| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
8. ஸல்லேக²ஸுத்தங்
8. Sallekhasuttaṃ
81. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா மஹாசுந்தோ³ ஸாயன்ஹஸமயங் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா மஹாசுந்தோ³ ப⁴க³வந்தங் ஏதத³வோச – ‘‘யா இமா, ப⁴ந்தே, அனேகவிஹிதா தி³ட்டி²யோ லோகே உப்பஜ்ஜந்தி – அத்தவாத³படிஸங்யுத்தா வா லோகவாத³படிஸங்யுத்தா வா – ஆதி³மேவ நு கோ², ப⁴ந்தே, பி⁴க்கு²னோ மனஸிகரோதோ ஏவமேதாஸங் தி³ட்டீ²னங் பஹானங் ஹோதி, ஏவமேதாஸங் தி³ட்டீ²னங் படினிஸ்ஸக்³கோ³ ஹோதீ’’தி?
81. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā mahācundo sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā mahācundo bhagavantaṃ etadavoca – ‘‘yā imā, bhante, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – ādimeva nu kho, bhante, bhikkhuno manasikaroto evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hotī’’ti?
82. ‘‘யா இமா, சுந்த³, அனேகவிஹிதா தி³ட்டி²யோ லோகே உப்பஜ்ஜந்தி – அத்தவாத³படிஸங்யுத்தா வா லோகவாத³படிஸங்யுத்தா வா – யத்த² சேதா தி³ட்டி²யோ உப்பஜ்ஜந்தி யத்த² ச அனுஸெந்தி யத்த² ச ஸமுதா³சரந்தி தங் ‘நேதங் மம, நேஸோஹமஸ்மி, ந மே ஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞா பஸ்ஸதோ ஏவமேதாஸங் தி³ட்டீ²னங் பஹானங் ஹோதி, ஏவமேதாஸங் தி³ட்டீ²னங் படினிஸ்ஸக்³கோ³ ஹோதி.
82. ‘‘Yā imā, cunda, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – yattha cetā diṭṭhiyo uppajjanti yattha ca anusenti yattha ca samudācaranti taṃ ‘netaṃ mama, nesohamasmi, na me so attā’ti – evametaṃ yathābhūtaṃ sammappaññā passato evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hoti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² பீதியா ச விராகா³ உபெக்க²கோ ச விஹரெய்ய, ஸதோ ச ஸம்பஜானோ ஸுக²ஞ்ச காயேன படிஸங்வேதெ³ய்ய, யங் தங் அரியா ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu pītiyā ca virāgā upekkhako ca vihareyya, sato ca sampajāno sukhañca kāyena paṭisaṃvedeyya, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasuṃ upekkhāsatipārisuddhiṃ catutthaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² ஸப்³ப³ஸோ ரூபஸஞ்ஞானங் ஸமதிக்கமா, படிக⁴ஸஞ்ஞானங் அத்த²ங்க³மா, நானத்தஸஞ்ஞானங் அமனஸிகாரா, ‘அனந்தோ ஆகாஸோ’தி ஆகாஸானஞ்சாயதனங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso rūpasaññānaṃ samatikkamā, paṭighasaññānaṃ atthaṅgamā, nānattasaññānaṃ amanasikārā, ‘ananto ākāso’ti ākāsānañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² ஸப்³ப³ஸோ விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘டா²னங் கோ² பனேதங், சுந்த³, விஜ்ஜதி யங் இதே⁴கச்சோ பி⁴க்கு² ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ விஹரெய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி . ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihareyya. Tassa evamassa – ‘sallekhena viharāmī’ti . Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
83. ‘‘இத⁴ கோ² பன வோ, சுந்த³, ஸல்லேகோ² கரணீயோ. ‘பரே விஹிங்ஸகா ப⁴விஸ்ஸந்தி, மயமெத்த² அவிஹிங்ஸகா ப⁴விஸ்ஸாமா’தி ஸல்லேகோ² கரணீயோ. ‘பரே பாணாதிபாதீ ப⁴விஸ்ஸந்தி, மயமெத்த² பாணாதிபாதா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அதி³ன்னாதா³யீ ப⁴விஸ்ஸந்தி, மயமெத்த² அதி³ன்னாதா³னா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அப்³ரஹ்மசாரீ ப⁴விஸ்ஸந்தி, மயமெத்த² ப்³ரஹ்மசாரீ ப⁴விஸ்ஸாமா’தி ஸல்லேகோ² கரணீயோ. ‘பரே முஸாவாதீ³ ப⁴விஸ்ஸந்தி, மயமெத்த² முஸாவாதா³ படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே பிஸுணவாசா 1 ப⁴விஸ்ஸந்தி, மயமெத்த² பிஸுணாய வாசாய படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே ப²ருஸவாசா 2 ப⁴விஸ்ஸந்தி, மயமெத்த² ப²ருஸாய வாசாய படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே ஸம்ப²ப்பலாபீ ப⁴விஸ்ஸந்தி, மயமெத்த² ஸம்ப²ப்பலாபா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அபி⁴ஜ்ஜா²லூ ப⁴விஸ்ஸந்தி, மயமெத்த² அனபி⁴ஜ்ஜா²லூ ப⁴விஸ்ஸாமா’தி ஸல்லேகோ² கரணீயோ. ‘பரே ப்³யாபன்னசித்தா ப⁴விஸ்ஸந்தி, மயமெத்த² அப்³யாபன்னசித்தா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²தி³ட்டீ² ப⁴விஸ்ஸந்தி, மயமெத்த² ஸம்மாதி³ட்டீ² ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸங்கப்பா ப⁴விஸ்ஸந்தி, மயமெத்த² ஸம்மாஸங்கப்பா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²வாசா ப⁴விஸ்ஸந்தி, மயமெத்த² ஸம்மாவாசா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²கம்மந்தா ப⁴விஸ்ஸந்தி, மயமெத்த² ஸம்மாகம்மந்தா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஆஜீவா ப⁴விஸ்ஸந்தி, மயமெத்த² ஸம்மாஆஜீவா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²வாயாமா ப⁴விஸ்ஸந்தி, மயமெத்த² ஸம்மாவாயாமா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸதீ ப⁴விஸ்ஸந்தி, மயமெத்த² ஸம்மாஸதீ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸமாதி⁴ ப⁴விஸ்ஸந்தி, மயமெத்த² ஸம்மாஸமாதீ⁴ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஞாணீ ப⁴விஸ்ஸந்தி, மயமெத்த² ஸம்மாஞாணீ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²விமுத்தீ ப⁴விஸ்ஸந்தி, மயமெத்த² ஸம்மாவிமுத்தீ ப⁴விஸ்ஸாமா’தி ஸல்லேகோ² கரணீயோ.
