| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. து³தியபண்ணாஸகங்
2. Dutiyapaṇṇāsakaṃ
(6) 1. ஸசித்தவக்³கோ³
(6) 1. Sacittavaggo
1. ஸசித்தஸுத்தங்
1. Sacittasuttaṃ
51. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
51. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘நோ சே, பி⁴க்க²வே, பி⁴க்கு² பரசித்தபரியாயகுஸலோ ஹோதி, அத² ‘ஸசித்தபரியாயகுஸலோ ப⁴விஸ்ஸாமீ’தி 1 – ஏவஞ்ஹி வோ, பி⁴க்க²வே, ஸிக்கி²தப்³ப³ங்.
‘‘No ce, bhikkhave, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti 2 – evañhi vo, bhikkhave, sikkhitabbaṃ.
‘‘கத²ஞ்ச, பி⁴க்க²வே, பி⁴க்கு² ஸசித்தபரியாயகுஸலோ ஹோதி? ஸெய்யதா²பி, பி⁴க்க²வே, இத்தீ² வா புரிஸோ வா த³ஹரோ யுவா மண்ட³னகஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³கபத்தே ஸகங் முக²னிமித்தங் பச்சவெக்க²மானோ ஸசே தத்த² பஸ்ஸதி ரஜங் வா அங்க³ணங் வா, தஸ்ஸேவ ரஜஸ்ஸ வா அங்க³ணஸ்ஸ வா பஹானாய வாயமதி. நோ சே தத்த² பஸ்ஸதி ரஜங் வா அங்க³ணங் வா, தேனேவத்தமனோ ஹோதி பரிபுண்ணஸங்கப்போ – ‘லாபா⁴ வத மே, பரிஸுத்³த⁴ங் வத மே’தி. ஏவமேவங் கோ², பி⁴க்க²வே, பி⁴க்கு²னோ பச்சவெக்க²ணா ப³ஹுகாரா 3 ஹோதி குஸலேஸு த⁴ம்மேஸு – ‘அபி⁴ஜ்ஜா²லு நு கோ² ப³ஹுலங் விஹராமி, அனபி⁴ஜ்ஜா²லு நு கோ² ப³ஹுலங் விஹராமி, ப்³யாபன்னசித்தோ நு கோ² ப³ஹுலங் விஹராமி, அப்³யாபன்னசித்தோ நு கோ² ப³ஹுலங் விஹராமி, தி²னமித்³த⁴பரியுட்டி²தோ நு கோ² ப³ஹுலங் விஹராமி, விக³ததி²னமித்³தோ⁴ நு கோ² ப³ஹுலங் விஹராமி , உத்³த⁴தோ நு கோ² ப³ஹுலங் விஹராமி, அனுத்³த⁴தோ நு கோ² ப³ஹுலங் விஹராமி, விசிகிச்சோ² நு கோ² ப³ஹுலங் விஹராமி, திண்ணவிசிகிச்சோ² நு கோ² ப³ஹுலங் விஹராமி, கோத⁴னோ நு கோ² ப³ஹுலங் விஹராமி, அக்கோத⁴னோ நு கோ² ப³ஹுலங் விஹராமி, ஸங்கிலிட்ட²சித்தோ நு கோ² ப³ஹுலங் விஹராமி, அஸங்கிலிட்ட²சித்தோ நு கோ² ப³ஹுலங் விஹராமி , ஸாரத்³த⁴காயோ நு கோ² ப³ஹுலங் விஹராமி, அஸாரத்³த⁴காயோ நு கோ² ப³ஹுலங் விஹராமி, குஸீதோ நு கோ² ப³ஹுலங் விஹராமி, ஆரத்³த⁴வீரியோ நு கோ² ப³ஹுலங் விஹராமி, அஸமாஹிதோ நு கோ² ப³ஹுலங் விஹராமி, ஸமாஹிதோ நு கோ² ப³ஹுலங் விஹராமீ’தி.
‘‘Kathañca, bhikkhave, bhikkhu sacittapariyāyakusalo hoti? Seyyathāpi, bhikkhave, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udakapatte sakaṃ mukhanimittaṃ paccavekkhamāno sace tattha passati rajaṃ vā aṅgaṇaṃ vā, tasseva rajassa vā aṅgaṇassa vā pahānāya vāyamati. No ce tattha passati rajaṃ vā aṅgaṇaṃ vā, tenevattamano hoti paripuṇṇasaṅkappo – ‘lābhā vata me, parisuddhaṃ vata me’ti. Evamevaṃ kho, bhikkhave, bhikkhuno paccavekkhaṇā bahukārā 4 hoti kusalesu dhammesu – ‘abhijjhālu nu kho bahulaṃ viharāmi, anabhijjhālu nu kho bahulaṃ viharāmi, byāpannacitto nu kho bahulaṃ viharāmi, abyāpannacitto nu kho bahulaṃ viharāmi, thinamiddhapariyuṭṭhito nu kho bahulaṃ viharāmi, vigatathinamiddho nu kho bahulaṃ viharāmi , uddhato nu kho bahulaṃ viharāmi, anuddhato nu kho bahulaṃ viharāmi, vicikiccho nu kho bahulaṃ viharāmi, tiṇṇavicikiccho nu kho bahulaṃ viharāmi, kodhano nu kho bahulaṃ viharāmi, akkodhano nu kho bahulaṃ viharāmi, saṃkiliṭṭhacitto nu kho bahulaṃ viharāmi, asaṃkiliṭṭhacitto nu kho bahulaṃ viharāmi , sāraddhakāyo nu kho bahulaṃ viharāmi, asāraddhakāyo nu kho bahulaṃ viharāmi, kusīto nu kho bahulaṃ viharāmi, āraddhavīriyo nu kho bahulaṃ viharāmi, asamāhito nu kho bahulaṃ viharāmi, samāhito nu kho bahulaṃ viharāmī’ti.
