayaṃ satisaṃvaro. Sabbattha paṭisaṅkhā ñāṇasaṃvaro. Aggahitaggahaṇena pana dassanaṃ paṭisevanā bhāvanā ca ñāṇasaṃvaro. Pariyāyanti etena dhammāti pariyāyo, uppattiṃ nirodhaṃ vā gacchantīti vuttaṃ hoti. Ettāvatā ‘‘sabbāsavasaṃvarapariyāya’’nti ettha yaṃ vattabbaṃ, taṃ vuttaṃ hoti.

    15. இதா³னி ஜானதோ அஹந்திஆதீ³ஸு ஜானதோதி ஜானந்தஸ்ஸ. பஸ்ஸதோதி பஸ்ஸந்தஸ்ஸ. த்³வேபி பதா³னி ஏகத்தா²னி, ப்³யஞ்ஜனமேவ நானங். ஏவங் ஸந்தேபி ஜானதோதி ஞாணலக்க²ணங் உபாதா³ய புக்³க³லங் நித்³தி³ஸதி, ஜானநலக்க²ணஞ்ஹி ஞாணங். பஸ்ஸதோதி ஞாணப்பபா⁴வங் உபாதா³ய, பஸ்ஸனப்பபா⁴வஞ்ஹி ஞாணங். ஞாணஸமங்கீ³ புக்³க³லோ சக்கு²மா விய சக்கு²னா ரூபானி ஞாணேன விவடே த⁴ம்மே பஸ்ஸதி. அபிச யோனிஸோமனஸிகாரங் உப்பாதே³துங் ஜானதோ, அயோனிஸோமனஸிகாரோ யதா² ந உப்பஜ்ஜதி, ஏவங் பஸ்ஸதோதி அயமெத்த² ஸாரோ. கேசி பனாசரியா ப³ஹூ பபஞ்சே ப⁴ணந்தி, தே இமஸ்மிங் அத்தே² ந யுஜ்ஜந்தி.

    15. Idāni jānato ahantiādīsu jānatoti jānantassa. Passatoti passantassa. Dvepi padāni ekatthāni, byañjanameva nānaṃ. Evaṃ santepi jānatoti ñāṇalakkhaṇaṃ upādāya puggalaṃ niddisati, jānanalakkhaṇañhi ñāṇaṃ. Passatoti ñāṇappabhāvaṃ upādāya, passanappabhāvañhi ñāṇaṃ. Ñāṇasamaṅgī puggalo cakkhumā viya cakkhunā rūpāni ñāṇena vivaṭe dhamme passati. Apica yonisomanasikāraṃ uppādetuṃ jānato, ayonisomanasikāro yathā na uppajjati, evaṃ passatoti ayamettha sāro. Keci panācariyā bahū papañce bhaṇanti, te imasmiṃ atthe na yujjanti.

    ஆஸவானங் க²யந்தி ஆஸவப்பஹானங் ஆஸவானங் அச்சந்தக்க²யஸமுப்பாத³ங் கீ²ணாகாரங் நத்தி²பா⁴வந்தி அயமேவ ஹி இமஸ்மிஞ்ச ஸுத்தே, ‘‘ஆஸவானங் க²யா அனாஸவங் சேதோவிமுத்தி’’ந்திஆதீ³ஸு (ம॰ நி॰ 1.438) ச ஆஸவக்க²யத்தோ². அஞ்ஞத்த² பன மக்³க³ப²லனிப்³பா³னானிபி ஆஸவக்க²யோதி வுச்சந்தி. ததா² ஹி –

    Āsavānaṃkhayanti āsavappahānaṃ āsavānaṃ accantakkhayasamuppādaṃ khīṇākāraṃ natthibhāvanti ayameva hi imasmiñca sutte, ‘‘āsavānaṃ khayā anāsavaṃ cetovimutti’’ntiādīsu (ma. ni. 1.438) ca āsavakkhayattho. Aññattha pana maggaphalanibbānānipi āsavakkhayoti vuccanti. Tathā hi –

    ‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

    ‘‘Sekhassa sikkhamānassa, ujumaggānusārino;

    க²யஸ்மிங் பட²மங் ஞாணங், ததோ அஞ்ஞா அனந்தரா’’தி. (இதிவு॰ 62) –

    Khayasmiṃ paṭhamaṃ ñāṇaṃ, tato aññā anantarā’’ti. (itivu. 62) –

    ஆதீ³ஸு மக்³கோ³ ஆஸவக்க²யோதி வுத்தோ,

    Ādīsu maggo āsavakkhayoti vutto,

    ‘‘ஆஸவானங் க²யா ஸமணோ ஹோதீ’’திஆதீ³ஸு (ம॰ நி॰ 1.438) ப²லங்.

    ‘‘Āsavānaṃ khayā samaṇo hotī’’tiādīsu (ma. ni. 1.438) phalaṃ.

    ‘‘பரவஜ்ஜானுபஸ்ஸிஸ்ஸ, நிச்சங் உஜ்ஜா²னஸஞ்ஞினோ;

    ‘‘Paravajjānupassissa, niccaṃ ujjhānasaññino;

    ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴॰ ப॰ 253) –

    Āsavā tassa vaḍḍhanti, ārā so āsavakkhayā’’ti. (dha. pa. 253) –

    ஆதீ³ஸு நிப்³பா³னங் ‘‘ஆஸவக்க²யோ’’தி வுத்தங்.

    Ādīsu nibbānaṃ ‘‘āsavakkhayo’’ti vuttaṃ.

    நோ அஜானதோ நோ அபஸ்ஸதோதி யோ பன ந ஜானாதி ந பஸ்ஸதி, தஸ்ஸ நோ வதா³மீதி அத்தோ². ஏதேன யே அஜானதோ அபஸ்ஸதோபி ஸங்வராதீ³ஹியேவ ஸுத்³தி⁴ங் வத³ந்தி, தே படிக்கி²த்தா ஹொந்தி. புரிமேன வா பத³த்³வயேன உபாயோ வுத்தோ, இமினா அனுபாயபடிஸேதோ⁴. ஸங்கே²பேன செத்த² ஞாணங் ஆஸவஸங்வரபரியாயோதி த³ஸ்ஸிதங் ஹோதி.

    No ajānato no apassatoti yo pana na jānāti na passati, tassa no vadāmīti attho. Etena ye ajānato apassatopi saṃvarādīhiyeva suddhiṃ vadanti, te paṭikkhittā honti. Purimena vā padadvayena upāyo vutto, iminā anupāyapaṭisedho. Saṅkhepena cettha ñāṇaṃ āsavasaṃvarapariyāyoti dassitaṃ hoti.

    இதா³னி யங் ஜானதோ ஆஸவானங் க²யோ ஹோதி, தங் த³ஸ்ஸேதுகாமோ கிஞ்ச, பி⁴க்க²வே, ஜானதோதி புச்ச²ங் ஆரபி⁴, தத்த² ஜானநா ப³ஹுவிதா⁴. த³ப்³ப³ஜாதிகோ ஏவ ஹி கோசி பி⁴க்கு² ச²த்தங் காதுங் ஜானாதி, கோசி சீவராதீ³னங் அஞ்ஞதரங், தஸ்ஸ ஈதி³ஸானி கம்மானி வத்தஸீஸே ட²த்வா கரொந்தஸ்ஸ ஸா ஜானநா மக்³க³ப²லானங் பத³ட்டா²னங் ந ஹோதீதி ந வத்தப்³பா³. யோ பன ஸாஸனே பப்³ப³ஜித்வா வேஜ்ஜகம்மாதீ³னி காதுங் ஜானாதி, தஸ்ஸேவங் ஜானதோ ஆஸவா வட்³ட⁴ந்தியேவ, தஸ்மா யங் ஜானதோ பஸ்ஸதோ ச ஆஸவானங் க²யோ ஹோதி, ததே³வ த³ஸ்ஸெந்தோ ஆஹ யோனிஸோ ச மனஸிகாரங் அயோனிஸோ ச மனஸிகாரந்தி.

    Idāni yaṃ jānato āsavānaṃ khayo hoti, taṃ dassetukāmo kiñca, bhikkhave, jānatoti pucchaṃ ārabhi, tattha jānanā bahuvidhā. Dabbajātiko eva hi koci bhikkhu chattaṃ kātuṃ jānāti, koci cīvarādīnaṃ aññataraṃ, tassa īdisāni kammāni vattasīse ṭhatvā karontassa sā jānanā maggaphalānaṃ padaṭṭhānaṃ na hotīti na vattabbā. Yo pana sāsane pabbajitvā vejjakammādīni kātuṃ jānāti, tassevaṃ jānato āsavā vaḍḍhantiyeva, tasmā yaṃ jānato passato ca āsavānaṃ khayo hoti, tadeva dassento āha yoniso ca manasikāraṃ ayoniso ca manasikāranti.

    தத்த² யோனிஸோ மனஸிகாரோ நாம உபாயமனஸிகாரோ பத²மனஸிகாரோ, அனிச்சாதீ³ஸு அனிச்சந்தி ஆதி³னா ஏவ நயேன ஸச்சானுலோமிகேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ, அயங் வுச்சதி யோனிஸோ மனஸிகாரோதி.

    Tattha yoniso manasikāro nāma upāyamanasikāro pathamanasikāro, aniccādīsu aniccanti ādinā eva nayena saccānulomikena vā cittassa āvaṭṭanā anvāvaṭṭanā ābhogo samannāhāro manasikāro, ayaṃ vuccati yoniso manasikāroti.

    அயோனிஸோ மனஸிகாரோதி அனுபாயமனஸிகாரோ உப்பத²மனஸிகாரோ. அனிச்சே நிச்சந்தி து³க்கே² ஸுக²ந்தி அனத்தனி அத்தாதி அஸுபே⁴ ஸுப⁴ந்தி அயோனிஸோ மனஸிகாரோ உப்பத²மனஸிகாரோ. ஸச்சப்படிகுலேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ, அயங் வுச்சதி அயோனிஸோ மனஸிகாரோதி. ஏவங் யோனிஸோ மனஸிகாரங் உப்பாதே³துங் ஜானதோ, அயோனிஸோ மனஸிகாரோ ச யதா² ந உப்பஜ்ஜதி, ஏவங் பஸ்ஸதோ ஆஸவானங் க²யோ ஹோதி.

    Ayoniso manasikāroti anupāyamanasikāro uppathamanasikāro. Anicce niccanti dukkhe sukhanti anattani attāti asubhe subhanti ayoniso manasikāro uppathamanasikāro. Saccappaṭikulena vā cittassa āvaṭṭanā anvāvaṭṭanā ābhogo samannāhāro manasikāro, ayaṃ vuccati ayoniso manasikāroti. Evaṃ yoniso manasikāraṃ uppādetuṃ jānato, ayoniso manasikāro ca yathā na uppajjati, evaṃ passato āsavānaṃ khayo hoti.

    இதா³னி இமஸ்ஸேவத்த²ஸ்ஸ யுத்திங் த³ஸ்ஸெந்தோ ஆஹ அயோனிஸோ, பி⁴க்க²வே…பே॰… பஹீயந்தீதி. தேன கிங் வுத்தங் ஹோதி, யஸ்மா அயோனிஸோ மனஸிகரோதோ ஆஸவா உப்பஜ்ஜந்தி, யோனிஸோ மனஸிகரோதோ பஹீயந்தி, தஸ்மா ஜானிதப்³ப³ங் யோனிஸோ மனஸிகாரங் உப்பாதே³துங் ஜானதோ, அயோனிஸோ மனஸிகாரோ ச யதா² ந உப்பஜ்ஜதி, ஏவங் பஸ்ஸதோ ஆஸவானங் க²யோ ஹோதீதி, அயங் தாவெத்த² ஸங்கே²பவண்ணனா.

    Idāni imassevatthassa yuttiṃ dassento āha ayoniso, bhikkhave…pe… pahīyantīti. Tena kiṃ vuttaṃ hoti, yasmā ayoniso manasikaroto āsavā uppajjanti, yoniso manasikaroto pahīyanti, tasmā jānitabbaṃ yoniso manasikāraṃ uppādetuṃ jānato, ayoniso manasikāro ca yathā na uppajjati, evaṃ passato āsavānaṃ khayo hotīti, ayaṃ tāvettha saṅkhepavaṇṇanā.

    அயங் பன வித்தா²ரோ – தத்த² ‘‘யோனிஸோ அயோனிஸோ’’தி இமேஹி தாவ த்³வீஹி பதே³ஹி ஆப³த்³த⁴ங் ஹோதி உபரி ஸகலஸுத்தங். வட்டவிவட்டவஸேன ஹி உபரி ஸகலஸுத்தங் வுத்தங். அயோனிஸோ மனஸிகாரமூலகஞ்ச வட்டங், யோனிஸோ மனஸிகாரமூலகஞ்ச விவட்டங். கத²ங்? அயோனிஸோ மனஸிகாரோ ஹி வட்³ட⁴மானோ த்³வே த⁴ம்மே பரிபூரேதி அவிஜ்ஜஞ்ச ப⁴வதண்ஹஞ்ச. அவிஜ்ஜாய ச ஸதி ‘‘அவிஜ்ஜாபச்சயா ஸங்கா²ரா…பே॰… து³க்க²க்க²ந்த⁴ஸ்ஸ ஸமுத³யோ ஹோதி. தண்ஹாய ஸதி தண்ஹாபச்சயா உபாதா³னங்…பே॰… ஸமுத³யோ ஹோதீ’’தி. ஏவங் அயங் அயோனிஸோ மனஸிகாரப³ஹுலோ புக்³க³லோ வாதவேகா³பி⁴கா⁴தேன விப்பனட்ட²னாவா விய க³ங்கா³வட்டே பதிதகோ³குலங் விய சக்கயந்தே யுத்தப³லிப³த்³தோ³ விய ச புனப்புனங் ப⁴வயோனிக³திவிஞ்ஞாணட்டி²திஸத்தாவாஸேஸு ஆவட்டபரிவட்டங் கரோதி, ஏவங் தாவ அயோனிஸோ மனஸிகாரமூலகங் வட்டங்.

    Ayaṃ pana vitthāro – tattha ‘‘yoniso ayoniso’’ti imehi tāva dvīhi padehi ābaddhaṃ hoti upari sakalasuttaṃ. Vaṭṭavivaṭṭavasena hi upari sakalasuttaṃ vuttaṃ. Ayoniso manasikāramūlakañca vaṭṭaṃ, yoniso manasikāramūlakañca vivaṭṭaṃ. Kathaṃ? Ayoniso manasikāro hi vaḍḍhamāno dve dhamme paripūreti avijjañca bhavataṇhañca. Avijjāya ca sati ‘‘avijjāpaccayā saṅkhārā…pe… dukkhakkhandhassa samudayo hoti. Taṇhāya sati taṇhāpaccayā upādānaṃ…pe… samudayo hotī’’ti. Evaṃ ayaṃ ayoniso manasikārabahulo puggalo vātavegābhighātena vippanaṭṭhanāvā viya gaṅgāvaṭṭe patitagokulaṃ viya cakkayante yuttabalibaddo viya ca punappunaṃ bhavayonigativiññāṇaṭṭhitisattāvāsesu āvaṭṭaparivaṭṭaṃ karoti, evaṃ tāva ayoniso manasikāramūlakaṃ vaṭṭaṃ.

    யோனிஸோ மனஸிகாரோ பன வட்³ட⁴மானோ – ‘‘யோனிஸோ மனஸிகாரஸம்பன்னஸ்ஸேதங், பி⁴க்க²வே, பி⁴க்கு²னோ பாடிகங்க²ங், அரியங் அட்ட²ங்கி³கங் மக்³க³ங் பா⁴வெஸ்ஸதி, அரியங் அட்ட²ங்கி³கங் மக்³க³ங் ப³ஹுலீகரிஸ்ஸதீ’’தி (ஸங்॰ நி॰ 5.55) வசனதோ ஸம்மாதி³ட்டி²பமுக²ங் அட்ட²ங்கி³கங் மக்³க³ங் பரிபூரேதி. யா ச ஸம்மாதி³ட்டி², ஸா விஜ்ஜாதி தஸ்ஸ விஜ்ஜுப்பாதா³ அவிஜ்ஜானிரோதோ⁴, ‘‘அவிஜ்ஜானிரோதா⁴ ஸங்கா²ரனிரோதோ⁴…பே॰… ஏவங் ஏதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி (மஹாவ॰ 1) ஏவங் யோனிஸோ மனஸிகாரமூலகங் விவட்டங் வேதி³தப்³ப³ங். ஏவங் இமேஹி த்³வீஹி பதே³ஹி ஆப³த்³த⁴ங் ஹோதி உபரி ஸகலஸுத்தங்.

    Yoniso manasikāro pana vaḍḍhamāno – ‘‘yoniso manasikārasampannassetaṃ, bhikkhave, bhikkhuno pāṭikaṅkhaṃ, ariyaṃ aṭṭhaṅgikaṃ maggaṃ bhāvessati, ariyaṃ aṭṭhaṅgikaṃ maggaṃ bahulīkarissatī’’ti (saṃ. ni. 5.55) vacanato sammādiṭṭhipamukhaṃ aṭṭhaṅgikaṃ maggaṃ paripūreti. Yā ca sammādiṭṭhi, sā vijjāti tassa vijjuppādā avijjānirodho, ‘‘avijjānirodhā saṅkhāranirodho…pe… evaṃ etassa kevalassa dukkhakkhandhassa nirodho hotī’’ti (mahāva. 1) evaṃ yoniso manasikāramūlakaṃ vivaṭṭaṃ veditabbaṃ. Evaṃ imehi dvīhi padehi ābaddhaṃ hoti upari sakalasuttaṃ.

    ஏவங் ஆப³த்³தே⁴ செத்த² யஸ்மா புப்³பே³ ஆஸவப்பஹானங் த³ஸ்ஸெத்வா பச்சா² உப்பத்தி வுச்சமானா ந யுஜ்ஜதி. ந ஹி பஹீனா புன உப்பஜ்ஜந்தி. உப்பன்னானங் பன பஹானங் யுஜ்ஜதி, தஸ்மா உத்³தே³ஸபடிலோமதோபி ‘‘அயோனிஸோ, பி⁴க்க²வே, மனஸிகரோதோ’’திஆதி³மாஹ.

    Evaṃ ābaddhe cettha yasmā pubbe āsavappahānaṃ dassetvā pacchā uppatti vuccamānā na yujjati. Na hi pahīnā puna uppajjanti. Uppannānaṃ pana pahānaṃ yujjati, tasmā uddesapaṭilomatopi ‘‘ayoniso, bhikkhave, manasikaroto’’tiādimāha.

    தத்த² அயோனிஸோ மனஸிகரோதோதி வுத்தப்பகாரங் அயோனிஸோ மனஸிகாரங் உப்பாத³யதோ. அனுப்பன்னா சேவ ஆஸவா உப்பஜ்ஜந்தீதி எத்த² யே புப்³பே³ அப்படிலத்³த⁴புப்³ப³ங் சீவராதி³ங் வா பச்சயங் உபட்டா²கஸத்³தி⁴விஹாரிகஅந்தேவாஸிகானங் வா அஞ்ஞதரங் மனுஞ்ஞங் வத்து²ங் படிலபி⁴த்வா, தங் ஸுப⁴ங் ஸுக²ந்தி அயோனிஸோ மனஸிகரோதோ, அஞ்ஞதரஞ்ஞதரங் வா பன அனநுபூ⁴தபுப்³ப³ங் ஆரம்மணங் யதா² வா ததா² வா அயோனிஸோ மனஸிகரோதோ ஆஸவா உப்பஜ்ஜந்தி, தே அனுப்பன்னா உப்பஜ்ஜந்தீதி வேதி³தப்³பா³, அஞ்ஞதா² ஹி அனமதக்³கே³ ஸங்ஸாரே அனுப்பன்னா நாம ஆஸவா ந ஸந்தி. அனுபூ⁴தபுப்³பே³பி ச வத்து²ம்ஹி ஆரம்மணே வா யஸ்ஸ பகதிஸுத்³தி⁴யா வா உத்³தே³ஸபரிபுச்சா²பரியத்தினவகம்மயோனிஸோமனஸிகாரானங் வா அஞ்ஞதரவஸேன புப்³பே³ அனுப்பஜ்ஜித்வா பச்சா² தாதி³ஸேன பச்சயேன ஸஹஸா உப்பஜ்ஜந்தி, இமேபி அனுப்பன்னா உப்பஜ்ஜந்தீதி வேதி³தப்³பா³. தேஸுயேவ பன வத்தா²ரம்மணேஸு புனப்புனங் உப்பஜ்ஜமானா உப்பன்னா பவட்³ட⁴ந்தீதி வுச்சந்தி. இதோ அஞ்ஞதா² ஹி பட²முப்பன்னானங் வட்³டி⁴ நாம நத்தி².

    Tattha ayoniso manasikarototi vuttappakāraṃ ayoniso manasikāraṃ uppādayato. Anuppannā ceva āsavā uppajjantīti ettha ye pubbe appaṭiladdhapubbaṃ cīvarādiṃ vā paccayaṃ upaṭṭhākasaddhivihārikaantevāsikānaṃ vā aññataraṃ manuññaṃ vatthuṃ paṭilabhitvā, taṃ subhaṃ sukhanti ayoniso manasikaroto, aññataraññataraṃ vā pana ananubhūtapubbaṃ ārammaṇaṃ yathā vā tathā vā ayoniso manasikaroto āsavā uppajjanti, te anuppannā uppajjantīti veditabbā, aññathā hi anamatagge saṃsāre anuppannā nāma āsavā na santi. Anubhūtapubbepi ca vatthumhi ārammaṇe vā yassa pakatisuddhiyā vā uddesaparipucchāpariyattinavakammayonisomanasikārānaṃ vā aññataravasena pubbe anuppajjitvā pacchā tādisena paccayena sahasā uppajjanti, imepi anuppannā uppajjantīti veditabbā. Tesuyeva pana vatthārammaṇesu punappunaṃ uppajjamānā uppannā pavaḍḍhantīti vuccanti. Ito aññathā hi paṭhamuppannānaṃ vaḍḍhi nāma natthi.

    யோனிஸோ ச கோ², பி⁴க்க²வேதி எத்த² பன யஸ்ஸ பகதிஸுத்³தி⁴யா வா ஸெய்யதா²பி ஆயஸ்மதோ மஹாகஸ்ஸபஸ்ஸ ப⁴த்³தா³ய ச காபிலானியா, உத்³தே³ஸபரிபுச்சா²தீ³ஹி வா காரணேஹி ஆஸவா நுப்பஜ்ஜந்தி, ஸோ ச ஜானாதி ‘‘ந கோ² மே ஆஸவா மக்³கே³ன ஸமுக்³கா⁴தங் க³தா, ஹந்த³ நேஸங் ஸமுக்³கா⁴தாய படிபஜ்ஜாமீ’’தி. ததோ மக்³க³பா⁴வனாய ஸப்³பே³ ஸமுக்³கா⁴தேதி. தஸ்ஸ தே ஆஸவா அனுப்பன்னா ந உப்பஜ்ஜந்தீதி வுச்சந்தி. யஸ்ஸ பன காரகஸ்ஸேவ ஸதோ ஸதிஸம்மோஸேன ஸஹஸா ஆஸவா உப்பஜ்ஜந்தி, ததோ ஸங்வேக³மாபஜ்ஜித்வா யோனிஸோ பத³ஹந்தோ தே ஆஸவே ஸமுச்சி²ந்த³தி, தஸ்ஸ உப்பன்னா பஹீயந்தீதி வுச்சந்தி மண்ட³லாராமவாஸீமஹாதிஸ்ஸபூ⁴தத்தே²ரஸ்ஸ விய. ஸோ கிர தஸ்மிங்யேவ விஹாரே உத்³தே³ஸங் க³ண்ஹாதி, அத²ஸ்ஸ கா³மே பிண்டா³ய சரதோ விஸபா⁴கா³ரம்மணே கிலேஸோ உப்பஜ்ஜி, ஸோ தங் விபஸ்ஸனாய விக்க²ம்பெ⁴த்வா விஹாரங் அக³மாஸி. தஸ்ஸ ஸுபினந்தேபி தங் ஆரம்மணங் ந உபட்டா²ஸி. ஸோ ‘‘அயங் கிலேஸோ வட்³டி⁴த்வா அபாயஸங்வத்தனிகோ ஹோதீ’’தி ஸங்வேக³ங் ஜனெத்வா ஆசரியங் ஆபுச்சி²த்வா விஹாரா நிக்க²ம்ம மஹாஸங்க⁴ரக்கி²தத்தே²ரஸ்ஸ ஸந்திகே ராக³படிபக்க²ங் அஸுப⁴கம்மட்டா²னங் க³ஹெத்வா கு³ம்ப³ந்தரங் பவிஸித்வா பங்ஸுகூலசீவரங் ஸந்த²ரித்வா நிஸஜ்ஜ அனாகா³மிமக்³கே³ன பஞ்சகாமகு³ணிகராக³ங் சி²ந்தி³த்வா உட்டா²ய ஆசரியங் வந்தி³த்வா புனதி³வஸே உத்³தே³ஸமக்³க³ங் பாபுணி. யே பன வத்தமானுப்பன்னா, தேஸங் படிபத்தியா பஹானங் நாம நத்தி².