83. ‘‘Idha kho pana vo, cunda, sallekho karaṇīyo. ‘Pare vihiṃsakā bhavissanti, mayamettha avihiṃsakā bhavissāmā’ti sallekho karaṇīyo. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti sallekho karaṇīyo. ‘Pare adinnādāyī bhavissanti, mayamettha adinnādānā paṭiviratā bhavissāmā’ti sallekho karaṇīyo. ‘Pare abrahmacārī bhavissanti, mayamettha brahmacārī bhavissāmā’ti sallekho karaṇīyo. ‘Pare musāvādī bhavissanti, mayamettha musāvādā paṭiviratā bhavissāmā’ti sallekho karaṇīyo. ‘Pare pisuṇavācā 3 bhavissanti, mayamettha pisuṇāya vācāya paṭiviratā bhavissāmā’ti sallekho karaṇīyo. ‘Pare pharusavācā 4 bhavissanti, mayamettha pharusāya vācāya paṭiviratā bhavissāmā’ti sallekho karaṇīyo. ‘Pare samphappalāpī bhavissanti, mayamettha samphappalāpā paṭiviratā bhavissāmā’ti sallekho karaṇīyo. ‘Pare abhijjhālū bhavissanti, mayamettha anabhijjhālū bhavissāmā’ti sallekho karaṇīyo. ‘Pare byāpannacittā bhavissanti, mayamettha abyāpannacittā bhavissāmā’ti sallekho karaṇīyo. ‘Pare micchādiṭṭhī bhavissanti, mayamettha sammādiṭṭhī bhavissāmā’ti sallekho karaṇīyo. ‘Pare micchāsaṅkappā bhavissanti, mayamettha sammāsaṅkappā bhavissāmā’ti sallekho karaṇīyo. ‘Pare micchāvācā bhavissanti, mayamettha sammāvācā bhavissāmā’ti sallekho karaṇīyo. ‘Pare micchākammantā bhavissanti, mayamettha sammākammantā bhavissāmā’ti sallekho karaṇīyo. ‘Pare micchāājīvā bhavissanti, mayamettha sammāājīvā bhavissāmā’ti sallekho karaṇīyo. ‘Pare micchāvāyāmā bhavissanti, mayamettha sammāvāyāmā bhavissāmā’ti sallekho karaṇīyo. ‘Pare micchāsatī bhavissanti, mayamettha sammāsatī bhavissāmā’ti sallekho karaṇīyo. ‘Pare micchāsamādhi bhavissanti, mayamettha sammāsamādhī bhavissāmā’ti sallekho karaṇīyo. ‘Pare micchāñāṇī bhavissanti, mayamettha sammāñāṇī bhavissāmā’ti sallekho karaṇīyo. ‘Pare micchāvimuttī bhavissanti, mayamettha sammāvimuttī bhavissāmā’ti sallekho karaṇīyo.
‘‘‘பரே தீ²னமித்³த⁴பரியுட்டி²தா ப⁴விஸ்ஸந்தி, மயமெத்த² விக³ததீ²னமித்³தா⁴ ப⁴விஸ்ஸாமா’தி ஸல்லேகோ² கரணீயோ . ‘பரே உத்³த⁴தா ப⁴விஸ்ஸந்தி, மயமெத்த² அனுத்³த⁴தா ப⁴விஸ்ஸாமா’தி ஸல்லேகோ² கரணீயோ. ‘பரே விசிகிச்சீ² 5 ப⁴விஸ்ஸந்தி, மயமெத்த² திண்ணவிசிகிச்சா² ப⁴விஸ்ஸாமா’தி ஸல்லேகோ² கரணீயோ. ‘பரே கோத⁴னா ப⁴விஸ்ஸந்தி, மயமெத்த² அக்கோத⁴னா ப⁴விஸ்ஸாமா’தி ஸல்லேகோ² கரணீயோ. ‘பரே உபனாஹீ ப⁴விஸ்ஸந்தி, மயமெத்த² அனுபனாஹீ ப⁴விஸ்ஸாமா’தி ஸல்லேகோ² கரணீயோ. ‘பரே மக்கீ² ப⁴விஸ்ஸந்தி , மயமெத்த² அமக்கீ² ப⁴விஸ்ஸாமா’தி ஸல்லேகோ² கரணீயோ. ‘பரே பளாஸீ ப⁴விஸ்ஸந்தி, மயமெத்த² அபளாஸீ ப⁴விஸ்ஸாமா’தி ஸல்லேகோ² கரணீயோ. ‘பரே இஸ்ஸுகீ ப⁴விஸ்ஸந்தி, மயமெத்த² அனிஸ்ஸுகீ ப⁴விஸ்ஸாமா’தி ஸல்லேகோ² கரணீயோ. ‘பரே மச்ச²ரீ ப⁴விஸ்ஸந்தி, மயமெத்த² அமச்ச²ரீ ப⁴விஸ்ஸாமா’தி ஸல்லேகோ² கரணீயோ. ‘பரே ஸடா² ப⁴விஸ்ஸந்தி, மயமெத்த² அஸடா² ப⁴விஸ்ஸாமா’தி ஸல்லேகோ² கரணீயோ. ‘பரே மாயாவீ ப⁴விஸ்ஸந்தி, மயமெத்த² அமாயாவீ ப⁴விஸ்ஸாமா’தி ஸல்லேகோ² கரணீயோ. ‘பரே த²த்³தா⁴ ப⁴விஸ்ஸந்தி, மயமெத்த² அத்த²த்³தா⁴ ப⁴விஸ்ஸாமா’தி ஸல்லேகோ² கரணீயோ. ‘பரே அதிமானீ ப⁴விஸ்ஸந்தி, மயமெத்த² அனதிமானீ ப⁴விஸ்ஸாமா’தி ஸல்லேகோ² கரணீயோ. ‘பரே து³ப்³ப³சா ப⁴விஸ்ஸந்தி, மயமெத்த² ஸுவசா