Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā)

    9. ஸம்மாதி³ட்டி²ஸுத்தவண்ணனா

    9. Sammādiṭṭhisuttavaṇṇanā

    89. ஏவங் மே ஸுதந்தி ஸம்மாதி³ட்டி²ஸுத்தங். தத்த² ‘‘ஸம்மாதி³ட்டி² ஸம்மாதி³ட்டீ²தி, ஆவுஸோ, வுச்சதி, கித்தாவதா நு கோ², ஆவுஸோ’’தி வா ‘‘கதமங் பனாவுஸோ , அகுஸல’’ந்தி வா ஏவங் யத்தகா தே²ரேன புச்சா² வுத்தா, ஸப்³பா³ கதே²துகம்யதா புச்சா² ஏவ.

    89.Evaṃme sutanti sammādiṭṭhisuttaṃ. Tattha ‘‘sammādiṭṭhi sammādiṭṭhīti, āvuso, vuccati, kittāvatā nu kho, āvuso’’ti vā ‘‘katamaṃ panāvuso , akusala’’nti vā evaṃ yattakā therena pucchā vuttā, sabbā kathetukamyatā pucchā eva.

    தத்த² யஸ்மா ஜானந்தாபி ஸம்மாதி³ட்டீ²தி வத³ந்தி அஜானந்தாபி பா³ஹிரகாபி ஸாஸனிகாபி அனுஸ்ஸவாதி³வஸேனாபி அத்தபச்சக்கே²னாபி, தஸ்மா தங் ப³ஹூனங் வசனங் உபாதா³ய த்³விக்க²த்துங் ஆமஸந்தோ ‘‘ஸம்மாதி³ட்டி² ஸம்மாதி³ட்டீ²தி, ஆவுஸோ, வுச்சதீ’’தி ஆஹ. அயஞ்ஹி எத்த² அதி⁴ப்பாயோ, அபரேஹிபி ஸம்மாதி³ட்டீ²தி வுச்சதி, அதா²பரேஹிபி ஸம்மாதி³ட்டீ²தி வுச்சதி, ஸ்வாயங் ஏவங் வுச்சமானோ அத்த²ஞ்ச லக்க²ணஞ்ச உபாதா³ய கித்தாவதா நு கோ², ஆவுஸோ, அரியஸாவகோ ஸம்மாதி³ட்டி² ஹோதீதி. தத்த² ஸம்மாதி³ட்டீ²தி ஸோப⁴னாய பஸத்தா²ய ச தி³ட்டி²யா ஸமன்னாக³தோ. யதா³ பன த⁴ம்மேயேவ அயங் ஸம்மாதி³ட்டி²ஸத்³தோ³ வத்ததி, ததா³ஸ்ஸ ஸோப⁴னா பஸத்தா² ச தி³ட்டி² ஸம்மாதி³ட்டீ²தி ஏவமத்தோ² வேதி³தப்³போ³.

    Tattha yasmā jānantāpi sammādiṭṭhīti vadanti ajānantāpi bāhirakāpi sāsanikāpi anussavādivasenāpi attapaccakkhenāpi, tasmā taṃ bahūnaṃ vacanaṃ upādāya dvikkhattuṃ āmasanto ‘‘sammādiṭṭhi sammādiṭṭhīti, āvuso, vuccatī’’ti āha. Ayañhi ettha adhippāyo, aparehipi sammādiṭṭhīti vuccati, athāparehipi sammādiṭṭhīti vuccati, svāyaṃ evaṃ vuccamāno atthañca lakkhaṇañca upādāya kittāvatā nu kho, āvuso, ariyasāvako sammādiṭṭhi hotīti. Tattha sammādiṭṭhīti sobhanāya pasatthāya ca diṭṭhiyā samannāgato. Yadā pana dhammeyeva ayaṃ sammādiṭṭhisaddo vattati, tadāssa sobhanā pasatthā ca diṭṭhi sammādiṭṭhīti evamattho veditabbo.

    ஸா சாயங் ஸம்மாதி³ட்டி² து³விதா⁴ ஹோதி லோகியா லோகுத்தராதி. தத்த² கம்மஸ்ஸகதாஞாணங் ஸச்சானுலோமிகஞாணஞ்ச லோகியா ஸம்மாதி³ட்டி², ஸங்கே²பதோ வா ஸப்³பா³பி ஸாஸவா பஞ்ஞா. அரியமக்³க³ப²லஸம்பயுத்தா பஞ்ஞா லோகுத்தரா ஸம்மாதி³ட்டி². புக்³க³லோ பன திவிதோ⁴ ஹோதி புது²ஜ்ஜனோ ஸெக்கோ² அஸெக்கோ² ச. தத்த² புது²ஜ்ஜனோ து³விதோ⁴ ஹோதி பா³ஹிரகோ ஸாஸனிகோ ச. தத்த² பா³ஹிரகோ கம்மவாதீ³ கம்மஸ்ஸகதாதி³ட்டி²யா ஸம்மாதி³ட்டி² ஹோதி, நோ ஸச்சானுலோமிகாய அத்ததி³ட்டி²பராமாஸகத்தா. ஸாஸனிகோ த்³வீஹிபி. ஸெக்கோ² நியதாய ஸம்மாதி³ட்டி²யா ஸம்மாதி³ட்டி². அஸெக்கோ² அஸெக்கா²ய. இத⁴ பன நியதாய நிய்யானிகாய லோகுத்தரகுஸலஸம்மாதி³ட்டி²யா ஸமன்னாக³தோ ‘‘ஸம்மாதி³ட்டீ²’’தி அதி⁴ப்பேதோ. தேனேவாஹ ‘‘உஜுக³தாஸ்ஸ தி³ட்டி² த⁴ம்மே அவேச்சப்பஸாதே³ன ஸமன்னாக³தோ ஆக³தோ இமங் ஸத்³த⁴ம்ம’’ந்தி, லோகுத்தரகுஸலஸம்மாதி³ட்டி²யேவ ஹி அந்தத்³வயமனுபக³ம்ம உஜுபா⁴வேன க³தத்தா , காயவங்காதீ³னி ச ஸப்³ப³வங்கானி ஸமுச்சி²ந்தி³த்வா க³தத்தா உஜுக³தா ஹோதி, தாயேவ ச தி³ட்டி²யா ஸமன்னாக³தோ நவப்பகாரேபி லோகுத்தரத⁴ம்மே அவேச்சப்பஸாதே³ன அசலப்பஸாதே³ன ஸமன்னாக³தோ ஹோதி, ஸப்³ப³தி³ட்டி²க³ஹனானி ச வினிப்³பே³டெ²ந்தோ ஸப்³ப³கிலேஸே பஜஹந்தோ ஜாதிஸங்ஸாரா நிக்க²மந்தோ படிபத்திங் பரினிட்ட²பெந்தோ அரியேன மக்³கே³ன ஆக³தோ இமங் ஸம்பு³த்³த⁴ப்பவேதி³தங் அமதோக³த⁴ங் நிப்³பா³னஸங்கா²தங் ஸத்³த⁴ம்மந்தி வுச்சதி.

    Sā cāyaṃ sammādiṭṭhi duvidhā hoti lokiyā lokuttarāti. Tattha kammassakatāñāṇaṃ saccānulomikañāṇañca lokiyā sammādiṭṭhi, saṅkhepato vā sabbāpi sāsavā paññā. Ariyamaggaphalasampayuttā paññā lokuttarā sammādiṭṭhi. Puggalo pana tividho hoti puthujjano sekkho asekkho ca. Tattha puthujjano duvidho hoti bāhirako sāsaniko ca. Tattha bāhirako kammavādī kammassakatādiṭṭhiyā sammādiṭṭhi hoti, no saccānulomikāya attadiṭṭhiparāmāsakattā. Sāsaniko dvīhipi. Sekkho niyatāya sammādiṭṭhiyā sammādiṭṭhi. Asekkho asekkhāya. Idha pana niyatāya niyyānikāya lokuttarakusalasammādiṭṭhiyā samannāgato ‘‘sammādiṭṭhī’’ti adhippeto. Tenevāha ‘‘ujugatāssa diṭṭhi dhamme aveccappasādena samannāgato āgato imaṃ saddhamma’’nti, lokuttarakusalasammādiṭṭhiyeva hi antadvayamanupagamma ujubhāvena gatattā , kāyavaṅkādīni ca sabbavaṅkāni samucchinditvā gatattā ujugatā hoti, tāyeva ca diṭṭhiyā samannāgato navappakārepi lokuttaradhamme aveccappasādena acalappasādena samannāgato hoti, sabbadiṭṭhigahanāni ca vinibbeṭhento sabbakilese pajahanto jātisaṃsārā nikkhamanto paṭipattiṃ pariniṭṭhapento ariyena maggena āgato imaṃ sambuddhappaveditaṃ amatogadhaṃ nibbānasaṅkhātaṃ saddhammanti vuccati.

    யதோ கோ²தி காலபரிச்சே²த³வசனமேதங், யஸ்மிங் காலேதி வுத்தங் ஹோதி. அகுஸலஞ்ச பஜானாதீதி த³ஸாகுஸலகம்மபத²ஸங்கா²தங் அகுஸலஞ்ச பஜானாதி, நிரோதா⁴ரம்மணாய பஜானநாய கிச்சவஸேன ‘‘இத³ங் து³க்க²’’ந்தி படிவிஜ்ஜ²ந்தோ அகுஸலங் பஜானாதி. அகுஸலமூலஞ்ச பஜானாதீதி தஸ்ஸ மூலபச்சயபூ⁴தங் அகுஸலமூலஞ்ச பஜானாதி, தேனேவ பகாரேன ‘‘அயங் து³க்க²ஸமுத³யோ’’தி படிவிஜ்ஜ²ந்தோ. ஏஸ நயோ குஸலஞ்ச குஸலமூலஞ்சாதி எத்தா²பி. யதா² செத்த², ஏவங் இதோ பரேஸு ஸப்³ப³வாரேஸு கிச்சவஸேனேவ வத்து²பஜானநா வேதி³தப்³பா³. எத்தாவதாபீதி எத்தகேன இமினா அகுஸலாதி³ப்பஜானநேனாபி. ஸம்மாதி³ட்டி² ஹோதீதி வுத்தப்பகாராய லோகுத்தரஸம்மாதி³ட்டி²யா ஸமன்னாக³தோ ஹோதி. உஜுக³தாஸ்ஸ…பே॰… இமங் ஸத்³த⁴ம்மந்தி எத்தாவதா ஸங்கி²த்ததே³ஸனா நிட்டி²தா ஹோதி. தே³ஸனாயேவ சேஸா ஸங்கி²த்தா, தேஸங் பன பி⁴க்கூ²னங் வித்தா²ரவஸேனேவ ஸம்மாமனஸிகாரப்படிவேதோ⁴ வேதி³தப்³போ³.

    Yato khoti kālaparicchedavacanametaṃ, yasmiṃ kāleti vuttaṃ hoti. Akusalañca pajānātīti dasākusalakammapathasaṅkhātaṃ akusalañca pajānāti, nirodhārammaṇāya pajānanāya kiccavasena ‘‘idaṃ dukkha’’nti paṭivijjhanto akusalaṃ pajānāti. Akusalamūlañca pajānātīti tassa mūlapaccayabhūtaṃ akusalamūlañca pajānāti, teneva pakārena ‘‘ayaṃ dukkhasamudayo’’ti paṭivijjhanto. Esa nayo kusalañca kusalamūlañcāti etthāpi. Yathā cettha, evaṃ ito paresu sabbavāresu kiccavaseneva vatthupajānanā veditabbā. Ettāvatāpīti ettakena iminā akusalādippajānanenāpi. Sammādiṭṭhi hotīti vuttappakārāya lokuttarasammādiṭṭhiyā samannāgato hoti. Ujugatāssa…pe… imaṃ saddhammanti ettāvatā saṃkhittadesanā niṭṭhitā hoti. Desanāyeva cesā saṃkhittā, tesaṃ pana bhikkhūnaṃ vitthāravaseneva sammāmanasikārappaṭivedho veditabbo.

    து³தியவாரே பன தே³ஸனாபி வித்தா²ரேன மனஸிகாரப்படிவேதோ⁴பி வித்தா²ரேனேவ வுத்தோதி வேதி³தப்³போ³. தத்த² ‘‘ஸங்கி²த்ததே³ஸனாய த்³வே ஹெட்டி²மமக்³கா³, வித்தா²ரதே³ஸனாய த்³வே உபரிமமக்³கா³ கதி²தா’’தி பி⁴க்கூ² ஆஹங்ஸு வித்தா²ரதே³ஸனாவஸானே ‘‘ஸப்³ப³ஸோ ராகா³னுஸயங் பஹாயா’’திஆதி³வசனங் ஸம்பஸ்ஸமானா. தே²ரோ பனாஹ ‘‘ஸங்கி²த்ததே³ஸனாயபி சத்தாரோ மக்³கா³ ராஸிதோ கதி²தா, வித்தா²ரதே³ஸனாயபீ’’தி. யா சாயங் இத⁴ ஸங்கி²த்தவித்தா²ரதே³ஸனாஸு விசாரணா ஆவிகதா, ஸா ஸப்³ப³வாரேஸு இத⁴ வுத்தனயேனேவ வேதி³தப்³பா³. அபுப்³பா³னுத்தானபத³வண்ணனாமத்தமேவ ஹி இதோ பரங் கரிஸ்ஸாம.

    Dutiyavāre pana desanāpi vitthārena manasikārappaṭivedhopi vitthāreneva vuttoti veditabbo. Tattha ‘‘saṃkhittadesanāya dve heṭṭhimamaggā, vitthāradesanāya dve uparimamaggā kathitā’’ti bhikkhū āhaṃsu vitthāradesanāvasāne ‘‘sabbaso rāgānusayaṃ pahāyā’’tiādivacanaṃ sampassamānā. Thero panāha ‘‘saṃkhittadesanāyapi cattāro maggā rāsito kathitā, vitthāradesanāyapī’’ti. Yā cāyaṃ idha saṃkhittavitthāradesanāsu vicāraṇā āvikatā, sā sabbavāresu idha vuttanayeneva veditabbā. Apubbānuttānapadavaṇṇanāmattameva hi ito paraṃ karissāma.

    அகுஸலகம்மபத²வண்ணனா

    Akusalakammapathavaṇṇanā

    தத்த² பட²மவாரஸ்ஸ தாவ வித்தா²ரதே³ஸனாய ‘‘பாணாதிபாதோ கோ², ஆவுஸோ, அகுஸல’’ந்திஆதீ³ஸு அகோஸல்லப்பவத்தியா அகுஸலங் வேதி³தப்³ப³ங், பரதோ வத்தப்³ப³குஸலப்படிபக்க²தோ வா. தங் லக்க²ணதோ ஸாவஜ்ஜது³க்க²விபாகங் ஸங்கிலிட்ட²ங் வா. அயங் தாவெத்த² ஸாதா⁴ரணபத³வண்ணனா.

    Tattha paṭhamavārassa tāva vitthāradesanāya ‘‘pāṇātipāto kho, āvuso, akusala’’ntiādīsu akosallappavattiyā akusalaṃ veditabbaṃ, parato vattabbakusalappaṭipakkhato vā. Taṃ lakkhaṇato sāvajjadukkhavipākaṃ saṃkiliṭṭhaṃ vā. Ayaṃ tāvettha sādhāraṇapadavaṇṇanā.

    அஸாதா⁴ரணேஸு பன பாணஸ்ஸ அதிபாதோ பாணாதிபாதோ, பாணவதோ⁴ பாணகா⁴தோதி வுத்தங் ஹோதி. பாணோதி செத்த² வோஹாரதோ ஸத்தோ, பரமத்த²தோ ஜீவிதிந்த்³ரியங். தஸ்மிங் பன பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானங் அஞ்ஞதரத்³வாரப்பவத்தா வத⁴கசேதனா பாணாதிபாதோ. ஸோ கு³ணவிரஹிதேஸு திரச்சா²னக³தாதீ³ஸு பாணேஸு கு²த்³த³கே பாணே அப்பஸாவஜ்ஜோ, மஹாஸரீரே மஹாஸாவஜ்ஜோ. கஸ்மா? பயோக³மஹந்ததாய. பயோக³ஸமத்தேபி வத்து²மஹந்ததாய. கு³ணவந்தேஸு மனுஸ்ஸாதீ³ஸு அப்பகு³ணே பாணே அப்பஸாவஜ்ஜோ, மஹாகு³ணே மஹாஸாவஜ்ஜோ. ஸரீரகு³ணானங் பன ஸமபா⁴வே ஸதி கிலேஸானங் உபக்கமானஞ்ச முது³தாய அப்பஸாவஜ்ஜோ, திப்³ப³தாய மஹாஸாவஜ்ஜோதி வேதி³தப்³போ³. தஸ்ஸ பஞ்ச ஸம்பா⁴ரா ஹொந்தி பாணோ, பாணஸஞ்ஞிதா, வத⁴கசித்தங், உபக்கமோ, தேன மரணந்தி. ச² பயோகா³ ஸாஹத்தி²கோ, ஆணத்திகோ, நிஸ்ஸக்³கி³யோ, தா²வரோ, விஜ்ஜாமயோ, இத்³தி⁴மயோதி. இமஸ்மிங் பனெத்த² வித்தா²ரீயமானே அதிபபஞ்சோ ஹோதி, தஸ்மா நங் ந வித்தா²ரயாம, அஞ்ஞஞ்ச ஏவரூபங். அத்தி²கேஹி பன ஸமந்தபாஸாதி³கங் வினயட்ட²கத²ங் (பாரா॰ அட்ட²॰ 2.172) ஓலோகெத்வா க³ஹேதப்³போ³.

    Asādhāraṇesu pana pāṇassa atipāto pāṇātipāto, pāṇavadho pāṇaghātoti vuttaṃ hoti. Pāṇoti cettha vohārato satto, paramatthato jīvitindriyaṃ. Tasmiṃ pana pāṇe pāṇasaññino jīvitindriyupacchedakaupakkamasamuṭṭhāpikā kāyavacīdvārānaṃ aññataradvārappavattā vadhakacetanā pāṇātipāto. So guṇavirahitesu tiracchānagatādīsu pāṇesu khuddake pāṇe appasāvajjo, mahāsarīre mahāsāvajjo. Kasmā? Payogamahantatāya. Payogasamattepi vatthumahantatāya. Guṇavantesu manussādīsu appaguṇe pāṇe appasāvajjo, mahāguṇe mahāsāvajjo. Sarīraguṇānaṃ pana samabhāve sati kilesānaṃ upakkamānañca mudutāya appasāvajjo, tibbatāya mahāsāvajjoti veditabbo. Tassa pañca sambhārā honti pāṇo, pāṇasaññitā, vadhakacittaṃ, upakkamo, tena maraṇanti. Cha payogā sāhatthiko, āṇattiko, nissaggiyo, thāvaro, vijjāmayo, iddhimayoti. Imasmiṃ panettha vitthārīyamāne atipapañco hoti, tasmā naṃ na vitthārayāma, aññañca evarūpaṃ. Atthikehi pana samantapāsādikaṃ vinayaṭṭhakathaṃ (pārā. aṭṭha. 2.172) oloketvā gahetabbo.

    அதி³ன்னஸ்ஸ ஆதா³னங் அதி³ன்னாதா³னங், பரஸ்ஸ ஹரணங் தெ²ய்யங், சோரிகாதி வுத்தங் ஹோதி. தத்த² அதி³ன்னந்தி பரபரிக்³க³ஹிதங், யத்த² பரோ யதா²காமகாரிதங் ஆபஜ்ஜந்தோ அத³ண்டா³ரஹோ அனுபவஜ்ஜோ ச ஹோதி. தஸ்மிங் பன பரபரிக்³க³ஹிதே பரபரிக்³க³ஹிதஸஞ்ஞினோ ததா³தா³யகஉபக்கமஸமுட்டா²பிகா தெ²ய்யசேதனா அதி³ன்னாதா³னங். தங் ஹீனே பரஸந்தகே அப்பஸாவஜ்ஜங் , பணீதே மஹாஸாவஜ்ஜங். கஸ்மா? வத்து²பணீததாய. வத்து²ஸமத்தே ஸதி கு³ணாதி⁴கானங் ஸந்தகே வத்து²ஸ்மிங் மஹாஸாவஜ்ஜங். தங் தங் கு³ணாதி⁴கங் உபாதா³ய ததோ ததோ ஹீனகு³ணஸ்ஸ ஸந்தகே வத்து²ஸ்மிங் அப்பஸாவஜ்ஜங். தஸ்ஸ பஞ்ச ஸம்பா⁴ரா ஹொந்தி பரபரிக்³க³ஹிதங், பரபரிக்³க³ஹிதஸஞ்ஞிதா, தெ²ய்யசித்தங், உபக்கமோ, தேன ஹரணந்தி. ச² பயோகா³ ஸாஹத்தி²காத³யோவ. தே ச கோ² யதா²னுரூபங் தெ²ய்யாவஹாரோ, பஸய்ஹாவஹாரோ, படிச்ச²ன்னாவஹாரோ, பரிகப்பாவஹாரோ, குஸாவஹாரோதி இமேஸங் அவஹாரானங் வஸேன பவத்தாதி அயமெத்த² ஸங்கே²போ. வித்தா²ரோ பன ஸமந்தபாஸாதி³காயங் (பாரா॰ அட்ட²॰ 1.92) வுத்தோ.

    Adinnassa ādānaṃ adinnādānaṃ, parassa haraṇaṃ theyyaṃ, corikāti vuttaṃ hoti. Tattha adinnanti parapariggahitaṃ, yattha paro yathākāmakāritaṃ āpajjanto adaṇḍāraho anupavajjo ca hoti. Tasmiṃ pana parapariggahite parapariggahitasaññino tadādāyakaupakkamasamuṭṭhāpikā theyyacetanā adinnādānaṃ. Taṃ hīne parasantake appasāvajjaṃ , paṇīte mahāsāvajjaṃ. Kasmā? Vatthupaṇītatāya. Vatthusamatte sati guṇādhikānaṃ santake vatthusmiṃ mahāsāvajjaṃ. Taṃ taṃ guṇādhikaṃ upādāya tato tato hīnaguṇassa santake vatthusmiṃ appasāvajjaṃ. Tassa pañca sambhārā honti parapariggahitaṃ, parapariggahitasaññitā, theyyacittaṃ, upakkamo, tena haraṇanti. Cha payogā sāhatthikādayova. Te ca kho yathānurūpaṃ theyyāvahāro, pasayhāvahāro, paṭicchannāvahāro, parikappāvahāro, kusāvahāroti imesaṃ avahārānaṃ vasena pavattāti ayamettha saṅkhepo. Vitthāro pana samantapāsādikāyaṃ (pārā. aṭṭha. 1.92) vutto.

    காமேஸுமிச்சா²சாரோதி எத்த² பன காமேஸூதி மேது²னஸமாசாரேஸு. மிச்சா²சாரோதி ஏகந்தனிந்தி³தோ லாமகாசாரோ. லக்க²ணதோ பன அஸத்³த⁴ம்மாதி⁴ப்பாயேன காயத்³வாரப்பவத்தா அக³மனீயட்டா²னவீதிக்கமசேதனா காமேஸுமிச்சா²சாரோ.

    Kāmesumicchācāroti ettha pana kāmesūti methunasamācāresu. Micchācāroti ekantanindito lāmakācāro. Lakkhaṇato pana asaddhammādhippāyena kāyadvārappavattā agamanīyaṭṭhānavītikkamacetanā kāmesumicchācāro.

    தத்த² அக³மனீயட்டா²னங் நாம புரிஸானங் தாவ மாதுரக்கி²தா, பிதுரக்கி²தா, மாதாபிதுரக்கி²தா, பா⁴துரக்கி²தா, ப⁴கி³னிரக்கி²தா, ஞாதிரக்கி²தா, கொ³த்தரக்கி²தா, த⁴ம்மரக்கி²தா, ஸாரக்கா², ஸபரித³ண்டா³தி மாதுரக்கி²தாத³யோ த³ஸ ; த⁴னக்கீதா, ச²ந்த³வாஸினீ, போ⁴க³வாஸினீ, படவாஸினீ, ஓத³பத்தகினீ, ஓப⁴டசும்ப³டா, தா³ஸீ ச ப⁴ரியா ச, கம்மகாரீ ச ப⁴ரியா ச, த⁴ஜாஹதா, முஹுத்திகாதி ஏதா ச த⁴னக்கீதாத³யோ த³ஸாதி வீஸதி இத்தி²யோ. இத்தீ²ஸு பன த்³வின்னங் ஸாரக்கா²ஸபரித³ண்டா³னங், த³ஸன்னஞ்ச த⁴னக்கீதாதீ³னந்தி த்³வாத³ஸன்னங் இத்தீ²னங் அஞ்ஞே புரிஸா, இத³ங் அக³மனீயட்டா²னங் நாம. ஸோ பனேஸ மிச்சா²சாரோ ஸீலாதி³கு³ணரஹிதே அக³மனீயட்டா²னே அப்பஸாவஜ்ஜோ, ஸீலாதி³கு³ணஸம்பன்னே மஹாஸாவஜ்ஜோ. தஸ்ஸ சத்தாரோ ஸம்பா⁴ரா அக³மனீயவத்து², தஸ்மிங் ஸேவனசித்தங், ஸேவனபயோகோ³, மக்³கே³னமக்³க³ப்படிபத்திஅதி⁴வாஸனந்தி. ஏகோ பயோகோ³ ஸாஹத்தி²கோ ஏவ.

