| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. ஸல்லேக²ஸுத்தவண்ணனா
8. Sallekhasuttavaṇṇanā
81. ஏவங் மே ஸுதந்தி ஸல்லேக²ஸுத்தங். தத்த² மஹாசுந்தோ³தி தஸ்ஸ தே²ரஸ்ஸ நாமங். ஸாயன்ஹஸமயந்தி ஸாயன்ஹகாலே. படிஸல்லானா வுட்டி²தோதி எத்த² படிஸல்லானந்தி தேஹி தேஹி ஸத்தஸங்கா²ரேஹி படினிவத்தித்வா ஸல்லானங் நிலீயனங், ஏகீபா⁴வோ பவிவேகோதி வுத்தங் ஹோதி. யோ ததோ வுட்டி²தோ, ஸோ படிஸல்லானா வுட்டி²தோ நாம ஹோதி. அயங் பன யஸ்மா படிஸல்லானானங் உத்தமதோ ப²லஸமாபத்திதோ வுட்டா²ஸி, தஸ்மா ‘‘படிஸல்லானா வுட்டி²தோ’’தி வுத்தோ. ப⁴க³வந்தங் அபி⁴வாதெ³த்வாதி ஸமத³ஸனகு²ஜ்ஜலவிபூ⁴ஸிதேன ஸிரஸா ப⁴க³வந்தங் ஸக்கச்சங் வந்தி³த்வா, அபி⁴வாதா³பெத்வா வா ‘‘ஸுகீ² ப⁴வ, சுந்தா³’’தி ஏவங் வசீபே⁴த³ங் காராபெத்வா, ப⁴க³வா பன கிர வந்தி³தோ ஸமானோ ஸுவண்ணது³ந்து³பி⁴ஸதி³ஸங் கீ³வங் பக்³க³ய்ஹ கண்ணஸுக²ங் பேமனியங் அமதாபி⁴ஸேகஸதி³ஸங் ப்³ரஹ்மகோ⁴ஸங் நிச்சா²ரெந்தோ ‘‘ஸுகீ² ஹோஹீ’’தி தஸ்ஸ தஸ்ஸ நாமங் க³ஹெத்வா வத³தி, ஏதங் ஆசிண்ணங் ததா²க³தானங். தத்ரித³ங் ஸாத⁴கஸுத்தங், ‘‘ஸக்கோ, ப⁴ந்தே, தே³வானமிந்தோ³ ஸாமச்சோ ஸபரிஜனோ ப⁴க³வதோ பாதே³ ஸிரஸா வந்த³தீதி, ஸுகீ² ஹோது பஞ்சஸிக² ஸக்கோ தே³வானமிந்தோ³ ஸாமச்சோ ஸபரிஜனோ, ஸுக²காமா ஹி தே³வா மனுஸ்ஸா அஸுரா நாகா³ க³ந்த⁴ப்³பா³, யே சஞ்ஞே ஸந்தி புது²காயா’’தி. ஏவஞ்ச பன ததா²க³தா ஏவரூபே மஹேஸக்கே² யக்கே² அபி⁴வத³ந்தீதி.
81.Evaṃme sutanti sallekhasuttaṃ. Tattha mahācundoti tassa therassa nāmaṃ. Sāyanhasamayanti sāyanhakāle. Paṭisallānā vuṭṭhitoti ettha paṭisallānanti tehi tehi sattasaṅkhārehi paṭinivattitvā sallānaṃ nilīyanaṃ, ekībhāvo pavivekoti vuttaṃ hoti. Yo tato vuṭṭhito, so paṭisallānā vuṭṭhito nāma hoti. Ayaṃ pana yasmā paṭisallānānaṃ uttamato phalasamāpattito vuṭṭhāsi, tasmā ‘‘paṭisallānā vuṭṭhito’’ti vutto. Bhagavantaṃ abhivādetvāti samadasanakhujjalavibhūsitena sirasā bhagavantaṃ sakkaccaṃ vanditvā, abhivādāpetvā vā ‘‘sukhī bhava, cundā’’ti evaṃ vacībhedaṃ kārāpetvā, bhagavā pana kira vandito samāno suvaṇṇadundubhisadisaṃ gīvaṃ paggayha kaṇṇasukhaṃ pemaniyaṃ amatābhisekasadisaṃ brahmaghosaṃ nicchārento ‘‘sukhī hohī’’ti tassa tassa nāmaṃ gahetvā vadati, etaṃ āciṇṇaṃ tathāgatānaṃ. Tatridaṃ sādhakasuttaṃ, ‘‘sakko, bhante, devānamindo sāmacco saparijano bhagavato pāde sirasā vandatīti, sukhī hotu pañcasikha sakko devānamindo sāmacco saparijano, sukhakāmā hi devā manussā asurā nāgā gandhabbā, ye caññe santi puthukāyā’’ti. Evañca pana tathāgatā evarūpe mahesakkhe yakkhe abhivadantīti.
யா இமாதி இதா³னி வத்தப்³பா³பி⁴முக²ங் கரொந்தோ விய ஆஹ. அனேகவிஹிதாதி நானப்பகாரா. தி³ட்டி²யோதி மிச்சா²தி³ட்டி²யோ . லோகே உப்பஜ்ஜந்தீதி ஸத்தேஸு பாதுப⁴வந்தி. அத்தவாத³ப்படிஸங்யுத்தாதி ‘‘ரூபங் அத்ததோ ஸமனுபஸ்ஸதீ’’திஆதி³னயப்பவத்தேன அத்தவாதே³ன படிஸங்யுத்தா, தா வீஸதி ப⁴வந்தி. லோகவாத³ப்படிஸங்யுத்தாதி ‘‘ஸஸ்ஸதோ அத்தா ச லோகோ சா’’திஆதி³னயப்பவத்தேன லோகவாதே³ன படிஸங்யுத்தா, தா அட்ட² ஹொந்தி ஸஸ்ஸதோ, அஸஸ்ஸதோ, ஸஸ்ஸதோ ச அஸஸ்ஸதோ ச, நேவ ஸஸ்ஸதோ நாஸஸ்ஸதோ, அந்தவா, அனந்தவா, அந்தவா ச அனந்தவா ச, நேவந்தவா நானந்தவா அத்தா ச லோகோ சாதி ஏவங் பவத்தத்தா.
Yā imāti idāni vattabbābhimukhaṃ karonto viya āha. Anekavihitāti nānappakārā. Diṭṭhiyoti micchādiṭṭhiyo . Loke uppajjantīti sattesu pātubhavanti. Attavādappaṭisaṃyuttāti ‘‘rūpaṃ attato samanupassatī’’tiādinayappavattena attavādena paṭisaṃyuttā, tā vīsati bhavanti. Lokavādappaṭisaṃyuttāti ‘‘sassato attā ca loko cā’’tiādinayappavattena lokavādena paṭisaṃyuttā, tā aṭṭha honti sassato, asassato, sassato ca asassato ca, neva sassato nāsassato, antavā, anantavā, antavā ca anantavā ca, nevantavā nānantavā attā ca loko cāti evaṃ pavattattā.
ஆதி³மேவாதிஆதீ³ஸு அயமத்தோ² கிங் நு கோ² ப⁴ந்தே ஆதி³மேவ மனஸிகரொந்தஸ்ஸ அப்பத்வாபி ஸோதாபத்திமக்³க³ங் விபஸ்ஸனாமிஸ்ஸகபட²மமனஸிகாரமேவ மனஸிகரொந்தஸ்ஸ பி⁴க்கு²னோ ஏவமேதாஸங் எத்தகேனேவ உபாயேன ஏதாஸங் தி³ட்டீ²னங் பஹானஞ்ச படினிஸ்ஸக்³கோ³ ச ஹோதீதி. இத³ஞ்ச தே²ரோ அத்தனா அனதி⁴மானிகோபி ஸமானோ அதி⁴மானிகானங் அதி⁴மானப்பஹானத்த²ங் அதி⁴மானிகோ விய ஹுத்வா புச்ச²தீதி வேதி³தப்³போ³. அபரே பனாஹு ‘‘தே²ரஸ்ஸ அந்தேவாஸிகா ஆதி³மனஸிகாரேனேவ தி³ட்டீ²னங் ஸமுச்சே²த³ப்பஹானங் ஹோதீதி ஏவங்ஸஞ்ஞினோபி, ஸமாபத்திவிஹாரா ஸல்லேக²விஹாராதி ஏவங்ஸஞ்ஞினோபி அத்தி². ஸோ தேஸங் அத்தா²ய ப⁴க³வந்தங் புச்ச²தீ’’தி.
Ādimevātiādīsu ayamattho kiṃ nu kho bhante ādimeva manasikarontassa appatvāpi sotāpattimaggaṃ vipassanāmissakapaṭhamamanasikārameva manasikarontassa bhikkhuno evametāsaṃ ettakeneva upāyena etāsaṃ diṭṭhīnaṃ pahānañca paṭinissaggo ca hotīti. Idañca thero attanā anadhimānikopi samāno adhimānikānaṃ adhimānappahānatthaṃ adhimāniko viya hutvā pucchatīti veditabbo. Apare panāhu ‘‘therassa antevāsikā ādimanasikāreneva diṭṭhīnaṃ samucchedappahānaṃ hotīti evaṃsaññinopi, samāpattivihārā sallekhavihārāti evaṃsaññinopi atthi. So tesaṃ atthāya bhagavantaṃ pucchatī’’ti.
82. அத²ஸ்ஸ ப⁴க³வா தாஸங் தி³ட்டீ²னங் பஹானூபாயங் த³ஸ்ஸெந்தோ யா இமாதிஆதி³மாஹ. தத்த² யத்த² சேதா தி³ட்டி²யோ உப்பஜ்ஜந்தீதிஆதி³ பஞ்சக்க²ந்தே⁴ ஸந்தா⁴ய வுத்தங். ஏதேஸு ஹி ஏதா தி³ட்டி²யோ உப்பஜ்ஜந்தி. யதா²ஹ ‘‘ரூபே கோ², பி⁴க்க²வே, ஸதி ரூபங் அபி⁴னிவிஸ்ஸ ஏவங் தி³ட்டி² உப்பஜ்ஜதி, ஸோ அத்தா ஸோ லோகோ ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’’தி (ஸங்॰ நி॰ 3.152) வித்தா²ரோ. ஆரம்மணவஸேன பன ஏகவசனங் கத்வா யத்த² சாதி ஆஹ, யஸ்மிங் ஆரம்மணே உப்பஜ்ஜந்தீதி வுத்தங் ஹோதி. எத்த² ச உப்பஜ்ஜந்தி அனுஸெந்தி ஸமுதா³சரந்தீதி இமேஸங் ஏவங் நானாகரணங் வேதி³தப்³ப³ங். ஜாதிவஸேன ஹி அஜாதா ஜாயமானா உப்பஜ்ஜந்தீதி வுச்சந்தி. புனப்புனங் ஆஸேவிதா தா²மக³தா அப்படிவினீதா அனுஸெந்தீதி. காயவசீத்³வாரங் ஸம்பத்தா ஸமுதா³சரந்தீதி, இத³மேதேஸங் நானாகரணங். தங் நேதங் மமாதிஆதீ³ஸு தங் பஞ்சக்க²ந்த⁴ப்பபே⁴த³ங் ஆரம்மணமேதங் மய்ஹங் ந ஹோதி, அஹம்பி ஏஸோ ந அஸ்மி, ஏஸோ மே அத்தாபி ந ஹோதீதி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோதி ஏவங் தாவ பத³த்தோ² வேதி³தப்³போ³.
82. Athassa bhagavā tāsaṃ diṭṭhīnaṃ pahānūpāyaṃ dassento yā imātiādimāha. Tattha yattha cetā diṭṭhiyo uppajjantītiādi pañcakkhandhe sandhāya vuttaṃ. Etesu hi etā diṭṭhiyo uppajjanti. Yathāha ‘‘rūpe kho, bhikkhave, sati rūpaṃ abhinivissa evaṃ diṭṭhi uppajjati, so attā so loko so pecca bhavissāmi nicco dhuvo sassato avipariṇāmadhammo’’ti (saṃ. ni. 3.152) vitthāro. Ārammaṇavasena pana ekavacanaṃ katvā yattha cāti āha, yasmiṃ ārammaṇe uppajjantīti vuttaṃ hoti. Ettha ca uppajjanti anusenti samudācarantīti imesaṃ evaṃ nānākaraṇaṃ veditabbaṃ. Jātivasena hi ajātā jāyamānā uppajjantīti vuccanti. Punappunaṃ āsevitā thāmagatā appaṭivinītā anusentīti. Kāyavacīdvāraṃ sampattā samudācarantīti, idametesaṃ nānākaraṇaṃ. Taṃ netaṃ mamātiādīsu taṃ pañcakkhandhappabhedaṃ ārammaṇametaṃ mayhaṃ na hoti, ahampi eso na asmi, eso me attāpi na hotīti evametaṃ yathābhūtaṃ sammappaññāya passatoti evaṃ tāva padattho veditabbo.
யஸ்மா பன எத்த² ஏதங் மமாதி தண்ஹாகா³ஹோ, தஞ்ச க³ண்ஹந்தோ அட்ட²ஸததண்ஹாவிசரிதப்பபே⁴த³ங் தண்ஹாபபஞ்சங் க³ண்ஹாதி. ஏஸோஹமஸ்மீதி மானகா³ஹோ, தஞ்ச க³ண்ஹந்தோ நவப்பபே⁴த³ங் மானபபஞ்சங் க³ண்ஹாதி. ஏஸோ மே அத்தாதி தி³ட்டி²கா³ஹோ, தஞ்ச க³ண்ஹந்தோ த்³வாஸட்டி²தி³ட்டி²க³தப்பபே⁴த³ங் தி³ட்டி²பபஞ்சங் க³ண்ஹாதி. தஸ்மா நேதங் மமாதி வத³ந்தோ ப⁴க³வா யதா²வுத்தப்பபே⁴த³ங் தண்ஹாபபஞ்சங் படிக்கி²பதி. நேஸோஹமஸ்மீதி மானபபஞ்சங். ந மேஸோ அத்தாதி தி³ட்டி²பபஞ்சங். தி³ட்டே²கட்டா²யேவ செத்த² தண்ஹாமானா வேதி³தப்³பா³. ஏவமேதந்தி ஏவங் ‘‘நேதங் மமா’’திஆதி³னா ஆகாரேன ஏதங் க²ந்த⁴பஞ்சகங். யதா²பூ⁴தந்தி யதா² ஸபா⁴வங், யதா² அத்தீ²தி வுத்தங் ஹோதி. க²ந்த⁴பஞ்சகஞ்ஹி ஏதேனேவ ஆகாரேன அத்தி². மமந்திஆதி³னா பன க³ய்ஹமானம்பி தேனாகாரேன நேவத்தீ²தி அதி⁴ப்பாயோ. ஸம்மப்பஞ்ஞாய பஸ்ஸதோதி ஸோதாபத்திமக்³க³பஞ்ஞாபரியோஸானாய விபஸ்ஸனாபஞ்ஞாய ஸுட்டு² பஸ்ஸந்தஸ்ஸ. ஏவமேதாஸந்தி ஏதேன உபாயேன ஏதாஸங். பஹானங் படினிஸ்ஸக்³கோ³தி உப⁴யம்பேதங் ஸமுச்சே²த³ப்பஹானஸ்ஸேவாதி⁴வசனங்.
