| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஸமனுபஸ்ஸனாஸுத்தவண்ணனா
5. Samanupassanāsuttavaṇṇanā
47. பரிபுண்ணகா³ஹவஸேனாதி பஞ்சக்க²ந்தே⁴ அஸேஸெத்வா ஏகஜ்ஜ²ங் ‘‘அத்தா’’தி க³ஹணவஸேன. ஏதேஸங் பஞ்சன்னங் உபாதா³னக்க²ந்தா⁴னங் அஞ்ஞதரங் ‘‘அத்தா’’தி ஸமனுபஸ்ஸந்தி. இதீதி ஏவங். யஸ்ஸ புக்³க³லஸ்ஸ அயங் அத்ததி³ட்டி²ஸங்கா²தா ஸமனுபஸ்ஸனா அத்தி² படிபக்கே²ன அவிஹதத்தா ஸங்விஜ்ஜதி. பஞ்சன்னங் இந்த்³ரியானந்தி சக்கா²தீ³னங் இந்த்³ரியானங்.
47.Paripuṇṇagāhavasenāti pañcakkhandhe asesetvā ekajjhaṃ ‘‘attā’’ti gahaṇavasena. Etesaṃ pañcannaṃ upādānakkhandhānaṃ aññataraṃ ‘‘attā’’ti samanupassanti. Itīti evaṃ. Yassa puggalassa ayaṃ attadiṭṭhisaṅkhātā samanupassanā atthi paṭipakkhena avihatattā saṃvijjati. Pañcannaṃ indriyānanti cakkhādīnaṃ indriyānaṃ.
ஆரம்மணந்தி கம்மவிஞ்ஞாணஸ்ஸ ஆரம்மணங். மானவஸேன ச தி³ட்டி²வஸேன ச ‘‘அஸ்மீ’’தி கா³ஹே ஸிஜ்ஜ²ந்தே தங்ஸஹக³தா தண்ஹாபி தக்³க³ஹிதாவ ஹோதீதி வுத்தங் ‘‘தண்ஹாமானதி³ட்டி²வஸேன அஸ்மீதி ஏவம்பிஸ்ஸ ஹோதீ’’தி. க³ஹெத்வாதி அஹங்காரவத்து²வஸேன க³ஹெத்வா. அயங் அஹமஸ்மீதி அயங் சக்கா²தி³கோ, ஸுகா²தி³கோ வா அஹமஸ்மி. ‘‘ரூபீ அத்தா அரோகோ³ பரங் மரணா’’தி ஏவமாதி³க³ஹணவஸேன பவத்தனதோ வுத்தங் ‘‘ரூபீ ப⁴விஸ்ஸந்திஆதீ³னி ஸப்³பா³னி ஸஸ்ஸதமேவ ப⁴ஜந்தீ’’தி. விபஸ்ஸனாபி⁴னிவேஸதோ புப்³பே³ யதே²வாகாரானி பஞ்சிந்த்³ரியானி, அத² விபஸ்ஸனாபி⁴னிவேஸதோ பரங் தேனேவாகாரேன டி²தேஸு சக்கா²தீ³ஸு இந்த்³ரியேஸு அவிஜ்ஜா பஹீயதி விபஸ்ஸனங் வட்³ட⁴எத்வா மக்³க³ஸ்ஸ உப்பாத³னேன, அத² மக்³க³பரம்பராய அரஹத்தமக்³க³விஜ்ஜா உப்பஜ்ஜதி. தண்ஹாமானதி³ட்டி²யோ கம்மஸம்பா⁴ரபா⁴வதோ. கம்மஸ்ஸ…பே॰… ஏகோ ஸந்தீ⁴தி ஹேதுப²லஸந்தி⁴. புன ஏகோ ஸந்தீ⁴தி ப²லஹேதுஸந்தி⁴மாஹ. தயோ பபஞ்சா அதீதோ அத்³தா⁴ அதீதப⁴வஅத்³தா⁴னங் தேஸங் அதி⁴ப்பேதத்தா. அனாக³தஸ்ஸ பச்சயோ த³ஸ்ஸிதோ அஸ்ஸுதவதோ புது²ஜ்ஜனஸ்ஸ வஸேன. ஸுதவதோ பன அரியஸாவகஸ்ஸ வஸேன வட்டஸ்ஸ வூபஸமோ த³ஸ்ஸிதோதி.
Ārammaṇanti kammaviññāṇassa ārammaṇaṃ. Mānavasena ca diṭṭhivasena ca ‘‘asmī’’ti gāhe sijjhante taṃsahagatā taṇhāpi taggahitāva hotīti vuttaṃ ‘‘taṇhāmānadiṭṭhivasena asmīti evampissa hotī’’ti. Gahetvāti ahaṃkāravatthuvasena gahetvā. Ayaṃ ahamasmīti ayaṃ cakkhādiko, sukhādiko vā ahamasmi. ‘‘Rūpī attā arogo paraṃ maraṇā’’ti evamādigahaṇavasena pavattanato vuttaṃ ‘‘rūpī bhavissantiādīni sabbāni sassatameva bhajantī’’ti. Vipassanābhinivesato pubbe yathevākārāni pañcindriyāni, atha vipassanābhinivesato paraṃ tenevākārena ṭhitesu cakkhādīsu indriyesu avijjā pahīyati vipassanaṃ vaḍḍhaetvā maggassa uppādanena, atha maggaparamparāya arahattamaggavijjā uppajjati. Taṇhāmānadiṭṭhiyo kammasambhārabhāvato. Kammassa…pe… eko sandhīti hetuphalasandhi. Puna eko sandhīti phalahetusandhimāha. Tayo papañcā atīto addhā atītabhavaaddhānaṃ tesaṃ adhippetattā. Anāgatassa paccayo dassito assutavato puthujjanassa vasena. Sutavato pana ariyasāvakassa vasena vaṭṭassa vūpasamo dassitoti.
ஸமனுபஸ்ஸனாஸுத்தவண்ணனா நிட்டி²தா.
Samanupassanāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஸமனுபஸ்ஸனாஸுத்தங் • 5. Samanupassanāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸமனுபஸ்ஸனாஸுத்தவண்ணனா • 5. Samanupassanāsuttavaṇṇanā
