| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. சூளயமகவக்³கோ³
5. Cūḷayamakavaggo
1. ஸாலெய்யகஸுத்தவண்ணனா
1. Sāleyyakasuttavaṇṇanā
439. ஏவங் மே ஸுதந்தி ஸாலெய்யகஸுத்தங். தத்த² கோஸலேஸூதி கோஸலா நாம ஜானபதி³னோ ராஜகுமாரா. தேஸங் நிவாஸோ ஏகோபி ஜனபதோ³ ருள்ஹீஸத்³தே³ன கோஸலாதி வுச்சதி, தஸ்மிங் கோஸலேஸு ஜனபதே³. போராணா பனாஹு – யஸ்மா புப்³பே³ மஹாபனாத³ங் ராஜகுமாரங் நானானாடகானி தி³ஸ்வா ஸிதமத்தம்பி அகரொந்தங் ஸுத்வா ராஜா ஆஹ – ‘‘யோ மம புத்தங் ஹஸாபேதி, ஸப்³பா³லங்காரேன நங் அலங்கரோமீ’’தி. ததோ நங்க³லானிபி ச²ட்³டெ³த்வா மஹாஜனகாயே ஸன்னிபதிதே மனுஸ்ஸா ஸாதிரேகானி ஸத்தவஸ்ஸானி நானாகீளிகாயோ த³ஸ்ஸெத்வா நங் ஹஸாபேதுங் நாஸக்கி²ங்ஸு. ததோ ஸக்கோ தே³வனடங் பேஸேஸி. ஸோ தி³ப்³ப³னாடகங் த³ஸ்ஸெத்வா ஹஸாபேஸி. அத² தே மனுஸ்ஸா அத்தனோ அத்தனோ வஸனோகாஸாபி⁴முகா² பக்கமிங்ஸு. தே படிபதே² மித்தஸுஹஜ்ஜாத³யோ தி³ஸ்வா படிஸந்தா²ரங் கரொந்தா, ‘‘கச்சி, போ⁴, குஸலங், கச்சி, போ⁴, குஸல’’ந்தி ஆஹங்ஸு. தஸ்மா தங் ‘‘குஸலங் குஸல’’ந்தி வசனங் உபாதா³ய ஸோ பதே³ஸோ கோஸலாதி வுச்சதீதி.
439.Evaṃme sutanti sāleyyakasuttaṃ. Tattha kosalesūti kosalā nāma jānapadino rājakumārā. Tesaṃ nivāso ekopi janapado ruḷhīsaddena kosalāti vuccati, tasmiṃ kosalesu janapade. Porāṇā panāhu – yasmā pubbe mahāpanādaṃ rājakumāraṃ nānānāṭakāni disvā sitamattampi akarontaṃ sutvā rājā āha – ‘‘yo mama puttaṃ hasāpeti, sabbālaṅkārena naṃ alaṅkaromī’’ti. Tato naṅgalānipi chaḍḍetvā mahājanakāye sannipatite manussā sātirekāni sattavassāni nānākīḷikāyo dassetvā naṃ hasāpetuṃ nāsakkhiṃsu. Tato sakko devanaṭaṃ pesesi. So dibbanāṭakaṃ dassetvā hasāpesi. Atha te manussā attano attano vasanokāsābhimukhā pakkamiṃsu. Te paṭipathe mittasuhajjādayo disvā paṭisanthāraṃ karontā, ‘‘kacci, bho, kusalaṃ, kacci, bho, kusala’’nti āhaṃsu. Tasmā taṃ ‘‘kusalaṃ kusala’’nti vacanaṃ upādāya so padeso kosalāti vuccatīti.
சாரிகங் சரமானோதி அதுரிதசாரிகங் சரமானோ. மஹதா பி⁴க்கு²ஸங்கே⁴ன ஸத்³தி⁴ந்தி ஸதங் வா ஸஹஸ்ஸங் வா ஸதஸஹஸ்ஸங் வாதி ஏவங் அபரிச்சி²ன்னேன மஹதா பி⁴க்கு²ஸங்கே⁴ன ஸத்³தி⁴ங். ப்³ராஹ்மணகா³மோதி ப்³ராஹ்மணானங் ஸமோஸரணகா³மோபி ப்³ராஹ்மணகா³மோதி வுச்சதி ப்³ராஹ்மணானங் போ⁴க³கா³மோபி. இத⁴ ஸமோஸரணகா³மோ அதி⁴ப்பேதோ. தத³வஸரீதி தங் அவஸரி, ஸம்பத்தோதி அத்தோ². விஹாரோ பனெத்த² அனியாமிதோ; தஸ்மா தஸ்ஸ அவிதூ³ரே பு³த்³தா⁴னங் அனுச்ச²விகோ ஏகோ வனஸண்டோ³ ப⁴விஸ்ஸதி, ஸத்தா² தங் வனஸண்ட³ங் க³தோதி வேதி³தப்³போ³. அஸ்ஸோஸுந்தி ஸுணிங்ஸு உபலபி⁴ங்ஸு. ஸோதத்³வாரஸம்பத்தவசனநிக்³கோ⁴ஸானுஸாரேன ஜானிங்ஸு. கோ²தி அவதா⁴ரணத்தே² பத³பூரணமத்தே வா நிபாதோ. தத்த² அவதா⁴ரணத்தே²ன அஸ்ஸோஸுங்யேவ , ந நேஸங் கோசி ஸவனந்தராயோ அஹோஸீதி அயமத்தோ² வேதி³தப்³போ³. பத³பூரணேன ப்³யஞ்ஜனஸிலிட்ட²தாமத்தமேவ.
Cārikaṃ caramānoti aturitacārikaṃ caramāno. Mahatā bhikkhusaṅghena saddhinti sataṃ vā sahassaṃ vā satasahassaṃ vāti evaṃ aparicchinnena mahatā bhikkhusaṅghena saddhiṃ. Brāhmaṇagāmoti brāhmaṇānaṃ samosaraṇagāmopi brāhmaṇagāmoti vuccati brāhmaṇānaṃ bhogagāmopi. Idha samosaraṇagāmo adhippeto. Tadavasarīti taṃ avasari, sampattoti attho. Vihāro panettha aniyāmito; tasmā tassa avidūre buddhānaṃ anucchaviko eko vanasaṇḍo bhavissati, satthā taṃ vanasaṇḍaṃ gatoti veditabbo. Assosunti suṇiṃsu upalabhiṃsu. Sotadvārasampattavacananigghosānusārena jāniṃsu. Khoti avadhāraṇatthe padapūraṇamatte vā nipāto. Tattha avadhāraṇatthena assosuṃyeva , na nesaṃ koci savanantarāyo ahosīti ayamattho veditabbo. Padapūraṇena byañjanasiliṭṭhatāmattameva.