ப⁴விஸ்ஸாமா’தி ஸல்லேகோ² கரணீயோ. ‘பரே பாபமித்தா ப⁴விஸ்ஸந்தி, மயமெத்த² கல்யாணமித்தா ப⁴விஸ்ஸாமா’தி ஸல்லேகோ² கரணீயோ. ‘பரே பமத்தா ப⁴விஸ்ஸந்தி, மயமெத்த² அப்பமத்தா ப⁴விஸ்ஸாமா’தி ஸல்லேகோ² கரணீயோ. ‘பரே அஸ்ஸத்³தா⁴ ப⁴விஸ்ஸந்தி, மயமெத்த² ஸத்³தா⁴ ப⁴விஸ்ஸாமா’தி ஸல்லேகோ² கரணீயோ. ‘பரே அஹிரிகா ப⁴விஸ்ஸந்தி, மயமெத்த² ஹிரிமனா ப⁴விஸ்ஸாமா’தி ஸல்லேகோ² கரணீயோ. ‘பரே அனொத்தாபீ 6 ப⁴விஸ்ஸந்தி, மயமெத்த² ஒத்தாபீ ப⁴விஸ்ஸாமா’தி ஸல்லேகோ² கரணீயோ. ‘பரே அப்பஸ்ஸுதா ப⁴விஸ்ஸந்தி, மயமெத்த² ப³ஹுஸ்ஸுதா ப⁴விஸ்ஸாமா’தி ஸல்லேகோ² கரணீயோ. ‘பரே குஸீதா ப⁴விஸ்ஸந்தி, மயமெத்த² ஆரத்³த⁴வீரியா ப⁴விஸ்ஸாமா’தி ஸல்லேகோ² கரணீயோ. ‘பரே முட்ட²ஸ்ஸதீ ப⁴விஸ்ஸந்தி, மயமெத்த² உபட்டி²தஸ்ஸதீ ப⁴விஸ்ஸாமா’தி ஸல்லேகோ² கரணீயோ. ‘பரே து³ப்பஞ்ஞா ப⁴விஸ்ஸந்தி, மயமெத்த² பஞ்ஞாஸம்பன்னா ப⁴விஸ்ஸாமா’தி ஸல்லேகோ² கரணீயோ. ‘பரே ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³ ப⁴விஸ்ஸந்தி, மயமெத்த² அஸந்தி³ட்டி²பராமாஸீ அனாதா⁴னக்³கா³ஹீ ஸுப்படினிஸ்ஸக்³கீ³ ப⁴விஸ்ஸாமா’தி ஸல்லேகோ² கரணீயோ.
‘‘‘Pare thīnamiddhapariyuṭṭhitā bhavissanti, mayamettha vigatathīnamiddhā bhavissāmā’ti sallekho karaṇīyo . ‘Pare uddhatā bhavissanti, mayamettha anuddhatā bhavissāmā’ti sallekho karaṇīyo. ‘Pare vicikicchī 7 bhavissanti, mayamettha tiṇṇavicikicchā bhavissāmā’ti sallekho karaṇīyo. ‘Pare kodhanā bhavissanti, mayamettha akkodhanā bhavissāmā’ti sallekho karaṇīyo. ‘Pare upanāhī bhavissanti, mayamettha anupanāhī bhavissāmā’ti sallekho karaṇīyo. ‘Pare makkhī bhavissanti , mayamettha amakkhī bhavissāmā’ti sallekho karaṇīyo. ‘Pare paḷāsī bhavissanti, mayamettha apaḷāsī bhavissāmā’ti sallekho karaṇīyo. ‘Pare issukī bhavissanti, mayamettha anissukī bhavissāmā’ti sallekho karaṇīyo. ‘Pare maccharī bhavissanti, mayamettha amaccharī bhavissāmā’ti sallekho karaṇīyo. ‘Pare saṭhā bhavissanti, mayamettha asaṭhā bhavissāmā’ti sallekho karaṇīyo. ‘Pare māyāvī bhavissanti, mayamettha amāyāvī bhavissāmā’ti sallekho karaṇīyo. ‘Pare thaddhā bhavissanti, mayamettha atthaddhā bhavissāmā’ti sallekho karaṇīyo. ‘Pare atimānī bhavissanti, mayamettha anatimānī bhavissāmā’ti sallekho karaṇīyo. ‘Pare dubbacā bhavissanti, mayamettha suvacā bhavissāmā’ti sallekho karaṇīyo. ‘Pare pāpamittā bhavissanti, mayamettha kalyāṇamittā bhavissāmā’ti sallekho karaṇīyo. ‘Pare pamattā bhavissanti, mayamettha appamattā bhavissāmā’ti sallekho karaṇīyo. ‘Pare assaddhā bhavissanti, mayamettha saddhā bhavissāmā’ti sallekho karaṇīyo. ‘Pare ahirikā bhavissanti, mayamettha hirimanā bhavissāmā’ti sallekho karaṇīyo. ‘Pare anottāpī 8 bhavissanti, mayamettha ottāpī bhavissāmā’ti sallekho karaṇīyo. ‘Pare appassutā bhavissanti, mayamettha bahussutā bhavissāmā’ti sallekho karaṇīyo. ‘Pare kusītā bhavissanti, mayamettha āraddhavīriyā bhavissāmā’ti sallekho karaṇīyo. ‘Pare muṭṭhassatī bhavissanti, mayamettha upaṭṭhitassatī bhavissāmā’ti sallekho karaṇīyo. ‘Pare duppaññā bhavissanti, mayamettha paññāsampannā bhavissāmā’ti sallekho karaṇīyo. ‘Pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti sallekho karaṇīyo.