Yasmā pana ettha etaṃ mamāti taṇhāgāho, tañca gaṇhanto aṭṭhasatataṇhāvicaritappabhedaṃ taṇhāpapañcaṃ gaṇhāti. Esohamasmīti mānagāho, tañca gaṇhanto navappabhedaṃ mānapapañcaṃ gaṇhāti. Eso me attāti diṭṭhigāho, tañca gaṇhanto dvāsaṭṭhidiṭṭhigatappabhedaṃ diṭṭhipapañcaṃ gaṇhāti. Tasmā netaṃ mamāti vadanto bhagavā yathāvuttappabhedaṃ taṇhāpapañcaṃ paṭikkhipati. Nesohamasmīti mānapapañcaṃ. Na meso attāti diṭṭhipapañcaṃ. Diṭṭhekaṭṭhāyeva cettha taṇhāmānā veditabbā. Evametanti evaṃ ‘‘netaṃ mamā’’tiādinā ākārena etaṃ khandhapañcakaṃ. Yathābhūtanti yathā sabhāvaṃ, yathā atthīti vuttaṃ hoti. Khandhapañcakañhi eteneva ākārena atthi. Mamantiādinā pana gayhamānampi tenākārena nevatthīti adhippāyo. Sammappaññāya passatoti sotāpattimaggapaññāpariyosānāya vipassanāpaññāya suṭṭhu passantassa. Evametāsanti etena upāyena etāsaṃ. Pahānaṃ paṭinissaggoti ubhayampetaṃ samucchedappahānassevādhivacanaṃ.
ஏவங் ப⁴க³வா ஆதி³மனஸிகாரேனேவ தி³ட்டீ²னங் பஹானங் ஹோதி நு கோ² நோதி ஆயஸ்மதா மஹாசுந்தே³ன அதி⁴மானிகானங் வஸேன பஞ்ஹங் புட்டோ² ஸோதாபத்திமக்³கே³ன தி³ட்டி²ப்பஹானங் த³ஸ்ஸெத்வா இதா³னி ஸயமேவ அதி⁴மானிகானங் ஜா²னங் விப⁴ஜந்தோ டா²னங் கோ² பனேதந்திஆதி³மாஹ. தத்த² அதி⁴மானிகா நாம யேஸங் அப்பத்தே பத்தஸஞ்ஞாய அதி⁴மானோ உப்பஜ்ஜதி, ஸ்வாயங் உப்பஜ்ஜமானோ நேவ லோகவட்டானுஸாரீனங் பா³லபுது²ஜ்ஜனானங் உப்பஜ்ஜதி, ந அரியஸாவகானங். ந ஹி ஸோதாபன்னஸ்ஸ ‘‘ஸகதா³கா³மீ அஹ’’ந்தி அதி⁴மானோ உப்பஜ்ஜதி, ந ஸகதா³கா³மிஸ்ஸ ‘‘அனாகா³மீ அஹ’’ந்தி, ந அனாகா³மினோ ‘‘அரஹா அஹ’’ந்தி, காரகஸ்ஸேவ பன ஸமத²வஸேன வா விபஸ்ஸனாவஸேன வா விக்க²ம்பி⁴தகிலேஸஸ்ஸ நிச்சங் யுத்தபயுத்தஸ்ஸ ஆரத்³த⁴விபஸ்ஸகஸ்ஸ உப்பஜ்ஜதி. தஸ்ஸ ஹி ஸமத²விக்க²ம்பி⁴தானங் வா விபஸ்ஸனாவிக்க²ம்பி⁴தானங் வா கிலேஸானங் ஸமுதா³சாரங் அபஸ்ஸதோ ‘‘ஸோதாபன்னோ அஹந்தி வா, ஸகதா³கா³மீ, அனாகா³மீ , அரஹா அஹ’’ந்தி வா அதி⁴மானோ உப்பஜ்ஜதி, தலங்க³ரதிஸ்ஸபப்³ப³தவாஸித⁴ம்மதி³ன்னத்தே²ரேன ஓவாதி³யமானத்தே²ரானங் விய.
Evaṃ bhagavā ādimanasikāreneva diṭṭhīnaṃ pahānaṃ hoti nu kho noti āyasmatā mahācundena adhimānikānaṃ vasena pañhaṃ puṭṭho sotāpattimaggena diṭṭhippahānaṃ dassetvā idāni sayameva adhimānikānaṃ jhānaṃ vibhajanto ṭhānaṃ kho panetantiādimāha. Tattha adhimānikā nāma yesaṃ appatte pattasaññāya adhimāno uppajjati, svāyaṃ uppajjamāno neva lokavaṭṭānusārīnaṃ bālaputhujjanānaṃ uppajjati, na ariyasāvakānaṃ. Na hi sotāpannassa ‘‘sakadāgāmī aha’’nti adhimāno uppajjati, na sakadāgāmissa ‘‘anāgāmī aha’’nti, na anāgāmino ‘‘arahā aha’’nti, kārakasseva pana samathavasena vā vipassanāvasena vā vikkhambhitakilesassa niccaṃ yuttapayuttassa āraddhavipassakassa uppajjati. Tassa hi samathavikkhambhitānaṃ vā vipassanāvikkhambhitānaṃ vā kilesānaṃ samudācāraṃ apassato ‘‘sotāpanno ahanti vā, sakadāgāmī, anāgāmī , arahā aha’’nti vā adhimāno uppajjati, talaṅgaratissapabbatavāsidhammadinnattherena ovādiyamānattherānaṃ viya.
தே²ரஸ்ஸ கிர அசிரூபஸம்பன்னஸ்ஸேவ ஓவாதே³ ட²த்வா ப³ஹூ பி⁴க்கூ² விஸேஸங் அதி⁴க³ச்சி²ங்ஸு. தங் பவத்திங் ஸுத்வா திஸ்ஸமஹாவிஹாரவாஸீ பி⁴க்கு²ஸங்கோ⁴ ‘‘ந அட்டா²னநியோஜகோ தே²ரோதி தே²ரங் ஆனேதா²’’தி ஸம்ப³ஹுலே பி⁴க்கூ² பாஹேஸி. தே க³ந்த்வா, ‘‘ஆவுஸோ, த⁴ம்மதி³ன்ன பி⁴க்கு²ஸங்கோ⁴ தங் பக்கோஸாபேதீ’’தி ஆஹங்ஸு. ஸோ ஆஹ ‘‘கிங் பன தும்ஹே, ப⁴ந்தே, அத்தானங் க³வேஸத² பர’’ந்தி? அத்தானங் ஸப்புரிஸாதி, ஸோ தேஸங் கம்மட்டா²னமதா³ஸி, ஸப்³பே³வ அரஹத்தங் பாபுணிங்ஸு. பி⁴க்கு²ஸங்கோ⁴ புன அஞ்ஞே பி⁴க்கூ² பாஹேஸி, ஏவங் யாவததியங் பஹிதா ஸப்³பே³பி தத்தே²வ அரஹத்தங் பத்வா விஹரிங்ஸு.
Therassa kira acirūpasampannasseva ovāde ṭhatvā bahū bhikkhū visesaṃ adhigacchiṃsu. Taṃ pavattiṃ sutvā tissamahāvihāravāsī bhikkhusaṅgho ‘‘na aṭṭhānaniyojako theroti theraṃ ānethā’’ti sambahule bhikkhū pāhesi. Te gantvā, ‘‘āvuso, dhammadinna bhikkhusaṅgho taṃ pakkosāpetī’’ti āhaṃsu. So āha ‘‘kiṃ pana tumhe, bhante, attānaṃ gavesatha para’’nti? Attānaṃ sappurisāti, so tesaṃ kammaṭṭhānamadāsi, sabbeva arahattaṃ pāpuṇiṃsu. Bhikkhusaṅgho puna aññe bhikkhū pāhesi, evaṃ yāvatatiyaṃ pahitā sabbepi tattheva arahattaṃ patvā vihariṃsu.
ததோ ஸங்கோ⁴ க³தக³தா நாக³ச்ச²ந்தீதி அஞ்ஞதரங் வுட்³ட⁴பப்³ப³ஜிதங் பாஹேஸி. ஸோ க³ந்த்வா ச, ‘‘ப⁴ந்தே, த⁴ம்மதி³ன்ன திக்க²த்துங் திஸ்ஸமஹாவிஹாரவாஸீ பி⁴க்கு²ஸங்கோ⁴ துய்ஹங் ஸந்திகே பேஸேஸி, த்வங் நாம ஸங்க⁴ஸ்ஸ ஆணங் க³ருங் ந கரோஸி, நாக³ச்ச²ஸீ’’தி ஆஹ. தே²ரோ கிமேதந்தி பண்ணஸாலங் அப்பவிஸித்வாவ பத்தசீவரங் கா³ஹாபெத்வா தாவதே³வ நிக்க²மி, ஸோ அந்தராமக்³கே³ ஹங்கனவிஹாரங் பாவிஸி. தத்த² சேகோ மஹாதே²ரோ ஸட்டி²வஸ்ஸாதீதோ அதி⁴மானேன அரஹத்தங் படிஜானாதி. தே²ரோ தங் உபஸங்கமித்வா வந்தி³த்வா படிஸந்தா²ரங் கத்வா அதி⁴க³மங் புச்சி². தே²ரோ ஆஹ ‘‘ஆம த⁴ம்மதி³ன்ன, யங் பப்³ப³ஜிதேன காதப்³ப³ங், சிரகதங் தங் மயா, அதீதஸட்டி²வஸ்ஸொம்ஹி ஏதரஹீ’’தி. கிங், ப⁴ந்தே, இத்³தி⁴ம்பி வளஞ்ஜேதா²தி. ஆம த⁴ம்மதி³ன்னாதி. ஸாது⁴ வத, ப⁴ந்தே, ஹத்தி²ங் தும்ஹாகங் படிமுக²ங் ஆக³ச்ச²ந்தங் மாபேதா²தி. ஸாதா⁴வுஸோதி தே²ரோ ஸப்³ப³ஸேதங் ஸத்தப்பதிட்ட²ங் திதா⁴பபி⁴ன்னங் நங்கு³ட்ட²ங் பீ³ஜயமானங் ஸொண்ட³ங் முகே² பக்கி²பித்வா த்³வீஹி த³ந்தேஹி விஜ்ஜி²துகாமங் விய படிமுக²ங் ஆக³ச்ச²ந்தங் மஹாஹத்தி²ங் மாபேஸி. ஸோ தங் அத்தனாயேவ மாபிதங் ஹத்தி²ங் தி³ஸ்வா பீ⁴தோ பலாயிதுங் ஆரபி⁴. ததா³வ அத்தானங் ‘‘நாஹங் அரஹா’’தி ஞத்வா த⁴ம்மதி³ன்னஸ்ஸ பாத³மூலே உக்குடிகங் நிஸீதி³த்வா ‘‘பதிட்டா² மே ஹோஹி, ஆவுஸோ’’தி ஆஹ. த⁴ம்மதி³ன்னோ ‘‘மா, ப⁴ந்தே, ஸோசி, மா அனத்தமனோ அஹோஸி, காரகானங்யேவ அதி⁴மானோ உப்பஜ்ஜதீ’’தி தே²ரங் ஸமஸ்ஸாஸெத்வா கம்மட்டா²னமதா³ஸி. தே²ரோ தஸ்ஸோவாதே³ ட²த்வா அரஹத்தங் பாபுணி.
Tato saṅgho gatagatā nāgacchantīti aññataraṃ vuḍḍhapabbajitaṃ pāhesi. So gantvā ca, ‘‘bhante, dhammadinna tikkhattuṃ tissamahāvihāravāsī bhikkhusaṅgho tuyhaṃ santike pesesi, tvaṃ nāma saṅghassa āṇaṃ garuṃ na karosi, nāgacchasī’’ti āha. Thero kimetanti paṇṇasālaṃ appavisitvāva pattacīvaraṃ gāhāpetvā tāvadeva nikkhami, so antarāmagge haṅkanavihāraṃ pāvisi. Tattha ceko mahāthero saṭṭhivassātīto adhimānena arahattaṃ paṭijānāti. Thero taṃ upasaṅkamitvā vanditvā paṭisanthāraṃ katvā adhigamaṃ pucchi. Thero āha ‘‘āma dhammadinna, yaṃ pabbajitena kātabbaṃ, cirakataṃ taṃ mayā, atītasaṭṭhivassomhi etarahī’’ti. Kiṃ, bhante, iddhimpi vaḷañjethāti. Āma dhammadinnāti. Sādhu vata, bhante, hatthiṃ tumhākaṃ paṭimukhaṃ āgacchantaṃ māpethāti. Sādhāvusoti thero sabbasetaṃ sattappatiṭṭhaṃ tidhāpabhinnaṃ naṅguṭṭhaṃ bījayamānaṃ soṇḍaṃ mukhe pakkhipitvā dvīhi dantehi vijjhitukāmaṃ viya paṭimukhaṃ āgacchantaṃ mahāhatthiṃ māpesi. So taṃ attanāyeva māpitaṃ hatthiṃ disvā bhīto palāyituṃ ārabhi. Tadāva attānaṃ ‘‘nāhaṃ arahā’’ti ñatvā dhammadinnassa pādamūle ukkuṭikaṃ nisīditvā ‘‘patiṭṭhā me hohi, āvuso’’ti āha. Dhammadinno ‘‘mā, bhante, soci, mā anattamano ahosi, kārakānaṃyeva adhimāno uppajjatī’’ti theraṃ samassāsetvā kammaṭṭhānamadāsi. Thero tassovāde ṭhatvā arahattaṃ pāpuṇi.