    Yonisoca kho, bhikkhaveti ettha pana yassa pakatisuddhiyā vā seyyathāpi āyasmato mahākassapassa bhaddāya ca kāpilāniyā, uddesaparipucchādīhi vā kāraṇehi āsavā nuppajjanti, so ca jānāti ‘‘na kho me āsavā maggena samugghātaṃ gatā, handa nesaṃ samugghātāya paṭipajjāmī’’ti. Tato maggabhāvanāya sabbe samugghāteti. Tassa te āsavā anuppannā na uppajjantīti vuccanti. Yassa pana kārakasseva sato satisammosena sahasā āsavā uppajjanti, tato saṃvegamāpajjitvā yoniso padahanto te āsave samucchindati, tassa uppannā pahīyantīti vuccanti maṇḍalārāmavāsīmahātissabhūtattherassa viya. So kira tasmiṃyeva vihāre uddesaṃ gaṇhāti, athassa gāme piṇḍāya carato visabhāgārammaṇe kileso uppajji, so taṃ vipassanāya vikkhambhetvā vihāraṃ agamāsi. Tassa supinantepi taṃ ārammaṇaṃ na upaṭṭhāsi. So ‘‘ayaṃ kileso vaḍḍhitvā apāyasaṃvattaniko hotī’’ti saṃvegaṃ janetvā ācariyaṃ āpucchitvā vihārā nikkhamma mahāsaṅgharakkhitattherassa santike rāgapaṭipakkhaṃ asubhakammaṭṭhānaṃ gahetvā gumbantaraṃ pavisitvā paṃsukūlacīvaraṃ santharitvā nisajja anāgāmimaggena pañcakāmaguṇikarāgaṃ chinditvā uṭṭhāya ācariyaṃ vanditvā punadivase uddesamaggaṃ pāpuṇi. Ye pana vattamānuppannā, tesaṃ paṭipattiyā pahānaṃ nāma natthi.

    16. இதா³னி ‘‘உப்பன்னா ச ஆஸவா பஹீயந்தீ’’தி இத³மேவ பத³ங் க³ஹெத்வா யே தே ஆஸவா பஹீயந்தி, தேஸங் நானப்பகாரதோ அஞ்ஞம்பி பஹானகாரணங் ஆவிகாதுங் தே³ஸனங் வித்தா²ரெந்தோ அத்தி², பி⁴க்க²வே, ஆஸவா த³ஸ்ஸனா பஹாதப்³பா³திஆதி³மாஹ யதா² தங் தே³ஸனாபபே⁴த³குஸலோ த⁴ம்மராஜா. தத்த² த³ஸ்ஸனா பஹாதப்³பா³தி த³ஸ்ஸனேன பஹாதப்³பா³. ஏஸ நயோ ஸப்³ப³த்த².

    16. Idāni ‘‘uppannā ca āsavā pahīyantī’’ti idameva padaṃ gahetvā ye te āsavā pahīyanti, tesaṃ nānappakārato aññampi pahānakāraṇaṃ āvikātuṃ desanaṃ vitthārento atthi, bhikkhave, āsavā dassanā pahātabbātiādimāha yathā taṃ desanāpabhedakusalo dhammarājā. Tattha dassanā pahātabbāti dassanena pahātabbā. Esa nayo sabbattha.

    த³ஸ்ஸனாபஹாதப்³ப³ஆஸவவண்ணனா

    Dassanāpahātabbaāsavavaṇṇanā

    17. இதா³னி தானி பதா³னி அனுபுப்³ப³தோ ப்³யாகாதுகாமோ ‘‘கதமே ச, பி⁴க்க²வே, ஆஸவா த³ஸ்ஸனா பஹாதப்³பா³’’தி புச்ச²ங் கத்வா மூலபரியாயவண்ணனாயங் வுத்தனயேனேவ ‘‘இத⁴, பி⁴க்க²வே, அஸ்ஸுதவா புது²ஜ்ஜனோ’’தி புக்³க³லாதி⁴ட்டா²னங் தே³ஸனங் ஆரபி⁴. தத்த² மனஸிகரணீயே த⁴ம்மே நப்பஜானாதீதி ஆவஜ்ஜிதப்³பே³ ஸமன்னாஹரிதப்³பே³ த⁴ம்மே ந பஜானாதி. அமனஸிகரணீயேதி தப்³பி³பரீதே. ஏஸ நயோ ஸேஸபதே³ஸுபி. யஸ்மா பன இமே த⁴ம்மா மனஸிகரணீயா, இமே அமனஸிகரணீயாதி த⁴ம்மதோ நியமோ நத்தி², ஆகாரதோ பன அத்தி². யேனா ஆகாரேன மனஸிகரியமானா அகுஸலுப்பத்திபத³ட்டா²னா ஹொந்தி, தேனாகாரேன ந மனஸிகாதப்³பா³. யேன குஸலுப்பத்திபத³ட்டா²னா ஹொந்தி, தேனாகாரேன மனஸிகாதப்³பா³. தஸ்மா ‘‘ய’ஸ்ஸ, பி⁴க்க²வே, த⁴ம்மே மனஸிகரோதோ அனுப்பன்னோ வா காமாஸவோ’’திஆதி³மாஹ.

    17. Idāni tāni padāni anupubbato byākātukāmo ‘‘katame ca, bhikkhave, āsavā dassanā pahātabbā’’ti pucchaṃ katvā mūlapariyāyavaṇṇanāyaṃ vuttanayeneva ‘‘idha, bhikkhave, assutavā puthujjano’’ti puggalādhiṭṭhānaṃ desanaṃ ārabhi. Tattha manasikaraṇīye dhamme nappajānātīti āvajjitabbe samannāharitabbe dhamme na pajānāti. Amanasikaraṇīyeti tabbiparīte. Esa nayo sesapadesupi. Yasmā pana ime dhammā manasikaraṇīyā, ime amanasikaraṇīyāti dhammato niyamo natthi, ākārato pana atthi. Yenā ākārena manasikariyamānā akusaluppattipadaṭṭhānā honti, tenākārena na manasikātabbā. Yena kusaluppattipadaṭṭhānā honti, tenākārena manasikātabbā. Tasmā ‘‘ya’ssa, bhikkhave, dhamme manasikaroto anuppanno vā kāmāsavo’’tiādimāha.

    தத்த² ய’ஸ்ஸாதி யே அஸ்ஸ அஸ்ஸுதவதோ புது²ஜ்ஜனஸ்ஸ. மனஸிகரோதோதி ஆவஜ்ஜயதோ ஸமன்னாஹரந்தஸ்ஸ. அனுப்பன்னோ வா காமாஸவோதி எத்த² ஸமுச்சயத்தோ² வாஸத்³தோ³, ந விகப்பத்தோ². தஸ்மா யதா² ‘‘யாவதா, பி⁴க்க²வே, ஸத்தா அபதா³ வா த்³விபதா³ வா…பே॰… ததா²க³தோ தேஸங் அக்³க³மக்கா²யதீ’’தி (இதிவு॰ 90) வுத்தே அபதா³ ச த்³விபதா³ சாதி அத்தோ², யதா² ச ‘‘பூ⁴தானங் வா ஸத்தானங் டி²தியா ஸம்ப⁴வேஸீனங் வா அனுக்³க³ஹாயா’’தி (ம॰ நி॰ 1.402) வுத்தே பூ⁴தானஞ்ச ஸம்ப⁴வேஸீனஞ்சாதி அத்தோ², யதா² ச ‘‘அக்³கி³தோ வா உத³கதோ வா மிது²பே⁴த³தோ வா’’தி (உதா³॰ 76) வுத்தே அக்³கி³தோ ச உத³கதோ ச மிது²பே⁴த³தோ சாதி அத்தோ², ஏவமிதா⁴பி அனுப்பன்னோ ச காமாஸவோ உப்பஜ்ஜதி, உப்பன்னோ ச காமாஸவோ பவட்³ட⁴தீதி அத்தோ² த³ட்ட²ப்³போ³. ஏவங் ஸேஸேஸு.

    Tattha ya’ssāti ye assa assutavato puthujjanassa. Manasikarototi āvajjayato samannāharantassa. Anuppanno vā kāmāsavoti ettha samuccayattho vāsaddo, na vikappattho. Tasmā yathā ‘‘yāvatā, bhikkhave, sattā apadā vā dvipadā vā…pe… tathāgato tesaṃ aggamakkhāyatī’’ti (itivu. 90) vutte apadā ca dvipadā cāti attho, yathā ca ‘‘bhūtānaṃ vā sattānaṃ ṭhitiyā sambhavesīnaṃ vā anuggahāyā’’ti (ma. ni. 1.402) vutte bhūtānañca sambhavesīnañcāti attho, yathā ca ‘‘aggito vā udakato vā mithubhedato vā’’ti (udā. 76) vutte aggito ca udakato ca mithubhedato cāti attho, evamidhāpi anuppanno ca kāmāsavo uppajjati, uppanno ca kāmāsavo pavaḍḍhatīti attho daṭṭhabbo. Evaṃ sesesu.

    எத்த² ச காமாஸவோதி பஞ்சகாமகு³ணிகோ ராகோ³. ப⁴வாஸவோதி ருபாரூபப⁴வே ச²ந்த³ராகோ³, ஜா²னநிகந்தி ச ஸஸ்ஸதுச்சே²த³தி³ட்டி²ஸஹக³தா. ஏவங் தி³ட்டா²ஸவோபி ப⁴வாஸவே ஏவ ஸமோதா⁴னங் க³ச்ச²தி. அவிஜ்ஜாஸவோதி சதூஸு ஸச்சேஸு அஞ்ஞாணங். தத்த² காமகு³ணே அஸ்ஸாத³தோ மனஸிகரோதோ அனுப்பன்னோ ச காமாஸவோ உப்பஜ்ஜதி, உப்பன்னோ ச பவட்³ட⁴தி. மஹக்³க³தத⁴ம்மே அஸ்ஸாத³தோ மனஸிகரோதோ அனுப்பன்னோ ச ப⁴வாஸவோ உப்பஜ்ஜதி, உப்பன்னோ ச பவட்³ட⁴தி. தீஸு பூ⁴மீஸு த⁴ம்மே சதுவிபல்லாஸபத³ட்டா²னபா⁴வேன மனஸிகரோதோ அனுப்பன்னோ ச அவிஜ்ஜாஸவோ உப்பஜ்ஜதி, உப்பன்னோ ச பவட்³ட⁴தீதி வேதி³தப்³போ³. வுத்தனயபச்சனீகதோ ஸுக்கபக்கோ² வித்தா²ரேதப்³போ³.

    Ettha ca kāmāsavoti pañcakāmaguṇiko rāgo. Bhavāsavoti rupārūpabhave chandarāgo, jhānanikanti ca sassatucchedadiṭṭhisahagatā. Evaṃ diṭṭhāsavopi bhavāsave eva samodhānaṃ gacchati. Avijjāsavoti catūsu saccesu aññāṇaṃ. Tattha kāmaguṇe assādato manasikaroto anuppanno ca kāmāsavo uppajjati, uppanno ca pavaḍḍhati. Mahaggatadhamme assādato manasikaroto anuppanno ca bhavāsavo uppajjati, uppanno ca pavaḍḍhati. Tīsu bhūmīsu dhamme catuvipallāsapadaṭṭhānabhāvena manasikaroto anuppanno ca avijjāsavo uppajjati, uppanno ca pavaḍḍhatīti veditabbo. Vuttanayapaccanīkato sukkapakkho vitthāretabbo.

    கஸ்மா பன தயோ ஏவ ஆஸவா இத⁴ வுத்தாதி. விமொக்க²படிபக்க²தோ. அப்பணிஹிதவிமொக்க²படிபக்கோ² ஹி காமாஸவோ,. அனிமித்தஸுஞ்ஞதவிமொக்க²படிபக்கா² இதரே. தஸ்மா இமே தயோ ஆஸவே உப்பாதெ³ந்தா திண்ணங் விமொக்கா²னங் அபா⁴கி³னோ ஹொந்தி, அனுப்பாதெ³ந்தா பா⁴கி³னோதி ஏதமத்த²ங் த³ஸ்ஸெந்தேன தயோ ஏவ வுத்தாதி வேதி³தப்³பா³. தி³ட்டா²ஸவோபி வா எத்த² வுத்தோ யேவாதி வண்ணிதமேதங்.

    Kasmā pana tayo eva āsavā idha vuttāti. Vimokkhapaṭipakkhato. Appaṇihitavimokkhapaṭipakkho hi kāmāsavo,. Animittasuññatavimokkhapaṭipakkhā itare. Tasmā ime tayo āsave uppādentā tiṇṇaṃ vimokkhānaṃ abhāgino honti, anuppādentā bhāginoti etamatthaṃ dassentena tayo eva vuttāti veditabbā. Diṭṭhāsavopi vā ettha vutto yevāti vaṇṇitametaṃ.

    தஸ்ஸ அமனஸிகரணீயானங் த⁴ம்மானங் மனஸிகாராதி மனஸிகாரஹேது, யஸ்மா தே த⁴ம்மே மனஸி கரோதி, தஸ்மாதி வுத்தங் ஹோதி. ஏஸ நயோ து³தியபதே³பி. ‘‘அனுப்பன்னா சேவ ஆஸவா உப்பஜ்ஜந்தி, உப்பன்னா ச ஆஸவா பவட்³ட⁴ந்தீ’’தி ஹெட்டா² வுத்தஆஸவானங்யேவ அபே⁴த³தோ நிக³மனமேதங்.

    Tassaamanasikaraṇīyānaṃ dhammānaṃ manasikārāti manasikārahetu, yasmā te dhamme manasi karoti, tasmāti vuttaṃ hoti. Esa nayo dutiyapadepi. ‘‘Anuppannā ceva āsavā uppajjanti, uppannā ca āsavā pavaḍḍhantī’’ti heṭṭhā vuttaāsavānaṃyeva abhedato nigamanametaṃ.

    18. எத்தாவதா யோ அயங் புக்³க³லாதி⁴ட்டா²னாய தே³ஸனாய த³ஸ்ஸனா பஹாதப்³பே³ ஆஸவே நித்³தி³ஸிதுங் அஸ்ஸுதவா புது²ஜ்ஜனோ வுத்தோ, ஸோ யஸ்மா ‘‘அயோனிஸோ, பி⁴க்க²வே, மனஸிகரோதோ அனுப்பன்னா சேவ ஆஸவா உப்பஜ்ஜந்தீ’’தி ஏவங் ஸாமஞ்ஞதோ வுத்தானங் அயோனிஸோ மனஸிகாரபச்சயானங் காமாஸவாதீ³னம்பி அதி⁴ட்டா²னங், தஸ்மா தேபி ஆஸவே தேனேவ புக்³க³லேன த³ஸ்ஸெத்வா இதா³னி த³ஸ்ஸனா பஹாதப்³பே³ ஆஸவே த³ஸ்ஸெந்தோ ஸோ ஏவங் அயோனிஸோ மனஸி கரோதி, அஹோஸிங் நு கோ² அஹந்திஆதி³மாஹ. விசிகிச்சா²ஸீஸேன செத்த² தி³ட்டா²ஸவம்பி த³ஸ்ஸேதுங் இமங் தே³ஸனங் ஆரபி⁴.

    18. Ettāvatā yo ayaṃ puggalādhiṭṭhānāya desanāya dassanā pahātabbe āsave niddisituṃ assutavā puthujjano vutto, so yasmā ‘‘ayoniso, bhikkhave, manasikaroto anuppannā ceva āsavā uppajjantī’’ti evaṃ sāmaññato vuttānaṃ ayoniso manasikārapaccayānaṃ kāmāsavādīnampi adhiṭṭhānaṃ, tasmā tepi āsave teneva puggalena dassetvā idāni dassanā pahātabbe āsave dassento so evaṃ ayoniso manasi karoti, ahosiṃ nu kho ahantiādimāha. Vicikicchāsīsena cettha diṭṭhāsavampi dassetuṃ imaṃ desanaṃ ārabhi.

    தஸ்ஸத்தோ², யஸ்ஸ தே இமினா வுத்தனயேன ஆஸவா உப்பஜ்ஜந்தி, ஸோ புது²ஜ்ஜனோ, யோ சாயங் ‘‘அஸ்ஸுதவா’’திஆதி³னா நயேன வுத்தோ, ஸோ புது²ஜ்ஜனோ ஏவங் அயோனிஸோ அனுபாயேன உப்பதே²ன மனஸி கரோதி. கத²ங்? அஹோஸிங் நு கோ²…பே॰…ஸோ குஹிங் கா³மீ ப⁴விஸ்ஸதீதி. கிங் வுத்தங் ஹோதி, ஸோ ஏவங் அயோனிஸோ மனஸி கரோதி, யதா²ஸ்ஸ ‘‘அஹங் அஹோஸிங் நு கோ²’’திஆதி³னா நயேன வுத்தா ஸோளஸவிதா⁴பி விசிகிச்சா² உப்பஜ்ஜதீதி.

    Tassattho, yassa te iminā vuttanayena āsavā uppajjanti, so puthujjano, yo cāyaṃ ‘‘assutavā’’tiādinā nayena vutto, so puthujjano evaṃ ayoniso anupāyena uppathena manasi karoti. Kathaṃ? Ahosiṃ nu kho…pe…so kuhiṃ gāmī bhavissatīti. Kiṃ vuttaṃ hoti, so evaṃ ayoniso manasi karoti, yathāssa ‘‘ahaṃ ahosiṃ nu kho’’tiādinā nayena vuttā soḷasavidhāpi vicikicchā uppajjatīti.

    தத்த² அஹோஸிங் நு கோ² நனு கோ²தி ஸஸ்ஸதாகாரஞ்ச அதி⁴ச்சஸமுப்பத்திஆகாரஞ்ச நிஸ்ஸாய அதீதே அத்தனோ விஜ்ஜமானதங் அவிஜ்ஜமானதஞ்ச கங்க²தி. கிங் காரணந்தி ந வத்தப்³ப³ங். உம்மத்தகோ விய ஹி பா³லபுது²ஜ்ஜனோ யதா² வா ததா² வா பவத்ததி. அபிச அயோனிஸோ மனஸிகாரோயேவெத்த² காரணங். ஏவங் அயோனிஸோ மனஸிகாரஸ்ஸ பன கிங் காரணந்தி. ஸ்வேவ புது²ஜ்ஜனபா⁴வோ அரியானங் அத³ஸ்ஸனாதீ³னி வா. நனு ச புது²ஜ்ஜனோபி யோனிஸோ மனஸி கரோதீதி. கோ வா ஏவமாஹ ந மனஸி கரோதீதி. ந பன தத்த² புது²ஜ்ஜனபா⁴வோ காரணங் , ஸத்³த⁴ம்மஸ்ஸவனகல்யாணமித்தாதீ³னி தத்த² காரணானி. ந ஹி மச்ச²மங்ஸாதீ³னி அத்தனோ அத்தனோ பகதியா ஸுக³ந்தா⁴னி, அபி⁴ஸங்கா²ரபச்சயா பன ஸுக³ந்தா⁴னிபி ஹொந்தி.

    Tattha ahosiṃ nu kho nanu khoti sassatākārañca adhiccasamuppattiākārañca nissāya atīte attano vijjamānataṃ avijjamānatañca kaṅkhati. Kiṃ kāraṇanti na vattabbaṃ. Ummattako viya hi bālaputhujjano yathā vā tathā vā pavattati. Apica ayoniso manasikāroyevettha kāraṇaṃ. Evaṃ ayoniso manasikārassa pana kiṃ kāraṇanti. Sveva puthujjanabhāvo ariyānaṃ adassanādīni vā. Nanu ca puthujjanopi yoniso manasi karotīti. Ko vā evamāha na manasi karotīti. Na pana tattha puthujjanabhāvo kāraṇaṃ , saddhammassavanakalyāṇamittādīni tattha kāraṇāni. Na hi macchamaṃsādīni attano attano pakatiyā sugandhāni, abhisaṅkhārapaccayā pana sugandhānipi honti.

    கிங் நு கோ² அஹோஸிந்தி ஜாதிலிங்கூ³பபத்தியோ நிஸ்ஸாய க²த்தியோ நு கோ² அஹோஸிங், ப்³ராஹ்மணவெஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானங் அஞ்ஞதரோதி கங்க²தி.

    Kiṃnu kho ahosinti jātiliṅgūpapattiyo nissāya khattiyo nu kho ahosiṃ, brāhmaṇavessasuddagahaṭṭhapabbajitadevamanussānaṃ aññataroti kaṅkhati.

    கத²ங் நு கோ²தி ஸண்டா²னாகாரங் நிஸ்ஸாய தீ³கோ⁴ நு கோ² அஹோஸிங், ரஸ்ஸஓதா³தகண்ஹப்பமாணிகஅப்பமாணிகாதீ³னங் அஞ்ஞதரோதி கங்க²தி. கேசி பன இஸ்ஸரனிம்மானாதி³ங் நிஸ்ஸாய கேன நு கோ² காரணேன அஹோஸிந்தி ஹேதுதோ கங்க²தீதி வத³ந்தி.

    Kathaṃ nu khoti saṇṭhānākāraṃ nissāya dīgho nu kho ahosiṃ, rassaodātakaṇhappamāṇikaappamāṇikādīnaṃ aññataroti kaṅkhati. Keci pana issaranimmānādiṃ nissāya kena nu kho kāraṇena ahosinti hetuto kaṅkhatīti vadanti.

    கிங் ஹுத்வா கிங் அஹோஸிந்தி ஜாதிஆதீ³னி நிஸ்ஸாய க²த்தியோ ஹுத்வா நு கோ² ப்³ராஹ்மணோ அஹோஸிங்…பே॰… தே³வோ ஹுத்வா மனுஸ்ஸோதி அத்தனோ பரம்பரங் கங்க²தி. ஸப்³ப³த்தே²வ பன அத்³தா⁴னந்தி காலாதி⁴வசனமேதங்.

    Kiṃ hutvā kiṃ ahosinti jātiādīni nissāya khattiyo hutvā nu kho brāhmaṇo ahosiṃ…pe… devo hutvā manussoti attano paramparaṃ kaṅkhati. Sabbattheva pana addhānanti kālādhivacanametaṃ.

    ப⁴விஸ்ஸாமி நு கோ² நனு கோ²தி ஸஸ்ஸதாகாரஞ்ச உச்சே²தா³காரஞ்ச நிஸ்ஸாய அனாக³தே அத்தனோ விஜ்ஜமானதங் அவிஜ்ஜமானதஞ்ச கங்க²தி. ஸேஸமெத்த² வுத்தனயமேவ.

