| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. ஸமணப்³ராஹ்மணஸுத்தவண்ணனா
3. Samaṇabrāhmaṇasuttavaṇṇanā
13. யே பச்சயஸமவாயே தேனத்தபா⁴வேன ஸச்சானி படிவிஜ்ஜி²துங் ஸமத்தா², தே பா³ஹிரகலிங்கே³ டி²தாபி தேனேவ தத்த² ஸமத்த²தாயோகே³ன பா⁴வினங் ஸமிதபா³ஹிதபாபதங் அபெக்கி²த்வா ஸமணஸம்மதாயேவ ப்³ராஹ்மணஸம்மதாயேவாதி தே நிவத்தேதுங் ‘‘ஸச்சானி படிவிஜ்ஜி²துங் அஸமத்தா²’’தி வுத்தங். து³க்க²ஸச்சவஸேனாதி து³க்க²அரியஸச்சவஸேன. அஞ்ஞதா² கத²ங் பா³ஹிரகாபி ஜராமரணங் து³க்க²ந்தி ந ஜானந்தி. ஸச்சதே³ஸனாபா⁴வதோ ‘‘ஸஹ தண்ஹாயா’’தி வுத்தந்தி கேசி. தங் ந ஸுட்டு². யஸ்மா தத்த² தத்த² ப⁴வே பட²மாபி⁴னிப்³ப³த்தி, இத⁴ ஜாதீதி அதி⁴ப்பேதா, ஸா ச தண்ஹா ஏவ ஸந்தானேன, தண்ஹேவ ஸா ஜாதி. ஜராமரணஞ்செத்த² பாகடமேவ அதி⁴ப்பேதங், ந க²ணிகங், தஸ்மா ஸதண்ஹா ஏவ ஜாதிஜராமரணஸ்ஸ ஸமுத³யோதி பூ⁴தகத²னமேதங் த³ட்ட²ப்³ப³ங். ஸமுத³யஸச்சவஸேன ந ஜானந்தீதி யோஜனா. ஏஸ நயோ ஸேஸபதே³ஸுபி. ஸப்³ப³பதே³ஸூதி யத்த² தண்ஹா விஸேஸனபா⁴வேன வத்தப்³பா³, தேஸு ஸப்³ப³பதே³ஸு. யேன ஸமன்னாக³தத்தா புக்³க³லோ பரமத்த²தோ ஸமணோ ப்³ராஹ்மணோதி வுச்சதி, தங் ஸாமஞ்ஞங் ப்³ரஹ்மஞ்ஞஞ்சாதி ஆஹ ‘‘அரிய…பே॰… ப்³ரஹ்மஞ்ஞஞ்சா’’தி. யேன ஹி பவத்தினிமித்தேன ஸமண-ஸத்³தோ³ ப்³ராஹ்மண-ஸத்³தோ³ ச ஸகே அத்தே² நிருள்ஹோ, தஸ்ஸ வஸேன அபி⁴ன்னோபி வேனெய்யஜ்ஜா²ஸயதோ த்³விதா⁴ கத்வா வத்துங் அரஹதீதி வுத்தங் ‘‘உப⁴யத்தா²பீ’’தி. ஏகாத³ஸஸு டா²னேஸு சத்தாரி ஸச்சானி கதே²ஸி அவிஜ்ஜாஸமுத³யஸ்ஸ அனுத்³த⁴டத்தா.
13. Ye paccayasamavāye tenattabhāvena saccāni paṭivijjhituṃ samatthā, te bāhirakaliṅge ṭhitāpi teneva tattha samatthatāyogena bhāvinaṃ samitabāhitapāpataṃ apekkhitvā samaṇasammatāyeva brāhmaṇasammatāyevāti te nivattetuṃ ‘‘saccāni paṭivijjhituṃ asamatthā’’ti vuttaṃ. Dukkhasaccavasenāti dukkhaariyasaccavasena. Aññathā kathaṃ bāhirakāpi jarāmaraṇaṃ dukkhanti na jānanti. Saccadesanābhāvato ‘‘saha taṇhāyā’’ti vuttanti keci. Taṃ na suṭṭhu. Yasmā tattha tattha bhave paṭhamābhinibbatti, idha jātīti adhippetā, sā ca taṇhā eva santānena, taṇheva sā jāti. Jarāmaraṇañcettha pākaṭameva adhippetaṃ, na khaṇikaṃ, tasmā sataṇhā eva jātijarāmaraṇassa samudayoti bhūtakathanametaṃ daṭṭhabbaṃ. Samudayasaccavasena na jānantīti yojanā. Esa nayo sesapadesupi. Sabbapadesūti yattha taṇhā visesanabhāvena vattabbā, tesu sabbapadesu. Yena samannāgatattā puggalo paramatthato samaṇo brāhmaṇoti vuccati, taṃ sāmaññaṃ brahmaññañcāti āha ‘‘ariya…pe… brahmaññañcā’’ti. Yena hi pavattinimittena samaṇa-saddo brāhmaṇa-saddo ca sake atthe niruḷho, tassa vasena abhinnopi veneyyajjhāsayato dvidhā katvā vattuṃ arahatīti vuttaṃ ‘‘ubhayatthāpī’’ti. Ekādasasu ṭhānesu cattāri saccāni kathesi avijjāsamudayassa anuddhaṭattā.
ஸமணப்³ராஹ்மணஸுத்தவண்ணனா நிட்டி²தா.
Samaṇabrāhmaṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸமணப்³ராஹ்மணஸுத்தங் • 3. Samaṇabrāhmaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸமணப்³ராஹ்மணஸுத்தவண்ணனா • 3. Samaṇabrāhmaṇasuttavaṇṇanā
