| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. ஸமித்³தி⁴ஸுத்தவண்ணனா
2. Samiddhisuttavaṇṇanā
158. மய்ஹங் லாபா⁴தி ஏவரூபஸ்ஸ நாம ஸம்மாஸம்பு³த்³த⁴ஸ்ஸ ஸத்து²ஸ்ஸ படிலாபோ⁴, ஏவரூபஸ்ஸ ச நாம நிய்யானிகஸ்ஸ ஸத்³த⁴ம்மஸ்ஸ படிலாபோ⁴, ஏவரூபானஞ்ச ஸுப்படிபன்னானங் ஸப்³ரஹ்மசாரீனங் படிலாபோ⁴, ஏதே மய்ஹங் ஸுலத்³த⁴லாபா⁴. மய்ஹங் ஸுலத்³த⁴ந்தி யஞ்சேதங் மம நிய்யானிகஸாஸனே பப்³ப³ஜ்ஜா உபஸம்பதா³, தஸ்மிஞ்ச அபி⁴ரதீதி ஸப்³ப³ஞ்சேதங் மயா ஸுலத்³த⁴ங். யதா² பனஸ்ஸ ஏவங் சேதஸோ பரிவிதக்கோ உப்பன்னோ, தங் த³ஸ்ஸேதுங் ‘‘ஸோ கிரா’’திஆதி³ வுத்தங். சரிதானுரூபவஸேன க³ஹிதங் மூலகம்மட்டா²னங். பாஸாதி³கந்தி பஸாதா³வஹங். ஏவமஹோஸீதி ‘‘லாபா⁴ வத மே’’திஆதி³னா ஏவங் பரிவிதக்கோ அஹோஸி. நிஸின்னஸதி³ஸோதி நிஸின்னோ விய. தஸ்மிங்யேவ டா²னேதி யஸ்மிங் டா²னே நிஸின்னங் மாரோ உபஸங்கமி, தஸ்மிங்யேவ டா²னே. தஸ்ஸாதி ஸமித்³தி⁴த்தே²ரஸ்ஸ. கம்மட்டா²னங் ஸப்பாயந்தி கம்மட்டா²னபா⁴வனாய அனுயுஞ்ஜனங் ஸப்பாயங் உபகாராவஹங் ப⁴விஸ்ஸதி.
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
மய்ஹந்தி மயா. ஸதி ச பஞ்ஞா ச ஸதிபஞ்ஞா, தா அரியமக்³கே³ன ஜானநஸமத்த²னபா⁴வேன அவபு³த்³தா⁴. தே²ரோ கிர ததா³ விபஸ்ஸனங் உஸ்ஸுக்காபேஸி. காமந்தி யதா²ருசி. கேசி ‘‘காமங் கரஸ்ஸூதி ஆயஸ்மதோ ‘காமா’தி மாரஸ்ஸ ஆலபன’’ந்தி வத³ந்தி. விபி⁴ங்ஸகாரஹானீதி ப⁴யானகாரஹானி. ரூபானீதி விப்பகாரானி. விப்பகாரத்தோ²பி ஹி ரூபஸத்³தோ³ ‘‘ரூபங் த³ஸ்ஸேதி அனப்பக’’ந்திஆதீ³ஸு விய. ந கம்பெஸ்ஸஸீதி ஸமணத⁴ம்மகரணதோ ந சலிஸ்ஸஸி.
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
ஸமித்³தி⁴ஸுத்தவண்ணனா நிட்டி²தா.
Samiddhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. ஸமித்³தி⁴ஸுத்தங் • 2. Samiddhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. ஸமித்³தி⁴ஸுத்தவண்ணனா • 2. Samiddhisuttavaṇṇanā
