| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. ஸமணமுண்டி³கஸுத்தவண்ணனா
8. Samaṇamuṇḍikasuttavaṇṇanā
260. ஏவங் மே ஸுதந்தி ஸமணமுண்டி³கஸுத்தங். தத்த² உக்³கா³ஹமானோதி தஸ்ஸ பரிப்³பா³ஜகஸ்ஸ நாமங். ஸுமனோதி பகதினாமங். கிஞ்சி கிஞ்சி பன உக்³க³ஹிதுங் உக்³கா³ஹேதுங் ஸமத்த²தாய உக்³கா³ஹமானோதி நங் ஸஞ்ஜானந்தி. ஸமயங் பவத³ந்தி எத்தா²தி ஸமயப்பவாத³கங். தஸ்மிங் கிர டா²னே சங்கீதாருக்க²பொக்க²ரஸாதிப்பபு⁴தயோ ப்³ராஹ்மணா நிக³ண்டா²சேலகபரிப்³பா³ஜகாத³யோ ச பப்³ப³ஜிதா ஸன்னிபதித்வா அத்தனோ அத்தனோ ஸமயங் பவத³ந்தி கதெ²ந்தி தீ³பெந்தி, தஸ்மா ஸோ ஆராமோ ஸமயப்பவாத³கோதி வுச்சதி. ஸ்வேவ திந்து³காசீரஸங்கா²தாய திம்ப³ரூஸகருக்க²பந்தியா பரிக்கி²த்தத்தா திந்து³காசீரங். யஸ்மா பனெத்த² பட²மங் ஏகா ஸாலா அஹோஸி, பச்சா² மஹாபுஞ்ஞங் பொட்ட²பாத³பரிப்³பா³ஜகங் நிஸ்ஸாய ப³ஹூ ஸாலா கதா, தஸ்மா தமேவ ஏகங் ஸாலங் உபாதா³ய லத்³த⁴னாமவஸேன ஏகஸாலகோதி வுச்சதி. மல்லிகாய பன பஸேனதி³ரஞ்ஞோ தே³வியா உய்யானபூ⁴தோ ஸோ புப்ப²ப²லஸஞ்ச²ன்னோ ஆராமோதி கத்வா மல்லிகாய ஆராமோதி ஸங்க²ங் க³தோ. தஸ்மிங் ஸமயப்பவாத³கே திந்து³காசீரே ஏகஸாலகே மல்லிகாய ஆராமே. படிவஸதீதி வாஸபா²ஸுதாய வஸதி. தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹாதிக்கமோ, தஸ்மிங் தி³வஸஸ்ஸபி தி³வாபூ⁴தே அதிக்கந்தமத்தே மஜ்ஜ²ன்ஹிகே நிக்க²மீதி அத்தோ². படிஸல்லீனோதி ததோ ததோ ரூபாதி³கோ³சரதோ சித்தங் படிஸங்ஹரித்வா லீனோ, ஜா²னரதிஸேவனவஸேன ஏகீபா⁴வங் க³தோ. மனோபா⁴வனீயானந்தி மனவட்³ட⁴னகானங், யே ஆவஜ்ஜதோ மனஸிகரோதோ சித்தங் வினீவரணங் ஹோதி உன்னமதி வட்³ட⁴தி. யாவதாதி யத்தகா. அயங் தேஸங் அஞ்ஞதரோதி அயங் தேஸங் அப்³ப⁴ந்தரோ ஏகோ ஸாவகோ. அப்பேவ நாமாதி தஸ்ஸ உபஸங்கமனங் பத்த²யமானோ ஆஹ. பத்த²னாகாரணங் பன ஸந்த³கஸுத்தே வுத்தமேவ.