    Bhavissāminu kho nanu khoti sassatākārañca ucchedākārañca nissāya anāgate attano vijjamānataṃ avijjamānatañca kaṅkhati. Sesamettha vuttanayameva.

    ஏதரஹி வா பச்சுப்பன்னமத்³தா⁴னந்தி இதா³னி வா படிஸந்தி⁴ங் ஆதி³ங் கத்வா சுதிபரியந்தங் ஸப்³ப³ம்பி வத்தமானகாலங் க³ஹெத்வா. அஜ்ஜ²த்தங் கத²ங்கதீ² ஹோதீதி அத்தனோ க²ந்தே⁴ஸு விசிகிச்சோ² ஹோதி. அஹங் நு கொ²ஸ்மீதி அத்தனோ அத்தி²பா⁴வங் கங்க²தி. யுத்தங் பனேதந்தி? யுத்தங் அயுத்தந்தி கா எத்த² சிந்தா. அபிசெத்த² இத³ங் வத்து²ம்பி உதா³ஹரந்தி. சூளமாதாய கிர புத்தோ முண்டோ³, மஹாமாதாய புத்தோ அமுண்டோ³, தங் புத்தங் முண்டே³ஸுங். ஸோ உட்டா²ய அஹங் நு கோ² சூளமாதாய புத்தோதி சிந்தேஸி. ஏவங் அஹங் நு கொ²ஸ்மீதி கங்கா² ஹோதி.

    Etarahi vā paccuppannamaddhānanti idāni vā paṭisandhiṃ ādiṃ katvā cutipariyantaṃ sabbampi vattamānakālaṃ gahetvā. Ajjhattaṃ kathaṃkathī hotīti attano khandhesu vicikiccho hoti. Ahaṃ nu khosmīti attano atthibhāvaṃ kaṅkhati. Yuttaṃ panetanti? Yuttaṃ ayuttanti kā ettha cintā. Apicettha idaṃ vatthumpi udāharanti. Cūḷamātāya kira putto muṇḍo, mahāmātāya putto amuṇḍo, taṃ puttaṃ muṇḍesuṃ. So uṭṭhāya ahaṃ nu kho cūḷamātāya puttoti cintesi. Evaṃ ahaṃ nu khosmīti kaṅkhā hoti.

    நோ நு கொ²ஸ்மீதி அத்தனோ நத்தி²பா⁴வங் கங்க²தி. தத்ராபி இத³ங் வத்து² – ஏகோ கிர மச்சே² க³ண்ஹந்தோ உத³கே சிரட்டா²னேன ஸீதிபூ⁴தங் அத்தனோ ஊருங் மச்சோ²தி சிந்தெத்வா பஹரி. அபரோ ஸுஸானபஸ்ஸே கெ²த்தங் ரக்க²ந்தோ பீ⁴தோ ஸங்குடிதோ ஸயி. ஸோ படிபு³ஜ்ஜி²த்வா அத்தனோ ஜண்ணுகானி த்³வே யக்கா²தி சிந்தெத்வா பஹரி. ஏவங் நோ நு கொ²ஸ்மீதி கங்க²தி.

    No nu khosmīti attano natthibhāvaṃ kaṅkhati. Tatrāpi idaṃ vatthu – eko kira macche gaṇhanto udake ciraṭṭhānena sītibhūtaṃ attano ūruṃ macchoti cintetvā pahari. Aparo susānapasse khettaṃ rakkhanto bhīto saṅkuṭito sayi. So paṭibujjhitvā attano jaṇṇukāni dve yakkhāti cintetvā pahari. Evaṃ no nu khosmīti kaṅkhati.

    கிங் நு கொ²ஸ்மீதி க²த்தியோவ ஸமானோ அத்தனோ க²த்தியபா⁴வங் கங்க²தி. ஏஸ நயோ ஸேஸேஸு. தே³வோ பன ஸமானோ தே³வபா⁴வங் அஜானந்தோ நாம நத்தி². ஸோபி பன ‘‘அஹங் ரூபீ நு கோ² அரூபீ நு கோ²’’திஆதி³னா நயேன கங்க²தி. க²த்தியாத³யோ கஸ்மா ந ஜானந்தீதி சே. அபச்சக்கா² தேஸங் தத்த² தத்த² குலே உப்பத்தி. க³ஹட்டா²பி ச பொத்த²லிகாத³யோ பப்³ப³ஜிதஸஞ்ஞினோ. பப்³ப³ஜிதாபி ‘‘குப்பங் நு கோ² மே கம்ம’’ந்திஆதி³னா நயேன க³ஹட்ட²ஸஞ்ஞினோ. மனுஸ்ஸாபி ச ராஜானோ விய அத்தனி தே³வஸஞ்ஞினோ ஹொந்தி.

    Kiṃ nu khosmīti khattiyova samāno attano khattiyabhāvaṃ kaṅkhati. Esa nayo sesesu. Devo pana samāno devabhāvaṃ ajānanto nāma natthi. Sopi pana ‘‘ahaṃ rūpī nu kho arūpī nu kho’’tiādinā nayena kaṅkhati. Khattiyādayo kasmā na jānantīti ce. Apaccakkhā tesaṃ tattha tattha kule uppatti. Gahaṭṭhāpi ca potthalikādayo pabbajitasaññino. Pabbajitāpi ‘‘kuppaṃ nu kho me kamma’’ntiādinā nayena gahaṭṭhasaññino. Manussāpi ca rājāno viya attani devasaññino honti.

    கத²ங் நு கொ²ஸ்மீதி வுத்தனயமேவ. கேவலஞ்செத்த² அப்³ப⁴ந்தரே ஜீவோ நாம அத்தீ²தி க³ஹெத்வா தஸ்ஸ ஸண்டா²னாகாரங் நிஸ்ஸாய தீ³கோ⁴ நு கொ²ஸ்மி, ரஸ்ஸசதுரங்ஸச²ளங்ஸஅட்ட²ங்ஸஸோளஸங்ஸாதீ³னங் அஞ்ஞதரப்பகாரோதி கங்க²ந்தோ கத²ங் நு கொ²ஸ்மீதி கங்க²தீதி வேதி³தப்³போ³. ஸரீரஸண்டா²னங் பன பச்சுப்பன்னங் அஜானந்தோ நாம நத்தி².

    Kathaṃ nu khosmīti vuttanayameva. Kevalañcettha abbhantare jīvo nāma atthīti gahetvā tassa saṇṭhānākāraṃ nissāya dīgho nu khosmi, rassacaturaṃsachaḷaṃsaaṭṭhaṃsasoḷasaṃsādīnaṃ aññatarappakāroti kaṅkhanto kathaṃ nu khosmīti kaṅkhatīti veditabbo. Sarīrasaṇṭhānaṃ pana paccuppannaṃ ajānanto nāma natthi.

    குதோ ஆக³தோ, ஸோ குஹிங் கா³மீ ப⁴விஸ்ஸதீதி அத்தபா⁴வஸ்ஸ ஆக³திக³திட்டா²னங் கங்க²தி.

    Kutoāgato, so kuhiṃ gāmī bhavissatīti attabhāvassa āgatigatiṭṭhānaṃ kaṅkhati.

    19. ஏவங் ஸோளஸப்பபே⁴த³ங் விசிகிச்ச²ங் த³ஸ்ஸெத்வா இதா³னி யங் இமினா விசிகிச்சா²ஸீஸேன தி³ட்டா²ஸவங் த³ஸ்ஸேதுங் அயங் தே³ஸனா ஆரத்³தா⁴. தங் த³ஸ்ஸெந்தோ தஸ்ஸ ஏவங் அயோனிஸோ மனஸிகரோதோ ச²ன்னங் தி³ட்டீ²னந்திஆதி³மாஹ. தத்த² தஸ்ஸ புக்³க³லஸ்ஸ யதா² அயங் விசிகிச்சா² உப்பஜ்ஜதி, ஏவங் அயோனிஸோ மனஸிகரோதோ தஸ்ஸேவ ஸவிசிகிச்ச²ஸ்ஸ அயோனிஸோ மனஸிகாரஸ்ஸ தா²மக³தத்தா ச²ன்னங் தி³ட்டீ²னங் அஞ்ஞதரா தி³ட்டி² உப்பஜ்ஜதீதி வுத்தங் ஹோதி. தத்த² ஸப்³ப³பதே³ஸு வாஸத்³தோ³ விகப்பத்தோ², ஏவங் வா ஏவங் வா தி³ட்டி² உப்பஜ்ஜதீதி வுத்தங் ஹோதி. அத்தி² மே அத்தாதி செத்த² ஸஸ்ஸததி³ட்டி² ஸப்³ப³காலேஸு அத்தனோ அத்தி²தங் க³ண்ஹாதி. ஸச்சதோ தே²ததோதி பூ⁴ததோ ச தி²ரதோ ச, ‘‘இத³ங் ஸச்ச’’ந்தி பூ⁴ததோ ஸுட்டு² த³ள்ஹபா⁴வேனாதி வுத்தங் ஹோதி. நத்தி² மே அத்தாதி அயங் பன உச்சே²த³தி³ட்டி², ஸதோ ஸத்தஸ்ஸ தத்த² தத்த² விப⁴வக்³க³ஹணதோ. அத² வா புரிமாபி தீஸு காலேஸு அத்தீ²தி க³ஹணதோ ஸஸ்ஸததி³ட்டி², பச்சுப்பன்னமேவ அத்தீ²தி க³ண்ஹந்தோ உச்சே²த³தி³ட்டி². பச்சி²மாபி அதீதானாக³தேஸு நத்தீ²தி க³ஹணதோ ப⁴ஸ்மந்தாஹுதியோதி க³ஹிததி³ட்டி²கானங் விய, உச்சே²த³தி³ட்டி². அதீதே ஏவ நத்தீ²தி க³ண்ஹந்தோ அதி⁴ச்சஸமுப்பத்திகஸ்ஸேவ ஸஸ்ஸததி³ட்டி².

    19. Evaṃ soḷasappabhedaṃ vicikicchaṃ dassetvā idāni yaṃ iminā vicikicchāsīsena diṭṭhāsavaṃ dassetuṃ ayaṃ desanā āraddhā. Taṃ dassento tassa evaṃ ayoniso manasikaroto channaṃ diṭṭhīnantiādimāha. Tattha tassa puggalassa yathā ayaṃ vicikicchā uppajjati, evaṃ ayoniso manasikaroto tasseva savicikicchassa ayoniso manasikārassa thāmagatattā channaṃ diṭṭhīnaṃ aññatarā diṭṭhi uppajjatīti vuttaṃ hoti. Tattha sabbapadesu vāsaddo vikappattho, evaṃ vā evaṃ vā diṭṭhi uppajjatīti vuttaṃ hoti. Atthi me attāti cettha sassatadiṭṭhi sabbakālesu attano atthitaṃ gaṇhāti. Saccato thetatoti bhūtato ca thirato ca, ‘‘idaṃ sacca’’nti bhūtato suṭṭhu daḷhabhāvenāti vuttaṃ hoti. Natthi me attāti ayaṃ pana ucchedadiṭṭhi, sato sattassa tattha tattha vibhavaggahaṇato. Atha vā purimāpi tīsu kālesu atthīti gahaṇato sassatadiṭṭhi, paccuppannameva atthīti gaṇhanto ucchedadiṭṭhi. Pacchimāpi atītānāgatesu natthīti gahaṇato bhasmantāhutiyoti gahitadiṭṭhikānaṃ viya, ucchedadiṭṭhi. Atīte eva natthīti gaṇhanto adhiccasamuppattikasseva sassatadiṭṭhi.

    அத்தனாவ அத்தானங் ஸஞ்ஜானாமீதி ஸஞ்ஞாக்க²ந்த⁴ஸீஸேன க²ந்தே⁴ அத்தாதி க³ஹெத்வா ஸஞ்ஞாய அவஸேஸக்க²ந்தே⁴ ஸஞ்ஜானதோ இமினா அத்தனா இமங் அத்தானங் ஸஞ்ஜானாமீதி ஹோதி. அத்தனாவ அனத்தானந்தி ஸஞ்ஞாக்க²ந்த⁴ங்யேவ அத்தாதி க³ஹெத்வா, இதரே சத்தாரோபி அனத்தாதி க³ஹெத்வா ஸஞ்ஞாய தேஸங் ஜானதோ ஏவங் ஹோதி . அனத்தனாவ அத்தானந்தி ஸஞ்ஞாக்க²ந்த⁴ங் அனத்தாதி. இதரே சத்தாரோ அத்தாதி க³ஹெத்வா ஸஞ்ஞாய தேஸங் ஜானதோ ஏவங் ஹோதி, ஸப்³பா³பி ஸஸ்ஸதுச்சே²த³தி³ட்டி²யோவ.

    Attanāva attānaṃ sañjānāmīti saññākkhandhasīsena khandhe attāti gahetvā saññāya avasesakkhandhe sañjānato iminā attanā imaṃ attānaṃ sañjānāmīti hoti. Attanāva anattānanti saññākkhandhaṃyeva attāti gahetvā, itare cattāropi anattāti gahetvā saññāya tesaṃ jānato evaṃ hoti . Anattanāva attānanti saññākkhandhaṃ anattāti. Itare cattāro attāti gahetvā saññāya tesaṃ jānato evaṃ hoti, sabbāpi sassatucchedadiṭṭhiyova.

    வதோ³ வேதெ³ய்யோதிஆத³யோ பன ஸஸ்ஸததி³ட்டி²யா ஏவ அபி⁴னிவேஸாகாரா. தத்த² வத³தீதி வதோ³, வசீகம்மஸ்ஸ காரகோதி வுத்தங் ஹோதி. வேத³யதீதி வேதெ³ய்யோ, ஜானாதி அனுப⁴வதி சாதி வுத்தங் ஹோதி. கிங் வேதே³தீதி, தத்ர தத்ர கல்யாணபாபகானங் கம்மானங் விபாகங் படிஸங்வேதே³தி. தத்ர தத்ராதி தேஸு தேஸு யோனிக³திட்டி²தினிவாஸனிகாயேஸு ஆரம்மணேஸு வா. நிச்சோதி உப்பாத³வயரஹிதோ. து⁴வோதி தி²ரோ ஸாரபூ⁴தோ. ஸஸ்ஸதோதி ஸப்³ப³காலிகோ. அவிபரிணாமத⁴ம்மோதி அத்தனோ பகதிபா⁴வங் அவிஜஹனத⁴ம்மோ, ககண்டகோ விய நானப்பகாரதங் நாபஜ்ஜதி. ஸஸ்ஸதிஸமந்தி சந்த³ஸூரியஸமுத்³த³மஹாபத²வீபப்³ப³தா லோகவோஹாரேன ஸஸ்ஸதியோதி வுச்சந்தி. ஸஸ்ஸதீஹி ஸமங் ஸஸ்ஸதிஸமங். யாவ ஸஸ்ஸதியோ திட்ட²ந்தி, தாவ ததே²வ ட²ஸ்ஸதீதி க³ண்ஹதோ ஏவங்தி³ட்டி² ஹோதி.

    Vado vedeyyotiādayo pana sassatadiṭṭhiyā eva abhinivesākārā. Tattha vadatīti vado, vacīkammassa kārakoti vuttaṃ hoti. Vedayatīti vedeyyo, jānāti anubhavati cāti vuttaṃ hoti. Kiṃ vedetīti, tatra tatra kalyāṇapāpakānaṃ kammānaṃ vipākaṃ paṭisaṃvedeti. Tatra tatrāti tesu tesu yonigatiṭṭhitinivāsanikāyesu ārammaṇesu vā. Niccoti uppādavayarahito. Dhuvoti thiro sārabhūto. Sassatoti sabbakāliko. Avipariṇāmadhammoti attano pakatibhāvaṃ avijahanadhammo, kakaṇṭako viya nānappakārataṃ nāpajjati. Sassatisamanti candasūriyasamuddamahāpathavīpabbatā lokavohārena sassatiyoti vuccanti. Sassatīhi samaṃ sassatisamaṃ. Yāva sassatiyo tiṭṭhanti, tāva tatheva ṭhassatīti gaṇhato evaṃdiṭṭhi hoti.

    இத³ங் வுச்சதி, பி⁴க்க²வே, தி³ட்டி²க³தந்திஆதீ³ஸு. இத³ந்தி இதா³னி வத்தப்³ப³ஸ்ஸ பச்சக்க²னித³ஸ்ஸனங். தி³ட்டி²க³தஸம்ப³ந்தே⁴ன ச இத³ந்தி வுத்தங், ந தி³ட்டி²ஸம்ப³ந்தே⁴ன. எத்த² ச தி³ட்டி²யேவ தி³ட்டி²க³தங், கூ³த²க³தங் விய. தி³ட்டீ²ஸு வா க³தமித³ங் த³ஸ்ஸனங் த்³வாஸட்டி²தி³ட்டி²அந்தோக³த⁴த்தாதிபி தி³ட்டி²க³தங். தி³ட்டி²யா வா க³தங் தி³ட்டி²க³தங். இத³ஞ்ஹி அத்தி² மே அத்தாதிஆதி³ தி³ட்டி²யா க³மனமத்தமேவ, நத்தெ²த்த² அத்தா வா நிச்சோ வா கோசீதி வுத்தங் ஹோதி. ஸா சாயங் தி³ட்டி² து³ன்னிக்³க³மனட்டே²ன க³ஹனங். து³ரதிக்கமட்டே²ன ஸப்படிப⁴யட்டே²ன ச கந்தாரோ, து³ப்³பி⁴க்க²கந்தாரவாளகந்தாராத³யோ விய. ஸம்மாதி³ட்டி²யா வினிவிஜ்ஜ²னட்டே²ன விலோமனட்டே²ன வா விஸூகங். கதா³சி ஸஸ்ஸதஸ்ஸ, கதா³சி உச்சே²த³ஸ்ஸ க³ஹணதோ விரூபங் ப²ந்தி³தந்தி விப்ப²ந்தி³தங். ப³ந்த⁴னட்டே²ன ஸங்யோஜனங். தேனாஹ ‘‘தி³ட்டி²க³ஹனங்…பே॰… தி³ட்டி²ஸங்யோஜன’’ந்தி. இதா³னிஸ்ஸ தமேவ ப³ந்த⁴னத்த²ங் த³ஸ்ஸெந்தோ தி³ட்டி²ஸங்யோஜனஸங்யுத்தோதிஆதி³மாஹ. தஸ்ஸாயங் ஸங்கே²பத்தோ². இமினா தி³ட்டி²ஸங்யோஜனேன ஸங்யுத்தோ புது²ஜ்ஜனோ ஏதேஹி ஜாதிஆதீ³ஹி ந பரிமுச்சதீதி. கிங் வா ப³ஹுனா, ஸகலவட்டது³க்க²தோபி ந முச்சதீதி.

    Idaṃ vuccati, bhikkhave, diṭṭhigatantiādīsu. Idanti idāni vattabbassa paccakkhanidassanaṃ. Diṭṭhigatasambandhena ca idanti vuttaṃ, na diṭṭhisambandhena. Ettha ca diṭṭhiyeva diṭṭhigataṃ, gūthagataṃ viya. Diṭṭhīsu vā gatamidaṃ dassanaṃ dvāsaṭṭhidiṭṭhiantogadhattātipi diṭṭhigataṃ. Diṭṭhiyā vā gataṃ diṭṭhigataṃ. Idañhi atthi me attātiādi diṭṭhiyā gamanamattameva, natthettha attā vā nicco vā kocīti vuttaṃ hoti. Sā cāyaṃ diṭṭhi dunniggamanaṭṭhena gahanaṃ. Duratikkamaṭṭhena sappaṭibhayaṭṭhena ca kantāro, dubbhikkhakantāravāḷakantārādayo viya. Sammādiṭṭhiyā vinivijjhanaṭṭhena vilomanaṭṭhena vā visūkaṃ. Kadāci sassatassa, kadāci ucchedassa gahaṇato virūpaṃ phanditanti vipphanditaṃ. Bandhanaṭṭhena saṃyojanaṃ. Tenāha ‘‘diṭṭhigahanaṃ…pe… diṭṭhisaṃyojana’’nti. Idānissa tameva bandhanatthaṃ dassento diṭṭhisaṃyojanasaṃyuttotiādimāha. Tassāyaṃ saṅkhepattho. Iminā diṭṭhisaṃyojanena saṃyutto puthujjano etehi jātiādīhi na parimuccatīti. Kiṃ vā bahunā, sakalavaṭṭadukkhatopi na muccatīti.

    20. ஏவங் ச²ப்பபே⁴த³ங் தி³ட்டா²ஸவங் த³ஸ்ஸெத்வா யஸ்மா ஸீலப்³ப³தபராமாஸோ காமாஸவாதி³வசனேனேவ த³ஸ்ஸிதோ ஹோதி. காமஸுக²த்த²ஞ்ஹி ப⁴வஸுக²ப⁴வவிஸுத்³தி⁴அத்த²ஞ்ச அவிஜ்ஜாய அபி⁴பூ⁴தா இதோ ப³ஹித்³தா⁴ ஸமணப்³ராஹ்மணா ஸீலப்³ப³தானி பராமஸந்தி, தஸ்மா தங் அத³ஸ்ஸெத்வா தி³ட்டி²க்³க³ஹணேன வா தஸ்ஸ க³ஹிதத்தாபி தங் அத³ஸ்ஸெத்வாவ இதா³னி யோ புக்³க³லோ த³ஸ்ஸனா பஹாதப்³பே³ ஆஸவே பஜஹதி, தங் த³ஸ்ஸெத்வா தேஸங் ஆஸவானங் பஹானங் த³ஸ்ஸேதுங் புப்³பே³ வா அயோனிஸோ மனஸிகரோதோ புது²ஜ்ஜனஸ்ஸ தேஸங் உப்பத்திங் த³ஸ்ஸெத்வா இதா³னி தப்³பி³பரீதஸ்ஸ பஹானங் த³ஸ்ஸேதுங் ஸுதவா ச கோ², பி⁴க்க²வேதிஆதி³மாஹ.

    20. Evaṃ chappabhedaṃ diṭṭhāsavaṃ dassetvā yasmā sīlabbataparāmāso kāmāsavādivacaneneva dassito hoti. Kāmasukhatthañhi bhavasukhabhavavisuddhiatthañca avijjāya abhibhūtā ito bahiddhā samaṇabrāhmaṇā sīlabbatāni parāmasanti, tasmā taṃ adassetvā diṭṭhiggahaṇena vā tassa gahitattāpi taṃ adassetvāva idāni yo puggalo dassanā pahātabbe āsave pajahati, taṃ dassetvā tesaṃ āsavānaṃ pahānaṃ dassetuṃ pubbe vā ayoniso manasikaroto puthujjanassa tesaṃ uppattiṃ dassetvā idāni tabbiparītassa pahānaṃ dassetuṃ sutavā ca kho, bhikkhavetiādimāha.

    தஸ்ஸத்தோ², யாவ ‘‘ஸோ இத³ங் து³க்க²’’ந்தி ஆக³ச்ச²தி, தாவ ஹெட்டா² வுத்தனயேன ச வுத்தபச்சனீகதோ ச வேதி³தப்³போ³. பச்சனீகதோ ச ஸப்³பா³காரேன அரியத⁴ம்மஸ்ஸ அகோவிதா³வினீதபச்சனீகதோ அயங் ‘‘ஸுதவா அரியஸாவகோ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ’’தி வேதி³தப்³போ³. அபிச கோ² ஸிகா²பத்தவிபஸ்ஸனதோ பபு⁴தி யாவ கொ³த்ரபு⁴, தாவ தத³னுரூபேன அத்தே²ன அயங் அரியஸாவகோதி வேதி³தப்³போ³.