    Tattha agamanīyaṭṭhānaṃ nāma purisānaṃ tāva māturakkhitā, piturakkhitā, mātāpiturakkhitā, bhāturakkhitā, bhaginirakkhitā, ñātirakkhitā, gottarakkhitā, dhammarakkhitā, sārakkhā, saparidaṇḍāti māturakkhitādayo dasa ; dhanakkītā, chandavāsinī, bhogavāsinī, paṭavāsinī, odapattakinī, obhaṭacumbaṭā, dāsī ca bhariyā ca, kammakārī ca bhariyā ca, dhajāhatā, muhuttikāti etā ca dhanakkītādayo dasāti vīsati itthiyo. Itthīsu pana dvinnaṃ sārakkhāsaparidaṇḍānaṃ, dasannañca dhanakkītādīnanti dvādasannaṃ itthīnaṃ aññe purisā, idaṃ agamanīyaṭṭhānaṃ nāma. So panesa micchācāro sīlādiguṇarahite agamanīyaṭṭhāne appasāvajjo, sīlādiguṇasampanne mahāsāvajjo. Tassa cattāro sambhārā agamanīyavatthu, tasmiṃ sevanacittaṃ, sevanapayogo, maggenamaggappaṭipattiadhivāsananti. Eko payogo sāhatthiko eva.

    முஸாதி விஸங்வாத³னபுரெக்கா²ரஸ்ஸ அத்த²ப⁴ஞ்ஜகோ வசீபயோகோ³ காயபயோகோ³ வா. விஸங்வாத³னாதி⁴ப்பாயேன பனஸ்ஸ பரவிஸங்வாத³னககாயவசீபயோக³ஸமுட்டா²பிகா சேதனா முஸாவாதோ³. அபரோ நயோ முஸாதி அபூ⁴தங் அதச்ச²ங் வத்து². வாதோ³தி தஸ்ஸ பூ⁴ததோ தச்ச²தோ விஞ்ஞாபனங். லக்க²ணதோ பன அதத²ங் வத்து²ங் தத²தோ பரங் விஞ்ஞாபேதுகாமஸ்ஸ ததா²விஞ்ஞத்திஸமுட்டா²பிகா சேதனா முஸாவாதோ³. ஸோ யமத்த²ங் ப⁴ஞ்ஜதி, தஸ்ஸ அப்பதாய அப்பஸாவஜ்ஜோ, மஹந்ததாய மஹாஸாவஜ்ஜோ. அபிச க³ஹட்டா²னங் அத்தனோ ஸந்தகங் அதா³துகாமதாய நத்தீ²திஆதி³னயப்பவத்தோ அப்பஸாவஜ்ஜோ, ஸக்கி²னா ஹுத்வா அத்த²ப⁴ஞ்ஜனத்த²ங் வுத்தோ மஹாஸாவஜ்ஜோ. பப்³ப³ஜிதானங் அப்பகம்பி தேலங் வா ஸப்பிங் வா லபி⁴த்வா ஹஸாதி⁴ப்பாயேன ‘‘அஜ்ஜ கா³மே தேலங் நதீ³மஞ்ஞே ஸந்த³தீ’’தி புராணகதா²னயேன பவத்தோ அப்பஸாவஜ்ஜோ, அதி³ட்ட²ங்யேவ பன தி³ட்ட²ந்திஆதி³னா நயேன வத³ந்தானங் மஹாஸாவஜ்ஜோ. தஸ்ஸ சத்தாரோ ஸம்பா⁴ரா ஹொந்தி அதத²ங் வத்து², விஸங்வாத³னசித்தங், தஜ்ஜோ வாயாமோ, பரஸ்ஸ தத³த்த²விஜானநந்தி. ஏகோ பயோகோ³ ஸாஹத்தி²கோவ. ஸோ காயேன வா காயப்படிப³த்³தே⁴ன வா வாசாய வா விஸங்வாத³ககிரியாகரணே த³ட்ட²ப்³போ³. தாய சே கிரியாய பரோ தமத்த²ங் ஜானாதி, அயங் கிரியாஸமுட்டா²பிகசேதனாக்க²ணேயேவ முஸாவாத³கம்முனா ப³ஜ்ஜ²தி.

    Musāti visaṃvādanapurekkhārassa atthabhañjako vacīpayogo kāyapayogo vā. Visaṃvādanādhippāyena panassa paravisaṃvādanakakāyavacīpayogasamuṭṭhāpikā cetanā musāvādo. Aparo nayo musāti abhūtaṃ atacchaṃ vatthu. Vādoti tassa bhūtato tacchato viññāpanaṃ. Lakkhaṇato pana atathaṃ vatthuṃ tathato paraṃ viññāpetukāmassa tathāviññattisamuṭṭhāpikā cetanā musāvādo. So yamatthaṃ bhañjati, tassa appatāya appasāvajjo, mahantatāya mahāsāvajjo. Apica gahaṭṭhānaṃ attano santakaṃ adātukāmatāya natthītiādinayappavatto appasāvajjo, sakkhinā hutvā atthabhañjanatthaṃ vutto mahāsāvajjo. Pabbajitānaṃ appakampi telaṃ vā sappiṃ vā labhitvā hasādhippāyena ‘‘ajja gāme telaṃ nadīmaññe sandatī’’ti purāṇakathānayena pavatto appasāvajjo, adiṭṭhaṃyeva pana diṭṭhantiādinā nayena vadantānaṃ mahāsāvajjo. Tassa cattāro sambhārā honti atathaṃ vatthu, visaṃvādanacittaṃ, tajjo vāyāmo, parassa tadatthavijānananti. Eko payogo sāhatthikova. So kāyena vā kāyappaṭibaddhena vā vācāya vā visaṃvādakakiriyākaraṇe daṭṭhabbo. Tāya ce kiriyāya paro tamatthaṃ jānāti, ayaṃ kiriyāsamuṭṭhāpikacetanākkhaṇeyeva musāvādakammunā bajjhati.

    பிஸுணா வாசாதிஆதீ³ஸு யாய வாசாய யஸ்ஸ தங் வாசங் பா⁴ஸதி, தஸ்ஸ ஹத³யே அத்தனோ பியபா⁴வங் பரஸ்ஸ ச ஸுஞ்ஞபா⁴வங் கரோதி, ஸா பிஸுணா வாசா. யாய பன அத்தானம்பி பரம்பி ப²ருஸம்பி கரோதி, ஸா வாசா ஸயம்பி ப²ருஸா நேவ கண்ணஸுகா² ந ஹத³யஸுகா² வா, அயங் ப²ருஸா வாசா. யேன ஸம்ப²ங் பலபதி நிரத்த²கங், ஸோ ஸம்ப²ப்பலாபோ. தேஸங் மூலபூ⁴தா சேதனாபி பிஸுணாவாசாதி³னாமமேவ லப⁴தி, ஸா ஏவ ச இத⁴ அதி⁴ப்பேதாதி. தத்த² ஸங்கிலிட்ட²சித்தஸ்ஸ பரேஸங் வா பே⁴தா³ய அத்தனோ பியகம்யதாய வா காயவசீபயோக³ஸமுட்டா²பிகா சேதனா பிஸுணா வாசா. ஸா யஸ்ஸ பே⁴த³ங் கரோதி, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா. தஸ்ஸா சத்தாரோ ஸம்பா⁴ரா பி⁴ந்தி³தப்³போ³ பரோ, ‘‘இதி இமே நானா ப⁴விஸ்ஸந்தி வினா ப⁴விஸ்ஸந்தீ’’தி பே⁴த³புரெக்கா²ரதா வா, ‘‘அஹங் பியோ ப⁴விஸ்ஸாமி விஸ்ஸாஸிகோ’’தி பியகம்யதா வா, தஜ்ஜோ வாயாமோ, தஸ்ஸ தத³த்த²விஜானநந்தி.

    Pisuṇā vācātiādīsu yāya vācāya yassa taṃ vācaṃ bhāsati, tassa hadaye attano piyabhāvaṃ parassa ca suññabhāvaṃ karoti, sā pisuṇā vācā. Yāya pana attānampi parampi pharusampi karoti, sā vācā sayampi pharusā neva kaṇṇasukhā na hadayasukhā vā, ayaṃ pharusā vācā. Yena samphaṃ palapati niratthakaṃ, so samphappalāpo. Tesaṃ mūlabhūtā cetanāpi pisuṇāvācādināmameva labhati, sā eva ca idha adhippetāti. Tattha saṃkiliṭṭhacittassa paresaṃ vā bhedāya attano piyakamyatāya vā kāyavacīpayogasamuṭṭhāpikā cetanā pisuṇā vācā. Sā yassa bhedaṃ karoti, tassa appaguṇatāya appasāvajjā, mahāguṇatāya mahāsāvajjā. Tassā cattāro sambhārā bhinditabbo paro, ‘‘iti ime nānā bhavissanti vinā bhavissantī’’ti bhedapurekkhāratā vā, ‘‘ahaṃ piyo bhavissāmi vissāsiko’’ti piyakamyatā vā, tajjo vāyāmo, tassa tadatthavijānananti.

    பரஸ்ஸ மம்மச்சே²த³ககாயவசீபயோக³ஸமுட்டா²பிகா ஏகந்தப²ருஸா சேதனா ப²ருஸா வாசா. தஸ்ஸ ஆவிபா⁴வத்த²மித³ங் வத்து² – ஏகோ கிர தா³ரகோ மாதுவசனங் அனாதி³யித்வா அரஞ்ஞங் க³ச்ச²தி, தங் மாதா நிவத்தேதுங் அஸக்கொந்தீ ‘‘சண்டா³ தங் மஹிங்ஸீ அனுப³ந்த⁴தூ’’தி அக்கோஸி. அத²ஸ்ஸ தத்தே²வ அரஞ்ஞே மஹிங்ஸீ உட்டா²ஸி. தா³ரகோ ‘‘யங் மம மாதா முகே²ன கதே²ஸி தங் மா ஹோது, யங் சித்தேன சிந்தேஸி தங் ஹோதூ’’தி ஸச்சகிரியமகாஸி. மஹிங்ஸீ தத்தே²வ ப³த்³தா⁴ விய அட்டா²ஸி. ஏவங் மம்மச்சே²த³கோபி பயோகோ³ சித்தஸண்ஹதாய ப²ருஸா வாசா ந ஹோதி. மாதாபிதரோ ஹி கதா³சி புத்தகே ஏவம்பி வத³ந்தி ‘‘சோரா வோ க²ண்டா³க²ண்டி³கங் கரொந்தூ’’தி, உப்பலபத்தம்பி ச நேஸங் உபரி பதந்தங் ந இச்ச²ந்தி. ஆசரியுபஜ்ஜா²யா ச கதா³சி நிஸ்ஸிதகே ஏவங் வத³ந்தி ‘‘கிங் இமே அஹிரிகா அனொத்தப்பினோ சரந்தி நித்³த⁴மத² நே’’தி. அத² கோ² நேஸங் ஆக³மாதி⁴க³மஸம்பத்திங் இச்ச²ந்தி. யதா² ச சித்தஸண்ஹதாய ப²ருஸா வாசா ந ஹோதி, ஏவங் வசனஸண்ஹதாய அப²ருஸா வாசாபி ந ஹோதி. ந ஹி மாராபேதுகாமஸ்ஸ ‘‘இமங் ஸுக²ங் ஸயாபேதா²’’தி வசனங் அப²ருஸா வாசா ஹோதி. சித்தப²ருஸதாய பனேஸா ப²ருஸா வாசாவ. ஸா யங் ஸந்தா⁴ய பவத்திதா, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா. தஸ்ஸா தயோ ஸம்பா⁴ரா அக்கோஸிதப்³போ³ பரோ, குபிதசித்தங், அக்கோஸனாதி.

    Parassa mammacchedakakāyavacīpayogasamuṭṭhāpikā ekantapharusā cetanā pharusā vācā. Tassa āvibhāvatthamidaṃ vatthu – eko kira dārako mātuvacanaṃ anādiyitvā araññaṃ gacchati, taṃ mātā nivattetuṃ asakkontī ‘‘caṇḍā taṃ mahiṃsī anubandhatū’’ti akkosi. Athassa tattheva araññe mahiṃsī uṭṭhāsi. Dārako ‘‘yaṃ mama mātā mukhena kathesi taṃ mā hotu, yaṃ cittena cintesi taṃ hotū’’ti saccakiriyamakāsi. Mahiṃsī tattheva baddhā viya aṭṭhāsi. Evaṃ mammacchedakopi payogo cittasaṇhatāya pharusā vācā na hoti. Mātāpitaro hi kadāci puttake evampi vadanti ‘‘corā vo khaṇḍākhaṇḍikaṃ karontū’’ti, uppalapattampi ca nesaṃ upari patantaṃ na icchanti. Ācariyupajjhāyā ca kadāci nissitake evaṃ vadanti ‘‘kiṃ ime ahirikā anottappino caranti niddhamatha ne’’ti. Atha kho nesaṃ āgamādhigamasampattiṃ icchanti. Yathā ca cittasaṇhatāya pharusā vācā na hoti, evaṃ vacanasaṇhatāya apharusā vācāpi na hoti. Na hi mārāpetukāmassa ‘‘imaṃ sukhaṃ sayāpethā’’ti vacanaṃ apharusā vācā hoti. Cittapharusatāya panesā pharusā vācāva. Sā yaṃ sandhāya pavattitā, tassa appaguṇatāya appasāvajjā, mahāguṇatāya mahāsāvajjā. Tassā tayo sambhārā akkositabbo paro, kupitacittaṃ, akkosanāti.

    அனத்த²விஞ்ஞாபககாயவசீபயோக³ஸமுட்டா²பிகா அகுஸலசேதனா ஸம்ப²ப்பலாபோ. ஸோ ஆஸேவனமந்த³தாய அப்பஸாவஜ்ஜோ, ஆஸேவனமஹந்ததாய மஹாஸாவஜ்ஜோ. தஸ்ஸ த்³வே ஸம்பா⁴ரா பா⁴ரதயுத்³த⁴ஸீதாஹரணாதி³னிரத்த²ககதா²புரெக்கா²ரதா, ததா²ரூபீகதா²கத²னந்தி.

    Anatthaviññāpakakāyavacīpayogasamuṭṭhāpikā akusalacetanā samphappalāpo. So āsevanamandatāya appasāvajjo, āsevanamahantatāya mahāsāvajjo. Tassa dve sambhārā bhāratayuddhasītāharaṇādiniratthakakathāpurekkhāratā, tathārūpīkathākathananti.

    அபி⁴ஜ்ஜா²யதீதி அபி⁴ஜ்ஜா², பரப⁴ண்டா³பி⁴முகீ² ஹுத்வா தன்னின்னதாய பவத்ததீதி அத்தோ². ஸா ‘‘அஹோ வத இத³ங் மமஸ்ஸா’’தி ஏவங் பரப⁴ண்டா³பி⁴ஜ்ஜா²யனலக்க²ணா. அதி³ன்னாதா³னங் விய அப்பஸாவஜ்ஜா ச மஹாஸாவஜ்ஜா ச. தஸ்ஸா த்³வே ஸம்பா⁴ரா பரப⁴ண்ட³ங், அத்தனோ பரிணாமனஞ்ச. பரப⁴ண்ட³வத்து²கே ஹி லோபே⁴ உப்பன்னேபி ந தாவ கம்மபத²பே⁴தோ³ ஹோதி, யாவ ‘‘அஹோ வதீத³ங் மமஸ்ஸா’’தி அத்தனோ ந பரிணாமேதி.

    Abhijjhāyatīti abhijjhā, parabhaṇḍābhimukhī hutvā tanninnatāya pavattatīti attho. Sā ‘‘aho vata idaṃ mamassā’’ti evaṃ parabhaṇḍābhijjhāyanalakkhaṇā. Adinnādānaṃ viya appasāvajjā ca mahāsāvajjā ca. Tassā dve sambhārā parabhaṇḍaṃ, attano pariṇāmanañca. Parabhaṇḍavatthuke hi lobhe uppannepi na tāva kammapathabhedo hoti, yāva ‘‘aho vatīdaṃ mamassā’’ti attano na pariṇāmeti.

    ஹிதஸுக²ங் ப்³யாபாத³யதீதி ப்³யாபாதோ³. ஸோ பரவினாஸாய மனோபதோ³ஸலக்க²ணோ , ப²ருஸா வாசா விய அப்பஸாவஜ்ஜோ மஹாஸாவஜ்ஜோ ச. தஸ்ஸ த்³வே ஸம்பா⁴ரா பரஸத்தோ ச, தஸ்ஸ ச வினாஸசிந்தா. பரஸத்தவத்து²கே ஹி கோதே⁴ உப்பன்னேபி ந தாவ கம்மபத²பே⁴தோ³ ஹோதி, யாவ ‘‘அஹோ வதாயங் உச்சி²ஜ்ஜெய்ய வினஸ்ஸெய்யா’’தி தஸ்ஸ வினாஸங் ந சிந்தேதி.

    Hitasukhaṃ byāpādayatīti byāpādo. So paravināsāya manopadosalakkhaṇo , pharusā vācā viya appasāvajjo mahāsāvajjo ca. Tassa dve sambhārā parasatto ca, tassa ca vināsacintā. Parasattavatthuke hi kodhe uppannepi na tāva kammapathabhedo hoti, yāva ‘‘aho vatāyaṃ ucchijjeyya vinasseyyā’’ti tassa vināsaṃ na cinteti.

    யதா²பு⁴ச்சக³ஹணாபா⁴வேன மிச்சா² பஸ்ஸதீதி மிச்சா²தி³ட்டி². ஸா ‘‘நத்தி² தி³ன்ன’’ந்திஆதி³னா நயேன விபரீதத³ஸ்ஸனலக்க²ணா. ஸம்ப²ப்பலாபோ விய அப்பஸாவஜ்ஜா மஹாஸாவஜ்ஜா ச. அபிச அனியதா அப்பஸாவஜ்ஜா, நியதா மஹாஸாவஜ்ஜா. தஸ்ஸா த்³வே ஸம்பா⁴ரா வத்து²னோ ச க³ஹிதாகாரவிபரீததா, யதா² ச தங் க³ண்ஹாதி, ததா²பா⁴வேன தஸ்ஸுபட்டா²னந்தி.

    Yathābhuccagahaṇābhāvena micchā passatīti micchādiṭṭhi. Sā ‘‘natthi dinna’’ntiādinā nayena viparītadassanalakkhaṇā. Samphappalāpo viya appasāvajjā mahāsāvajjā ca. Apica aniyatā appasāvajjā, niyatā mahāsāvajjā. Tassā dve sambhārā vatthuno ca gahitākāraviparītatā, yathā ca taṃ gaṇhāti, tathābhāvena tassupaṭṭhānanti.

    இமேஸங் பன த³ஸன்னங் அகுஸலகம்மபதா²னங் த⁴ம்மதோ கொட்டா²ஸதோ ஆரம்மணதோ வேத³னாதோ மூலதோதி பஞ்சஹாகாரேஹி வினிச்ச²யோ வேதி³தப்³போ³.

    Imesaṃ pana dasannaṃ akusalakammapathānaṃ dhammato koṭṭhāsato ārammaṇato vedanāto mūlatoti pañcahākārehi vinicchayo veditabbo.

    தத்த² த⁴ம்மதோதி ஏதேஸு ஹி படிபாடியா ஸத்த, சேதனாத⁴ம்மாவ ஹொந்தி, அபி⁴ஜ்ஜா²த³யோ தயோ சேதனாஸம்பயுத்தா.

    Tattha dhammatoti etesu hi paṭipāṭiyā satta, cetanādhammāva honti, abhijjhādayo tayo cetanāsampayuttā.

    கொட்டா²ஸதோதி படிபாடியா ஸத்த, மிச்சா²தி³ட்டி² சாதி இமே அட்ட² கம்மபதா² ஏவ ஹொந்தி, நோ மூலானி. அபி⁴ஜ்ஜா²ப்³யாபாதா³ கம்மபதா² சேவ மூலானி ச. அபி⁴ஜ்ஜா² ஹி மூலங் பத்வா லோபோ⁴ அகுஸலமூலங் ஹோதி. ப்³யாபாதோ³ தோ³ஸோ அகுஸலமூலங்.

    Koṭṭhāsatoti paṭipāṭiyā satta, micchādiṭṭhi cāti ime aṭṭha kammapathā eva honti, no mūlāni. Abhijjhābyāpādā kammapathā ceva mūlāni ca. Abhijjhā hi mūlaṃ patvā lobho akusalamūlaṃ hoti. Byāpādo doso akusalamūlaṃ.

    ஆரம்மணதோதி பாணாதிபாதோ ஜீவிதிந்த்³ரியாரம்மணதோ ஸங்கா²ராரம்மணோ ஹோதி. அதி³ன்னாதா³னங் ஸத்தாரம்மணங் வா ஸங்கா²ராரம்மணங் வா. மிச்சா²சாரோ பொ²ட்ட²ப்³ப³வஸேன ஸங்கா²ராரம்மணோ. ஸத்தாரம்மணோதிபி ஏகே. முஸாவாதோ³ ஸத்தாரம்மணோ வா ஸங்கா²ராரம்மணோ வா. ததா² பிஸுணா வாசா. ப²ருஸா வாசா ஸத்தாரம்மணாவ. ஸம்ப²ப்பலாபோ தி³ட்ட²ஸுதமுதவிஞ்ஞாதவஸேன ஸத்தாரம்மணோ வா ஸங்கா²ராரம்மணோ வா, ததா² அபி⁴ஜ்ஜா². ப்³யாபாதோ³ ஸத்தாரம்மணோவ. மிச்சா²தி³ட்டி² தேபூ⁴மகத⁴ம்மவஸேன ஸங்கா²ராரம்மணா.

    Ārammaṇatoti pāṇātipāto jīvitindriyārammaṇato saṅkhārārammaṇo hoti. Adinnādānaṃ sattārammaṇaṃ vā saṅkhārārammaṇaṃ vā. Micchācāro phoṭṭhabbavasena saṅkhārārammaṇo. Sattārammaṇotipi eke. Musāvādo sattārammaṇo vā saṅkhārārammaṇo vā. Tathā pisuṇā vācā. Pharusā vācā sattārammaṇāva. Samphappalāpo diṭṭhasutamutaviññātavasena sattārammaṇo vā saṅkhārārammaṇo vā, tathā abhijjhā. Byāpādo sattārammaṇova. Micchādiṭṭhi tebhūmakadhammavasena saṅkhārārammaṇā.

    வேத³னாதோதி பாணாதிபாதோ து³க்க²வேத³னோ ஹோதி. கிஞ்சாபி ஹி ராஜானோ சோரங் தி³ஸ்வா ஹஸமானாபி ‘‘க³ச்ச²த² நங் கா⁴தேதா²’’தி வத³ந்தி, ஸன்னிட்டா²பகசேதனா பன நேஸங் து³க்க²ஸம்பயுத்தாவ ஹோதி. அதி³ன்னாதா³னங் திவேத³னங். மிச்சா²சாரோ ஸுக²மஜ்ஜ²த்தவஸேன த்³விவேத³னோ, ஸன்னிட்டா²பகசித்தே பன மஜ்ஜ²த்தவேத³னோ ந ஹோதி. முஸாவாதோ³ திவேத³னோ, ததா² பிஸுணா வாசா. ப²ருஸா வாசா து³க்க²வேத³னாவ. ஸம்ப²ப்பலாபோ திவேத³னோ . அபி⁴ஜ்ஜா² ஸுக²மஜ்ஜ²த்தவஸேன த்³விவேத³னா, ததா² மிச்சா²தி³ட்டி². ப்³யாபாதோ³ து³க்க²வேத³னோ.

    Vedanātoti pāṇātipāto dukkhavedano hoti. Kiñcāpi hi rājāno coraṃ disvā hasamānāpi ‘‘gacchatha naṃ ghātethā’’ti vadanti, sanniṭṭhāpakacetanā pana nesaṃ dukkhasampayuttāva hoti. Adinnādānaṃ tivedanaṃ. Micchācāro sukhamajjhattavasena dvivedano, sanniṭṭhāpakacitte pana majjhattavedano na hoti. Musāvādo tivedano, tathā pisuṇā vācā. Pharusā vācā dukkhavedanāva. Samphappalāpo tivedano . Abhijjhā sukhamajjhattavasena dvivedanā, tathā micchādiṭṭhi. Byāpādo dukkhavedano.

    மூலதோதி பாணாதிபாதோ தோ³ஸமோஹவஸேன த்³விமூலகோ ஹோதி. அதி³ன்னாதா³னங் தோ³ஸமோஹவஸேன வா லோப⁴மோஹவஸேன வா. மிச்சா²சாரோ லோப⁴மோஹவஸேன. முஸாவாதோ³ தோ³ஸமோஹவஸேன வா லோப⁴மோஹவஸேன வா, ததா² பிஸுணா வாசா ஸம்ப²ப்பலாபோ ச. ப²ருஸா வாசா தோ³ஸமோஹவஸேன. அபி⁴ஜ்ஜா² மோஹவஸேன ஏகமூலா, ததா² ப்³யாபாதோ³. மிச்சா²தி³ட்டி² லோப⁴மோஹவஸேன த்³விமூலாதி.

