| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. ஸாது⁴ஸுத்தவண்ணனா
3. Sādhusuttavaṇṇanā
33. உதா³னங் உதா³னேஸீதி பீதிவேகே³ன உக்³கி³ரிதப்³ப³தாய உதா³னங் உக்³கி³ரி உச்சாரேஸி. தயித³ங் யஸ்மா பீதிஸமுட்டா²பிதங் வசனங், தஸ்மா வுத்தங் ‘‘உதா³ஹாரங் உதா³ஹரீ’’தி . யதா² பன தங் வசனங் ‘‘உதா³ன’’ந்தி வுச்சதி, தங் த³ஸ்ஸேதுங் ‘‘யதா² ஹீ’’திஆதி³ வுத்தங். ஸத்³தா⁴யாதி எத்த² ய-காரோ ஹேதுஅத்தோ². பரிச்சாக³சேதனாய ஹி ஸத்³தா⁴ விஸேஸபச்சயோ அஸ்ஸத்³த⁴ஸ்ஸ தத³பா⁴வதோ. பி-ஸத்³தோ³ வுத்தத்த²ஸம்பிண்ட³னத்தோ². ‘‘ஸாஹூ’’தி பத³ங் ஸாது⁴ஸத்³தே³ன ஸமானத்த²ங் த³ட்ட²ப்³ப³ங். கத²ந்தி தா³னயுத்³தா⁴னங் விபக்க²ஸபா⁴வாதி அதி⁴ப்பாயோ. ஏதங் உப⁴யந்தி தா³னங் யுத்³த⁴ந்தி இத³ங் த்³வயங். ஜீவிதபீ⁴ருகோதி ஜீவிதவினாஸபீ⁴ருகோ. க²யபீ⁴ருகோதி போ⁴க³க்க²யஸ்ஸ பீ⁴ருகோ. வத³ந்தோதி ஜீவிதே ஸாலயதங், ததோ ஏவ யுஜ்ஜ²னே அஸமத்த²தங் பவேதெ³ந்தோ. சே²ஜ்ஜந்தி ஹத்த²பாதா³தி³சே²தோ³. உஸ்ஸஹந்தோதி வீரியங் கரொந்தோ. ஏவங் போ⁴கே³ ரக்கி²ஸ்ஸாமீதி ததா² போ⁴கே³ அபரிக்கீ²ணே கரிஸ்ஸாமீதி. வத³ந்தோதி இத⁴ போ⁴கே³ஸு லோப⁴ங், ததோ ஏவ தா³துங் அஸமத்த²தங் பவேதெ³ந்தோ. ஏவந்தி ஏவங் ஜீவிதபோ⁴க³னிரபெக்க²தாய தா³னஞ்ச யுத்³த⁴ஞ்ச ஸமங் ஹோதி. ஸத்³தா⁴தி³ஸம்பன்னோதி ஸத்³தா⁴த⁴ம்மஜீவிதாவீமங்ஸாஸீலாதி³கு³ணஸமன்னாக³தோ. ஸோ ஹி தெ³ய்யவத்து²னோ பரித்தகத்தா அப்பகம்பி த³த³ந்தோ அத்தனோ பன சித்தஸம்பத்தியா கெ²த்தஸம்பத்தியா ச ப³ஹுங் உளாரபுஞ்ஞங் பவட்³டெ⁴ந்தோ ப³ஹுவித⁴ங் லோப⁴-தோ³ஸ-இஸ்ஸா-மச்ச²ரிய-தி³ட்டி²விசிகிச்சா²தி³பே⁴த³ங் தப்படிபக்க²ங் அபி⁴ப⁴வதி, ததோ ஏவ ச தங் மஹப்ப²லங் ஹோதி மஹானிஸங்ஸங். அட்ட²கதா²யங் பன ‘‘மச்சே²ரங் மத்³த³தி’’ச்சேவ வுத்தங், தஸ்ஸ பன உஜுவிபச்சனீகபா⁴வதோ.