சித்தலபப்³ப³தேபி தாதி³ஸோவ தே²ரோ வஸதி. த⁴ம்மதி³ன்னோ தம்பி உபஸங்கமித்வா ததே²வ புச்சி². ஸோபி ததே²வ ப்³யாகாஸி. ததோ நங் த⁴ம்மதி³ன்னோ கிங், ப⁴ந்தே, இத்³தி⁴ம்பி வளஞ்ஜேதா²தி ஆஹ. ஆமாவுஸோதி. ஸாது⁴ வத, ப⁴ந்தே, ஏகங் பொக்க²ரணிங் மாபேதா²தி. தே²ரோ மாபேஸி. எத்த², ப⁴ந்தே, பது³மகு³ம்ப³ங் மாபேதா²தி. தம்பி மாபேஸி. பது³மகு³ம்பே³ மஹாபது³மங் மாபேதா²தி. தம்பி மாபேஸி. ஏதஸ்மிங் பது³மகு³ம்பே³ ட²த்வா மது⁴ரஸ்ஸரேன கா³யந்தங் நச்சந்தஞ்ச ஏகங் இத்தி²விக்³க³ஹங் மாபேதா²தி. தம்பி மாபேஸி. ஸோ ஏதங், ப⁴ந்தே, புனப்புனங் உபனிஜ்ஜா²யதா²தி வத்வா ஸயங் பாஸாத³ங் பாவிஸி. தே²ரஸ்ஸ தங் உபனிஜ்ஜா²யதோ ஸட்டி²வஸ்ஸானி விக்க²ம்பி⁴தகிலேஸா சலிங்ஸு, ஸோ ததா³ அத்தானங் ஞத்வா புரிமத்தே²ரோ விய த⁴ம்மதி³ன்னத்தே²ரஸ்ஸ ஸந்திகே கம்மட்டா²னங் க³ஹெத்வா அரஹத்தங் பாபுணி.
Cittalapabbatepi tādisova thero vasati. Dhammadinno tampi upasaṅkamitvā tatheva pucchi. Sopi tatheva byākāsi. Tato naṃ dhammadinno kiṃ, bhante, iddhimpi vaḷañjethāti āha. Āmāvusoti. Sādhu vata, bhante, ekaṃ pokkharaṇiṃ māpethāti. Thero māpesi. Ettha, bhante, padumagumbaṃ māpethāti. Tampi māpesi. Padumagumbe mahāpadumaṃ māpethāti. Tampi māpesi. Etasmiṃ padumagumbe ṭhatvā madhurassarena gāyantaṃ naccantañca ekaṃ itthiviggahaṃ māpethāti. Tampi māpesi. So etaṃ, bhante, punappunaṃ upanijjhāyathāti vatvā sayaṃ pāsādaṃ pāvisi. Therassa taṃ upanijjhāyato saṭṭhivassāni vikkhambhitakilesā caliṃsu, so tadā attānaṃ ñatvā purimatthero viya dhammadinnattherassa santike kammaṭṭhānaṃ gahetvā arahattaṃ pāpuṇi.
த⁴ம்மதி³ன்னோபி அனுபுப்³பே³ன திஸ்ஸமஹாவிஹாரங் அக³மாஸி. தஸ்மிஞ்ச ஸமயே தே²ரா சேதியங்க³ணங் ஸம்மஜ்ஜித்வா பு³த்³தா⁴ரம்மணங் பீதிங் உப்பாதெ³த்வா நிஸின்னா ஹொந்தி, ஏதங் கிர தேஸங் வத்தங். தேன நேஸங் ஏகோபி ‘‘இத⁴ பத்தசீவரங் ட²பேஹீ’’தி த⁴ம்மதி³ன்னங் வத்தா புச்சி²தாபி நாஹோஸி. த⁴ம்மதி³ன்னோ ஏஸோ ப⁴வெய்யாதி ஞத்வா பன பஞ்ஹங் புச்சி²ங்ஸு. ஸோ புச்சி²தபஞ்ஹே திண்ஹேன அஸினா குமுத³னாளகலாபங் விய சி²ந்தி³த்வா பாத³ங்கு³லியா மஹாபத²விங் பஹரி. ப⁴ந்தே அயங் அசேதனா மஹாபத²வீபி த⁴ம்மதி³ன்னஸ்ஸ கு³ணங் ஜானாதி. தும்ஹே பன ந ஜானித்தா²தி ச வத்வா இமங் கா³த²மாஹ –
Dhammadinnopi anupubbena tissamahāvihāraṃ agamāsi. Tasmiñca samaye therā cetiyaṅgaṇaṃ sammajjitvā buddhārammaṇaṃ pītiṃ uppādetvā nisinnā honti, etaṃ kira tesaṃ vattaṃ. Tena nesaṃ ekopi ‘‘idha pattacīvaraṃ ṭhapehī’’ti dhammadinnaṃ vattā pucchitāpi nāhosi. Dhammadinno eso bhaveyyāti ñatvā pana pañhaṃ pucchiṃsu. So pucchitapañhe tiṇhena asinā kumudanāḷakalāpaṃ viya chinditvā pādaṅguliyā mahāpathaviṃ pahari. Bhante ayaṃ acetanā mahāpathavīpi dhammadinnassa guṇaṃ jānāti. Tumhe pana na jānitthāti ca vatvā imaṃ gāthamāha –
‘‘அசேதனாயங் பத²வீ, விஜானாதி கு³ணாகு³ணங்;
‘‘Acetanāyaṃ pathavī, vijānāti guṇāguṇaṃ;
ஸசேதனாத² கோ² ப⁴ந்தே, ந ஜானாத² கு³ணாகு³ண’’ந்தி.
Sacetanātha kho bhante, na jānātha guṇāguṇa’’nti.
தாவதே³வ ச ஆகாஸே அப்³பு⁴க்³க³ந்த்வா தலங்க³ரதிஸ்ஸபப்³ப³தமேவ அக³மாஸி. ஏவங் காரகஸ்ஸேவ அதி⁴மானோ உப்பஜ்ஜதி. தஸ்மா ப⁴க³வா தாதி³ஸானங் பி⁴க்கூ²னங் வஸேன ஜா²னங் விப⁴ஜந்தோ டா²னங் கோ² பனேதந்திஆதி³மாஹ.
Tāvadeva ca ākāse abbhuggantvā talaṅgaratissapabbatameva agamāsi. Evaṃ kārakasseva adhimāno uppajjati. Tasmā bhagavā tādisānaṃ bhikkhūnaṃ vasena jhānaṃ vibhajanto ṭhānaṃ kho panetantiādimāha.
தஸ்ஸத்தோ², அத்தே²தங் காரணங், நோ நத்தி². யேன இதே⁴கச்சோ பி⁴க்கு² பா³ஹிரபரிப்³பா³ஜகேஹி ஸாதா⁴ரணங் விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரெய்ய, யங் பன தஸ்ஸ ஏவமஸ்ஸ ஸல்லேகே²ன விஹராமீதி, யங் படிபத்திவிதா⁴னங் கிலேஸே ஸங்லிக²தி, தேனாஹங் விஹராமீதி, தங் ந யுஜ்ஜதி, ந ஹி அதி⁴மானிகஸ்ஸ பி⁴க்கு²னோ ஜா²னங் ஸல்லேகோ² வா ஸல்லேக²படிபதா³ வா ஹோதி. கஸ்மா? அவிபஸ்ஸனாபாத³கத்தா. ந ஹி ஸோ ஜா²னங் ஸமாபஜ்ஜித்வா ததோ வுட்டா²ய ஸங்கா²ரே ஸம்மஸதி, ஜா²னங் பனஸ்ஸ சித்தேகக்³க³மத்தங் கரோதி, தி³ட்ட²த⁴ம்மஸுக²விஹாரோ ஹோதி. தஸ்மா தமத்த²ங் த³ஸ்ஸெந்தோ ப⁴க³வா ‘‘ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி, தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தீ’’தி ஆஹ.
Tassattho, atthetaṃ kāraṇaṃ, no natthi. Yena idhekacco bhikkhu bāhiraparibbājakehi sādhāraṇaṃ vivicceva kāmehi…pe… paṭhamaṃ jhānaṃ upasampajja vihareyya, yaṃ pana tassa evamassa sallekhena viharāmīti, yaṃ paṭipattividhānaṃ kilese saṃlikhati, tenāhaṃ viharāmīti, taṃ na yujjati, na hi adhimānikassa bhikkhuno jhānaṃ sallekho vā sallekhapaṭipadā vā hoti. Kasmā? Avipassanāpādakattā. Na hi so jhānaṃ samāpajjitvā tato vuṭṭhāya saṅkhāre sammasati, jhānaṃ panassa cittekaggamattaṃ karoti, diṭṭhadhammasukhavihāro hoti. Tasmā tamatthaṃ dassento bhagavā ‘‘na kho panete, cunda, ariyassa vinaye sallekhā vuccanti, diṭṭhadhammasukhavihārā ete ariyassa vinaye vuccantī’’ti āha.
தத்த² ஏதேதி ஜா²னத⁴ம்மவஸேன ப³ஹுவசனங் வேதி³தப்³ப³ங், ஏதே பட²மஜ்ஜா²னத⁴ம்மாதி வுத்தங் ஹோதி. ஸமாபத்திவஸேன வா, ஏகம்பி ஹி பட²மஜ்ஜா²னங் புனப்புனங் ஸமாபத்திவஸேன பவத்தத்தா ப³ஹுத்தங் க³ச்ச²தி. ஆரம்மணவஸேன வா, ஏகம்பி ஹி பட²மஜ்ஜா²னங் பத²வீகஸிணாதீ³ஸு பவத்திவஸேன ப³ஹுத்தங் க³ச்ச²தீதி. ஏஸ நயோ து³தியததியசதுத்த²ஜ்ஜா²னேஸு. ஆருப்பஜா²னேஸு பன ஆரம்மணபே⁴தா³பா⁴வதோ புரிமகாரணத்³வயவஸேனேவ ப³ஹுவசனங் வேதி³தப்³ப³ங்.
Tattha eteti jhānadhammavasena bahuvacanaṃ veditabbaṃ, ete paṭhamajjhānadhammāti vuttaṃ hoti. Samāpattivasena vā, ekampi hi paṭhamajjhānaṃ punappunaṃ samāpattivasena pavattattā bahuttaṃ gacchati. Ārammaṇavasena vā, ekampi hi paṭhamajjhānaṃ pathavīkasiṇādīsu pavattivasena bahuttaṃ gacchatīti. Esa nayo dutiyatatiyacatutthajjhānesu. Āruppajhānesu pana ārammaṇabhedābhāvato purimakāraṇadvayavaseneva bahuvacanaṃ veditabbaṃ.
யஸ்மா சேதேஸங் அங்கா³னிபி ஸந்தானி ஆரம்மணானிபி, நிப்³பு³தானி சேவ ஸுகு²மானி சாதி வுத்தங் ஹோதி, தஸ்மா தானி ஸந்தா ஏதே விஹாராதி ஏவங் வுத்தானீதி வேதி³தப்³பா³னி. அயங் தாவ தேஸங் சதுன்னம்பி ஸாதா⁴ரணா வண்ணனா. விஸேஸவண்ணனா பன ‘‘ஸப்³ப³ஸோ ரூபஸஞ்ஞான’’ந்திஆதி³பதா³னுஸாரதோ வத்தப்³பா³ ஸியா. ஸா விஸுத்³தி⁴மக்³கே³ ஸப்³பா³காரேன வுத்தாயேவ.
Yasmā cetesaṃ aṅgānipi santāni ārammaṇānipi, nibbutāni ceva sukhumāni cāti vuttaṃ hoti, tasmā tāni santā ete vihārāti evaṃ vuttānīti veditabbāni. Ayaṃ tāva tesaṃ catunnampi sādhāraṇā vaṇṇanā. Visesavaṇṇanā pana ‘‘sabbaso rūpasaññāna’’ntiādipadānusārato vattabbā siyā. Sā visuddhimagge sabbākārena vuttāyeva.
83. ஏவங் யஸ்மா அதி⁴மானிகஸ்ஸ பி⁴க்கு²னோ ஜா²னவிஹாரோ அவிபஸ்ஸனாபாத³கத்தா ஸல்லேக²விஹாரோ ந ஹோதி, ந ஹி ஸோ ஜா²னங் ஸமாபஜ்ஜித்வா ததோ வுட்டா²ய ஸங்கா²ரே ஸம்மஸதி, சித்தேகக்³க³கரோ தி³ட்ட²த⁴ம்மே ஸுக²விஹாரோ பனஸ்ஸ ஹோதி, தஸ்மா தமத்த²ங் த³ஸ்ஸெந்தோ ரூபஜ்ஜா²னானி ச அரூபஜ்ஜா²னானி ச விப⁴ஜித்வா இதா³னி ச யத்த² ஸல்லேகோ² காதப்³போ³ சதுசத்தாலீஸாய ஆகாரேஹி, தஞ்ச வத்து²ங் தஞ்ச ஸல்லேக²ங் த³ஸ்ஸெந்தோ இத⁴ கோ² பன வோதிஆதி³மாஹ.
83. Evaṃ yasmā adhimānikassa bhikkhuno jhānavihāro avipassanāpādakattā sallekhavihāro na hoti, na hi so jhānaṃ samāpajjitvā tato vuṭṭhāya saṅkhāre sammasati, cittekaggakaro diṭṭhadhamme sukhavihāro panassa hoti, tasmā tamatthaṃ dassento rūpajjhānāni ca arūpajjhānāni ca vibhajitvā idāni ca yattha sallekho kātabbo catucattālīsāya ākārehi, tañca vatthuṃ tañca sallekhaṃ dassento idha kho pana votiādimāha.