    Mūlatoti pāṇātipāto dosamohavasena dvimūlako hoti. Adinnādānaṃ dosamohavasena vā lobhamohavasena vā. Micchācāro lobhamohavasena. Musāvādo dosamohavasena vā lobhamohavasena vā, tathā pisuṇā vācā samphappalāpo ca. Pharusā vācā dosamohavasena. Abhijjhā mohavasena ekamūlā, tathā byāpādo. Micchādiṭṭhi lobhamohavasena dvimūlāti.

    லோபோ⁴ அகுஸலமூலந்திஆதீ³ஸு லுப்³ப⁴தீதி லோபோ⁴. து³ஸ்ஸதீதி தோ³ஸோ. முய்ஹதீதி மோஹோ. தேஸு லோபோ⁴ ஸயஞ்ச அகுஸலோ ஸாவஜ்ஜது³க்க²விபாகட்டே²ன, இமேஸஞ்ச பாணாதிபாதாதீ³னங் அகுஸலானங் கேஸஞ்சி ஸம்பயுத்தப்பபா⁴வகட்டே²ன கேஸஞ்சி உபனிஸ்ஸயபச்சயட்டே²ன மூலந்தி அகுஸலமூலங். வுத்தம்பி சேதங் ‘‘ரத்தோ கோ² ஆவுஸோ ராகே³ன அபி⁴பூ⁴தோ பரியாதி³ன்னசித்தோ பாணம்பி ஹனதீ’’திஆதி³. தோ³ஸமோஹானங் அகுஸலமூலபா⁴வேபி ஏஸேவ நயோ.

    Lobho akusalamūlantiādīsu lubbhatīti lobho. Dussatīti doso. Muyhatīti moho. Tesu lobho sayañca akusalo sāvajjadukkhavipākaṭṭhena, imesañca pāṇātipātādīnaṃ akusalānaṃ kesañci sampayuttappabhāvakaṭṭhena kesañci upanissayapaccayaṭṭhena mūlanti akusalamūlaṃ. Vuttampi cetaṃ ‘‘ratto kho āvuso rāgena abhibhūto pariyādinnacitto pāṇampi hanatī’’tiādi. Dosamohānaṃ akusalamūlabhāvepi eseva nayo.

    அகுஸலகம்மபத²வண்ணனா நிட்டி²தா.

    Akusalakammapathavaṇṇanā niṭṭhitā.

    குஸலகம்மபத²வண்ணனா

    Kusalakammapathavaṇṇanā

    பாணாதிபாதா வேரமணீ குஸலந்திஆதீ³ஸு பாணாதிபாதாத³யோ வுத்தத்தா² ஏவ. வேரங் மணதீதி வேரமணீ, வேரங் பஜஹதீதி அத்தோ². விரமதி வா ஏதாய கரணபூ⁴தாய, விகாரஸ்ஸ வேகாரங் கத்வாபி வேரமணீ. அயங் தாவெத்த² ப்³யஞ்ஜனதோ வண்ணனா. அத்த²தோ பன வேரமணீதி குஸலசித்தஸம்பயுத்தா விரதி. யா ‘‘பாணாதிபாதா விரமந்தஸ்ஸ, யா தஸ்மிங் ஸமயே பாணாதிபாதா ஆரதி விரதீ’’தி ஏவங் வுத்தா குஸலசித்தஸம்பயுத்தா விரதி, ஸா பே⁴த³தோ திவிதோ⁴ ஹோதி ஸம்பத்தவிரதி ஸமாதா³னவிரதி ஸமுச்சே²த³விரதீதி. தத்த² அஸமாதி³ன்னஸிக்கா²பதா³னங் அத்தனோ ஜாதிவயபா³ஹுஸச்சாதீ³னி பச்சவெக்கி²த்வா ‘‘அயுத்தங் அம்ஹாகங் ஏவரூபங் காது’’ந்தி ஸம்பத்தவத்து²ங் அவீதிக்கமந்தானங் உப்பஜ்ஜமானா விரதி ஸம்பத்தவிரதீதி வேதி³தப்³பா³ ஸீஹளதீ³பே சக்கனஉபாஸகஸ்ஸ விய.

    Pāṇātipātā veramaṇī kusalantiādīsu pāṇātipātādayo vuttatthā eva. Veraṃ maṇatīti veramaṇī, veraṃ pajahatīti attho. Viramati vā etāya karaṇabhūtāya, vikārassa vekāraṃ katvāpi veramaṇī. Ayaṃ tāvettha byañjanato vaṇṇanā. Atthato pana veramaṇīti kusalacittasampayuttā virati. Yā ‘‘pāṇātipātā viramantassa, yā tasmiṃ samaye pāṇātipātā ārati viratī’’ti evaṃ vuttā kusalacittasampayuttā virati, sā bhedato tividho hoti sampattavirati samādānavirati samucchedaviratīti. Tattha asamādinnasikkhāpadānaṃ attano jātivayabāhusaccādīni paccavekkhitvā ‘‘ayuttaṃ amhākaṃ evarūpaṃ kātu’’nti sampattavatthuṃ avītikkamantānaṃ uppajjamānā virati sampattaviratīti veditabbā sīhaḷadīpe cakkanaupāsakassa viya.

    தஸ்ஸ கிர த³ஹரகாலேயேவ மாதுயா ரோகோ³ உப்பஜ்ஜி. வேஜ்ஜேன ச ‘‘அல்லஸஸமங்ஸங் லத்³து⁴ங் வட்டதீ’’தி வுத்தங். ததோ சக்கனஸ்ஸ பா⁴தா ‘‘க³ச்ச² தாத கெ²த்தங் ஆஹிண்டா³ஹீ’’தி சக்கனங் பேஸேஸி. ஸோ தத்த² க³தோ. தஸ்மிஞ்ச ஸமயே ஏகோ ஸஸோ தருணஸஸ்ஸங் கா²தி³துங் ஆக³தோ ஹோதி, ஸோ தங் தி³ஸ்வா வேகே³ன தா⁴வெந்தோ வல்லியா ப³த்³தோ⁴ ‘‘கிரி கிரீ’’தி ஸத்³த³மகாஸி. சக்கனோ தேன ஸத்³தே³ன க³ந்த்வா தங் க³ஹெத்வா சிந்தேஸி ‘‘மாது பே⁴ஸஜ்ஜங் கரோமீ’’தி. புன சிந்தேஸி ‘‘ந மேதங் பதிரூபங், ய்வாஹங் மாது ஜீவிதகாரணா பரங் ஜீவிதா வோரோபெய்ய’’ந்தி. அத² நங் ‘‘க³ச்ச² அரஞ்ஞே ஸஸேஹி ஸத்³தி⁴ங் திணோத³கங் பரிபு⁴ஞ்ஜா’’தி முஞ்சி. பா⁴தரா ச ‘‘கிங் தாத ஸஸோ லத்³தோ⁴’’தி புச்சி²தோ தங் பவத்திங் ஆசிக்கி². ததோ நங் பா⁴தா பரிபா⁴ஸி. ஸோ மாதுஸந்திகங் க³ந்த்வா ‘‘யதோஹங் ஜாதோ, நாபி⁴ஜானாமி ஸஞ்சிச்ச பாணங் ஜீவிதா வோரோபேதா’’தி ஸச்சங் வத்வா அதி⁴ட்டா²ஸி. தாவதே³வஸ்ஸ மாதா அரோகா³ அஹோஸி.

    Tassa kira daharakāleyeva mātuyā rogo uppajji. Vejjena ca ‘‘allasasamaṃsaṃ laddhuṃ vaṭṭatī’’ti vuttaṃ. Tato cakkanassa bhātā ‘‘gaccha tāta khettaṃ āhiṇḍāhī’’ti cakkanaṃ pesesi. So tattha gato. Tasmiñca samaye eko saso taruṇasassaṃ khādituṃ āgato hoti, so taṃ disvā vegena dhāvento valliyā baddho ‘‘kiri kirī’’ti saddamakāsi. Cakkano tena saddena gantvā taṃ gahetvā cintesi ‘‘mātu bhesajjaṃ karomī’’ti. Puna cintesi ‘‘na metaṃ patirūpaṃ, yvāhaṃ mātu jīvitakāraṇā paraṃ jīvitā voropeyya’’nti. Atha naṃ ‘‘gaccha araññe sasehi saddhiṃ tiṇodakaṃ paribhuñjā’’ti muñci. Bhātarā ca ‘‘kiṃ tāta saso laddho’’ti pucchito taṃ pavattiṃ ācikkhi. Tato naṃ bhātā paribhāsi. So mātusantikaṃ gantvā ‘‘yatohaṃ jāto, nābhijānāmi sañcicca pāṇaṃ jīvitā voropetā’’ti saccaṃ vatvā adhiṭṭhāsi. Tāvadevassa mātā arogā ahosi.

    ஸமாதி³ன்னஸிக்கா²பதா³னங் பன ஸிக்கா²பத³ஸமாதா³னே ச ததுத்தரி ச அத்தனோ ஜீவிதம்பி பரிச்சஜித்வா வத்து²ங் அவீதிக்கமந்தானங் உப்பஜ்ஜமானா விரதி ஸமாதா³னவிரதீதி வேதி³தப்³பா³ உத்தரவட்³ட⁴மானபப்³ப³தவாஸீஉபாஸகஸ்ஸ விய.

    Samādinnasikkhāpadānaṃ pana sikkhāpadasamādāne ca tatuttari ca attano jīvitampi pariccajitvā vatthuṃ avītikkamantānaṃ uppajjamānā virati samādānaviratīti veditabbā uttaravaḍḍhamānapabbatavāsīupāsakassa viya.

    ஸோ கிர அம்ப³ரியவிஹாரவாஸீபிங்க³லபு³த்³த⁴ரக்கி²தத்தே²ரஸ்ஸ ஸந்திகே ஸிக்கா²பதா³னி க³ஹெத்வா கெ²த்தங் கஸ்ஸதி. அத²ஸ்ஸ கோ³ணோ நட்டோ², ஸோ தங் க³வேஸந்தோ உத்தரவட்³ட⁴மானபப்³ப³தங் ஆருஹி, தத்ர நங் மஹாஸப்போ அக்³க³ஹேஸி. ஸோ சிந்தேஸி ‘‘இமாயஸ்ஸ திகி²ணவாஸியா ஸீஸங் சி²ந்தா³மீ’’தி. புன சிந்தேஸி ‘‘ந மேதங் பதிரூபங், ய்வாஹங் பா⁴வனீயஸ்ஸ க³ருனோ ஸந்திகே ஸிக்கா²பத³ங் க³ஹெத்வா பி⁴ந்தெ³ய்ய’’ந்தி. ஏவங் யாவததியங் சிந்தெத்வா ‘‘ஜீவிதங் பரிச்சஜாமி, ந ஸிக்கா²பத³’’ந்தி அங்ஸே ட²பிதங் திகி²ணத³ண்ட³வாஸிங் அரஞ்ஞே ச²ட்³டே³ஸி. தாவதே³வ நங் மஹாவாளோ முஞ்சித்வா அக³மாஸீதி.

    So kira ambariyavihāravāsīpiṅgalabuddharakkhitattherassa santike sikkhāpadāni gahetvā khettaṃ kassati. Athassa goṇo naṭṭho, so taṃ gavesanto uttaravaḍḍhamānapabbataṃ āruhi, tatra naṃ mahāsappo aggahesi. So cintesi ‘‘imāyassa tikhiṇavāsiyā sīsaṃ chindāmī’’ti. Puna cintesi ‘‘na metaṃ patirūpaṃ, yvāhaṃ bhāvanīyassa garuno santike sikkhāpadaṃ gahetvā bhindeyya’’nti. Evaṃ yāvatatiyaṃ cintetvā ‘‘jīvitaṃ pariccajāmi, na sikkhāpada’’nti aṃse ṭhapitaṃ tikhiṇadaṇḍavāsiṃ araññe chaḍḍesi. Tāvadeva naṃ mahāvāḷo muñcitvā agamāsīti.

    அரியமக்³க³ஸம்பயுத்தா பன விரதி ஸமுச்சே²த³விரதீதி வேதி³தப்³பா³. யஸ்ஸா உப்பத்திதோ பபு⁴தி ‘‘பாணங் கா⁴தெஸ்ஸாமீ’’தி அரியபுக்³க³லானங் சித்தம்பி ந உப்பஜ்ஜதீதி. ஸா பனாயங் விரதி கோஸல்லப்பவத்தியா குஸலந்தி வுத்தா. குச்சி²தஸயனதோ வா குஸந்தி லத்³த⁴வோஹாரங் து³ஸ்ஸீல்யங் லுனாதீதிபி குஸலங். கதமஞ்சாவுஸோ குஸலந்தி இமஸ்ஸ பன பஞ்ஹஸ்ஸ அனநுரூபத்தா குஸலாதி ந வுத்தா.

    Ariyamaggasampayuttā pana virati samucchedaviratīti veditabbā. Yassā uppattito pabhuti ‘‘pāṇaṃ ghātessāmī’’ti ariyapuggalānaṃ cittampi na uppajjatīti. Sā panāyaṃ virati kosallappavattiyā kusalanti vuttā. Kucchitasayanato vā kusanti laddhavohāraṃ dussīlyaṃ lunātītipi kusalaṃ. Katamañcāvuso kusalanti imassa pana pañhassa ananurūpattā kusalāti na vuttā.

    யதா² ச அகுஸலானங், ஏவங் இமேஸம்பி குஸலகம்மபதா²னங் த⁴ம்மதோ கொட்டா²ஸதோ ஆரம்மணதோ வேத³னாதோ மூலதோதி பஞ்சஹாகாரேஹி வினிச்ச²யோ வேதி³தப்³போ³.

    Yathā ca akusalānaṃ, evaṃ imesampi kusalakammapathānaṃ dhammato koṭṭhāsato ārammaṇato vedanāto mūlatoti pañcahākārehi vinicchayo veditabbo.

    தத்த² த⁴ம்மதோதி ஏதேஸு ஹி படிபாடியா ஸத்த சேதனாபி வட்டந்தி, விரதியோபி. அந்தே தயோ சேதனாஸம்பயுத்தாவ.

    Tattha dhammatoti etesu hi paṭipāṭiyā satta cetanāpi vaṭṭanti, viratiyopi. Ante tayo cetanāsampayuttāva.

    கொட்டா²ஸதோதி படிபாடியா ஸத்த கம்மபதா² ஏவ, நோ மூலானி. அந்தே தயோ கம்மபதா² சேவ மூலானி ச. அனபி⁴ஜ்ஜா² ஹி மூலங் பத்வா அலோபோ⁴ குஸலமூலங் ஹோதி. அப்³யாபாதோ³ அதோ³ஸோ குஸலமூலங். ஸம்மாதி³ட்டி² அமோஹோ குஸலமூலங்.

    Koṭṭhāsatoti paṭipāṭiyā satta kammapathā eva, no mūlāni. Ante tayo kammapathā ceva mūlāni ca. Anabhijjhā hi mūlaṃ patvā alobho kusalamūlaṃ hoti. Abyāpādo adoso kusalamūlaṃ. Sammādiṭṭhi amoho kusalamūlaṃ.

    ஆரம்மணதோதி பாணாதிபாதாதீ³னங் ஆரம்மணானேவ ஏதேஸங் ஆரம்மணானி, வீதிக்கமிதப்³ப³தோயேவ ஹி வேரமணீ நாம ஹோதி. யதா² பன நிப்³பா³னாரம்மணோ அரியமக்³கோ³ கிலேஸே பஜஹதி, ஏவங் ஜீவிதிந்த்³ரியாதி³ஆரம்மணாபேதே கம்மபதா² பாணாதிபாதாதீ³னி து³ஸ்ஸீல்யானி பஜஹந்தீதி வேதி³தப்³பா³.

    Ārammaṇatoti pāṇātipātādīnaṃ ārammaṇāneva etesaṃ ārammaṇāni, vītikkamitabbatoyeva hi veramaṇī nāma hoti. Yathā pana nibbānārammaṇo ariyamaggo kilese pajahati, evaṃ jīvitindriyādiārammaṇāpete kammapathā pāṇātipātādīni dussīlyāni pajahantīti veditabbā.

    வேத³னாதோதி ஸப்³பே³ ஸுக²வேத³னா வா ஹொந்தி, மஜ்ஜ²த்தவேத³னா வா. குஸலங் பத்வா ஹி து³க்க²வேத³னா நாம நத்தி².

    Vedanātoti sabbe sukhavedanā vā honti, majjhattavedanā vā. Kusalaṃ patvā hi dukkhavedanā nāma natthi.

    மூலதோதி படிபாடியா ஸத்த கம்மபதா² ஞாணஸம்பயுத்தசித்தேன விரமந்தஸ்ஸ அலோப⁴அதோ³ஸஅமோஹவஸேன திமூலா ஹொந்தி. ஞாணவிப்பயுத்தசித்தேன விரமந்தஸ்ஸ த்³விமூலா. அனபி⁴ஜ்ஜா² ஞாணஸம்பயுத்தசித்தேன விரமந்தஸ்ஸ த்³விமூலா. ஞாணவிப்பயுத்தசித்தேன ஏகமூலா. அலோபோ⁴ பன அத்தனாவ அத்தனோ மூலங் ந ஹோதி, அப்³யாபாதே³பி ஏஸேவ நயோ. ஸம்மாதி³ட்டி² அலோபா⁴தோ³ஸவஸேன த்³விமூலாவாதி.

    Mūlatoti paṭipāṭiyā satta kammapathā ñāṇasampayuttacittena viramantassa alobhaadosaamohavasena timūlā honti. Ñāṇavippayuttacittena viramantassa dvimūlā. Anabhijjhā ñāṇasampayuttacittena viramantassa dvimūlā. Ñāṇavippayuttacittena ekamūlā. Alobho pana attanāva attano mūlaṃ na hoti, abyāpādepi eseva nayo. Sammādiṭṭhi alobhādosavasena dvimūlāvāti.

    அலோபோ⁴ குஸலமூலந்திஆதீ³ஸு ந லோபோ⁴தி அலோபோ⁴, லோப⁴படிபக்க²ஸ்ஸ த⁴ம்மஸ்ஸேதங் அதி⁴வசனங். அதோ³ஸாமோஹேஸுபி ஏஸேவ நயோ. தேஸு அலோபோ⁴ ஸயஞ்ச குஸலங், இமேஸஞ்ச பாணாதிபாதா வேரமணீஆதீ³னங் குஸலானங் கேஸஞ்சி ஸம்பயுத்தப்பபா⁴வகட்டே²ன கேஸஞ்சி உபனிஸ்ஸயபச்சயட்டே²ன மூலந்தி குஸலமூலங். அதோ³ஸாமோஹானம்பி குஸலமூலபா⁴வே ஏஸேவ நயோ.

    Alobho kusalamūlantiādīsu na lobhoti alobho, lobhapaṭipakkhassa dhammassetaṃ adhivacanaṃ. Adosāmohesupi eseva nayo. Tesu alobho sayañca kusalaṃ, imesañca pāṇātipātā veramaṇīādīnaṃ kusalānaṃ kesañci sampayuttappabhāvakaṭṭhena kesañci upanissayapaccayaṭṭhena mūlanti kusalamūlaṃ. Adosāmohānampi kusalamūlabhāve eseva nayo.

    இதா³னி ஸப்³ப³ம்பி தங் ஸங்கே²பேன ச வித்தா²ரேன ச தே³ஸிதமத்த²ங் நிக³மெந்தோ யதோ கோ² ஆவுஸோதிஆதி³அப்பனாவாரமாஹ. தத்த² ஏவங் அகுஸலங் பஜானாதீதி ஏவங் யதா²னித்³தி³ட்ட²த³ஸாகுஸலகம்மபத²வஸேன அகுஸலங் பஜானாதி. ஏவங் அகுஸலமூலந்திஆதீ³ஸுபி ஏஸேவ நயோ. எத்தாவதா ஏகேன நயேன சதுஸச்சகம்மட்டா²னிகஸ்ஸ யாவ அரஹத்தா நிய்யானங் கதி²தங் ஹோதி. கத²ங்? எத்த² ஹி ட²பெத்வா அபி⁴ஜ்ஜ²ங் த³ஸ அகுஸலகம்மபதா² ச குஸலகம்மபதா² ச து³க்க²ஸச்சங். அபி⁴ஜ்ஜா² ச லோபோ⁴ அகுஸலமூலஞ்சாதி இமே த்³வே த⁴ம்மா நிப்பரியாயேன ஸமுத³யஸச்சங். பரியாயேன பன ஸப்³பே³பி கம்மபதா² து³க்க²ஸச்சங். ஸப்³பா³னி குஸலாகுஸலமூலானி ஸமுத³யஸச்சங். உபி⁴ன்னங் அப்பவத்தி நிரோத⁴ஸச்சங் . து³க்க²ங் பரிஜானந்தோ ஸமுத³யங் பஜஹமானோ நிரோத⁴ங் பஜானந்தோ அரியமக்³கோ³ மக்³க³ஸச்சந்தி இதி த்³வே ஸச்சானி ஸரூபேன வுத்தானி, த்³வே ஆவத்தஹாரவஸேன வேதி³தப்³பா³னி.

    Idāni sabbampi taṃ saṅkhepena ca vitthārena ca desitamatthaṃ nigamento yato kho āvusotiādiappanāvāramāha. Tattha evaṃ akusalaṃ pajānātīti evaṃ yathāniddiṭṭhadasākusalakammapathavasena akusalaṃ pajānāti. Evaṃ akusalamūlantiādīsupi eseva nayo. Ettāvatā ekena nayena catusaccakammaṭṭhānikassa yāva arahattā niyyānaṃ kathitaṃ hoti. Kathaṃ? Ettha hi ṭhapetvā abhijjhaṃ dasa akusalakammapathā ca kusalakammapathā ca dukkhasaccaṃ. Abhijjhā ca lobho akusalamūlañcāti ime dve dhammā nippariyāyena samudayasaccaṃ. Pariyāyena pana sabbepi kammapathā dukkhasaccaṃ. Sabbāni kusalākusalamūlāni samudayasaccaṃ. Ubhinnaṃ appavatti nirodhasaccaṃ . Dukkhaṃ parijānanto samudayaṃ pajahamāno nirodhaṃ pajānanto ariyamaggo maggasaccanti iti dve saccāni sarūpena vuttāni, dve āvattahāravasena veditabbāni.

    ஸோ ஸப்³ப³ஸோ ராகா³னுஸயங் பஹாயாதி ஸோ ஏவங் அகுஸலாதீ³னி பஜானந்தோ ஸப்³பா³காரேன ராகா³னுஸயங் பஜஹித்வா. படிகா⁴னுஸயங் படிவினோதெ³த்வாதி படிகா⁴னுஸயஞ்ச ஸப்³பா³காரேனேவ நீஹரித்வாதி வுத்தங் ஹோதி. எத்தாவதா அனாகா³மிமக்³கோ³ கதி²தோ. அஸ்மீதி தி³ட்டி²மானானுஸயங் ஸமூஹனித்வாதி பஞ்சஸு க²ந்தே⁴ஸு கஞ்சி த⁴ம்மங் அனவகாரீகரித்வா ‘‘அஸ்மீ’’தி இமினா ஸமூஹக்³க³ஹணாகாரேன பவத்தங் தி³ட்டி²மானானுஸயங் ஸமுக்³கா⁴டெத்வா.

    So sabbaso rāgānusayaṃ pahāyāti so evaṃ akusalādīni pajānanto sabbākārena rāgānusayaṃ pajahitvā. Paṭighānusayaṃ paṭivinodetvāti paṭighānusayañca sabbākāreneva nīharitvāti vuttaṃ hoti. Ettāvatā anāgāmimaggo kathito. Asmīti diṭṭhimānānusayaṃ samūhanitvāti pañcasu khandhesu kañci dhammaṃ anavakārīkaritvā ‘‘asmī’’ti iminā samūhaggahaṇākārena pavattaṃ diṭṭhimānānusayaṃ samugghāṭetvā.

    தத்த² தி³ட்டி²மானானுஸயந்தி தி³ட்டி²ஸதி³ஸங் மானானுஸயந்தி வுத்தங் ஹோதி. அயஞ்ஹி மானானுஸயோ அஸ்மீதி பவத்தத்தா தி³ட்டி²ஸதி³ஸோ ஹோதி, தஸ்மா ஏவங் வுத்தோ . இமஞ்ச அஸ்மிமானங் வித்தா²ரதோ விஞ்ஞாதுகாமேன க²ந்தி⁴யவக்³கே³ கே²மகஸுத்தங் (ஸங்॰ நி॰ 3.89) ஓலோகேதப்³ப³ந்தி.

    Tattha diṭṭhimānānusayanti diṭṭhisadisaṃ mānānusayanti vuttaṃ hoti. Ayañhi mānānusayo asmīti pavattattā diṭṭhisadiso hoti, tasmā evaṃ vutto . Imañca asmimānaṃ vitthārato viññātukāmena khandhiyavagge khemakasuttaṃ (saṃ. ni. 3.89) oloketabbanti.

