| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૯. સમાદપકત્થેરઅપદાનવણ્ણના
9. Samādapakattheraapadānavaṇṇanā
નગરે બન્ધુમતિયાતિઆદિકં આયસ્મતો સમાદપકત્થેરસ્સ અપદાનં. અયમ્પિ થેરો પુરિમબુદ્ધાનં સન્તિકે કતકુસલસમ્ભારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા પુઞ્ઞાનિ કરોન્તો વસમાનો સદ્ધો પસન્નો બહૂ ઉપાસકે સન્નિપાતેત્વા ગણજેટ્ઠકો હુત્વા ‘‘માળકં કરિસ્સામા’’તિ તે સબ્બે સમાદપેત્વા એકં માળકં સમં કારેત્વા પણ્ડરપુલિનં ઓકિરિત્વા ભગવતો નિય્યાદેસિ. સો તેન પુઞ્ઞેન દેવલોકે ઉપ્પન્નો છ કામાવચરસમ્પત્તિયો અનુભવિત્વા મનુસ્સેસુ ચ ચક્કવત્તિઆદિસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો ભગવતિ પસન્નો ધમ્મં સુત્વા પસન્નમાનસો સદ્ધાજાતો પબ્બજિત્વા સીલસમ્પન્નો વત્તસમ્પન્નો નચિરસ્સેવ અરહત્તં પાપુણિ.
Nagare bandhumatiyātiādikaṃ āyasmato samādapakattherassa apadānaṃ. Ayampi thero purimabuddhānaṃ santike katakusalasambhāro anekesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā puññāni karonto vasamāno saddho pasanno bahū upāsake sannipātetvā gaṇajeṭṭhako hutvā ‘‘māḷakaṃ karissāmā’’ti te sabbe samādapetvā ekaṃ māḷakaṃ samaṃ kāretvā paṇḍarapulinaṃ okiritvā bhagavato niyyādesi. So tena puññena devaloke uppanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto viññutaṃ patto bhagavati pasanno dhammaṃ sutvā pasannamānaso saddhājāto pabbajitvā sīlasampanno vattasampanno nacirasseva arahattaṃ pāpuṇi.
૪૪. સો અપરભાગે અત્તનો કતકુસલં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો નગરે બન્ધુમતિયાતિઆદિમાહ. તત્થ બન્ધન્તિ ઞાતિગોત્તાદિવસેન એકસમ્બન્ધા હોન્તિ સકલનગરવાસિનોતિ બન્ધૂ, બન્ધૂ એતસ્મિં વિજ્જન્તીતિ બન્ધુમતી, તસ્સા બન્ધુમતિયા નામ નગરે મહાપૂગગણો ઉપાસકસમૂહો અહોસીતિ અત્થો. માળં કસ્સામ સઙ્ઘસ્સાતિ એત્થ માતિ ગણ્હાતિ સમ્પત્તસમ્પત્તજનાનં ચિત્તન્તિ માળં, અથ વા સમ્પત્તયતિગણાનં ચિત્તસ્સ વિવેકકરણે અલન્તિ માળં, માળમેવ માળકં, ભિક્ખુસઙ્ઘસ્સ ફાસુવિહારત્થાય માળકં કરિસ્સામાતિ અત્થો. સેસં પાકટમેવાતિ.
44. So aparabhāge attano katakusalaṃ saritvā sañjātasomanasso pubbacaritāpadānaṃ pakāsento nagare bandhumatiyātiādimāha. Tattha bandhanti ñātigottādivasena ekasambandhā honti sakalanagaravāsinoti bandhū, bandhū etasmiṃ vijjantīti bandhumatī, tassā bandhumatiyā nāma nagare mahāpūgagaṇo upāsakasamūho ahosīti attho. Māḷaṃ kassāma saṅghassāti ettha māti gaṇhāti sampattasampattajanānaṃ cittanti māḷaṃ, atha vā sampattayatigaṇānaṃ cittassa vivekakaraṇe alanti māḷaṃ, māḷameva māḷakaṃ, bhikkhusaṅghassa phāsuvihāratthāya māḷakaṃ karissāmāti attho. Sesaṃ pākaṭamevāti.
સમાદપકત્થેરઅપદાનવણ્ણના સમત્તા.
Samādapakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૯. સમાદપકત્થેરઅપદાનં • 9. Samādapakattheraapadānaṃ