இதா³னி யமத்த²ங் அஸ்ஸோஸுங், தங் பகாஸேதுங் ஸமணோ க²லு, போ⁴, கோ³தமோதிஆதி³ வுத்தங். தத்த² ஸமிதபாபத்தா ஸமணோதி வேதி³தப்³போ³. க²லூதி அனுஸ்ஸவனத்தே² நிபாதோ. போ⁴தி தேஸங் அஞ்ஞமஞ்ஞங் ஆலபனமத்தங். கோ³தமோதி ப⁴க³வதோ கொ³த்தவஸேன பரிதீ³பனங். தஸ்மா ஸமணோ க²லு, போ⁴, கோ³தமோதி எத்த² ஸமணோ கிர, போ⁴, கோ³தமகொ³த்தோதி ஏவமத்தோ² த³ட்ட²ப்³போ³. ஸக்யபுத்தோதி இத³ங் பன ப⁴க³வதோ உச்சாகுலபரிதீ³பனங். ஸக்யகுலா பப்³ப³ஜிதோதி ஸத்³தா⁴பப்³ப³ஜிதபா⁴வதீ³பனங். கேனசி பாரிஜுஞ்ஞேன அனபி⁴பூ⁴தோ அபரிக்கீ²ணங்யேவ தங் குலங் பஹாய ஸத்³தா⁴பப்³ப³ஜிதோதி வுத்தங் ஹோதி. ததோ பரங் வுத்தத்த²மேவ. தங் கோ² பனாதி இத்த²ம்பூ⁴தாக்²யானத்தே² உபயோக³வசனங், தஸ்ஸ கோ² பன போ⁴தோ கோ³தமஸ்ஸாதி அத்தோ². கல்யாணோதி கல்யாணகு³ணஸமன்னாக³தோ, ஸெட்டோ²தி வுத்தங் ஹோதி. கித்திஸத்³தோ³தி கித்தியேவ, து²திகோ⁴ஸோ வா. அப்³பு⁴க்³க³தோதி ஸதே³வகங் லோகங் அஜ்ஜொ²த்த²ரித்வா உக்³க³தோ. கிந்தி? ‘‘இதிபி ஸோ ப⁴க³வா…பே॰… பு³த்³தோ⁴ ப⁴க³வா’’தி.
Idāni yamatthaṃ assosuṃ, taṃ pakāsetuṃ samaṇo khalu, bho, gotamotiādi vuttaṃ. Tattha samitapāpattā samaṇoti veditabbo. Khalūti anussavanatthe nipāto. Bhoti tesaṃ aññamaññaṃ ālapanamattaṃ. Gotamoti bhagavato gottavasena paridīpanaṃ. Tasmā samaṇo khalu, bho, gotamoti ettha samaṇo kira, bho, gotamagottoti evamattho daṭṭhabbo. Sakyaputtoti idaṃ pana bhagavato uccākulaparidīpanaṃ. Sakyakulā pabbajitoti saddhāpabbajitabhāvadīpanaṃ. Kenaci pārijuññena anabhibhūto aparikkhīṇaṃyeva taṃ kulaṃ pahāya saddhāpabbajitoti vuttaṃ hoti. Tato paraṃ vuttatthameva. Taṃ kho panāti itthambhūtākhyānatthe upayogavacanaṃ, tassa kho pana bhoto gotamassāti attho. Kalyāṇoti kalyāṇaguṇasamannāgato, seṭṭhoti vuttaṃ hoti. Kittisaddoti kittiyeva, thutighoso vā. Abbhuggatoti sadevakaṃ lokaṃ ajjhottharitvā uggato. Kinti? ‘‘Itipi so bhagavā…pe… buddho bhagavā’’ti.
தத்ராயங் பத³ஸம்ப³ந்தோ⁴ – ஸோ ப⁴க³வா இதிபி அரஹங், இதிபி ஸம்மாஸம்பு³த்³தோ⁴…பே॰… இதிபி ப⁴க³வாதி. இமினா ச இமினா ச காரணேனாதி வுத்தங் ஹோதி. தத்த² ஆரகத்தா, அரீனங் அரானஞ்ச ஹதத்தா, பச்சயாதீ³னங் அரஹத்தா, பாபகரணே ரஹாபா⁴வாதி இமேஹி தாவ காரணேஹி ஸோ ப⁴க³வா அரஹந்தி வேதி³தப்³போ³திஆதி³னா நயேன மாதிகங் நிக்கி²பித்வா ஸப்³பா³னேவ ஏதானி பதா³னி விஸுத்³தி⁴மக்³கே³ பு³த்³தா⁴னுஸ்ஸதினித்³தே³ஸே வித்தா²ரிதானீதி ததோ தேஸங் வித்தா²ரோ க³ஹேதப்³போ³.
Tatrāyaṃ padasambandho – so bhagavā itipi arahaṃ, itipi sammāsambuddho…pe… itipi bhagavāti. Iminā ca iminā ca kāraṇenāti vuttaṃ hoti. Tattha ārakattā, arīnaṃ arānañca hatattā, paccayādīnaṃ arahattā, pāpakaraṇe rahābhāvāti imehi tāva kāraṇehi so bhagavā arahanti veditabbotiādinā nayena mātikaṃ nikkhipitvā sabbāneva etāni padāni visuddhimagge buddhānussatiniddese vitthāritānīti tato tesaṃ vitthāro gahetabbo.
ஸாது⁴ கோ² பனாதி ஸுந்த³ரங் கோ² பன; அத்தா²வஹங் ஸுகா²வஹந்தி வுத்தங் ஹோதி. ததா²ரூபானங் அரஹதந்தி யதா²ரூபோ ஸோ ப⁴வங் கோ³தமோ, ஏவரூபானங் அனேகேஹிபி கப்பகோடிஸதஸஹஸ்ஸேஹி து³ல்லப⁴த³ஸ்ஸனானங் ப்³யாமப்பபா⁴பரிக்கி²த்தேஹி அஸீதிஅனுப்³யஞ்ஜனரதனபடிமண்டி³தேஹி த்³வத்திங்ஸ்மஹாபுரிஸலக்க²ணவரேஹி ஸமாகிண்ணமனோரமஸரீரானங் அதப்பகத³ஸ்ஸனானங் அதிமது⁴ரத⁴ம்மனிக்³கோ⁴ஸானங், யதா²பூ⁴தகு³ணாதி⁴க³மேன லோகே அரஹந்தோதி லத்³த⁴ஸத்³தா³னங் அரஹதங். த³ஸ்ஸனங் ஹோதீதி பஸாத³ஸொம்மானி அக்கீ²னி உம்மீலெத்வா த³ஸ்ஸனமத்தம்பி ஸாது⁴ ஹோதி. ஸசே பன அட்ட²ங்க³ஸமன்னாக³தேன ப்³ரஹ்மஸ்ஸரேன த⁴ம்மங் தே³ஸெந்தஸ்ஸ ஏகங் பத³ம்பி ஸோதுங் லபி⁴ஸ்ஸாம, ஸாது⁴தரங்யேவ ப⁴விஸ்ஸதீதி ஏவங் அஜ்ஜா²ஸயங் கத்வா.