    அவிஜ்ஜங் பஹாயாதி வட்டமூலங் அவிஜ்ஜங் பஜஹித்வா. விஜ்ஜங் உப்பாதெ³த்வாதி தஸ்ஸா அவிஜ்ஜாய ஸமுக்³கா⁴டிகங் அரஹத்தமக்³க³விஜ்ஜங் உப்பாதெ³த்வா. எத்தாவதா அரஹத்தமக்³கோ³ கதி²தோ. தி³ட்டே²வ த⁴ம்மே து³க்க²ஸ்ஸந்தகரோ ஹோதீதி அஸ்மிங்யேவ அத்தபா⁴வே வட்டது³க்க²ஸ்ஸ பரிச்சே²த³கரோ ஹோதி. எத்தாவதாபி கோ², ஆவுஸோதி தே³ஸனங் நிய்யாதேதி, இமாய கம்மபத²தே³ஸனாய வுத்தமனஸிகாரப்படிவேத⁴வஸேனபீதி வுத்தங் ஹோதி. ஸேஸங் வுத்தனயமேவ. ஏவங் அனாகா³மிமக்³க³அரஹத்தமக்³கே³ஹி தே³ஸனங் நிட்ட²பேஸீதி.

    Avijjaṃ pahāyāti vaṭṭamūlaṃ avijjaṃ pajahitvā. Vijjaṃ uppādetvāti tassā avijjāya samugghāṭikaṃ arahattamaggavijjaṃ uppādetvā. Ettāvatā arahattamaggo kathito. Diṭṭheva dhamme dukkhassantakaro hotīti asmiṃyeva attabhāve vaṭṭadukkhassa paricchedakaro hoti. Ettāvatāpi kho, āvusoti desanaṃ niyyāteti, imāya kammapathadesanāya vuttamanasikārappaṭivedhavasenapīti vuttaṃ hoti. Sesaṃ vuttanayameva. Evaṃ anāgāmimaggaarahattamaggehi desanaṃ niṭṭhapesīti.

    குஸலகம்மபத²வண்ணனா நிட்டி²தா.

    Kusalakammapathavaṇṇanā niṭṭhitā.

    ஆஹாரவாரவண்ணனா

    Āhāravāravaṇṇanā

    90. ஸாதா⁴வுஸோதி கோ²…பே॰… ஆக³தோ இமங் ஸத்³த⁴ம்மந்தி ஏவங் ஆயஸ்மதோ ஸாரிபுத்தஸ்ஸ குஸலாகுஸலமுகே²ன சதுஸச்சதே³ஸனங் ஸுத்வா தங் ஆயஸ்மதோ ஸாரிபுத்தஸ்ஸ பா⁴ஸிதங் ‘‘ஸாதா⁴வுஸோ’’தி இமினா வசனேன தே பி⁴க்கூ² அபி⁴னந்தி³த்வா இமஸ்ஸேவ வசனஸ்ஸ ஸமுட்டா²பகேன சித்தேன அனுமோதி³த்வா வசஸா ஸம்படிச்சி²த்வா சேதஸா ஸம்பியாயித்வாதி வுத்தங் ஹோதி. இதா³னி யஸ்மா தே²ரோ நானப்பகாரேன சதுஸச்சதே³ஸனங் தே³ஸேதுங் படிப³லோ, யதா²ஹ ‘‘ஸாரிபுத்தோ, பி⁴க்க²வே, பஹோதி சத்தாரி அரியஸச்சானி வித்தா²ரேன ஆசிக்கி²துங் தே³ஸேது’’ந்தி யஸ்மா வா உத்தரிம்பி தே³ஸேதுகாமோவ ஹுத்வா ‘‘எத்தாவதாபி கோ²’’தி அவச, தஸ்மா அபரேனபி நயேன ஸச்சதே³ஸனங் ஸோதுகாமா தே பி⁴க்கூ² ஆயஸ்மந்தங் ஸாரிபுத்தங் உத்தரிங் பஞ்ஹங் அபுச்சி²ங்ஸு. தேன ஸயமேவ புச்சி²த்வா விஸ்ஸஜ்ஜிதபஞ்ஹதோ உத்தரிங் ஸியா கோ² பனாவுஸோ, அஞ்ஞோபி பரியாயோ ப⁴வெய்ய அஞ்ஞம்பி காரணந்தி இமினா நயேன அஞ்ஞங் அதிரேகங் பஞ்ஹங் புச்சி²ங்ஸு, புரிமபஞ்ஹஸ்ஸ வா உபரிபா⁴கே³ புச்சி²ங்ஸூதி வுத்தங் ஹோதி. அத² நேஸங் ப்³யாகரமானோ தே²ரோ ஸியா, ஆவுஸோதிஆதி³மாஹ. தத்தா²யங் அனுத்தானபத³வண்ணனா, ஆஹாரந்தி பச்சயங். பச்சயோ ஹி ஆஹரதி அத்தனோ ப²லங், தஸ்மா ‘‘ஆஹாரோ’’தி வுச்சதி.

    90.Sādhāvusoti kho…pe… āgato imaṃ saddhammanti evaṃ āyasmato sāriputtassa kusalākusalamukhena catusaccadesanaṃ sutvā taṃ āyasmato sāriputtassa bhāsitaṃ ‘‘sādhāvuso’’ti iminā vacanena te bhikkhū abhinanditvā imasseva vacanassa samuṭṭhāpakena cittena anumoditvā vacasā sampaṭicchitvā cetasā sampiyāyitvāti vuttaṃ hoti. Idāni yasmā thero nānappakārena catusaccadesanaṃ desetuṃ paṭibalo, yathāha ‘‘sāriputto, bhikkhave, pahoti cattāri ariyasaccāni vitthārena ācikkhituṃ desetu’’nti yasmā vā uttarimpi desetukāmova hutvā ‘‘ettāvatāpi kho’’ti avaca, tasmā aparenapi nayena saccadesanaṃ sotukāmā te bhikkhū āyasmantaṃ sāriputtaṃ uttariṃ pañhaṃ apucchiṃsu. Tena sayameva pucchitvā vissajjitapañhato uttariṃ siyā kho panāvuso, aññopi pariyāyo bhaveyya aññampi kāraṇanti iminā nayena aññaṃ atirekaṃ pañhaṃ pucchiṃsu, purimapañhassa vā uparibhāge pucchiṃsūti vuttaṃ hoti. Atha nesaṃ byākaramāno thero siyā, āvusotiādimāha. Tatthāyaṃ anuttānapadavaṇṇanā, āhāranti paccayaṃ. Paccayo hi āharati attano phalaṃ, tasmā ‘‘āhāro’’ti vuccati.

    பூ⁴தானங் வா ஸத்தானந்திஆதீ³ஸு பூ⁴தாதி ஸஞ்ஜாதா, நிப்³ப³த்தா. ஸம்ப⁴வேஸீனந்தி யே ஸம்ப⁴வங் ஜாதிங் நிப்³ப³த்திங் ஏஸந்தி க³வேஸந்தி. தத்த² சதூஸு யோனீஸு அண்ட³ஜஜலாபு³ஜா ஸத்தா யாவ அண்ட³கோஸங் வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸினோ நாம. அண்ட³கோஸங் வத்தி²கோஸஞ்ச பி⁴ந்தி³த்வா ப³ஹி நிக்க²ந்தா பூ⁴தா நாம. ஸங்ஸேத³ஜா ஓபபாதிகா ச பட²மசித்தக்க²ணே ஸம்ப⁴வேஸினோ நாம. து³தியசித்தக்க²ணதோ பபு⁴தி பூ⁴தா நாம. யேன யேன வா இரியாபதே²ன ஜாயந்தி, யாவ தே ததோ அஞ்ஞங் ந பாபுணந்தி, தாவ ஸம்ப⁴வேஸினோ நாம. ததோ பரங் பூ⁴தா நாம.

    Bhūtānaṃvā sattānantiādīsu bhūtāti sañjātā, nibbattā. Sambhavesīnanti ye sambhavaṃ jātiṃ nibbattiṃ esanti gavesanti. Tattha catūsu yonīsu aṇḍajajalābujā sattā yāva aṇḍakosaṃ vatthikosañca na bhindanti, tāva sambhavesino nāma. Aṇḍakosaṃ vatthikosañca bhinditvā bahi nikkhantā bhūtā nāma. Saṃsedajā opapātikā ca paṭhamacittakkhaṇe sambhavesino nāma. Dutiyacittakkhaṇato pabhuti bhūtā nāma. Yena yena vā iriyāpathena jāyanti, yāva te tato aññaṃ na pāpuṇanti, tāva sambhavesino nāma. Tato paraṃ bhūtā nāma.

    அத² வா பூ⁴தாதி ஜாதா அபி⁴னிப்³ப³த்தா, யே பூ⁴தாயேவ ந புன ப⁴விஸ்ஸந்தீதி ஸங்க்²யங் க³ச்ச²ந்தி, தேஸங் கீ²ணாஸவானமேதங் அதி⁴வசனங். ஸம்ப⁴வமேஸந்தீதி ஸம்ப⁴வேஸினோ. அப்பஹீனப⁴வஸங்யோஜனத்தா ஆயதிம்பி ஸம்ப⁴வங் ஏஸந்தானங் ஸெக்க²புது²ஜ்ஜனானமேதங் அதி⁴வசனங். ஏவங் ஸப்³ப³தா²பி இமேஹி த்³வீஹி பதே³ஹி ஸப்³ப³ஸத்தே பரியாதி³யதி. வாஸத்³தோ³ செத்த² ஸம்பிண்ட³னத்தோ², தஸ்மா பூ⁴தானஞ்ச ஸம்ப⁴வேஸீனஞ்சாதி அயமத்தோ² வேதி³தப்³போ³.

    Atha vā bhūtāti jātā abhinibbattā, ye bhūtāyeva na puna bhavissantīti saṅkhyaṃ gacchanti, tesaṃ khīṇāsavānametaṃ adhivacanaṃ. Sambhavamesantīti sambhavesino. Appahīnabhavasaṃyojanattā āyatimpi sambhavaṃ esantānaṃ sekkhaputhujjanānametaṃ adhivacanaṃ. Evaṃ sabbathāpi imehi dvīhi padehi sabbasatte pariyādiyati. Vāsaddo cettha sampiṇḍanattho, tasmā bhūtānañca sambhavesīnañcāti ayamattho veditabbo.

    டி²தியாதி டி²தத்த²ங். அனுக்³க³ஹாயாதி அனுக்³க³ஹத்த²ங் உபகாரத்த²ங். வசனபே⁴தோ³ சேஸ, அத்தோ² பன த்³வின்னம்பி பதா³னங் ஏகோயேவ. அத² வா டி²தியாதி தஸ்ஸ தஸ்ஸ ஸத்தஸ்ஸ உப்பன்னத⁴ம்மானங் அனுப்பப³ந்த⁴வஸேன அவிச்சே²தா³ய. அனுக்³க³ஹாயாதி அனுப்பன்னானங் உப்பாதா³ய. உபோ⁴பி சேதானி பூ⁴தானங் டி²தியா சேவ அனுக்³க³ஹாய ச. ஸம்ப⁴வேஸீனங் வா டி²தியா சேவ அனுக்³க³ஹாய சாதி ஏவங் உப⁴யத்த² த³ட்ட²ப்³பா³னி. கப³ளீகாரோ ஆஹாரோதி கப³ளங் கத்வா அஜ்ஜோ²ஹரிதப்³ப³தோ கப³ளீகாரோ ஆஹாரோ, ஓத³னகும்மாஸாதி³வத்து²காய ஓஜாயேதங் அதி⁴வசனங். ஓளாரிகோ வா ஸுகு²மோ வாதி வத்து²ஓளாரிகதாய ஓளாரிகோ, வத்து²ஸுகு²மதாய ஸுகு²மோ. ஸபா⁴வேன பன ஸுகு²மரூபபரியாபன்னத்தா கப³ளீகாரோ ஆஹாரோ ஸுகு²மோவ ஹோதி. ஸாபி சஸ்ஸ வத்து²தோ ஓளாரிகதா ஸுகு²மதா ச உபாதா³யுபாதா³ய வேதி³தப்³பா³.

    Ṭhitiyāti ṭhitatthaṃ. Anuggahāyāti anuggahatthaṃ upakāratthaṃ. Vacanabhedo cesa, attho pana dvinnampi padānaṃ ekoyeva. Atha vā ṭhitiyāti tassa tassa sattassa uppannadhammānaṃ anuppabandhavasena avicchedāya. Anuggahāyāti anuppannānaṃ uppādāya. Ubhopi cetāni bhūtānaṃ ṭhitiyā ceva anuggahāya ca. Sambhavesīnaṃ vā ṭhitiyā ceva anuggahāya cāti evaṃ ubhayattha daṭṭhabbāni. Kabaḷīkāro āhāroti kabaḷaṃ katvā ajjhoharitabbato kabaḷīkāro āhāro, odanakummāsādivatthukāya ojāyetaṃ adhivacanaṃ. Oḷāriko vā sukhumo vāti vatthuoḷārikatāya oḷāriko, vatthusukhumatāya sukhumo. Sabhāvena pana sukhumarūpapariyāpannattā kabaḷīkāro āhāro sukhumova hoti. Sāpi cassa vatthuto oḷārikatā sukhumatā ca upādāyupādāya veditabbā.

    கும்பீ⁴லானஞ்ஹி ஆஹாரங் உபாதா³ய மோரானங் ஆஹாரோ ஸுகு²மோ. கும்பீ⁴லா கிர பாஸாணே கி³லந்தி. தே ச நேஸங் குச்சி²ப்பத்தாவ விலீயந்தி. மோரா ஸப்பவிச்சி²காதி³பாணே கா²த³ந்தி. மோரானங் பன ஆஹாரங் உபாதா³ய தரச்சா²னங் ஆஹாரோ ஸுகு²மோ. தே கிர திவஸ்ஸச²ட்³டி³தானி விஸாணானி சேவ அட்டீ²னி ச கா²த³ந்தி. தானி ச நேஸங் கே²ளேன தேமிதமத்தேனேவ கந்த³மூலங் விய முது³கானி ஹொந்தி. தரச்சா²னம்பி ஆஹாரங் உபாதா³ய ஹத்தீ²னங் ஆஹாரோ ஸுகு²மோ. தேபி நானாருக்க²ஸாகா²யோ கா²த³ந்தி. ஹத்தீ²னங் ஆஹாரதோ க³வயகோ³கண்ணமிகா³தீ³னங் ஆஹாரோ ஸுகு²மோ. தே கிர நிஸ்ஸாரானி நானாருக்க²பண்ணாதீ³னி கா²த³ந்தி. தேஸம்பி ஆஹாரதோ கு³ன்னங் ஆஹாரோ ஸுகு²மோ. தே அல்லஸுக்க²திணானி கா²த³ந்தி. தேஸங் ஆஹாரதோ ஸஸானங் ஆஹாரோ ஸுகு²மோ. ஸஸானங் ஆஹாரதோ ஸகுணானங் ஆஹாரோ ஸுகு²மோ. ஸகுணானங் ஆஹாரதோ பச்சந்தவாஸீனங் ஆஹாரோ ஸுகு²மோ. பச்சந்தவாஸீனங் ஆஹாரதோ கா³மபோ⁴ஜகானங் ஆஹாரோ ஸுகு²மோ. கா³மபோ⁴ஜகானங் ஆஹாரதோ ராஜராஜமஹாமத்தானங் ஆஹாரோ ஸுகு²மோ. தேஸம்பி ஆஹாரதோ சக்கவத்தினோ ஆஹாரோ ஸுகு²மோ. சக்கவத்தினோ ஆஹாரதோ பு⁴ம்மதே³வானங் ஆஹாரோ ஸுகு²மோ. பு⁴ம்மதே³வானங் ஆஹாரதோ சாதுமஹாராஜிகானங் ஆஹாரோ ஸுகு²மோ. ஏவங் யாவ பரனிம்மிதவஸவத்தீனங் ஆஹாரோ வித்தா²ரேதப்³போ³, தேஸங் ஆஹாரோ ஸுகு²மொத்வேவ நிட்ட²ங் பத்தோ.

    Kumbhīlānañhi āhāraṃ upādāya morānaṃ āhāro sukhumo. Kumbhīlā kira pāsāṇe gilanti. Te ca nesaṃ kucchippattāva vilīyanti. Morā sappavicchikādipāṇe khādanti. Morānaṃ pana āhāraṃ upādāya taracchānaṃ āhāro sukhumo. Te kira tivassachaḍḍitāni visāṇāni ceva aṭṭhīni ca khādanti. Tāni ca nesaṃ kheḷena temitamatteneva kandamūlaṃ viya mudukāni honti. Taracchānampi āhāraṃ upādāya hatthīnaṃ āhāro sukhumo. Tepi nānārukkhasākhāyo khādanti. Hatthīnaṃ āhārato gavayagokaṇṇamigādīnaṃ āhāro sukhumo. Te kira nissārāni nānārukkhapaṇṇādīni khādanti. Tesampi āhārato gunnaṃ āhāro sukhumo. Te allasukkhatiṇāni khādanti. Tesaṃ āhārato sasānaṃ āhāro sukhumo. Sasānaṃ āhārato sakuṇānaṃ āhāro sukhumo. Sakuṇānaṃ āhārato paccantavāsīnaṃ āhāro sukhumo. Paccantavāsīnaṃ āhārato gāmabhojakānaṃ āhāro sukhumo. Gāmabhojakānaṃ āhārato rājarājamahāmattānaṃ āhāro sukhumo. Tesampi āhārato cakkavattino āhāro sukhumo. Cakkavattino āhārato bhummadevānaṃ āhāro sukhumo. Bhummadevānaṃ āhārato cātumahārājikānaṃ āhāro sukhumo. Evaṃ yāva paranimmitavasavattīnaṃ āhāro vitthāretabbo, tesaṃ āhāro sukhumotveva niṭṭhaṃ patto.

    எத்த² ச ஓளாரிகே வத்து²ஸ்மிங் ஓஜா பரித்தா ஹோதி து³ப்³ப³லா, ஸுகு²மே ப³லவதீ. ததா² ஹி ஏகபத்தபூரம்பி யாகு³ங் பீவதோ முஹுத்தேனேவ ஜிக⁴ச்சி²தோ ஹோதி, யங்கஞ்சிதே³வ கா²தி³துகாமோ. ஸப்பிங் பன பஸடமத்தங் பிவித்வா தி³வஸங் அபொ⁴த்துகாமோ ஹோதி. தத்த² வத்து² பரிஸ்ஸமங் வினோதே³தி, ந பன ஸக்கோதி பாலேதுங். ஓஜா பாலேதி, ந ஸக்கோதி பரிஸ்ஸமங் வினோதே³துங். த்³வே பன ஏகதோ ஹுத்வா பரிஸ்ஸமஞ்சேவ வினோதெ³ந்தி பாலெந்தி சாதி.

    Ettha ca oḷārike vatthusmiṃ ojā parittā hoti dubbalā, sukhume balavatī. Tathā hi ekapattapūrampi yāguṃ pīvato muhutteneva jighacchito hoti, yaṃkañcideva khāditukāmo. Sappiṃ pana pasaṭamattaṃ pivitvā divasaṃ abhottukāmo hoti. Tattha vatthu parissamaṃ vinodeti, na pana sakkoti pāletuṃ. Ojā pāleti, na sakkoti parissamaṃ vinodetuṃ. Dve pana ekato hutvā parissamañceva vinodenti pālenti cāti.

    ப²ஸ்ஸோ து³தியோதி சக்கு²ஸம்ப²ஸ்ஸாதி³ ச²ப்³பி³தோ⁴பி ப²ஸ்ஸோ. ஏதேஸு சதூஸு ஆஹாரேஸு து³தியோ ஆஹாரோதி வேதி³தப்³போ³. தே³ஸனானயோ ஏவ சேஸ. தஸ்மா இமினா நாம காரணேன து³தியோ வா ததியோ வாதி இத³மெத்த² ந க³வேஸிதப்³ப³ங். மனோஸஞ்சேதனாதி சேதனா ஏவ வுச்சதி. விஞ்ஞாணந்தி யங்கிஞ்சி சித்தங்.

    Phassodutiyoti cakkhusamphassādi chabbidhopi phasso. Etesu catūsu āhāresu dutiyo āhāroti veditabbo. Desanānayo eva cesa. Tasmā iminā nāma kāraṇena dutiyo vā tatiyo vāti idamettha na gavesitabbaṃ. Manosañcetanāti cetanā eva vuccati. Viññāṇanti yaṃkiñci cittaṃ.

    எத்தா²ஹ, யதி³ பச்சயட்டோ² ஆஹாரட்டோ², அத² கஸ்மா அஞ்ஞேஸுபி ஸத்தானங் பச்சயேஸு விஜ்ஜமானேஸு இமேயேவ சத்தாரோ வுத்தாதி? வுச்சதே, அஜ்ஜ²த்திகஸந்ததியா விஸேஸபச்சயத்தா. விஸேஸபச்சயோ ஹி கப³ளீகாராஹாரப⁴க்கா²னங் ஸத்தானங் ரூபகாயஸ்ஸ கப³ளீகாரோ ஆஹாரோ. நாமகாயே வேத³னாய ப²ஸ்ஸோ, விஞ்ஞாணஸ்ஸ மனோஸஞ்சேதனா, நாமரூபஸ்ஸ விஞ்ஞாணங். யதா²ஹ –

    Etthāha, yadi paccayaṭṭho āhāraṭṭho, atha kasmā aññesupi sattānaṃ paccayesu vijjamānesu imeyeva cattāro vuttāti? Vuccate, ajjhattikasantatiyā visesapaccayattā. Visesapaccayo hi kabaḷīkārāhārabhakkhānaṃ sattānaṃ rūpakāyassa kabaḷīkāro āhāro. Nāmakāye vedanāya phasso, viññāṇassa manosañcetanā, nāmarūpassa viññāṇaṃ. Yathāha –

    ‘‘ஸெய்யதா²பி, பி⁴க்க²வே, அயங் காயோ ஆஹாரட்டி²திகோ, ஆஹாரங் படிச்ச திட்ட²தி, அனாஹாரோ நோ திட்ட²தி. ததா² ப²ஸ்ஸபச்சயா வேத³னா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூப’’ந்தி.

    ‘‘Seyyathāpi, bhikkhave, ayaṃ kāyo āhāraṭṭhitiko, āhāraṃ paṭicca tiṭṭhati, anāhāro no tiṭṭhati. Tathā phassapaccayā vedanā, saṅkhārapaccayā viññāṇaṃ, viññāṇapaccayā nāmarūpa’’nti.

    கோ பனெத்த² ஆஹாரோ, கிங் ஆஹரதீதி? கப³ளீகாராஹாரோ ஓஜட்ட²மகரூபானி ஆஹரதி. ப²ஸ்ஸாஹாரோ திஸ்ஸோ வேத³னா, மனோஸஞ்சேதனாஹாரோ தயோ ப⁴வே, விஞ்ஞாணாஹாரோ படிஸந்தி⁴னாமரூபந்தி.

    Ko panettha āhāro, kiṃ āharatīti? Kabaḷīkārāhāro ojaṭṭhamakarūpāni āharati. Phassāhāro tisso vedanā, manosañcetanāhāro tayo bhave, viññāṇāhāro paṭisandhināmarūpanti.

    கத²ங்? கப³ளீகாராஹாரோ தாவ முகே² ட²பிதமத்தோயேவ அட்ட² ரூபானி ஸமுட்டா²பேதி. த³ந்தவிசுண்ணிதங் பன அஜ்ஜோ²ஹரியமானங் ஏகேகங் ஸித்த²ங் அட்ட²ட்ட² ரூபானி ஸமுட்டா²பேதியேவ. ஏவங் ஓஜட்ட²மகரூபானி ஆஹரதி.

    Kathaṃ? Kabaḷīkārāhāro tāva mukhe ṭhapitamattoyeva aṭṭha rūpāni samuṭṭhāpeti. Dantavicuṇṇitaṃ pana ajjhohariyamānaṃ ekekaṃ sitthaṃ aṭṭhaṭṭha rūpāni samuṭṭhāpetiyeva. Evaṃ ojaṭṭhamakarūpāni āharati.

    ப²ஸ்ஸாஹாரோ பன ஸுக²வேத³னியோ ப²ஸ்ஸோ உப்பஜ்ஜமானோ ஸுக²வேத³னங் ஆஹரதி, ததா² து³க்க²வேத³னியோ து³க்க²ங், அது³க்க²மஸுக²வேத³னியோ அது³க்க²மஸுக²ந்தி ஏவங் ஸப்³ப³தா²பி ப²ஸ்ஸாஹாரோ திஸ்ஸோ வேத³னா ஆஹரதி.

    Phassāhāro pana sukhavedaniyo phasso uppajjamāno sukhavedanaṃ āharati, tathā dukkhavedaniyo dukkhaṃ, adukkhamasukhavedaniyo adukkhamasukhanti evaṃ sabbathāpi phassāhāro tisso vedanā āharati.

    மனோஸஞ்சேதனாஹாரோ காமப⁴வூபக³ங் கம்மங் காமப⁴வங் ஆஹரதி, ரூபாரூபப⁴வூபகா³னி தங் தங் ப⁴வங். ஏவங் ஸப்³ப³தா²பி மனோஸஞ்சேதனாஹாரோ தயோ ப⁴வே ஆஹரதி.