84. ‘‘சித்துப்பாத³ம்பி கோ² அஹங், சுந்த³, குஸலேஸு த⁴ம்மேஸு ப³ஹுகாரங் 9 வதா³மி, கோ பன வாதோ³ காயேன வாசாய அனுவிதீ⁴யனாஸு! தஸ்மாதிஹ, சுந்த³, ‘பரே விஹிங்ஸகா ப⁴விஸ்ஸந்தி, மயமெத்த² அவிஹிங்ஸகா ப⁴விஸ்ஸாமா’தி சித்தங் உப்பாதே³தப்³ப³ங். ‘பரே பாணாதிபாதீ ப⁴விஸ்ஸந்தி, மயமெத்த² பாணாதிபாதா படிவிரதா ப⁴விஸ்ஸாமா’தி சித்தங் உப்பாதே³தப்³ப³ங்…‘பரே ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³ ப⁴விஸ்ஸந்தி, மயமெத்த² அஸந்தி³ட்டி²பராமாஸீ அனாதா⁴னக்³கா³ஹீ ஸுப்படினிஸ்ஸக்³கீ³ ப⁴விஸ்ஸாமா’தி சித்தங் உப்பாதே³தப்³ப³ங்.
84. ‘‘Cittuppādampi kho ahaṃ, cunda, kusalesu dhammesu bahukāraṃ 10 vadāmi, ko pana vādo kāyena vācāya anuvidhīyanāsu! Tasmātiha, cunda, ‘pare vihiṃsakā bhavissanti, mayamettha avihiṃsakā bhavissāmā’ti cittaṃ uppādetabbaṃ. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti cittaṃ uppādetabbaṃ…‘pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti cittaṃ uppādetabbaṃ.
85. ‘‘ஸெய்யதா²பி, சுந்த³, விஸமோ மக்³கோ³ அஸ்ஸ, தஸ்ஸ 11 அஞ்ஞோ ஸமோ மக்³கோ³ பரிக்கமனாய; ஸெய்யதா² வா பன, சுந்த³, விஸமங் தித்த²ங் அஸ்ஸ, தஸ்ஸ அஞ்ஞங் ஸமங் தித்த²ங் பரிக்கமனாய; ஏவமேவ கோ², சுந்த³, விஹிங்ஸகஸ்ஸ புரிஸபுக்³க³லஸ்ஸ அவிஹிங்ஸா ஹோதி பரிக்கமனாய, பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி பரிக்கமனாய, அதி³ன்னாதா³யிஸ்ஸ புரிஸபுக்³க³லஸ்ஸ அதி³ன்னாதா³னா வேரமணீ ஹோதி பரிக்கமனாய, அப்³ரஹ்மசாரிஸ்ஸ புரிஸபுக்³க³லஸ்ஸ அப்³ரஹ்மசரியா வேரமணீ ஹோதி பரிக்கமனாய , முஸாவாதி³ஸ்ஸ புரிஸபுக்³க³லஸ்ஸ முஸாவாதா³ வேரமணீ ஹோதி பரிக்கமனாய, பிஸுணவாசஸ்ஸ புரிஸபுக்³க³லஸ்ஸ பிஸுணாய வாசாய வேரமணீ ஹோதி பரிக்கமனாய, ப²ருஸவாசஸ்ஸ புரிஸபுக்³க³லஸ்ஸ ப²ருஸாய வாசாய வேரமணீ ஹோதி பரிக்கமனாய, ஸம்ப²ப்பலாபிஸ்ஸ புரிஸபுக்³க³லஸ்ஸ ஸம்ப²ப்பலாபா வேரமணீ ஹோதி பரிக்கமனாய, அபி⁴ஜ்ஜா²லுஸ்ஸ புரிஸபுக்³க³லஸ்ஸ அனபி⁴ஜ்ஜா² ஹோதி பரிக்கமனாய, ப்³யாபன்னசித்தஸ்ஸ புரிஸபுக்³க³லஸ்ஸ அப்³யாபாதோ³ ஹோதி பரிக்கமனாய, மிச்சா²தி³ட்டி²ஸ்ஸ புரிஸபுக்³க³லஸ்ஸ ஸம்மாதி³ட்டி² ஹோதி பரிக்கமனாய, மிச்சா²ஸங்கப்பஸ்ஸ புரிஸபுக்³க³லஸ்ஸ ஸம்மாஸங்கப்போ ஹோதி பரிக்கமனாய, மிச்சா²வாசஸ்ஸ புரிஸபுக்³க³லஸ்ஸ ஸம்மாவாசா ஹோதி பரிக்கமனாய, மிச்சா²கம்மந்தஸ்ஸ புரிஸபுக்³க³லஸ்ஸ ஸம்மாகம்மந்தோ ஹோதி பரிக்கமனாய, மிச்சா²ஆஜீவஸ்ஸ புரிஸபுக்³க³லஸ்ஸ ஸம்மாஆஜீவோ ஹோதி பரிக்கமனாய, மிச்சா²வாயாமஸ்ஸ புரிஸபுக்³க³லஸ்ஸ ஸம்மாவாயாமோ ஹோதி பரிக்கமனாய, மிச்சா²ஸதிஸ்ஸ புரிஸபுக்³க³லஸ்ஸ ஸம்மாஸதி ஹோதி பரிக்கமனாய, மிச்சா²ஸமாதி⁴ஸ்ஸ புரிஸபுக்³க³லஸ்ஸ ஸம்மாஸமாதி⁴ ஹோதி பரிக்கமனாய, மிச்சா²ஞாணிஸ்ஸ புரிஸபுக்³க³லஸ்ஸ ஸம்மாஞாணங் ஹோதி பரிக்கமனாய, மிச்சா²விமுத்திஸ்ஸ புரிஸபுக்³க³லஸ்ஸ ஸம்மாவிமுத்தி ஹோதி பரிக்கமனாய.
