| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. ஸசேதனஸுத்தங்
5. Sacetanasuttaṃ
15. ஏகங் ஸமயங் ப⁴க³வா பா³ராணஸியங் விஹரதி இஸிபதனே மிக³தா³யே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
15. Ekaṃ samayaṃ bhagavā bārāṇasiyaṃ viharati isipatane migadāye. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘பூ⁴தபுப்³ப³ங், பி⁴க்க²வே, ராஜா அஹோஸி ஸசேதனோ 1 நாம. அத² கோ², பி⁴க்க²வே, ராஜா ஸசேதனோ ரத²காரங் ஆமந்தேஸி – ‘இதோ மே, ஸம்ம ரத²கார, ச²ன்னங் மாஸானங் அச்சயேன ஸங்கா³மோ ப⁴விஸ்ஸதி. ஸக்கி²ஸ்ஸஸி 2 மே, ஸம்ம ரத²கார, நவங் சக்கயுக³ங் காது’ந்தி? ‘ஸக்கோமி தே³வா’தி கோ², பி⁴க்க²வே, ரத²காரோ ரஞ்ஞோ ஸசேதனஸ்ஸ பச்சஸ்ஸோஸி. அத² கோ², பி⁴க்க²வே, ரத²காரோ ச²ஹி மாஸேஹி சா²ரத்தூனேஹி ஏகங் சக்கங் நிட்டா²பேஸி. அத² கோ², பி⁴க்க²வே, ராஜா ஸசேதனோ ரத²காரங் ஆமந்தேஸி – ‘இதோ மே, ஸம்ம ரத²கார, ச²ன்னங் தி³வஸானங் அச்சயேன ஸங்கா³மோ ப⁴விஸ்ஸதி, நிட்டி²தங் நவங் சக்கயுக³’ந்தி? ‘இமேஹி கோ², தே³வ, ச²ஹி மாஸேஹி சா²ரத்தூனேஹி ஏகங் சக்கங் நிட்டி²த’ந்தி. ‘ஸக்கி²ஸ்ஸஸி பன மே, ஸம்ம ரத²கார, இமேஹி ச²ஹி தி³வஸேஹி து³தியங் சக்கங் நிட்டா²பேது’ந்தி? ‘ஸக்கோமி தே³வா’தி கோ², பி⁴க்க²வே, ரத²காரோ ச²ஹி தி³வஸேஹி து³தியங் சக்கங் நிட்டா²பெத்வா நவங் சக்கயுக³ங் ஆதா³ய யேன ராஜா ஸசேதனோ தேனுபஸங்கமி; உபஸங்கமித்வா ராஜானங் ஸசேதனங் ஏதத³வோச – ‘இத³ங் தே, தே³வ, நவங் சக்கயுக³ங் நிட்டி²த’ந்தி. ‘யஞ்ச தே இத³ங், ஸம்ம ரத²கார, சக்கங் ச²ஹி மாஸேஹி நிட்டி²தங் சா²ரத்தூனேஹி யஞ்ச தே இத³ங் சக்கங் ச²ஹி தி³வஸேஹி நிட்டி²தங், இமேஸங் கிங் நானாகரணங்? நேஸாஹங் கிஞ்சி நானாகரணங் பஸ்ஸாமீ’தி. ‘அத்தே²ஸங், தே³வ, நானாகரணங். பஸ்ஸது தே³வோ நானாகரண’’’ந்தி.