    Manosañcetanāhāro kāmabhavūpagaṃ kammaṃ kāmabhavaṃ āharati, rūpārūpabhavūpagāni taṃ taṃ bhavaṃ. Evaṃ sabbathāpi manosañcetanāhāro tayo bhave āharati.

    விஞ்ஞாணாஹாரோ பன யே ச படிஸந்தி⁴க்க²ணே தங்ஸம்பயுத்தகா தயோ க²ந்தா⁴, யானி ச திஸந்ததிவஸேன திங்ஸரூபானி உப்பஜ்ஜந்தி, ஸஹஜாதாதி³பச்சயனயேன தானி ஆஹரதீதி வுச்சதி. ஏவங் விஞ்ஞாணாஹாரோ படிஸந்தி⁴னாமரூபங் ஆஹரதீதி.

    Viññāṇāhāro pana ye ca paṭisandhikkhaṇe taṃsampayuttakā tayo khandhā, yāni ca tisantativasena tiṃsarūpāni uppajjanti, sahajātādipaccayanayena tāni āharatīti vuccati. Evaṃ viññāṇāhāro paṭisandhināmarūpaṃ āharatīti.

    எத்த² ச மனோஸஞ்சேதனாஹாரோ தயோ ப⁴வே ஆஹரதீதி ஸாஸவா குஸலாகுஸலசேதனாவ வுத்தா. விஞ்ஞாணங் படிஸந்தி⁴னாமரூபங் ஆஹரதீதி படிஸந்தி⁴விஞ்ஞாணமேவ வுத்தங் . அவிஸேஸேன பன தங்ஸம்பயுத்ததங்ஸமுட்டா²னத⁴ம்மானங் ஆஹரணதோ பேதே ஆஹாராதி வேதி³தப்³பா³.

    Ettha ca manosañcetanāhāro tayo bhave āharatīti sāsavā kusalākusalacetanāva vuttā. Viññāṇaṃ paṭisandhināmarūpaṃ āharatīti paṭisandhiviññāṇameva vuttaṃ . Avisesena pana taṃsampayuttataṃsamuṭṭhānadhammānaṃ āharaṇato pete āhārāti veditabbā.

    ஏதேஸு சதூஸு ஆஹாரேஸு கப³ளீகாராஹாரோ உபத்த²ம்பெ⁴ந்தோ ஆஹாரகிச்சங் ஸாதே⁴தி. ப²ஸ்ஸோ பு²ஸந்தோயேவ, மனோஸஞ்சேதனா ஆயூஹமானாவ. விஞ்ஞாணங் விஜானந்தமேவ.

    Etesu catūsu āhāresu kabaḷīkārāhāro upatthambhento āhārakiccaṃ sādheti. Phasso phusantoyeva, manosañcetanā āyūhamānāva. Viññāṇaṃ vijānantameva.

    கத²ங்? கப³ளீகாராஹாரோ ஹி உபத்த²ம்பெ⁴ந்தோயேவ காயட்ட²பனேன ஸத்தானங் டி²தியா ஹோதி. கம்மஜனிதோபி ஹி அயங் காயோ கப³ளீகாராஹாரேன உபத்த²ம்பி⁴தோ த³ஸபி வஸ்ஸானி வஸ்ஸஸதம்பி யாவ ஆயுபரிமாணங் திட்ட²தி. யதா² கிங்? யதா² மாதுயா ஜனிதோபி தா³ரகோ தா⁴தியா த²ஞ்ஞாதீ³னி பாயெத்வா போஸியமானோவ சிரங் திட்ட²தி, யதா² சுபத்த²ம்பே⁴ன உபத்த²ம்பி⁴தகே³ஹங். வுத்தம்பி சேதங் –

    Kathaṃ? Kabaḷīkārāhāro hi upatthambhentoyeva kāyaṭṭhapanena sattānaṃ ṭhitiyā hoti. Kammajanitopi hi ayaṃ kāyo kabaḷīkārāhārena upatthambhito dasapi vassāni vassasatampi yāva āyuparimāṇaṃ tiṭṭhati. Yathā kiṃ? Yathā mātuyā janitopi dārako dhātiyā thaññādīni pāyetvā posiyamānova ciraṃ tiṭṭhati, yathā cupatthambhena upatthambhitagehaṃ. Vuttampi cetaṃ –

    ‘‘யதா² மஹாராஜ கே³ஹே பதந்தே அஞ்ஞேன தா³ருனா உபத்த²ம்பெ⁴ந்தி, அஞ்ஞேன தா³ருனா உபத்த²ம்பி⁴தங் ஸந்தங் ஏவங் தங் கே³ஹங் ந பததி, ஏவமேவ கோ² மஹாராஜ அயங் காயோ ஆஹாரட்டி²திகோ, ஆஹாரங் படிச்ச திட்ட²தீ’’தி.

    ‘‘Yathā mahārāja gehe patante aññena dārunā upatthambhenti, aññena dārunā upatthambhitaṃ santaṃ evaṃ taṃ gehaṃ na patati, evameva kho mahārāja ayaṃ kāyo āhāraṭṭhitiko, āhāraṃ paṭicca tiṭṭhatī’’ti.

    ஏவங் கப³ளீகாரோ ஆஹாரோ உபத்த²ம்பெ⁴ந்தோ ஆஹாரகிச்சங் ஸாதே⁴தி. ஏவங் ஸாதெ⁴ந்தோபி ச கப³ளீகாரோ ஆஹாரோ த்³வின்னங் ரூபஸந்ததீனங் பச்சயோ ஹோதி ஆஹாரஸமுட்டா²னஸ்ஸ ச உபாதி³ன்னஸ்ஸ ச. கம்மஜானங் அனுபாலகோ ஹுத்வா பச்சயோ ஹோதி. ஆஹாரஸமுட்டா²னானங் ஜனகோ ஹுத்வா பச்சயோ ஹோதி.

    Evaṃ kabaḷīkāro āhāro upatthambhento āhārakiccaṃ sādheti. Evaṃ sādhentopi ca kabaḷīkāro āhāro dvinnaṃ rūpasantatīnaṃ paccayo hoti āhārasamuṭṭhānassa ca upādinnassa ca. Kammajānaṃ anupālako hutvā paccayo hoti. Āhārasamuṭṭhānānaṃ janako hutvā paccayo hoti.

    ப²ஸ்ஸோ பன ஸுகா²தி³வத்து²பூ⁴தங் ஆரம்மணங் பு²ஸந்தோயேவ ஸுகா²தி³வேத³னாபவத்தனேன ஸத்தானங் டி²தியா ஹோதி. மனோஸஞ்சேதனா குஸலாகுஸலகம்மவஸேன ஆயூஹமானாயேவ ப⁴வமூலனிப்பா²த³னதோ ஸத்தானங் டி²தியா ஹோதி. விஞ்ஞாணங் விஜானந்தமேவ நாமரூபப்பவத்தனேன ஸத்தானங் டி²தியா ஹோதி.

    Phasso pana sukhādivatthubhūtaṃ ārammaṇaṃ phusantoyeva sukhādivedanāpavattanena sattānaṃ ṭhitiyā hoti. Manosañcetanā kusalākusalakammavasena āyūhamānāyeva bhavamūlanipphādanato sattānaṃ ṭhitiyā hoti. Viññāṇaṃ vijānantameva nāmarūpappavattanena sattānaṃ ṭhitiyā hoti.

    ஏவங் உபத்த²ம்ப⁴னாதி³வஸேன ஆஹாரகிச்சங் ஸாத⁴யமானேஸு பனேதேஸு சத்தாரி ப⁴யானி த³ட்ட²ப்³பா³னி. ஸெய்யதி²த³ங், கப³ளீகாராஹாரே நிகந்தியேவ ப⁴யங், ப²ஸ்ஸே உபக³மனமேவ, மனோஸஞ்சேதனாய ஆயூஹனமேவ, விஞ்ஞாணே அபி⁴னிபாதோயேவ ப⁴யந்தி. கிங் காரணா? கப³ளீகாராஹாரே ஹி நிகந்திங் கத்வா ஸீதாதீ³னங் புரெக்க²தா ஸத்தா ஆஹாரத்தா²ய முத்³தா³க³ணனாதி³கம்மானி கரொந்தா அனப்பகங் து³க்க²ங் நிக³ச்ச²ந்தி. ஏகச்சே ச இமஸ்மிங் ஸாஸனே பப்³ப³ஜித்வாபி வேஜ்ஜகம்மாதி³காய அனேஸனாய ஆஹாரங் பரியேஸந்தா தி³ட்டே²பி த⁴ம்மே கா³ரய்ஹா ஹொந்தி. ஸம்பராயேபி தஸ்ஸ ஸங்கா⁴டிபி ஆதி³த்தா ஸம்பஜ்ஜலிதாதிஆதி³னா லக்க²ணஸங்யுத்தே வுத்தனயேன ஸமணபேதா ஹொந்தி. இமினாவ தாவ காரணேன கப³ளீகாராஹாரே நிகந்தியேவ ப⁴யந்தி வேதி³தப்³பா³.

    Evaṃ upatthambhanādivasena āhārakiccaṃ sādhayamānesu panetesu cattāri bhayāni daṭṭhabbāni. Seyyathidaṃ, kabaḷīkārāhāre nikantiyeva bhayaṃ, phasse upagamanameva, manosañcetanāya āyūhanameva, viññāṇe abhinipātoyeva bhayanti. Kiṃ kāraṇā? Kabaḷīkārāhāre hi nikantiṃ katvā sītādīnaṃ purekkhatā sattā āhāratthāya muddāgaṇanādikammāni karontā anappakaṃ dukkhaṃ nigacchanti. Ekacce ca imasmiṃ sāsane pabbajitvāpi vejjakammādikāya anesanāya āhāraṃ pariyesantā diṭṭhepi dhamme gārayhā honti. Samparāyepi tassa saṅghāṭipi ādittā sampajjalitātiādinā lakkhaṇasaṃyutte vuttanayena samaṇapetā honti. Imināva tāva kāraṇena kabaḷīkārāhāre nikantiyeva bhayanti veditabbā.

    ப²ஸ்ஸங் உபக³ச்ச²ந்தாபி ப²ஸ்ஸஸ்ஸாதி³னோ பரேஸங் ரக்கி²தகோ³பிதேஸு தா³ராதீ³ஸு ப⁴ண்டே³ஸு அபரஜ்ஜ²ந்தி. தே ஸஹ ப⁴ண்டே³ன ப⁴ண்ட³ஸாமிகா க³ஹெத்வா க²ண்டா³க²ண்டி³கங் வா சி²ந்தி³த்வா ஸங்காரகூடேஸு ச²ட்³டெ³ந்தி. ரஞ்ஞோ வா நிய்யாதெந்தி. ததோ நே ராஜா விவிதா⁴ கம்மகாரணா காராபேதி. காயஸ்ஸ ச பே⁴தா³ து³க்³க³தி நேஸங் பாடிகங்கா² ஹோதி. இதி ப²ஸ்ஸஸ்ஸாத³மூலகங் தி³ட்ட²த⁴ம்மிகம்பி ஸம்பராயிகம்பி ப⁴யங் ஸப்³ப³மாக³தமேவ ஹோதி. இமினா காரணேன ப²ஸ்ஸாஹாரே உபக³மனமேவ ப⁴யந்தி வேதி³தப்³ப³ங்.

    Phassaṃ upagacchantāpi phassassādino paresaṃ rakkhitagopitesu dārādīsu bhaṇḍesu aparajjhanti. Te saha bhaṇḍena bhaṇḍasāmikā gahetvā khaṇḍākhaṇḍikaṃ vā chinditvā saṅkārakūṭesu chaḍḍenti. Rañño vā niyyātenti. Tato ne rājā vividhā kammakāraṇā kārāpeti. Kāyassa ca bhedā duggati nesaṃ pāṭikaṅkhā hoti. Iti phassassādamūlakaṃ diṭṭhadhammikampi samparāyikampi bhayaṃ sabbamāgatameva hoti. Iminā kāraṇena phassāhāre upagamanameva bhayanti veditabbaṃ.

    குஸலாகுஸலகம்மாயூஹனேனேவ பன தம்மூலகங் தீஸு ப⁴வேஸு ப⁴யங் ஸப்³ப³மாக³தங்யேவ ஹோதி. இமினா காரணேன மனோஸஞ்சேதனாஹாரே ஆயூஹனமேவ ப⁴யந்தி வேதி³தப்³ப³ங்.

    Kusalākusalakammāyūhaneneva pana tammūlakaṃ tīsu bhavesu bhayaṃ sabbamāgataṃyeva hoti. Iminā kāraṇena manosañcetanāhāre āyūhanameva bhayanti veditabbaṃ.

    படிஸந்தி⁴விஞ்ஞாணஞ்ச யஸ்மிங் யஸ்மிங் டா²னே அபி⁴னிபததி, தஸ்மிங் தஸ்மிங் டா²னே படிஸந்தி⁴னாமரூபங் க³ஹெத்வாவ நிப்³ப³த்ததி, தஸ்மிஞ்ச நிப்³ப³த்தே ஸப்³ப³ப⁴யானி நிப்³ப³த்தானியேவ ஹொந்தி, தம்மூலகத்தாதி, இமினா காரணேன விஞ்ஞாணாஹாரே அபி⁴னிபாதோயேவ ப⁴யந்தி வேதி³தப்³போ³.

    Paṭisandhiviññāṇañca yasmiṃ yasmiṃ ṭhāne abhinipatati, tasmiṃ tasmiṃ ṭhāne paṭisandhināmarūpaṃ gahetvāva nibbattati, tasmiñca nibbatte sabbabhayāni nibbattāniyeva honti, tammūlakattāti, iminā kāraṇena viññāṇāhāre abhinipātoyeva bhayanti veditabbo.

    ஏவங் ஸப⁴யேஸு பன இமேஸு ஆஹாரேஸு ஸம்மாஸம்பு³த்³தோ⁴ கப³ளீகாராஹாரே நிகந்திபரியாதா³னத்த²ங் ‘‘ஸெய்யதா²பி, பி⁴க்க²வே, த்³வே ஜாயம்பதிகா’’திஆதி³னா (ஸங்॰ நி॰ 2.63) நயேன புத்தமங்ஸூபமங் தே³ஸேஸி. ப²ஸ்ஸாஹாரே நிகந்திபரியாதா³னத்த²ங் ‘‘ஸெய்யதா²பி, பி⁴க்க²வே, கா³வீ நிச்சம்மா’’திஆதி³னா நயேன நிச்சம்மகா³வூபமங் தே³ஸேஸி. மனோஸஞ்சேதனாஹாரே நிகந்திபரியாதா³னத்த²ங் ‘‘ஸெய்யதா²பி, பி⁴க்க²வே, அங்கா³ரகாஸூ’’திஆதி³னா நயேன அங்கா³ரகாஸூபமங் தே³ஸேஸி. விஞ்ஞாணாஹாரே நிகந்திபரியாதா³னத்த²ங் ‘‘ஸெய்யதா²பி, பி⁴க்க²வே, சோரங் ஆகு³சாரி’’ந்திஆதி³னா நயேன ஸத்திஸதாஹதூபமங் தே³ஸேஸி.

    Evaṃ sabhayesu pana imesu āhāresu sammāsambuddho kabaḷīkārāhāre nikantipariyādānatthaṃ ‘‘seyyathāpi, bhikkhave, dve jāyampatikā’’tiādinā (saṃ. ni. 2.63) nayena puttamaṃsūpamaṃ desesi. Phassāhāre nikantipariyādānatthaṃ ‘‘seyyathāpi, bhikkhave, gāvī niccammā’’tiādinā nayena niccammagāvūpamaṃ desesi. Manosañcetanāhāre nikantipariyādānatthaṃ ‘‘seyyathāpi, bhikkhave, aṅgārakāsū’’tiādinā nayena aṅgārakāsūpamaṃ desesi. Viññāṇāhāre nikantipariyādānatthaṃ ‘‘seyyathāpi, bhikkhave, coraṃ āgucāri’’ntiādinā nayena sattisatāhatūpamaṃ desesi.

    தத்ராயங் பூ⁴தமத்த²ங் கத்வா ஸங்கே²பதோ அத்த²யோஜனா, த்³வே கிர ஜாயம்பதிகா புத்தங் க³ஹெத்வா பரித்தேன பாதெ²ய்யேன யோஜனஸதிகங் கந்தாரமக்³க³ங் படிபஜ்ஜிங்ஸு. தேஸங் பஞ்ஞாஸ யோஜனானி க³ந்த்வா பாதெ²ய்யங் நிட்டா²ஸி. தே கு²ப்பிபாஸாதுரா விரளச்சா²யாயங் நிஸீதி³ங்ஸு. ததோ புரிஸோ ப⁴ரியங் ஆஹ ‘‘ப⁴த்³தே³ இதோ ஸமந்தா பஞ்ஞாஸ யோஜனானி கா³மோ வா நிக³மோ வா நத்தி², தஸ்மா யங் தங் புரிஸேன காதப்³ப³ங் ப³ஹும்பி கஸிகோ³ரக்கா²தி³கம்மங், ந தா³னி ஸக்கா தங் மயா காதுங், ஏஹி மங் மாரெத்வா உபட்³ட⁴மங்ஸங் கா²தி³த்வா உபட்³ட⁴ங் பாதெ²ய்யங் கத்வா புத்தேன ஸத்³தி⁴ங் கந்தாரங் நித்த²ராஹீ’’தி. ஸாபி ஆஹ ‘‘ஸாமி மயா தா³னி யங் தங் இத்தி²யா காதப்³ப³ங் ப³ஹும்பி ஸுத்தகந்தனாதி³கம்மங், தங் காதுங் ந ஸக்கா, ஏஹி மங் மாரெத்வா உபட்³ட⁴மங்ஸங் கா²தி³த்வா உபட்³ட⁴ங் பாதெ²ய்யங் கத்வா புத்தேன ஸத்³தி⁴ங் கந்தாரங் நித்த²ராஹீ’’தி. ததோ ஸோ தங் ஆஹ ‘‘ப⁴த்³தே³ மாதுகா³மமரணேன த்³வின்னங் மரணங் பஞ்ஞாயதி. ந ஹி மந்தோ³ குமாரோ மாதரங் வினா ஜீவிதுங் ஸக்கோதி. யதி³ பன மயங் ஜீவாம, புன தா³ரகங் லபெ⁴ய்யாம, ஹந்த³ தா³னி புத்தகங் மாரெத்வா மங்ஸங் க³ஹெத்வா கந்தாரங் நித்த²ராமா’’தி.

    Tatrāyaṃ bhūtamatthaṃ katvā saṅkhepato atthayojanā, dve kira jāyampatikā puttaṃ gahetvā parittena pātheyyena yojanasatikaṃ kantāramaggaṃ paṭipajjiṃsu. Tesaṃ paññāsa yojanāni gantvā pātheyyaṃ niṭṭhāsi. Te khuppipāsāturā viraḷacchāyāyaṃ nisīdiṃsu. Tato puriso bhariyaṃ āha ‘‘bhadde ito samantā paññāsa yojanāni gāmo vā nigamo vā natthi, tasmā yaṃ taṃ purisena kātabbaṃ bahumpi kasigorakkhādikammaṃ, na dāni sakkā taṃ mayā kātuṃ, ehi maṃ māretvā upaḍḍhamaṃsaṃ khāditvā upaḍḍhaṃ pātheyyaṃ katvā puttena saddhiṃ kantāraṃ nittharāhī’’ti. Sāpi āha ‘‘sāmi mayā dāni yaṃ taṃ itthiyā kātabbaṃ bahumpi suttakantanādikammaṃ, taṃ kātuṃ na sakkā, ehi maṃ māretvā upaḍḍhamaṃsaṃ khāditvā upaḍḍhaṃ pātheyyaṃ katvā puttena saddhiṃ kantāraṃ nittharāhī’’ti. Tato so taṃ āha ‘‘bhadde mātugāmamaraṇena dvinnaṃ maraṇaṃ paññāyati. Na hi mando kumāro mātaraṃ vinā jīvituṃ sakkoti. Yadi pana mayaṃ jīvāma, puna dārakaṃ labheyyāma, handa dāni puttakaṃ māretvā maṃsaṃ gahetvā kantāraṃ nittharāmā’’ti.

    ததோ மாதா புத்தமாஹ ‘‘தாத பிது ஸந்திகங் க³ச்சா²ஹீ’’தி. ஸோ அக³மாஸி. அத²ஸ்ஸ பிதா ‘‘மயா புத்தகங் போஸெஸ்ஸாமீதி கஸிகோ³ரக்கா²தீ³ஹி அனப்பகங் து³க்க²மனுபூ⁴தங், ந ஸக்கோமி புத்தங் மாரேதுங், த்வங்யேவ தவ புத்தகங் மாரேஹீ’’தி வத்வா ‘‘தாத மாதுஸந்திகமேவ க³ச்சா²ஹீ’’தி ஆஹ. ஸோ அக³மாஸி. அத²ஸ்ஸ மாதாபி ‘‘மயா புத்தங் பத்தெ²ந்தியா கோ³வதகுக்குரவததே³வதாயாசனாதீ³ஹிபி தாவ அனப்பகங் து³க்க²ங் அனுபூ⁴தங், கோ பன வாதோ³ குச்சி²னா பரிஹரந்தியா? ந ஸக்காஹங் புத்தங் மாரேது’’ந்தி வத்வா ‘‘தாத பிதுஸந்திகங்யேவ க³ச்சா²ஹீ’’தி ஆஹ. ஏவங் ஸோ த்³வின்னங் அந்தரா க³ச்ச²ந்தோயேவ மதோ. தே தங் தி³ஸ்வா பரிதே³வித்வா புப்³பே³ வுத்தனயேனேவ மங்ஸானி க³ஹெத்வா கா²த³ந்தா பக்கமிங்ஸு. தேஸங் ஸோ புத்தமங்ஸாஹாரோ நவஹி காரணேஹி படிகுலத்தா நேவ த³வாய ஹோதி, ந மதா³ய ந மண்ட³னாய ந விபூ⁴ஸனாய, கேவலங் கந்தாரனித்த²ரணத்தா²யேவ ஹோதி.

    Tato mātā puttamāha ‘‘tāta pitu santikaṃ gacchāhī’’ti. So agamāsi. Athassa pitā ‘‘mayā puttakaṃ posessāmīti kasigorakkhādīhi anappakaṃ dukkhamanubhūtaṃ, na sakkomi puttaṃ māretuṃ, tvaṃyeva tava puttakaṃ mārehī’’ti vatvā ‘‘tāta mātusantikameva gacchāhī’’ti āha. So agamāsi. Athassa mātāpi ‘‘mayā puttaṃ patthentiyā govatakukkuravatadevatāyācanādīhipi tāva anappakaṃ dukkhaṃ anubhūtaṃ, ko pana vādo kucchinā pariharantiyā? Na sakkāhaṃ puttaṃ māretu’’nti vatvā ‘‘tāta pitusantikaṃyeva gacchāhī’’ti āha. Evaṃ so dvinnaṃ antarā gacchantoyeva mato. Te taṃ disvā paridevitvā pubbe vuttanayeneva maṃsāni gahetvā khādantā pakkamiṃsu. Tesaṃ so puttamaṃsāhāro navahi kāraṇehi paṭikulattā neva davāya hoti, na madāya na maṇḍanāya na vibhūsanāya, kevalaṃ kantāranittharaṇatthāyeva hoti.

    கதமேஹி நவஹி காரணேஹி படிகூலோதி சே? ஸஜாதிமங்ஸதாய ஞாதிமங்ஸதாய புத்தமங்ஸதாய பியபுத்தமங்ஸதாய தருணமங்ஸதாய ஆமகமங்ஸதாய அகோ³ரஸமங்ஸதாய அலோணதாய அதூ⁴பிததாயாதி. தஸ்மா யோ பி⁴க்கு² கப³ளீகாராஹாரங் ஏவங் புத்தமங்ஸஸதி³ஸங் பஸ்ஸதி , ஸோ தத்த² நிகந்திங் பரியாதி³யதி. அயங் தாவ புத்தமங்ஸூபமாயங் அத்த²யோஜனா.

    Katamehi navahi kāraṇehi paṭikūloti ce? Sajātimaṃsatāya ñātimaṃsatāya puttamaṃsatāya piyaputtamaṃsatāya taruṇamaṃsatāya āmakamaṃsatāya agorasamaṃsatāya aloṇatāya adhūpitatāyāti. Tasmā yo bhikkhu kabaḷīkārāhāraṃ evaṃ puttamaṃsasadisaṃ passati , so tattha nikantiṃ pariyādiyati. Ayaṃ tāva puttamaṃsūpamāyaṃ atthayojanā.