85. ‘‘Seyyathāpi, cunda, visamo maggo assa, tassa 12 añño samo maggo parikkamanāya; seyyathā vā pana, cunda, visamaṃ titthaṃ assa, tassa aññaṃ samaṃ titthaṃ parikkamanāya; evameva kho, cunda, vihiṃsakassa purisapuggalassa avihiṃsā hoti parikkamanāya, pāṇātipātissa purisapuggalassa pāṇātipātā veramaṇī hoti parikkamanāya, adinnādāyissa purisapuggalassa adinnādānā veramaṇī hoti parikkamanāya, abrahmacārissa purisapuggalassa abrahmacariyā veramaṇī hoti parikkamanāya , musāvādissa purisapuggalassa musāvādā veramaṇī hoti parikkamanāya, pisuṇavācassa purisapuggalassa pisuṇāya vācāya veramaṇī hoti parikkamanāya, pharusavācassa purisapuggalassa pharusāya vācāya veramaṇī hoti parikkamanāya, samphappalāpissa purisapuggalassa samphappalāpā veramaṇī hoti parikkamanāya, abhijjhālussa purisapuggalassa anabhijjhā hoti parikkamanāya, byāpannacittassa purisapuggalassa abyāpādo hoti parikkamanāya, micchādiṭṭhissa purisapuggalassa sammādiṭṭhi hoti parikkamanāya, micchāsaṅkappassa purisapuggalassa sammāsaṅkappo hoti parikkamanāya, micchāvācassa purisapuggalassa sammāvācā hoti parikkamanāya, micchākammantassa purisapuggalassa sammākammanto hoti parikkamanāya, micchāājīvassa purisapuggalassa sammāājīvo hoti parikkamanāya, micchāvāyāmassa purisapuggalassa sammāvāyāmo hoti parikkamanāya, micchāsatissa purisapuggalassa sammāsati hoti parikkamanāya, micchāsamādhissa purisapuggalassa sammāsamādhi hoti parikkamanāya, micchāñāṇissa purisapuggalassa sammāñāṇaṃ hoti parikkamanāya, micchāvimuttissa purisapuggalassa sammāvimutti hoti parikkamanāya.
‘‘தீ²னமித்³த⁴பரியுட்டி²தஸ்ஸ புரிஸபுக்³க³லஸ்ஸ விக³ததி²னமித்³த⁴தா ஹோதி பரிக்கமனாய, உத்³த⁴தஸ்ஸ புரிஸபுக்³க³லஸ்ஸ அனுத்³த⁴ச்சங் ஹோதி பரிக்கமனாய, விசிகிச்சி²ஸ்ஸ புரிஸபுக்³க³லஸ்ஸ திண்ணவிசிகிச்ச²தா ஹோதி பரிக்கமனாய, கோத⁴னஸ்ஸ புரிஸபுக்³க³லஸ்ஸ அக்கோதோ⁴ ஹோதி பரிக்கமனாய, உபனாஹிஸ்ஸ புரிஸபுக்³க³லஸ்ஸ அனுபனாஹோ ஹோதி பரிக்கமனாய, மக்கி²ஸ்ஸ புரிஸபுக்³க³லஸ்ஸ அமக்கோ² ஹோதி பரிக்கமனாய, பளாஸிஸ்ஸ புரிஸபுக்³க³லஸ்ஸ அபளாஸோ ஹோதி பரிக்கமனாய , இஸ்ஸுகிஸ்ஸ புரிஸபுக்³க³லஸ்ஸ அனிஸ்ஸுகிதா ஹோதி பரிக்கமனாய, மச்ச²ரிஸ்ஸ புரிஸபுக்³க³லஸ்ஸ அமச்ச²ரியங் ஹோதி பரிக்கமனாய, ஸட²ஸ்ஸ புரிஸபுக்³க³லஸ்ஸ அஸாடெ²ய்யங் ஹோதி பரிக்கமனாய, மாயாவிஸ்ஸ புரிஸபுக்³க³லஸ்ஸ அமாயா 13 ஹோதி பரிக்கமனாய, த²த்³த⁴ஸ்ஸ புரிஸபுக்³க³லஸ்ஸ அத்த²த்³தி⁴யங் ஹோதி பரிக்கமனாய, அதிமானிஸ்ஸ புரிஸபுக்³க³லஸ்ஸ அனதிமானோ ஹோதி பரிக்கமனாய, து³ப்³ப³சஸ்ஸ புரிஸபுக்³க³லஸ்ஸ ஸோவசஸ்ஸதா ஹோதி பரிக்கமனாய, பாபமித்தஸ்ஸ புரிஸபுக்³க³லஸ்ஸ கல்யாணமித்ததா ஹோதி பரிக்கமனாய, பமத்தஸ்ஸ புரிஸபுக்³க³லஸ்ஸ அப்பமாதோ³ ஹோதி பரிக்கமனாய, அஸ்ஸத்³த⁴ஸ்ஸ புரிஸபுக்³க³லஸ்ஸ ஸத்³தா⁴ ஹோதி பரிக்கமனாய, அஹிரிகஸ்ஸ புரிஸபுக்³க³லஸ்ஸ ஹிரீ ஹோதி பரிக்கமனாய, அனொத்தாபிஸ்ஸ புரிஸபுக்³க³லஸ்ஸ ஒத்தப்பங் ஹோதி பரிக்கமனாய, அப்பஸ்ஸுதஸ்ஸ புரிஸபுக்³க³லஸ்ஸ பா³ஹுஸச்சங் ஹோதி பரிக்கமனாய, குஸீதஸ்ஸ புரிஸபுக்³க³லஸ்ஸ வீரியாரம்போ⁴ ஹோதி பரிக்கமனாய, முட்ட²ஸ்ஸதிஸ்ஸ புரிஸபுக்³க³லஸ்ஸ உபட்டி²தஸ்ஸதிதா ஹோதி பரிக்கமனாய, து³ப்பஞ்ஞஸ்ஸ புரிஸபுக்³க³லஸ்ஸ பஞ்ஞாஸம்பதா³ ஹோதி பரிக்கமனாய , ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸிஅனாதா⁴னக்³கா³ஹி-ஸுப்படினிஸ்ஸக்³கி³தா ஹோதி பரிக்கமனாய.