    Tassattho, yāva ‘‘so idaṃ dukkha’’nti āgacchati, tāva heṭṭhā vuttanayena ca vuttapaccanīkato ca veditabbo. Paccanīkato ca sabbākārena ariyadhammassa akovidāvinītapaccanīkato ayaṃ ‘‘sutavā ariyasāvako ariyadhammassa kovido ariyadhamme suvinīto’’ti veditabbo. Apica kho sikhāpattavipassanato pabhuti yāva gotrabhu, tāva tadanurūpena atthena ayaṃ ariyasāvakoti veditabbo.

    21. ‘‘ஸோ இத³ங் து³க்க²ந்தி யோனிஸோ மனஸி கரோதீ’’திஆதீ³ஸு பன அயங் அத்த²விபா⁴வனா, ஸோ சதுஸச்சகம்மட்டா²னிகோ அரியஸாவகோ தண்ஹாவஜ்ஜா தேபூ⁴மகா க²ந்தா⁴ து³க்க²ங், தண்ஹா து³க்க²ஸமுத³யோ, உபி⁴ன்னங் அப்பவத்தி நிரோதோ⁴, நிரோத⁴ஸம்பாபகோ மக்³கோ³தி ஏவங் புப்³பே³வ ஆசரியஸந்திகே உக்³க³ஹிதசதுஸச்சகம்மட்டா²னோ அபரேன ஸமயேன விபஸ்ஸனாமக்³க³ங் ஸமாருள்ஹோ ஸமானோ தே தேபூ⁴மகே க²ந்தே⁴ இத³ங் து³க்க²ந்தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச. எத்த² ஹி யாவ ஸோதாபத்திமக்³கோ³, தாவ மனஸிகாரஸீஸேனேவ விபஸ்ஸனா வுத்தா. யா பனாயங் தஸ்ஸேவ து³க்க²ஸ்ஸ ஸமுட்டா²பிகா பபா⁴விகா தண்ஹா, அயங் ஸமுத³யோதி யோனிஸோ மனஸி கரோதி. யஸ்மா பன து³க்க²ஞ்ச ஸமுத³யோ ச இத³ங் டா²னங் பத்வா நிருஜ்ஜ²ந்தி நப்பவத்தந்தி, தஸ்மா யதி³த³ங் நிப்³பா³னங் நாம, அயங் து³க்க²னிரோதோ⁴தி யோனிஸோ மனஸி கரோதி. நிரோத⁴ஸம்பாபகங் அட்ட²ங்கி³கங் மக்³க³ங் அயங் து³க்க²னிரோத⁴கா³மினீ படிபதா³தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச.

    21. ‘‘So idaṃ dukkhanti yoniso manasi karotī’’tiādīsu pana ayaṃ atthavibhāvanā, so catusaccakammaṭṭhāniko ariyasāvako taṇhāvajjā tebhūmakā khandhā dukkhaṃ, taṇhā dukkhasamudayo, ubhinnaṃ appavatti nirodho, nirodhasampāpako maggoti evaṃ pubbeva ācariyasantike uggahitacatusaccakammaṭṭhāno aparena samayena vipassanāmaggaṃ samāruḷho samāno te tebhūmake khandhe idaṃ dukkhanti yoniso manasi karoti, upāyena pathena samannāharati ceva vipassati ca. Ettha hi yāva sotāpattimaggo, tāva manasikārasīseneva vipassanā vuttā. Yā panāyaṃ tasseva dukkhassa samuṭṭhāpikā pabhāvikā taṇhā, ayaṃ samudayoti yoniso manasi karoti. Yasmā pana dukkhañca samudayo ca idaṃ ṭhānaṃ patvā nirujjhanti nappavattanti, tasmā yadidaṃ nibbānaṃ nāma, ayaṃ dukkhanirodhoti yoniso manasi karoti. Nirodhasampāpakaṃ aṭṭhaṅgikaṃ maggaṃ ayaṃ dukkhanirodhagāminī paṭipadāti yoniso manasi karoti, upāyena pathena samannāharati ceva vipassati ca.

    தத்ராயங் உபாயோ, அபி⁴னிவேஸோ நாம வட்டே ஹோதி, விவட்டே நத்தி². தஸ்மா ‘‘அயங் அத்தி² இமஸ்மிங் காயே பத²வீதா⁴து, ஆபோதா⁴தூ’’திஆதி³னா நயேன ஸகஸந்ததியங் சத்தாரி பூ⁴தானி தத³னுஸாரேன உபாதா³ரூபானி ச பரிக்³க³ஹெத்வா அயங் ரூபக்க²ந்தோ⁴தி வவத்த²பேதி. தங் வவத்தா²பயதோ உப்பன்னே ததா³ரம்மணே சித்தசேதஸிகே த⁴ம்மே இமே சத்தாரோ அரூபக்க²ந்தா⁴தி வவத்த²பேதி. ததோ இமே பஞ்சக்க²ந்தா⁴ து³க்க²ந்தி வவத்த²பேதி. தே பன ஸங்கே²பதோ நாமஞ்ச ரூபஞ்சாதி த்³வே பா⁴கா³யேவ ஹொந்தி. இத³ஞ்ச நாமரூபங் ஸஹேது ஸப்பச்சயங் உப்பஜ்ஜதி. தஸ்ஸ அயங் ஹேது அயங் பச்சயோதி அவிஜ்ஜாப⁴வதண்ஹாகம்மாஹாராதி³கே ஹேதுபச்சயே வவத்த²பேதி. ததோ தேஸங் பச்சயானஞ்ச பச்சயுப்பன்னத⁴ம்மானஞ்ச யாதா²வஸரஸலக்க²ணங் வவத்த²பெத்வா இமே த⁴ம்மா அஹுத்வா ஹொந்தீதி அனிச்சலக்க²ணங் ஆரோபேதி, உத³யப்³ப³யபீளிதத்தா து³க்கா²தி து³க்க²லக்க²ணங் ஆரோபேதி. அவஸவத்தனதோ அனத்தாதி அனத்தலக்க²ணங் ஆரோபேதி. ஏவங் தீணி லக்க²ணானி ஆரோபெத்வா படிபாடியா விபஸ்ஸனங் பவத்தெந்தோ ஸோதாபத்திமக்³க³ங் பாபுணாதி.

    Tatrāyaṃ upāyo, abhiniveso nāma vaṭṭe hoti, vivaṭṭe natthi. Tasmā ‘‘ayaṃ atthi imasmiṃ kāye pathavīdhātu, āpodhātū’’tiādinā nayena sakasantatiyaṃ cattāri bhūtāni tadanusārena upādārūpāni ca pariggahetvā ayaṃ rūpakkhandhoti vavatthapeti. Taṃ vavatthāpayato uppanne tadārammaṇe cittacetasike dhamme ime cattāro arūpakkhandhāti vavatthapeti. Tato ime pañcakkhandhā dukkhanti vavatthapeti. Te pana saṅkhepato nāmañca rūpañcāti dve bhāgāyeva honti. Idañca nāmarūpaṃ sahetu sappaccayaṃ uppajjati. Tassa ayaṃ hetu ayaṃ paccayoti avijjābhavataṇhākammāhārādike hetupaccaye vavatthapeti. Tato tesaṃ paccayānañca paccayuppannadhammānañca yāthāvasarasalakkhaṇaṃ vavatthapetvā ime dhammā ahutvā hontīti aniccalakkhaṇaṃ āropeti, udayabbayapīḷitattā dukkhāti dukkhalakkhaṇaṃ āropeti. Avasavattanato anattāti anattalakkhaṇaṃ āropeti. Evaṃ tīṇi lakkhaṇāni āropetvā paṭipāṭiyā vipassanaṃ pavattento sotāpattimaggaṃ pāpuṇāti.

    தஸ்மிங் க²ணே சத்தாரி ஸச்சானி ஏகபடிவேதே⁴னேவ படிவிஜ்ஜ²தி, ஏகாபி⁴ஸமயேன அபி⁴ஸமேதி. து³க்க²ங் பரிஞ்ஞாபடிவேதே⁴ன படிவிஜ்ஜ²தி, ஸமுத³யங் பஹானபடிவேதே⁴ன, நிரோத⁴ங் ஸச்சி²கிரியாபடிவேதே⁴ன, மக்³க³ங் பா⁴வனாபடிவேதே⁴ன. து³க்க²ஞ்ச பரிஞ்ஞாபி⁴ஸமயேன அபி⁴ஸமேதி…பே॰… மக்³க³ங் பா⁴வனாபி⁴ஸமயேன அபி⁴ஸமேதி, நோ ச கோ² அஞ்ஞமஞ்ஞேன ஞாணேன. ஏகஞாணேனேவ ஹி ஏஸ நிரோத⁴ங் ஆரம்மணதோ, ஸேஸானி கிச்சதோ படிவிஜ்ஜ²தி சேவ அபி⁴ஸமேதி ச. ந ஹிஸ்ஸ தஸ்மிங் ஸமயே ஏவங் ஹோதி – ‘‘அஹங் து³க்க²ங் பரிஜானாமீ’’தி வா…பே॰… ‘‘மக்³க³ங் பா⁴வேமீ’’தி வா. அபிச க்²வஸ்ஸ ஆரம்மணங் கத்வா படிவேத⁴வஸேன நிரோத⁴ங் ஸச்சி²கரோதோ ஏவங் தங் ஞாணங் து³க்க²பரிஞ்ஞாகிச்சம்பி ஸமுத³யபஹானகிச்சம்பி மக்³க³பா⁴வனாகிச்சம்பி கரோதியேவ. தஸ்ஸேவங் உபாயேன யோனிஸோ மனஸிகரோதோ தீணி ஸங்யோஜனானி பஹீயந்தி, வீஸதிவத்து²கா ஸக்காயதி³ட்டி², அட்ட²வத்து²கா விசிகிச்சா², ‘‘ஸீலேன ஸுத்³தி⁴ வதேன ஸுத்³தீ⁴’’தி ஸீலப்³ப³தானங் பராமஸனதோ ஸீலப்³ப³தபராமாஸோதி. தத்த² சதூஸு ஆஸவேஸு ஸக்காயதி³ட்டி²ஸீலப்³ப³தபராமாஸா தி³ட்டா²ஸவேன ஸங்க³ஹிதத்தா ஆஸவா சேவ ஸங்யோஜனா ச. விசிகிச்சா² ஸங்யோஜனமேவ, ந ஆஸவோ . ‘‘த³ஸ்ஸனா பஹாதப்³பா³ ஆஸவா’’தி எத்த² பரியாபன்னத்தா பன ஆஸவாதி.

    Tasmiṃ khaṇe cattāri saccāni ekapaṭivedheneva paṭivijjhati, ekābhisamayena abhisameti. Dukkhaṃ pariññāpaṭivedhena paṭivijjhati, samudayaṃ pahānapaṭivedhena, nirodhaṃ sacchikiriyāpaṭivedhena, maggaṃ bhāvanāpaṭivedhena. Dukkhañca pariññābhisamayena abhisameti…pe… maggaṃ bhāvanābhisamayena abhisameti, no ca kho aññamaññena ñāṇena. Ekañāṇeneva hi esa nirodhaṃ ārammaṇato, sesāni kiccato paṭivijjhati ceva abhisameti ca. Na hissa tasmiṃ samaye evaṃ hoti – ‘‘ahaṃ dukkhaṃ parijānāmī’’ti vā…pe… ‘‘maggaṃ bhāvemī’’ti vā. Apica khvassa ārammaṇaṃ katvā paṭivedhavasena nirodhaṃ sacchikaroto evaṃ taṃ ñāṇaṃ dukkhapariññākiccampi samudayapahānakiccampi maggabhāvanākiccampi karotiyeva. Tassevaṃ upāyena yoniso manasikaroto tīṇi saṃyojanāni pahīyanti, vīsativatthukā sakkāyadiṭṭhi, aṭṭhavatthukā vicikicchā, ‘‘sīlena suddhi vatena suddhī’’ti sīlabbatānaṃ parāmasanato sīlabbataparāmāsoti. Tattha catūsu āsavesu sakkāyadiṭṭhisīlabbataparāmāsā diṭṭhāsavena saṅgahitattā āsavā ceva saṃyojanā ca. Vicikicchā saṃyojanameva, na āsavo . ‘‘Dassanā pahātabbā āsavā’’ti ettha pariyāpannattā pana āsavāti.

    ‘‘இமே வுச்சந்தி…பே॰… பஹாதப்³பா³’’தி இமே ஸக்காயதி³ட்டி²ஆத³யோ த³ஸ்ஸனா பஹாதப்³பா³ நாம ஆஸவாதி த³ஸ்ஸெந்தோ ஆஹ. அத² வா யா அயங் ச²ன்னங் தி³ட்டீ²னங் அஞ்ஞதரா தி³ட்டி² உப்பஜ்ஜதீதி ஏவங் ஸரூபேனேவ ஸக்காயதி³ட்டி² விப⁴த்தா. தங் ஸந்தா⁴யாஹ ‘‘இமே வுச்சந்தி, பி⁴க்க²வே’’தி. ஸா ச யஸ்மா ஸஹஜாதபஹானேகட்டே²ஹி ஸத்³தி⁴ங் பஹீயதி. தி³ட்டா²ஸவே ஹி பஹீயமானே தங்ஸஹஜாதோ சதூஸு தி³ட்டி²ஸம்பயுத்தசித்தேஸு காமாஸவோபி அவிஜ்ஜாஸவோபி பஹீயதி . பஹானேகட்டோ² பன சதூஸு தி³ட்டி²விப்பயுத்தேஸு நாக³ஸுபண்ணாதி³ஸமித்³தி⁴பத்த²னாவஸேன உப்பஜ்ஜமானோ ப⁴வாஸவோ. தேனேவ ஸம்பயுத்தோ அவிஜ்ஜாஸவோபி, த்³வீஸு தோ³மனஸ்ஸசித்தேஸு பாணாதிபாதாதி³னிப்³ப³த்தகோ அவிஜ்ஜாஸவோபி, ததா² விசிகிச்சா²சித்தஸம்பயுத்தோ அவிஜ்ஜாஸவோபீதி ஏவங் ஸப்³ப³தா²பி அவஸேஸா தயோபி ஆஸவா பஹீயந்தி. தஸ்மா ப³ஹுவசனநித்³தே³ஸோ கதோதி ஏவமெத்த² அத்தோ² வேதி³தப்³போ³. ஏஸ போராணானங் அதி⁴ப்பாயோ.

    ‘‘Ime vuccanti…pe… pahātabbā’’ti ime sakkāyadiṭṭhiādayo dassanā pahātabbā nāma āsavāti dassento āha. Atha vā yā ayaṃ channaṃ diṭṭhīnaṃ aññatarā diṭṭhi uppajjatīti evaṃ sarūpeneva sakkāyadiṭṭhi vibhattā. Taṃ sandhāyāha ‘‘ime vuccanti, bhikkhave’’ti. Sā ca yasmā sahajātapahānekaṭṭhehi saddhiṃ pahīyati. Diṭṭhāsave hi pahīyamāne taṃsahajāto catūsu diṭṭhisampayuttacittesu kāmāsavopi avijjāsavopi pahīyati . Pahānekaṭṭho pana catūsu diṭṭhivippayuttesu nāgasupaṇṇādisamiddhipatthanāvasena uppajjamāno bhavāsavo. Teneva sampayutto avijjāsavopi, dvīsu domanassacittesu pāṇātipātādinibbattako avijjāsavopi, tathā vicikicchācittasampayutto avijjāsavopīti evaṃ sabbathāpi avasesā tayopi āsavā pahīyanti. Tasmā bahuvacananiddeso katoti evamettha attho veditabbo. Esa porāṇānaṃ adhippāyo.

    த³ஸ்ஸனா பஹாதப்³பா³தி த³ஸ்ஸனங் நாம ஸோதாபத்திமக்³கோ³, தேன பஹாதப்³பா³தி அத்தோ². கஸ்மா ஸோதாபத்திமக்³கோ³ த³ஸ்ஸனங்? பட²மங் நிப்³பா³னத³ஸ்ஸனதோ. நனு கொ³த்ரபு⁴ பட²மதரங் பஸ்ஸதீதி? நோ ந பஸ்ஸதி. தி³ஸ்வா கத்தப்³ப³கிச்சங் பன ந கரோதி ஸங்யோஜனானங் அப்பஹானதோ. தஸ்மா பஸ்ஸதீதி ந வத்தப்³போ³. யத்த² கத்த²சி ராஜானங் தி³ஸ்வாபி பண்ணாகாரங் த³த்வா கிச்சனிப்ப²த்தியா அதி³ட்ட²த்தா ‘‘அஜ்ஜாபி ராஜானங் ந பஸ்ஸாமீ’’தி வத³ந்தோ கா³மவாஸீ புரிஸோ செத்த² நித³ஸ்ஸனங்.

    Dassanā pahātabbāti dassanaṃ nāma sotāpattimaggo, tena pahātabbāti attho. Kasmā sotāpattimaggo dassanaṃ? Paṭhamaṃ nibbānadassanato. Nanu gotrabhu paṭhamataraṃ passatīti? No na passati. Disvā kattabbakiccaṃ pana na karoti saṃyojanānaṃ appahānato. Tasmā passatīti na vattabbo. Yattha katthaci rājānaṃ disvāpi paṇṇākāraṃ datvā kiccanipphattiyā adiṭṭhattā ‘‘ajjāpi rājānaṃ na passāmī’’ti vadanto gāmavāsī puriso cettha nidassanaṃ.

    த³ஸ்ஸனாபஹாதப்³ப³ஆஸவவண்ணனா நிட்டி²தா.

    Dassanāpahātabbaāsavavaṇṇanā niṭṭhitā.

    ஸங்வராபஹாதப்³ப³ஆஸவவண்ணனா

    Saṃvarāpahātabbaāsavavaṇṇanā

    22. ஏவங் த³ஸ்ஸனேன பஹாதப்³பே³ ஆஸவே த³ஸ்ஸெத்வா இதா³னி தத³னந்தருத்³தி³ட்டே² ஸங்வரா பஹாதப்³பே³ த³ஸ்ஸேதுங், கதமே ச, பி⁴க்க²வே, ஆஸவா ஸங்வரா பஹாதப்³பா³தி ஆஹ. ஏவங் ஸப்³ப³த்த² ஸம்ப³ந்தோ⁴ வேதி³தப்³போ³. இதோ பரஞ்ஹி அத்த²மத்தமேவ வண்ணயிஸ்ஸாம.

    22. Evaṃ dassanena pahātabbe āsave dassetvā idāni tadanantaruddiṭṭhe saṃvarā pahātabbe dassetuṃ, katame ca, bhikkhave, āsavā saṃvarā pahātabbāti āha. Evaṃ sabbattha sambandho veditabbo. Ito parañhi atthamattameva vaṇṇayissāma.

    நனு ச த³ஸ்ஸனேன பா⁴வனாயாதி இமேஹி த்³வீஹி அப்பஹாதப்³போ³ ஆஸவோ நாம நத்தி², அத² கஸ்மா விஸுங் ஸங்வராதீ³ஹி பஹாதப்³பே³ த³ஸ்ஸேதீதி. ஸங்வராதீ³ஹி புப்³ப³பா⁴கே³ விக்க²ம்பி⁴தா ஆஸவா சதூஹி மக்³கே³ஹி ஸமுக்³கா⁴தங் க³ச்ச²ந்தி, தஸ்மா தேஸங் மக்³கா³னங் புப்³ப³பா⁴கே³ இமேஹி பஞ்சஹாகாரேஹி விக்க²ம்ப⁴னப்பஹானங் த³ஸ்ஸெந்தோ ஏவமாஹ. தஸ்மா யோ சாயங் வுத்தோ பட²மோ த³ஸ்ஸனமக்³கோ³யேவ, இதா³னி பா⁴வனானாமேன வுச்சிஸ்ஸந்தி தயோ மக்³கா³, தேஸங் ஸப்³பே³ஸம்பி அயங் புப்³ப³பா⁴க³படிபதா³தி வேதி³தப்³பா³.

    Nanu ca dassanena bhāvanāyāti imehi dvīhi appahātabbo āsavo nāma natthi, atha kasmā visuṃ saṃvarādīhi pahātabbe dassetīti. Saṃvarādīhi pubbabhāge vikkhambhitā āsavā catūhi maggehi samugghātaṃ gacchanti, tasmā tesaṃ maggānaṃ pubbabhāge imehi pañcahākārehi vikkhambhanappahānaṃ dassento evamāha. Tasmā yo cāyaṃ vutto paṭhamo dassanamaggoyeva, idāni bhāvanānāmena vuccissanti tayo maggā, tesaṃ sabbesampi ayaṃ pubbabhāgapaṭipadāti veditabbā.

    தத்த² இதா⁴தி இமஸ்மிங் ஸாஸனே. படிஸங்கா²தி படிஸங்கா²ய. தத்தா²யங் ஸங்கா²ஸத்³தோ³ ஞாணகொட்டா²ஸபஞ்ஞத்திக³ணனாஸு தி³ஸ்ஸதி. ‘‘ஸங்கா²யேகங் படிஸேவதீ’’திஆதீ³ஸு (ம॰ நி॰ 2.168) ஹி ஞாணே தி³ஸ்ஸதி. ‘‘பபஞ்சஸஞ்ஞாஸங்கா² ஸமுதா³சரந்தீ’’திஆதீ³ஸு (ம॰ நி॰ 1.201) கொட்டா²ஸே. ‘‘தேஸங் தேஸங் த⁴ம்மானங் ஸங்கா² ஸமஞ்ஞா’’திஆதீ³ஸு (த⁴॰ ஸ॰ 1313) பஞ்ஞத்தியங். ‘‘ந ஸுகரங் ஸங்கா²து’’ந்திஆதீ³ஸு (ஸங்॰ நி॰ 2.128) க³ணனாயங். இத⁴ பன ஞாணே த³ட்ட²ப்³போ³.

    Tattha idhāti imasmiṃ sāsane. Paṭisaṅkhāti paṭisaṅkhāya. Tatthāyaṃ saṅkhāsaddo ñāṇakoṭṭhāsapaññattigaṇanāsu dissati. ‘‘Saṅkhāyekaṃ paṭisevatī’’tiādīsu (ma. ni. 2.168) hi ñāṇe dissati. ‘‘Papañcasaññāsaṅkhā samudācarantī’’tiādīsu (ma. ni. 1.201) koṭṭhāse. ‘‘Tesaṃ tesaṃ dhammānaṃ saṅkhā samaññā’’tiādīsu (dha. sa. 1313) paññattiyaṃ. ‘‘Na sukaraṃ saṅkhātu’’ntiādīsu (saṃ. ni. 2.128) gaṇanāyaṃ. Idha pana ñāṇe daṭṭhabbo.

    படிஸங்கா² யோனிஸோதி ஹி உபாயேன பதே²ன படிஸங்கா²ய ஞத்வா பச்சவெக்கி²த்வாதி அத்தோ². எத்த² ச அஸங்வரே ஆதீ³னவபடிஸங்கா² யோனிஸோ படிஸங்கா²தி வேதி³தப்³பா³. ஸா சாயங் ‘‘வரங், பி⁴க்க²வே, தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய சக்கு²ந்த்³ரியங் ஸம்பலிமட்ட²ங், ந த்வேவ சக்கு²விஞ்ஞெய்யேஸு ரூபேஸு அனுப்³யஞ்ஜனஸோ நிமித்தக்³கா³ஹோ’’திஆதி³னா (ஸங்॰ நி॰ 4.235) ஆதி³த்தபரியாயனயேன வேதி³தப்³பா³. சக்கு²ந்த்³ரியஸங்வரஸங்வுதோ விஹரதீதி எத்த² சக்கு²மேவ இந்த்³ரியங் சக்கு²ந்த்³ரியங், ஸங்வரணதோ ஸங்வரோ, பித³ஹனதோ த²கனதோதி வுத்தங் ஹோதி. ஸதியா ஏதங் அதி⁴வசனங். சக்கு²ந்த்³ரியே ஸங்வரோ சக்கு²ந்த்³ரியஸங்வரோ. தித்த²காகோ ஆவாடகச்ச²போ வனமஹிங்ஸோதிஆத³யோ விய.