33.Udānaṃudānesīti pītivegena uggiritabbatāya udānaṃ uggiri uccāresi. Tayidaṃ yasmā pītisamuṭṭhāpitaṃ vacanaṃ, tasmā vuttaṃ ‘‘udāhāraṃ udāharī’’ti . Yathā pana taṃ vacanaṃ ‘‘udāna’’nti vuccati, taṃ dassetuṃ ‘‘yathā hī’’tiādi vuttaṃ. Saddhāyāti ettha ya-kāro hetuattho. Pariccāgacetanāya hi saddhā visesapaccayo assaddhassa tadabhāvato. Pi-saddo vuttatthasampiṇḍanattho. ‘‘Sāhū’’ti padaṃ sādhusaddena samānatthaṃ daṭṭhabbaṃ. Kathanti dānayuddhānaṃ vipakkhasabhāvāti adhippāyo. Etaṃ ubhayanti dānaṃ yuddhanti idaṃ dvayaṃ. Jīvitabhīrukoti jīvitavināsabhīruko. Khayabhīrukoti bhogakkhayassa bhīruko. Vadantoti jīvite sālayataṃ, tato eva yujjhane asamatthataṃ pavedento. Chejjanti hatthapādādichedo. Ussahantoti vīriyaṃ karonto. Evaṃ bhoge rakkhissāmīti tathā bhoge aparikkhīṇe karissāmīti. Vadantoti idha bhogesu lobhaṃ, tato eva dātuṃ asamatthataṃ pavedento. Evanti evaṃ jīvitabhoganirapekkhatāya dānañca yuddhañca samaṃ hoti. Saddhādisampannoti saddhādhammajīvitāvīmaṃsāsīlādiguṇasamannāgato. So hi deyyavatthuno parittakattā appakampi dadanto attano pana cittasampattiyā khettasampattiyā ca bahuṃ uḷārapuññaṃ pavaḍḍhento bahuvidhaṃ lobha-dosa-issā-macchariya-diṭṭhivicikicchādibhedaṃ tappaṭipakkhaṃ abhibhavati, tato eva ca taṃ mahapphalaṃ hoti mahānisaṃsaṃ. Aṭṭhakathāyaṃ pana ‘‘maccheraṃ maddati’’cceva vuttaṃ, tassa pana ujuvipaccanīkabhāvato.
பரத்தா²தி பரலோகே. ஏகஸாடகப்³ராஹ்மணவத்து² அன்வயவஸேன, அங்குரவத்து² ப்³யதிரேகவஸேன வித்தா²ரேதப்³ப³ங்.
Paratthāti paraloke. Ekasāṭakabrāhmaṇavatthu anvayavasena, aṅkuravatthu byatirekavasena vitthāretabbaṃ.
த⁴ம்மோ லத்³தோ⁴ ஏதேனாதி த⁴ம்மலத்³தோ⁴, புக்³க³லோ. அக்³கி³ஆஹிதபத³ஸ்ஸ விய ஸத்³த³ஸித்³தி⁴ த³ட்ட²ப்³பா³. ‘‘உட்டா²னந்தி காயிகங் வீரியங், வீரியந்தி சேதஸிக’’ந்தி வத³ந்தி. உட்டா²னந்தி போ⁴கு³ப்பாதே³ யுத்தபயுத்ததா. வீரியந்தி தஜ்ஜோ உஸ்ஸாஹோ. யமஸ்ஸ ஆணாபவத்திட்டா²னங். வேதரணிம்பி இதரே நிரயே ச அதிக்கம்ம. தே பன அப்³பு³தா³தீ³னங் வஸேன அவீசிங் த³ஸதா⁴ கத்வா அவஸேஸமஹானிரயே ஸத்தபி ஆயுப்பமாணபே⁴தே³ன தயோ தயோ கத்வா ஏகதிங்ஸாதி வத³ந்தி. ஸஞ்ஜீவாதி³னிரயஸங்வத்தனஸ்ஸ கம்மஸ்ஸ திக்க²மஜ்ஜ²முது³பா⁴வேன தஸ்ஸ ஆயுப்பமாணஸ்ஸ திவித⁴தா விபா⁴வேதப்³பா³. அபரே பன ‘‘அட்ட² மஹானிரயா ஸோளஸ உஸ்ஸத³னிரயா ஆதி³தோ சத்தாரோ ஸிதனிரயே ஏகங் கத்வா ஸத்த ஸிதனிரயாதி ஏவங் ஏகதிங்ஸ மஹானிரயா’’தி வத³ந்தி. மஹானிரயக்³க³ஹணதோ ஆதி³தோ சத்தாரோ ஸிதனிரயா ஏகோ நிரயோ கதோதி.