‘‘Thīnamiddhapariyuṭṭhitassa purisapuggalassa vigatathinamiddhatā hoti parikkamanāya, uddhatassa purisapuggalassa anuddhaccaṃ hoti parikkamanāya, vicikicchissa purisapuggalassa tiṇṇavicikicchatā hoti parikkamanāya, kodhanassa purisapuggalassa akkodho hoti parikkamanāya, upanāhissa purisapuggalassa anupanāho hoti parikkamanāya, makkhissa purisapuggalassa amakkho hoti parikkamanāya, paḷāsissa purisapuggalassa apaḷāso hoti parikkamanāya , issukissa purisapuggalassa anissukitā hoti parikkamanāya, maccharissa purisapuggalassa amacchariyaṃ hoti parikkamanāya, saṭhassa purisapuggalassa asāṭheyyaṃ hoti parikkamanāya, māyāvissa purisapuggalassa amāyā 14 hoti parikkamanāya, thaddhassa purisapuggalassa atthaddhiyaṃ hoti parikkamanāya, atimānissa purisapuggalassa anatimāno hoti parikkamanāya, dubbacassa purisapuggalassa sovacassatā hoti parikkamanāya, pāpamittassa purisapuggalassa kalyāṇamittatā hoti parikkamanāya, pamattassa purisapuggalassa appamādo hoti parikkamanāya, assaddhassa purisapuggalassa saddhā hoti parikkamanāya, ahirikassa purisapuggalassa hirī hoti parikkamanāya, anottāpissa purisapuggalassa ottappaṃ hoti parikkamanāya, appassutassa purisapuggalassa bāhusaccaṃ hoti parikkamanāya, kusītassa purisapuggalassa vīriyārambho hoti parikkamanāya, muṭṭhassatissa purisapuggalassa upaṭṭhitassatitā hoti parikkamanāya, duppaññassa purisapuggalassa paññāsampadā hoti parikkamanāya , sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsianādhānaggāhi-suppaṭinissaggitā hoti parikkamanāya.
86. ‘‘ஸெய்யதா²பி, சுந்த³, யே கேசி அகுஸலா த⁴ம்மா ஸப்³பே³ தே அதோ⁴பா⁴க³ங்க³மனீயா 15, யே கேசி குஸலா த⁴ம்மா ஸப்³பே³ தே உபரிபா⁴க³ங்க³மனீயா 16, ஏவமேவ கோ², சுந்த³, விஹிங்ஸகஸ்ஸ புரிஸபுக்³க³லஸ்ஸ அவிஹிங்ஸா ஹோதி உபரிபா⁴கா³ய 17, பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி உபரிபா⁴கா³ய…பே॰… ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸி-அனாதா⁴னக்³கா³ஹி-ஸுப்படினிஸ்ஸக்³கி³தா ஹோதி உபரிபா⁴கா³ய.
86. ‘‘Seyyathāpi, cunda, ye keci akusalā dhammā sabbe te adhobhāgaṅgamanīyā 18, ye keci kusalā dhammā sabbe te uparibhāgaṅgamanīyā 19, evameva kho, cunda, vihiṃsakassa purisapuggalassa avihiṃsā hoti uparibhāgāya 20, pāṇātipātissa purisapuggalassa pāṇātipātā veramaṇī hoti uparibhāgāya…pe… sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti uparibhāgāya.
87. ‘‘ஸோ வத, சுந்த³, அத்தனா பலிபபலிபன்னோ பரங் பலிபபலிபன்னங் உத்³த⁴ரிஸ்ஸதீதி நேதங் டா²னங் விஜ்ஜதி. ஸோ வத, சுந்த³, அத்தனா அபலிபபலிபன்னோ பரங் பலிபபலிபன்னங் உத்³த⁴ரிஸ்ஸதீதி டா²னமேதங் விஜ்ஜதி. ஸோ வத, சுந்த³, அத்தனா அத³ந்தோ அவினீதோ அபரினிப்³பு³தோ பரங் த³மெஸ்ஸதி வினெஸ்ஸதி பரினிப்³பா³பெஸ்ஸதீதி நேதங் டா²னங் விஜ்ஜதி. ஸோ வத , சுந்த³, அத்தனா த³ந்தோ வினீதோ பரினிப்³பு³தோ பரங் த³மெஸ்ஸதி வினெஸ்ஸதி பரினிப்³பா³பெஸ்ஸதீதி டா²னமேதங் விஜ்ஜதி. ஏவமேவ கோ², சுந்த³, விஹிங்ஸகஸ்ஸ புரிஸபுக்³க³லஸ்ஸ அவிஹிங்ஸா ஹோதி பரினிப்³பா³னாய, பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி பரினிப்³பா³னாய. அதி³ன்னாதா³யிஸ்ஸ புரிஸபுக்³க³லஸ்ஸ அதி³ன்னாதா³னா வேரமணீ ஹோதி பரினிப்³பா³னாய. அப்³ரஹ்மசாரிஸ்ஸ புரிஸபுக்³க³லஸ்ஸ அப்³ரஹ்மசரியா வேரமணீ ஹோதி பரினிப்³பா³னாய. முஸாவாதி³ஸ்ஸ புரிஸபுக்³க³லஸ்ஸ முஸாவாதா³ வேரமணீ ஹோதி பரினிப்³பா³னாய. பிஸுணவாசஸ்ஸ புரிஸபுக்³க³லஸ்ஸ பிஸுணாய வாசாய வேரமணீ ஹோதி பரினிப்³பா³னாய. ப²ருஸவாசஸ்ஸ புரிஸபுக்³க³லஸ்ஸ ப²ருஸாய வாசாய வேரமணீ ஹோதி பரினிப்³பா³னாய. ஸம்ப²ப்பலாபிஸ்ஸ புரிஸபுக்³க³லஸ்ஸ ஸம்ப²ப்பலாபா வேரமணீ ஹோதி பரினிப்³பா³னாய. அபி⁴ஜ்ஜா²லுஸ்ஸ புரிஸபுக்³க³லஸ்ஸ அனபி⁴ஜ்ஜா² ஹோதி பரினிப்³பா³னாய. ப்³யாபன்னசித்தஸ்ஸ புரிஸபுக்³க³லஸ்ஸ அப்³யாபாதோ³ ஹோதி பரினிப்³பா³னாய. மிச்சா²தி³ட்டி²ஸ்ஸ புரிஸபுக்³க³லஸ்ஸ ஸம்மாதி³ட்டி² ஹோதி பரினிப்³பா³னாய. மிச்சா²ஸங்கப்பஸ்ஸ புரிஸபுக்³க³லஸ்ஸ ஸம்மாஸங்கப்போ ஹோதி பரினிப்³பா³னாய. மிச்சா²வாசஸ்ஸ புரிஸபுக்³க³லஸ்ஸ ஸம்மாவாசா ஹோதி பரினிப்³பா³னாய. மிச்சா²கம்மந்தஸ்ஸ புரிஸபுக்³க³லஸ்ஸ ஸம்மாகம்மந்தோ ஹோதி பரினிப்³பா³னாய. மிச்சா²ஆஜீவஸ்ஸ புரிஸபுக்³க³லஸ்ஸ ஸம்மாஆஜீவோ ஹோதி பரினிப்³பா³னாய. மிச்சா²வாயாமஸ்ஸ புரிஸபுக்³க³லஸ்ஸ ஸம்மாவாயாமோ ஹோதி பரினிப்³பா³னாய. மிச்சா²ஸதிஸ்ஸ புரிஸபுக்³க³லஸ்ஸ ஸம்மாஸதி ஹோதி பரினிப்³பா³னாய. மிச்சா²ஸமாதி⁴ஸ்ஸ புரிஸபுக்³க³லஸ்ஸ ஸம்மாஸமாதி⁴ ஹோதி பரினிப்³பா³னாய. மிச்சா²ஞாணிஸ்ஸ புரிஸபுக்³க³லஸ்ஸ ஸம்மாஞாணங் ஹோதி பரினிப்³பா³னாய. மிச்சா²விமுத்திஸ்ஸ புரிஸபுக்³க³லஸ்ஸ ஸம்மாவிமுத்தி ஹோதி பரினிப்³பா³னாய.