கஸ்மா பன ‘‘அட்ட²ஹி ஸமாபத்தீஹி அவிஹிங்ஸாத³யோ ஸல்லேகா²’’தி வுத்தா? லோகுத்தரபாத³கத்தா. பா³ஹிரகானஞ்ஹி அட்ட² ஸமாபத்தியோ வட்டபாத³காயேவ. ஸாஸனே ஸரணக³மனம்பி லோகுத்தரபாத³கங், பகே³வ அவிஹிங்ஸாத³யோ. இமினாயேவ ச ஸுத்தேன வேதி³தப்³ப³ங் ‘‘யதா² பா³ஹிரகஸ்ஸ அட்ட²ஸமாபத்திலாபி⁴னோ பஞ்சாபி⁴ஞ்ஞஸ்ஸாபி தி³ன்னதா³னதோ ஸாஸனே திஸரணக³தஸ்ஸ தி³ன்னதா³னங் மஹப்ப²லதரங் ஹோதீ’’தி. இத³ஞ்ஹி ஸந்தா⁴ய த³க்கி²ணாவிஸுத்³தி⁴ஸுத்தே ‘‘பா³ஹிரகே காமேஸு வீதராகே³ தா³னங் த³த்வா கோடிஸதஸஹஸ்ஸகு³ணா பாடிகங்கி²தப்³பா³. ஸோதாபத்திப²லஸச்சி²கிரியாய படிபன்னே தா³னங் த³த்வா அஸங்கெ²ய்யா அப்பமெய்யா த³க்கி²ணா பாடிகங்கி²தப்³பா³, கோ பன வாதோ³ ஸோதாபன்னே’’தி வுத்தங் (ம॰ நி॰ 3.379). ஸரணக³மனதோ பட்டா²ய ஹி தத்த² ஸோதாபத்திப²லஸச்சி²கிரியாய படிபன்னோ அதி⁴ப்பேதோதி, அயங் தாவெத்த² பாளியோஜனா.
Kasmā pana ‘‘aṭṭhahi samāpattīhi avihiṃsādayo sallekhā’’ti vuttā? Lokuttarapādakattā. Bāhirakānañhi aṭṭha samāpattiyo vaṭṭapādakāyeva. Sāsane saraṇagamanampi lokuttarapādakaṃ, pageva avihiṃsādayo. Imināyeva ca suttena veditabbaṃ ‘‘yathā bāhirakassa aṭṭhasamāpattilābhino pañcābhiññassāpi dinnadānato sāsane tisaraṇagatassa dinnadānaṃ mahapphalataraṃ hotī’’ti. Idañhi sandhāya dakkhiṇāvisuddhisutte ‘‘bāhirake kāmesu vītarāge dānaṃ datvā koṭisatasahassaguṇā pāṭikaṅkhitabbā. Sotāpattiphalasacchikiriyāya paṭipanne dānaṃ datvā asaṅkheyyā appameyyā dakkhiṇā pāṭikaṅkhitabbā, ko pana vādo sotāpanne’’ti vuttaṃ (ma. ni. 3.379). Saraṇagamanato paṭṭhāya hi tattha sotāpattiphalasacchikiriyāya paṭipanno adhippetoti, ayaṃ tāvettha pāḷiyojanā.
அனுபத³வண்ணனாயங் பன இதா⁴தி விஹிங்ஸாதி³வத்து²தீ³பனமேதங். கோ² பனாதி நிபாதமத்தங். வோதி கரணத்தே² ஸாமிவசனங், அயங் பன ஸங்கே²பத்தோ², யதே³தங் ‘‘பரே விஹிங்ஸகா ப⁴விஸ்ஸந்தீ’’திஆதி³னா நயேன விஹிங்ஸாதி³வத்து²ங் வதா³ம. இத⁴, சுந்த³, தும்ஹேஹி ஸல்லேகோ² காதப்³போ³தி.
Anupadavaṇṇanāyaṃ pana idhāti vihiṃsādivatthudīpanametaṃ. Kho panāti nipātamattaṃ. Voti karaṇatthe sāmivacanaṃ, ayaṃ pana saṅkhepattho, yadetaṃ ‘‘pare vihiṃsakā bhavissantī’’tiādinā nayena vihiṃsādivatthuṃ vadāma. Idha, cunda, tumhehi sallekho kātabboti.
ஏவங் ஸங்கே²பதோ வத்வா இதா³னி வித்தா²ரெந்தோ ‘‘பரே விஹிங்ஸகா ப⁴விஸ்ஸந்தி, மயமெத்த² அவிஹிங்ஸகா ப⁴விஸ்ஸாமாதி ஸல்லேகோ² கரணீயோ’’திஆதி³மாஹ.
Evaṃ saṅkhepato vatvā idāni vitthārento ‘‘pare vihiṃsakā bhavissanti, mayamettha avihiṃsakā bhavissāmāti sallekho karaṇīyo’’tiādimāha.
தத்த² பரேதி யே கேசி இமங் ஸல்லேக²மனநுயுத்தா. விஹிங்ஸகா ப⁴விஸ்ஸந்தீதி பாணினா வா லெட்³டு³னா வாதிஆதீ³ஹி ஸத்தானங் விஹேஸகா ப⁴விஸ்ஸந்தி. மயமெத்த² அவிஹிங்ஸகா ப⁴விஸ்ஸாமாதி மயங் பன யத்தே²வ வத்து²ஸ்மிங் பரே ஏவங் விஹிங்ஸகா ப⁴விஸ்ஸந்தி, எத்தே²வ அவிஹிங்ஸகா ப⁴விஸ்ஸாம, அவிஹிங்ஸங் உப்பாதெ³த்வா விஹரிஸ்ஸாம. இதி ஸல்லேகோ² கரணீயோதி ஏவங் தும்ஹேஹி ஸல்லேகோ² காதப்³போ³ . ஸல்லேகோ²தி ச இத⁴ அவிஹிங்ஸாவ வேதி³தப்³பா³. அவிஹிங்ஸா ஹி விஹிங்ஸங் ஸல்லேக²தி, தங் சி²ந்த³தி, தஸ்மா ஸல்லேகோ²தி வுச்சதி. ஏஸ நயோ ஸப்³ப³த்த². அயங் பன விஸேஸோ. பரே மிச்சா²தி³ட்டீ²தி எத்த² கம்மபதா²னங் அந்தமிச்சா²தி³ட்டி²ஞ்ச மிச்ச²த்தானங் ஆதி³மிச்சா²தி³ட்டி²ஞ்ச மிஸ்ஸெத்வா தி³ட்டி² வுத்தாதி வேதி³தப்³பா³. ததா² மயமெத்த² ஸம்மாதி³ட்டீ²தி வுத்தட்டா²னே ஸம்மாதி³ட்டி². எத்த² ச கம்மபத²கதா² வித்தா²ரதோ ஸம்மாதி³ட்டி²ஸுத்தே ஆவி ப⁴விஸ்ஸதி. மிச்ச²த்தேஸு மிச்சா²தி³ட்டி²ஆத³யோ த்³வேதா⁴விதக்கே.
Tattha pareti ye keci imaṃ sallekhamananuyuttā. Vihiṃsakā bhavissantīti pāṇinā vā leḍḍunā vātiādīhi sattānaṃ vihesakā bhavissanti. Mayamettha avihiṃsakā bhavissāmāti mayaṃ pana yattheva vatthusmiṃ pare evaṃ vihiṃsakā bhavissanti, ettheva avihiṃsakā bhavissāma, avihiṃsaṃ uppādetvā viharissāma. Iti sallekho karaṇīyoti evaṃ tumhehi sallekho kātabbo . Sallekhoti ca idha avihiṃsāva veditabbā. Avihiṃsā hi vihiṃsaṃ sallekhati, taṃ chindati, tasmā sallekhoti vuccati. Esa nayo sabbattha. Ayaṃ pana viseso. Pare micchādiṭṭhīti ettha kammapathānaṃ antamicchādiṭṭhiñca micchattānaṃ ādimicchādiṭṭhiñca missetvā diṭṭhi vuttāti veditabbā. Tathā mayamettha sammādiṭṭhīti vuttaṭṭhāne sammādiṭṭhi. Ettha ca kammapathakathā vitthārato sammādiṭṭhisutte āvi bhavissati. Micchattesu micchādiṭṭhiādayo dvedhāvitakke.
அயங் பனெத்த² ஸங்கே²போ, பாணங் அதிபாதெந்தீதி பாணாதிபாதீ பாணகா⁴தகாதி அத்தோ². அதி³ன்னங் ஆதி³யந்தீதி அதி³ன்னாதா³யீ, பரஸ்ஸ ஹாரினோதி அத்தோ². அப்³ரஹ்மங் ஹீனங் லாமகத⁴ம்மங் சரந்தீதி அப்³ரஹ்மசாரீ, மேது²னத⁴ம்மப்படிஸேவகாதி அத்தோ². ப்³ரஹ்மங் ஸெட்ட²ங் படிபத³ங் சரந்தீதி ப்³ரஹ்மசாரீ, மேது²னா படிவிரதாதி அத்தோ². எத்த² ச ப்³ரஹ்மசரியங் ஸல்லேகோ²தி வேதி³தப்³ப³ங். ப்³ரஹ்மசரியஞ்ஹி அப்³ரஹ்மசரியங் ஸல்லேக²தி. முஸா வத³ந்தீதி முஸாவாதீ³, பரேஸங் அத்த²ப⁴ஞ்ஜனகங் துச்ச²ங் அலிகங் வாசங் பா⁴ஸிதாரோதி அத்தோ². பிஸுணா வாசா ஏதேஸந்தி பிஸுணவாசா. பரேஸங் மம்மச்சே²தி³கா ப²ருஸா வாசா ஏதேஸந்தி ப²ருஸவாசா. ஸம்ப²ங் நிரத்த²கவசனங் பலபந்தீதி ஸம்ப²ப்பலாபீ. அபி⁴ஜ்ஜா²யந்தீதி அபி⁴ஜ்ஜா²லூ, பரப⁴ண்ட³லுப்³ப⁴னஸீலாதி அத்தோ². ப்³யாபன்னங் பூதிபூ⁴தங் சித்தமேதேஸந்தி ப்³யாபன்னசித்தா. மிச்சா² பாபிகா விஞ்ஞுக³ரஹிதா ஏதேஸங் தி³ட்டீ²தி மிச்சா²தி³ட்டீ², கம்மபத²பரியாபன்னாய நத்தி² தி³ன்னந்திஆதி³வத்து²காய, மிச்ச²த்தபரியாபன்னாய அனிய்யானிகதி³ட்டி²யா ச ஸமன்னாக³தாதி அத்தோ². ஸம்மா ஸோப⁴னா விஞ்ஞுப்பஸத்தா² ஏதேஸங் தி³ட்டீ²தி ஸம்மாதி³ட்டீ², கம்மபத²பரியாபன்னாய அத்தி² தி³ன்னந்திஆதி³காய கம்மஸ்ஸகதாதி³ட்டி²யா, ஸம்மத்தபரியாபன்னாய மக்³க³தி³ட்டி²யா ச ஸமன்னாக³தாதி அத்தோ².
Ayaṃ panettha saṅkhepo, pāṇaṃ atipātentīti pāṇātipātī pāṇaghātakāti attho. Adinnaṃ ādiyantīti adinnādāyī, parassa hārinoti attho. Abrahmaṃ hīnaṃ lāmakadhammaṃ carantīti abrahmacārī, methunadhammappaṭisevakāti attho. Brahmaṃ seṭṭhaṃ paṭipadaṃ carantīti brahmacārī, methunā paṭiviratāti attho. Ettha ca brahmacariyaṃ sallekhoti veditabbaṃ. Brahmacariyañhi abrahmacariyaṃ sallekhati. Musā vadantīti musāvādī, paresaṃ atthabhañjanakaṃ tucchaṃ alikaṃ vācaṃ bhāsitāroti attho. Pisuṇā vācā etesanti pisuṇavācā. Paresaṃ mammacchedikā pharusā vācā etesanti pharusavācā. Samphaṃ niratthakavacanaṃ palapantīti samphappalāpī. Abhijjhāyantīti abhijjhālū, parabhaṇḍalubbhanasīlāti attho. Byāpannaṃ pūtibhūtaṃ cittametesanti byāpannacittā. Micchā pāpikā viññugarahitā etesaṃ diṭṭhīti micchādiṭṭhī, kammapathapariyāpannāya natthi dinnantiādivatthukāya, micchattapariyāpannāya aniyyānikadiṭṭhiyā ca samannāgatāti attho. Sammā sobhanā viññuppasatthā etesaṃ diṭṭhīti sammādiṭṭhī, kammapathapariyāpannāya atthi dinnantiādikāya kammassakatādiṭṭhiyā, sammattapariyāpannāya maggadiṭṭhiyā ca samannāgatāti attho.