Dhammo laddho etenāti dhammaladdho, puggalo. Aggiāhitapadassa viya saddasiddhi daṭṭhabbā. ‘‘Uṭṭhānanti kāyikaṃ vīriyaṃ, vīriyanti cetasika’’nti vadanti. Uṭṭhānanti bhoguppāde yuttapayuttatā. Vīriyanti tajjo ussāho. Yamassa āṇāpavattiṭṭhānaṃ. Vetaraṇimpi itare niraye ca atikkamma. Te pana abbudādīnaṃ vasena avīciṃ dasadhā katvā avasesamahāniraye sattapi āyuppamāṇabhedena tayo tayo katvā ekatiṃsāti vadanti. Sañjīvādinirayasaṃvattanassa kammassa tikkhamajjhamudubhāvena tassa āyuppamāṇassa tividhatā vibhāvetabbā. Apare pana ‘‘aṭṭha mahānirayā soḷasa ussadanirayā ādito cattāro sitaniraye ekaṃ katvā satta sitanirayāti evaṃ ekatiṃsa mahānirayā’’ti vadanti. Mahānirayaggahaṇato ādito cattāro sitanirayā eko nirayo katoti.
தேஸந்தி விசினித்வா க³ஹிதபச்சயானங். பஞ்சனவுதிபாஸண்ட³பே⁴தா³ பபஞ்சஸூத³னிஸங்வண்ணனாயங் வுத்தனயேன வேதி³தப்³பா³. தத்தா²தி தேஸு த்³வீஸு விசினநேஸு. த³க்கி²ணாவிசினநங் ஆஹ, உபமானானி ஹி நாம யாவதே³வ உபமெய்யத்த²விபா⁴வனத்தா²னி. ஏதேன ஸுகெ²த்தக³ஹணதோபி த³க்கி²ணெய்யவிசினநங் த³ட்ட²ப்³ப³ங்.
Tesanti vicinitvā gahitapaccayānaṃ. Pañcanavutipāsaṇḍabhedā papañcasūdanisaṃvaṇṇanāyaṃ vuttanayena veditabbā. Tatthāti tesu dvīsu vicinanesu. Dakkhiṇāvicinanaṃ āha, upamānāni hi nāma yāvadeva upameyyatthavibhāvanatthāni. Etena sukhettagahaṇatopi dakkhiṇeyyavicinanaṃ daṭṭhabbaṃ.
பாணேஸு ஸங்யமோதி இமினா த³ஸவித⁴ம்பி குஸலகம்மபத²த⁴ம்மங் த³ஸ்ஸேதி. யதா² ஹி ‘‘பாணேஸு ஸங்யமோ’’தி இமினா ஸத்தானங் ஜீவிதாவோரோபனதோ ஸங்யமோ வுத்தோ, ஏவங் தேஸங் ஸாபதெய்யாவஹாரதோ பரதா³ராமஸனதோ விஸங்வாத³னதோ அஞ்ஞமஞ்ஞபே⁴த³னதோ ப²ருஸவசனேன ஸங்க⁴ட்டனதோ நிரத்த²கவிப்பலபனதோ பரஸந்தகாபி⁴ஜ்ஜா²னதோ உச்சே²த³சிந்தனதோ மிச்சா²பி⁴னிவேஸனதோ ச ஸங்யமோ ஹோதீதி. தேனாஹ ‘‘ஸீலானிஸங்ஸங் கதே²துமாரத்³தா⁴’’தி. ப²ருஸவசனஸங்யமோ பனெத்த² ஸரூபேனேவ வுத்தோ.
