| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஸதுல்லபகாயிகவக்³கோ³
4. Satullapakāyikavaggo
1. ஸப்³பி⁴ஸுத்தவண்ணனா
1. Sabbhisuttavaṇṇanā
31. ஸதங் ஸாதூ⁴னங் ஸரணக³மனஸீலாதி³பே⁴த³ஸ்ஸ த⁴ம்மஸ்ஸ உல்லபனதோ, அத்தனோ வா புப்³பே³னிவாஸானுஸ்ஸதியா தஸ்ஸ த⁴ம்மஸ்ஸ உல்லபனதோ கத²னதோ ஸதுல்லபா, தே³வதா, தாஸங் காயோ ஸமூஹோ, தத்த² ப⁴வாதி ஸதுல்லபகாயிகா. தேனாஹ ‘‘ஸதங் த⁴ம்ம’’ந்திஆதி³. ஸமாதா³னவஸேன உல்லபெத்வா, ந வண்ணனாகத²னமத்தேன தத்ராதி தஸ்மிங் தாஸங் தே³வதானங் ஸதுல்லபகாயிகபா⁴வே. இத³ங் வத்தூ²தி இத³ங் காரணங். ஸமுத்³த³வாணிஜாதி ஸங்யத்திகா. கி²த்தஸரவேகே³னாதி ஜியாமுத்தஸரஸதி³ஸவேகே³ன, ஸீக⁴ஓகே⁴னாதி அத்தோ². உப்பததீதி உப்பாதோ. உப்பாதே ப⁴வங் ப்³யஸனங் உப்பாதிகங். பதிட்டா²தி ஹிதபதிட்டா². பரலோகே ஹிதஸுகா²வஹங் அப⁴யகாரணங். ஜங்க⁴ஸதந்தி மனுஸ்ஸஸதங். ஜங்கா⁴ஸீஸேன ஹி மனுஸ்ஸே வத³தி ஸஹசாரிபா⁴வதோ. அக்³க³ஹேஸி பஞ்சஸீலானி. ஆஸன்னானாஸன்னேஸு ஆஸன்னஸ்ஸேவ பட²மங் விபச்சனதோ ‘‘ஆஸன்னகாலே க³ஹிதஸீலங் நிஸ்ஸாயா’’தி வுத்தங். க⁴டாவஸேனாதி ஸமூஹவஸேன.
31. Sataṃ sādhūnaṃ saraṇagamanasīlādibhedassa dhammassa ullapanato, attano vā pubbenivāsānussatiyā tassa dhammassa ullapanato kathanato satullapā, devatā, tāsaṃ kāyo samūho, tattha bhavāti satullapakāyikā. Tenāha ‘‘sataṃ dhamma’’ntiādi. Samādānavasena ullapetvā, na vaṇṇanākathanamattena tatrāti tasmiṃ tāsaṃ devatānaṃ satullapakāyikabhāve. Idaṃ vatthūti idaṃ kāraṇaṃ. Samuddavāṇijāti saṃyattikā. Khittasaravegenāti jiyāmuttasarasadisavegena, sīghaoghenāti attho. Uppatatīti uppāto. Uppāte bhavaṃ byasanaṃ uppātikaṃ. Patiṭṭhāti hitapatiṭṭhā. Paraloke hitasukhāvahaṃ abhayakāraṇaṃ. Jaṅghasatanti manussasataṃ. Jaṅghāsīsena hi manusse vadati sahacāribhāvato. Aggahesi pañcasīlāni. Āsannānāsannesu āsannasseva paṭhamaṃ vipaccanato ‘‘āsannakāle gahitasīlaṃ nissāyā’’ti vuttaṃ. Ghaṭāvasenāti samūhavasena.
ஸப்³பீ⁴தி ஸாதூ⁴ஹி. தே ஹி ஸபரஹிதஸாத⁴னதோ பாஸங்ஸதாய ஸந்தகு³ணதாய ச ஸந்தோதி வுச்சதி. தே பன யஸ்மா பண்டி³தலக்க²ணேஹி ஸமன்னாக³தா ஹொந்தி, தஸ்மா ‘‘பண்டி³தேஹீ’’தி ஆஹ. ஸமாஸேதா²தி ஸங்வஸேதா²தி அயமெத்த² அதி⁴ப்பாயோதி ஆஹ ‘‘ஸப்³ப³இரியாபதே²’’திஆதி³. மித்தஸந்த²வந்தி மெத்திஸந்தா⁴னங். ஸத்தானங் ஹிதேஸிதாலக்க²ணா ஹி மெத்தி, ஸா ச ஞாணஸஹிதா ஞாணபுப்³ப³ங்க³மாவாதி மித்தஸந்த²வோ அஸங்கிலிட்டோ², இதரோ ஸங்கிலிட்டோ²தி ஆஹ ‘‘ந கேனசி ஸத்³தி⁴ங் காதப்³போ³’’தி. ஸத்³த⁴ம்மந்தி தி³ட்ட²த⁴ம்மிகாதி³ஹிதாவஹங் ஸுந்த³ரத⁴ம்மங். ஸெய்யோதி ஹிதவட்³ட⁴னதாதி³ வுத்தந்தி ஆஹ ‘‘வட்³டீ⁴’’தி.
Sabbhīti sādhūhi. Te hi saparahitasādhanato pāsaṃsatāya santaguṇatāya ca santoti vuccati. Te pana yasmā paṇḍitalakkhaṇehi samannāgatā honti, tasmā ‘‘paṇḍitehī’’ti āha. Samāsethāti saṃvasethāti ayamettha adhippāyoti āha ‘‘sabbairiyāpathe’’tiādi. Mittasanthavanti mettisandhānaṃ. Sattānaṃ hitesitālakkhaṇā hi metti, sā ca ñāṇasahitā ñāṇapubbaṅgamāvāti mittasanthavo asaṃkiliṭṭho, itaro saṃkiliṭṭhoti āha ‘‘na kenaci saddhiṃ kātabbo’’ti. Saddhammanti diṭṭhadhammikādihitāvahaṃ sundaradhammaṃ. Seyyoti hitavaḍḍhanatādi vuttanti āha ‘‘vaḍḍhī’’ti.
ஸதங் ஸாதூ⁴னங், பண்டி³தானந்தி அயமெத்த² அத்தோ². தப்படியோக³விஸயத்தா அஞ்ஞ-ஸத்³த³ஸ்ஸ வுத்தங் ‘‘அஞ்ஞதோ அந்த⁴பா³லதோ’’தி. ஸோகனிமித்தங் ஸோககாரணங் உத்தரபத³லோபேன இத⁴ ஸோகஸத்³தே³ன க³ஹிதந்தி ஆஹ ‘‘ஸோகவத்தூ²ன’’ந்திஆதி³. ஸோகவத்தூ²னி நாம சோராத³யோ அச்சி²ந்த³னாதி³வஸேன பரேஸங் ஸோககரணதோ. ஸோகானுக³தா ஸோகப்பத்தா.
Sataṃ sādhūnaṃ, paṇḍitānanti ayamettha attho. Tappaṭiyogavisayattā añña-saddassa vuttaṃ ‘‘aññatoandhabālato’’ti. Sokanimittaṃ sokakāraṇaṃ uttarapadalopena idha sokasaddena gahitanti āha ‘‘sokavatthūna’’ntiādi. Sokavatthūni nāma corādayo acchindanādivasena paresaṃ sokakaraṇato. Sokānugatā sokappattā.
தே²ரஸ்ஸாதி ஸங்கிச்சத்தே²ரஸ்ஸ. அத்தனோ ப⁴கி³னியா ஜெட்ட²த்தா ‘‘தும்ஹே’’தி ஆஹ. அயங் ‘‘இத⁴ சோரா படிபஜ்ஜிங்ஸூ’’தி அம்ஹே திணாயபி ந மஞ்ஞதீதி சிந்தெத்வா ஏகச்சே ‘‘மாரேம ந’’ந்தி ஆஹங்ஸு. கருணாய ஏகச்சே ‘‘விஸ்ஸஜ்ஜேமா’’தி ஆஹங்ஸு. மந்தெத்வாதி பா⁴ஸெத்வா.
Therassāti saṃkiccattherassa. Attano bhaginiyā jeṭṭhattā ‘‘tumhe’’ti āha. Ayaṃ ‘‘idha corā paṭipajjiṃsū’’ti amhe tiṇāyapi na maññatīti cintetvā ekacce ‘‘mārema na’’nti āhaṃsu. Karuṇāya ekacce ‘‘vissajjemā’’ti āhaṃsu. Mantetvāti bhāsetvā.
அஹு அஹோஸி, பூ⁴தபுப்³ப³ந்தி அத்தோ². அரஞ்ஞஸ்மிங் ப்³ரஹாவனேதி தாதி³ஸே ப்³ரஹாவனே, மஹாரஞ்ஞே நிவாஸீதி அத்தோ² சேதோதி ப்³யாதோ⁴. கூடானீதி வாகுராத³யோ. ஒட்³டெ³த்வாதி ஸஜ்ஜெத்வா. ஸஸகந்தி பேலகங் உப்³பி³க்³கா³தி பீ⁴ததஸிதா. ஏகரத்திந்தி ஏகரத்தேனேவ. த⁴னஜானீதி பரிப்³ப³யவஸேன அத்³தி⁴கேஹி லத்³த⁴ப்³ப³த⁴னதோ ஹானி, ‘‘ஸமணம்பி நாம ஹந்தி, கிங் அம்ஹேஸு லஜ்ஜிஸ்ஸதீ’’தி அத்³தி⁴கானங் அனாக³மனதோ ஏகதி³வஸங் லத்³த⁴ப்³ப³பரிப்³ப³யம்பி ந லபி⁴ஸ்ஸந்தீதி அதி⁴ப்பாயோ.
Ahu ahosi, bhūtapubbanti attho. Araññasmiṃ brahāvaneti tādise brahāvane, mahāraññe nivāsīti attho cetoti byādho. Kūṭānīti vākurādayo. Oḍḍetvāti sajjetvā. Sasakanti pelakaṃ ubbiggāti bhītatasitā. Ekarattinti ekaratteneva. Dhanajānīti paribbayavasena addhikehi laddhabbadhanato hāni, ‘‘samaṇampi nāma hanti, kiṃ amhesu lajjissatī’’ti addhikānaṃ anāgamanato ekadivasaṃ laddhabbaparibbayampi na labhissantīti adhippāyo.
ஞாதயோபி மாதாபிதுபா⁴துப⁴கி³னிஆதி³கே ஞாதகே. தே கிர அதி⁴முத்தஸ்ஸ ப⁴கி³னியா ஸந்திகங் உபக³ச்ச²ந்தா அந்தராமக்³கே³ தேன ஸமாக³தா, அதி⁴முத்தோ ஸச்சவாசங் அனுரக்க²ந்தோ சோரப⁴யங் தேஸங் நாரோசேஸி. தேன வுத்தங் ‘‘தேஸம்பீ’’திஆதி³. தங் நிஸ்ஸாய பப்³ப³ஜிதத்தா ‘‘அதி⁴முத்தஸாமணேரஸ்ஸ ஸந்திகே’’தி வுத்தங், ந உபஸம்பதா³சரியோ ஹுத்வா. தேனாஹ ‘‘அத்தனோ அந்தேவாஸிகே கத்வா’’தி. ஸச்சானுரக்க²ணேன அனுத்தரகு³ணாதி⁴க³மேன ச ஞாதிமஜ்ஜே² விரோசதி.
Ñātayopi mātāpitubhātubhaginiādike ñātake. Te kira adhimuttassa bhaginiyā santikaṃ upagacchantā antarāmagge tena samāgatā, adhimutto saccavācaṃ anurakkhanto corabhayaṃ tesaṃ nārocesi. Tena vuttaṃ ‘‘tesampī’’tiādi. Taṃ nissāya pabbajitattā ‘‘adhimuttasāmaṇerassa santike’’ti vuttaṃ, na upasampadācariyo hutvā. Tenāha ‘‘attano antevāsike katvā’’ti. Saccānurakkhaṇena anuttaraguṇādhigamena ca ñātimajjhe virocati.
ஸாததந்தி ஸததங். ஸ-ஸத்³த³ஸ்ஸ ஹி இத⁴ ஸாபா⁴வோ யதா² ‘‘ஸாராகோ³’’திஆதீ³ஸு. ஸாதபா⁴வோ வா ஸாததந்தி ஆஹ ‘‘ஸுக²ங் வா’’தி. காரணேனாதி தேன தேன காரணேன. ஸப்³பா³ஸங் தாஸங் வசனங் ஸுபா⁴ஸிதங், ப⁴க³வதோ பன உக்கங்ஸக³தங் ஸுபா⁴ஸிதமேவ. ஸ்வாயமத்தோ² தங்தங்கா³தா²பதே³னேவ விஞ்ஞாயதீதி தங் நீஹரித்வா த³ஸ்ஸேதுங் ‘‘ந கேவல’’ந்திஆதி³ வுத்தங். தேன ஸப்புரிஸூபஸங்ஸேவஸத்³த⁴ம்மாபி⁴யோகோ³ யதா² ஸத்தானங் வட்³டி⁴யா பஞ்ஞாபடிலாப⁴ஸ்ஸ ஏகந்திகங் காரணங், ஏவங் ஸோகபச்சயே ஸதி விஸோகபா⁴வஸ்ஸ, ஞாதிமஜ்ஜே² ஸோபா⁴ய, ஸுக³திக³மனஸ்ஸ, சிரங் ஸுக²ட்டா²னஸ்ஸ, வட்டது³க்க²மோசனஸ்ஸபி அஞ்ஞாஸாதா⁴ரணங் ஹோதீதி வுத்தமேவாதி த³ட்ட²ப்³ப³ங்.
Sātatanti satataṃ. Sa-saddassa hi idha sābhāvo yathā ‘‘sārāgo’’tiādīsu. Sātabhāvo vā sātatanti āha ‘‘sukhaṃ vā’’ti. Kāraṇenāti tena tena kāraṇena. Sabbāsaṃ tāsaṃ vacanaṃ subhāsitaṃ, bhagavato pana ukkaṃsagataṃ subhāsitameva. Svāyamattho taṃtaṃgāthāpadeneva viññāyatīti taṃ nīharitvā dassetuṃ ‘‘na kevala’’ntiādi vuttaṃ. Tena sappurisūpasaṃsevasaddhammābhiyogo yathā sattānaṃ vaḍḍhiyā paññāpaṭilābhassa ekantikaṃ kāraṇaṃ, evaṃ sokapaccaye sati visokabhāvassa, ñātimajjhe sobhāya, sugatigamanassa, ciraṃ sukhaṭṭhānassa, vaṭṭadukkhamocanassapi aññāsādhāraṇaṃ hotīti vuttamevāti daṭṭhabbaṃ.
ஸப்³பி⁴ஸுத்தவண்ணனா நிட்டி²தா.
Sabbhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸப்³பி⁴ஸுத்தங் • 1. Sabbhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸப்³பி⁴ஸுத்தவண்ணனா • 1. Sabbhisuttavaṇṇanā