மிச்சா²ஸங்கப்பாதி அயாதா²வஅனிய்யானிகஅகுஸலஸங்கப்பா. ஏஸ நயோ மிச்சா²வாசாதிஆதீ³ஸு. அயங் பன விஸேஸோ, மிச்சா²ஸங்கப்பாத³யோ விய ஹி மிச்சா²ஸதி நாம பாடிஏக்கோ கோசி த⁴ம்மோ நத்தி², அதீதங் பன சிந்தயதோ பவத்தானங் சதுன்னம்பி அகுஸலக்க²ந்தா⁴னமேதங் அதி⁴வசனங். யம்பி வுத்தங் ப⁴க³வதா – ‘‘அத்தே²ஸா, பி⁴க்க²வே, அனுஸ்ஸதி, நேஸா நத்தீ²தி வதா³மி, புத்தலாப⁴ங் வா, பி⁴க்க²வே, அனுஸ்ஸரதோ, த⁴னலாப⁴ங் வா, பி⁴க்க²வே, அனுஸ்ஸரதோ, யஸலாப⁴ங் வா, பி⁴க்க²வே, அனுஸ்ஸரதோ’’தி, தம்பி தங் தங் சிந்தெந்தஸ்ஸ ஸதிபதிரூபகேன உப்பத்திங் ஸந்தா⁴ய வுத்தந்தி வேதி³தப்³ப³ங் . மிச்சா²ஞாணீதி எத்த² ச மிச்சா²ஞாணந்தி பாபகிரியாஸு உபாயசிந்தாவஸேன பாபங் கத்வா ‘‘ஸுகதங் மயா’’தி பச்சவெக்க²ணாகாரேன ச உப்பன்னோ மோஹோ வேதி³தப்³போ³, தேன ஸமன்னாக³தா புக்³க³லா மிச்சா²ஞாணீ. ஸம்மாஞாணீதி எத்த² பன ஏகூனவீஸதிபே⁴த³ங் பச்சவெக்க²ணாஞாணங் ‘‘ஸம்மாஞாண’’ந்தி வுச்சதி, தேன ஸமன்னாக³தா புக்³க³லா ஸம்மாஞாணீ. மிச்சா²விமுத்தீதி அவிமுத்தாயேவ ஸமானா ‘‘விமுத்தா மய’’ந்தி ஏவங்ஸஞ்ஞினோ, அவிமுத்தியங் வா விமுத்திஸஞ்ஞினோ. தத்ராயங் வசனத்தோ², மிச்சா² பாபிகா விபரீதா விமுத்தி ஏதேஸங் அத்தீ²தி மிச்சா²விமுத்தீ. மிச்சா²விமுத்தீதி ச யதா²வுத்தேனாகாரேன பவத்தானங் அகுஸலக்க²ந்தா⁴னமேதங் அதி⁴வசனங். ப²லஸம்பயுத்தானி பன ஸம்மாதி³ட்டி²ஆதீ³னி அட்ட²ங்கா³னி ட²பெத்வா ஸேஸத⁴ம்மா ஸம்மாவிமுத்தீதி வேதி³தப்³பா³. ஸா ச மிச்சா²விமுத்திங் ஸல்லிகி²த்வா டி²தத்தா ஸல்லேகோ²தி வேதி³தப்³பா³. தத்த² நியோஜெந்தோ ஆஹ ‘‘மயமெத்த² ஸம்மாவிமுத்தீ ப⁴விஸ்ஸாமாதி ஸல்லேகோ² கரணீயோ’’தி.
Micchāsaṅkappāti ayāthāvaaniyyānikaakusalasaṅkappā. Esa nayo micchāvācātiādīsu. Ayaṃ pana viseso, micchāsaṅkappādayo viya hi micchāsati nāma pāṭiekko koci dhammo natthi, atītaṃ pana cintayato pavattānaṃ catunnampi akusalakkhandhānametaṃ adhivacanaṃ. Yampi vuttaṃ bhagavatā – ‘‘atthesā, bhikkhave, anussati, nesā natthīti vadāmi, puttalābhaṃ vā, bhikkhave, anussarato, dhanalābhaṃ vā, bhikkhave, anussarato, yasalābhaṃ vā, bhikkhave, anussarato’’ti, tampi taṃ taṃ cintentassa satipatirūpakena uppattiṃ sandhāya vuttanti veditabbaṃ . Micchāñāṇīti ettha ca micchāñāṇanti pāpakiriyāsu upāyacintāvasena pāpaṃ katvā ‘‘sukataṃ mayā’’ti paccavekkhaṇākārena ca uppanno moho veditabbo, tena samannāgatā puggalā micchāñāṇī. Sammāñāṇīti ettha pana ekūnavīsatibhedaṃ paccavekkhaṇāñāṇaṃ ‘‘sammāñāṇa’’nti vuccati, tena samannāgatā puggalā sammāñāṇī. Micchāvimuttīti avimuttāyeva samānā ‘‘vimuttā maya’’nti evaṃsaññino, avimuttiyaṃ vā vimuttisaññino. Tatrāyaṃ vacanattho, micchā pāpikā viparītā vimutti etesaṃ atthīti micchāvimuttī. Micchāvimuttīti ca yathāvuttenākārena pavattānaṃ akusalakkhandhānametaṃ adhivacanaṃ. Phalasampayuttāni pana sammādiṭṭhiādīni aṭṭhaṅgāni ṭhapetvā sesadhammā sammāvimuttīti veditabbā. Sā ca micchāvimuttiṃ sallikhitvā ṭhitattā sallekhoti veditabbā. Tattha niyojento āha ‘‘mayamettha sammāvimuttī bhavissāmāti sallekho karaṇīyo’’ti.
இதோ பரானி தீணி நீவரணவஸேன வுத்தானி. அபி⁴ஜ்ஜா²லூ ப்³யாபன்னசித்தாதி ஏவங் கம்மபதே²ஸு வுத்தத்தா பனெத்த² பட²மானி த்³வே நீவரணானி ந வுத்தானீதி வேதி³தப்³பா³னி. தத்த² தி²னமித்³தே⁴ன பரியுட்டி²தா அபி⁴பூ⁴தாதி தி²னமித்³த⁴பரியுட்டி²தா. உத்³த⁴ச்சேன ஸமன்னாக³தாதி உத்³த⁴தா. விசினந்தா கிச்ச²ந்தி ந ஸக்கொந்தி ஸன்னிட்டா²னங் காதுந்தி விசிகிச்சீ². கோத⁴னாதிஆதீ³னி த³ஸ சித்தஸ்ஸ உபக்கிலேஸவஸேன வுத்தானி. தத்த² கோதா⁴தீ³ஸு யங் வத்தப்³ப³ங் ஸியா, தங் ஸப்³ப³ங் த⁴ம்மதா³யாத³வத்த²ஸுத்தேஸு வுத்தங். அயங் பனெத்த² வசனத்தோ² – கோத⁴னாதி குஜ்ஜ²னஸீலா. உபனாஹீதி உபனாஹனஸீலா, உபனாஹோ வா ஏதேஸங் அத்தீ²தி உபனாஹீ. ததா² மக்கீ² பலாஸீ ச. இஸ்ஸந்தீதி இஸ்ஸுகீ. மச்ச²ராயந்தீதி மச்ச²ரீ, மச்சே²ரங் வா ஏதேஸங் அத்தீ²தி மச்ச²ரீ. ஸட²யந்தீதி ஸடா², ந ஸம்மா பா⁴ஸந்தீதி வுத்தங் ஹோதி, கேராடிகயுத்தானமேதங் அதி⁴வசனங். மாயா ஏதேஸங் அத்தீ²தி மாயாவீ. த²ம்ப⁴ஸமங்கி³தாய த²த்³தா⁴. அதிமானயோகே³ன அதிமானீ. வுத்தபச்சனீகனயேன ஸுக்கபக்கோ² வேதி³தப்³போ³.
Ito parāni tīṇi nīvaraṇavasena vuttāni. Abhijjhālū byāpannacittāti evaṃ kammapathesu vuttattā panettha paṭhamāni dve nīvaraṇāni na vuttānīti veditabbāni. Tattha thinamiddhena pariyuṭṭhitā abhibhūtāti thinamiddhapariyuṭṭhitā. Uddhaccena samannāgatāti uddhatā. Vicinantā kicchanti na sakkonti sanniṭṭhānaṃ kātunti vicikicchī. Kodhanātiādīni dasa cittassa upakkilesavasena vuttāni. Tattha kodhādīsu yaṃ vattabbaṃ siyā, taṃ sabbaṃ dhammadāyādavatthasuttesu vuttaṃ. Ayaṃ panettha vacanattho – kodhanāti kujjhanasīlā. Upanāhīti upanāhanasīlā, upanāho vā etesaṃ atthīti upanāhī. Tathā makkhī palāsī ca. Issantīti issukī. Maccharāyantīti maccharī, maccheraṃ vā etesaṃ atthīti maccharī. Saṭhayantīti saṭhā, na sammā bhāsantīti vuttaṃ hoti, kerāṭikayuttānametaṃ adhivacanaṃ. Māyā etesaṃ atthīti māyāvī. Thambhasamaṅgitāya thaddhā. Atimānayogena atimānī. Vuttapaccanīkanayena sukkapakkho veditabbo.
து³ப்³ப³சாதி வத்துங் து³க்கா² கிஞ்சி வுச்சமானா ந ஸஹந்தி. தப்³பி³பரீதா ஸுவசா. தே³வத³த்தாதி³ஸதி³ஸா பாபகா மித்தா ஏதேஸந்தி பாபமித்தா. பு³த்³தா⁴ வா ஸாரிபுத்தாதி³ஸதி³ஸா வா கல்யாணா மித்தா ஏதேஸந்தி கல்யாணமித்தா. காயது³ச்சரிதாதீ³ஸு சித்தவொஸ்ஸக்³க³வஸேன பமத்தா. விபரீதா அப்பமத்தாதி வேதி³தப்³பா³. இமானி தீணி பகிண்ணகவஸேன வுத்தானி. அஸ்ஸத்³தா⁴திஆதீ³னி ஸத்த அஸத்³த⁴ம்மவஸேன. தத்த² தீஸு வத்தூ²ஸு ஸத்³தா⁴ ஏதேஸங் நத்தீ²தி அஸ்ஸத்³தா⁴. ஸுக்கபக்கே² ஸத்³த³ஹந்தீதி ஸத்³தா⁴, ஸத்³தா⁴ வா ஏதேஸங் அத்தீ²திபி ஸத்³தா⁴. நத்தி² ஏதேஸங் ஹிரீதி அஹிரிகா, அகுஸலஸமாபத்தியா அஜிகு³ச்ச²மானானமேதங் அதி⁴வசனங். ஹிரீ ஏதேஸங் மனே, ஹிரியா வா யுத்தமனாதி ஹிரிமனா. ந ஒத்தப்பந்தீதி அனொத்தப்பீ, அகுஸலஸமாபத்தியா ந பா⁴யந்தீதி வுத்தங் ஹோதி. தப்³பி³பரீதா ஒத்தப்பீ. அப்பங் ஸுதமேதேஸந்தி அப்பஸ்ஸுதா, அப்பந்தி ச தோ²கந்தி ந க³ஹேதப்³ப³ங், நத்தீ²தி க³ஹேதப்³ப³ங். ‘‘அப்பஸ்ஸுதா’’தி ஹி நிஸ்ஸுதா ஸுதவிரஹிதா வுச்சந்தி. ப³ஹு ஸுதமேதேஸந்தி ப³ஹுஸ்ஸுதா, ததா²க³தபா⁴ஸிதங் ஏகம்பி கா³த²ங் யாதா²வதோ ஞத்வா அனுரூபபடிபன்னானமேதங் அதி⁴வசனங். குச்சி²தா ஸீத³ந்தீதி குஸீதா, ஹீனவீரியானமேதங் அதி⁴வசனங். ஆரத்³த⁴ங் வீரியமேதேஸந்தி ஆரத்³த⁴வீரியா, ஸம்மப்பதா⁴னயுத்தானமேதங் அதி⁴வசனங், முட்டா² ஸதி ஏதேஸந்தி முட்ட²ஸ்ஸதீ, நட்ட²ஸ்ஸதீதி வுத்தங் ஹோதி. உபட்டி²தா ஸதி ஏதேஸந்தி உபட்டி²தஸ்ஸதீ, நிச்சங் ஆரம்மணாபி⁴முக²ப்பவத்தஸதீனமேதங் அதி⁴வசனங். து³ட்டா² பஞ்ஞா ஏதேஸந்தி து³ப்பஞ்ஞா, நட்ட²பஞ்ஞாதி வுத்தங் ஹோதி. பஞ்ஞாய ஸம்பன்னாதி பஞ்ஞாஸம்பன்னா, பஞ்ஞாதி ச இத⁴ விபஸ்ஸனாபஞ்ஞா வேதி³தப்³பா³. விபஸ்ஸனாஸம்பா⁴ரோ ஹி பரிபூரோ இமஸ்மிங் டா²னே ஆக³தோ, தஸ்மா விபஸ்ஸனாபஞ்ஞாவ அயந்தி போராணானங் ஆணா.
Dubbacāti vattuṃ dukkhā kiñci vuccamānā na sahanti. Tabbiparītā suvacā. Devadattādisadisā pāpakā mittā etesanti pāpamittā. Buddhā vā sāriputtādisadisā vā kalyāṇā mittā etesanti kalyāṇamittā. Kāyaduccaritādīsu cittavossaggavasena pamattā. Viparītā appamattāti veditabbā. Imāni tīṇi pakiṇṇakavasena vuttāni. Assaddhātiādīni satta asaddhammavasena. Tattha tīsu vatthūsu saddhā etesaṃ natthīti assaddhā. Sukkapakkhe saddahantīti saddhā, saddhā vā etesaṃ atthītipi saddhā. Natthi etesaṃ hirīti ahirikā, akusalasamāpattiyā ajigucchamānānametaṃ adhivacanaṃ. Hirī etesaṃ mane, hiriyā vā yuttamanāti hirimanā. Na ottappantīti anottappī, akusalasamāpattiyā na bhāyantīti vuttaṃ hoti. Tabbiparītā ottappī. Appaṃ sutametesanti appassutā, appanti ca thokanti na gahetabbaṃ, natthīti gahetabbaṃ. ‘‘Appassutā’’ti hi nissutā sutavirahitā vuccanti. Bahu sutametesanti bahussutā, tathāgatabhāsitaṃ ekampi gāthaṃ yāthāvato ñatvā anurūpapaṭipannānametaṃ adhivacanaṃ. Kucchitā sīdantīti kusītā, hīnavīriyānametaṃ adhivacanaṃ. Āraddhaṃ vīriyametesanti āraddhavīriyā, sammappadhānayuttānametaṃ adhivacanaṃ, muṭṭhā sati etesanti muṭṭhassatī, naṭṭhassatīti vuttaṃ hoti. Upaṭṭhitā sati etesanti upaṭṭhitassatī, niccaṃ ārammaṇābhimukhappavattasatīnametaṃ adhivacanaṃ. Duṭṭhā paññā etesanti duppaññā, naṭṭhapaññāti vuttaṃ hoti. Paññāya sampannāti paññāsampannā, paññāti ca idha vipassanāpaññā veditabbā. Vipassanāsambhāro hi paripūro imasmiṃ ṭhāne āgato, tasmā vipassanāpaññāva ayanti porāṇānaṃ āṇā.