Sādhu kho panāti sundaraṃ kho pana; atthāvahaṃ sukhāvahanti vuttaṃ hoti. Tathārūpānaṃ arahatanti yathārūpo so bhavaṃ gotamo, evarūpānaṃ anekehipi kappakoṭisatasahassehi dullabhadassanānaṃ byāmappabhāparikkhittehi asītianubyañjanaratanapaṭimaṇḍitehi dvattiṃsmahāpurisalakkhaṇavarehi samākiṇṇamanoramasarīrānaṃ atappakadassanānaṃ atimadhuradhammanigghosānaṃ, yathābhūtaguṇādhigamena loke arahantoti laddhasaddānaṃ arahataṃ. Dassanaṃ hotīti pasādasommāni akkhīni ummīletvā dassanamattampi sādhu hoti. Sace pana aṭṭhaṅgasamannāgatena brahmassarena dhammaṃ desentassa ekaṃ padampi sotuṃ labhissāma, sādhutaraṃyeva bhavissatīti evaṃ ajjhāsayaṃ katvā.
யேன ப⁴க³வா தேனுபஸங்கமிங்ஸூதி ஸப்³ப³கிச்சானி பஹாய துட்ட²மானஸா ஆக³மங்ஸு. ஏதத³வோசுந்தி து³விதா⁴ ஹி புச்சா² அகா³ரிகபுச்சா² அனகா³ரிகபுச்சா² ச. தத்த² ‘‘கிங், ப⁴ந்தே, குஸலங், கிங் அகுஸல’’ந்தி இமினா நயேன அகா³ரிகபுச்சா² ஆக³தா. ‘‘இமே கோ², ப⁴ந்தே, பஞ்சுபாதா³னக்க²ந்தா⁴’’தி இமினா நயேன அனகா³ரிகபுச்சா². இமே பன அத்தனோ அனுரூபங் அகா³ரிகபுச்ச²ங் புச்ச²ந்தா ஏதங், ‘‘கோ நு கோ², போ⁴ கோ³தம, ஹேது கோ பச்சயோ’’திஆதி³வசனங் அவோசுங். தேஸங் ப⁴க³வா யதா² ந ஸக்கொந்தி ஸல்லக்கே²துங், ஏவங் ஸங்கி²த்தேனேவ தாவ பஞ்ஹங் விஸ்ஸஜ்ஜெந்தோ, அத⁴ம்மசரியாவிஸமசரியாஹேது கோ² க³ஹபதயோதிஆதி³மாஹ. கஸ்மா பன ப⁴க³வா யதா² ந ஸல்லக்கெ²ந்தி, ஏவங் விஸ்ஸஜ்ஜேஸீதி? பண்டி³தமானிகா ஹி தே; ஆதி³தோவ மாதிகங் அட்ட²பெத்வா யதா² ஸல்லக்கெ²ந்தி, ஏவங் அத்தே² வித்தா²ரிதே, தே³ஸனங் உத்தானிகாதி மஞ்ஞந்தா அவஜானந்தி, மயம்பி கதெ²ந்தா ஏவமேவ கதெ²ய்யாமாதி வத்தாரோ ப⁴வந்தி. தேன நேஸங் ப⁴க³வா யதா² ந ஸக்கொந்தி ஸல்லக்கே²துங், ஏவங் ஸங்கி²த்தேனேவ தாவ பஞ்ஹங் விஸ்ஸஜ்ஜேஸி. ததோ ஸல்லக்கே²துங் அஸக்கொந்தேஹி வித்தா²ரதே³ஸனங் யாசிதோ வித்தா²ரேன தே³ஸேதுங், தேன ஹி க³ஹபதயோதிஆதி³மாஹ. தத்த² தேன ஹீதி காரணத்தே² நிபாதோ. யஸ்மா மங் தும்ஹே யாசத², தஸ்மாதி அத்தோ².
Yena bhagavā tenupasaṅkamiṃsūti sabbakiccāni pahāya tuṭṭhamānasā āgamaṃsu. Etadavocunti duvidhā hi pucchā agārikapucchā anagārikapucchā ca. Tattha ‘‘kiṃ, bhante, kusalaṃ, kiṃ akusala’’nti iminā nayena agārikapucchā āgatā. ‘‘Ime kho, bhante, pañcupādānakkhandhā’’ti iminā nayena anagārikapucchā. Ime pana attano anurūpaṃ agārikapucchaṃ pucchantā etaṃ, ‘‘ko nu kho, bho gotama, hetu ko paccayo’’tiādivacanaṃ avocuṃ. Tesaṃ bhagavā yathā na sakkonti sallakkhetuṃ, evaṃ saṃkhitteneva tāva pañhaṃ vissajjento, adhammacariyāvisamacariyāhetu kho gahapatayotiādimāha. Kasmā pana bhagavā yathā na sallakkhenti, evaṃ vissajjesīti? Paṇḍitamānikā hi te; āditova mātikaṃ aṭṭhapetvā yathā sallakkhenti, evaṃ atthe vitthārite, desanaṃ uttānikāti maññantā avajānanti, mayampi kathentā evameva katheyyāmāti vattāro bhavanti. Tena nesaṃ bhagavā yathā na sakkonti sallakkhetuṃ, evaṃ saṃkhitteneva tāva pañhaṃ vissajjesi. Tato sallakkhetuṃ asakkontehi vitthāradesanaṃ yācito vitthārena desetuṃ, tena hi gahapatayotiādimāha. Tattha tena hīti kāraṇatthe nipāto. Yasmā maṃ tumhe yācatha, tasmāti attho.
440. திவித⁴ந்தி தீஹி கொட்டா²ஸேஹி. காயேனாதி காயத்³வாரேன. அத⁴ம்மசரியாவிஸமசரியாதி அத⁴ம்மசரியஸங்கா²தா விஸமசரியா. அயங் பனெத்த² பத³த்தோ², அத⁴ம்மஸ்ஸ சரியா அத⁴ம்மசரியா, அத⁴ம்மகரணந்தி அத்தோ². விஸமா சரியா, விஸமஸ்ஸ வா கம்மஸ்ஸ சரியாதி விஸமசரியா. அத⁴ம்மசரியா ச ஸா விஸமசரியா சாதி அத⁴ம்மசரியாவிஸமசரியா. ஏதேனுபாயேன ஸப்³பே³ஸு கண்ஹஸுக்கபதே³ஸு அத்தோ² வேதி³தப்³போ³. லுத்³தோ³தி கக்க²ளோ. தா³ருணோதி ஸாஹஸிகோ. லோஹிதபாணீதி பரங் ஜீவிதா வோரோபெந்தஸ்ஸ பாணீ லோஹிதேன லிப்பந்தி. ஸசேபி ந லிப்பந்தி, ததா²விதோ⁴ லோஹிதபாணீத்வேவ வுச்சதி. ஹதப்பஹதே நிவிட்டோ²தி ஹதே ச பரஸ்ஸ பஹாரதா³னே , பஹதே ச பரமாரணே நிவிட்டோ². அத³யாபன்னோதி நிக்கருணதங் ஆபன்னோ.
