| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஸமாதி⁴ஸுத்தங்
6. Samādhisuttaṃ
70. ‘‘‘ஸோ வத, பி⁴க்க²வே, பி⁴க்கு² ந ஸந்தேன ஸமாதி⁴னா ந பணீதேன ந படிப்பஸ்ஸத்³தி⁴லத்³தே⁴ன 1 ந ஏகோதி³பா⁴வாதி⁴க³தேன அனேகவிஹிதங் இத்³தி⁴வித⁴ங் பச்சனுப⁴விஸ்ஸதி – ஏகோபி ஹுத்வா ப³ஹுதா⁴ ப⁴விஸ்ஸதி, ப³ஹுதா⁴பி ஹுத்வா ஏகோ ப⁴விஸ்ஸதி…பே॰… யாவ ப்³ரஹ்மலோகாபி காயேன வஸங் வத்தெஸ்ஸதீ’தி நேதங் டா²னங் விஜ்ஜதி. ‘தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணிஸ்ஸதி – தி³ப்³பே³ ச மானுஸே ச யே தூ³ரே ஸந்திகே சா’தி நேதங் டா²னங் விஜ்ஜதி. ‘பரஸத்தானங் பரபுக்³க³லானங் சேதஸா சேதோ பரிச்ச பஜானிஸ்ஸதி – ஸராக³ங் வா சித்தங் ஸராக³ங் சித்தந்தி பஜானிஸ்ஸதி …பே॰… விமுத்தங் வா சித்தங் விமுத்தங் சித்தந்தி பஜானிஸ்ஸதீ’தி நேதங் டா²னங் விஜ்ஜதி. ‘அனேகவிஹிதங் புப்³பே³னிவாஸங் அனுஸ்ஸரிஸ்ஸதி, ஸெய்யதி²த³ங் – ஏகம்பி ஜாதிங், த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரிஸ்ஸதீ’தி நேதங் டா²னங் விஜ்ஜதி. ‘தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸிஸ்ஸதி…பே॰… யதா²கம்மூபகே³ ஸத்தே பஜானிஸ்ஸதீ’தி நேதங் டா²னங் விஜ்ஜதி . ‘ஆஸவானங் க²யா…பே॰… ஸச்சி²கத்வா உபஸம்பஜ்ஜ விஹரிஸ்ஸதீ’தி நேதங் டா²னங் விஜ்ஜதி.
70. ‘‘‘So vata, bhikkhave, bhikkhu na santena samādhinā na paṇītena na paṭippassaddhiladdhena 2 na ekodibhāvādhigatena anekavihitaṃ iddhividhaṃ paccanubhavissati – ekopi hutvā bahudhā bhavissati, bahudhāpi hutvā eko bhavissati…pe… yāva brahmalokāpi kāyena vasaṃ vattessatī’ti netaṃ ṭhānaṃ vijjati. ‘Dibbāya sotadhātuyā visuddhāya atikkantamānusikāya ubho sadde suṇissati – dibbe ca mānuse ca ye dūre santike cā’ti netaṃ ṭhānaṃ vijjati. ‘Parasattānaṃ parapuggalānaṃ cetasā ceto paricca pajānissati – sarāgaṃ vā cittaṃ sarāgaṃ cittanti pajānissati …pe… vimuttaṃ vā cittaṃ vimuttaṃ cittanti pajānissatī’ti netaṃ ṭhānaṃ vijjati. ‘Anekavihitaṃ pubbenivāsaṃ anussarissati, seyyathidaṃ – ekampi jātiṃ, dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarissatī’ti netaṃ ṭhānaṃ vijjati. ‘Dibbena cakkhunā visuddhena atikkantamānusakena satte passissati…pe… yathākammūpage satte pajānissatī’ti netaṃ ṭhānaṃ vijjati . ‘Āsavānaṃ khayā…pe… sacchikatvā upasampajja viharissatī’ti netaṃ ṭhānaṃ vijjati.
‘‘‘ஸோ வத, பி⁴க்க²வே, பி⁴க்கு² ஸந்தேன ஸமாதி⁴னா பணீதேன படிப்பஸ்ஸத்³தி⁴லத்³தே⁴ன ஏகோதி³பா⁴வாதி⁴க³தேன அனேகவிஹிதங் இத்³தி⁴வித⁴ங் பச்சனுப⁴விஸ்ஸதி…பே॰… யாவ ப்³ரஹ்மலோகாபி காயேன வஸங் வத்தெஸ்ஸதீ’தி டா²னமேதங் விஜ்ஜதி. ‘தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணிஸ்ஸதி – தி³ப்³பே³ ச மானுஸே ச யே தூ³ரே ஸந்திகே சா’தி டா²னமேதங் விஜ்ஜதி. ‘பரஸத்தானங் பரபுக்³க³லானங் சேதஸா சேதோ பரிச்ச பஜானிஸ்ஸதி – ஸராக³ங் வா சித்தங் ஸராக³ங் சித்தந்தி பஜானிஸ்ஸதி…பே॰… விமுத்தங் வா சித்தங் விமுத்தங் சித்தந்தி பஜானிஸ்ஸதீ’தி டா²னமேதங் விஜ்ஜதி. ‘அனேகவிஹிதங் புப்³பே³னிவாஸங் அனுஸ்ஸரிஸ்ஸதி, ஸெய்யதி²த³ங் – ஏகம்பி ஜாதிங், த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரிஸ்ஸதீ’தி டா²னமேதங் விஜ்ஜதி. ‘தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸிஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானிஸ்ஸதீ’தி டா²னமேதங் விஜ்ஜதி . ‘ஆஸவானங் க²யா அனாஸவங் சேதோவிமுத்திங்…பே॰… ஸச்சி²கத்வா உபஸம்பஜ்ஜ விஹரிஸ்ஸதீ’தி டா²னமேதங் விஜ்ஜதீ’’தி. ச²ட்ட²ங்.
‘‘‘So vata, bhikkhave, bhikkhu santena samādhinā paṇītena paṭippassaddhiladdhena ekodibhāvādhigatena anekavihitaṃ iddhividhaṃ paccanubhavissati…pe… yāva brahmalokāpi kāyena vasaṃ vattessatī’ti ṭhānametaṃ vijjati. ‘Dibbāya sotadhātuyā visuddhāya atikkantamānusikāya ubho sadde suṇissati – dibbe ca mānuse ca ye dūre santike cā’ti ṭhānametaṃ vijjati. ‘Parasattānaṃ parapuggalānaṃ cetasā ceto paricca pajānissati – sarāgaṃ vā cittaṃ sarāgaṃ cittanti pajānissati…pe… vimuttaṃ vā cittaṃ vimuttaṃ cittanti pajānissatī’ti ṭhānametaṃ vijjati. ‘Anekavihitaṃ pubbenivāsaṃ anussarissati, seyyathidaṃ – ekampi jātiṃ, dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarissatī’ti ṭhānametaṃ vijjati. ‘Dibbena cakkhunā visuddhena atikkantamānusakena satte passissati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānissatī’ti ṭhānametaṃ vijjati . ‘Āsavānaṃ khayā anāsavaṃ cetovimuttiṃ…pe… sacchikatvā upasampajja viharissatī’ti ṭhānametaṃ vijjatī’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸமாதி⁴ஸுத்தவண்ணனா • 6. Samādhisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸமாதி⁴ஸுத்தவண்ணனா • 6. Samādhisuttavaṇṇanā