    நிச்சம்மகா³வூபமாயங் பன யதா² ஸா கா³வீ கீ³வதோ யாவ கு²ரா, தாவ சம்மங் உத்³தா³லெத்வா முத்தா யங் யதே³வ நிஸ்ஸாய திட்ட²தி, தத்த² பாணகேஹி க²ஜ்ஜமானா து³க்க²ஸ்ஸேவாதி⁴கரணங் ஹோதி, ஏவங் ப²ஸ்ஸோபி யங் யதே³வ வத்து²ங் ஆரம்மணங் வா நிஸ்ஸாய திட்ட²தி, தங்தங்வத்தா²ரம்மணஸம்ப⁴வஸ்ஸ வேத³யிதது³க்க²ஸ்ஸ அதி⁴கரணமேவ ஹோதி. தஸ்மா யோ பி⁴க்கு² ப²ஸ்ஸாஹாரங் ஏவங் நிச்சம்மகா³விஸதி³ஸங் பஸ்ஸதி , ஸோ தத்த² நிகந்திங் பரியாதி³யதி, அயங் நிச்சம்மகா³வூபமாயங் அத்த²யோஜனா.

    Niccammagāvūpamāyaṃ pana yathā sā gāvī gīvato yāva khurā, tāva cammaṃ uddāletvā muttā yaṃ yadeva nissāya tiṭṭhati, tattha pāṇakehi khajjamānā dukkhassevādhikaraṇaṃ hoti, evaṃ phassopi yaṃ yadeva vatthuṃ ārammaṇaṃ vā nissāya tiṭṭhati, taṃtaṃvatthārammaṇasambhavassa vedayitadukkhassa adhikaraṇameva hoti. Tasmā yo bhikkhu phassāhāraṃ evaṃ niccammagāvisadisaṃ passati , so tattha nikantiṃ pariyādiyati, ayaṃ niccammagāvūpamāyaṃ atthayojanā.

    அங்கா³ரகாஸூபமாயங் பன யதா² ஸா அங்கா³ரகாஸு, ஏவங் மஹாபரிளாஹட்டே²ன தயோ ப⁴வா. யதா² நானாபா³ஹாஸு க³ஹெத்வா தத்த² உபகட்³ட⁴கா த்³வே புரிஸா, ஏவங் ப⁴வேஸு உபகட்³ட⁴னட்டே²ன மனோஸஞ்சேதனா. தஸ்மா யோ பி⁴க்கு² மனோஸஞ்சேதனாஹாரங் ஏவங் அங்கா³ரகாஸூபகட்³ட⁴கபுரிஸஸதி³ஸங் பஸ்ஸதி, ஸோ தத்த² நிகந்திங் பரியாதி³யதி, அயங் அங்கா³ரகாஸூபமாயங் அத்த²யோஜனா.

    Aṅgārakāsūpamāyaṃ pana yathā sā aṅgārakāsu, evaṃ mahāpariḷāhaṭṭhena tayo bhavā. Yathā nānābāhāsu gahetvā tattha upakaḍḍhakā dve purisā, evaṃ bhavesu upakaḍḍhanaṭṭhena manosañcetanā. Tasmā yo bhikkhu manosañcetanāhāraṃ evaṃ aṅgārakāsūpakaḍḍhakapurisasadisaṃ passati, so tattha nikantiṃ pariyādiyati, ayaṃ aṅgārakāsūpamāyaṃ atthayojanā.

    ஸத்திஸதாஹதூபமாயங் பன யேன ஸோ புரிஸோ புப்³ப³ண்ஹஸமயே ஸத்திஸதேன ஹஞ்ஞதி, தமஸ்ஸ ஸரீரே வணமுக²ஸதங் கத்வா அந்தரா அட்ட²த்வா வினிவிஜ்ஜி²த்வா அபரபா⁴கே³யேவ பததி, ஏவங் இதரானி த்³வே ஸத்திஸதானி, ஏவமஸ்ஸ பதிதோகாஸே அபதித்வா அபதித்வா க³தாஹி ஸத்தீஹி ஸப்³ப³ஸரீரங் சி²த்³தா³வசி²த்³த³மேவ ஹோதி, தஸ்ஸ ஏகவணமுகே²பி உப்பன்னஸ்ஸ து³க்க²ஸ்ஸ பமாணங் நத்தி², கோ பன வாதோ³ தீஸு வணமுக²ஸதேஸு? தத்த² ஸத்தினிபாதகாலோ விய படிஸந்தி⁴விஞ்ஞாணனிப்³ப³த்தகாலோ. வணமுக²ஜனநங் விய க²ந்த⁴ஜனநங். வணமுகே²ஸு து³க்க²வேத³னுப்பாதோ³ விய ஜாதேஸு க²ந்தே⁴ஸு வட்டமூலகனானாவித⁴து³க்கு²ப்பாதோ³. அபரோ நயோ, ஆகு³சாரீ புரிஸோ விய படிஸந்தி⁴விஞ்ஞாணங். தஸ்ஸ ஸத்திகா⁴தேஹி உப்பன்னவணமுகா²னி விய விஞ்ஞாணபச்சயா நாமரூபங். வணமுக²பச்சயா தஸ்ஸ புரிஸஸ்ஸ கக்க²ளது³க்கு²ப்பாதோ³ விய நாமரூபபச்சயா விஞ்ஞாணஸ்ஸ த்³வத்திங்ஸகம்மகாரணஅட்ட²னவுதிரோகா³தி³வஸேன நானப்பகாரகது³க்கு²ப்பாதோ³ த³ட்ட²ப்³போ³. தஸ்மா யோ பி⁴க்கு² விஞ்ஞாணாஹாரங் ஏவங் ஸத்திஸதாஹதஸதி³ஸங் பஸ்ஸதி. ஸோ தத்த² நிகந்திங் பரியாதி³யதி, அயங் ஸத்திஸதாஹதூபமாயங் அத்த²யோஜனா.

    Sattisatāhatūpamāyaṃ pana yena so puriso pubbaṇhasamaye sattisatena haññati, tamassa sarīre vaṇamukhasataṃ katvā antarā aṭṭhatvā vinivijjhitvā aparabhāgeyeva patati, evaṃ itarāni dve sattisatāni, evamassa patitokāse apatitvā apatitvā gatāhi sattīhi sabbasarīraṃ chiddāvachiddameva hoti, tassa ekavaṇamukhepi uppannassa dukkhassa pamāṇaṃ natthi, ko pana vādo tīsu vaṇamukhasatesu? Tattha sattinipātakālo viya paṭisandhiviññāṇanibbattakālo. Vaṇamukhajananaṃ viya khandhajananaṃ. Vaṇamukhesu dukkhavedanuppādo viya jātesu khandhesu vaṭṭamūlakanānāvidhadukkhuppādo. Aparo nayo, āgucārī puriso viya paṭisandhiviññāṇaṃ. Tassa sattighātehi uppannavaṇamukhāni viya viññāṇapaccayā nāmarūpaṃ. Vaṇamukhapaccayā tassa purisassa kakkhaḷadukkhuppādo viya nāmarūpapaccayā viññāṇassa dvattiṃsakammakāraṇaaṭṭhanavutirogādivasena nānappakārakadukkhuppādo daṭṭhabbo. Tasmā yo bhikkhu viññāṇāhāraṃ evaṃ sattisatāhatasadisaṃ passati. So tattha nikantiṃ pariyādiyati, ayaṃ sattisatāhatūpamāyaṃ atthayojanā.

    ஸோ ஏவங் இமேஸு ஆஹாரேஸு நிகந்திங் பரியாதி³யந்தோ சத்தாரோபி ஆஹாரே பரிஜானாதி, யேஸு பரிஞ்ஞாதேஸு ஸப்³ப³ம்பி பரிஞ்ஞாதங் வத்து² பரிஞ்ஞாதமேவ ஹோதி. வுத்தஞ்ஹேதங் ப⁴க³வதா –

    So evaṃ imesu āhāresu nikantiṃ pariyādiyanto cattāropi āhāre parijānāti, yesu pariññātesu sabbampi pariññātaṃ vatthu pariññātameva hoti. Vuttañhetaṃ bhagavatā –

    ‘‘கப³ளீகாரே, பி⁴க்க²வே, ஆஹாரே பரிஞ்ஞாதே பஞ்சகாமகு³ணிகோ ராகோ³ பரிஞ்ஞாதோ ஹோதி. பஞ்சகாமகு³ணிகே ராகே³ பரிஞ்ஞாதே நத்தி² தங் ஸங்யோஜனங், யேன ஸங்யோஜனேன ஸங்யுத்தோ அரியஸாவகோ புன இமங் லோகங் ஆக³ச்செ²ய்ய. ப²ஸ்ஸே, பி⁴க்க²வே, ஆஹாரே பரிஞ்ஞாதே திஸ்ஸோ வேத³னா பரிஞ்ஞாதா ஹொந்தி. தீஸு வேத³னாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மி. மனோஸஞ்சேதனாய, பி⁴க்க²வே, ஆஹாரே பரிஞ்ஞாதே திஸ்ஸோ தண்ஹா பரிஞ்ஞாதா ஹொந்தி. தீஸு தண்ஹாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மி. விஞ்ஞாணே, பி⁴க்க²வே, ஆஹாரே பரிஞ்ஞாதே நாமரூபங் பரிஞ்ஞாதங் ஹோதி. நாமரூபே பரிஞ்ஞாதே அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மீ’’தி (ஸங்॰ நி॰ 2.63).

    ‘‘Kabaḷīkāre, bhikkhave, āhāre pariññāte pañcakāmaguṇiko rāgo pariññāto hoti. Pañcakāmaguṇike rāge pariññāte natthi taṃ saṃyojanaṃ, yena saṃyojanena saṃyutto ariyasāvako puna imaṃ lokaṃ āgaccheyya. Phasse, bhikkhave, āhāre pariññāte tisso vedanā pariññātā honti. Tīsu vedanāsu pariññātāsu ariyasāvakassa natthi kiñci uttarikaraṇīyanti vadāmi. Manosañcetanāya, bhikkhave, āhāre pariññāte tisso taṇhā pariññātā honti. Tīsu taṇhāsu pariññātāsu ariyasāvakassa natthi kiñci uttarikaraṇīyanti vadāmi. Viññāṇe, bhikkhave, āhāre pariññāte nāmarūpaṃ pariññātaṃ hoti. Nāmarūpe pariññāte ariyasāvakassa natthi kiñci uttarikaraṇīyanti vadāmī’’ti (saṃ. ni. 2.63).

    தண்ஹாஸமுத³யா ஆஹாரஸமுத³யோதி புரிமதண்ஹாஸமுத³யா படிஸந்தி⁴கானங் ஆஹாரானங் ஸமுத³யோ நிப்³ப³த்தோ ஹோதீதி அத்தோ². கத²ங்? படிஸந்தி⁴க்க²ணே ஹி திஸந்ததிவஸேன உப்பன்னஸமதிங்ஸரூபப்³ப⁴ந்தரே ஜாதா ஓஜா அத்தி². அயங் தண்ஹாபச்சயா நிப்³ப³த்தோ உபாதி³ன்னககப³ளீகாராஹாரோ. படிஸந்தி⁴சித்தஸம்பயுத்தா பன ப²ஸ்ஸசேதனா ஸயஞ்ச சித்தங் விஞ்ஞாணந்தி இமே தண்ஹாபச்சயா நிப்³ப³த்தா உபாதி³ன்னகப²ஸ்ஸமனோஸஞ்சேதனா விஞ்ஞாணாஹாராதி. ஏவங் தாவ புரிமதண்ஹாஸமுத³யா படிஸந்தி⁴கானங் ஆஹாரானங் ஸமுத³யோ வேதி³தப்³போ³. யஸ்மா பனித⁴ உபாதி³ன்னகாபி அனுபாதி³ன்னகாபி ஆஹாரா மிஸ்ஸெத்வா கதி²தா, தஸ்மா அனுபாதி³ன்னகானம்பி ஏவங் தண்ஹாஸமுத³யா ஆஹாரஸமுத³யோ வேதி³தப்³போ³ . அட்ட²லோப⁴ஸஹக³தசித்தஸமுட்டி²தேஸு ஹி ரூபேஸு ஓஜா அத்தி², அயங் ஸஹஜாததண்ஹாபச்சயா நிப்³ப³த்தோ அனுபாதி³ன்னககப³ளீகாராஹாரோ. லோப⁴ஸஹக³தசித்தஸம்பயுத்தா பன ப²ஸ்ஸசேதனா ஸயஞ்ச சித்தங் விஞ்ஞாணந்தி இமே தண்ஹாபச்சயா நிப்³ப³த்தா அனுபாதி³ன்னகப²ஸ்ஸமனோஸஞ்சேதனா விஞ்ஞாணாஹாராதி.

    Taṇhāsamudayā āhārasamudayoti purimataṇhāsamudayā paṭisandhikānaṃ āhārānaṃ samudayo nibbatto hotīti attho. Kathaṃ? Paṭisandhikkhaṇe hi tisantativasena uppannasamatiṃsarūpabbhantare jātā ojā atthi. Ayaṃ taṇhāpaccayā nibbatto upādinnakakabaḷīkārāhāro. Paṭisandhicittasampayuttā pana phassacetanā sayañca cittaṃ viññāṇanti ime taṇhāpaccayā nibbattā upādinnakaphassamanosañcetanā viññāṇāhārāti. Evaṃ tāva purimataṇhāsamudayā paṭisandhikānaṃ āhārānaṃ samudayo veditabbo. Yasmā panidha upādinnakāpi anupādinnakāpi āhārā missetvā kathitā, tasmā anupādinnakānampi evaṃ taṇhāsamudayā āhārasamudayo veditabbo . Aṭṭhalobhasahagatacittasamuṭṭhitesu hi rūpesu ojā atthi, ayaṃ sahajātataṇhāpaccayā nibbatto anupādinnakakabaḷīkārāhāro. Lobhasahagatacittasampayuttā pana phassacetanā sayañca cittaṃ viññāṇanti ime taṇhāpaccayā nibbattā anupādinnakaphassamanosañcetanā viññāṇāhārāti.

    தண்ஹானிரோதா⁴ ஆஹாரனிரோதோ⁴தி இமிஸ்ஸா உபாதி³ன்னகானஞ்ச அனுபாதி³ன்னகானஞ்ச ஆஹாரானங் பச்சயபூ⁴தாய தண்ஹாய நிரோதே⁴ன ஆஹாரனிரோதோ⁴ பஞ்ஞாயதி. ஸேஸங் வுத்தனயமேவ. அயங் பன விஸேஸோ, இத⁴ சத்தாரிபி ஸச்சானி ஸரூபேனேவ வுத்தானி. யதா² ச இத⁴, ஏவங் இதோ உத்தரிம்பி ஸப்³ப³வாரேஸூதி. தஸ்மா ஸப்³ப³த்த² அஸம்முய்ஹந்தேன ஸச்சானி உத்³த⁴ரிதப்³பா³னி. ஸப்³ப³வாரேஸு ச ‘‘எத்தாவதாபி கோ² ஆவுஸோ’’தி இத³ங் தே³ஸனானிய்யாதனங் தத்த² தத்த² தே³ஸிதத⁴ம்மவஸேன யோஜேதப்³ப³ங். தஸ்ஸ இத⁴ தாவ அயங் யோஜனா எத்தாவதாபீதி இமாய ஆஹாரதே³ஸனாய வுத்தமனஸிகாரப்படிவேத⁴வஸேனாபீதி வுத்தங் ஹோதி. ஏஸ நயோ ஸப்³ப³த்தா²பி.

    Taṇhānirodhāāhāranirodhoti imissā upādinnakānañca anupādinnakānañca āhārānaṃ paccayabhūtāya taṇhāya nirodhena āhāranirodho paññāyati. Sesaṃ vuttanayameva. Ayaṃ pana viseso, idha cattāripi saccāni sarūpeneva vuttāni. Yathā ca idha, evaṃ ito uttarimpi sabbavāresūti. Tasmā sabbattha asammuyhantena saccāni uddharitabbāni. Sabbavāresu ca ‘‘ettāvatāpi kho āvuso’’ti idaṃ desanāniyyātanaṃ tattha tattha desitadhammavasena yojetabbaṃ. Tassa idha tāva ayaṃ yojanā ettāvatāpīti imāya āhāradesanāya vuttamanasikārappaṭivedhavasenāpīti vuttaṃ hoti. Esa nayo sabbatthāpi.

    ஆஹாரவாரவண்ணனா நிட்டி²தா.

    Āhāravāravaṇṇanā niṭṭhitā.

    ஸச்சவாரவண்ணனா

    Saccavāravaṇṇanā

    91. இதா³னி ‘‘ஸாதா⁴வுஸோ’’தி புரிமனயேனேவ தே²ரஸ்ஸ பா⁴ஸிதங் அபி⁴னந்தி³த்வா அனுமோதி³த்வா தே பி⁴க்கூ² உத்தரிம்பி பஞ்ஹங் புச்சி²ங்ஸு. தே²ரோ ச நேஸங் அஞ்ஞேனபி பரியாயேன ப்³யாகாஸி. ஏஸ நயோ இதோ பரேஸுபி ஸப்³ப³வாரேஸு. தஸ்மா இதோ பரங் ஏவரூபானி வசனானி அனாமஸித்வா யேன யேன பரியாயேன ப்³யாகரோதி, தஸ்ஸ தஸ்ஸேவ அத்த²ங் வண்ணயிஸ்ஸாம. இமஸ்ஸ பன வாரஸ்ஸ ஸங்கே²பதே³ஸனாயங் து³க்க²ஞ்ச பஜானாதீதி எத்த² து³க்க²ந்தி து³க்க²ஸச்சங். வித்தா²ரதே³ஸனாயங் பன யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ ஸச்சனித்³தே³ஸே வுத்தமேவாதி.

    91. Idāni ‘‘sādhāvuso’’ti purimanayeneva therassa bhāsitaṃ abhinanditvā anumoditvā te bhikkhū uttarimpi pañhaṃ pucchiṃsu. Thero ca nesaṃ aññenapi pariyāyena byākāsi. Esa nayo ito paresupi sabbavāresu. Tasmā ito paraṃ evarūpāni vacanāni anāmasitvā yena yena pariyāyena byākaroti, tassa tasseva atthaṃ vaṇṇayissāma. Imassa pana vārassa saṅkhepadesanāyaṃ dukkhañca pajānātīti ettha dukkhanti dukkhasaccaṃ. Vitthāradesanāyaṃ pana yaṃ vattabbaṃ siyā, taṃ sabbaṃ visuddhimagge saccaniddese vuttamevāti.

    ஸச்சவாரவண்ணனா நிட்டி²தா.

    Saccavāravaṇṇanā niṭṭhitā.

    ஜராமரணவாரவண்ணனா

    Jarāmaraṇavāravaṇṇanā

    92. இதோ பரங் படிச்சஸமுப்பாத³வஸேன தே³ஸனா ஹோதி. தத்த² ஜராமரணவாரே தாவ தேஸங் தேஸந்தி அயங் ஸங்கே²பதோ அனேகேஸங் ஸத்தானங் ஸாதா⁴ரணனித்³தே³ஸோதி ஞாதப்³போ³. யா தே³வத³த்தஸ்ஸ ஜரா, யா ஸோமத³த்தஸ்ஸ ஜராதி ஏவஞ்ஹி தி³வஸம்பி கதெ²ந்தஸ்ஸ நேவ ஸத்தா பரியாதா³னங் க³ச்ச²ந்தி. இமேஹி பன த்³வீஹி பதே³ஹி ந கோசி ஸத்தோ அபரியாதி³ன்னோ ஹோதி. தஸ்மா வுத்தங் ‘‘அயங் ஸங்கே²பதோ அனேகேஸங் ஸத்தானங் ஸாதா⁴ரணனித்³தே³ஸோ’’தி.

    92. Ito paraṃ paṭiccasamuppādavasena desanā hoti. Tattha jarāmaraṇavāre tāva tesaṃ tesanti ayaṃ saṅkhepato anekesaṃ sattānaṃ sādhāraṇaniddesoti ñātabbo. Yā devadattassa jarā, yā somadattassa jarāti evañhi divasampi kathentassa neva sattā pariyādānaṃ gacchanti. Imehi pana dvīhi padehi na koci satto apariyādinno hoti. Tasmā vuttaṃ ‘‘ayaṃ saṅkhepato anekesaṃ sattānaṃ sādhāraṇaniddeso’’ti.

    தம்ஹி தம்ஹீதி அயங் க³திஜாதிவஸேன அனேகேஸங் நிகாயானங் ஸாதா⁴ரணனித்³தே³ஸோ. ஸத்தனிகாயேதி ஸாதா⁴ரணனித்³தே³ஸேன நித்³தி³ட்ட²ஸ்ஸ ஸரூபனித³ஸ்ஸனங். ஜரா ஜீரணதாதிஆதீ³ஸு பன ஜராதி ஸபா⁴வனித்³தே³ஸோ. ஜீரணதாதி ஆகாரனித்³தே³ஸோ. க²ண்டி³ச்சந்திஆத³யோ காலாதிக்கமே கிச்சனித்³தே³ஸா. பச்சி²மா த்³வே பகதினித்³தே³ஸா. அயஞ்ஹி ஜராதி இமினா பதே³ன ஸபா⁴வதோ தீ³பிதா, தேனஸ்ஸாயங் ஸபா⁴வனித்³தே³ஸோ. ஜீரணதாதி இமினா ஆகாரதோ. தேனஸ்ஸாயங் ஆகாரனித்³தே³ஸோ. க²ண்டி³ச்சந்தி இமினா காலாதிக்கமே த³ந்தனகா²னங் க²ண்டி³தபா⁴வகரணகிச்சதோ. பாலிச்சந்தி இமினா கேஸலோமானங் பலிதபா⁴வகரணகிச்சதோ. வலித்தசதாதி இமினா மங்ஸங் மிலாபெத்வா தசே வலித்தபா⁴வகரணகிச்சதோ தீ³பிதா. தேனஸ்ஸா இமே க²ண்டி³ச்சந்திஆத³யோ தயோ காலாதிக்கமே கிச்சனித்³தே³ஸா. தேஹி இமேஸங் விகாரானங் த³ஸ்ஸனவஸேன பாகடீபூ⁴தா பாகடஜரா த³ஸ்ஸிதா. யதே²வ ஹி உத³கஸ்ஸ வா அக்³கி³னோ வா வாதஸ்ஸ வா திணருக்கா²தீ³னங் ஸம்ப⁴க்³க³பலிப⁴க்³க³தாய வா ஜா²மதாய வா க³தமக்³கோ³ பாகடோ ஹோதி, ந ச ஸோ க³தமக்³கோ³ தானேவ உத³காதீ³னி, ஏவமேவ ஜராய த³ந்தாதீ³ஸு க²ண்டி³ச்சாதி³வஸேன க³தமக்³கோ³ பாகடோ, சக்கு²ங் உம்மீலெத்வாபி க³ய்ஹதி. ந ச க²ண்டி³ச்சாதீ³னேவ ஜரா, ந ஹி ஜரா சக்கு²விஞ்ஞெய்யா ஹோதி.

    Tamhi tamhīti ayaṃ gatijātivasena anekesaṃ nikāyānaṃ sādhāraṇaniddeso. Sattanikāyeti sādhāraṇaniddesena niddiṭṭhassa sarūpanidassanaṃ. Jarā jīraṇatātiādīsu pana jarāti sabhāvaniddeso. Jīraṇatāti ākāraniddeso. Khaṇḍiccantiādayo kālātikkame kiccaniddesā. Pacchimā dve pakatiniddesā. Ayañhi jarāti iminā padena sabhāvato dīpitā, tenassāyaṃ sabhāvaniddeso. Jīraṇatāti iminā ākārato. Tenassāyaṃ ākāraniddeso. Khaṇḍiccanti iminā kālātikkame dantanakhānaṃ khaṇḍitabhāvakaraṇakiccato. Pāliccanti iminā kesalomānaṃ palitabhāvakaraṇakiccato. Valittacatāti iminā maṃsaṃ milāpetvā tace valittabhāvakaraṇakiccato dīpitā. Tenassā ime khaṇḍiccantiādayo tayo kālātikkame kiccaniddesā. Tehi imesaṃ vikārānaṃ dassanavasena pākaṭībhūtā pākaṭajarā dassitā. Yatheva hi udakassa vā aggino vā vātassa vā tiṇarukkhādīnaṃ sambhaggapalibhaggatāya vā jhāmatāya vā gatamaggo pākaṭo hoti, na ca so gatamaggo tāneva udakādīni, evameva jarāya dantādīsu khaṇḍiccādivasena gatamaggo pākaṭo, cakkhuṃ ummīletvāpi gayhati. Na ca khaṇḍiccādīneva jarā, na hi jarā cakkhuviññeyyā hoti.

    ஆயுனோ ஸங்ஹானி இந்த்³ரியானங் பரிபாகோதி இமேஹி பன பதே³ஹி காலாதிக்கமேயேவ அபி⁴ப்³யத்ததாய ஆயுக்க²யசக்கா²தி³இந்த்³ரியபரிபாகஸஞ்ஞிதாய பகதியா தீ³பிதா. தேனஸ்ஸிமே பச்சி²மா த்³வே பகதினித்³தே³ஸாதி வேதி³தப்³பா³.

    Āyuno saṃhāni indriyānaṃ paripākoti imehi pana padehi kālātikkameyeva abhibyattatāya āyukkhayacakkhādiindriyaparipākasaññitāya pakatiyā dīpitā. Tenassime pacchimā dve pakatiniddesāti veditabbā.