260.Evaṃme sutanti samaṇamuṇḍikasuttaṃ. Tattha uggāhamānoti tassa paribbājakassa nāmaṃ. Sumanoti pakatināmaṃ. Kiñci kiñci pana uggahituṃ uggāhetuṃ samatthatāya uggāhamānoti naṃ sañjānanti. Samayaṃ pavadanti etthāti samayappavādakaṃ. Tasmiṃ kira ṭhāne caṅkītārukkhapokkharasātippabhutayo brāhmaṇā nigaṇṭhācelakaparibbājakādayo ca pabbajitā sannipatitvā attano attano samayaṃ pavadanti kathenti dīpenti, tasmā so ārāmo samayappavādakoti vuccati. Sveva tindukācīrasaṅkhātāya timbarūsakarukkhapantiyā parikkhittattā tindukācīraṃ. Yasmā panettha paṭhamaṃ ekā sālā ahosi, pacchā mahāpuññaṃ poṭṭhapādaparibbājakaṃ nissāya bahū sālā katā, tasmā tameva ekaṃ sālaṃ upādāya laddhanāmavasena ekasālakoti vuccati. Mallikāya pana pasenadirañño deviyā uyyānabhūto so pupphaphalasañchanno ārāmoti katvā mallikāya ārāmoti saṅkhaṃ gato. Tasmiṃ samayappavādake tindukācīre ekasālake mallikāya ārāme. Paṭivasatīti vāsaphāsutāya vasati. Divā divassāti divasassa divā nāma majjhanhātikkamo, tasmiṃ divasassapi divābhūte atikkantamatte majjhanhike nikkhamīti attho. Paṭisallīnoti tato tato rūpādigocarato cittaṃ paṭisaṃharitvā līno, jhānaratisevanavasena ekībhāvaṃ gato. Manobhāvanīyānanti manavaḍḍhanakānaṃ, ye āvajjato manasikaroto cittaṃ vinīvaraṇaṃ hoti unnamati vaḍḍhati. Yāvatāti yattakā. Ayaṃ tesaṃ aññataroti ayaṃ tesaṃ abbhantaro eko sāvako. Appeva nāmāti tassa upasaṅkamanaṃ patthayamāno āha. Patthanākāraṇaṃ pana sandakasutte vuttameva.
261. ஏதத³வோசாதி த³ந்த³பஞ்ஞோ அயங் க³ஹபதி, த⁴ம்மகதா²ய நங் ஸங்க³ண்ஹித்வா அத்தனோ ஸாவகங் கரிஸ்ஸாமீதி மஞ்ஞமானோ ஏதங் ‘‘சதூஹி கோ²’’திஆதி³வசனங் அவோச. தத்த² பஞ்ஞ்பேமீதி த³ஸ்ஸேமி ட²பேமி. ஸம்பன்னகுஸலந்தி பரிபுண்ணகுஸலங். பரமகுஸலந்தி உத்தமகுஸலங். அயொஜ்ஜ²ந்தி வாத³யுத்³தே⁴ன யுஜ்ஜி²த்வா சாலேதுங் அஸக்குணெய்யங் அசலங் நிக்கம்பங் தி²ரங். ந கரோதீதி அகரணமத்தமேவ வத³தி, எத்த² பன ஸங்வரப்பஹானங் வா படிஸேவனப்பஹானங் வா ந வத³தி. ஸேஸபதே³ஸுபி ஏஸேவ நயோ.
261.Etadavocāti dandapañño ayaṃ gahapati, dhammakathāya naṃ saṅgaṇhitvā attano sāvakaṃ karissāmīti maññamāno etaṃ ‘‘catūhi kho’’tiādivacanaṃ avoca. Tattha paññpemīti dassemi ṭhapemi. Sampannakusalanti paripuṇṇakusalaṃ. Paramakusalanti uttamakusalaṃ. Ayojjhanti vādayuddhena yujjhitvā cāletuṃ asakkuṇeyyaṃ acalaṃ nikkampaṃ thiraṃ. Na karotīti akaraṇamattameva vadati, ettha pana saṃvarappahānaṃ vā paṭisevanappahānaṃ vā na vadati. Sesapadesupi eseva nayo.
நேவ அபி⁴னந்தீ³தி தித்தி²யா நாம ஜானித்வாபி அஜானித்வாபி யங் வா தங் வா வத³ந்தீதி மஞ்ஞமானோ நாபி⁴னந்தி³. ந படிக்கோஸீதி ஸாஸனஸ்ஸ அனுலோமங் விய பஸன்னாகாரங் விய வத³தீதி மஞ்ஞமானோ ந படிஸேதே⁴தி.
Neva abhinandīti titthiyā nāma jānitvāpi ajānitvāpi yaṃ vā taṃ vā vadantīti maññamāno nābhinandi. Na paṭikkosīti sāsanassa anulomaṃ viya pasannākāraṃ viya vadatīti maññamāno na paṭisedheti.