440.Tividhanti tīhi koṭṭhāsehi. Kāyenāti kāyadvārena. Adhammacariyāvisamacariyāti adhammacariyasaṅkhātā visamacariyā. Ayaṃ panettha padattho, adhammassa cariyā adhammacariyā, adhammakaraṇanti attho. Visamā cariyā, visamassa vā kammassa cariyāti visamacariyā. Adhammacariyā ca sā visamacariyā cāti adhammacariyāvisamacariyā. Etenupāyena sabbesu kaṇhasukkapadesu attho veditabbo. Luddoti kakkhaḷo. Dāruṇoti sāhasiko. Lohitapāṇīti paraṃ jīvitā voropentassa pāṇī lohitena lippanti. Sacepi na lippanti, tathāvidho lohitapāṇītveva vuccati. Hatappahate niviṭṭhoti hate ca parassa pahāradāne , pahate ca paramāraṇe niviṭṭho. Adayāpannoti nikkaruṇataṃ āpanno.
யங் தங் பரஸ்ஸாதி யங் தங் பரஸ்ஸ ஸந்தகங். பரவித்தூபகரணந்தி தஸ்ஸேவ பரஸ்ஸ வித்தூபகரணங் துட்டி²ஜனநங் பரிக்கா²ரப⁴ண்ட³கங். கா³மக³தங் வாதி அந்தோகா³மே வா ட²பிதங். அரஞ்ஞக³தங் வாதி அரஞ்ஞே ருக்க²க்³க³பப்³ப³தமத்த²காதீ³ஸு வா ட²பிதங். அதி³ன்னந்தி தேஹி பரேஹி காயேன வா வாசாய வா அதி³ன்னங். தெ²ய்யஸங்கா²தந்தி எத்த² தே²னோதி சோரோ. தே²னஸ்ஸ பா⁴வோ தெ²ய்யங், அவஹரணசித்தஸ்ஸேதங் அதி⁴வசனங். ஸங்கா² ஸங்கா²தந்தி அத்த²தோ ஏகங், கொட்டா²ஸஸ்ஸேதங் அதி⁴வசனங், ‘‘ஸஞ்ஞானிதா³னா ஹி பபஞ்சஸங்கா²’’திஆதீ³ஸு விய. தெ²ய்யஞ்ச தங் ஸங்கா²தஞ்சாதி தெ²ய்யஸங்கா²தங், தெ²ய்யசித்தஸங்கா²தோ ஏகோ சித்தகொட்டா²ஸோதி அத்தோ² . கரணத்தே² சேதங் பச்சத்தவசனங், தஸ்மா தெ²ய்யஸங்கா²தேனாதி அத்த²தோ த³ட்ட²ப்³ப³ங்.
Yaṃ taṃ parassāti yaṃ taṃ parassa santakaṃ. Paravittūpakaraṇanti tasseva parassa vittūpakaraṇaṃ tuṭṭhijananaṃ parikkhārabhaṇḍakaṃ. Gāmagataṃ vāti antogāme vā ṭhapitaṃ. Araññagataṃ vāti araññe rukkhaggapabbatamatthakādīsu vā ṭhapitaṃ. Adinnanti tehi parehi kāyena vā vācāya vā adinnaṃ. Theyyasaṅkhātanti ettha thenoti coro. Thenassa bhāvo theyyaṃ, avaharaṇacittassetaṃ adhivacanaṃ. Saṅkhā saṅkhātanti atthato ekaṃ, koṭṭhāsassetaṃ adhivacanaṃ, ‘‘saññānidānā hi papañcasaṅkhā’’tiādīsu viya. Theyyañca taṃ saṅkhātañcāti theyyasaṅkhātaṃ, theyyacittasaṅkhāto eko cittakoṭṭhāsoti attho . Karaṇatthe cetaṃ paccattavacanaṃ, tasmā theyyasaṅkhātenāti atthato daṭṭhabbaṃ.
மாதுரக்கி²தாதிஆதீ³ஸு யங் பிதரி நட்டே² வா மதே வா கா⁴ஸச்சா²த³னாதீ³ஹி படிஜக்³க³மானா, வயபத்தங் குலக⁴ரே த³ஸ்ஸாமீதி மாதா ரக்க²தி, அயங் மாதுரக்கி²தா நாம. ஏதேனுபாயேன பிதுரக்கி²தாத³யோபி வேதி³தப்³பா³. ஸபா⁴க³குலானி பன குச்சி²க³தேஸுபி க³ப்³பே⁴ஸு கதிகங் கரொந்தி – ‘‘ஸசே மய்ஹங் புத்தோ ஹோதி, துய்ஹங் தீ⁴தா, அஞ்ஞத்த² க³ந்துங் ந லபி⁴ஸ்ஸதி, மய்ஹங் புத்தஸ்ஸேவ ஹோதூ’’தி. ஏவங் க³ப்³பே⁴பி பரிக்³க³ஹிதா ஸஸ்ஸாமிகா நாம. ‘‘யோ இத்த²ன்னாமங் இத்தி²ங் க³ச்ச²தி, தஸ்ஸ எத்தகோ த³ண்டோ³’’தி ஏவங் கா³மங் வா கே³ஹங் வா வீதி²ங் வா உத்³தி³ஸ்ஸ ட²பிதத³ண்டா³, பன ஸபரித³ண்டா³ நாம. அந்தமஸோ மாலாகு³ணபரிக்கி²த்தாபீதி யா ஸப்³ப³ந்திமேன பரிச்சே²தே³ன, ‘‘ஏஸா மே ப⁴ரியா ப⁴விஸ்ஸதீ’’தி ஸஞ்ஞாய தஸ்ஸா உபரி கேனசி மாலாகு³ணங் கி²பந்தேன மாலாகு³ணமத்தேனாபி பரிக்கி²த்தா ஹோதி. ததா²ரூபாஸு சாரித்தங் ஆபஜ்ஜிதா ஹோதீதி ஏவரூபாஸு இத்தீ²ஸு ஸம்மாதி³ட்டி²ஸுத்தே வுத்தமிச்சா²சாரலக்க²ணவஸேன வீதிக்கமங் கத்தா ஹோதி.
