| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૨. રાજકારામવગ્ગો
2. Rājakārāmavaggo
૧. સહસ્સભિક્ખુનિસઙ્ઘસુત્તવણ્ણના
1. Sahassabhikkhunisaṅghasuttavaṇṇanā
૧૦૦૭. ધમ્મિકત્તા દેસવાસીહિ અનુકમ્પિતો રાજાતિ રાજકો, તસ્સ આરામો રાજકારામો, તસ્મિં. ભૂમિસીસં સેટ્ઠપ્પદેસો, યત્થ વસન્તો લાભગ્ગયસગ્ગપ્પત્તો હોતીતિ તેસં અધિપ્પાયો.
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
વારાપેહીતિ પટિસેધેહિ. યુજ્ઝાપેતુન્તિ કલહં કારાપેતું. પુન આગચ્છન્તાતિ અપરસ્મિં સંવચ્છરે આગચ્છન્તા. ઉબ્બટ્ટેત્વાતિ મહતી વીચિયો ઉબ્બટ્ટેત્વા. યથા તસ્સ સકલમેવ રટ્ઠં એકોદકીભૂતં હોતિ, એવં કત્વા સમુદ્દમેવ જાતં. તેન વુત્તં ‘‘સમુદ્દમેવ અકંસૂ’’તિ.
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
ઇસીનમન્તરં કત્વાતિ ઇસીનં કારણં કત્વા, ઇસીનં હેતૂતિ અત્થો, ઇસીનં વા અન્તરભેદં કત્વા. તથા લોકે કોલાહલસ્સ પત્થટતં વિભાવેન્તો ભગવા ‘‘મે સુત’’ન્તિ આહ પચ્ચક્ખતો જાનમ્પિ. ઉચ્છિન્નોતિ કુલચ્છેદેન ઉચ્છિન્નો. ન કેવલં સયમેવ, અથ ખો સહ રટ્ઠેહિ. વિભવન્તિ વિનાસં ઉપગતો.
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
તં સન્ધાયેતં વુત્તન્તિ તં યથાવુત્તં પસેનદિના કોસલરાજેન કારિતં વિહારં સન્ધાય એતં ‘‘રાજકારામે’’તિ વુત્તં.
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. સહસ્સભિક્ખુનિસઙ્ઘસુત્તં • 1. Sahassabhikkhunisaṅghasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. સહસ્સભિક્ખુનિસઙ્ઘસુત્તવણ્ણના • 1. Sahassabhikkhunisaṅghasuttavaṇṇanā
