| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. அனுத்தரியவக்³கோ³
3. Anuttariyavaggo
1. ஸாமகஸுத்தங்
1. Sāmakasuttaṃ
21. ஏகங் ஸமயங் ப⁴க³வா ஸக்கேஸு விஹரதி ஸாமகா³மகே பொக்க²ரணியாயங். அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் பொக்க²ரணியங் ஓபா⁴ஸெத்வா யேன ப⁴க³வா தேனுபஸங்கமி ; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா ப⁴க³வந்தங் ஏதத³வோச –
21. Ekaṃ samayaṃ bhagavā sakkesu viharati sāmagāmake pokkharaṇiyāyaṃ. Atha kho aññatarā devatā abhikkantāya rattiyā abhikkantavaṇṇā kevalakappaṃ pokkharaṇiyaṃ obhāsetvā yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca –
‘‘தயோமே, ப⁴ந்தே, த⁴ம்மா பி⁴க்கு²னோ பரிஹானாய ஸங்வத்தந்தி. கதமே தயோ? கம்மாராமதா, ப⁴ஸ்ஸாராமதா , நித்³தா³ராமதா – இமே கோ², ப⁴ந்தே, தயோ த⁴ம்மா பி⁴க்கு²னோ பரிஹானாய ஸங்வத்தந்தீ’’தி. இத³மவோச ஸா தே³வதா. ஸமனுஞ்ஞோ ஸத்தா² அஹோஸி. அத² கோ² ஸா தே³வதா ‘‘ஸமனுஞ்ஞோ மே ஸத்தா²’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி.
‘‘Tayome, bhante, dhammā bhikkhuno parihānāya saṃvattanti. Katame tayo? Kammārāmatā, bhassārāmatā , niddārāmatā – ime kho, bhante, tayo dhammā bhikkhuno parihānāya saṃvattantī’’ti. Idamavoca sā devatā. Samanuñño satthā ahosi. Atha kho sā devatā ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமங், பி⁴க்க²வே, ரத்திங் அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் பொக்க²ரணியங் ஓபா⁴ஸெத்வா யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ², பி⁴க்க²வே, ஸா தே³வதா மங் ஏதத³வோச – ‘தயோமே, ப⁴ந்தே, த⁴ம்மா பி⁴க்கு²னோ பரிஹானாய ஸங்வத்தந்தி. கதமே தயோ? கம்மாராமதா, ப⁴ஸ்ஸாராமதா, நித்³தா³ராமதா – இமே கோ², ப⁴ந்தே, தயோ த⁴ம்மா பி⁴க்கு²னோ பரிஹானாய ஸங்வத்தந்தீ’தி. இத³மவோச, பி⁴க்க²வே, ஸா தே³வதா. இத³ங் வத்வா மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி. தேஸங் வோ 1, பி⁴க்க²வே, அலாபா⁴ தேஸங் து³ல்லத்³த⁴ங், யே வோ தே³வதாபி ஜானந்தி குஸலேஹி த⁴ம்மேஹி பரிஹாயமானே’’.
Atha kho bhagavā tassā rattiyā accayena bhikkhū āmantesi – ‘‘imaṃ, bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ pokkharaṇiyaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘tayome, bhante, dhammā bhikkhuno parihānāya saṃvattanti. Katame tayo? Kammārāmatā, bhassārāmatā, niddārāmatā – ime kho, bhante, tayo dhammā bhikkhuno parihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyi. Tesaṃ vo 2, bhikkhave, alābhā tesaṃ dulladdhaṃ, ye vo devatāpi jānanti kusalehi dhammehi parihāyamāne’’.
‘‘அபரேபி, பி⁴க்க²வே, தயோ பரிஹானியே த⁴ம்மே தே³ஸெஸ்ஸாமி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘கதமே ச, பி⁴க்க²வே, தயோ பரிஹானியா த⁴ம்மா? ஸங்க³ணிகாராமதா, தோ³வசஸ்ஸதா, பாபமித்ததா – இமே கோ², பி⁴க்க²வே, தயோ பரிஹானியா த⁴ம்மா’’.
‘‘Aparepi, bhikkhave, tayo parihāniye dhamme desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca – ‘‘katame ca, bhikkhave, tayo parihāniyā dhammā? Saṅgaṇikārāmatā, dovacassatā, pāpamittatā – ime kho, bhikkhave, tayo parihāniyā dhammā’’.
‘‘யே ஹி கேசி, பி⁴க்க²வே, அதீதமத்³தா⁴னங் பரிஹாயிங்ஸு குஸலேஹி த⁴ம்மேஹி, ஸப்³பே³தே இமேஹேவ ச²ஹி த⁴ம்மேஹி பரிஹாயிங்ஸு குஸலேஹி த⁴ம்மேஹி. யேபி ஹி கேசி, பி⁴க்க²வே, அனாக³தமத்³தா⁴னங் பரிஹாயிஸ்ஸந்தி குஸலேஹி த⁴ம்மேஹி, ஸப்³பே³தே இமேஹேவ ச²ஹி த⁴ம்மேஹி பரிஹாயிஸ்ஸந்தி குஸலேஹி த⁴ம்மேஹி. யேபி ஹி கேசி, பி⁴க்க²வே, ஏதரஹி பரிஹாயந்தி குஸலேஹி த⁴ம்மேஹி, ஸப்³பே³தே இமேஹேவ ச²ஹி த⁴ம்மேஹி பரிஹாயந்தி குஸலேஹி த⁴ம்மேஹீ’’தி. பட²மங்.
‘‘Ye hi keci, bhikkhave, atītamaddhānaṃ parihāyiṃsu kusalehi dhammehi, sabbete imeheva chahi dhammehi parihāyiṃsu kusalehi dhammehi. Yepi hi keci, bhikkhave, anāgatamaddhānaṃ parihāyissanti kusalehi dhammehi, sabbete imeheva chahi dhammehi parihāyissanti kusalehi dhammehi. Yepi hi keci, bhikkhave, etarahi parihāyanti kusalehi dhammehi, sabbete imeheva chahi dhammehi parihāyanti kusalehi dhammehī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-2. ஸாமகஸுத்தாதி³வண்ணனா • 1-2. Sāmakasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. ஸாமகஸுத்தாதி³வண்ணனா • 1-2. Sāmakasuttādivaṇṇanā