    Paṭisaṅkhā yonisoti hi upāyena pathena paṭisaṅkhāya ñatvā paccavekkhitvāti attho. Ettha ca asaṃvare ādīnavapaṭisaṅkhā yoniso paṭisaṅkhāti veditabbā. Sā cāyaṃ ‘‘varaṃ, bhikkhave, tattāya ayosalākāya ādittāya sampajjalitāya sajotibhūtāya cakkhundriyaṃ sampalimaṭṭhaṃ, na tveva cakkhuviññeyyesu rūpesu anubyañjanaso nimittaggāho’’tiādinā (saṃ. ni. 4.235) ādittapariyāyanayena veditabbā. Cakkhundriyasaṃvarasaṃvuto viharatīti ettha cakkhumeva indriyaṃ cakkhundriyaṃ, saṃvaraṇato saṃvaro, pidahanato thakanatoti vuttaṃ hoti. Satiyā etaṃ adhivacanaṃ. Cakkhundriye saṃvaro cakkhundriyasaṃvaro. Titthakāko āvāṭakacchapo vanamahiṃsotiādayo viya.

    தத்த² கிஞ்சாபி சக்கு²ந்த்³ரியே ஸங்வரோ வா அஸங்வரோ வா நத்தி². ந ஹி சக்கு²பஸாத³ங் நிஸ்ஸாய ஸதி வா முட்ட²ஸச்சங் வா உப்பஜ்ஜதி. அபிச யதா³ ரூபாரம்மணங் சக்கு²ஸ்ஸ ஆபாத²ங் ஆக³ச்ச²தி, ததா³ ப⁴வங்கே³ த்³விக்க²த்துங் உப்பஜ்ஜித்வா நிருத்³தே⁴ கிரியமனோதா⁴து ஆவஜ்ஜனகிச்சங் ஸாத⁴யமானா உப்பஜ்ஜித்வா நிருஜ்ஜ²தி, ததோ சக்கு²விஞ்ஞாணங் த³ஸ்ஸனகிச்சங், ததோ விபாகமனோதா⁴து ஸம்படிச்ச²னகிச்சங், ததோ விபாகாஹேதுகமனோவிஞ்ஞாணதா⁴து ஸந்தீரணகிச்சங், ததோ கிரியாஹேதுகமனோவிஞ்ஞாணதா⁴து வொட்ட²ப்³ப³னகிச்சங் ஸாத⁴யமானா உப்பஜ்ஜித்வா நிருஜ்ஜ²தி. தத³னந்தரங் ஜவனங் ஜவதி.

    Tattha kiñcāpi cakkhundriye saṃvaro vā asaṃvaro vā natthi. Na hi cakkhupasādaṃ nissāya sati vā muṭṭhasaccaṃ vā uppajjati. Apica yadā rūpārammaṇaṃ cakkhussa āpāthaṃ āgacchati, tadā bhavaṅge dvikkhattuṃ uppajjitvā niruddhe kiriyamanodhātu āvajjanakiccaṃ sādhayamānā uppajjitvā nirujjhati, tato cakkhuviññāṇaṃ dassanakiccaṃ, tato vipākamanodhātu sampaṭicchanakiccaṃ, tato vipākāhetukamanoviññāṇadhātu santīraṇakiccaṃ, tato kiriyāhetukamanoviññāṇadhātu voṭṭhabbanakiccaṃ sādhayamānā uppajjitvā nirujjhati. Tadanantaraṃ javanaṃ javati.

    தத்த²பி நேவ ப⁴வங்க³ஸமயே, ந ஆவஜ்ஜனாதீ³னங் அஞ்ஞதரஸமயே ஸங்வரோ வா அஸங்வரோ வா அத்தி². ஜவனக்க²ணே பன ஸசே து³ஸ்ஸீல்யங் வா முட்ட²ஸச்சங் வா அஞ்ஞாணங் வா அக்க²ந்தி வா கோஸஜ்ஜங் வா உப்பஜ்ஜதி, அயங் அஸங்வரோ ஹோதி. ஏவங் ஹொந்தோபி ஸோ சக்கு²ந்த்³ரியே அஸங்வரோதி வுச்சதி. கஸ்மா? தஸ்மிஞ்ஹி ஸதி த்³வாரம்பி அகு³த்தங் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² கிங் , யதா² நக³ரே சதூஸு த்³வாரேஸு அஸங்வுதேஸு கிஞ்சாபி அந்தோ க⁴ரகொட்ட²கக³ப்³பா⁴த³யோ ஸுஸங்வுதா, ததா²பி அந்தோனக³ரே ஸப்³ப³ங் ப⁴ண்ட³ங் அரக்கி²தங் அகோ³பிதமேவ ஹோதி. நக³ரத்³வாரேன ஹி பவிஸித்வா சோரா யதி³ச்ச²ந்தி, தங் கரெய்யுங், ஏவமேவ ஜவனே து³ஸ்ஸீல்யாதீ³ஸு உப்பன்னேஸு, தஸ்மிங் அஸங்வரே ஸதி த்³வாரம்பி அகு³த்தங் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபீதி.

    Tatthapi neva bhavaṅgasamaye, na āvajjanādīnaṃ aññatarasamaye saṃvaro vā asaṃvaro vā atthi. Javanakkhaṇe pana sace dussīlyaṃ vā muṭṭhasaccaṃ vā aññāṇaṃ vā akkhanti vā kosajjaṃ vā uppajjati, ayaṃ asaṃvaro hoti. Evaṃ hontopi so cakkhundriye asaṃvaroti vuccati. Kasmā? Tasmiñhi sati dvārampi aguttaṃ hoti, bhavaṅgampi āvajjanādīni vīthicittānipi. Yathā kiṃ , yathā nagare catūsu dvāresu asaṃvutesu kiñcāpi anto gharakoṭṭhakagabbhādayo susaṃvutā, tathāpi antonagare sabbaṃ bhaṇḍaṃ arakkhitaṃ agopitameva hoti. Nagaradvārena hi pavisitvā corā yadicchanti, taṃ kareyyuṃ, evameva javane dussīlyādīsu uppannesu, tasmiṃ asaṃvare sati dvārampi aguttaṃ hoti, bhavaṅgampi āvajjanādīni vīthicittānipīti.

    தஸ்மிங் பன ஸீலாதீ³ஸு உப்பன்னேஸு த்³வாரம்பி கு³த்தங் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² கிங்? யதா² நக³ரத்³வாரேஸு ஸுஸங்வுதேஸு கிஞ்சாபி அந்தோ க⁴ராத³யோ அஸங்வுதா, ததா²பி அந்தோனக³ரே ஸப்³ப³ங் ப⁴ண்ட³ங் ஸுரக்கி²தங் ஸுகோ³பிதமேவ ஹோதி. நக³ரத்³வாரேஸு ஹி பிஹிதேஸு சோரானங் பவேஸோ நத்தி², ஏவமேவ ஜவனே ஸீலாதீ³ஸு உப்பன்னேஸு த்³வாரம்பி ஸுகு³த்தங் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. தஸ்மா ஜவனக்க²ணே உப்பஜ்ஜமானோபி சக்கு²ந்த்³ரியே ஸங்வரோதி வுத்தோ. இத⁴ சாயங் ஸதிஸங்வரோ அதி⁴ப்பேதோதி வேதி³தப்³போ³. சக்கு²ந்த்³ரியஸங்வரேன ஸங்வுதோ சக்கு²ந்த்³ரியஸங்வரஸங்வுதோ, உபேதோதி வுத்தங் ஹோதி. ததா² ஹி, பாதிமொக்க²ஸங்வரஸங்வுதோதி இமஸ்ஸ விப⁴ங்கே³ ‘‘இமினா பாதிமொக்க²ஸங்வரேன உபேதோ ஹோதி…பே॰… ஸமன்னாக³தோ’’தி (விப⁴॰ 511) வுத்தங். தங் ஏகஜ்ஜ²ங் கத்வா சக்கு²ந்த்³ரியஸங்வரேன ஸங்வுதோதி ஏவமத்தோ² வேதி³தப்³போ³.

    Tasmiṃ pana sīlādīsu uppannesu dvārampi guttaṃ hoti, bhavaṅgampi āvajjanādīni vīthicittānipi. Yathā kiṃ? Yathā nagaradvāresu susaṃvutesu kiñcāpi anto gharādayo asaṃvutā, tathāpi antonagare sabbaṃ bhaṇḍaṃ surakkhitaṃ sugopitameva hoti. Nagaradvāresu hi pihitesu corānaṃ paveso natthi, evameva javane sīlādīsu uppannesu dvārampi suguttaṃ hoti, bhavaṅgampi āvajjanādīni vīthicittānipi. Tasmā javanakkhaṇe uppajjamānopi cakkhundriye saṃvaroti vutto. Idha cāyaṃ satisaṃvaro adhippetoti veditabbo. Cakkhundriyasaṃvarena saṃvuto cakkhundriyasaṃvarasaṃvuto, upetoti vuttaṃ hoti. Tathā hi, pātimokkhasaṃvarasaṃvutoti imassa vibhaṅge ‘‘iminā pātimokkhasaṃvarena upeto hoti…pe… samannāgato’’ti (vibha. 511) vuttaṃ. Taṃ ekajjhaṃ katvā cakkhundriyasaṃvarena saṃvutoti evamattho veditabbo.

    அத² வா ஸங்வரீதி ஸங்வுதோ, த²கேஸி பித³ஹீதி வுத்தங் ஹோதி. சக்கு²ந்த்³ரியே ஸங்வரஸங்வுதோ சக்கு²ந்த்³ரியஸங்வரஸங்வுதோ, சக்கு²ந்த்³ரியஸங்வரஸஞ்ஞிதங் ஸதிகவாடங் சக்கு²த்³வாரே, க⁴ரத்³வாரே கவாடங் விய ஸங்வரி த²கேஸி பித³ஹீதி வுத்தங் ஹோதி. அயமேவ செத்த² அத்தோ² ஸுந்த³ரதரோ. ததா² ஹி ‘‘சக்கு²ந்த்³ரியஸங்வரங் அஸங்வுதஸ்ஸ விஹரதோ ஸங்வுதஸ்ஸ விஹரதோ’’தி ஏதேஸு பதே³ஸு அயமேவ அத்தோ² தி³ஸ்ஸதி.

    Atha vā saṃvarīti saṃvuto, thakesi pidahīti vuttaṃ hoti. Cakkhundriye saṃvarasaṃvuto cakkhundriyasaṃvarasaṃvuto, cakkhundriyasaṃvarasaññitaṃ satikavāṭaṃ cakkhudvāre, gharadvāre kavāṭaṃ viya saṃvari thakesi pidahīti vuttaṃ hoti. Ayameva cettha attho sundarataro. Tathā hi ‘‘cakkhundriyasaṃvaraṃ asaṃvutassa viharato saṃvutassa viharato’’ti etesu padesu ayameva attho dissati.

    விஹரதீதி ஏவங் சக்கு²ந்த்³ரியஸங்வரஸங்வுதோ யேன கேனசி இரியாபத²விஹாரேன விஹரதி. யஞ்ஹிஸ்ஸாதிஆதி³ம்ஹி யங் சக்கு²ந்த்³ரியஸங்வரங் அஸ்ஸ பி⁴க்கு²னோ அஸங்வுதஸ்ஸ அத²கெத்வா அபித³ஹித்வா விஹரந்தஸ்ஸாதி ஏவமத்தோ² வேதி³தப்³போ³. அத² வா, யே-காரஸ்ஸ யந்தி ஆதே³ஸோ. ஹிகாரோ ச பத³பூரணோ, யே அஸ்ஸாதி அத்தோ².

    Viharatīti evaṃ cakkhundriyasaṃvarasaṃvuto yena kenaci iriyāpathavihārena viharati. Yañhissātiādimhi yaṃ cakkhundriyasaṃvaraṃ assa bhikkhuno asaṃvutassa athaketvā apidahitvā viharantassāti evamattho veditabbo. Atha vā, ye-kārassa yanti ādeso. Hikāro ca padapūraṇo, ye assāti attho.

    உப்பஜ்ஜெய்யுந்தி நிப்³ப³த்தெய்யுங். ஆஸவா விகா⁴தபரிளாஹாதி சத்தாரோ ஆஸவா ச அஞ்ஞே ச விகா⁴தகரா கிலேஸபரிளாஹா விபாகபரிளாஹா ச. சக்கு²த்³வாரே ஹி இட்டா²ரம்மணங் ஆபாத²க³தங் காமஸ்ஸாத³வஸேன அஸ்ஸாத³யதோ அபி⁴னந்த³தோ காமாஸவோ உப்பஜ்ஜதி, ஈதி³ஸங் அஞ்ஞஸ்மிம்பி ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவோ உப்பஜ்ஜதி, ஸத்தோதி வா ஸத்தஸ்ஸாதி வா க³ண்ஹந்தஸ்ஸ தி³ட்டா²ஸவோ உப்பஜ்ஜதி, ஸப்³பே³ஹேவ ஸஹஜாதங் அஞ்ஞாணங் அவிஜ்ஜாஸவோதி சத்தாரோ ஆஸவா உப்பஜ்ஜந்தி. தேஹி ஸம்பயுத்தா அபரே கிலேஸா விகா⁴தபரிளாஹா, ஆயதிங் வா தேஸங் விபாகா. தேபி ஹி அஸங்வுதஸ்ஸேவ விஹரதோ உப்பஜ்ஜெய்யுந்தி வுச்சந்தி.

    Uppajjeyyunti nibbatteyyuṃ. Āsavā vighātapariḷāhāti cattāro āsavā ca aññe ca vighātakarā kilesapariḷāhā vipākapariḷāhā ca. Cakkhudvāre hi iṭṭhārammaṇaṃ āpāthagataṃ kāmassādavasena assādayato abhinandato kāmāsavo uppajjati, īdisaṃ aññasmimpi sugatibhave labhissāmīti bhavapatthanāya assādayato bhavāsavo uppajjati, sattoti vā sattassāti vā gaṇhantassa diṭṭhāsavo uppajjati, sabbeheva sahajātaṃ aññāṇaṃ avijjāsavoti cattāro āsavā uppajjanti. Tehi sampayuttā apare kilesā vighātapariḷāhā, āyatiṃ vā tesaṃ vipākā. Tepi hi asaṃvutasseva viharato uppajjeyyunti vuccanti.

    ஏவங்ஸ தேதி ஏவங் அஸ்ஸ தே. ஏவங் ஏதேன உபாயேன ந ஹொந்தி, நோ அஞ்ஞதா²தி வுத்தங் ஹோதி. ஏஸ நயோ படிஸங்கா² யோனிஸோ ஸோதிந்த்³ரியஸங்வரஸங்வுதோதிஆதீ³ஸு.

    Evaṃsa teti evaṃ assa te. Evaṃ etena upāyena na honti, no aññathāti vuttaṃ hoti. Esa nayo paṭisaṅkhā yoniso sotindriyasaṃvarasaṃvutotiādīsu.

    இமே வுச்சந்தி, பி⁴க்க²வே, ஆஸவா ஸங்வரா பஹாதப்³பா³தி இமே ச²ஸு த்³வாரேஸு சத்தாரோ சத்தாரோ கத்வா சதுவீஸதி ஆஸவா ஸங்வரேன பஹாதப்³பா³தி வுச்சந்தி. ஸப்³ப³த்தே²வ செத்த² ஸதிஸங்வரோ ஏவ ஸங்வரோதி வேதி³தப்³போ³.

    Ime vuccanti, bhikkhave, āsavā saṃvarā pahātabbāti ime chasu dvāresu cattāro cattāro katvā catuvīsati āsavā saṃvarena pahātabbāti vuccanti. Sabbattheva cettha satisaṃvaro eva saṃvaroti veditabbo.

    ஸங்வராபஹாதப்³ப³ஆஸவவண்ணனா நிட்டி²தா.

    Saṃvarāpahātabbaāsavavaṇṇanā niṭṭhitā.

    படிஸேவனாபஹாதப்³ப³ஆஸவவண்ணனா

    Paṭisevanāpahātabbaāsavavaṇṇanā

    23. படிஸங்கா² யோனிஸோ சீவரந்திஆதீ³ஸு யங் வத்தப்³ப³ங், தங் ஸப்³ப³ங் விஸுத்³தி⁴மக்³கே³ ஸீலகதா²யங் வுத்தமேவ. யஞ்ஹிஸ்ஸாதி யங் சீவரபிண்ட³பாதாதீ³ஸு வா அஞ்ஞதரங் அஸ்ஸ. அப்படிஸேவதோதி ஏவங் யோனிஸோ அப்படிஸேவந்தஸ்ஸ. ஸேஸங் வுத்தனயமேவ. கேவலங் பனித⁴ அலத்³த⁴ங் சீவராதி³ங் பத்த²யதோ லத்³த⁴ங் வா அஸ்ஸாத³யதோ காமாஸவஸ்ஸ உப்பத்தி வேதி³தப்³பா³. ஈதி³ஸங் அஞ்ஞஸ்மிம்பி ஸம்பத்திப⁴வே ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவஸ்ஸ, அஹங் லபா⁴மி ந லபா⁴மீதி வா மய்ஹங் வா இத³ந்தி அத்தஸஞ்ஞங் அதி⁴ட்ட²ஹதோ தி³ட்டா²ஸவஸ்ஸ உப்பத்தி வேதி³தப்³பா³. ஸப்³பே³ஹேவ பன ஸஹஜாதோ அவிஜ்ஜாஸவோதி ஏவங் சதுன்னங் ஆஸவானங் உப்பத்தி விபாகபரிளாஹா ச நவவேத³னுப்பாத³னதோபி வேதி³தப்³பா³.

    23.Paṭisaṅkhā yoniso cīvarantiādīsu yaṃ vattabbaṃ, taṃ sabbaṃ visuddhimagge sīlakathāyaṃ vuttameva. Yañhissāti yaṃ cīvarapiṇḍapātādīsu vā aññataraṃ assa. Appaṭisevatoti evaṃ yoniso appaṭisevantassa. Sesaṃ vuttanayameva. Kevalaṃ panidha aladdhaṃ cīvarādiṃ patthayato laddhaṃ vā assādayato kāmāsavassa uppatti veditabbā. Īdisaṃ aññasmimpi sampattibhave sugatibhave labhissāmīti bhavapatthanāya assādayato bhavāsavassa, ahaṃ labhāmi na labhāmīti vā mayhaṃ vā idanti attasaññaṃ adhiṭṭhahato diṭṭhāsavassa uppatti veditabbā. Sabbeheva pana sahajāto avijjāsavoti evaṃ catunnaṃ āsavānaṃ uppatti vipākapariḷāhā ca navavedanuppādanatopi veditabbā.

    இமே வுச்சந்தி, பி⁴க்க²வே, ஆஸவா படிஸேவனா பஹாதப்³பா³தி இமே ஏகமேகஸ்மிங் பச்சயே சத்தாரோ சத்தாரோ கத்வா ஸோளஸ ஆஸவா இமினா ஞாணஸங்வரஸங்கா²தேன பச்சவெக்க²ணபடிஸேவனேன பஹாதப்³பா³தி வுச்சந்தி.

    Imevuccanti, bhikkhave, āsavā paṭisevanā pahātabbāti ime ekamekasmiṃ paccaye cattāro cattāro katvā soḷasa āsavā iminā ñāṇasaṃvarasaṅkhātena paccavekkhaṇapaṭisevanena pahātabbāti vuccanti.

    படிஸேவனாபஹாதப்³ப³ஆஸவவண்ணனா நிட்டி²தா.

    Paṭisevanāpahātabbaāsavavaṇṇanā niṭṭhitā.

    அதி⁴வாஸனாபஹாதப்³ப³ஆஸவவண்ணனா

    Adhivāsanāpahātabbaāsavavaṇṇanā

    24. படிஸங்கா² யோனிஸோ க²மோ ஹோதி ஸீதஸ்ஸாதி உபாயேன பதே²ன பச்சவெக்கி²த்வா க²மோ ஹோதி ஸீதஸ்ஸ ஸீதங் க²மதி ஸஹதி, ந அவீரபுரிஸோ விய அப்பமத்தகேனபி ஸீதேன சலதி கம்பதி கம்மட்டா²னங் விஜஹதி. அபிச கோ² லோமஸனாக³த்தே²ரோ விய அனப்பகேனாபி ஸீதேன பு²ட்டோ² ந சலதி ந கம்பதி, கம்மட்டா²னமேவ மனஸி கரோதி. தே²ரோ கிர சேதியபப்³ப³தே பியங்கு³கு³ஹாயங் பதா⁴னக⁴ரே விஹரந்தோ அந்தரட்ட²கே ஹிமபாதஸமயே லோகந்தரிகனிரயே பச்சவெக்கி²த்வா கம்மட்டா²னங் அவிஜஹந்தோவ அப்³போ⁴காஸே வீதினாமேஸி. ஏவங் உண்ஹாதீ³ஸுபி அத்த²யோஜனா வேதி³தப்³பா³.

    24.Paṭisaṅkhā yoniso khamo hoti sītassāti upāyena pathena paccavekkhitvā khamo hoti sītassa sītaṃ khamati sahati, na avīrapuriso viya appamattakenapi sītena calati kampati kammaṭṭhānaṃ vijahati. Apica kho lomasanāgatthero viya anappakenāpi sītena phuṭṭho na calati na kampati, kammaṭṭhānameva manasi karoti. Thero kira cetiyapabbate piyaṅguguhāyaṃ padhānaghare viharanto antaraṭṭhake himapātasamaye lokantarikaniraye paccavekkhitvā kammaṭṭhānaṃ avijahantova abbhokāse vītināmesi. Evaṃ uṇhādīsupi atthayojanā veditabbā.

    கேவலஞ்ஹி யோ பி⁴க்கு² அதி⁴மத்தம்பி உண்ஹங் ஸஹதி ஸ்வேவ தே²ரோ விய, அயங் ‘‘க²மோ உண்ஹஸ்ஸா’’தி வேதி³தப்³போ³. தே²ரோ கிர கி³ம்ஹஸமயே பச்சா²ப⁴த்தங் ப³ஹிசங்கமே நிஸீதி³. கம்மட்டா²னங் மனஸிகரொந்தோ ஸேதா³பிஸ்ஸ கச்சே²ஹி முச்சந்தி. அத² நங் அந்தேவாஸிகோ ஆஹ ‘‘இத⁴, ப⁴ந்தே, நிஸீத³த², ஸீதலோ ஓகாஸோ’’தி. தே²ரோ ‘‘உண்ஹப⁴யேனேவம்ஹி ஆவுஸோ இத⁴ நிஸின்னோ’’தி அவீசிமஹானிரயங் பச்சவெக்கி²த்வா நிஸீதி³யேவ. உண்ஹந்தி செத்த² அக்³கி³ஸந்தாபோவ வேதி³தப்³போ³. ஸூரியஸந்தாபவஸேன பனேதங் வத்து² வுத்தங்.

    Kevalañhi yo bhikkhu adhimattampi uṇhaṃ sahati sveva thero viya, ayaṃ ‘‘khamo uṇhassā’’ti veditabbo. Thero kira gimhasamaye pacchābhattaṃ bahicaṅkame nisīdi. Kammaṭṭhānaṃ manasikaronto sedāpissa kacchehi muccanti. Atha naṃ antevāsiko āha ‘‘idha, bhante, nisīdatha, sītalo okāso’’ti. Thero ‘‘uṇhabhayenevamhi āvuso idha nisinno’’ti avīcimahānirayaṃ paccavekkhitvā nisīdiyeva. Uṇhanti cettha aggisantāpova veditabbo. Sūriyasantāpavasena panetaṃ vatthu vuttaṃ.