87. ‘‘So vata, cunda, attanā palipapalipanno paraṃ palipapalipannaṃ uddharissatīti netaṃ ṭhānaṃ vijjati. So vata, cunda, attanā apalipapalipanno paraṃ palipapalipannaṃ uddharissatīti ṭhānametaṃ vijjati. So vata, cunda, attanā adanto avinīto aparinibbuto paraṃ damessati vinessati parinibbāpessatīti netaṃ ṭhānaṃ vijjati. So vata , cunda, attanā danto vinīto parinibbuto paraṃ damessati vinessati parinibbāpessatīti ṭhānametaṃ vijjati. Evameva kho, cunda, vihiṃsakassa purisapuggalassa avihiṃsā hoti parinibbānāya, pāṇātipātissa purisapuggalassa pāṇātipātā veramaṇī hoti parinibbānāya. Adinnādāyissa purisapuggalassa adinnādānā veramaṇī hoti parinibbānāya. Abrahmacārissa purisapuggalassa abrahmacariyā veramaṇī hoti parinibbānāya. Musāvādissa purisapuggalassa musāvādā veramaṇī hoti parinibbānāya. Pisuṇavācassa purisapuggalassa pisuṇāya vācāya veramaṇī hoti parinibbānāya. Pharusavācassa purisapuggalassa pharusāya vācāya veramaṇī hoti parinibbānāya. Samphappalāpissa purisapuggalassa samphappalāpā veramaṇī hoti parinibbānāya. Abhijjhālussa purisapuggalassa anabhijjhā hoti parinibbānāya. Byāpannacittassa purisapuggalassa abyāpādo hoti parinibbānāya. Micchādiṭṭhissa purisapuggalassa sammādiṭṭhi hoti parinibbānāya. Micchāsaṅkappassa purisapuggalassa sammāsaṅkappo hoti parinibbānāya. Micchāvācassa purisapuggalassa sammāvācā hoti parinibbānāya. Micchākammantassa purisapuggalassa sammākammanto hoti parinibbānāya. Micchāājīvassa purisapuggalassa sammāājīvo hoti parinibbānāya. Micchāvāyāmassa purisapuggalassa sammāvāyāmo hoti parinibbānāya. Micchāsatissa purisapuggalassa sammāsati hoti parinibbānāya. Micchāsamādhissa purisapuggalassa sammāsamādhi hoti parinibbānāya. Micchāñāṇissa purisapuggalassa sammāñāṇaṃ hoti parinibbānāya. Micchāvimuttissa purisapuggalassa sammāvimutti hoti parinibbānāya.
‘‘தீ²னமித்³த⁴பரியுட்டி²தஸ்ஸ புரிஸபுக்³க³லஸ்ஸ விக³ததி²னமித்³த⁴தா ஹோதி பரினிப்³பா³னாய. உத்³த⁴தஸ்ஸ புரிஸபுக்³க³லஸ்ஸ அனுத்³த⁴ச்சங் ஹோதி பரினிப்³பா³னாய. விசிகிச்சி²ஸ்ஸ புரிஸபுக்³க³லஸ்ஸ திண்ணவிசிகிச்ச²தா ஹோதி பரினிப்³பா³னாய. கோத⁴னஸ்ஸ புரிஸபுக்³க³லஸ்ஸ அக்கோதோ⁴ ஹோதி பரினிப்³பா³னாய. உபனாஹிஸ்ஸ புரிஸபுக்³க³லஸ்ஸ அனுபனாஹோ ஹோதி பரினிப்³பா³னாய. மக்கி²ஸ்ஸ புரிஸபுக்³க³லஸ்ஸ அமக்கோ² ஹோதி பரினிப்³பா³னாய. பளாஸிஸ்ஸ புரிஸபுக்³க³லஸ்ஸ அபளாஸோ ஹோதி பரினிப்³பா³னாய. இஸ்ஸுகிஸ்ஸ புரிஸபுக்³க³லஸ்ஸ அனிஸ்ஸுகிதா ஹோதி பரினிப்³பா³னாய. மச்ச²ரிஸ்ஸ புரிஸபுக்³க³லஸ்ஸ அமச்ச²ரியங் ஹோதி பரினிப்³பா³னாய. ஸட²ஸ்ஸ புரிஸபுக்³க³லஸ்ஸ அஸாடெ²ய்யங் ஹோதி பரினிப்³பா³னாய. மாயாவிஸ்ஸ புரிஸபுக்³க³லஸ்ஸ அமாயா ஹோதி பரினிப்³பா³னாய. த²த்³த⁴ஸ்ஸ புரிஸபுக்³க³லஸ்ஸ அத்த²த்³தி⁴யங் ஹோதி பரினிப்³பா³னாய. அதிமானிஸ்ஸ புரிஸபுக்³க³லஸ்ஸ அனதிமானோ ஹோதி பரினிப்³பா³னாய. து³ப்³ப³சஸ்ஸ புரிஸபுக்³க³லஸ்ஸ ஸோவசஸ்ஸதா ஹோதி பரினிப்³பா³னாய. பாபமித்தஸ்ஸ புரிஸபுக்³க³லஸ்ஸ கல்யாணமித்ததா ஹோதி பரினிப்³பா³னாய. பமத்தஸ்ஸ புரிஸபுக்³க³லஸ்ஸ அப்பமாதோ³ ஹோதி பரினிப்³பா³னாய. அஸ்ஸத்³த⁴ஸ்ஸ புரிஸபுக்³க³லஸ்ஸ ஸத்³தா⁴ ஹோதி பரினிப்³பா³னாய. அஹிரிகஸ்ஸ புரிஸபுக்³க³லஸ்ஸ ஹிரீ ஹோதி பரினிப்³பா³னாய. அனொத்தாபிஸ்ஸ புரிஸபுக்³க³லஸ்ஸ ஒத்தப்பங் ஹோதி பரினிப்³பா³னாய. அப்பஸ்ஸுதஸ்ஸ புரிஸபுக்³க³லஸ்ஸ பா³ஹுஸச்சங் ஹோதி பரினிப்³பா³னாய. குஸீதஸ்ஸ புரிஸபுக்³க³லஸ்ஸ வீரியாரம்போ⁴ ஹோதி பரினிப்³பா³னாய. முட்ட²ஸ்ஸதிஸ்ஸ புரிஸபுக்³க³லஸ்ஸ உபட்டி²தஸ்ஸதிதா ஹோதி பரினிப்³பா³னாய. து³ப்பஞ்ஞஸ்ஸ புரிஸபுக்³க³லஸ்ஸ பஞ்ஞாஸம்பதா³ ஹோதி பரினிப்³பா³னாய. ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸி-அனாதா⁴னக்³கா³ஹி-ஸுப்படினிஸ்ஸக்³கி³தா ஹோதி பரினிப்³பா³னாய.