Māturakkhitātiādīsu yaṃ pitari naṭṭhe vā mate vā ghāsacchādanādīhi paṭijaggamānā, vayapattaṃ kulaghare dassāmīti mātā rakkhati, ayaṃ māturakkhitā nāma. Etenupāyena piturakkhitādayopi veditabbā. Sabhāgakulāni pana kucchigatesupi gabbhesu katikaṃ karonti – ‘‘sace mayhaṃ putto hoti, tuyhaṃ dhītā, aññattha gantuṃ na labhissati, mayhaṃ puttasseva hotū’’ti. Evaṃ gabbhepi pariggahitā sassāmikā nāma. ‘‘Yo itthannāmaṃ itthiṃ gacchati, tassa ettako daṇḍo’’ti evaṃ gāmaṃ vā gehaṃ vā vīthiṃ vā uddissa ṭhapitadaṇḍā, pana saparidaṇḍā nāma. Antamaso mālāguṇaparikkhittāpīti yā sabbantimena paricchedena, ‘‘esā me bhariyā bhavissatī’’ti saññāya tassā upari kenaci mālāguṇaṃ khipantena mālāguṇamattenāpi parikkhittā hoti. Tathārūpāsu cārittaṃ āpajjitā hotīti evarūpāsu itthīsu sammādiṭṭhisutte vuttamicchācāralakkhaṇavasena vītikkamaṃ kattā hoti.
ஸபா⁴க³தோதி ஸபா⁴யங் டி²தோ. பரிஸாக³தோதி பரிஸாயங் டி²தோ. ஞாதிமஜ்ஜ²க³தோதி தா³யாதா³னங் மஜ்ஜே² டி²தோ. பூக³மஜ்ஜ²க³தோதி ஸேனீனங் மஜ்ஜே² டி²தோ. ராஜகுலமஜ்ஜ²க³தோதி ராஜகுலஸ்ஸ மஜ்ஜே² மஹாவினிச்ச²யே டி²தோ . அபி⁴னீதோதி புச்ச²னத்தா²ய நீதோ. ஸக்கி²புட்டோ²தி ஸக்கி²ங் கத்வா புச்சி²தோ. ஏஹம்போ⁴ புரிஸாதி ஆலபனமேதங். அத்தஹேது வா பரஹேது வாதி அத்தனோ வா பரஸ்ஸ வா ஹத்த²பாதா³தி³ஹேது வா த⁴னஹேது வா. ஆமிஸகிஞ்சிக்க²ஹேது வாதி எத்த² ஆமிஸந்தி லாபோ⁴ அதி⁴ப்பேதோ. கிஞ்சிக்க²ந்தி யங் வா தங் வா அப்பமத்தகங். அந்தமஸோ தித்திரவட்டகஸப்பிபிண்ட³னவனீதபிண்டா³தி³மத்தகஸ்ஸபி லஞ்ஜஸ்ஸ ஹேதூதி அத்தோ². ஸம்பஜானமுஸா பா⁴ஸிதா ஹோதீதி ஜானந்தோயேவ முஸாவாத³ங் கத்தா ஹோதி.
Sabhāgatoti sabhāyaṃ ṭhito. Parisāgatoti parisāyaṃ ṭhito. Ñātimajjhagatoti dāyādānaṃ majjhe ṭhito. Pūgamajjhagatoti senīnaṃ majjhe ṭhito. Rājakulamajjhagatoti rājakulassa majjhe mahāvinicchaye ṭhito . Abhinītoti pucchanatthāya nīto. Sakkhipuṭṭhoti sakkhiṃ katvā pucchito. Ehambho purisāti ālapanametaṃ. Attahetu vā parahetu vāti attano vā parassa vā hatthapādādihetu vā dhanahetu vā. Āmisakiñcikkhahetu vāti ettha āmisanti lābho adhippeto. Kiñcikkhanti yaṃ vā taṃ vā appamattakaṃ. Antamaso tittiravaṭṭakasappipiṇḍanavanītapiṇḍādimattakassapi lañjassa hetūti attho. Sampajānamusā bhāsitā hotīti jānantoyeva musāvādaṃ kattā hoti.
இமேஸங் பே⁴தா³யாதி யேஸங் இதோதி வுத்தானங் ஸந்திகே ஸுதங் ஹோதி, தேஸங் பே⁴தா³ய. அமூஸங் பே⁴தா³யாதி யேஸங் அமுத்ராதி வுத்தானங் ஸந்திகே ஸுதங் ஹோதி, தேஸங் பே⁴தா³ய. இதி ஸமக்³கா³னங் வா பே⁴த³காதி ஏவங் ஸமக்³கா³னங் வா த்³வின்னங் ஸஹாயகானங் பே⁴த³ங் கத்தா. பி⁴ன்னானங் வா அனுப்பதா³தாதி ஸுட்டு² கதங் தயா, தங் பஜஹந்தேன கதிபாஹேனேவ தே மஹந்தங் அனத்த²ங் கரெய்யாதி ஏவங் பி⁴ன்னானங் புன அஸங்ஸந்த³னாய அனுப்பதா³தா உபத்த²ம்பே⁴தா காரணங் த³ஸ்ஸேதாதி அத்தோ². வக்³கோ³ ஆராமோ அபி⁴ரதிட்டா²னமஸ்ஸாதி வக்³கா³ராமோ. வக்³க³ரதோதி வக்³கே³ஸு ரதோ. வக்³கே³ தி³ஸ்வா வா ஸுத்வா வா நந்த³தீதி வக்³க³னந்தீ³. வக்³க³கரணிங் வாசந்தி யா வாசா ஸமக்³கே³பி ஸத்தே வக்³கே³ கரோதி பி⁴ந்த³தி, தங் கலஹகாரணங் வாசங் பா⁴ஸிதா ஹோதி.
Imesaṃbhedāyāti yesaṃ itoti vuttānaṃ santike sutaṃ hoti, tesaṃ bhedāya. Amūsaṃ bhedāyāti yesaṃ amutrāti vuttānaṃ santike sutaṃ hoti, tesaṃ bhedāya. Iti samaggānaṃ vā bhedakāti evaṃ samaggānaṃ vā dvinnaṃ sahāyakānaṃ bhedaṃ kattā. Bhinnānaṃ vā anuppadātāti suṭṭhu kataṃ tayā, taṃ pajahantena katipāheneva te mahantaṃ anatthaṃ kareyyāti evaṃ bhinnānaṃ puna asaṃsandanāya anuppadātā upatthambhetā kāraṇaṃ dassetāti attho. Vaggo ārāmo abhiratiṭṭhānamassāti vaggārāmo. Vaggaratoti vaggesu rato. Vagge disvā vā sutvā vā nandatīti vagganandī. Vaggakaraṇiṃ vācanti yā vācā samaggepi satte vagge karoti bhindati, taṃ kalahakāraṇaṃ vācaṃ bhāsitā hoti.