    யோ ச த்³வே தயோ வாரே ப⁴த்தங் வா பானீயங் வா அலப⁴மானோபி அனமதக்³கே³ ஸங்ஸாரே அத்தனோ பெத்திவிஸயூபபத்திங் பச்சவெக்கி²த்வா அவேதெ⁴ந்தோ கம்மட்டா²னங் ந விஜஹதியேவ. அதி⁴மத்தேஹி ட³ங்ஸமகஸவாதாதபஸம்ப²ஸ்ஸேஹி பு²ட்டோ² சாபி திரச்சா²னூபபத்திங் பச்சவெக்கி²த்வா அவேதெ⁴ந்தோ கம்மட்டா²னங் ந விஜஹதியேவ. ஸரீஸபஸம்ப²ஸ்ஸேன பு²ட்டோ² சாபி அனமதக்³கே³ ஸங்ஸாரே ஸீஹப்³யக்³கா⁴தி³முகே²ஸு அனேகவாரங் பரிவத்திதபுப்³ப³பா⁴வங் பச்சவெக்கி²த்வா அவேதெ⁴ந்தோ கம்மட்டா²னங் ந விஜஹதியேவ பதா⁴னியத்தே²ரோ விய. அயங் ‘‘க²மோ ஜிக⁴ச்சா²ய…பே॰… ஸரீஸபஸம்ப²ஸ்ஸான’’ந்தி வேதி³தப்³போ³.

    Yo ca dve tayo vāre bhattaṃ vā pānīyaṃ vā alabhamānopi anamatagge saṃsāre attano pettivisayūpapattiṃ paccavekkhitvā avedhento kammaṭṭhānaṃ na vijahatiyeva. Adhimattehi ḍaṃsamakasavātātapasamphassehi phuṭṭho cāpi tiracchānūpapattiṃ paccavekkhitvā avedhento kammaṭṭhānaṃ na vijahatiyeva. Sarīsapasamphassena phuṭṭho cāpi anamatagge saṃsāre sīhabyagghādimukhesu anekavāraṃ parivattitapubbabhāvaṃ paccavekkhitvā avedhento kammaṭṭhānaṃ na vijahatiyeva padhāniyatthero viya. Ayaṃ ‘‘khamo jighacchāya…pe… sarīsapasamphassāna’’nti veditabbo.

    தே²ரங் கிர க²ண்ட³சேலவிஹாரே கணிகாரபதா⁴னியக⁴ரே அரியவங்ஸங் ஸுணந்தங் கோ⁴ரவிஸோ ஸப்போ ட³ங்ஸி. தே²ரோ ஜானித்வாபி பஸன்னசித்தோ நிஸின்னோ த⁴ம்மங்யேவ ஸுணாதி. விஸவேகோ³ த²த்³தோ⁴ அஹோஸி. தே²ரோ உபஸம்பத³மண்ட³லங் ஆதி³ங் கத்வா ஸீலங் பச்சவெக்கி²த்வா பரிஸுத்³த⁴ஸீலோஹமஸ்மீதி பீதிங் உப்பாதே³ஸி. ஸஹ பீதுப்பாதா³ விஸங் நிவத்தித்வா பத²விங் பாவிஸி. தே²ரோ தத்தே²வ சித்தேகக்³க³தங் லபி⁴த்வா விபஸ்ஸனங் வட்³டெ⁴த்வா அரஹத்தங் பாபுணி.

    Theraṃ kira khaṇḍacelavihāre kaṇikārapadhāniyaghare ariyavaṃsaṃ suṇantaṃ ghoraviso sappo ḍaṃsi. Thero jānitvāpi pasannacitto nisinno dhammaṃyeva suṇāti. Visavego thaddho ahosi. Thero upasampadamaṇḍalaṃ ādiṃ katvā sīlaṃ paccavekkhitvā parisuddhasīlohamasmīti pītiṃ uppādesi. Saha pītuppādā visaṃ nivattitvā pathaviṃ pāvisi. Thero tattheva cittekaggataṃ labhitvā vipassanaṃ vaḍḍhetvā arahattaṃ pāpuṇi.

    யோ பன அக்கோஸவஸேன து³ருத்தே து³ருத்தத்தாயேவ ச து³ராக³தே அபி அந்திமவத்து²ஸஞ்ஞிதே வசனபதே² ஸுத்வா க²ந்திகு³ணங்யேவ பச்சவெக்கி²த்வா ந வேத⁴தி தீ³க⁴பா⁴ணகஅப⁴யத்தே²ரோ விய. அயங் ‘‘க²மோ து³ருத்தானங் து³ராக³தானங் வசனபதா²ன’’ந்தி வேதி³தப்³போ³.

    Yo pana akkosavasena durutte duruttattāyeva ca durāgate api antimavatthusaññite vacanapathe sutvā khantiguṇaṃyeva paccavekkhitvā na vedhati dīghabhāṇakaabhayatthero viya. Ayaṃ ‘‘khamo duruttānaṃ durāgatānaṃ vacanapathāna’’nti veditabbo.

    தே²ரோ கிர பச்சயஸந்தோஸபா⁴வனாராமதாய மஹாஅரியவங்ஸப்படிபத³ங் கதே²ஸி, ஸப்³போ³ மஹாகா³மோ ஆக³ச்ச²தி. தே²ரஸ்ஸ மஹாஸக்காரோ உப்பஜ்ஜதி. தங் அஞ்ஞதரோ மஹாதே²ரோ அதி⁴வாஸேதுங் அஸக்கொந்தோ தீ³க⁴பா⁴ணகோ அரியவங்ஸங் கதே²மீதி ஸப்³ப³ரத்திங் கோலாஹலங் கரோஸீதிஆதீ³ஹி அக்கோஸி. உபோ⁴பி ச அத்தனோ அத்தனோ விஹாரங் க³ச்ச²ந்தா கா³வுதமத்தங் ஏகபதே²ன அக³மங்ஸு. ஸகலகா³வுதம்பி ஸோ தங் அக்கோஸியேவ. ததோ யத்த² த்³வின்னங் விஹாரானங் மக்³கோ³ பி⁴ஜ்ஜதி, தத்த² ட²த்வா தீ³க⁴பா⁴ணகத்தே²ரோ தங் வந்தி³த்வா ‘‘ஏஸ, ப⁴ந்தே, தும்ஹாகங் மக்³கோ³’’தி ஆஹ. ஸோ அஸுணந்தோ விய அக³மாஸி. தே²ரோபி விஹாரங் க³ந்த்வா பாதே³ பக்கா²லெத்வா நிஸீதி³. தமேனங் அந்தேவாஸிகோ ‘‘கிங், ப⁴ந்தே, ஸகலகா³வுதங் பரிபா⁴ஸந்தங் ந கிஞ்சி அவோசுத்தா²’’தி ஆஹ. தே²ரோ ‘‘க²ந்தியேவ, ஆவுஸோ, மய்ஹங் பா⁴ரோ, ந அக்க²ந்தி. ஏகபது³த்³தா⁴ரேபி கம்மட்டா²னவியோக³ங் ந பஸ்ஸாமீ’’தி ஆஹ. எத்த² ச வசனமேவ வசனபதோ²தி வேதி³தப்³போ³.

    Thero kira paccayasantosabhāvanārāmatāya mahāariyavaṃsappaṭipadaṃ kathesi, sabbo mahāgāmo āgacchati. Therassa mahāsakkāro uppajjati. Taṃ aññataro mahāthero adhivāsetuṃ asakkonto dīghabhāṇako ariyavaṃsaṃ kathemīti sabbarattiṃ kolāhalaṃ karosītiādīhi akkosi. Ubhopi ca attano attano vihāraṃ gacchantā gāvutamattaṃ ekapathena agamaṃsu. Sakalagāvutampi so taṃ akkosiyeva. Tato yattha dvinnaṃ vihārānaṃ maggo bhijjati, tattha ṭhatvā dīghabhāṇakatthero taṃ vanditvā ‘‘esa, bhante, tumhākaṃ maggo’’ti āha. So asuṇanto viya agamāsi. Theropi vihāraṃ gantvā pāde pakkhāletvā nisīdi. Tamenaṃ antevāsiko ‘‘kiṃ, bhante, sakalagāvutaṃ paribhāsantaṃ na kiñci avocutthā’’ti āha. Thero ‘‘khantiyeva, āvuso, mayhaṃ bhāro, na akkhanti. Ekapaduddhārepi kammaṭṭhānaviyogaṃ na passāmī’’ti āha. Ettha ca vacanameva vacanapathoti veditabbo.

    யோ பன உப்பன்னா ஸாரீரிகா வேத³னா து³க்க²மனட்டே²ன து³க்கா², ப³ஹலட்டே²ன திப்³பா³, ப²ருஸட்டே²ன க²ரா, திகி²ணட்டே²ன கடுகா, அஸ்ஸாத³விரஹதோ அஸாதா, மனங் அவட்³ட⁴னதோ அமனாபா, பாணஹரணஸமத்த²தாய பாணஹரா அதி⁴வாஸேதியேவ, ந வேத⁴தி. ஏவங் ஸபா⁴வோ ஹோதி சித்தலபப்³ப³தே பதா⁴னியத்தே²ரோ விய. அயங் ‘‘உப்பன்னானங்…பே॰… அதி⁴வாஸனஜாதிகோ’’தி வேதி³தப்³போ³.

    Yo pana uppannā sārīrikā vedanā dukkhamanaṭṭhena dukkhā, bahalaṭṭhena tibbā, pharusaṭṭhena kharā, tikhiṇaṭṭhena kaṭukā, assādavirahato asātā, manaṃ avaḍḍhanato amanāpā, pāṇaharaṇasamatthatāya pāṇaharā adhivāsetiyeva, na vedhati. Evaṃ sabhāvo hoti cittalapabbate padhāniyatthero viya. Ayaṃ ‘‘uppannānaṃ…pe… adhivāsanajātiko’’ti veditabbo.

    தே²ரஸ்ஸ கிர ரத்திங் பதா⁴னேன வீதினாமெத்வா டி²தஸ்ஸ உத³ரவாதோ உப்பஜ்ஜி. ஸோ தங் அதி⁴வாஸேதுங் அஸக்கொந்தோ ஆவத்ததி பரிவத்ததி. தமேனங் சங்கமபஸ்ஸே டி²தோ பிண்ட³பாதியத்தே²ரோ ஆஹ ‘‘ஆவுஸோ, பப்³ப³ஜிதோ நாம அதி⁴வாஸனஸீலோ ஹோதீ’’தி. ஸோ ‘‘ஸாது⁴, ப⁴ந்தே’’தி அதி⁴வாஸெத்வா நிச்சலோ ஸயி. வாதோ நாபி⁴தோ யாவ ஹத³யங் பா²லேதி. தே²ரோ வேத³னங் விக்க²ம்பெ⁴த்வா விபஸ்ஸந்தோ முஹுத்தேன அனாகா³மீ ஹுத்வா பரினிப்³பா³யீதி.

    Therassa kira rattiṃ padhānena vītināmetvā ṭhitassa udaravāto uppajji. So taṃ adhivāsetuṃ asakkonto āvattati parivattati. Tamenaṃ caṅkamapasse ṭhito piṇḍapātiyatthero āha ‘‘āvuso, pabbajito nāma adhivāsanasīlo hotī’’ti. So ‘‘sādhu, bhante’’ti adhivāsetvā niccalo sayi. Vāto nābhito yāva hadayaṃ phāleti. Thero vedanaṃ vikkhambhetvā vipassanto muhuttena anāgāmī hutvā parinibbāyīti.

    யஞ்ஹிஸ்ஸாதி ஸீதாதீ³ஸு யங்கிஞ்சி ஏகத⁴ம்மம்பி அஸ்ஸ. அனதி⁴வாஸயதோதி அனதி⁴வாஸெந்தஸ்ஸ அக்க²மந்தஸ்ஸ. ஸேஸங் வுத்தனயமேவ. ஆஸவுப்பத்தி பனெத்த² ஏவங் வேதி³தப்³பா³. ஸீதேன பு²ட்ட²ஸ்ஸ உண்ஹங் பத்த²யந்தஸ்ஸ காமாஸவோ உப்பஜ்ஜதி, ஏவங் ஸப்³ப³த்த². நத்தி² நோ ஸம்பத்திப⁴வே ஸுக³திப⁴வே ஸீதங் வா உண்ஹங் வாதி ப⁴வங் பத்த²யந்தஸ்ஸ ப⁴வாஸவோ. மய்ஹங் ஸீதங் உண்ஹந்தி கா³ஹோ தி³ட்டா²ஸவோ. ஸப்³பே³ஹேவ ஸம்பயுத்தோ அவிஜ்ஜாஸவோதி.

    Yañhissāti sītādīsu yaṃkiñci ekadhammampi assa. Anadhivāsayatoti anadhivāsentassa akkhamantassa. Sesaṃ vuttanayameva. Āsavuppatti panettha evaṃ veditabbā. Sītena phuṭṭhassa uṇhaṃ patthayantassa kāmāsavo uppajjati, evaṃ sabbattha. Natthi no sampattibhave sugatibhave sītaṃ vā uṇhaṃ vāti bhavaṃ patthayantassa bhavāsavo. Mayhaṃ sītaṃ uṇhanti gāho diṭṭhāsavo. Sabbeheva sampayutto avijjāsavoti.

    ‘‘இமே வுச்சந்தி…பே॰… அதி⁴வாஸனா பஹாதப்³பா³’’தி இமே ஸீதாதீ³ஸு ஏகமேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமாய க²ந்திஸங்வரஸங்கா²தாய அதி⁴வாஸனாய பஹாதப்³பா³தி வுச்சந்தீதி அத்தோ². எத்த² ச யஸ்மா அயங் க²ந்தி ஸீதாதி³த⁴ம்மே அதி⁴வாஸேதி, அத்தனோ உபரி ஆரோபெத்வா வாஸேதியேவ. ந அஸஹமானா ஹுத்வா நிரஸ்ஸதி, தஸ்மா ‘‘அதி⁴வாஸனா’’தி வுச்சதீதி வேதி³தப்³பா³.

    ‘‘Ime vuccanti…pe… adhivāsanā pahātabbā’’ti ime sītādīsu ekamekassa vasena cattāro cattāro katvā aneke āsavā imāya khantisaṃvarasaṅkhātāya adhivāsanāya pahātabbāti vuccantīti attho. Ettha ca yasmā ayaṃ khanti sītādidhamme adhivāseti, attano upari āropetvā vāsetiyeva. Na asahamānā hutvā nirassati, tasmā ‘‘adhivāsanā’’ti vuccatīti veditabbā.

    அதி⁴வாஸனாபஹாதப்³ப³ஆஸவவண்ணனா நிட்டி²தா.

    Adhivāsanāpahātabbaāsavavaṇṇanā niṭṭhitā.

    பரிவஜ்ஜனாபஹாதப்³ப³ஆஸவவண்ணனா

    Parivajjanāpahātabbaāsavavaṇṇanā

    25. படிஸங்கா² யோனிஸோ சண்ட³ங் ஹத்தி²ங் பரிவஜ்ஜேதீதி அஹங் ஸமணோதி சண்ட³ஸ்ஸ ஹத்தி²ஸ்ஸ ஆஸன்னே ந டா²தப்³ப³ங். ததோனிதா³னஞ்ஹி மரணம்பி ஸியா மரணமத்தம்பி து³க்க²ந்தி ஏவங் உபாயேன பதே²ன பச்சயேன பச்சவெக்கி²த்வா சண்ட³ங் ஹத்தி²ங் பரிவஜ்ஜேதி படிக்கமதி. ஏஸ நயோ ஸப்³ப³த்த². சண்ட³ந்தி ச து³ட்ட²ங், வாளந்தி வுத்தங் ஹோதி. கா²ணுந்தி க²தி³ரகா²ணுஆதி³ங். கண்டகட்டா²னந்தி கண்டகானங் டா²னங், யத்த² கண்டகா விஜ்ஜந்தி, தங் ஓகாஸந்தி வுத்தங் ஹோதி. ஸொப்³ப⁴ந்தி ஸப்³ப³தோ பரிச்சி²ன்னதடங். பபாதந்தி ஏகதோ சி²ன்னதடங். சந்த³னிகந்தி உச்சி²ட்டோ²த³கக³ப்³ப⁴மலாதீ³னங் ச²ட்³ட³னட்டா²னங். ஓளிக³ல்லந்தி தேஸங்யேவ ஸகத்³த³மாதீ³னங் ஸந்த³னோகாஸங். தங் ஜண்ணுமத்தம்பி அஸுசிப⁴ரிதங் ஹோதி, த்³வேபி சேதானி டா²னானி அமனுஸ்ஸது³ட்டா²னி ஹொந்தி. தஸ்மா தானி வஜ்ஜேதப்³பா³னி. அனாஸனேதி எத்த² பன அயுத்தங் ஆஸனங் அனாஸனங், தங் அத்த²தோ அனியதவத்து²கங் ரஹோபடிச்ச²ன்னாஸனந்தி வேதி³தப்³ப³ங். அகோ³சரேதி எத்த²பி ச அயுத்தோ கோ³சரோ அகோ³சரோ, ஸோ வேஸியாதி³பே⁴த³தோ பஞ்சவிதோ⁴. பாபகே மித்தேதி லாமகே து³ஸ்ஸீலே மித்தபதிரூபகே, அமித்தே வா. ப⁴ஜந்தந்தி ஸேவமானங். விஞ்ஞூ ஸப்³ரஹ்மசாரீதி பண்டி³தா பு³த்³தி⁴ஸம்பன்னா ஸப்³ரஹ்மசாரயோ, பி⁴க்கூ²னமேதங் அதி⁴வசனங். தே ஹி ஏககம்மங் ஏகுத்³தே³ஸோ ஸமஸிக்க²தாதி இமங் ப்³ரஹ்மங் ஸமானங் சரந்தி, தஸ்மா ஸப்³ரஹ்மசாரீதி வுச்சந்தி. பாபகேஸு டா²னேஸூதி லாமகேஸு டா²னேஸு. ஓகப்பெய்யுந்தி ஸத்³த³ஹெய்யுங், அதி⁴முச்செய்யுங் ‘‘அத்³தா⁴ அயமாயஸ்மா அகாஸி வா கரிஸ்ஸதி வா’’தி.

    25.Paṭisaṅkhāyoniso caṇḍaṃ hatthiṃ parivajjetīti ahaṃ samaṇoti caṇḍassa hatthissa āsanne na ṭhātabbaṃ. Tatonidānañhi maraṇampi siyā maraṇamattampi dukkhanti evaṃ upāyena pathena paccayena paccavekkhitvā caṇḍaṃ hatthiṃ parivajjeti paṭikkamati. Esa nayo sabbattha. Caṇḍanti ca duṭṭhaṃ, vāḷanti vuttaṃ hoti. Khāṇunti khadirakhāṇuādiṃ. Kaṇṭakaṭṭhānanti kaṇṭakānaṃ ṭhānaṃ, yattha kaṇṭakā vijjanti, taṃ okāsanti vuttaṃ hoti. Sobbhanti sabbato paricchinnataṭaṃ. Papātanti ekato chinnataṭaṃ. Candanikanti ucchiṭṭhodakagabbhamalādīnaṃ chaḍḍanaṭṭhānaṃ. Oḷigallanti tesaṃyeva sakaddamādīnaṃ sandanokāsaṃ. Taṃ jaṇṇumattampi asucibharitaṃ hoti, dvepi cetāni ṭhānāni amanussaduṭṭhāni honti. Tasmā tāni vajjetabbāni. Anāsaneti ettha pana ayuttaṃ āsanaṃ anāsanaṃ, taṃ atthato aniyatavatthukaṃ rahopaṭicchannāsananti veditabbaṃ. Agocareti etthapi ca ayutto gocaro agocaro, so vesiyādibhedato pañcavidho. Pāpake mitteti lāmake dussīle mittapatirūpake, amitte vā. Bhajantanti sevamānaṃ. Viññū sabrahmacārīti paṇḍitā buddhisampannā sabrahmacārayo, bhikkhūnametaṃ adhivacanaṃ. Te hi ekakammaṃ ekuddeso samasikkhatāti imaṃ brahmaṃ samānaṃ caranti, tasmā sabrahmacārīti vuccanti. Pāpakesu ṭhānesūti lāmakesu ṭhānesu. Okappeyyunti saddaheyyuṃ, adhimucceyyuṃ ‘‘addhā ayamāyasmā akāsi vā karissati vā’’ti.

    யஞ்ஹிஸ்ஸாதி ஹத்தி²ஆதீ³ஸு யங்கிஞ்சி ஏகம்பி அஸ்ஸ. ஸேஸங் வுத்தனயமேவ. ஆஸவுப்பத்தி பனெத்த² ஏவங் வேதி³தப்³பா³. ஹத்தி²ஆதி³னிதா³னேன து³க்கே²ன பு²ட்ட²ஸ்ஸ ஸுக²ங் பத்த²யதோ காமாஸவோ உப்பஜ்ஜதி. நத்தி² நோ ஸம்பத்திப⁴வே ஸுக³திப⁴வே ஈதி³ஸங் து³க்க²ந்தி ப⁴வங் பத்தெ²ந்தஸ்ஸ ப⁴வாஸவோ. மங் ஹத்தீ² மத்³த³தி, மங் அஸ்ஸோதி கா³ஹோ தி³ட்டா²ஸவோ. ஸப்³பே³ஹேவ ஸம்பயுத்தோ அவிஜ்ஜாஸவோதி.

    Yañhissāti hatthiādīsu yaṃkiñci ekampi assa. Sesaṃ vuttanayameva. Āsavuppatti panettha evaṃ veditabbā. Hatthiādinidānena dukkhena phuṭṭhassa sukhaṃ patthayato kāmāsavo uppajjati. Natthi no sampattibhave sugatibhave īdisaṃ dukkhanti bhavaṃ patthentassa bhavāsavo. Maṃ hatthī maddati, maṃ assoti gāho diṭṭhāsavo. Sabbeheva sampayutto avijjāsavoti.

    இமே வுச்சந்தி…பே॰… பரிவஜ்ஜனா பஹாதப்³பா³தி இமே ஹத்தி²ஆதீ³ஸு ஏகேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமினா ஸீலஸங்வரஸங்கா²தேன பரிவஜ்ஜனேன பஹாதப்³பா³தி வுச்சந்தீதி வேதி³தப்³பா³.

    Ime vuccanti…pe… parivajjanā pahātabbāti ime hatthiādīsu ekekassa vasena cattāro cattāro katvā aneke āsavā iminā sīlasaṃvarasaṅkhātena parivajjanena pahātabbāti vuccantīti veditabbā.

    பரிவஜ்ஜனாபஹாதப்³ப³ஆஸவவண்ணனா நிட்டி²தா.

    Parivajjanāpahātabbaāsavavaṇṇanā niṭṭhitā.

    வினோத³னாபஹாதப்³ப³ஆஸவவண்ணனா

    Vinodanāpahātabbaāsavavaṇṇanā

    26. படிஸங்கா² யோனிஸோ உப்பன்னங் காமவிதக்கங் நாதி⁴வாஸேதீதி ‘‘இதி பாயங் விதக்கோ அகுஸலோ, இதிபி ஸாவஜ்ஜோ, இதிபி து³க்க²விபாகோ, ஸோ ச கோ² அத்தப்³யாபா³தா⁴ய ஸங்வத்ததீ’’திஆதி³னா நயேன யோனிஸோ காமவிதக்கே ஆதீ³னவங் பச்சவெக்கி²த்வா தஸ்மிங் தஸ்மிங் ஆரம்மணே உப்பன்னங் ஜாதமபி⁴னிப்³ப³த்தங் காமவிதக்கங் நாதி⁴வாஸேதி, சித்தங் ஆரோபெத்வா ந வாஸேதி, அப்³ப⁴ந்தரே வா ந வாஸேதீதிபி அத்தோ².

    26.Paṭisaṅkhāyoniso uppannaṃ kāmavitakkaṃ nādhivāsetīti ‘‘iti pāyaṃ vitakko akusalo, itipi sāvajjo, itipi dukkhavipāko, so ca kho attabyābādhāya saṃvattatī’’tiādinā nayena yoniso kāmavitakke ādīnavaṃ paccavekkhitvā tasmiṃ tasmiṃ ārammaṇe uppannaṃ jātamabhinibbattaṃ kāmavitakkaṃ nādhivāseti, cittaṃ āropetvā na vāseti, abbhantare vā na vāsetītipi attho.

