| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
૪. સક્કચ્ચવગ્ગવણ્ણના
4. Sakkaccavaggavaṇṇanā
૬૦૮. ચતુત્થવગ્ગાદીસુ સપદાનન્તિ એત્થ દાનં વુચ્ચતિ અવખણ્ડનં, અપેતં દાનતો અપદાનં, સહ અપદાનેન સપદાનં, અવખણ્ડનવિરહિતં અનુપટિપાટિયાતિ વુત્તં હોતિ. તેનાહ ‘‘તત્થ તત્થ ઓધિં અકત્વા’’તિઆદિ.
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
૬૧૧. વિઞ્ઞત્તિયન્તિ સૂપોદનવિઞ્ઞત્તિસિક્ખાપદં સન્ધાય વદતિ. ‘‘વત્તબ્બં નત્થી’’તિ ઇમિના પાળિયાવ સબ્બં વિઞ્ઞાયતીતિ દસ્સેતિ. તત્થ પાળિયં અસઞ્ચિચ્ચાતિઆદીસુ વત્થુમત્તં ઞત્વા ભુઞ્જનેન આપત્તિં આપજ્જન્તસ્સેવ પુન પણ્ણત્તિં ઞત્વા મુખગતં છડ્ડેતુકામસ્સ યં અરુચિયા પવિટ્ઠં, તં અસઞ્ચિચ્ચ પવિટ્ઠં નામ, તત્થ અનાપત્તિ. તદેવ પુન અઞ્ઞવિહિતતાય વા અવિઞ્ઞત્તમિદન્તિસઞ્ઞાય વા ભુઞ્જને ‘‘અસતિયા’’તિ વુચ્ચતિ.
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
૬૧૩. ‘‘અઞ્ઞસ્સત્થાયા’’તિ ઇદમસ્સ સિક્ખાપદસ્સ અત્તનો અત્થાય વિઞ્ઞાપેત્વા સયં ભુઞ્જને એવ પઞ્ઞત્તત્તા ઇમિના સિક્ખાપદેન અનાપત્તિં સન્ધાય વુત્તં. પઞ્ચસહધમ્મિકાનં પન અત્થાય અઞ્ઞાતકઅપ્પવારિતટ્ઠાને વિઞ્ઞાપેન્તો વિઞ્ઞત્તિક્ખણે અટ્ઠકથાસુ સુત્તાનુલોમતો વુત્તઅકતવિઞ્ઞત્તિદુક્કટતો ન મુચ્ચતિ. સઞ્ચિચ્ચ ભુઞ્જનક્ખણે સયઞ્ચ અઞ્ઞે ચ મિચ્છાજીવતો ન મુચ્ચન્તીતિ ગહેતબ્બં.
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
૬૧૫. ‘‘કુક્કુટણ્ડં અતિખુદ્દક’’ન્તિ ઇદં અસારુપ્પવસેન વુત્તં, અતિમહન્તે એવ આપત્તીતિ દટ્ઠબ્બં. ભુઞ્જન્તેન પન ચોરાદિભયં પટિચ્ચ મહન્તમ્પિ અપરિમણ્ડલમ્પિ કત્વા સીઘં ભુઞ્જનવસેનેત્થ આપદા. એવમઞ્ઞેસુપિ યથાનુરૂપં દટ્ઠબ્બં.
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
સક્કચ્ચવગ્ગવણ્ણના નિટ્ઠિતા.
Sakkaccavaggavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૪. સક્કચ્ચવગ્ગો • 4. Sakkaccavaggo
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૪. સક્કચ્ચવગ્ગવણ્ણના • 4. Sakkaccavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૪. સક્કચ્ચવગ્ગવણ્ણના • 4. Sakkaccavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૪. સક્કચ્ચવગ્ગ-અત્થયોજના • 4. Sakkaccavagga-atthayojanā