262. யதா² உக்³கா³ஹமானஸ்ஸாதி யதா² தஸ்ஸ வசனங், ஏவங் ஸந்தே உத்தானஸெய்யகோ குமாரோ அயொஜ்ஜ²ஸமணோ தி²ரஸமணோ ப⁴விஸ்ஸதி, மயங் பன ஏவங் ந வதா³மாதி தீ³பேதி. காயோதிபி ந ஹோதீதி ஸககாயோ பரகாயோதிபி விஸேஸஞாணங் ந ஹோதி. அஞ்ஞத்ர ப²ந்தி³தமத்தாதி பச்சத்த²ரணே வலிஸம்ப²ஸ்ஸேன வா மங்கு³லத³ட்டே²ன வா காயப²ந்த³னமத்தங் நாம ஹோதி. தங் ட²பெத்வா அஞ்ஞங் காயேன கரணகம்மங் நாம நத்தி². தம்பி ச கிலேஸஸஹக³தசித்தேனேவ ஹோதி. வாசாதிபி ந ஹோதீதி மிச்சா²வாசா ஸம்மாவாசாதிபி நானத்தங் ந ஹோதி. ரோதி³தமத்தாதி ஜிக⁴ச்சா²பிபாஸாபரேதஸ்ஸ பன ரோதி³தமத்தங் ஹோதி. தம்பி கிலேஸஸஹக³தசித்தேனேவ. ஸங்கப்போதி மிச்சா²ஸங்கப்போ ஸம்மாஸங்கப்போதிபி நானத்தங் ந ஹோதி. விகூஜிதமத்தாதி விகூஜிதமத்தங் ரோத³னஹஸிதமத்தங் ஹோதி. த³ஹரகுமாரகானஞ்ஹி சித்தங் அதீதாரம்மணங் பவத்ததி, நிரயதோ ஆக³தா நிரயது³க்க²ங் ஸரித்வா ரோத³ந்தி, தே³வலோகதோ ஆக³தா ஹஸந்தி, தம்பி கிலேஸஸஹக³தசித்தேனேவ ஹோதி. ஆஜீவோதி மிச்சா²ஜீவோ ஸம்மாஜீவோதிபி நானத்தங் ந ஹோதி. அஞ்ஞத்ர மாதுத²ஞ்ஞாதி த²ஞ்ஞசோரதா³ரகா நாம ஹொந்தி, மாதரி கீ²ரங் பாயந்தியா அபிவித்வா அஞ்ஞவிஹிதகாலே பிட்டி²பஸ்ஸேன ஆக³ந்த்வா த²ஞ்ஞங் பிவந்தி. எத்தகங் முஞ்சித்வா அஞ்ஞோ மிச்சா²ஜீவோ நத்தி². அயம்பி கிலேஸஸஹக³தசித்தேனேவ ஹோதீதி த³ஸ்ஸேதி.
262.Yathā uggāhamānassāti yathā tassa vacanaṃ, evaṃ sante uttānaseyyako kumāro ayojjhasamaṇo thirasamaṇo bhavissati, mayaṃ pana evaṃ na vadāmāti dīpeti. Kāyotipi na hotīti sakakāyo parakāyotipi visesañāṇaṃ na hoti. Aññatraphanditamattāti paccattharaṇe valisamphassena vā maṅguladaṭṭhena vā kāyaphandanamattaṃ nāma hoti. Taṃ ṭhapetvā aññaṃ kāyena karaṇakammaṃ nāma natthi. Tampi ca kilesasahagatacitteneva hoti. Vācātipi na hotīti micchāvācā sammāvācātipi nānattaṃ na hoti. Roditamattāti jighacchāpipāsāparetassa pana roditamattaṃ hoti. Tampi kilesasahagatacitteneva. Saṅkappoti micchāsaṅkappo sammāsaṅkappotipi nānattaṃ na hoti. Vikūjitamattāti vikūjitamattaṃ rodanahasitamattaṃ hoti. Daharakumārakānañhi cittaṃ atītārammaṇaṃ pavattati, nirayato āgatā nirayadukkhaṃ saritvā rodanti, devalokato āgatā hasanti, tampi kilesasahagatacitteneva hoti. Ājīvoti micchājīvo sammājīvotipi nānattaṃ na hoti. Aññatra mātuthaññāti thaññacoradārakā nāma honti, mātari khīraṃ pāyantiyā apivitvā aññavihitakāle piṭṭhipassena āgantvā thaññaṃ pivanti. Ettakaṃ muñcitvā añño micchājīvo natthi. Ayampi kilesasahagatacitteneva hotīti dasseti.
263. ஏவங் பரிப்³பா³ஜகவாத³ங் படிக்கி²பித்வா இதா³னி ஸயங் ஸெக்க²பூ⁴மியங் மாதிகங் ட²பெந்தோ சதூஹி கோ² அஹந்திஆதி³மாஹ. தத்த² ஸமதி⁴க³ய்ஹ திட்ட²தீதி விஸேஸெத்வா திட்ட²தி. ந காயேன பாப கம்மந்திஆதீ³ஸு ந கேவலங் அகரணமத்தமேவ, ப⁴க³வா பன எத்த² ஸங்வரப்பஹானபடிஸங்கா² பஞ்ஞபேதி. தங் ஸந்தா⁴யேவமாஹ. ந சேவ ஸம்பன்னகுஸலந்திஆதி³ பன கீ²ணாஸவங் ஸந்தா⁴ய வுத்தங்.