‘‘ஸசே , பி⁴க்க²வே, பி⁴க்கு² பச்சவெக்க²மானோ ஏவங் ஜானாதி – ‘அபி⁴ஜ்ஜா²லு ப³ஹுலங் விஹராமி, ப்³யாபன்னசித்தோ ப³ஹுலங் விஹராமி, தி²னமித்³த⁴பரியுட்டி²தோ ப³ஹுலங் விஹராமி, உத்³த⁴தோ ப³ஹுலங் விஹராமி, விசிகிச்சோ² ப³ஹுலங் விஹராமி, கோத⁴னோ ப³ஹுலங் விஹராமி, ஸங்கிலிட்ட²சித்தோ ப³ஹுலங் விஹராமி, ஸாரத்³த⁴காயோ ப³ஹுலங் விஹராமி, குஸீதோ ப³ஹுலங் விஹராமி, அஸமாஹிதோ ப³ஹுலங் விஹராமீ’தி, தேன, பி⁴க்க²வே, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங். ஸெய்யதா²பி, பி⁴க்க²வே, ஆதி³த்தசேலோ வா ஆதி³த்தஸீஸோ வா. தஸ்ஸேவ சேலஸ்ஸ வா ஸீஸஸ்ஸ வா நிப்³பா³பனாய அதி⁴மத்தங் ச²ந்த³ஞ்ச வாயாமஞ்ச உஸ்ஸாஹஞ்ச உஸ்ஸொள்ஹிஞ்ச அப்படிவானிஞ்ச ஸதிஞ்ச ஸம்பஜஞ்ஞஞ்ச கரெய்ய. ஏவமேவங் கோ² தேன, பி⁴க்க²வே, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங்.
‘‘Sace , bhikkhave, bhikkhu paccavekkhamāno evaṃ jānāti – ‘abhijjhālu bahulaṃ viharāmi, byāpannacitto bahulaṃ viharāmi, thinamiddhapariyuṭṭhito bahulaṃ viharāmi, uddhato bahulaṃ viharāmi, vicikiccho bahulaṃ viharāmi, kodhano bahulaṃ viharāmi, saṃkiliṭṭhacitto bahulaṃ viharāmi, sāraddhakāyo bahulaṃ viharāmi, kusīto bahulaṃ viharāmi, asamāhito bahulaṃ viharāmī’ti, tena, bhikkhave, bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ. Seyyathāpi, bhikkhave, ādittacelo vā ādittasīso vā. Tasseva celassa vā sīsassa vā nibbāpanāya adhimattaṃ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya. Evamevaṃ kho tena, bhikkhave, bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘ஸசே பன, பி⁴க்க²வே, பி⁴க்கு² பச்சவெக்க²மானோ ஏவங் ஜானாதி – ‘அனபி⁴ஜ்ஜா²லு ப³ஹுலங் விஹராமி, அப்³யாபன்னசித்தோ ப³ஹுலங் விஹராமி, விக³ததி²னமித்³தோ⁴ ப³ஹுலங் விஹராமி, அனுத்³த⁴தோ ப³ஹுலங் விஹராமி, திண்ணவிசிகிச்சோ² ப³ஹுலங் விஹராமி, அக்கோத⁴னோ ப³ஹுலங் விஹராமி, அஸங்கிலிட்ட²சித்தோ ப³ஹுலங் விஹராமி, அஸாரத்³த⁴காயோ ப³ஹுலங் விஹராமி, ஆரத்³த⁴வீரியோ ப³ஹுலங் விஹராமி, ஸமாஹிதோ ப³ஹுலங் விஹராமீ’தி, தேன, பி⁴க்க²வே, பி⁴க்கு²னா தேஸுயேவ குஸலேஸு த⁴ம்மேஸு பதிட்டா²ய உத்தரி ஆஸவானங் க²யாய யோகோ³ கரணீயோ’’தி. பட²மங்.
‘‘Sace pana, bhikkhave, bhikkhu paccavekkhamāno evaṃ jānāti – ‘anabhijjhālu bahulaṃ viharāmi, abyāpannacitto bahulaṃ viharāmi, vigatathinamiddho bahulaṃ viharāmi, anuddhato bahulaṃ viharāmi, tiṇṇavicikiccho bahulaṃ viharāmi, akkodhano bahulaṃ viharāmi, asaṃkiliṭṭhacitto bahulaṃ viharāmi, asāraddhakāyo bahulaṃ viharāmi, āraddhavīriyo bahulaṃ viharāmi, samāhito bahulaṃ viharāmī’ti, tena, bhikkhave, bhikkhunā tesuyeva kusalesu dhammesu patiṭṭhāya uttari āsavānaṃ khayāya yogo karaṇīyo’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-4. ஸசித்தஸுத்தாதி³வண்ணனா • 1-4. Sacittasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸசித்தஸுத்தாதி³வண்ணனா • 1-10. Sacittasuttādivaṇṇanā