இதா³னி ஏகமேவ லோகுத்தரகு³ணானங் அந்தராயகரங் அனிய்யானிகதி³ட்டி²ங் தீஹாகாரேஹி த³ஸ்ஸெந்தோ ஸந்தி³ட்டி²பராமாஸீதிஆதி³மாஹ. தத்த² ஸந்தி³ட்டி²ங் பராமஸந்தீதி ஸந்தி³ட்டி²பராமாஸீ. ஆதா⁴னங் க³ண்ஹந்தீதி ஆதா⁴னக்³கா³ஹீ, ஆதா⁴னந்தி த³ள்ஹங் வுச்சதி, த³ள்ஹக்³கா³ஹீதி அத்தோ². யுத்தகாரணங் தி³ஸ்வாவ லத்³தி⁴ங் படினிஸ்ஸஜ்ஜந்தீதி படினிஸ்ஸக்³கீ³, து³க்கே²ன கிச்சே²ன கஸிரேன ப³ஹும்பி காரணங் த³ஸ்ஸெத்வா ந ஸக்கா படினிஸ்ஸக்³க³ங் காதுந்தி து³ப்படினிஸ்ஸக்³கீ³, யே அத்தனோ உப்பன்னங் தி³ட்டி²ங் இத³மேவ ஸச்சந்தி த³ள்ஹங் க³ண்ஹித்வா அபி பு³த்³தா⁴தீ³ஹி காரணங் த³ஸ்ஸெத்வா வுச்சமானா ந படினிஸ்ஸஜ்ஜந்தி, தேஸமேதங் அதி⁴வசனங். தாதி³ஸா ஹி புக்³க³லா யங் யதே³வ த⁴ம்மங் வா அத⁴ம்மங் வா க³ண்ஹந்தி, தங் ஸப்³ப³ங் ‘‘ஏவங் அம்ஹாகங் ஆசரியேஹி கதி²தங், ஏவங் அம்ஹேஹி ஸுத’’ந்தி கும்மோவ அங்கா³னி ஸகே கபாலே அந்தோயேவ ஸமோத³ஹந்தி, கும்பீ⁴லக்³கா³ஹங் க³ண்ஹந்தி ந விஸ்ஸஜ்ஜந்தி. வுத்தவிபரியாயேன ஸுக்கபக்கோ² வேதி³தப்³போ³.
Idāni ekameva lokuttaraguṇānaṃ antarāyakaraṃ aniyyānikadiṭṭhiṃ tīhākārehi dassento sandiṭṭhiparāmāsītiādimāha. Tattha sandiṭṭhiṃ parāmasantīti sandiṭṭhiparāmāsī. Ādhānaṃ gaṇhantīti ādhānaggāhī, ādhānanti daḷhaṃ vuccati, daḷhaggāhīti attho. Yuttakāraṇaṃ disvāva laddhiṃ paṭinissajjantīti paṭinissaggī, dukkhena kicchena kasirena bahumpi kāraṇaṃ dassetvā na sakkā paṭinissaggaṃ kātunti duppaṭinissaggī, ye attano uppannaṃ diṭṭhiṃ idameva saccanti daḷhaṃ gaṇhitvā api buddhādīhi kāraṇaṃ dassetvā vuccamānā na paṭinissajjanti, tesametaṃ adhivacanaṃ. Tādisā hi puggalā yaṃ yadeva dhammaṃ vā adhammaṃ vā gaṇhanti, taṃ sabbaṃ ‘‘evaṃ amhākaṃ ācariyehi kathitaṃ, evaṃ amhehi suta’’nti kummova aṅgāni sake kapāle antoyeva samodahanti, kumbhīlaggāhaṃ gaṇhanti na vissajjanti. Vuttavipariyāyena sukkapakkho veditabbo.
84. ஏவங் சதுசத்தாலீஸாய ஆகாரேஹி ஸல்லேக²ங் த³ஸ்ஸெத்வா இதா³னி தஸ்மிங் ஸல்லேகே² சித்துப்பாத³ஸ்ஸாபி ப³ஹூபகாரதங் த³ஸ்ஸேதுங் சித்துப்பாத³ம்பி கோ² அஹந்திஆதி³மாஹ.
84. Evaṃ catucattālīsāya ākārehi sallekhaṃ dassetvā idāni tasmiṃ sallekhe cittuppādassāpi bahūpakārataṃ dassetuṃ cittuppādampi kho ahantiādimāha.
தஸ்ஸத்தோ² , அஹங், சுந்த³, குஸலேஸு த⁴ம்மேஸு சித்துப்பாத³ம்பி ப³ஹூபகாரங் வதா³மி, யா பனேதா காயேன ச வாசாய ச அனுவிதி⁴யனா, யதா² பட²மங் சித்தங் உப்பன்னங், ததே²வ தேஸங் த⁴ம்மானங் காயேன கரணங், வாசாய ச ‘‘கரோதா²’’தி ஆணாபனங் வா, உக்³க³ஹபரிபுச்சா²தீ³னி வா, தத்த² வாதோ³யேவ கோ, ஏகந்தப³ஹூபகாராயேவ ஹி தா அனுவிதி⁴யனாதி த³ஸ்ஸேதி. கஸ்மா பனெத்த² சித்துப்பாதோ³பி ப³ஹூபகாரோதி? ஏகந்தஹிதஸுகா²வஹத்தா அனுவிதி⁴யனானங் ஹேதுத்தா ச.
Tassattho , ahaṃ, cunda, kusalesu dhammesu cittuppādampi bahūpakāraṃ vadāmi, yā panetā kāyena ca vācāya ca anuvidhiyanā, yathā paṭhamaṃ cittaṃ uppannaṃ, tatheva tesaṃ dhammānaṃ kāyena karaṇaṃ, vācāya ca ‘‘karothā’’ti āṇāpanaṃ vā, uggahaparipucchādīni vā, tattha vādoyeva ko, ekantabahūpakārāyeva hi tā anuvidhiyanāti dasseti. Kasmā panettha cittuppādopi bahūpakāroti? Ekantahitasukhāvahattā anuvidhiyanānaṃ hetuttā ca.
‘‘தா³னங் த³ஸ்ஸாமீ’’தி ஹி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவஞ்ஹி உப்பன்னசித்தத்தாயேவ து³தியதி³வஸே மஹாவீதி²ங் பித³ஹித்வா மஹாமண்ட³பங் கத்வா பி⁴க்கு²ஸதஸ்ஸ வா பி⁴க்கு²ஸஹஸ்ஸஸ்ஸ வா தா³னங் தே³தி, ‘‘பி⁴க்கு²ஸங்க⁴ங் நிமந்தேத² பூஜேத² பரிவிஸதா²’’தி பரிஜனே ஆணாபேதி. ஏவங் ‘‘ஸங்க⁴ஸ்ஸ சீவரங் ஸேனாஸனங் பே⁴ஸஜ்ஜங் த³ஸ்ஸாமீ’’தி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவங் உப்பன்னசித்தத்தாயேவ ஹி சீவராதீ³னி அபி⁴ஸங்க²ரோதி தே³தி தா³பேதி ச. ஏஸ நயோ ஸரணக³மனாதீ³ஸு.
‘‘Dānaṃ dassāmī’’ti hi cittuppādo sayampi ekantahitasukhāvaho anuvidhiyanānampi hetu, evañhi uppannacittattāyeva dutiyadivase mahāvīthiṃ pidahitvā mahāmaṇḍapaṃ katvā bhikkhusatassa vā bhikkhusahassassa vā dānaṃ deti, ‘‘bhikkhusaṅghaṃ nimantetha pūjetha parivisathā’’ti parijane āṇāpeti. Evaṃ ‘‘saṅghassa cīvaraṃ senāsanaṃ bhesajjaṃ dassāmī’’ti cittuppādo sayampi ekantahitasukhāvaho anuvidhiyanānampi hetu, evaṃ uppannacittattāyeva hi cīvarādīni abhisaṅkharoti deti dāpeti ca. Esa nayo saraṇagamanādīsu.
‘‘ஸரணங் க³ச்சா²மீ’’தி ஹி சித்தங் உப்பாதெ³த்வாவ பச்சா² காயேன வா வாசாய வா ஸரணங் க³ண்ஹாதி. ததா² ‘‘பஞ்சங்க³ங் அட்ட²ங்க³ங் த³ஸங்க³ங் வா ஸீலங் ஸமாதி³யிஸ்ஸாமீ’’தி சித்தங் உப்பாதெ³த்வா காயேன வா வாசாய வா ஸமாதி³யதி, ‘‘பப்³ப³ஜித்வா சதூஸு ஸீலேஸு பதிட்ட²ஹிஸ்ஸாமீ’’தி ச சித்தங் உப்பாதெ³த்வா காயேன வாசாய ச பூரேதப்³ப³ங் ஸீலங் பூரேதி. ‘‘பு³த்³த⁴வசனங் உக்³க³ஹெஸ்ஸாமீ’’தி சித்தங் உப்பாதெ³த்வாவ ஏகங் வா நிகாயங் த்³வே வா தயோ வா சத்தாரோ வா பஞ்ச வா நிகாயே வாசாய உக்³க³ண்ஹாதி. ஏவங் து⁴தங்க³ஸமாதா³ன-கம்மட்டா²னுக்³க³ஹ-கஸிணபரிகம்ம-ஜா²னஸமாபத்திவிபஸ்ஸனாமக்³க³ப²ல- பச்சேகபோ³தி⁴-ஸம்மாஸம்போ³தி⁴வஸேன நேதப்³ப³ங்.
‘‘Saraṇaṃ gacchāmī’’ti hi cittaṃ uppādetvāva pacchā kāyena vā vācāya vā saraṇaṃ gaṇhāti. Tathā ‘‘pañcaṅgaṃ aṭṭhaṅgaṃ dasaṅgaṃ vā sīlaṃ samādiyissāmī’’ti cittaṃ uppādetvā kāyena vā vācāya vā samādiyati, ‘‘pabbajitvā catūsu sīlesu patiṭṭhahissāmī’’ti ca cittaṃ uppādetvā kāyena vācāya ca pūretabbaṃ sīlaṃ pūreti. ‘‘Buddhavacanaṃ uggahessāmī’’ti cittaṃ uppādetvāva ekaṃ vā nikāyaṃ dve vā tayo vā cattāro vā pañca vā nikāye vācāya uggaṇhāti. Evaṃ dhutaṅgasamādāna-kammaṭṭhānuggaha-kasiṇaparikamma-jhānasamāpattivipassanāmaggaphala- paccekabodhi-sammāsambodhivasena netabbaṃ.
‘‘பு³த்³தோ⁴ ப⁴விஸ்ஸாமீ’’தி ஹி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவஞ்ஹி உப்பன்னசித்தத்தாயேவ அபரேன ஸமயேன கப்பஸதஸஹஸ்ஸாதி⁴கானி சத்தாரி அஸங்கெ²ய்யானி காயேன வாசாய ச பாரமியோ பூரெத்வா ஸதே³வகங் லோகங் தாரெந்தோ விசரதி. ஏவங் ஸப்³ப³த்த² சித்துப்பாதோ³பி ப³ஹூபகாரோ. காயவாசாஹி பன அனுவிதி⁴யனா அதிப³ஹூபகாராயேவாதி வேதி³தப்³பா³.
‘‘Buddho bhavissāmī’’ti hi cittuppādo sayampi ekantahitasukhāvaho anuvidhiyanānampi hetu, evañhi uppannacittattāyeva aparena samayena kappasatasahassādhikāni cattāri asaṅkheyyāni kāyena vācāya ca pāramiyo pūretvā sadevakaṃ lokaṃ tārento vicarati. Evaṃ sabbattha cittuppādopi bahūpakāro. Kāyavācāhi pana anuvidhiyanā atibahūpakārāyevāti veditabbā.
ஏவங் குஸலேஸு த⁴ம்மேஸு சித்துப்பாத³ஸ்ஸாபி ப³ஹூபகாரதங் த³ஸ்ஸெத்வா இதா³னி தத்த² நியோஜெந்தோ ‘‘தஸ்மா திஹ சுந்தா³’’திஆதி³மாஹ. தங் அத்த²தோ பாகடமேவ.
Evaṃ kusalesu dhammesu cittuppādassāpi bahūpakārataṃ dassetvā idāni tattha niyojento ‘‘tasmā tiha cundā’’tiādimāha. Taṃ atthato pākaṭameva.
85. ஏவங் சதுசத்தாலீஸாய ஆகாரேஹி த³ஸ்ஸிதே ஸல்லேகே² சித்துப்பாத³ஸ்ஸாபி ப³ஹூபகாரதங் த³ஸ்ஸெத்வா இதா³னி தஸ்ஸேவ ஸல்லேக²ஸ்ஸ ஹிதாதி⁴க³மாய மக்³க³பா⁴வங் த³ஸ்ஸெந்தோ ஸெய்யதா²பீதிஆதி³மாஹ.
85. Evaṃ catucattālīsāya ākārehi dassite sallekhe cittuppādassāpi bahūpakārataṃ dassetvā idāni tasseva sallekhassa hitādhigamāya maggabhāvaṃ dassento seyyathāpītiādimāha.