    தத்த² யஸ்மா ஜரங் பத்தஸ்ஸ ஆயு ஹாயதி, தஸ்மா ஜரா ‘‘ஆயுனோ ஸங்ஹானீ’’தி ப²லூபசாரேன வுத்தா . யஸ்மா ச த³ஹரகாலே ஸுப்பஸன்னானி ஸுகு²மம்பி அத்தனோ விஸயங் ஸுகே²னேவ க³ண்ஹனஸமத்தா²னி சக்கா²தீ³னி இந்த்³ரியானி ஜரங் பத்தஸ்ஸ பரிபக்கானி ஆலுளிதானி அவிஸதா³னி ஓளாரிகம்பி அத்தனோ விஸயங் க³ஹேதுங் அஸமத்தா²னி ஹொந்தி, தஸ்மா ‘‘இந்த்³ரியானங் பரிபாகோ’’திபி ப²லூபசாரேனேவ வுத்தா. ஸா பனாயங் ஏவங் நித்³தி³ட்டா² ஸப்³பா³பி ஜரா பாகடா படிச்ச²ன்னாதி து³விதா⁴ ஹோதி.

    Tattha yasmā jaraṃ pattassa āyu hāyati, tasmā jarā ‘‘āyuno saṃhānī’’ti phalūpacārena vuttā . Yasmā ca daharakāle suppasannāni sukhumampi attano visayaṃ sukheneva gaṇhanasamatthāni cakkhādīni indriyāni jaraṃ pattassa paripakkāni āluḷitāni avisadāni oḷārikampi attano visayaṃ gahetuṃ asamatthāni honti, tasmā ‘‘indriyānaṃ paripāko’’tipi phalūpacāreneva vuttā. Sā panāyaṃ evaṃ niddiṭṭhā sabbāpi jarā pākaṭā paṭicchannāti duvidhā hoti.

    தத்த² த³ந்தாதீ³ஸு க²ண்ட³பா⁴வாதி³த³ஸ்ஸனதோ ரூபத⁴ம்மேஸு ஜரா பாகடஜரா நாம. அரூபத⁴ம்மேஸு பன தாதி³ஸஸ்ஸ விகாரஸ்ஸ அத³ஸ்ஸனதோ படிச்ச²ன்னஜரா நாம. தத்த² ய்வாயங் க²ண்டா³தி³பா⁴வோ தி³ஸ்ஸதி, ஸோ தாதி³ஸானங் த³ந்தாதீ³னங் ஸுவிஞ்ஞெய்யத்தா வண்ணோயேவ, தங் சக்கு²னா தி³ஸ்வா மனொத்³வாரேன சிந்தெத்வா ‘‘இமே த³ந்தா ஜராய பஹடா’’தி ஜரங் ஜானாதி உத³கட்டா²னே ப³த்³தா⁴னி கோ³ஸீஸாதீ³னி ஓலோகெத்வா ஹெட்டா² உத³கஸ்ஸ அத்தி²பா⁴வங் ஜானநங் விய. புன அவீசி ஸவீசீதி ஏவம்பி து³விதா⁴ ஹோதி. தத்த² மணிகனகரஜதபவாளஸூரியாதீ³னங் மந்த³த³ஸகாதீ³ஸு பாணீனங் விய புப்ப²ப²லபல்லவாதீ³ஸு ச அபாணீனங் விய அந்தரந்தரா வண்ணவிஸேஸாதீ³னங் து³விஞ்ஞெய்யத்தா ஜரா அவீசிஜரா நாம, நிரந்தரஜராதி அத்தோ². ததோ அஞ்ஞேஸு பன யதா²வுத்தேஸு அந்தரந்தரா வண்ணவிஸேஸாதீ³னங் ஸுவிஞ்ஞெய்யத்தா ஜரா ஸவீசிஜரா நாமாதி வேதி³தப்³பா³.

    Tattha dantādīsu khaṇḍabhāvādidassanato rūpadhammesu jarā pākaṭajarā nāma. Arūpadhammesu pana tādisassa vikārassa adassanato paṭicchannajarā nāma. Tattha yvāyaṃ khaṇḍādibhāvo dissati, so tādisānaṃ dantādīnaṃ suviññeyyattā vaṇṇoyeva, taṃ cakkhunā disvā manodvārena cintetvā ‘‘ime dantā jarāya pahaṭā’’ti jaraṃ jānāti udakaṭṭhāne baddhāni gosīsādīni oloketvā heṭṭhā udakassa atthibhāvaṃ jānanaṃ viya. Puna avīci savīcīti evampi duvidhā hoti. Tattha maṇikanakarajatapavāḷasūriyādīnaṃ mandadasakādīsu pāṇīnaṃ viya pupphaphalapallavādīsu ca apāṇīnaṃ viya antarantarā vaṇṇavisesādīnaṃ duviññeyyattā jarā avīcijarā nāma, nirantarajarāti attho. Tato aññesu pana yathāvuttesu antarantarā vaṇṇavisesādīnaṃ suviññeyyattā jarā savīcijarā nāmāti veditabbā.

    இதோ பரங், தேஸங் தேஸந்திஆதி³ வுத்தனயேனேவ வேதி³தப்³ப³ங். சுதி சவனதாதிஆதீ³ஸு பன சுதீதி சவனகவஸேன வுச்சதி, ஏகசதுபஞ்சக்க²ந்தா⁴னங் ஸாமஞ்ஞவசனமேதங். சவனதாதி பா⁴வவசனேன லக்க²ணனித³ஸ்ஸனங். பே⁴தோ³தி சுதிக்க²ந்தா⁴னங் ப⁴ங்கு³ப்பத்திபரிதீ³பனங். அந்தரதா⁴னந்தி க⁴டஸ்ஸேவ பி⁴ன்னஸ்ஸ பி⁴ன்னானங் சுதிக்க²ந்தா⁴னங் யேன கேனசி பரியாயேன டா²னாபா⁴வபரிதீ³பனங். மச்சு மரணந்தி மச்சுஸங்கா²தங் மரணங். தேன ஸமுச்சே²த³மரணாதீ³னி நிஸேதே⁴தி. காலோ நாம அந்தகோ, தஸ்ஸ கிரியாதி காலகிரியா. ஏதேன லோகஸம்முதியா மரணங் தீ³பேதி.

    Ito paraṃ, tesaṃ tesantiādi vuttanayeneva veditabbaṃ. Cuti cavanatātiādīsu pana cutīti cavanakavasena vuccati, ekacatupañcakkhandhānaṃ sāmaññavacanametaṃ. Cavanatāti bhāvavacanena lakkhaṇanidassanaṃ. Bhedoti cutikkhandhānaṃ bhaṅguppattiparidīpanaṃ. Antaradhānanti ghaṭasseva bhinnassa bhinnānaṃ cutikkhandhānaṃ yena kenaci pariyāyena ṭhānābhāvaparidīpanaṃ. Maccu maraṇanti maccusaṅkhātaṃ maraṇaṃ. Tena samucchedamaraṇādīni nisedheti. Kālo nāma antako, tassa kiriyāti kālakiriyā. Etena lokasammutiyā maraṇaṃ dīpeti.

    இதா³னி பரமத்தே²ன தீ³பேதுங், க²ந்தா⁴னங் பே⁴தோ³திஆதி³மாஹ. பரமத்தே²ன ஹி க²ந்தா⁴யேவ பி⁴ஜ்ஜந்தி, ந ஸத்தோ நாம கோசி மரதி. க²ந்தே⁴ஸு பன பி⁴ஜ்ஜமானேஸு ஸத்தோ மரதி, பி⁴ன்னேஸு மதோதி வோஹாரோ ஹோதி.

    Idāni paramatthena dīpetuṃ, khandhānaṃ bhedotiādimāha. Paramatthena hi khandhāyeva bhijjanti, na satto nāma koci marati. Khandhesu pana bhijjamānesu satto marati, bhinnesu matoti vohāro hoti.

    எத்த² ச சதுவோகாரவஸேன க²ந்தா⁴னங் பே⁴தோ³, ஏகவோகாரவஸேன களேவரஸ்ஸ நிக்கே²போ. சதுவோகாரவஸேன வா க²ந்தா⁴னங் பே⁴தோ³, ஸேஸத்³வயவஸேன களேவரஸ்ஸ நிக்கே²போ வேதி³தப்³போ³. கஸ்மா? ப⁴வத்³வயேபி ரூபகாயஸங்கா²தஸ்ஸ களேவரஸ்ஸ ஸம்ப⁴வதோ. அத² வா யஸ்மா ச சாதுமஹாராஜிகாதீ³ஸு க²ந்தா⁴ பி⁴ஜ்ஜந்தேவ, ந கிஞ்சி நிக்கி²பந்தி, தஸ்மா தேஸங் வஸேன க²ந்தா⁴னங் பே⁴தோ³, மனுஸ்ஸாதீ³ஸு களேவரஸ்ஸ நிக்கே²போ. எத்த² ச களேவரஸ்ஸ நிக்கே²பகாரணதோ மரணங் களேவரஸ்ஸ நிக்கே²போதி வுத்தந்தி ஏவமத்தோ² த³ட்ட²ப்³போ³.

    Ettha ca catuvokāravasena khandhānaṃ bhedo, ekavokāravasena kaḷevarassa nikkhepo. Catuvokāravasena vā khandhānaṃ bhedo, sesadvayavasena kaḷevarassa nikkhepo veditabbo. Kasmā? Bhavadvayepi rūpakāyasaṅkhātassa kaḷevarassa sambhavato. Atha vā yasmā ca cātumahārājikādīsu khandhā bhijjanteva, na kiñci nikkhipanti, tasmā tesaṃ vasena khandhānaṃ bhedo, manussādīsu kaḷevarassa nikkhepo. Ettha ca kaḷevarassa nikkhepakāraṇato maraṇaṃ kaḷevarassa nikkhepoti vuttanti evamattho daṭṭhabbo.

    இதி அயஞ்ச ஜரா இத³ஞ்ச மரணங். இத³ங் வுச்சதாவுஸோதி இத³ங் உப⁴யம்பி ஏகதோ கத்வா ஜராமரணந்தி கதீ²யதி. ஸேஸங் வுத்தனயமேவாதி.

    Iti ayañca jarā idañca maraṇaṃ. Idaṃ vuccatāvusoti idaṃ ubhayampi ekato katvā jarāmaraṇanti kathīyati. Sesaṃ vuttanayamevāti.

    ஜராமரணவாரவண்ணனா நிட்டி²தா.

    Jarāmaraṇavāravaṇṇanā niṭṭhitā.

    ஜாதிவாரவண்ணனா

    Jātivāravaṇṇanā

    93. ஜாதிவாரே ஜாதி ஸஞ்ஜாதீதிஆதீ³ஸு ஜாயனட்டே²ன ஜாதி, ஸா அபரிபுண்ணாயதனவஸேன யுத்தா. ஸஞ்ஜாயனட்டே²ன ஸஞ்ஜாதி, ஸா பரிபுண்ணாயதனவஸேன யுத்தா. ஓக்கமனட்டே²ன ஓக்கந்தி, ஸா அண்ட³ஜஜலாபு³ஜவஸேன யுத்தா. தே ஹி அண்ட³கோஸஞ்ச வத்தி²கோஸஞ்ச ஓக்கமந்தா பவிஸந்தா விய படிஸந்தி⁴ங் க³ண்ஹந்தி. அபி⁴னிப்³ப³த்தனட்டே²ன அபி⁴னிப்³ப³த்தி, ஸா ஸங்ஸேத³ஜஓபபாதிகவஸேன யுத்தா, தே ஹி பாகடாயேவ ஹுத்வா நிப்³ப³த்தந்தி. அயங் தாவ வோஹாரதே³ஸனா.

    93. Jātivāre jāti sañjātītiādīsu jāyanaṭṭhena jāti, sā aparipuṇṇāyatanavasena yuttā. Sañjāyanaṭṭhena sañjāti, sā paripuṇṇāyatanavasena yuttā. Okkamanaṭṭhena okkanti, sā aṇḍajajalābujavasena yuttā. Te hi aṇḍakosañca vatthikosañca okkamantā pavisantā viya paṭisandhiṃ gaṇhanti. Abhinibbattanaṭṭhena abhinibbatti, sā saṃsedajaopapātikavasena yuttā, te hi pākaṭāyeva hutvā nibbattanti. Ayaṃ tāva vohāradesanā.

    இதா³னி பரமத்த²தே³ஸனா ஹோதி. க²ந்தா⁴யேவ ஹி பரமத்த²தோ பாதுப⁴வந்தி, ந ஸத்தோ. தத்த² ச க²ந்தா⁴னந்தி ஏகவோகாரப⁴வே ஏகஸ்ஸ சதுவோகாரப⁴வே சதுன்னங் பஞ்சவோகாரப⁴வே பஞ்சன்னம்பி க³ஹணங் வேதி³தப்³ப³ங். பாதுபா⁴வோதி உப்பத்தி. ஆயதனானந்தி எத்த² தத்ர தத்ர உப்பஜ்ஜமானாயதனவஸேனேவ ஸங்க³ஹோ வேதி³தப்³போ³. படிலாபோ⁴தி ஸந்ததியங் பாதுபா⁴வோயேவ. பாதுப⁴வந்தானேவ ஹி தானி படிலத்³தா⁴னி நாம ஹொந்தி. அயங் வுச்சதாவுஸோ ஜாதீதி இமினா பதே³ன வோஹாரதோ பரமத்த²தோ ச தே³ஸிதாய ஜாதியா நிக³மனங் கரோதீதி. ப⁴வஸமுத³யாதி எத்த² பன ஜாதியா பச்சயபூ⁴தோ கம்மப⁴வோ வேதி³தப்³போ³. ஸேஸங் வுத்தனயமேவாதி.

    Idāni paramatthadesanā hoti. Khandhāyeva hi paramatthato pātubhavanti, na satto. Tattha ca khandhānanti ekavokārabhave ekassa catuvokārabhave catunnaṃ pañcavokārabhave pañcannampi gahaṇaṃ veditabbaṃ. Pātubhāvoti uppatti. Āyatanānanti ettha tatra tatra uppajjamānāyatanavaseneva saṅgaho veditabbo. Paṭilābhoti santatiyaṃ pātubhāvoyeva. Pātubhavantāneva hi tāni paṭiladdhāni nāma honti. Ayaṃ vuccatāvuso jātīti iminā padena vohārato paramatthato ca desitāya jātiyā nigamanaṃ karotīti. Bhavasamudayāti ettha pana jātiyā paccayabhūto kammabhavo veditabbo. Sesaṃ vuttanayamevāti.

    ஜாதிவாரவண்ணனா நிட்டி²தா.

    Jātivāravaṇṇanā niṭṭhitā.

    ப⁴வவாரவண்ணனா

    Bhavavāravaṇṇanā

    94. ப⁴வவாரே காமப⁴வோதி கம்மப⁴வோ ச உபபத்திப⁴வோ ச. தத்த² கம்மப⁴வோ நாம காமப⁴வூபக³ங் கம்மமேவ. தஞ்ஹி உபபத்திப⁴வஸ்ஸ காரணத்தா ‘‘ஸுகோ² பு³த்³தா⁴னமுப்பாதோ³ (த⁴॰ ப॰ 194) து³க்கோ² பாபஸ்ஸ உச்சயோ’’திஆதீ³னி (த⁴॰ ப॰ 117) விய ப²லவோஹாரேன ப⁴வோதி வுத்தங். உபபத்திப⁴வோ நாம தேன கம்மேன நிப்³ப³த்தங் உபாதி³ன்னக²ந்த⁴பஞ்சகங். தஞ்ஹி தத்த² ப⁴வதீதி கத்வா ப⁴வோதி வுத்தங். ஏவங் ஸப்³ப³தா²பி இத³ங் கம்மஞ்ச உபபத்தி ச உப⁴யம்பேதமித⁴ ‘‘காமப⁴வோ’’தி வுத்தங். ஏஸ நயோ ரூபாரூபப⁴வேஸு. உபாதா³னஸமுத³யாதி எத்த² பன உபாதா³னங் குஸலகம்மப⁴வஸ்ஸ உபனிஸ்ஸயவஸேனேவ பச்சயோ ஹோதி. அகுஸலகம்மப⁴வஸ்ஸ உபனிஸ்ஸயவஸேனபி ஸஹஜாதாதி³வஸேனபி. உபபத்திப⁴வஸ்ஸ பன ஸப்³ப³ஸ்ஸாபி உபனிஸ்ஸயவஸேனேவ. ஸேஸங் வுத்தனயமேவாதி.

    94. Bhavavāre kāmabhavoti kammabhavo ca upapattibhavo ca. Tattha kammabhavo nāma kāmabhavūpagaṃ kammameva. Tañhi upapattibhavassa kāraṇattā ‘‘sukho buddhānamuppādo (dha. pa. 194) dukkho pāpassa uccayo’’tiādīni (dha. pa. 117) viya phalavohārena bhavoti vuttaṃ. Upapattibhavo nāma tena kammena nibbattaṃ upādinnakhandhapañcakaṃ. Tañhi tattha bhavatīti katvā bhavoti vuttaṃ. Evaṃ sabbathāpi idaṃ kammañca upapatti ca ubhayampetamidha ‘‘kāmabhavo’’ti vuttaṃ. Esa nayo rūpārūpabhavesu. Upādānasamudayāti ettha pana upādānaṃ kusalakammabhavassa upanissayavaseneva paccayo hoti. Akusalakammabhavassa upanissayavasenapi sahajātādivasenapi. Upapattibhavassa pana sabbassāpi upanissayavaseneva. Sesaṃ vuttanayamevāti.

    ப⁴வவாரவண்ணனா நிட்டி²தா.

    Bhavavāravaṇṇanā niṭṭhitā.

    உபாதா³னவாரவண்ணனா

    Upādānavāravaṇṇanā

    95. உபாதா³னவாரே காமுபாதா³னந்திஆதீ³ஸு வத்து²காமங் உபாதி³யதி ஏதேன, ஸயங் வா தங் உபாதி³யதீதி காமுபாதா³னங். காமோ ச ஸோ உபாதா³னஞ்சாதி வா காமுபாதா³னங். உபாதா³னந்தி த³ள்ஹக்³க³ஹணங் வுச்சதி. த³ள்ஹத்தோ² ஹி எத்த² உபஸத்³தோ³, ‘‘உபாயாஸ உபகட்டா²’’திஆதீ³ஸு விய பஞ்சகாமகு³ணிகராக³ஸ்ஸேதங் அதி⁴வசனங். அயமெத்த² ஸங்கே²போ. வித்தா²ரதோ பனேதங் ‘‘தத்த² கதமங் காமுபாதா³னங், யோ காமேஸு காமச்ச²ந்தோ³’’தி (த⁴॰ ஸ॰ 1220; விப⁴॰ 938) வுத்தனயேன வேதி³தப்³ப³ங்.

    95. Upādānavāre kāmupādānantiādīsu vatthukāmaṃ upādiyati etena, sayaṃ vā taṃ upādiyatīti kāmupādānaṃ. Kāmo ca so upādānañcāti vā kāmupādānaṃ. Upādānanti daḷhaggahaṇaṃ vuccati. Daḷhattho hi ettha upasaddo, ‘‘upāyāsa upakaṭṭhā’’tiādīsu viya pañcakāmaguṇikarāgassetaṃ adhivacanaṃ. Ayamettha saṅkhepo. Vitthārato panetaṃ ‘‘tattha katamaṃ kāmupādānaṃ, yo kāmesu kāmacchando’’ti (dha. sa. 1220; vibha. 938) vuttanayena veditabbaṃ.

    ததா² தி³ட்டி² ச ஸா உபாதா³னஞ்சாதி தி³ட்டு²பாதா³னங். அத² வா தி³ட்டி²ங் உபாதி³யதி, உபாதி³யந்தி வா ஏதேன தி³ட்டி²ந்தி தி³ட்டு²பாதா³னங். உபாதி³யதி ஹி புரிமதி³ட்டி²ங் உத்தரதி³ட்டி². உபாதி³யந்தி ச தாய தி³ட்டி²ங். யதா²ஹ ‘‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்திஆதி³ (ம॰ நி॰ 3.27), ஸீலப்³ப³துபாதா³னஅத்தவாது³பாதா³னவஜ்ஜஸ்ஸ ஸப்³ப³தி³ட்டி²க³தஸ்ஸேதங் அதி⁴வசனங். அயமெத்த² ஸங்கே²போ. வித்தா²ரதோ பனேதங் ‘‘தத்த² கதமங் தி³ட்டு²பாதா³னங் நத்தி² தி³ன்ன’’ந்தி (த⁴॰ ஸ॰ 1220; விப⁴॰ 938) வுத்தனயேன வேதி³தப்³ப³ங்.

    Tathā diṭṭhi ca sā upādānañcāti diṭṭhupādānaṃ. Atha vā diṭṭhiṃ upādiyati, upādiyanti vā etena diṭṭhinti diṭṭhupādānaṃ. Upādiyati hi purimadiṭṭhiṃ uttaradiṭṭhi. Upādiyanti ca tāya diṭṭhiṃ. Yathāha ‘‘sassato attā ca loko ca, idameva saccaṃ moghamañña’’ntiādi (ma. ni. 3.27), sīlabbatupādānaattavādupādānavajjassa sabbadiṭṭhigatassetaṃ adhivacanaṃ. Ayamettha saṅkhepo. Vitthārato panetaṃ ‘‘tattha katamaṃ diṭṭhupādānaṃ natthi dinna’’nti (dha. sa. 1220; vibha. 938) vuttanayena veditabbaṃ.

    ததா² ஸீலப்³ப³தங் உபாதி³யந்தி ஏதேன, ஸயங் வா தங் உபாதி³யதி, ஸீலப்³ப³தஞ்ச தங் உபாதா³னஞ்சாதி வா ஸீலப்³ப³துபாதா³னங். கோ³ஸீலகோ³வதாதீ³னி ஹி ஏவங் ஸுத்³தீ⁴தி அபி⁴னிவேஸதோ ஸயமேவ உபாதா³னானி அயமெத்த² ஸங்கே²போ. வித்தா²ரதோ பனேதங் ‘‘தத்த² கதமங் ஸீலப்³ப³துபாதா³னங், இதோ ப³ஹித்³தா⁴ ஸமணப்³ராஹ்மணானங் ஸீலேன ஸுத்³தீ⁴’’தி வுத்தனயேன வேதி³தப்³ப³ங்.

    Tathā sīlabbataṃ upādiyanti etena, sayaṃ vā taṃ upādiyati, sīlabbatañca taṃ upādānañcāti vā sīlabbatupādānaṃ. Gosīlagovatādīni hi evaṃ suddhīti abhinivesato sayameva upādānāni ayamettha saṅkhepo. Vitthārato panetaṃ ‘‘tattha katamaṃ sīlabbatupādānaṃ, ito bahiddhā samaṇabrāhmaṇānaṃ sīlena suddhī’’ti vuttanayena veditabbaṃ.

    இதா³னி வத³ந்தி ஏதேனாதி வாதோ³. உபாதி³யந்தி ஏதேனாதி உபாதா³னங். கிங் வத³ந்தி, உபாதி³யந்தி வா? அத்தானங். அத்தனோ வாது³பாதா³னங் அத்தவாது³பாதா³னங். அத்தவாத³மத்தமேவ வா அத்தாதி உபாதி³யதி ஏதேனாதி அத்தவாது³பாதா³னங், வீஸதிவத்து²காய ஸக்காயதி³ட்டி²யா ஏதங் அதி⁴வசனங். அயமெத்த² ஸங்கே²போ. வித்தா²ரதோ பனேதங் ‘‘தத்த² கதமங் அத்தவாது³பாதா³னங், இத⁴ அஸ்ஸுதவா புது²ஜ்ஜனோ அரியானங் அத³ஸ்ஸாவீ’’தி (த⁴॰ ஸ॰ 1223) வுத்தனயேன வேதி³தப்³ப³ங்.

    Idāni vadanti etenāti vādo. Upādiyanti etenāti upādānaṃ. Kiṃ vadanti, upādiyanti vā? Attānaṃ. Attano vādupādānaṃ attavādupādānaṃ. Attavādamattameva vā attāti upādiyati etenāti attavādupādānaṃ, vīsativatthukāya sakkāyadiṭṭhiyā etaṃ adhivacanaṃ. Ayamettha saṅkhepo. Vitthārato panetaṃ ‘‘tattha katamaṃ attavādupādānaṃ, idha assutavā puthujjano ariyānaṃ adassāvī’’ti (dha. sa. 1223) vuttanayena veditabbaṃ.

    தண்ஹாஸமுத³யாதி எத்த² தண்ஹா காமுபாதா³னஸ்ஸ உபனிஸ்ஸயவஸேன அனந்தரஸமனந்தரனத்தி²விக³தாஸேவனவஸேன வா பச்சயோ. அவஸேஸானங் பன ஸஹஜாதாதி³வஸேனாபி. ஸேஸங் வுத்தனயமேவாதி.

    Taṇhāsamudayāti ettha taṇhā kāmupādānassa upanissayavasena anantarasamanantaranatthivigatāsevanavasena vā paccayo. Avasesānaṃ pana sahajātādivasenāpi. Sesaṃ vuttanayamevāti.

    உபாதா³னவாரவண்ணனா நிட்டி²தா.

    Upādānavāravaṇṇanā niṭṭhitā.