263. Evaṃ paribbājakavādaṃ paṭikkhipitvā idāni sayaṃ sekkhabhūmiyaṃ mātikaṃ ṭhapento catūhi kho ahantiādimāha. Tattha samadhigayha tiṭṭhatīti visesetvā tiṭṭhati. Nakāyena pāpa kammantiādīsu na kevalaṃ akaraṇamattameva, bhagavā pana ettha saṃvarappahānapaṭisaṅkhā paññapeti. Taṃ sandhāyevamāha. Na ceva sampannakusalantiādi pana khīṇāsavaṃ sandhāya vuttaṃ.
இதா³னி அஸெக்க²பூ⁴மியங் மாதிகங் ட²பெந்தோ த³ஸஹி கோ² அஹந்திஆதி³மாஹ. தத்த² தீணி பதா³னி நிஸ்ஸாய த்³வே பட²மசதுக்கா ட²பிதா, ஏகங் பத³ங் நிஸ்ஸாய த்³வே பச்சி²மசதுக்கா. அயங் ஸெக்க²பூ⁴மியங் மாதிகா.
Idāni asekkhabhūmiyaṃ mātikaṃ ṭhapento dasahi kho ahantiādimāha. Tattha tīṇi padāni nissāya dve paṭhamacatukkā ṭhapitā, ekaṃ padaṃ nissāya dve pacchimacatukkā. Ayaṃ sekkhabhūmiyaṃ mātikā.
264. இதா³னி தங் விப⁴ஜந்தோ கதமே ச த²பதி அகுஸலஸீலாதிஆதி³மாஹ. தத்த² ஸராக³ந்தி அட்ட²வித⁴ங் லோப⁴ஸஹக³தசித்தங். ஸதோ³ஸந்தி படிக⁴ஸம்பயுத்தசித்தத்³வயங். ஸமோஹந்தி விசிகிச்சு²த்³த⁴ச்சஸஹக³தசித்தத்³வயம்பி வட்டதி, ஸப்³பா³குஸலசித்தானிபி. மோஹோ ஸப்³பா³குஸலே உப்பஜ்ஜதீதி ஹி வுத்தங். இதோஸமுட்டா²னாதி இதோ ஸராகா³தி³சித்ததோ ஸமுட்டா²னங் உப்பத்தி ஏதேஸந்தி இதோஸமுட்டா²னா.
264. Idāni taṃ vibhajanto katame ca thapati akusalasīlātiādimāha. Tattha sarāganti aṭṭhavidhaṃ lobhasahagatacittaṃ. Sadosanti paṭighasampayuttacittadvayaṃ. Samohanti vicikicchuddhaccasahagatacittadvayampi vaṭṭati, sabbākusalacittānipi. Moho sabbākusale uppajjatīti hi vuttaṃ. Itosamuṭṭhānāti ito sarāgādicittato samuṭṭhānaṃ uppatti etesanti itosamuṭṭhānā.
குஹிந்தி கதரங் டா²னங் பாபுணித்வா அபரிஸேஸா நிருஜ்ஜ²ந்தி. எத்தே²தேதி ஸோதாபத்திப²லே பு⁴ம்மங். பாதிமொக்க²ஸங்வரஸீலஞ்ஹி ஸோதாபத்திப²லே பரிபுண்ணங் ஹோதி, தங் டா²னங் பத்வா அகுஸலஸீலங் அஸேஸங் நிருஜ்ஜ²தி. அகுஸலஸீலந்தி ச து³ஸ்ஸீலஸ்ஸேதங் அதி⁴வசனந்தி வேதி³தப்³ப³ங்.
Kuhinti kataraṃ ṭhānaṃ pāpuṇitvā aparisesā nirujjhanti. Ettheteti sotāpattiphale bhummaṃ. Pātimokkhasaṃvarasīlañhi sotāpattiphale paripuṇṇaṃ hoti, taṃ ṭhānaṃ patvā akusalasīlaṃ asesaṃ nirujjhati. Akusalasīlanti ca dussīlassetaṃ adhivacananti veditabbaṃ.
அகுஸலானங் ஸீலானங் நிரோதா⁴ய படிபன்னோதி எத்த² யாவ ஸோதாபத்திமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹொந்தி.
Akusalānaṃ sīlānaṃ nirodhāya paṭipannoti ettha yāva sotāpattimaggā nirodhāya paṭipanno nāma hoti, phalapatte pana te nirodhitā nāma honti.