அண்ட³காதி யதா² ஸதோ³ஸே ருக்கே² அண்ட³கானி உட்ட²ஹந்தி, ஏவங் ஸதோ³ஸதாய கு²ங்ஸனாவம்ப⁴னாதி³வசனேஹி அண்ட³கா ஜாதா. கக்கஸாதி பூதிகா. யதா² நாம பூதிகருக்கோ² கக்கஸோ ஹோதி பக்³க⁴ரிதசுண்ணோ, ஏவங் கக்கஸா ஹோதி, ஸோதங் க⁴ங்ஸமானா விய பவிஸதி. தேன வுத்தங் ‘‘கக்கஸா’’தி. பரகடுகாதி பரேஸங் கடுகா அமனாபா தோ³ஸஜனநீ. பராபி⁴ஸஜ்ஜனீதி குடிலகண்டகஸாகா² விய மம்மேஸு விஜ்ஜி²த்வா பரேஸங் அபி⁴ஸஜ்ஜனீ க³ந்துகாமானம்பி க³ந்துங் அத³த்வா லக்³க³னகாரீ. கோத⁴ஸாமந்தாதி கோத⁴ஸ்ஸ ஆஸன்னா. அஸமாதி⁴ஸங்வத்தனிகாதி அப்பனாஸமாதி⁴ஸ்ஸ வா உபசாரஸமாதி⁴ஸ்ஸ வா அஸங்வத்தனிகா. இதி ஸப்³பா³னேவ தானி ஸதோ³ஸவாசாய வேவசனானி.
Aṇḍakāti yathā sadose rukkhe aṇḍakāni uṭṭhahanti, evaṃ sadosatāya khuṃsanāvambhanādivacanehi aṇḍakā jātā. Kakkasāti pūtikā. Yathā nāma pūtikarukkho kakkaso hoti paggharitacuṇṇo, evaṃ kakkasā hoti, sotaṃ ghaṃsamānā viya pavisati. Tena vuttaṃ ‘‘kakkasā’’ti. Parakaṭukāti paresaṃ kaṭukā amanāpā dosajananī. Parābhisajjanīti kuṭilakaṇṭakasākhā viya mammesu vijjhitvā paresaṃ abhisajjanī gantukāmānampi gantuṃ adatvā lagganakārī. Kodhasāmantāti kodhassa āsannā. Asamādhisaṃvattanikāti appanāsamādhissa vā upacārasamādhissa vā asaṃvattanikā. Iti sabbāneva tāni sadosavācāya vevacanāni.
அகாலவாதீ³தி அகாலேன வத்தா. அபூ⁴தவாதீ³தி யங் நத்தி², தஸ்ஸ வத்தா. அனத்த²வாதீ³தி அகாரணனிஸ்ஸிதங் வத்தா. அத⁴ம்மவாதீ³தி அஸபா⁴வங் வத்தா . அவினயவாதீ³தி அஸங்வரவினயபடிஸங்யுத்தஸ்ஸ வத்தா. அனிதா⁴னவதி வாசந்தி ஹத³யமஞ்ஜூஸாயங் நிதே⁴துங் அயுத்தங் வாசங் பா⁴ஸிதா ஹோதி. அகாலேனாதி வத்தப்³ப³காலஸ்ஸ புப்³பே³ வா பச்சா² வா அயுத்தகாலே வத்தா ஹோதி. அனபதே³ஸந்தி ஸுத்தாபதே³ஸவிரஹிதங். அபரியந்தவதிந்தி அபரிச்சே²த³ங், ஸுத்தங் வா ஜாதகங் வா நிக்கி²பித்வா தஸ்ஸ உபலப்³ப⁴ங் வா உபமங் வா வத்து²ங் வா ஆஹரித்வா பா³ஹிரகத²ங்யேவ கதே²தி. நிக்கி²த்தங் நிக்கி²த்தமேவ ஹோதி. ‘‘ஸுத்தங் நு கோ² கதே²தி ஜாதகங் நு கோ², நஸ்ஸ அந்தங் வா கோடிங் வா பஸ்ஸாமா’’தி வத்தப்³ப³தங் ஆபஜ்ஜதி. யதா² வடருக்க²ஸாகா²னங் க³தக³தட்டா²னே பாரோஹா ஓதரந்தி, ஓதிண்ணோதிண்ணட்டா²னே ஸம்பஜ்ஜித்வா புன வட்³ட⁴ந்தியேவ . ஏவங் அட்³ட⁴யோஜனம்பி யோஜனம்பி க³ச்ச²ந்தியேவ, க³ச்ச²ந்தே க³ச்ச²ந்தே பன மூலருக்கோ² வினஸ்ஸதி, பவேணிஜாதகாவ திட்ட²ந்தி. ஏவமயம்பி நிக்³ரோத⁴த⁴ம்மகதி²கோ நாம ஹோதி; நிக்கி²த்தங் நிக்கி²த்தமத்தமேவ கத்வா பஸ்ஸேனேவ பரிஹரந்தோ க³ச்ச²தி. யோ பன ப³ஹும்பி ப⁴ணந்தோ ஏதத³த்த²மித³ங் வுத்தந்தி ஆஹரித்வா ஜானாபேதுங் ஸக்கோதி, தஸ்ஸ கதே²துங் வட்டதி. அனத்த²ஸங்ஹிதந்தி ந அத்த²னிஸ்ஸிதங்.
Akālavādīti akālena vattā. Abhūtavādīti yaṃ natthi, tassa vattā. Anatthavādīti akāraṇanissitaṃ vattā. Adhammavādīti asabhāvaṃ vattā . Avinayavādīti asaṃvaravinayapaṭisaṃyuttassa vattā. Anidhānavati vācanti hadayamañjūsāyaṃ nidhetuṃ ayuttaṃ vācaṃ bhāsitā hoti. Akālenāti vattabbakālassa pubbe vā pacchā vā ayuttakāle vattā hoti. Anapadesanti suttāpadesavirahitaṃ. Apariyantavatinti aparicchedaṃ, suttaṃ vā jātakaṃ vā nikkhipitvā tassa upalabbhaṃ vā upamaṃ vā vatthuṃ vā āharitvā bāhirakathaṃyeva katheti. Nikkhittaṃ nikkhittameva hoti. ‘‘Suttaṃ nu kho katheti jātakaṃ nu kho, nassa antaṃ vā koṭiṃ vā passāmā’’ti vattabbataṃ āpajjati. Yathā vaṭarukkhasākhānaṃ gatagataṭṭhāne pārohā otaranti, otiṇṇotiṇṇaṭṭhāne sampajjitvā puna vaḍḍhantiyeva . Evaṃ aḍḍhayojanampi yojanampi gacchantiyeva, gacchante gacchante pana mūlarukkho vinassati, paveṇijātakāva tiṭṭhanti. Evamayampi nigrodhadhammakathiko nāma hoti; nikkhittaṃ nikkhittamattameva katvā passeneva pariharanto gacchati. Yo pana bahumpi bhaṇanto etadatthamidaṃ vuttanti āharitvā jānāpetuṃ sakkoti, tassa kathetuṃ vaṭṭati. Anatthasaṃhitanti na atthanissitaṃ.