    அனதி⁴வாஸெந்தோ கிங் கரோதீதி? பஜஹதி ச²ட்³டே³தி.

    Anadhivāsento kiṃ karotīti? Pajahati chaḍḍeti.

    கிங் கசவரங் விய பிடகேனாதி? ந ஹி, அபிச கோ² நங் வினோதே³தி துத³தி விஜ்ஜ²தி நீஹரதி.

    Kiṃ kacavaraṃ viya piṭakenāti? Na hi, apica kho naṃ vinodeti tudati vijjhati nīharati.

    கிங் ப³லிப³த்³த³ங் விய பதோதே³னாதி? ந ஹி, அத² கோ² நங் ப்³யந்தீகரோதி விக³தந்தங் கரோதி. யதா²ஸ்ஸ அந்தோபி நாவஸிஸ்ஸதி அந்தமஸோ ப⁴ங்க³மத்தம்பி, ததா² நங் கரோதி.

    Kiṃ balibaddaṃ viya patodenāti? Na hi, atha kho naṃ byantīkaroti vigatantaṃ karoti. Yathāssa antopi nāvasissati antamaso bhaṅgamattampi, tathā naṃ karoti.

    கத²ங் பன நங் ததா² கரோதீதி? அனபா⁴வங் க³மேதீதி அனு அனு அபா⁴வங் க³மேதி, விக்க²ம்ப⁴னப்பஹானேன யதா² ஸுவிக்க²ம்பி⁴தோ ஹோதி, ததா² கரோதீதி வுத்தங் ஹோதி. ஏஸ நயோ ப்³யாபாத³விஹிங்ஸாவிதக்கேஸு.

    Kathaṃ pana naṃ tathā karotīti? Anabhāvaṃ gametīti anu anu abhāvaṃ gameti, vikkhambhanappahānena yathā suvikkhambhito hoti, tathā karotīti vuttaṃ hoti. Esa nayo byāpādavihiṃsāvitakkesu.

    எத்த² ச காமவிதக்கோதி ‘‘யோ காமபடிஸங்யுத்தோ தக்கோ விதக்கோ மிச்சா²ஸங்கப்போ’’தி விப⁴ங்கே³ (விப⁴॰ 910) வுத்தோ. ஏஸ நயோ இதரேஸு. உப்பன்னுப்பன்னேதி உப்பன்னே உப்பன்னே, உப்பன்னமத்தேயேவாதி வுத்தங் ஹோதி. ஸகிங் வா உப்பன்னே வினோதெ³த்வா து³தியவாரே அஜ்ஜு²பெக்கி²தா ந ஹோதி, ஸதக்க²த்தும்பி உப்பன்னே உப்பன்னே வினோதே³தியேவ. பாபகே அகுஸலேதி லாமகட்டே²ன பாபகே, அகோஸல்லதாய அகுஸலே. த⁴ம்மேதி தேயேவ காமவிதக்காத³யோ ஸப்³பே³பி வா நவ மஹாவிதக்கே. தத்த² தயோ வுத்தா ஏவ. அவஸேஸா ‘‘ஞாதிவிதக்கோ ஜனபத³விதக்கோ அமரவிதக்கோ பரானுத்³த³யதாபடிஸங்யுத்தோ விதக்கோ லாப⁴ஸக்காரஸிலோகபடிஸங்யுத்தோ விதக்கோ அனவஞ்ஞத்திபடிஸங்யுத்தோ விதக்கோ’’தி (மஹானி॰ 207) இமே ச².

    Ettha ca kāmavitakkoti ‘‘yo kāmapaṭisaṃyutto takko vitakko micchāsaṅkappo’’ti vibhaṅge (vibha. 910) vutto. Esa nayo itaresu. Uppannuppanneti uppanne uppanne, uppannamatteyevāti vuttaṃ hoti. Sakiṃ vā uppanne vinodetvā dutiyavāre ajjhupekkhitā na hoti, satakkhattumpi uppanne uppanne vinodetiyeva. Pāpake akusaleti lāmakaṭṭhena pāpake, akosallatāya akusale. Dhammeti teyeva kāmavitakkādayo sabbepi vā nava mahāvitakke. Tattha tayo vuttā eva. Avasesā ‘‘ñātivitakko janapadavitakko amaravitakko parānuddayatāpaṭisaṃyutto vitakko lābhasakkārasilokapaṭisaṃyutto vitakko anavaññattipaṭisaṃyutto vitakko’’ti (mahāni. 207) ime cha.

    யஞ்ஹிஸ்ஸாதி ஏதேஸு விதக்கேஸு யங்கிஞ்சி அஸ்ஸ, ஸேஸங் வுத்தனயமேவ. காமவிதக்கோ பனெத்த² காமாஸவோ ஏவ. தப்³பி³ஸேஸோ ப⁴வாஸவோ. தங்ஸம்பயுத்தோ தி³ட்டா²ஸவோ. ஸப்³ப³விதக்கேஸு அவிஜ்ஜாஸவோதி ஏவங் ஆஸவுப்பத்திபி வேதி³தப்³பா³.

    Yañhissāti etesu vitakkesu yaṃkiñci assa, sesaṃ vuttanayameva. Kāmavitakko panettha kāmāsavo eva. Tabbiseso bhavāsavo. Taṃsampayutto diṭṭhāsavo. Sabbavitakkesu avijjāsavoti evaṃ āsavuppattipi veditabbā.

    இமே வுச்சந்தி…பே॰… வினோத³னா பஹாதப்³பா³தி இமே காமவிதக்காதி³வஸேன வுத்தப்பகாரா ஆஸவா இமினா தஸ்மிங் தஸ்மிங் விதக்கே ஆதீ³னவபச்சவெக்க²ணஸஹிதேன வீரியஸங்வரஸங்கா²தேன வினோத³னேன பஹாதப்³பா³தி வுச்சந்தீதி வேதி³தப்³பா³.

    Ime vuccanti…pe… vinodanā pahātabbāti ime kāmavitakkādivasena vuttappakārā āsavā iminā tasmiṃ tasmiṃ vitakke ādīnavapaccavekkhaṇasahitena vīriyasaṃvarasaṅkhātena vinodanena pahātabbāti vuccantīti veditabbā.

    வினோத³னாபஹாதப்³ப³ஆஸவவண்ணனா நிட்டி²தா.

    Vinodanāpahātabbaāsavavaṇṇanā niṭṭhitā.

    பா⁴வனாபஹாதப்³ப³ஆஸவவண்ணனா

    Bhāvanāpahātabbaāsavavaṇṇanā

    27. படிஸங்கா² யோனிஸோ ஸதிஸம்பொ³ஜ்ஜ²ங்க³ங் பா⁴வேதீதி அபா⁴வனாய ஆதீ³னவங், பா⁴வனாய ச ஆனிஸங்ஸங் உபாயேன பதே²ன பச்சவெக்கி²த்வா ஸதிஸம்பொ³ஜ்ஜ²ங்க³ங் பா⁴வேதி, ஏஸ நயோ ஸப்³ப³த்த². எத்த² ச கிஞ்சாபி இமே உபரிமக்³க³த்தயஸமயஸம்பூ⁴தா லோகுத்தரபொ³ஜ்ஜ²ங்கா³ ஏவ அதி⁴ப்பேதா, ததா²பி ஆதி³கம்மிகானங் பொ³ஜ்ஜ²ங்கே³ஸு அஸம்மோஹத்த²ங் லோகியலோகுத்தரமிஸ்ஸகேன நேஸங் நயேன அத்த²வண்ணனங் கரிஸ்ஸாமி. இத⁴ பன லோகியனயங் பஹாய லோகுத்தரனயோ ஏவ க³ஹேதப்³போ³. தத்த² ஸதிஸம்பொ³ஜ்ஜ²ங்க³ந்திஆதி³னா நயேன வுத்தானங் ஸத்தன்னங் ஆதி³பதா³னங்யேவ தாவ –

    27.Paṭisaṅkhā yoniso satisambojjhaṅgaṃ bhāvetīti abhāvanāya ādīnavaṃ, bhāvanāya ca ānisaṃsaṃ upāyena pathena paccavekkhitvā satisambojjhaṅgaṃ bhāveti, esa nayo sabbattha. Ettha ca kiñcāpi ime uparimaggattayasamayasambhūtā lokuttarabojjhaṅgā eva adhippetā, tathāpi ādikammikānaṃ bojjhaṅgesu asammohatthaṃ lokiyalokuttaramissakena nesaṃ nayena atthavaṇṇanaṃ karissāmi. Idha pana lokiyanayaṃ pahāya lokuttaranayo eva gahetabbo. Tattha satisambojjhaṅgantiādinā nayena vuttānaṃ sattannaṃ ādipadānaṃyeva tāva –

    அத்த²தோ லக்க²ணாதீ³ஹி, கமதோ ச வினிச்ச²யோ;

    Atthato lakkhaṇādīhi, kamato ca vinicchayo;

    அனூனாதி⁴கதோ சேவ, விஞ்ஞாதப்³போ³ விபா⁴வினா.

    Anūnādhikato ceva, viññātabbo vibhāvinā.

    தத்த² ஸதிஸம்பொ³ஜ்ஜ²ங்கே³ தாவ ஸரணட்டே²ன ஸதி. ஸா பனேஸா உபட்டா²னலக்க²ணா, அபிலாபனலக்க²ணா வா. வுத்தம்பி ஹேதங் ‘‘யதா², மஹாராஜ, ரஞ்ஞோ ப⁴ண்டா³கா³ரிகோ ரஞ்ஞோ ஸாபதெய்யங் அபிலாபேதி, எத்தகங், மஹாராஜ, ஹிரஞ்ஞங், எத்தகங் ஸுவண்ணங், எத்தகங் ஸாபதெய்யந்தி, ஏவமேவ கோ², மஹாராஜ , ஸதி உப்பஜ்ஜமானா குஸலாகுஸலஸாவஜ்ஜானவஜ்ஜஹீனபணீதகண்ஹஸுக்கஸப்படிபா⁴கே³ த⁴ம்மே அபிலாபேதி. இமே சத்தாரோ ஸதிபட்டா²னா’’தி (மி॰ ப॰ 2.1.13) வித்தா²ரோ. அபிலாபனரஸா. கிச்சவஸேனேவ ஹிஸ்ஸ ஏதங் லக்க²ணங் தே²ரேன வுத்தங். அஸம்மோஸரஸா வா. கோ³சராபி⁴முக²பா⁴வபச்சுபட்டா²னா. ஸதி ஏவ ஸம்பொ³ஜ்ஜ²ங்கோ³ ஸதிஸம்பொ³ஜ்ஜ²ங்கோ³. தத்த² போ³தி⁴யா போ³தி⁴ஸ்ஸ வா அங்கோ³தி பொ³ஜ்ஜ²ங்கோ³.

    Tattha satisambojjhaṅge tāva saraṇaṭṭhena sati. Sā panesā upaṭṭhānalakkhaṇā, apilāpanalakkhaṇā vā. Vuttampi hetaṃ ‘‘yathā, mahārāja, rañño bhaṇḍāgāriko rañño sāpateyyaṃ apilāpeti, ettakaṃ, mahārāja, hiraññaṃ, ettakaṃ suvaṇṇaṃ, ettakaṃ sāpateyyanti, evameva kho, mahārāja , sati uppajjamānā kusalākusalasāvajjānavajjahīnapaṇītakaṇhasukkasappaṭibhāge dhamme apilāpeti. Ime cattāro satipaṭṭhānā’’ti (mi. pa. 2.1.13) vitthāro. Apilāpanarasā. Kiccavaseneva hissa etaṃ lakkhaṇaṃ therena vuttaṃ. Asammosarasā vā. Gocarābhimukhabhāvapaccupaṭṭhānā. Sati eva sambojjhaṅgo satisambojjhaṅgo. Tattha bodhiyā bodhissa vā aṅgoti bojjhaṅgo.

    கிங் வுத்தங் ஹோதி? யா ஹி அயங் த⁴ம்மஸாமக்³கீ³, யாய லோகியலோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹன-காமஸுக²த்தகிலமதா²னுயோக³-உச்சே²த³ஸஸ்ஸதாபி⁴னிவேஸாதீ³னங் அனேகேஸங் உபத்³த³வானங் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபெக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தீதி கத்வா ‘‘போ³தீ⁴’’தி வுச்சதி. பு³ஜ்ஜ²தீதி கிலேஸஸந்தானநித்³தா³ய உட்ட²ஹதி, சத்தாரி வா அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி வுத்தங் ஹோதி. யதா²ஹ ‘‘ஸத்த பொ³ஜ்ஜ²ங்கே³ பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’’தி. தஸ்ஸா த⁴ம்மஸாமக்³கி³ஸங்கா²தாய போ³தி⁴யா அங்கோ³திபி பொ³ஜ்ஜ²ங்கோ³, ஜா²னங்க³மக்³க³ங்கா³த³யோ விய.

    Kiṃ vuttaṃ hoti? Yā hi ayaṃ dhammasāmaggī, yāya lokiyalokuttaramaggakkhaṇe uppajjamānāya līnuddhaccapatiṭṭhānāyūhana-kāmasukhattakilamathānuyoga-ucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā ‘‘bodhī’’ti vuccati. Bujjhatīti kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti. Tassā dhammasāmaggisaṅkhātāya bodhiyā aṅgotipi bojjhaṅgo, jhānaṅgamaggaṅgādayo viya.

    யோபேஸ யதா²வுத்தப்பகாராய ஏதாய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ ‘‘போ³தீ⁴’’தி வுச்சதி, தஸ்ஸ போ³தி⁴ஸ்ஸ அங்கோ³திபி பொ³ஜ்ஜ²ங்கோ³, ஸேனங்க³ரத²ங்கா³த³யோ விய. தேனாஹு அட்ட²கதா²சரியா ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி வா பொ³ஜ்ஜ²ங்கா³’’தி. அபிச ‘‘பொ³ஜ்ஜ²ங்கா³தி கேனட்டே²ன பொ³ஜ்ஜ²ங்கா³? போ³தா⁴ய ஸங்வத்தந்தீதி பொ³ஜ்ஜ²ங்கா³, பு³ஜ்ஜ²ந்தீதி பொ³ஜ்ஜ²ங்கா³, அனுபு³ஜ்ஜ²ந்தீதி பொ³ஜ்ஜ²ங்கா³, படிபு³ஜ்ஜ²ந்தீதி பொ³ஜ்ஜ²ங்கா³, ஸம்பு³ஜ்ஜ²ந்தீதி பொ³ஜ்ஜ²ங்கா³’’திஆதி³னா (படி॰ ம॰ 3.17) படிஸம்பி⁴தா³னயேனாபி அத்தோ² வேதி³தப்³போ³. பஸத்தோ² ஸுந்த³ரோ வா பொ³ஜ்ஜ²ங்கோ³தி ஸம்பொ³ஜ்ஜ²ங்கோ³. ஏவங் ஸதி ஏவ ஸம்பொ³ஜ்ஜ²ங்கோ³ ஸதிஸம்பொ³ஜ்ஜ²ங்கோ³. தங் ஸதிஸம்பொ³ஜ்ஜ²ங்க³ங். ஏவங் தாவ ஏகஸ்ஸ ஆதி³பத³ஸ்ஸ அத்த²தோ லக்க²ணாதீ³ஹி ச வினிச்ச²யோ விஞ்ஞாதப்³போ³.

    Yopesa yathāvuttappakārāya etāya dhammasāmaggiyā bujjhatīti katvā ariyasāvako ‘‘bodhī’’ti vuccati, tassa bodhissa aṅgotipi bojjhaṅgo, senaṅgarathaṅgādayo viya. Tenāhu aṭṭhakathācariyā ‘‘bujjhanakassa puggalassa aṅgāti vā bojjhaṅgā’’ti. Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’tiādinā (paṭi. ma. 3.17) paṭisambhidānayenāpi attho veditabbo. Pasattho sundaro vā bojjhaṅgoti sambojjhaṅgo. Evaṃ sati eva sambojjhaṅgo satisambojjhaṅgo. Taṃ satisambojjhaṅgaṃ. Evaṃ tāva ekassa ādipadassa atthato lakkhaṇādīhi ca vinicchayo viññātabbo.

    து³தியாதீ³ஸு பன சதுஸச்சத⁴ம்மே விசினாதீதி த⁴ம்மவிசயோ. ஸோ பன விசயலக்க²ணோ, ஓபா⁴ஸனரஸோ, அஸம்மோஹபச்சுபட்டா²னோ. வீரபா⁴வதோ விதி⁴னா ஈரயிதப்³ப³தோ ச வீரியங். தங் பக்³க³ஹலக்க²ணங் , உபத்த²ம்ப⁴னரஸங், அனோஸீத³னபச்சுபட்டா²னங் . பீணயதீதி பீதி. ஸா ப²ரணலக்க²ணா, துட்டி²லக்க²ணா வா, காயசித்தானங் பீணனரஸா, தேஸங்யேவ ஓத³க்³யபச்சுபட்டா²னா. காயசித்தத³ரத²பஸ்ஸம்ப⁴னதோ பஸ்ஸத்³தி⁴. ஸா உபஸமலக்க²ணா, காயசித்தத³ரத²னிம்மத்³த³னரஸா, ஆயசித்தானங் அபரிப்ப²ந்த³னபூ⁴தஸீதிபா⁴வபச்சுபட்டா²னா. ஸமாதா⁴னதோ ஸமாதி⁴. ஸோ அவிக்கே²பலக்க²ணோ, அவிஸாரலக்க²ணோ வா, சித்தசேதஸிகானங் ஸம்பிண்ட³னரஸோ, சித்தட்டி²திபச்சுபட்டா²னோ. அஜ்ஜு²பெக்க²னதோ உபெக்கா². ஸா படிஸங்கா²னலக்க²ணா, ஸமவாஹிதலக்க²ணா வா, ஊனாதி⁴கதானிவாரணரஸா, பக்க²பாதுபச்சே²த³ரஸா வா, மஜ்ஜ²த்தபா⁴வபச்சுபட்டா²னா. ஸேஸங் வுத்தனயமேவ. ஏவங் ஸேஸபதா³னம்பி அத்த²தோ லக்க²ணாதீ³ஹி ச வினிச்ச²யோ விஞ்ஞாதப்³போ³.

    Dutiyādīsu pana catusaccadhamme vicinātīti dhammavicayo. So pana vicayalakkhaṇo, obhāsanaraso, asammohapaccupaṭṭhāno. Vīrabhāvato vidhinā īrayitabbato ca vīriyaṃ. Taṃ paggahalakkhaṇaṃ , upatthambhanarasaṃ, anosīdanapaccupaṭṭhānaṃ . Pīṇayatīti pīti. Sā pharaṇalakkhaṇā, tuṭṭhilakkhaṇā vā, kāyacittānaṃ pīṇanarasā, tesaṃyeva odagyapaccupaṭṭhānā. Kāyacittadarathapassambhanato passaddhi. Sā upasamalakkhaṇā, kāyacittadarathanimmaddanarasā, āyacittānaṃ aparipphandanabhūtasītibhāvapaccupaṭṭhānā. Samādhānato samādhi. So avikkhepalakkhaṇo, avisāralakkhaṇo vā, cittacetasikānaṃ sampiṇḍanaraso, cittaṭṭhitipaccupaṭṭhāno. Ajjhupekkhanato upekkhā. Sā paṭisaṅkhānalakkhaṇā, samavāhitalakkhaṇā vā, ūnādhikatānivāraṇarasā, pakkhapātupacchedarasā vā, majjhattabhāvapaccupaṭṭhānā. Sesaṃ vuttanayameva. Evaṃ sesapadānampi atthato lakkhaṇādīhi ca vinicchayo viññātabbo.

    கமதோதி எத்த² ச ‘‘ஸதிஞ்ச க்²வாஹங், பி⁴க்க²வே, ஸப்³ப³த்தி²கங் வதா³மீ’’தி (ஸங்॰ நி॰ 5.234) வசனதோ ஸப்³பே³ஸங் ஸேஸபொ³ஜ்ஜ²ங்கா³னங் உபகாரகத்தா ஸதிஸம்பொ³ஜ்ஜ²ங்கோ³வ பட²மங் வுத்தோ. ததோ பரங் ‘‘ஸோ ததா² ஸதோ விஹரந்தோ தங் த⁴ம்மங் பஞ்ஞாய பவிசினதீ’’திஆதி³னா (விப⁴॰ 469) நயேன ஸேஸபொ³ஜ்ஜ²ங்கா³னங் புப்³பா³பரியவசனே பயோஜனங் ஸுத்தேயேவ வுத்தங். ஏவமெத்த² கமதோபி வினிச்ச²யோ விஞ்ஞாதப்³போ³.

    Kamatoti ettha ca ‘‘satiñca khvāhaṃ, bhikkhave, sabbatthikaṃ vadāmī’’ti (saṃ. ni. 5.234) vacanato sabbesaṃ sesabojjhaṅgānaṃ upakārakattā satisambojjhaṅgova paṭhamaṃ vutto. Tato paraṃ ‘‘so tathā sato viharanto taṃ dhammaṃ paññāya pavicinatī’’tiādinā (vibha. 469) nayena sesabojjhaṅgānaṃ pubbāpariyavacane payojanaṃ sutteyeva vuttaṃ. Evamettha kamatopi vinicchayo viññātabbo.

    அனூனாதி⁴கதோதி கஸ்மா பன ப⁴க³வதா ஸத்தேவ பொ³ஜ்ஜ²ங்கா³ வுத்தா அனூனா அனதி⁴காதி. லீனுத்³த⁴ச்சபடிபக்க²தோ ஸப்³ப³த்தி²கதோ ச. எத்த² ஹி தயோ பொ³ஜ்ஜ²ங்கா³ லீனஸ்ஸ படிபக்கா². யதா²ஹ – ‘‘யஸ்மிஞ்ச கோ², பி⁴க்க²வே, ஸமயே லீனங் சித்தங் ஹோதி, காலோ தஸ்மிங் ஸமயே த⁴ம்மவிசயஸம்பொ³ஜ்ஜ²ங்க³ஸ்ஸ பா⁴வனாய, காலோ வீரியஸம்பொ³ஜ்ஜ²ங்க³ஸ்ஸ பா⁴வனாய, காலோ பீதிஸம்பொ³ஜ்ஜ²ங்க³ஸ்ஸ பா⁴வனாயா’’தி (ஸங்॰ நி॰ 5.234). தயோ உத்³த⁴ச்சஸ்ஸ படிபக்கா². யதா²ஹ – ‘‘யஸ்மிஞ்ச கோ², பி⁴க்க²வே, ஸமயே உத்³த⁴தங் சித்தங் ஹோதி, காலோ தஸ்மிங் ஸமயே பஸ்ஸத்³தி⁴ஸம்பொ³ஜ்ஜ²ங்க³ஸ்ஸ பா⁴வனாய, காலோ ஸமாதி⁴ஸம்பொ³ஜ்ஜ²ங்க³ஸ்ஸ பா⁴வனாய, காலோ உபெக்கா²ஸம்பொ³ஜ்ஜ²ங்க³ஸ்ஸ பா⁴வனாயா’’தி (ஸங்॰ நி॰ 5.234). ஏகோ பனெத்த² ஸப்³ப³த்தி²கோ. யதா²ஹ – ‘‘ஸதிஞ்ச க்²வாஹங், பி⁴க்க²வே, ஸப்³ப³த்தி²கங் வதா³மீ’’தி. ‘‘ஸப்³ப³த்த²க’’ந்திபி பாடோ², த்³வின்னம்பி ஸப்³ப³த்த² இச்சி²தப்³ப³ந்தி அத்தோ². ஏவங் லீனுத்³த⁴ச்சபடிபக்க²தோ ஸப்³ப³த்தி²கதோ ச ஸத்தேவ பொ³ஜ்ஜ²ங்கா³ வுத்தா அனூனா அனதி⁴காதி, ஏவமெத்த² அனூனாதி⁴கதோபி வினிச்ச²யோ விஞ்ஞாதப்³போ³.