265. வீதராக³ந்திஆதீ³ஹி அட்ட²வித⁴ங் காமாவசரகுஸலசித்தமேவ வுத்தங். ஏதேன ஹி குஸலஸீலங் ஸமுட்டா²தி.
265.Vītarāgantiādīhi aṭṭhavidhaṃ kāmāvacarakusalacittameva vuttaṃ. Etena hi kusalasīlaṃ samuṭṭhāti.
ஸீலவா ஹோதீதி ஸீலஸம்பன்னோ ஹோதி கு³ணஸம்பன்னோ ச. நோ ச ஸீலமயோதி அலமெத்தாவதா, நத்தி² இதோ கிஞ்சி உத்தரி கரணீயந்தி ஏவங் ஸீலமயோ ந ஹோதி. யத்த²ஸ்ஸ தேதி அரஹத்தப²லே பு⁴ம்மங். அரஹத்தப²லஞ்ஹி பத்வா அகுஸலஸீலங் அஸேஸங் நிருஜ்ஜ²தி.
Sīlavā hotīti sīlasampanno hoti guṇasampanno ca. No ca sīlamayoti alamettāvatā, natthi ito kiñci uttari karaṇīyanti evaṃ sīlamayo na hoti. Yatthassa teti arahattaphale bhummaṃ. Arahattaphalañhi patvā akusalasīlaṃ asesaṃ nirujjhati.
நிரோதா⁴ய படிபன்னோதி எத்த² யாவ அரஹத்தமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹொந்தி.
Nirodhāya paṭipannoti ettha yāva arahattamaggā nirodhāya paṭipanno nāma hoti, phalapatte pana te nirodhitā nāma honti.
266. காமஸஞ்ஞாதீ³ஸு காமஸஞ்ஞா அட்ட²லோப⁴ஸஹக³தசித்தஸஹஜாதா, இதரா த்³வே தோ³மனஸ்ஸஸஹக³தசித்தத்³வயேன ஸஹஜாதா.
266.Kāmasaññādīsu kāmasaññā aṭṭhalobhasahagatacittasahajātā, itarā dve domanassasahagatacittadvayena sahajātā.
பட²மங் ஜா²னந்தி அனாகா³மிப²லபட²மஜ்ஜா²னங். எத்தே²தேதி அனாகா³மிப²லே பு⁴ம்மங். அனாகா³மிப²லஞ்ஹி பத்வா அகுஸலஸங்கப்பா அபரிஸேஸா நிருஜ்ஜ²ந்தி.
Paṭhamaṃjhānanti anāgāmiphalapaṭhamajjhānaṃ. Ettheteti anāgāmiphale bhummaṃ. Anāgāmiphalañhi patvā akusalasaṅkappā aparisesā nirujjhanti.
நிரோதா⁴ய படிபன்னோதி எத்த² யாவ அனாகா³மிமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹொந்தி. நெக்க²ம்மஸஞ்ஞாத³யோ ஹி திஸ்ஸோபி அட்ட²காமாவசரகுஸலஸஹஜாதஸஞ்ஞாவ.
Nirodhāya paṭipannoti ettha yāva anāgāmimaggā nirodhāya paṭipanno nāma hoti, phalapatte pana te nirodhitā nāma honti. Nekkhammasaññādayo hi tissopi aṭṭhakāmāvacarakusalasahajātasaññāva.
267. எத்தே²தேதி அரஹத்தப²லே பு⁴ம்மங். து³தியஜ்ஜா²னிகங் அரஹத்தப²லஞ்ஹி பாபுணித்வா குஸலஸங்கப்பா அபரிஸேஸா நிருஜ்ஜ²ந்தி. நிரோதா⁴ய படிபன்னோதி எத்த² யாவ அரஹத்தமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹொந்தி. ஸேஸங் ஸப்³ப³த்த² உத்தானமேவாதி.
267.Ettheteti arahattaphale bhummaṃ. Dutiyajjhānikaṃ arahattaphalañhi pāpuṇitvā kusalasaṅkappā aparisesā nirujjhanti. Nirodhāya paṭipannoti ettha yāva arahattamaggā nirodhāya paṭipanno nāma hoti, phalapatte pana te nirodhitā nāma honti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸமணமுண்டி³கஸுத்தவண்ணனா நிட்டி²தா.
Samaṇamuṇḍikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. ஸமணமுண்டி³கஸுத்தங் • 8. Samaṇamuṇḍikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. ஸமணமுண்டி³காபுத்தஸுத்தவண்ணனா • 8. Samaṇamuṇḍikāputtasuttavaṇṇanā