அபி⁴ஜ்ஜா²தா ஹோதீதி அபி⁴ஜ்ஜா²ய ஓலோகேதா ஹோதி. அஹோ வதாதி பத்த²னத்தே² நிபாதோ. அபி⁴ஜ்ஜா²ய ஓலோகிதமத்தகேன செத்த² கம்மபத²பே⁴தோ³ ந ஹோதி. யதா³ பன, ‘‘அஹோ வதித³ங் மம ஸந்தகங் அஸ்ஸ, அஹமெத்த² வஸங் வத்தெய்ய’’ந்தி அத்தனோ பரிணாமேதி, ததா³ கம்மபத²பே⁴தோ³ ஹோதி, அயமித⁴ அதி⁴ப்பேதோ.
Abhijjhātā hotīti abhijjhāya oloketā hoti. Aho vatāti patthanatthe nipāto. Abhijjhāya olokitamattakena cettha kammapathabhedo na hoti. Yadā pana, ‘‘aho vatidaṃ mama santakaṃ assa, ahamettha vasaṃ vatteyya’’nti attano pariṇāmeti, tadā kammapathabhedo hoti, ayamidha adhippeto.
ப்³யாபன்னசித்தோதி விபன்னசித்தோ பூதிபூ⁴தசித்தோ. பது³ட்ட²மனஸங்கப்போதி தோ³ஸேன து³ட்ட²சித்தஸங்கப்போ. ஹஞ்ஞந்தூதி கா⁴தியந்தூ. வஜ்ஜ²ந்தூதி வத⁴ங் பாபுணந்து. மா வா அஹேஸுந்தி கிஞ்சிபி மா அஹேஸுங். இதா⁴பி கோபமத்தகேன கம்மபத²பே⁴தோ³ ந ஹோதி. ஹஞ்ஞந்தூதிஆதி³சிந்தனேனேவ ஹோதி, தஸ்மா ஏவங் வுத்தங்.
Byāpannacittoti vipannacitto pūtibhūtacitto. Paduṭṭhamanasaṅkappoti dosena duṭṭhacittasaṅkappo. Haññantūti ghātiyantū. Vajjhantūti vadhaṃ pāpuṇantu. Mā vā ahesunti kiñcipi mā ahesuṃ. Idhāpi kopamattakena kammapathabhedo na hoti. Haññantūtiādicintaneneva hoti, tasmā evaṃ vuttaṃ.
மிச்சா²தி³ட்டி²கோதி அகுஸலத³ஸ்ஸனோ. விபரீதத³ஸ்ஸனோதி விபல்லத்த²த³ஸ்ஸனோ. நத்தி² தி³ன்னந்தி தி³ன்னஸ்ஸ ப²லாபா⁴வங் ஸந்தா⁴ய வத³தி. யிட்ட²ங் வுச்சதி மஹாயாகோ³. ஹுதந்தி பஹேணகஸக்காரோ அதி⁴ப்பேதோ, தம்பி உப⁴யங் ப²லாபா⁴வமேவ ஸந்தா⁴ய படிக்கி²பதி. ஸுகதது³க்கடானந்தி ஸுகதது³க்கடானங், குஸலாகுஸலானந்தி அத்தோ². ப²லங் விபாகோதி யங் ப²லந்தி வா விபாகோதி வா வுச்சதி, தங் நத்தீ²தி வத³தி. நத்தி² அயங் லோகோதி பரலோகே டி²தஸ்ஸ அயங் லோகோ நத்தி². நத்தி² பரோ லோகோதி இத⁴ லோகே டி²தஸ்ஸபி பரலோகோ நத்தி², ஸப்³பே³ தத்த² தத்தே²வ உச்சி²ஜ்ஜந்தீதி த³ஸ்ஸேதி. நத்தி² மாதா நத்தி² பிதாதி தேஸு ஸம்மாபடிபத்திமிச்சா²படிபத்தீனங் ப²லாபா⁴வவஸேன வத³தி. நத்தி² ஸத்தா ஓபபாதிகாதி சவித்வா உபபஜ்ஜனகஸத்தா நாம நத்தீ²தி வத³தி. ஸயங் அபி⁴ஞ்ஞா ஸச்சி²கத்வா பவேதெ³ந்தீதி யே இமஞ்ச லோகங் பரஞ்ச லோகங் அபி⁴விஸிட்டா²ய பஞ்ஞாய ஸயங் பச்சக்க²ங் கத்வா பவேதெ³ந்தி, தே நத்தீ²தி ஸப்³ப³ஞ்ஞுபு³த்³தா⁴னங் அபா⁴வங் தீ³பேதி, எத்தாவதா த³ஸவத்து²கா மிச்சா²தி³ட்டி² கதி²தா ஹோதி.
Micchādiṭṭhikoti akusaladassano. Viparītadassanoti vipallatthadassano. Natthi dinnanti dinnassa phalābhāvaṃ sandhāya vadati. Yiṭṭhaṃ vuccati mahāyāgo. Hutanti paheṇakasakkāro adhippeto, tampi ubhayaṃ phalābhāvameva sandhāya paṭikkhipati. Sukatadukkaṭānanti sukatadukkaṭānaṃ, kusalākusalānanti attho. Phalaṃ vipākoti yaṃ phalanti vā vipākoti vā vuccati, taṃ natthīti vadati. Natthi ayaṃ lokoti paraloke ṭhitassa ayaṃ loko natthi. Natthi paro lokoti idha loke ṭhitassapi paraloko natthi, sabbe tattha tattheva ucchijjantīti dasseti. Natthi mātā natthi pitāti tesu sammāpaṭipattimicchāpaṭipattīnaṃ phalābhāvavasena vadati. Natthi sattā opapātikāti cavitvā upapajjanakasattā nāma natthīti vadati. Sayaṃ abhiññā sacchikatvā pavedentīti ye imañca lokaṃ parañca lokaṃ abhivisiṭṭhāya paññāya sayaṃ paccakkhaṃ katvā pavedenti, te natthīti sabbaññubuddhānaṃ abhāvaṃ dīpeti, ettāvatā dasavatthukā micchādiṭṭhi kathitā hoti.
441. பாணாதிபாதங் பஹாயாதிஆத³யோ ஸத்த கம்மபதா² சூளஹத்தி²பதே³ வித்தா²ரிதா. அனபி⁴ஜ்ஜா²த³யோ உத்தானத்தா²யேவ.
441.Pāṇātipātaṃpahāyātiādayo satta kammapathā cūḷahatthipade vitthāritā. Anabhijjhādayo uttānatthāyeva.
442. ஸஹப்³யதங் உபபஜ்ஜெய்யந்தி ஸஹபா⁴வங் உபக³ச்செ²ய்யங். ப்³ரஹ்மகாயிகானங் தே³வானந்தி பட²மஜ்ஜா²னபூ⁴மிதே³வானங். ஆபா⁴னங் தே³வானந்தி ஆபா⁴ நாம விஸுங் நத்தி², பரித்தாப⁴அப்பமாணாப⁴ஆப⁴ஸ்ஸரானமேதங் அதி⁴வசனங். பரித்தாபா⁴னந்திஆதி³ பன ஏகதோ அக்³க³ஹெத்வா தேஸங்யேவ பே⁴த³தோ க³ஹணங். பரித்தஸுபா⁴னந்திஆதீ³ஸுபி ஏஸேவ நயோ. இதி ப⁴க³வா ஆஸவக்க²யங் த³ஸ்ஸெத்வா அரஹத்தனிகூடேன தே³ஸனங் நிட்ட²பேஸி.
442.Sahabyataṃ upapajjeyyanti sahabhāvaṃ upagaccheyyaṃ. Brahmakāyikānaṃ devānanti paṭhamajjhānabhūmidevānaṃ. Ābhānaṃ devānanti ābhā nāma visuṃ natthi, parittābhaappamāṇābhaābhassarānametaṃ adhivacanaṃ. Parittābhānantiādi pana ekato aggahetvā tesaṃyeva bhedato gahaṇaṃ. Parittasubhānantiādīsupi eseva nayo. Iti bhagavā āsavakkhayaṃ dassetvā arahattanikūṭena desanaṃ niṭṭhapesi.
இத⁴ ட²த்வா பன தே³வலோகா ஸமானேதப்³பா³. திஸ்ஸன்னங் தாவ ஜா²னபூ⁴மீனங் வஸேன நவ ப்³ரஹ்மலோகா, பஞ்ச ஸுத்³தா⁴வாஸா சதூஹி ஆரூபேஹி ஸத்³தி⁴ங் நவாதி அட்டா²ரஸ, வேஹப்ப²லேஹி ஸத்³தி⁴ங் ஏகூனவீஸதி, தே அஸஞ்ஞங் பக்கி²பித்வா வீஸதி ப்³ரஹ்மலோகா ஹொந்தி, ஏவங் ச²ஹி காமாவசரேஹி ஸத்³தி⁴ங் ச²ப்³பீ³ஸதி தே³வலோகா நாம. தேஸங் ஸப்³பே³ஸம்பி ப⁴க³வதா த³ஸகுஸலகம்மபதே²ஹி நிப்³ப³த்தி த³ஸ்ஸிதா.
Idha ṭhatvā pana devalokā samānetabbā. Tissannaṃ tāva jhānabhūmīnaṃ vasena nava brahmalokā, pañca suddhāvāsā catūhi ārūpehi saddhiṃ navāti aṭṭhārasa, vehapphalehi saddhiṃ ekūnavīsati, te asaññaṃ pakkhipitvā vīsati brahmalokā honti, evaṃ chahi kāmāvacarehi saddhiṃ chabbīsati devalokā nāma. Tesaṃ sabbesampi bhagavatā dasakusalakammapathehi nibbatti dassitā.
தத்த² ச²ஸு தாவ காமாவசரேஸு திண்ணங் ஸுசரிதானங் விபாகேனேவ நிப்³ப³த்தி ஹோதி. உபரிதே³வலோகானங் பன இமே கம்மபதா² உபனிஸ்ஸயவஸேன கதி²தா . த³ஸ குஸலகம்மபதா² ஹி ஸீலங், ஸீலவதோ ச கஸிணபரிகம்மங் இஜ்ஜ²தீதி. ஸீலே பதிட்டா²ய கஸிணபரிகம்மங் கத்வா பட²மஜ்ஜா²னங் நிப்³ப³த்தெத்வா பட²மஜ்ஜா²னபூ⁴மியங் நிப்³ப³த்ததி; து³தியாதீ³னி பா⁴வெத்வா து³தியஜ்ஜா²னபூ⁴மிஆதீ³ஸு நிப்³ப³த்ததி; ரூபாவசரஜ்ஜா²னங் பாத³கங் கத்வா விபஸ்ஸனங் வட்³டெ⁴த்வா அனாகா³மிப²லே பதிட்டி²தோ பஞ்சஸு ஸுத்³தா⁴வாஸேஸு நிப்³ப³த்ததி; ரூபாவசரஜ்ஜா²னங் பாத³கங் கத்வா அரூபாவசரஸமாபத்திங் நிப்³ப³த்தெத்வா சதூஸு அரூபேஸு நிப்³ப³த்ததி; ரூபாரூபஜ்ஜா²னங் பாத³கங் கத்வா விபஸ்ஸனங் வட்³டெ⁴த்வா அரஹத்தங் பாபுணாதி. அஸஞ்ஞப⁴வோ பன பா³ஹிரகானங் தாபஸபரிப்³பா³ஜகானங் ஆசிண்ணோதி இத⁴ ந நித்³தி³ட்டோ². ஸேஸங் ஸப்³ப³த்த² உத்தானத்த²மேவாதி.
Tattha chasu tāva kāmāvacaresu tiṇṇaṃ sucaritānaṃ vipākeneva nibbatti hoti. Uparidevalokānaṃ pana ime kammapathā upanissayavasena kathitā . Dasa kusalakammapathā hi sīlaṃ, sīlavato ca kasiṇaparikammaṃ ijjhatīti. Sīle patiṭṭhāya kasiṇaparikammaṃ katvā paṭhamajjhānaṃ nibbattetvā paṭhamajjhānabhūmiyaṃ nibbattati; dutiyādīni bhāvetvā dutiyajjhānabhūmiādīsu nibbattati; rūpāvacarajjhānaṃ pādakaṃ katvā vipassanaṃ vaḍḍhetvā anāgāmiphale patiṭṭhito pañcasu suddhāvāsesu nibbattati; rūpāvacarajjhānaṃ pādakaṃ katvā arūpāvacarasamāpattiṃ nibbattetvā catūsu arūpesu nibbattati; rūpārūpajjhānaṃ pādakaṃ katvā vipassanaṃ vaḍḍhetvā arahattaṃ pāpuṇāti. Asaññabhavo pana bāhirakānaṃ tāpasaparibbājakānaṃ āciṇṇoti idha na niddiṭṭho. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸாலெய்யகஸுத்தவண்ணனா நிட்டி²தா.
Sāleyyakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. ஸாலெய்யகஸுத்தங் • 1. Sāleyyakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. ஸாலெய்யகஸுத்தவண்ணனா • 1. Sāleyyakasuttavaṇṇanā