    Anūnādhikatoti kasmā pana bhagavatā satteva bojjhaṅgā vuttā anūnā anadhikāti. Līnuddhaccapaṭipakkhato sabbatthikato ca. Ettha hi tayo bojjhaṅgā līnassa paṭipakkhā. Yathāha – ‘‘yasmiñca kho, bhikkhave, samaye līnaṃ cittaṃ hoti, kālo tasmiṃ samaye dhammavicayasambojjhaṅgassa bhāvanāya, kālo vīriyasambojjhaṅgassa bhāvanāya, kālo pītisambojjhaṅgassa bhāvanāyā’’ti (saṃ. ni. 5.234). Tayo uddhaccassa paṭipakkhā. Yathāha – ‘‘yasmiñca kho, bhikkhave, samaye uddhataṃ cittaṃ hoti, kālo tasmiṃ samaye passaddhisambojjhaṅgassa bhāvanāya, kālo samādhisambojjhaṅgassa bhāvanāya, kālo upekkhāsambojjhaṅgassa bhāvanāyā’’ti (saṃ. ni. 5.234). Eko panettha sabbatthiko. Yathāha – ‘‘satiñca khvāhaṃ, bhikkhave, sabbatthikaṃ vadāmī’’ti. ‘‘Sabbatthaka’’ntipi pāṭho, dvinnampi sabbattha icchitabbanti attho. Evaṃ līnuddhaccapaṭipakkhato sabbatthikato ca satteva bojjhaṅgā vuttā anūnā anadhikāti, evamettha anūnādhikatopi vinicchayo viññātabbo.

    ஏவங் தாவ ‘‘ஸதிஸம்பொ³ஜ்ஜ²ங்க³’’ந்திஆதி³னா நயேன வுத்தானங் ஸத்தன்னங் ஆதி³பதா³னங்யேவ அத்த²வண்ணனங் ஞத்வா இதா³னி பா⁴வேதி விவேகனிஸ்ஸிதந்திஆதீ³ஸு ஏவங் ஞாதப்³பா³. பா⁴வேதீதி வட்³டே⁴தி, அத்தனோ சித்தஸந்தானே புனப்புனங் ஜனேதி அபி⁴னிப்³ப³த்தேதீதி அத்தோ². விவேகனிஸ்ஸிதந்தி விவேகே நிஸ்ஸிதங். விவேகோதி விவித்ததா. ஸ்வாயங் தத³ங்க³விவேகோ விக்க²ம்ப⁴னஸமுச்சே²த³படிப்பஸ்ஸத்³தி⁴ நிஸ்ஸரணவிவேகோதி பஞ்சவிதோ⁴. தஸ்ஸ நானத்தங் ‘‘அரியத⁴ம்மே அவினீதோ’’தி எத்த² வுத்தனயேனேவ வேதி³தப்³ப³ங். அயமேவ ஹி தத்த² வினயோதி வுத்தோ. ஏவங் ஏதஸ்மிங் பஞ்சவிதே⁴ விவேகே.

    Evaṃ tāva ‘‘satisambojjhaṅga’’ntiādinā nayena vuttānaṃ sattannaṃ ādipadānaṃyeva atthavaṇṇanaṃ ñatvā idāni bhāveti vivekanissitantiādīsu evaṃ ñātabbā. Bhāvetīti vaḍḍheti, attano cittasantāne punappunaṃ janeti abhinibbattetīti attho. Vivekanissitanti viveke nissitaṃ. Vivekoti vivittatā. Svāyaṃ tadaṅgaviveko vikkhambhanasamucchedapaṭippassaddhi nissaraṇavivekoti pañcavidho. Tassa nānattaṃ ‘‘ariyadhamme avinīto’’ti ettha vuttanayeneva veditabbaṃ. Ayameva hi tattha vinayoti vutto. Evaṃ etasmiṃ pañcavidhe viveke.

    விவேகனிஸ்ஸிதந்தி தத³ங்க³விவேகனிஸ்ஸிதங் ஸமுச்சே²த³விவேகனிஸ்ஸிதங் நிஸ்ஸரணவிவேகனிஸ்ஸிதஞ்ச ஸதிஸம்பொ³ஜ்ஜ²ங்க³ங் பா⁴வேதீதி அயமத்தோ² வேதி³தப்³போ³. ததா² ஹி அயங் பொ³ஜ்ஜ²ங்க³பா⁴வனானுயுத்தோ யோகீ³ விபஸ்ஸனாக்க²ணே கிச்சதோ தத³ங்க³விவேகனிஸ்ஸிதங், அஜ்ஜா²ஸயதோ நிஸ்ஸரணவிவேகனிஸ்ஸிதங், மக்³க³காலே பன கிச்சதோ ஸமுச்சே²த³விவேகனிஸ்ஸிதங், ஆரம்மணதோ நிஸ்ஸரணவிவேகனிஸ்ஸிதங் ஸதிஸம்பொ³ஜ்ஜ²ங்க³ங் பா⁴வேதி. பஞ்சவித⁴விவேகனிஸ்ஸிதந்திபி ஏகே, தே ஹி ந கேவலங் ப³லவவிபஸ்ஸனாமக்³க³ப²லக்க²ணேஸு ஏவ பொ³ஜ்ஜ²ங்கே³ உத்³த⁴ரந்தி, விபஸ்ஸனாபாத³ககஸிணஜ்ஜா²னஆனாபானாஸுப⁴ப்³ரஹ்மவிஹாரஜ்ஜா²னேஸுபி உத்³த⁴ரந்தி. ந ச படிஸித்³தா⁴ அட்ட²கதா²சரியேஹி. தஸ்மா தேஸங் மதேன ஏதேஸங் ஜா²னானங் பவத்திக்க²ணே கிச்சதோ ஏவ விக்க²ம்ப⁴னவிவேகனிஸ்ஸிதங். யதா² ச ‘‘விபஸ்ஸனாக்க²ணே அஜ்ஜா²ஸயதோ நிஸ்ஸரணவிவேகனிஸ்ஸித’’ந்தி வுத்தங், ஏவங் படிப்பஸ்ஸத்³தி⁴விவேகனிஸ்ஸிதம்பி பா⁴வேதீதி வத்துங் வட்டதி. ஏஸ நயோ விராக³னிஸ்ஸிதாதீ³ஸு. விவேகட்டா² ஏவ ஹி விராகா³த³யோ.

    Vivekanissitanti tadaṅgavivekanissitaṃ samucchedavivekanissitaṃ nissaraṇavivekanissitañca satisambojjhaṅgaṃ bhāvetīti ayamattho veditabbo. Tathā hi ayaṃ bojjhaṅgabhāvanānuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ satisambojjhaṅgaṃ bhāveti. Pañcavidhavivekanissitantipi eke, te hi na kevalaṃ balavavipassanāmaggaphalakkhaṇesu eva bojjhaṅge uddharanti, vipassanāpādakakasiṇajjhānaānāpānāsubhabrahmavihārajjhānesupi uddharanti. Na ca paṭisiddhā aṭṭhakathācariyehi. Tasmā tesaṃ matena etesaṃ jhānānaṃ pavattikkhaṇe kiccato eva vikkhambhanavivekanissitaṃ. Yathā ca ‘‘vipassanākkhaṇe ajjhāsayato nissaraṇavivekanissita’’nti vuttaṃ, evaṃ paṭippassaddhivivekanissitampi bhāvetīti vattuṃ vaṭṭati. Esa nayo virāganissitādīsu. Vivekaṭṭhā eva hi virāgādayo.

    கேவலஞ்ஹெத்த² வொஸ்ஸக்³கோ³ து³விதோ⁴ பரிச்சாக³வொஸ்ஸக்³கோ³ ச பக்க²ந்த³னவொஸ்ஸக்³கோ³ சாதி. தத்த² பரிச்சாக³வொஸ்ஸக்³கோ³தி விபஸ்ஸனாக்க²ணே ச தத³ங்க³வஸேன, மக்³க³க்க²ணே ச ஸமுச்சே²த³வஸேன கிலேஸப்பஹானங். பக்க²ந்த³னவொஸ்ஸக்³கோ³தி விபஸ்ஸனாக்க²ணே தன்னின்னபா⁴வேன, மக்³க³க்க²ணே பன ஆரம்மணகரணேன நிப்³பா³னபக்க²ந்த³னங். தது³ப⁴யம்பி இமஸ்மிங் லோகியலோகுத்தரமிஸ்ஸகே அத்த²வண்ணனானயே வட்டதி. ததா² ஹி அயங் ஸதிஸம்பொ³ஜ்ஜ²ங்கோ³ யதா²வுத்தேன பகாரேன கிலேஸே பரிச்சஜதி, நிப்³பா³னஞ்ச பக்க²ந்த³தி. வொஸ்ஸக்³க³பரிணாமிந்தி இமினா பன ஸகலேன வசனேன வொஸ்ஸக்³க³த்தங் பரிணமந்தங் பரிணதஞ்ச பரிபச்சந்தங் பரிபக்கஞ்சாதி. இத³ங் வுத்தங் ஹோதி ‘‘அயஞ்ஹி பொ³ஜ்ஜ²ங்க³பா⁴வனானுயுத்தோ பி⁴க்கு² யதா² ஸதிஸம்பொ³ஜ்ஜ²ங்கோ³ கிலேஸபரிச்சாக³வொஸ்ஸக்³க³த்தங் நிப்³பா³னபக்க²ந்த³னவொஸ்ஸக்³க³த்தஞ்ச பரிபச்சதி, யதா² ச பரிபக்கோ ஹோதி, ததா² நங் பா⁴வேதீ’’தி. ஏஸ நயோ ஸேஸபொ³ஜ்ஜ²ங்கே³ஸு.

    Kevalañhettha vossaggo duvidho pariccāgavossaggo ca pakkhandanavossaggo cāti. Tattha pariccāgavossaggoti vipassanākkhaṇe ca tadaṅgavasena, maggakkhaṇe ca samucchedavasena kilesappahānaṃ. Pakkhandanavossaggoti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ. Tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ satisambojjhaṅgo yathāvuttena pakārena kilese pariccajati, nibbānañca pakkhandati. Vossaggapariṇāminti iminā pana sakalena vacanena vossaggattaṃ pariṇamantaṃ pariṇatañca paripaccantaṃ paripakkañcāti. Idaṃ vuttaṃ hoti ‘‘ayañhi bojjhaṅgabhāvanānuyutto bhikkhu yathā satisambojjhaṅgo kilesapariccāgavossaggattaṃ nibbānapakkhandanavossaggattañca paripaccati, yathā ca paripakko hoti, tathā naṃ bhāvetī’’ti. Esa nayo sesabojjhaṅgesu.

    இத⁴ பன நிப்³பா³னங்யேவ ஸப்³ப³ஸங்க²தேஹி விவித்தத்தா விவேகோ, ஸப்³பே³ஸங் விராக³பா⁴வதோ விராகோ³, நிரோத⁴பா⁴வதோ நிரோதோ⁴தி வுத்தங். மக்³கோ³ ஏவ ச வொஸ்ஸக்³க³பரிணாமீ, தஸ்மா ஸதிஸம்பொ³ஜ்ஜ²ங்க³ங் பா⁴வேதி விவேகங் ஆரம்மணங் கத்வா பவத்தியா விவேகனிஸ்ஸிதங். ததா² விராக³னிஸ்ஸிதங் நிரோத⁴னிஸ்ஸிதங். தஞ்ச கோ² அரியமக்³க³க்க²ணுப்பத்தியா கிலேஸானங் ஸமுச்சே²த³தோ பரிச்சாக³பா⁴வேன ச நிப்³பா³னபக்க²ந்த³னபா⁴வேன ச பரிணதங் பரிபக்கந்தி அயமேவ அத்தோ² த³ட்ட²ப்³போ³. ஏஸ நயோ ஸேஸபொ³ஜ்ஜ²ங்கே³ஸு.

    Idha pana nibbānaṃyeva sabbasaṅkhatehi vivittattā viveko, sabbesaṃ virāgabhāvato virāgo, nirodhabhāvato nirodhoti vuttaṃ. Maggo eva ca vossaggapariṇāmī, tasmā satisambojjhaṅgaṃ bhāveti vivekaṃ ārammaṇaṃ katvā pavattiyā vivekanissitaṃ. Tathā virāganissitaṃ nirodhanissitaṃ. Tañca kho ariyamaggakkhaṇuppattiyā kilesānaṃ samucchedato pariccāgabhāvena ca nibbānapakkhandanabhāvena ca pariṇataṃ paripakkanti ayameva attho daṭṭhabbo. Esa nayo sesabojjhaṅgesu.

    யஞ்ஹிஸ்ஸாதி ஏதேஸு பொ³ஜ்ஜ²ங்கே³ஸு யங்கிஞ்சி அஸ்ஸ. ஸேஸங் வுத்தனயமேவ. ஆஸவுப்பத்தியங் பனெத்த² இமேஸங் உபரிமக்³க³த்தயஸம்பயுத்தானங் பொ³ஜ்ஜ²ங்கா³னங் அபா⁴விதத்தா யே உப்பஜ்ஜெய்யுங் காமாஸவோ ப⁴வாஸவோ அவிஜ்ஜாஸவோதி தயோ ஆஸவா, பா⁴வயதோ ஏவங்ஸ தே ஆஸவா ந ஹொந்தீதி அயங் நயோ வேதி³தப்³போ³.

    Yañhissāti etesu bojjhaṅgesu yaṃkiñci assa. Sesaṃ vuttanayameva. Āsavuppattiyaṃ panettha imesaṃ uparimaggattayasampayuttānaṃ bojjhaṅgānaṃ abhāvitattā ye uppajjeyyuṃ kāmāsavo bhavāsavo avijjāsavoti tayo āsavā, bhāvayato evaṃsa te āsavā na hontīti ayaṃ nayo veditabbo.

    இமே வுச்சந்தி…பே॰… பா⁴வனா பஹாதப்³பா³தி இமே தயோ ஆஸவா இமாய மக்³க³த்தயஸம்பயுத்தாய பொ³ஜ்ஜ²ங்க³பா⁴வனாய பஹாதப்³பா³தி வுச்சந்தீதி வேதி³தப்³பா³.

    Ime vuccanti…pe… bhāvanā pahātabbāti ime tayo āsavā imāya maggattayasampayuttāya bojjhaṅgabhāvanāya pahātabbāti vuccantīti veditabbā.

    28. இதா³னி இமேஹி ஸத்தஹாகாரேஹி பஹீனாஸவங் பி⁴க்கு²ங் தோ²மெந்தோ ஆஸவப்பஹானே சஸ்ஸ ஆனிஸங்ஸங் த³ஸ்ஸெந்தோ ஏதேஹேவ ச காரணேஹி ஆஸவப்பஹானே ஸத்தானங் உஸ்ஸுக்கங் ஜனெந்தோ யதோ கோ², பி⁴க்க²வே…பே॰… அந்தமகாஸி து³க்க²ஸ்ஸாதி ஆஹ. தத்த² யதோ கோ²தி ஸாமிவசனே தோகாரோ, யஸ்ஸ கோ²தி வுத்தங் ஹோதி. போராணா பன யஸ்மிங் காலேதி வண்ணயந்தி. யே ஆஸவா த³ஸ்ஸனா பஹாதப்³பா³தி யே ஆஸவா த³ஸ்ஸனேன பஹாதப்³பா³, தே த³ஸ்ஸனேனேவ பஹீனா ஹொந்தி, ந அப்பஹீனேஸுயேவ பஹீனஸஞ்ஞீ ஹோதி. ஏவங் ஸப்³ப³த்த² வித்தா²ரோ.

    28. Idāni imehi sattahākārehi pahīnāsavaṃ bhikkhuṃ thomento āsavappahāne cassa ānisaṃsaṃ dassento eteheva ca kāraṇehi āsavappahāne sattānaṃ ussukkaṃ janento yato kho, bhikkhave…pe… antamakāsi dukkhassāti āha. Tattha yato khoti sāmivacane tokāro, yassa khoti vuttaṃ hoti. Porāṇā pana yasmiṃ kāleti vaṇṇayanti. Ye āsavā dassanā pahātabbāti ye āsavā dassanena pahātabbā, te dassaneneva pahīnā honti, na appahīnesuyeva pahīnasaññī hoti. Evaṃ sabbattha vitthāro.

    ஸப்³பா³ஸவஸங்வரஸங்வுதோதி ஸப்³பே³ஹி ஆஸவபிதா⁴னேஹி பிஹிதோ, ஸப்³பே³ஸங் வா ஆஸவானங் பிதா⁴னேஹி பிஹிதோ. அச்செ²ச்சி² தண்ஹந்தி ஸப்³ப³ம்பி தண்ஹங் சி²ந்தி³, ஸங்சி²ந்தி³ ஸமுச்சி²ந்தி³. விவத்தயி ஸங்யோஜனந்தி த³ஸவித⁴ம்பி ஸங்யோஜனங் பரிவத்தயி நிம்மலமகாஸி. ஸம்மாதி ஹேதுனா காரணேன. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா பஹானாபி⁴ஸமயா ச. அரஹத்தமக்³கோ³ ஹி கிச்சவஸேன மானங் பஸ்ஸதி, அயமஸ்ஸ த³ஸ்ஸனாபி⁴ஸமயோ. தேன தி³ட்டோ² பன ஸோ தாவதே³வ பஹீயதி தி³ட்ட²விஸேன தி³ட்ட²ஸத்தானங் ஜீவிதங் விய. அயமஸ்ஸ பஹானாபி⁴ஸமயோ.

    Sabbāsavasaṃvarasaṃvutoti sabbehi āsavapidhānehi pihito, sabbesaṃ vā āsavānaṃ pidhānehi pihito. Acchecchitaṇhanti sabbampi taṇhaṃ chindi, saṃchindi samucchindi. Vivattayi saṃyojananti dasavidhampi saṃyojanaṃ parivattayi nimmalamakāsi. Sammāti hetunā kāraṇena. Mānābhisamayāti mānassa dassanābhisamayā pahānābhisamayā ca. Arahattamaggo hi kiccavasena mānaṃ passati, ayamassa dassanābhisamayo. Tena diṭṭho pana so tāvadeva pahīyati diṭṭhavisena diṭṭhasattānaṃ jīvitaṃ viya. Ayamassa pahānābhisamayo.

    அந்தமகாஸி து³க்க²ஸ்ஸாதி ஏவங் அரஹத்தமக்³கே³ன ஸம்மா மானஸ்ஸ தி³ட்ட²த்தா பஹீனத்தா ச யே இமே ‘‘காயப³ந்த⁴னஸ்ஸ அந்தோ ஜீரதி (சூளவ॰ 278). ஹரிதந்தங் வா’’தி (ம॰ நி॰ 1.304) ஏவங் வுத்தஅந்திமமரியாத³ந்தோ ச, ‘‘அந்தமித³ங், பி⁴க்க²வே, ஜீவிகான’’ந்தி (இதிவு॰ 91; ஸங்॰ நி॰ 3.80) ஏவங் வுத்தலாமகந்தோ ச, ‘‘ஸக்காயோ ஏகோ அந்தோ’’தி (அ॰ நி॰ 6.61) ஏவங் வுத்தகொட்டா²ஸந்தோ ச, ‘‘ஏஸேவந்தோ து³க்க²ஸ்ஸ ஸப்³ப³பச்சயஸங்க²யா’’தி (ஸங்॰ நி॰ 2.51) ஏவங் வுத்தகோடந்தோ சாதி ஏவங் சத்தாரோ அந்தா, தேஸு ஸப்³ப³ஸ்ஸேவ வட்டது³க்க²ஸ்ஸ அந்தங் சதுத்த²கோடிஸங்கா²தங் அந்திமகோடிஸங்கா²தங் அந்தமகாஸி பரிச்சே²த³ங் பரிவடுமங் அகாஸி. அந்திமஸமுஸ்ஸயமத்தாவஸேஸங் து³க்க²ங் அகாஸீதி வுத்தங் ஹோதி.

    Antamakāsi dukkhassāti evaṃ arahattamaggena sammā mānassa diṭṭhattā pahīnattā ca ye ime ‘‘kāyabandhanassa anto jīrati (cūḷava. 278). Haritantaṃ vā’’ti (ma. ni. 1.304) evaṃ vuttaantimamariyādanto ca, ‘‘antamidaṃ, bhikkhave, jīvikāna’’nti (itivu. 91; saṃ. ni. 3.80) evaṃ vuttalāmakanto ca, ‘‘sakkāyo eko anto’’ti (a. ni. 6.61) evaṃ vuttakoṭṭhāsanto ca, ‘‘esevanto dukkhassa sabbapaccayasaṅkhayā’’ti (saṃ. ni. 2.51) evaṃ vuttakoṭanto cāti evaṃ cattāro antā, tesu sabbasseva vaṭṭadukkhassa antaṃ catutthakoṭisaṅkhātaṃ antimakoṭisaṅkhātaṃ antamakāsi paricchedaṃ parivaṭumaṃ akāsi. Antimasamussayamattāvasesaṃ dukkhaṃ akāsīti vuttaṃ hoti.

    அத்தமனா தே பி⁴க்கூ²தி ஸகமனா துட்ட²மனா, பீதிஸோமனஸ்ஸேஹி வா ஸம்பயுத்தமனா ஹுத்வா. ப⁴க³வதோ பா⁴ஸிதங் அபி⁴னந்து³ந்தி இத³ங் து³க்க²ஸ்ஸ அந்தகிரியாபரியோஸானங் ப⁴க³வதோ பா⁴ஸிதங் ஸுகதி²தங் ஸுலபிதங், ஏவமேதங் ப⁴க³வா ஏவமேதங் ஸுக³தாதி மத்த²கேன ஸம்படிச்ச²ந்தா அப்³ப⁴னுமோதி³ங்ஸூதி.

    Attamanā te bhikkhūti sakamanā tuṭṭhamanā, pītisomanassehi vā sampayuttamanā hutvā. Bhagavato bhāsitaṃ abhinandunti idaṃ dukkhassa antakiriyāpariyosānaṃ bhagavato bhāsitaṃ sukathitaṃ sulapitaṃ, evametaṃ bhagavā evametaṃ sugatāti matthakena sampaṭicchantā abbhanumodiṃsūti.

    ஸேஸமெத்த² யங் ந வுத்தங், தங் புப்³பே³ வுத்தத்தா ச ஸுவிஞ்ஞெய்யத்தா ச ந வுத்தங். தஸ்மா ஸப்³ப³ங் வுத்தானுஸாரேன அனுபத³ஸோ பச்சவெக்கி²தப்³ப³ங்.

    Sesamettha yaṃ na vuttaṃ, taṃ pubbe vuttattā ca suviññeyyattā ca na vuttaṃ. Tasmā sabbaṃ vuttānusārena anupadaso paccavekkhitabbaṃ.

    பா⁴வனாபஹாதப்³ப³ஆஸவவண்ணனா நிட்டி²தா.

    Bhāvanāpahātabbaāsavavaṇṇanā niṭṭhitā.

    பபஞ்சஸூத³னியா மஜ்ஜி²மனிகாயட்ட²கதா²ய

    Papañcasūdaniyā majjhimanikāyaṭṭhakathāya

    ஸப்³பா³ஸவஸுத்தவண்ணனா நிட்டி²தா.

    Sabbāsavasuttavaṇṇanā niṭṭhitā.




    Next: 3. த⁴ம்மதா³யாத³ஸுத்தவண்ணனா • 3. Dhammadāyādasuttavaṇṇanā




    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. ஸப்³பா³ஸவஸுத்தங் • 2. Sabbāsavasuttaṃ

    டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 2. ஸப்³பா³ஸவஸுத்தவண்ணனா • 2. Sabbāsavasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact