| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. ஸமித்³தி⁴ஸுத்தங்
4. Samiddhisuttaṃ
14. அத² கோ² ஆயஸ்மா ஸமித்³தி⁴ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மந்தங் ஸாரிபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஸமித்³தி⁴ங் ஆயஸ்மா ஸாரிபுத்தோ ஏதத³வோச – ‘‘கிமாரம்மணா, ஸமித்³தி⁴, புரிஸஸ்ஸ ஸங்கப்பவிதக்கா உப்பஜ்ஜந்தீ’’தி? ‘‘நாமரூபாரம்மணா, ப⁴ந்தே’’தி. ‘‘தே பன, ஸமித்³தி⁴, க்வ நானத்தங் க³ச்ச²ந்தீ’’தி? ‘‘தா⁴தூஸு, ப⁴ந்தே’’தி. ‘‘தே பன, ஸமித்³தி⁴, கிங்ஸமுத³யா’’தி? ‘‘ப²ஸ்ஸஸமுத³யா, ப⁴ந்தே’’தி. ‘‘தே பன, ஸமித்³தி⁴, கிங்ஸமோஸரணா’’தி? ‘‘வேத³னாஸமோஸரணா, ப⁴ந்தே’’தி. ‘‘தே பன , ஸமித்³தி⁴, கிங்பமுகா²’’தி? ‘‘ஸமாதி⁴ப்பமுகா², ப⁴ந்தே’’தி. ‘‘தே பன, ஸமித்³தி⁴, கிங்அதி⁴பதெய்யா’’தி? ‘‘ஸதாதி⁴பதெய்யா, ப⁴ந்தே’’தி. ‘‘தே பன, ஸமித்³தி⁴, கிங்உத்தரா’’தி? ‘‘பஞ்ஞுத்தரா, ப⁴ந்தே’’தி. ‘‘தே பன, ஸமித்³தி⁴, கிங்ஸாரா’’தி? ‘‘விமுத்திஸாரா, ப⁴ந்தே’’தி. ‘‘தே பன, ஸமித்³தி⁴, கிங்ஓக³தா⁴’’தி? ‘‘அமதோக³தா⁴, ப⁴ந்தே’’தி.
14. Atha kho āyasmā samiddhi yenāyasmā sāriputto tenupasaṅkami; upasaṅkamitvā āyasmantaṃ sāriputtaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ samiddhiṃ āyasmā sāriputto etadavoca – ‘‘kimārammaṇā, samiddhi, purisassa saṅkappavitakkā uppajjantī’’ti? ‘‘Nāmarūpārammaṇā, bhante’’ti. ‘‘Te pana, samiddhi, kva nānattaṃ gacchantī’’ti? ‘‘Dhātūsu, bhante’’ti. ‘‘Te pana, samiddhi, kiṃsamudayā’’ti? ‘‘Phassasamudayā, bhante’’ti. ‘‘Te pana, samiddhi, kiṃsamosaraṇā’’ti? ‘‘Vedanāsamosaraṇā, bhante’’ti. ‘‘Te pana , samiddhi, kiṃpamukhā’’ti? ‘‘Samādhippamukhā, bhante’’ti. ‘‘Te pana, samiddhi, kiṃadhipateyyā’’ti? ‘‘Satādhipateyyā, bhante’’ti. ‘‘Te pana, samiddhi, kiṃuttarā’’ti? ‘‘Paññuttarā, bhante’’ti. ‘‘Te pana, samiddhi, kiṃsārā’’ti? ‘‘Vimuttisārā, bhante’’ti. ‘‘Te pana, samiddhi, kiṃogadhā’’ti? ‘‘Amatogadhā, bhante’’ti.
‘‘‘கிமாரம்மணா, ஸமித்³தி⁴, புரிஸஸ்ஸ ஸங்கப்பவிதக்கா உப்பஜ்ஜந்தீ’தி, இதி புட்டோ² ஸமானோ ‘நாமரூபாரம்மணா, ப⁴ந்தே’தி வதே³ஸி. ‘தே பன, ஸமித்³தி⁴, க்வ நானத்தங் க³ச்ச²ந்தீ’தி, இதி புட்டோ² ஸமானோ ‘தா⁴தூஸு, ப⁴ந்தே’தி வதே³ஸி. ‘தே பன, ஸமித்³தி⁴, கிங்ஸமுத³யா’தி, இதி புட்டோ² ஸமானோ ‘ப²ஸ்ஸஸமுத³யா, ப⁴ந்தே’தி வதே³ஸி. ‘தே பன, ஸமித்³தி⁴, கிங்ஸமோஸரணா’தி, இதி புட்டோ² ஸமானோ ‘வேத³னாஸமோஸரணா, ப⁴ந்தே’தி வதே³ஸி. ‘தே பன, ஸமித்³தி⁴, கிங்பமுகா²’தி, இதி புட்டோ² ஸமானோ ‘ஸமாதி⁴ப்பமுகா², ப⁴ந்தே’தி வதே³ஸி. ‘தே பன, ஸமித்³தி⁴, கிங்அதி⁴பதெய்யா’தி, இதி புட்டோ² ஸமானோ ‘ஸதாதி⁴பதெய்யா, ப⁴ந்தே’தி வதே³ஸி. ‘தே பன, ஸமித்³தி⁴, கிங்உத்தரா’தி, இதி புட்டோ² ஸமானோ ‘பஞ்ஞுத்தரா, ப⁴ந்தே’தி வதே³ஸி. ‘தே பன, ஸமித்³தி⁴, கிங்ஸாரா’தி, இதி புட்டோ² ஸமானோ ‘விமுத்திஸாரா, ப⁴ந்தே’தி வதே³ஸி. ‘தே பன, ஸமித்³தி⁴, கிங்ஓக³தா⁴’தி, இதி புட்டோ² ஸமானோ ‘அமதோக³தா⁴, ப⁴ந்தே’தி வதே³ஸி. ஸாது⁴ ஸாது⁴, ஸமித்³தி⁴! ஸாது⁴ கோ² த்வங், ஸமித்³தி⁴, புட்டோ² 1 புட்டோ² விஸ்ஸஜ்ஜேஸி, தேன ச மா மஞ்ஞீ’’தி. சதுத்த²ங்.
‘‘‘Kimārammaṇā, samiddhi, purisassa saṅkappavitakkā uppajjantī’ti, iti puṭṭho samāno ‘nāmarūpārammaṇā, bhante’ti vadesi. ‘Te pana, samiddhi, kva nānattaṃ gacchantī’ti, iti puṭṭho samāno ‘dhātūsu, bhante’ti vadesi. ‘Te pana, samiddhi, kiṃsamudayā’ti, iti puṭṭho samāno ‘phassasamudayā, bhante’ti vadesi. ‘Te pana, samiddhi, kiṃsamosaraṇā’ti, iti puṭṭho samāno ‘vedanāsamosaraṇā, bhante’ti vadesi. ‘Te pana, samiddhi, kiṃpamukhā’ti, iti puṭṭho samāno ‘samādhippamukhā, bhante’ti vadesi. ‘Te pana, samiddhi, kiṃadhipateyyā’ti, iti puṭṭho samāno ‘satādhipateyyā, bhante’ti vadesi. ‘Te pana, samiddhi, kiṃuttarā’ti, iti puṭṭho samāno ‘paññuttarā, bhante’ti vadesi. ‘Te pana, samiddhi, kiṃsārā’ti, iti puṭṭho samāno ‘vimuttisārā, bhante’ti vadesi. ‘Te pana, samiddhi, kiṃogadhā’ti, iti puṭṭho samāno ‘amatogadhā, bhante’ti vadesi. Sādhu sādhu, samiddhi! Sādhu kho tvaṃ, samiddhi, puṭṭho 2 puṭṭho vissajjesi, tena ca mā maññī’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ஸமித்³தி⁴ஸுத்தவண்ணனா • 4. Samiddhisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. ஸமித்³தி⁴ஸுத்தவண்ணனா • 4. Samiddhisuttavaṇṇanā