‘‘Bhūtapubbaṃ, bhikkhave, rājā ahosi sacetano 3 nāma. Atha kho, bhikkhave, rājā sacetano rathakāraṃ āmantesi – ‘ito me, samma rathakāra, channaṃ māsānaṃ accayena saṅgāmo bhavissati. Sakkhissasi 4 me, samma rathakāra, navaṃ cakkayugaṃ kātu’nti? ‘Sakkomi devā’ti kho, bhikkhave, rathakāro rañño sacetanassa paccassosi. Atha kho, bhikkhave, rathakāro chahi māsehi chārattūnehi ekaṃ cakkaṃ niṭṭhāpesi. Atha kho, bhikkhave, rājā sacetano rathakāraṃ āmantesi – ‘ito me, samma rathakāra, channaṃ divasānaṃ accayena saṅgāmo bhavissati, niṭṭhitaṃ navaṃ cakkayuga’nti? ‘Imehi kho, deva, chahi māsehi chārattūnehi ekaṃ cakkaṃ niṭṭhita’nti. ‘Sakkhissasi pana me, samma rathakāra, imehi chahi divasehi dutiyaṃ cakkaṃ niṭṭhāpetu’nti? ‘Sakkomi devā’ti kho, bhikkhave, rathakāro chahi divasehi dutiyaṃ cakkaṃ niṭṭhāpetvā navaṃ cakkayugaṃ ādāya yena rājā sacetano tenupasaṅkami; upasaṅkamitvā rājānaṃ sacetanaṃ etadavoca – ‘idaṃ te, deva, navaṃ cakkayugaṃ niṭṭhita’nti. ‘Yañca te idaṃ, samma rathakāra, cakkaṃ chahi māsehi niṭṭhitaṃ chārattūnehi yañca te idaṃ cakkaṃ chahi divasehi niṭṭhitaṃ, imesaṃ kiṃ nānākaraṇaṃ? Nesāhaṃ kiñci nānākaraṇaṃ passāmī’ti. ‘Atthesaṃ, deva, nānākaraṇaṃ. Passatu devo nānākaraṇa’’’nti.
‘‘அத² கோ², பி⁴க்க²வே, ரத²காரோ யங் தங் சக்கங் ச²ஹி தி³வஸேஹி நிட்டி²தங் தங் பவத்தேஸி. தங் பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா சிங்கு³லாயித்வா பூ⁴மியங் பபதி. யங் பன தங் சக்கங் ச²ஹி மாஸேஹி நிட்டி²தங் சா²ரத்தூனேஹி தங் பவத்தேஸி. தங் பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா அக்கா²ஹதங் மஞ்ஞே அட்டா²ஸி.
‘‘Atha kho, bhikkhave, rathakāro yaṃ taṃ cakkaṃ chahi divasehi niṭṭhitaṃ taṃ pavattesi. Taṃ pavattitaṃ samānaṃ yāvatikā abhisaṅkhārassa gati tāvatikaṃ gantvā ciṅgulāyitvā bhūmiyaṃ papati. Yaṃ pana taṃ cakkaṃ chahi māsehi niṭṭhitaṃ chārattūnehi taṃ pavattesi. Taṃ pavattitaṃ samānaṃ yāvatikā abhisaṅkhārassa gati tāvatikaṃ gantvā akkhāhataṃ maññe aṭṭhāsi.
‘‘‘கோ நு கோ², ஸம்ம ரத²கார, ஹேது கோ பச்சயோ யமித³ங் 5 சக்கங் ச²ஹி தி³வஸேஹி நிட்டி²தங் தங் பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா சிங்கு³லாயித்வா பூ⁴மியங் பபதி? கோ பன, ஸம்ம ரத²கார, ஹேது கோ பச்சயோ யமித³ங் சக்கங் ச²ஹி மாஸேஹி நிட்டி²தங் சா²ரத்தூனேஹி தங் பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா அக்கா²ஹதங் மஞ்ஞே அட்டா²ஸீ’தி? ‘யமித³ங், தே³வ, சக்கங் ச²ஹி தி³வஸேஹி நிட்டி²தங் தஸ்ஸ நேமிபி ஸவங்கா ஸதோ³ஸா ஸகஸாவா, அராபி ஸவங்கா ஸதோ³ஸா ஸகஸாவா, நாபி⁴பி ஸவங்கா ஸதோ³ஸா ஸகஸாவா. தங் நேமியாபி ஸவங்கத்தா ஸதோ³ஸத்தா ஸகஸாவத்தா, அரானம்பி ஸவங்கத்தா ஸதோ³ஸத்தா ஸகஸாவத்தா, நாபி⁴யாபி ஸவங்கத்தா ஸதோ³ஸத்தா ஸகஸாவத்தா பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா சிங்கு³லாயித்வா பூ⁴மியங் பபதி. யங் பன தங், தே³வ, சக்கங் ச²ஹி மாஸேஹி நிட்டி²தங் சா²ரத்தூனேஹி தஸ்ஸ நேமிபி அவங்கா அதோ³ஸா அகஸாவா, அராபி அவங்கா அதோ³ஸா அகஸாவா, நாபி⁴பி அவங்கா அதோ³ஸா அகஸாவா. தங் நேமியாபி அவங்கத்தா அதோ³ஸத்தா அகஸாவத்தா, அரானம்பி அவங்கத்தா அதோ³ஸத்தா அகஸாவத்தா, நாபி⁴யாபி அவங்கத்தா அதோ³ஸத்தா அகஸாவத்தா பவத்திதங் ஸமானங் யாவதிகா அபி⁴ஸங்கா²ரஸ்ஸ க³தி தாவதிகங் க³ந்த்வா அக்கா²ஹதங் மஞ்ஞே அட்டா²ஸீ’’’தி.
‘‘‘Ko nu kho, samma rathakāra, hetu ko paccayo yamidaṃ 6 cakkaṃ chahi divasehi niṭṭhitaṃ taṃ pavattitaṃ samānaṃ yāvatikā abhisaṅkhārassa gati tāvatikaṃ gantvā ciṅgulāyitvā bhūmiyaṃ papati? Ko pana, samma rathakāra, hetu ko paccayo yamidaṃ cakkaṃ chahi māsehi niṭṭhitaṃ chārattūnehi taṃ pavattitaṃ samānaṃ yāvatikā abhisaṅkhārassa gati tāvatikaṃ gantvā akkhāhataṃ maññe aṭṭhāsī’ti? ‘Yamidaṃ, deva, cakkaṃ chahi divasehi niṭṭhitaṃ tassa nemipi savaṅkā sadosā sakasāvā, arāpi savaṅkā sadosā sakasāvā, nābhipi savaṅkā sadosā sakasāvā. Taṃ nemiyāpi savaṅkattā sadosattā sakasāvattā, arānampi savaṅkattā sadosattā sakasāvattā, nābhiyāpi savaṅkattā sadosattā sakasāvattā pavattitaṃ samānaṃ yāvatikā abhisaṅkhārassa gati tāvatikaṃ gantvā ciṅgulāyitvā bhūmiyaṃ papati. Yaṃ pana taṃ, deva, cakkaṃ chahi māsehi niṭṭhitaṃ chārattūnehi tassa nemipi avaṅkā adosā akasāvā, arāpi avaṅkā adosā akasāvā, nābhipi avaṅkā adosā akasāvā. Taṃ nemiyāpi avaṅkattā adosattā akasāvattā, arānampi avaṅkattā adosattā akasāvattā, nābhiyāpi avaṅkattā adosattā akasāvattā pavattitaṃ samānaṃ yāvatikā abhisaṅkhārassa gati tāvatikaṃ gantvā akkhāhataṃ maññe aṭṭhāsī’’’ti.
‘‘ஸியா கோ² பன, பி⁴க்க²வே, தும்ஹாகங் ஏவமஸ்ஸ – ‘அஞ்ஞோ நூன தேன ஸமயேன ஸோ ரத²காரோ அஹோஸீ’தி! ந கோ² பனேதங், பி⁴க்க²வே, ஏவங் த³ட்ட²ப்³ப³ங். அஹங் தேன ஸமயேன ஸோ ரத²காரோ அஹோஸிங். ததா³ஹங், பி⁴க்க²வே, குஸலோ தா³ருவங்கானங் தா³ருதோ³ஸானங் தா³ருகஸாவானங். ஏதரஹி கோ² பனாஹங், பி⁴க்க²வே, அரஹங் ஸம்மாஸம்பு³த்³தோ⁴ குஸலோ காயவங்கானங் காயதோ³ஸானங் காயகஸாவானங், குஸலோ வசீவங்கானங் வசீதோ³ஸானங் வசீகஸாவானங், குஸலோ மனோவங்கானங் மனோதோ³ஸானங் மனோகஸாவானங். யஸ்ஸ கஸ்ஸசி, பி⁴க்க²வே, பி⁴க்கு²ஸ்ஸ வா பி⁴க்கு²னியா வா காயவங்கோ அப்பஹீனோ காயதோ³ஸோ காயகஸாவோ, வசீவங்கோ அப்பஹீனோ வசீதோ³ஸோ வசீகஸாவோ, மனோவங்கோ அப்பஹீனோ மனோதோ³ஸோ மனோகஸாவோ, ஏவங் பபதிதா தே, பி⁴க்க²வே, இமஸ்மா த⁴ம்மவினயா, ஸெய்யதா²பி தங் சக்கங் ச²ஹி தி³வஸேஹி நிட்டி²தங்.
‘‘Siyā kho pana, bhikkhave, tumhākaṃ evamassa – ‘añño nūna tena samayena so rathakāro ahosī’ti! Na kho panetaṃ, bhikkhave, evaṃ daṭṭhabbaṃ. Ahaṃ tena samayena so rathakāro ahosiṃ. Tadāhaṃ, bhikkhave, kusalo dāruvaṅkānaṃ dārudosānaṃ dārukasāvānaṃ. Etarahi kho panāhaṃ, bhikkhave, arahaṃ sammāsambuddho kusalo kāyavaṅkānaṃ kāyadosānaṃ kāyakasāvānaṃ, kusalo vacīvaṅkānaṃ vacīdosānaṃ vacīkasāvānaṃ, kusalo manovaṅkānaṃ manodosānaṃ manokasāvānaṃ. Yassa kassaci, bhikkhave, bhikkhussa vā bhikkhuniyā vā kāyavaṅko appahīno kāyadoso kāyakasāvo, vacīvaṅko appahīno vacīdoso vacīkasāvo, manovaṅko appahīno manodoso manokasāvo, evaṃ papatitā te, bhikkhave, imasmā dhammavinayā, seyyathāpi taṃ cakkaṃ chahi divasehi niṭṭhitaṃ.
‘‘யஸ்ஸ கஸ்ஸசி, பி⁴க்க²வே, பி⁴க்கு²ஸ்ஸ வா பி⁴க்கு²னியா வா காயவங்கோ பஹீனோ காயதோ³ஸோ காயகஸாவோ, வசீவங்கோ பஹீனோ வசீதோ³ஸோ வசீகஸாவோ, மனோவங்கோ பஹீனோ மனோதோ³ஸோ மனோகஸாவோ , ஏவங் பதிட்டி²தா தே, பி⁴க்க²வே, இமஸ்மிங் த⁴ம்மவினயே, ஸெய்யதா²பி தங் சக்கங் ச²ஹி மாஸேஹி நிட்டி²தங் சா²ரத்தூனேஹி.
‘‘Yassa kassaci, bhikkhave, bhikkhussa vā bhikkhuniyā vā kāyavaṅko pahīno kāyadoso kāyakasāvo, vacīvaṅko pahīno vacīdoso vacīkasāvo, manovaṅko pahīno manodoso manokasāvo , evaṃ patiṭṭhitā te, bhikkhave, imasmiṃ dhammavinaye, seyyathāpi taṃ cakkaṃ chahi māsehi niṭṭhitaṃ chārattūnehi.
‘‘தஸ்மாதிஹ , பி⁴க்க²வே, ஏவங் ஸிக்கி²தப்³ப³ங் – ‘காயவங்கங் பஜஹிஸ்ஸாம காயதோ³ஸங் காயகஸாவங், வசீவங்கங் பஜஹிஸ்ஸாம வசீதோ³ஸங் வசீகஸாவங், மனோவங்கங் பஜஹிஸ்ஸாம மனோதோ³ஸங் மனோகஸாவ’ந்தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பஞ்சமங்.
‘‘Tasmātiha , bhikkhave, evaṃ sikkhitabbaṃ – ‘kāyavaṅkaṃ pajahissāma kāyadosaṃ kāyakasāvaṃ, vacīvaṅkaṃ pajahissāma vacīdosaṃ vacīkasāvaṃ, manovaṅkaṃ pajahissāma manodosaṃ manokasāva’nti. Evañhi vo, bhikkhave, sikkhitabba’’nti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. ஸசேதனஸுத்தவண்ணனா • 5. Sacetanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. ஸசேதனஸுத்தவண்ணனா • 5. Sacetanasuttavaṇṇanā