Pāṇesu saṃyamoti iminā dasavidhampi kusalakammapathadhammaṃ dasseti. Yathā hi ‘‘pāṇesu saṃyamo’’ti iminā sattānaṃ jīvitāvoropanato saṃyamo vutto, evaṃ tesaṃ sāpateyyāvahārato paradārāmasanato visaṃvādanato aññamaññabhedanato pharusavacanena saṅghaṭṭanato niratthakavippalapanato parasantakābhijjhānato ucchedacintanato micchābhinivesanato ca saṃyamo hotīti. Tenāha ‘‘sīlānisaṃsaṃ kathetumāraddhā’’ti. Pharusavacanasaṃyamo panettha sarūpeneva vutto.
பரஸ்ஸ உபவாத³ப⁴யேனாதி பாபகிரியஹேது பரேன அத்தனோ வத்தப்³ப³உபவாத³ப⁴யேன. உபவாத³ப⁴யாதி உபவாத³ப⁴யனிமித்தங். ‘‘கத²ங் நு கோ² அம்ஹே பரே ந உபவதெ³ய்யு’’ந்தி ஆஸீஸந்தா பாபங் ந கரொந்தி. த⁴ம்மபத³மேவாதி அஸங்க²தத⁴ம்மகொட்டா²ஸோ ஏவ ஸெய்யோ ஸெட்டோ². யஸ்மா ஸப்³ப³ஸங்க²தங் அனிச்சங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மங், தஸ்மா தத³தி⁴க³மாய உஸ்ஸாஹோ கரணீயோதி த³ஸ்ஸேதி. புப்³ப³ஸத்³தோ³ காலவிஸேஸவிஸயோதி ஆஹ ‘‘புப்³பே³ ச கஸ்ஸபபு³த்³தா⁴தி³காலேபீ’’திஆதி³. புன அகாலவிஸேஸோ அபாடியேக்கோ பு⁴ம்மத்த²விஸயோவாதி ஆஹ ‘‘ஸப்³பே³பி வா’’திஆதி³. தத்த² ஸப்³பே³பி வாதி ஏதே ஸப்³பே³பி கஸ்ஸபபு³த்³தா⁴த³யோ லோகனாதா² ஸந்தோ நாம வூபஸந்தஸப்³ப³கிலேஸஸந்தாபா ஸந்தஸப்³பூ⁴தகு³ணத்தா.
Parassa upavādabhayenāti pāpakiriyahetu parena attano vattabbaupavādabhayena. Upavādabhayāti upavādabhayanimittaṃ. ‘‘Kathaṃ nu kho amhe pare na upavadeyyu’’nti āsīsantā pāpaṃ na karonti. Dhammapadamevāti asaṅkhatadhammakoṭṭhāso eva seyyo seṭṭho. Yasmā sabbasaṅkhataṃ aniccaṃ khayadhammaṃ vayadhammaṃ virāgadhammaṃ nirodhadhammaṃ, tasmā tadadhigamāya ussāho karaṇīyoti dasseti. Pubbasaddo kālavisesavisayoti āha ‘‘pubbe ca kassapabuddhādikālepī’’tiādi. Puna akālaviseso apāṭiyekko bhummatthavisayovāti āha ‘‘sabbepi vā’’tiādi. Tattha sabbepi vāti ete sabbepi kassapabuddhādayo lokanāthā santo nāma vūpasantasabbakilesasantāpā santasabbhūtaguṇattā.
ஸாது⁴ஸுத்தவண்ணனா நிட்டி²தா.
Sādhusuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸாது⁴ஸுத்தங் • 3. Sādhusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸாது⁴ஸுத்தவண்ணனா • 3. Sādhusuttavaṇṇanā