தஸ்ஸத்தோ² , யதா² நாம, சுந்த³, கா²ணுகண்டகபாஸாணாதீ³ஹி விஸமோ மக்³கோ³ ப⁴வெய்ய, தஸ்ஸ பரிக்கமனாய பரிவஜ்ஜனத்தா²ய அஞ்ஞோ ஸுபரிகம்மகதோ விய பூ⁴மிபா⁴கோ³ ஸமோ மக்³கோ³ ப⁴வெய்ய, யதா² ச ருக்க²மூலபாஸாணபபாதகும்பீ⁴லமகராதி³ பரிப்³யாகுலங் விஸமங் தித்த²மஸ்ஸ, தஸ்ஸ பரிக்கமனாய பரிவஜ்ஜனத்தா²ய அஞ்ஞங் அவிஸமங் அனுபுப்³ப³க³ம்பீ⁴ரங் ஸோபானப²லகஸதி³ஸங் தித்த²ங் ப⁴வெய்ய, யங் படிபன்னோ ஸுகே²னேவ தங் நதி³ங் வா தளாகங் வா அஜ்ஜோ²கா³ஹெத்வா ந்ஹாயெய்ய வா உத்தரெய்ய வா, ஏவமேவ கோ², சுந்த³, விஸமமக்³க³விஸமதித்த²ஸதி³ஸாய விஹிங்ஸாய ஸமன்னாக³தஸ்ஸ விஹிங்ஸகபுக்³க³லஸ்ஸ ஸமமக்³க³ஸமதித்த²ஸதி³ஸா அவிஹிங்ஸா ஹோதி பரிக்கமனாய. யதே²வ ஹி விஸமமக்³க³தித்த²பரிவஜ்ஜனத்தா²ய ஸமோ மக்³கோ³ ச தித்த²ஞ்ச படியத்தங், ஏவங் விஹிங்ஸாபரிவஜ்ஜனத்தா²ய அவிஹிங்ஸா படியத்தா, யங் படிபன்னோ ஸுகே²னேவ மனுஸ்ஸக³திங் வா தே³வக³திங் வா அஜ்ஜோ²கா³ஹெத்வா ஸம்பத்திங் வா அனுப⁴வெய்ய உத்தரெய்ய வா லோகா. ஏதேனேவ உபாயேன ஸப்³ப³பதா³னி யோஜேதப்³பா³னி.
Tassattho , yathā nāma, cunda, khāṇukaṇṭakapāsāṇādīhi visamo maggo bhaveyya, tassa parikkamanāya parivajjanatthāya añño suparikammakato viya bhūmibhāgo samo maggo bhaveyya, yathā ca rukkhamūlapāsāṇapapātakumbhīlamakarādi paribyākulaṃ visamaṃ titthamassa, tassa parikkamanāya parivajjanatthāya aññaṃ avisamaṃ anupubbagambhīraṃ sopānaphalakasadisaṃ titthaṃ bhaveyya, yaṃ paṭipanno sukheneva taṃ nadiṃ vā taḷākaṃ vā ajjhogāhetvā nhāyeyya vā uttareyya vā, evameva kho, cunda, visamamaggavisamatitthasadisāya vihiṃsāya samannāgatassa vihiṃsakapuggalassa samamaggasamatitthasadisā avihiṃsā hoti parikkamanāya. Yatheva hi visamamaggatitthaparivajjanatthāya samo maggo ca titthañca paṭiyattaṃ, evaṃ vihiṃsāparivajjanatthāya avihiṃsā paṭiyattā, yaṃ paṭipanno sukheneva manussagatiṃ vā devagatiṃ vā ajjhogāhetvā sampattiṃ vā anubhaveyya uttareyya vā lokā. Eteneva upāyena sabbapadāni yojetabbāni.
86. ஏவங் தஸ்ஸேவ ஹிதாதி⁴க³மாய மக்³க³பா⁴வங் த³ஸ்ஸெத்வா இதா³னி உபரிபா⁴க³ங்க³மனீயதங் த³ஸ்ஸெந்தோ, ஸெய்யதா²பீதிஆதி³மாஹ.
86. Evaṃ tasseva hitādhigamāya maggabhāvaṃ dassetvā idāni uparibhāgaṅgamanīyataṃ dassento, seyyathāpītiādimāha.
தஸ்ஸத்தோ², யதா² நாம, சுந்த³, யே கேசி அகுஸலா த⁴ம்மா படிஸந்தி⁴யா ஜனகா வா அஜனகா வா, தி³ன்னாயபி படிஸந்தி⁴யா விபாகஜனகா வா அஜனகா வா, ஸப்³பே³ தே ஜாதிவஸேன அதோ⁴பா⁴க³ங்க³மனீயாதி ஏவங்னாமாவ ஹொந்தி, விபாககாலே அனிட்டா²கந்தவிபாகத்தா. யதா² ச யே கேசி குஸலா த⁴ம்மா படிஸந்தி⁴யா ஜனகா வா அஜனகா வா தி³ன்னாயபி படிஸந்தி⁴யா விபாகஜனகா வா அஜனகா வா, ஸப்³பே³ தே ஜாதிவஸேன உபரிபா⁴க³ங்க³மனீயாதி ஏவங்னாமாவ ஹொந்தி, விபாககாலே இட்ட²கந்தவிபாகத்தா, ஏவமேவ கோ², சுந்த³, விஹிங்ஸகஸ்ஸ…பே॰… உபரிபா⁴கா³யாதி. தத்ராயங் ஓபம்மஸங்ஸந்த³னா – யதா² ஸப்³பே³ அகுஸலா அதோ⁴பா⁴க³ங்க³மனீயா, ஏவங் விஹிங்ஸகஸ்ஸ ஏகா விஹிங்ஸாபி. யதா² ச ஸப்³பே³ குஸலா உபரிபா⁴க³ங்க³மனீயா, ஏவங் அவிஹிங்ஸகஸ்ஸ ஏகா அவிஹிங்ஸாபி. ஏதேனேவ உபாயேன அகுஸலங் அகுஸலேன குஸலஞ்ச குஸலேன உபமேதப்³ப³ங், அயங் கிரெத்த² அதி⁴ப்பாயோதி.
Tassattho, yathā nāma, cunda, ye keci akusalā dhammā paṭisandhiyā janakā vā ajanakā vā, dinnāyapi paṭisandhiyā vipākajanakā vā ajanakā vā, sabbe te jātivasena adhobhāgaṅgamanīyāti evaṃnāmāva honti, vipākakāle aniṭṭhākantavipākattā. Yathā ca ye keci kusalā dhammā paṭisandhiyā janakā vā ajanakā vā dinnāyapi paṭisandhiyā vipākajanakā vā ajanakā vā, sabbe te jātivasena uparibhāgaṅgamanīyāti evaṃnāmāva honti, vipākakāle iṭṭhakantavipākattā, evameva kho, cunda, vihiṃsakassa…pe… uparibhāgāyāti. Tatrāyaṃ opammasaṃsandanā – yathā sabbe akusalā adhobhāgaṅgamanīyā, evaṃ vihiṃsakassa ekā vihiṃsāpi. Yathā ca sabbe kusalā uparibhāgaṅgamanīyā, evaṃ avihiṃsakassa ekā avihiṃsāpi. Eteneva upāyena akusalaṃ akusalena kusalañca kusalena upametabbaṃ, ayaṃ kirettha adhippāyoti.
87. ஏவங் தஸ்ஸேவ ஸல்லேக²ஸ்ஸ உபரிபா⁴க³ங்க³மனீயதங் த³ஸ்ஸெத்வா இதா³னி பரினிப்³பா³பனே ஸமத்த²பா⁴வங் த³ஸ்ஸேதுங் ஸோ வத சுந்தா³திஆதி³மாஹ. தத்த² ஸோதி வுத்தப்பகாரபுக்³க³லனித்³தே³ஸோ. தஸ்ஸ யோதி இமங் உத்³தே³ஸவசனங் ஆஹரித்வா யோ அத்தனா பலிபபலிபன்னோ, ஸோ வத, சுந்த³, பரங் பலிபபலிபன்னங் உத்³த⁴ரிஸ்ஸதீதி ஏவங் ஸப்³ப³பதே³ஸு ஸம்ப³ந்தோ⁴ வேதி³தப்³போ³. பலிபபலிபன்னோதி க³ம்பீ⁴ரகத்³த³மே நிமுக்³கோ³ வுச்சதி, நோ ச கோ² அரியஸ்ஸ வினயே. அரியஸ்ஸ பன வினயே பலிபந்தி பஞ்ச காமகு³ணா வுச்சந்தி. பலிபன்னோதி தத்த² நிமுக்³கோ³ பா³லபுது²ஜ்ஜனோ, தஸ்மா ஏவமெத்த² அத்த²யோஜனா வேதி³தப்³பா³. யதா², சுந்த³, கோசி புரிஸோ யாவ நாஸிகக்³கா³ க³ம்பீ⁴ரே கத்³த³மே நிமுக்³கோ³ அபரங் தத்தே²வ நிமுக்³க³ங் ஹத்தே² வா ஸீஸே வா க³ஹெத்வா உத்³த⁴ரிஸ்ஸதீதி நேதங் டா²னங் விஜ்ஜதி, ந ஹி தங் காரணமத்தி², யேன ஸோ தங் உத்³த⁴ரித்வா த²லே பதிட்ட²பெய்ய, ஏவமேவ யோ அத்தனா பஞ்சகாமகு³ணபலிபே பலிபன்னோ, ஸோ வத பரங் ததே²வ பலிபபலிபன்னங் உத்³த⁴ரிஸ்ஸதீதி நேதங் டா²னங் விஜ்ஜதி.
87. Evaṃ tasseva sallekhassa uparibhāgaṅgamanīyataṃ dassetvā idāni parinibbāpane samatthabhāvaṃ dassetuṃ so vata cundātiādimāha. Tattha soti vuttappakārapuggalaniddeso. Tassa yoti imaṃ uddesavacanaṃ āharitvā yo attanā palipapalipanno, so vata, cunda, paraṃ palipapalipannaṃ uddharissatīti evaṃ sabbapadesu sambandho veditabbo. Palipapalipannoti gambhīrakaddame nimuggo vuccati, no ca kho ariyassa vinaye. Ariyassa pana vinaye palipanti pañca kāmaguṇā vuccanti. Palipannoti tattha nimuggo bālaputhujjano, tasmā evamettha atthayojanā veditabbā. Yathā, cunda, koci puriso yāva nāsikaggā gambhīre kaddame nimuggo aparaṃ tattheva nimuggaṃ hatthe vā sīse vā gahetvā uddharissatīti netaṃ ṭhānaṃ vijjati, na hi taṃ kāraṇamatthi, yena so taṃ uddharitvā thale patiṭṭhapeyya, evameva yo attanā pañcakāmaguṇapalipe palipanno, so vata paraṃ tatheva palipapalipannaṃ uddharissatīti netaṃ ṭhānaṃ vijjati.
தத்த² ஸியா அயுத்தமேதங், புது²ஜ்ஜனானம்பி பி⁴க்கு²பி⁴க்கு²னீஉபாஸகஉபாஸிகானங் த⁴ம்மதே³ஸனங் ஸுத்வா ஹொந்தியேவ த⁴ம்மங் அபி⁴ஸமேதாரோ, தஸ்மா பலிபபலிபன்னோ உத்³த⁴ரதீதி, தங் ந ததா² த³ட்ட²ப்³ப³ங். ப⁴க³வாயேவ ஹி தத்த² உத்³த⁴ரதி, பஸங்ஸாமத்தமேவ பன த⁴ம்மகதி²கா லப⁴ந்தி ரஞ்ஞா பஹிதலேக²வாசகோ விய. யதா² ஹி ரஞ்ஞோ பச்சந்தஜனபதே³ பஹிதங் லேக²ங் தத்த² மனுஸ்ஸா லேக²ங் வாசேதுங் அஜானந்தா யோ வாசேதுங் ஜானாதி, தேன வாசாபெத்வா தமத்த²ங் ஸுத்வா ‘‘ரஞ்ஞோ ஆணா’’தி ஆத³ரேன ஸம்பாதெ³ந்தி, ந ச நேஸங் ஹோதி ‘‘லேக²வாசகஸ்ஸ அயங் ஆணா’’தி. லேக²வாசகோ பன ‘‘விஸ்ஸட்டா²ய வாசாய வாசேஸி அனேலக³ளாயா’’தி பஸங்ஸாமத்தமேவ லப⁴தி, ஏவமேவ கிஞ்சாபி ஸாரிபுத்தபபு⁴தயோ த⁴ம்மகதி²கா த⁴ம்மங் தே³ஸெந்தி, அத² கோ² லிகி²தபண்ணவாசகோ விய தே ஹொந்தி. ப⁴க³வதோயேவ பன ஸா த⁴ம்மதே³ஸனா ரஞ்ஞோ ஆணா விய. யே ச தங் ஸுத்வா த⁴ம்மங் அபி⁴ஸமெந்தி, தே ப⁴க³வாயேவ உத்³த⁴ரதீதி வேதி³தப்³பா³. த⁴ம்மகதி²கா பன ‘‘விஸ்ஸட்டா²ய வாசாய த⁴ம்மங் தே³ஸெந்தி அனேலக³ளாயா’’தி பஸங்ஸாமத்தமேவ லப⁴ந்தீதி. தஸ்மா யுத்தமேவேதந்தி. வுத்தவிபரியாயேன ஸுக்கபக்கோ² வேதி³தப்³போ³.
Tattha siyā ayuttametaṃ, puthujjanānampi bhikkhubhikkhunīupāsakaupāsikānaṃ dhammadesanaṃ sutvā hontiyeva dhammaṃ abhisametāro, tasmā palipapalipanno uddharatīti, taṃ na tathā daṭṭhabbaṃ. Bhagavāyeva hi tattha uddharati, pasaṃsāmattameva pana dhammakathikā labhanti raññā pahitalekhavācako viya. Yathā hi rañño paccantajanapade pahitaṃ lekhaṃ tattha manussā lekhaṃ vācetuṃ ajānantā yo vācetuṃ jānāti, tena vācāpetvā tamatthaṃ sutvā ‘‘rañño āṇā’’ti ādarena sampādenti, na ca nesaṃ hoti ‘‘lekhavācakassa ayaṃ āṇā’’ti. Lekhavācako pana ‘‘vissaṭṭhāya vācāya vācesi anelagaḷāyā’’ti pasaṃsāmattameva labhati, evameva kiñcāpi sāriputtapabhutayo dhammakathikā dhammaṃ desenti, atha kho likhitapaṇṇavācako viya te honti. Bhagavatoyeva pana sā dhammadesanā rañño āṇā viya. Ye ca taṃ sutvā dhammaṃ abhisamenti, te bhagavāyeva uddharatīti veditabbā. Dhammakathikā pana ‘‘vissaṭṭhāya vācāya dhammaṃ desenti anelagaḷāyā’’ti pasaṃsāmattameva labhantīti. Tasmā yuttamevetanti. Vuttavipariyāyena sukkapakkho veditabbo.
அத³ந்தோ அவினீதோ அபரினிப்³பு³தோதி எத்த² பன அனிப்³பி³ஸதாய அத³ந்தோ. அஸிக்கி²தவினயதாய அவினீதோ. அனிப்³பு³தகிலேஸதாய அபரினிப்³பு³தோதி வேதி³தப்³போ³. ஸோ தாதி³ஸோ பரங் த³மெஸ்ஸதி, நிப்³பி³ஸங் கரிஸ்ஸதி , வினெஸ்ஸதி வா திஸ்ஸோ ஸிக்கா² ஸிக்கா²பெஸ்ஸதி, பரினிப்³பா³பெஸ்ஸதி வா தஸ்ஸ கிலேஸே நிப்³பா³பெஸ்ஸதீதி நேதங் டா²னங் விஜ்ஜதி. வுத்தவிபரியாயேன ஸுக்கபக்கோ² வேதி³தப்³போ³.
Adantoavinīto aparinibbutoti ettha pana anibbisatāya adanto. Asikkhitavinayatāya avinīto. Anibbutakilesatāya aparinibbutoti veditabbo. So tādiso paraṃ damessati, nibbisaṃ karissati , vinessati vā tisso sikkhā sikkhāpessati, parinibbāpessati vā tassa kilese nibbāpessatīti netaṃ ṭhānaṃ vijjati. Vuttavipariyāyena sukkapakkho veditabbo.
ஏவமேவ கோ², சுந்த³, விஹிங்ஸகஸ்ஸ…பே॰… பரினிப்³பா³னாயாதி எத்த² பன ஏவமத்தோ² வேதி³தப்³போ³ – யதா² ஹி அத்தனா அபலிபபலிபன்னோ பரங் பலிபபலிபன்னங் உத்³த⁴ரிஸ்ஸதி, த³ந்தோ த³மெஸ்ஸதி, வினீதோ வினெஸ்ஸதி, பரினிப்³பு³தோ பரினிப்³பா³பெஸ்ஸதீதி டா²னமேதங் விஜ்ஜதீதி. கிங் பன தந்தி? அபலிபபலிபன்னத்தங், த³ந்தத்தங் வினீதத்தங் பரினிப்³பு³தத்தஞ்ச, ஏவமேவ கோ², சுந்த³, விஹிங்ஸகஸ்ஸ புரிஸபுக்³க³லஸ்ஸ அவிஹிங்ஸா ஹோதி பரினிப்³பா³னாய. கிங் வுத்தங் ஹோதி? யோ அத்தனா அவிஹிங்ஸகோ, தஸ்ஸ யா அவிஹிங்ஸா, அயங் யா ஏஸா விஹிங்ஸகஸ்ஸ பரஸ்ஸ விஹிங்ஸா, தஸ்ஸா பரினிப்³பா³னாய ஹோதி, அத்தனா ஹி அவிஹிங்ஸகோ பரஸ்ஸ விஹிங்ஸாசேதனங் நிப்³பா³பெஸ்ஸதீதி டா²னமேதங் விஜ்ஜதி. கிங் பன தந்தி? அவிஹிங்ஸகத்தமேவ. யஞ்ஹி யேன அத்தனா அதி⁴க³தங் ஹோதி, ஸோ பரங் தத³த்தா²ய ஸமாத³பேதுங் ஸக்கோதீதி.
Evameva kho, cunda, vihiṃsakassa…pe… parinibbānāyāti ettha pana evamattho veditabbo – yathā hi attanā apalipapalipanno paraṃ palipapalipannaṃ uddharissati, danto damessati, vinīto vinessati, parinibbuto parinibbāpessatīti ṭhānametaṃ vijjatīti. Kiṃ pana tanti? Apalipapalipannattaṃ, dantattaṃ vinītattaṃ parinibbutattañca, evameva kho, cunda, vihiṃsakassa purisapuggalassa avihiṃsā hoti parinibbānāya. Kiṃ vuttaṃ hoti? Yo attanā avihiṃsako, tassa yā avihiṃsā, ayaṃ yā esā vihiṃsakassa parassa vihiṃsā, tassā parinibbānāya hoti, attanā hi avihiṃsako parassa vihiṃsācetanaṃ nibbāpessatīti ṭhānametaṃ vijjati. Kiṃ pana tanti? Avihiṃsakattameva. Yañhi yena attanā adhigataṃ hoti, so paraṃ tadatthāya samādapetuṃ sakkotīti.
அத² வா யதா² அத்தனா அபலிபன்னோ த³ந்தோ வினீதோ பரினிப்³பு³தோ பரங் பலிபபலிபன்னங் அத³ந்தங் அவினீதங் அபரினிப்³பு³தஞ்ச உத்³த⁴ரிஸ்ஸதி த³மெஸ்ஸதி வினெஸ்ஸதி பரினிப்³பா³பெஸ்ஸதீதி டா²னமேதங் விஜ்ஜதி, ஏவமேவ விஹிங்ஸகஸ்ஸ புரிஸபுக்³க³லஸ்ஸ விஹிங்ஸாபஹானாய மக்³க³ங் பா⁴வயதோ உப்பன்னா அவிஹிங்ஸா ஹோதி பரினிப்³பா³னாய. பரினிப்³பு³தோ விய ஹி அபரினிப்³பு³தங் அவிஹிங்ஸாசேதனாவ விஹிங்ஸாசேதனங் பரினிப்³பா³பேதுங் ஸமத்தா². ஏதமத்த²ங் த³ஸ்ஸெந்தோ ‘‘ஏவமேவ கோ², சுந்தா³’’திஆதி³மாஹாதி ஏவமெத்த² அத்தோ² த³ட்ட²ப்³போ³. யதா² செத்த², ஏவங் ஸப்³ப³பதே³ஸு. அதிவித்தா²ரப⁴யேன பன அனுபத³யோஜனா ந கதாதி.
Atha vā yathā attanā apalipanno danto vinīto parinibbuto paraṃ palipapalipannaṃ adantaṃ avinītaṃ aparinibbutañca uddharissati damessati vinessati parinibbāpessatīti ṭhānametaṃ vijjati, evameva vihiṃsakassa purisapuggalassa vihiṃsāpahānāya maggaṃ bhāvayato uppannā avihiṃsā hoti parinibbānāya. Parinibbuto viya hi aparinibbutaṃ avihiṃsācetanāva vihiṃsācetanaṃ parinibbāpetuṃ samatthā. Etamatthaṃ dassento ‘‘evameva kho, cundā’’tiādimāhāti evamettha attho daṭṭhabbo. Yathā cettha, evaṃ sabbapadesu. Ativitthārabhayena pana anupadayojanā na katāti.
88. ஏவங் தஸ்ஸ பரினிப்³பா³பனே ஸமத்த²பா⁴வங் த³ஸ்ஸெத்வா இதா³னி தங் தே³ஸனங் நிக³மெத்வா த⁴ம்மபடிபத்தியங் நியோஜேதுங் இதி கோ², சுந்தா³திஆதி³மாஹ. தத்த² ஸல்லேக²பரியாயோதி ஸல்லேக²காரணங். ஏஸ நயோ ஸப்³ப³த்த² எத்த² அவிஹிங்ஸாத³யோ ஏவ விஹிங்ஸாதீ³னங் ஸல்லேக²னதோ ஸல்லேக²காரணங் . தேஸங் வஸேன சித்தஸ்ஸ உப்பாதே³தப்³ப³தோ சித்துபாத³காரணங், விஹிங்ஸாதி³, பரிக்கமனஸ்ஸ ஹேதுதோ பரிக்கமனகாரணங், உபரிபா⁴க³னிப்பா²த³னதோ உபரிபா⁴க³காரணங் , விஹிங்ஸாதீ³னங் பரினிப்³பா³பனதோ பரினிப்³பா³னகாரணந்தி வேதி³தப்³பா³. ஹிதேஸினாதி ஹிதங் ஏஸந்தேன. அனுகம்பகேனாதி அனுகம்பமானேன. அனுகம்பங் உபாதா³யாதி அனுகம்பங் சித்தேன பரிக்³க³ஹெத்வா, பரிச்சாதிபி வுத்தங் ஹோதி. கதங் வோ தங் மயாதி தங் மயா இமே பஞ்ச பரியாயே த³ஸ்ஸெந்தேன தும்ஹாகங் கதங். எத்தகமேவ ஹி அனுகம்பகஸ்ஸ ஸத்து² கிச்சங், யதி³த³ங் அவிபரீதத⁴ம்மதே³ஸனா. இதோ பரங் பன படிபத்தி நாம ஸாவகானங் கிச்சங். தேனாஹ ஏதானி, சுந்த³, ருக்க²மூலானி…பே॰… அம்ஹாகங் அனுஸாஸனீதி.
88. Evaṃ tassa parinibbāpane samatthabhāvaṃ dassetvā idāni taṃ desanaṃ nigametvā dhammapaṭipattiyaṃ niyojetuṃ iti kho, cundātiādimāha. Tattha sallekhapariyāyoti sallekhakāraṇaṃ. Esa nayo sabbattha ettha avihiṃsādayo eva vihiṃsādīnaṃ sallekhanato sallekhakāraṇaṃ . Tesaṃ vasena cittassa uppādetabbato cittupādakāraṇaṃ, vihiṃsādi, parikkamanassa hetuto parikkamanakāraṇaṃ, uparibhāganipphādanato uparibhāgakāraṇaṃ , vihiṃsādīnaṃ parinibbāpanato parinibbānakāraṇanti veditabbā. Hitesināti hitaṃ esantena. Anukampakenāti anukampamānena. Anukampaṃ upādāyāti anukampaṃ cittena pariggahetvā, pariccātipi vuttaṃ hoti. Kataṃ vo taṃ mayāti taṃ mayā ime pañca pariyāye dassentena tumhākaṃ kataṃ. Ettakameva hi anukampakassa satthu kiccaṃ, yadidaṃ aviparītadhammadesanā. Ito paraṃ pana paṭipatti nāma sāvakānaṃ kiccaṃ. Tenāha etāni, cunda, rukkhamūlāni…pe… amhākaṃ anusāsanīti.
தத்த² ச ருக்க²மூலானீதி இமினா ருக்க²மூலஸேனாஸனங் த³ஸ்ஸேதி. ஸுஞ்ஞாகா³ரானீதி இமினா ஜனவிவித்தட்டா²னங். உப⁴யேனாபி ச யோகா³னுரூபஸேனாஸனமாசிக்க²தி, தா³யஜ்ஜங் நிய்யாதேதி. ஜா²யதா²தி ஆரம்மணூபனிஜ்ஜா²னேன அட்ட²திங்ஸாரம்மணானி, லக்க²ணூபனிஜ்ஜா²னேன ச அனிச்சாதி³தோ க²ந்தா⁴யதனாதீ³னி உபனிஜ்ஜா²யத², ஸமத²ஞ்ச விபஸ்ஸனஞ்ச வட்³டே⁴தா²தி வுத்தங் ஹோதி. மா பமாத³த்தா²தி மா பமஜ்ஜித்த². மா பச்சா² விப்படிஸாரினோ அஹுவத்தா²தி யே ஹி புப்³பே³ த³ஹரகாலே, ஆரொக்³யகாலே, ஸத்தஸப்பாயாதி³ஸம்பத்திகாலே, ஸத்து² ஸம்முகீ²பா⁴வகாலே ச யோனிஸோமனஸிகாரவிரஹிதா ரத்திந்தி³வங் மங்கு³லப⁴த்தா ஹுத்வா ஸெய்யஸுக²ங் மித்³த⁴ஸுக²மனுபொ⁴ந்தா பமஜ்ஜந்தி, தே பச்சா² ஜராகாலே, ரோக³காலே, மரணகாலே, விபத்திகாலே, ஸத்து² பரினிப்³பு³தகாலே ச தங் புப்³பே³ பமாத³விஹாரங் அனுஸ்ஸரந்தா, ஸப்படிஸந்தி⁴காலகிரியஞ்ச பா⁴ரியங் ஸம்பஸ்ஸமானா விப்படிஸாரினோ ஹொந்தி, தும்ஹே பன தாதி³ஸா மா அஹுவத்தா²தி ஏதமத்த²ங் த³ஸ்ஸெந்தோ ஆஹ ‘‘மா பச்சா² விப்படிஸாரினோ அஹுவத்தா²’’தி. அயங் வோ அம்ஹாகங் அனுஸாஸனீதி அயங் அம்ஹாகங் ஸந்திகா ‘‘ஜா²யத² மா பமாத³த்தா²’’தி தும்ஹாகங் அனுஸாஸனீ, ஓவாதோ³தி வுத்தங் ஹோதி.
Tattha ca rukkhamūlānīti iminā rukkhamūlasenāsanaṃ dasseti. Suññāgārānīti iminā janavivittaṭṭhānaṃ. Ubhayenāpi ca yogānurūpasenāsanamācikkhati, dāyajjaṃ niyyāteti. Jhāyathāti ārammaṇūpanijjhānena aṭṭhatiṃsārammaṇāni, lakkhaṇūpanijjhānena ca aniccādito khandhāyatanādīni upanijjhāyatha, samathañca vipassanañca vaḍḍhethāti vuttaṃ hoti. Mā pamādatthāti mā pamajjittha. Mā pacchā vippaṭisārino ahuvatthāti ye hi pubbe daharakāle, ārogyakāle, sattasappāyādisampattikāle, satthu sammukhībhāvakāle ca yonisomanasikāravirahitā rattindivaṃ maṅgulabhattā hutvā seyyasukhaṃ middhasukhamanubhontā pamajjanti, te pacchā jarākāle, rogakāle, maraṇakāle, vipattikāle, satthu parinibbutakāle ca taṃ pubbe pamādavihāraṃ anussarantā, sappaṭisandhikālakiriyañca bhāriyaṃ sampassamānā vippaṭisārino honti, tumhe pana tādisā mā ahuvatthāti etamatthaṃ dassento āha ‘‘mā pacchā vippaṭisārino ahuvatthā’’ti. Ayaṃ vo amhākaṃ anusāsanīti ayaṃ amhākaṃ santikā ‘‘jhāyatha mā pamādatthā’’ti tumhākaṃ anusāsanī, ovādoti vuttaṃ hoti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸல்லேக²ஸுத்தவண்ணனா நிட்டி²தா.
Sallekhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. ஸல்லேக²ஸுத்தங் • 8. Sallekhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. ஸல்லேக²ஸுத்தவண்ணனா • 8. Sallekhasuttavaṇṇanā