‘‘Thīnamiddhapariyuṭṭhitassa purisapuggalassa vigatathinamiddhatā hoti parinibbānāya. Uddhatassa purisapuggalassa anuddhaccaṃ hoti parinibbānāya. Vicikicchissa purisapuggalassa tiṇṇavicikicchatā hoti parinibbānāya. Kodhanassa purisapuggalassa akkodho hoti parinibbānāya. Upanāhissa purisapuggalassa anupanāho hoti parinibbānāya. Makkhissa purisapuggalassa amakkho hoti parinibbānāya. Paḷāsissa purisapuggalassa apaḷāso hoti parinibbānāya. Issukissa purisapuggalassa anissukitā hoti parinibbānāya. Maccharissa purisapuggalassa amacchariyaṃ hoti parinibbānāya. Saṭhassa purisapuggalassa asāṭheyyaṃ hoti parinibbānāya. Māyāvissa purisapuggalassa amāyā hoti parinibbānāya. Thaddhassa purisapuggalassa atthaddhiyaṃ hoti parinibbānāya. Atimānissa purisapuggalassa anatimāno hoti parinibbānāya. Dubbacassa purisapuggalassa sovacassatā hoti parinibbānāya. Pāpamittassa purisapuggalassa kalyāṇamittatā hoti parinibbānāya. Pamattassa purisapuggalassa appamādo hoti parinibbānāya. Assaddhassa purisapuggalassa saddhā hoti parinibbānāya. Ahirikassa purisapuggalassa hirī hoti parinibbānāya. Anottāpissa purisapuggalassa ottappaṃ hoti parinibbānāya. Appassutassa purisapuggalassa bāhusaccaṃ hoti parinibbānāya. Kusītassa purisapuggalassa vīriyārambho hoti parinibbānāya. Muṭṭhassatissa purisapuggalassa upaṭṭhitassatitā hoti parinibbānāya. Duppaññassa purisapuggalassa paññāsampadā hoti parinibbānāya. Sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti parinibbānāya.
88. ‘‘இதி கோ², சுந்த³, தே³ஸிதோ மயா ஸல்லேக²பரியாயோ, தே³ஸிதோ சித்துப்பாத³பரியாயோ, தே³ஸிதோ பரிக்கமனபரியாயோ, தே³ஸிதோ உபரிபா⁴க³பரியாயோ, தே³ஸிதோ பரினிப்³பா³னபரியாயோ. யங் கோ², சுந்த³, ஸத்தா²ரா கரணீயங் ஸாவகானங் ஹிதேஸினா அனுகம்பகேன அனுகம்பங் உபாதா³ய, கதங் வோ தங் மயா. ‘ஏதானி, சுந்த³, ருக்க²மூலானி, ஏதானி ஸுஞ்ஞாகா³ரானி, ஜா²யத², சுந்த³, மா பமாத³த்த², மா பச்சா²விப்படிஸாரினோ அஹுவத்த²’ – அயங் கோ² அம்ஹாகங் அனுஸாஸனீ’’தி.
88. ‘‘Iti kho, cunda, desito mayā sallekhapariyāyo, desito cittuppādapariyāyo, desito parikkamanapariyāyo, desito uparibhāgapariyāyo, desito parinibbānapariyāyo. Yaṃ kho, cunda, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. ‘Etāni, cunda, rukkhamūlāni, etāni suññāgārāni, jhāyatha, cunda, mā pamādattha, mā pacchāvippaṭisārino ahuvattha’ – ayaṃ kho amhākaṃ anusāsanī’’ti.
இத³மவோச ப⁴க³வா. அத்தமனோ ஆயஸ்மா மஹாசுந்தோ³ ப⁴க³வதோ பா⁴ஸிதங் அபி⁴னந்தீ³தி.
Idamavoca bhagavā. Attamano āyasmā mahācundo bhagavato bhāsitaṃ abhinandīti.
சதுத்தாலீஸபதா³ வுத்தா, ஸந்த⁴யோ பஞ்ச தே³ஸிதா;
Catuttālīsapadā vuttā, sandhayo pañca desitā;
ஸல்லேகோ² நாம ஸுத்தந்தோ, க³ம்பீ⁴ரோ ஸாக³ரூபமோதி.
Sallekho nāma suttanto, gambhīro sāgarūpamoti.
ஸல்லேக²ஸுத்தங் நிட்டி²தங் அட்ட²மங்.
Sallekhasuttaṃ niṭṭhitaṃ aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. ஸல்லேக²ஸுத்தவண்ணனா • 8. Sallekhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. ஸல்லேக²ஸுத்தவண்ணனா • 8. Sallekhasuttavaṇṇanā