    தண்ஹாவாரவண்ணனா

    Taṇhāvāravaṇṇanā

    96. தண்ஹாவாரே ரூபதண்ஹா…பே॰… த⁴ம்மதண்ஹாதி ஏவங் சக்கு²த்³வாராதீ³ஸு ஜவனவீதி²யங் பவத்தாய தண்ஹாய ‘‘ஸெட்டி²புத்தோ ப்³ராஹ்மணபுத்தோ’’தி ஏவமாதீ³ஸு பிதிதோ நாமங் விய பிதிஸதி³ஸாரம்மணதோ நாமங். எத்த² ச ரூபாரம்மணா தண்ஹா, ரூபே தண்ஹாதி ரூபதண்ஹா. ஸா காமராக³பா⁴வேன ரூபங் அஸ்ஸாதெ³ந்தீ பவத்தமானா காமதண்ஹா. ஸஸ்ஸததி³ட்டி²ஸஹக³தராக³பா⁴வேன ரூபங் நிச்சங் து⁴வங் ஸஸ்ஸதந்தி ஏவங் அஸ்ஸாதெ³ந்தீ பவத்தமானா ப⁴வதண்ஹா. உச்சே²த³தி³ட்டி²ஸஹக³தராக³பா⁴வேன ரூபங் உச்சி²ஜ்ஜதி வினஸ்ஸதி பேச்ச ந ப⁴விஸ்ஸதீதி ஏவங் அஸ்ஸாதெ³ந்தீ பவத்தமானா விப⁴வதண்ஹாதி ஏவங் திவிதா⁴ ஹோதி. யதா² ச ரூபதண்ஹா, ததா² ஸத்³த³தண்ஹாத³யோபீதி ஏதானி அட்டா²ரஸ தண்ஹாவிசரிதானி ஹொந்தி. தானி அஜ்ஜ²த்தரூபாதீ³ஸு அட்டா²ரஸ, ப³ஹித்³தா⁴ரூபாதீ³ஸு அட்டா²ரஸாதி ச²த்திங்ஸ. இதி அதீதானி ச²த்திங்ஸ, அனாக³தானி ச²த்திங்ஸ, பச்சுப்பன்னானி ச²த்திங்ஸாதி அட்ட²ஸதங். ‘‘அஜ்ஜ²த்திகஸ்ஸுபாதா³ய ‘அஸ்மீ’தி ஹோதி , ‘இத்த²ஸ்மீ’தி ஹோதீ’’தி (விப⁴॰ 973-974) வா ஏவமாதீ³னா அஜ்ஜ²த்திகரூபாதி³னிஸ்ஸிதானி அட்டா²ரஸ, ‘‘பா³ஹிரஸ்ஸுபாதா³ய ‘இமினா அஸ்மீ’தி ஹோதி, ‘இமினா இத்த²ஸ்மீ’தி ஹோதீ’’தி வா (விப⁴॰ 975) ஏவமாதி³னா பா³ஹிரரூபாதி³னிஸ்ஸிதானி அட்டா²ரஸாதி ச²த்திங்ஸ. இதி அதீதானி ச²த்திங்ஸ, அனாக³தானி ச²த்திங்ஸ, பச்சுப்பன்னானி ச²த்திங்ஸாதி ஏவம்பி அட்ட²ஸததண்ஹாவிசரிதானி ஹொந்தி. புன ஸங்க³ஹே கரீயமானே ரூபாதீ³ஸு ஆரம்மணேஸு ச²ளேவ தண்ஹாகாயா திஸ்ஸோயேவ காமதண்ஹாத³யோ ஹொந்தீதி ஏவங் –

    96. Taṇhāvāre rūpataṇhā…pe… dhammataṇhāti evaṃ cakkhudvārādīsu javanavīthiyaṃ pavattāya taṇhāya ‘‘seṭṭhiputto brāhmaṇaputto’’ti evamādīsu pitito nāmaṃ viya pitisadisārammaṇato nāmaṃ. Ettha ca rūpārammaṇā taṇhā, rūpe taṇhāti rūpataṇhā. Sā kāmarāgabhāvena rūpaṃ assādentī pavattamānā kāmataṇhā. Sassatadiṭṭhisahagatarāgabhāvena rūpaṃ niccaṃ dhuvaṃ sassatanti evaṃ assādentī pavattamānā bhavataṇhā. Ucchedadiṭṭhisahagatarāgabhāvena rūpaṃ ucchijjati vinassati pecca na bhavissatīti evaṃ assādentī pavattamānā vibhavataṇhāti evaṃ tividhā hoti. Yathā ca rūpataṇhā, tathā saddataṇhādayopīti etāni aṭṭhārasa taṇhāvicaritāni honti. Tāni ajjhattarūpādīsu aṭṭhārasa, bahiddhārūpādīsu aṭṭhārasāti chattiṃsa. Iti atītāni chattiṃsa, anāgatāni chattiṃsa, paccuppannāni chattiṃsāti aṭṭhasataṃ. ‘‘Ajjhattikassupādāya ‘asmī’ti hoti , ‘itthasmī’ti hotī’’ti (vibha. 973-974) vā evamādīnā ajjhattikarūpādinissitāni aṭṭhārasa, ‘‘bāhirassupādāya ‘iminā asmī’ti hoti, ‘iminā itthasmī’ti hotī’’ti vā (vibha. 975) evamādinā bāhirarūpādinissitāni aṭṭhārasāti chattiṃsa. Iti atītāni chattiṃsa, anāgatāni chattiṃsa, paccuppannāni chattiṃsāti evampi aṭṭhasatataṇhāvicaritāni honti. Puna saṅgahe karīyamāne rūpādīsu ārammaṇesu chaḷeva taṇhākāyā tissoyeva kāmataṇhādayo hontīti evaṃ –

    நித்³தே³ஸத்தே²ன நித்³தே³ஸ-வித்தா²ரா வித்தா²ரஸ்ஸ ச;

    Niddesatthena niddesa-vitthārā vitthārassa ca;

    புன ஸங்க³ஹதோ தண்ஹா, விஞ்ஞாதப்³பா³ விபா⁴வினாதி.

    Puna saṅgahato taṇhā, viññātabbā vibhāvināti.

    வேத³னாஸமுத³யாதி எத்த² பன வேத³னாதி விபாகவேத³னா அதி⁴ப்பேதா. ஸா கத²ங் ச²ஸு த்³வாரேஸு தண்ஹாய பச்சயோ ஹோதீதி சே? அஸ்ஸாத³னீயதோ. ஸுகா²ய ஹி வேத³னாய அஸ்ஸாத³னேன ஸத்தா வேத³னங் மமாயந்தா வேத³னாய தண்ஹங் உப்பாதெ³த்வா வேத³னாராக³ரத்தா ஹுத்வா சக்கு²த்³வாரே இட்ட²மேவ ரூபங் பத்தெ²ந்தி, லத்³தா⁴ ச நங் அஸ்ஸாதெ³ந்தி, ஆரம்மணதா³யகானஞ்ச சித்தகாராதீ³னங் ஸக்காரங் கரொந்தி. ததா² ஸோதத்³வாராதீ³ஸு இட்டே² ச ஸத்³தா³த³யோ பத்தெ²ந்தி, லத்³தா⁴ ச நே அஸ்ஸாதெ³ந்தி, ஆரம்மணதா³யகானஞ்ச வீணாவாத³க-க³ந்தி⁴கஸூத³-தந்தவாய-நானாவித⁴ஸிப்பஸந்த³ஸ்ஸகாதீ³னங் ஸக்காரங் கரொந்தி. யதா² கிங்? யதா² புத்தஸினேஹேன புத்தங் மமாயந்தா தா⁴தியா ஸக்காரங் கரொந்தி, ஸப்பாயஸப்பிகீ²ராதீ³னியேவ நங் பாயெந்தி சேவ போ⁴ஜெந்தி ச. ஸேஸங் வுத்தனயமேவ.

    Vedanāsamudayāti ettha pana vedanāti vipākavedanā adhippetā. Sā kathaṃ chasu dvāresu taṇhāya paccayo hotīti ce? Assādanīyato. Sukhāya hi vedanāya assādanena sattā vedanaṃ mamāyantā vedanāya taṇhaṃ uppādetvā vedanārāgarattā hutvā cakkhudvāre iṭṭhameva rūpaṃ patthenti, laddhā ca naṃ assādenti, ārammaṇadāyakānañca cittakārādīnaṃ sakkāraṃ karonti. Tathā sotadvārādīsu iṭṭhe ca saddādayo patthenti, laddhā ca ne assādenti, ārammaṇadāyakānañca vīṇāvādaka-gandhikasūda-tantavāya-nānāvidhasippasandassakādīnaṃ sakkāraṃ karonti. Yathā kiṃ? Yathā puttasinehena puttaṃ mamāyantā dhātiyā sakkāraṃ karonti, sappāyasappikhīrādīniyeva naṃ pāyenti ceva bhojenti ca. Sesaṃ vuttanayameva.

    தண்ஹாவாரவண்ணனா நிட்டி²தா.

    Taṇhāvāravaṇṇanā niṭṭhitā.

    வேத³னாவாரவண்ணனா

    Vedanāvāravaṇṇanā

    97. வேத³னாவாரே வேத³னாகாயாதி வேத³னாஸமூஹா. சக்கு²ஸம்ப²ஸ்ஸஜா வேத³னா…பே॰… மனோஸம்ப²ஸ்ஸஜா வேத³னாதி ஏதங் ‘‘சக்கு²ஸம்ப²ஸ்ஸஜா வேத³னா அத்தி² குஸலா, அத்தி² அகுஸலா, அத்தி² அப்³யாகதா’’தி (விப⁴॰ 34) ஏவங் விப⁴ங்கே³ ஆக³தத்தா சக்கு²த்³வாராதீ³ஸு பவத்தானங் குஸலாகுஸலாப்³யாகதவேத³னானங் ‘‘ஸாரிபுத்தோ, மந்தாணிபுத்தோ’’தி ஏவமாதீ³ஸு மாதிதோ நாமங் விய மாதிஸதி³ஸவத்து²தோ நாமங். வசனத்தோ² பனெத்த² சக்கு²ஸம்ப²ஸ்ஸஹேது ஜாதா வேத³னா சக்கு²ஸம்ப²ஸ்ஸஜா வேத³னாதி. ஏஸ நயோ ஸப்³ப³த்த². அயங் தாவெத்த² ஸப்³ப³ஸங்கா³ஹிககதா² . விபாகவஸேன பன சக்கு²த்³வாரே த்³வே சக்கு²விஞ்ஞாணானி, த்³வே மனோதா⁴துயோ, திஸ்ஸோ மனோவிஞ்ஞாணதா⁴துயோதி ஏதாஹி ஸம்பயுத்தவஸேன வேத³னா வேதி³தப்³பா³. ஏஸ நயோ ஸோதத்³வாராதீ³ஸு. மனொத்³வாரே மனோவிஞ்ஞாணதா⁴துஸம்பயுத்தாவ.

    97. Vedanāvāre vedanākāyāti vedanāsamūhā. Cakkhusamphassajā vedanā…pe… manosamphassajā vedanāti etaṃ ‘‘cakkhusamphassajā vedanā atthi kusalā, atthi akusalā, atthi abyākatā’’ti (vibha. 34) evaṃ vibhaṅge āgatattā cakkhudvārādīsu pavattānaṃ kusalākusalābyākatavedanānaṃ ‘‘sāriputto, mantāṇiputto’’ti evamādīsu mātito nāmaṃ viya mātisadisavatthuto nāmaṃ. Vacanattho panettha cakkhusamphassahetu jātā vedanā cakkhusamphassajā vedanāti. Esa nayo sabbattha. Ayaṃ tāvettha sabbasaṅgāhikakathā . Vipākavasena pana cakkhudvāre dve cakkhuviññāṇāni, dve manodhātuyo, tisso manoviññāṇadhātuyoti etāhi sampayuttavasena vedanā veditabbā. Esa nayo sotadvārādīsu. Manodvāre manoviññāṇadhātusampayuttāva.

    ப²ஸ்ஸஸமுத³யாதி எத்த² பன பஞ்சத்³வாரே பஞ்சவத்து²கவேத³னானங் ஸஹஜாதசக்கு²ஸம்ப²ஸ்ஸாதி³ஸமுத³யா ஸமுத³யோ ஹோதி. அவஸேஸானங் சக்கு²ஸம்ப²ஸ்ஸாத³யோ உபனிஸ்ஸயாதி³வஸேன பச்சயா. மனொத்³வாரே ததா³ரம்மணவேத³னானங் அத்³வாரிகானஞ்ச படிஸந்தி⁴ப⁴வங்க³சுதிவேத³னானங் ஸஹஜாதமனோஸம்ப²ஸ்ஸஸமுத³யா ஸமுத³யோ ஹோதீதி வேதி³தப்³போ³. ஸேஸங் வுத்தனயமேவ.

    Phassasamudayāti ettha pana pañcadvāre pañcavatthukavedanānaṃ sahajātacakkhusamphassādisamudayā samudayo hoti. Avasesānaṃ cakkhusamphassādayo upanissayādivasena paccayā. Manodvāre tadārammaṇavedanānaṃ advārikānañca paṭisandhibhavaṅgacutivedanānaṃ sahajātamanosamphassasamudayā samudayo hotīti veditabbo. Sesaṃ vuttanayameva.

    வேத³னாவாரவண்ணனா நிட்டி²தா.

    Vedanāvāravaṇṇanā niṭṭhitā.

    ப²ஸ்ஸவாரவண்ணனா

    Phassavāravaṇṇanā

    98. ப²ஸ்ஸவாரே சக்கு²ஸம்ப²ஸ்ஸோதி சக்கு²ம்ஹி ஸம்ப²ஸ்ஸோ. ஏஸ நயோ ஸப்³ப³த்த². சக்கு²ஸம்ப²ஸ்ஸோ…பே॰… காயஸம்ப²ஸ்ஸோதி எத்தாவதா ச குஸலாகுஸலவிபாகா பஞ்சவத்து²கா த³ஸ ஸம்ப²ஸ்ஸா வுத்தா ஹொந்தி. மனோஸம்ப²ஸ்ஸோதி இமினா ஸேஸா பா³வீஸதி லோகியவிபாகமனஸம்பயுத்தப²ஸ்ஸா. ஸளாயதனஸமுத³யாதி ச²ன்னங் சக்கா²தீ³னங் ஆயதனானங் ஸமுத³யேன இமஸ்ஸ ச²ப்³பி³த⁴ஸ்ஸாபி ஸம்ப²ஸ்ஸஸ்ஸ ஸமுத³யோ ஹோதீதி வேதி³தப்³போ³. ஸேஸங் வுத்தனயமேவாதி.

    98. Phassavāre cakkhusamphassoti cakkhumhi samphasso. Esa nayo sabbattha. Cakkhusamphasso…pe… kāyasamphassoti ettāvatā ca kusalākusalavipākā pañcavatthukā dasa samphassā vuttā honti. Manosamphassoti iminā sesā bāvīsati lokiyavipākamanasampayuttaphassā. Saḷāyatanasamudayāti channaṃ cakkhādīnaṃ āyatanānaṃ samudayena imassa chabbidhassāpi samphassassa samudayo hotīti veditabbo. Sesaṃ vuttanayamevāti.

    ப²ஸ்ஸவாரவண்ணனா நிட்டி²தா.

    Phassavāravaṇṇanā niṭṭhitā.

    ஸளாயதனவாரவண்ணனா

    Saḷāyatanavāravaṇṇanā

    99. ஸளாயதனவாரே சக்கா²யதனந்திஆதீ³ஸு யங் வத்தப்³ப³ங், தங் ஸப்³ப³ங் விஸுத்³தி⁴மக்³கே³ க²ந்த⁴னித்³தே³ஸே சேவ ஆயதனநித்³தே³ஸே ச வுத்தனயமேவ. நாமரூபஸமுத³யாதி எத்த² பன யங் நாமங் யஞ்ச ரூபங், யஞ்ச நாமரூபங் யஸ்ஸ ஆயதனஸ்ஸ பச்சயோ ஹோதி, தஸ்ஸ வஸேன விஸுத்³தி⁴மக்³கே³ படிச்சஸமுப்பாத³னித்³தே³ஸே வுத்தனயேன நாமரூபஸமுத³யா ஸளாயதனஸமுத³யோ வேதி³தப்³போ³. ஸேஸங் வுத்தப்பகாரமேவாதி.

    99. Saḷāyatanavāre cakkhāyatanantiādīsu yaṃ vattabbaṃ, taṃ sabbaṃ visuddhimagge khandhaniddese ceva āyatananiddese ca vuttanayameva. Nāmarūpasamudayāti ettha pana yaṃ nāmaṃ yañca rūpaṃ, yañca nāmarūpaṃ yassa āyatanassa paccayo hoti, tassa vasena visuddhimagge paṭiccasamuppādaniddese vuttanayena nāmarūpasamudayā saḷāyatanasamudayo veditabbo. Sesaṃ vuttappakāramevāti.

    ஸளாயதனவாரவண்ணனா நிட்டி²தா.

    Saḷāyatanavāravaṇṇanā niṭṭhitā.

    நாமரூபவாரவண்ணனா

    Nāmarūpavāravaṇṇanā

    100. நாமரூபவாரே நமனலக்க²ணங் நாமங். ருப்பனலக்க²ணங் ரூபங். வித்தா²ரவாரே பனஸ்ஸ வேத³னாதி வேத³னாக்க²ந்தோ⁴. ஸஞ்ஞாதி ஸஞ்ஞாக்க²ந்தோ⁴. சேதனா ப²ஸ்ஸோ மனஸிகாரோதி ஸங்கா²ரக்க²ந்தோ⁴ வேதி³தப்³போ³. காமஞ்ச அஞ்ஞேபி ஸங்கா²ரக்க²ந்த⁴ஸங்க³ஹிதா த⁴ம்மா ஸந்தி, இமே பன தயோ ஸப்³ப³து³ப்³ப³லேஸுபி சித்தேஸு ஸந்தி. தஸ்மா ஏதேஸங்யேவ வஸேனெத்த² ஸங்கா²ரக்க²ந்தோ⁴பி த³ஸ்ஸிதோ. சத்தாரி ச மஹாபூ⁴தானீதி எத்த² சத்தாரீதி க³ணனபரிச்சே²தோ³. மஹாபூ⁴தானீதி பத²வீஆபதேஜவாயானமேதங் அதி⁴வசனங். யேன பன காரணேன தானி மஹாபூ⁴தானீதி வுச்சந்தி, யோ செத்த² அஞ்ஞோ வினிச்ச²யனயோ, ஸோ ஸப்³போ³ விஸுத்³தி⁴மக்³கே³ ரூபக்க²ந்த⁴னித்³தே³ஸே வுத்தோ.

    100. Nāmarūpavāre namanalakkhaṇaṃ nāmaṃ. Ruppanalakkhaṇaṃ rūpaṃ. Vitthāravāre panassa vedanāti vedanākkhandho. Saññāti saññākkhandho. Cetanā phasso manasikāroti saṅkhārakkhandho veditabbo. Kāmañca aññepi saṅkhārakkhandhasaṅgahitā dhammā santi, ime pana tayo sabbadubbalesupi cittesu santi. Tasmā etesaṃyeva vasenettha saṅkhārakkhandhopi dassito. Cattāri ca mahābhūtānīti ettha cattārīti gaṇanaparicchedo. Mahābhūtānīti pathavīāpatejavāyānametaṃ adhivacanaṃ. Yena pana kāraṇena tāni mahābhūtānīti vuccanti, yo cettha añño vinicchayanayo, so sabbo visuddhimagge rūpakkhandhaniddese vutto.

    சதுன்னஞ்ச மஹாபூ⁴தானங் உபாதா³யாதி எத்த² பன சதுன்னந்தி உபயோக³த்தே² ஸாமிவசனங், சத்தாரி ச மஹாபூ⁴தானீதி வுத்தங் ஹோதி. உபாதா³யாதி உபாதி³யித்வா, க³ஹெத்வாதி அத்தோ². நிஸ்ஸாயாதிபி ஏகே. வத்தமானந்தி அயஞ்செத்த² பாட²ஸேஸோ. ஸமூஹத்தே² வா ஏதங் ஸாமிவசனங். தேன சதுன்னஞ்ச மஹாபூ⁴தானங் ஸமூஹங் உபாதா³ய பவத்தமானங் ரூபந்தி அயமத்தோ² வேதி³தப்³போ³. ஏவங் ஸப்³ப³த்தா²பி யானி சத்தாரி பத²வீஆதீ³னி மஹாபூ⁴தானி, யஞ்ச சதுன்னங் மஹாபூ⁴தானங் உபாதா³ய வத்தமானங் சக்கா²யதனாதி³பே⁴தே³ன அபி⁴த⁴ம்மபாளியமேவ வுத்தங் தேவீஸதிவித⁴ங் ரூபங், தங் ஸப்³ப³ம்பி ‘‘ரூப’’ந்தி வேதி³தப்³ப³ங். விஞ்ஞாணஸமுத³யாதி எத்த² பன யங் விஞ்ஞாணங் யஸ்ஸ நாமஸ்ஸ யஸ்ஸ ச ரூபஸ்ஸ யஸ்ஸ ச நாமரூபஸ்ஸ பச்சயோ ஹோதி, தஸ்ஸ வஸேன விஸுத்³தி⁴மக்³கே³ படிச்சஸமுப்பாத³னித்³தே³ஸே வுத்தனயேனேவ விஞ்ஞாணஸமுத³யா நாமரூபஸமுத³யோ வேதி³தப்³போ³. ஸேஸங் வுத்தனயமேவாதி.

    Catunnañca mahābhūtānaṃ upādāyāti ettha pana catunnanti upayogatthe sāmivacanaṃ, cattāri ca mahābhūtānīti vuttaṃ hoti. Upādāyāti upādiyitvā, gahetvāti attho. Nissāyātipi eke. Vattamānanti ayañcettha pāṭhaseso. Samūhatthe vā etaṃ sāmivacanaṃ. Tena catunnañca mahābhūtānaṃ samūhaṃ upādāya pavattamānaṃ rūpanti ayamattho veditabbo. Evaṃ sabbatthāpi yāni cattāri pathavīādīni mahābhūtāni, yañca catunnaṃ mahābhūtānaṃ upādāya vattamānaṃ cakkhāyatanādibhedena abhidhammapāḷiyameva vuttaṃ tevīsatividhaṃ rūpaṃ, taṃ sabbampi ‘‘rūpa’’nti veditabbaṃ. Viññāṇasamudayāti ettha pana yaṃ viññāṇaṃ yassa nāmassa yassa ca rūpassa yassa ca nāmarūpassa paccayo hoti, tassa vasena visuddhimagge paṭiccasamuppādaniddese vuttanayeneva viññāṇasamudayā nāmarūpasamudayo veditabbo. Sesaṃ vuttanayamevāti.

    நாமரூபவாரவண்ணனா நிட்டி²தா.

    Nāmarūpavāravaṇṇanā niṭṭhitā.

    விஞ்ஞாணவாரவண்ணனா

    Viññāṇavāravaṇṇanā

    101. விஞ்ஞாணவாரே சக்கு²விஞ்ஞாணந்தி சக்கு²ம்ஹி விஞ்ஞாணங், சக்கு²தோ வா ஜாதங் விஞ்ஞாணந்தி சக்கு²விஞ்ஞாணங். ஏவங் ஸோதகா⁴னஜிவ்ஹாகாயவிஞ்ஞாணானி. இதரங் பன மனோயேவ விஞ்ஞாணந்தி மனோவிஞ்ஞாணங். த்³விபஞ்சவிஞ்ஞாணவஜ்ஜஸ்ஸ தேபூ⁴மகவிபாகசித்தஸ்ஸேதங் அதி⁴வசனங். ஸங்கா²ரஸமுத³யாதி எத்த² பன யோ ஸங்கா²ரோ யஸ்ஸ விஞ்ஞாணஸ்ஸ பச்சயோ ஹோதி, தஸ்ஸ வஸேன ஸங்கா²ரஸமுத³யா விஞ்ஞாணஸமுத³யோ வேதி³தப்³போ³. ஸேஸங் வுத்தனயமேவாதி.

    101. Viññāṇavāre cakkhuviññāṇanti cakkhumhi viññāṇaṃ, cakkhuto vā jātaṃ viññāṇanti cakkhuviññāṇaṃ. Evaṃ sotaghānajivhākāyaviññāṇāni. Itaraṃ pana manoyeva viññāṇanti manoviññāṇaṃ. Dvipañcaviññāṇavajjassa tebhūmakavipākacittassetaṃ adhivacanaṃ. Saṅkhārasamudayāti ettha pana yo saṅkhāro yassa viññāṇassa paccayo hoti, tassa vasena saṅkhārasamudayā viññāṇasamudayo veditabbo. Sesaṃ vuttanayamevāti.

    விஞ்ஞாணவாரவண்ணனா நிட்டி²தா.

    Viññāṇavāravaṇṇanā niṭṭhitā.

    ஸங்கா²ரவாரவண்ணனா

    Saṅkhāravāravaṇṇanā

    102. ஸங்கா²ரவாரே அபி⁴ஸங்க²ரணலக்க²ணோ ஸங்கா²ரோ. வித்தா²ரவாரே பனஸ்ஸ காயஸங்கா²ரோதி காயதோ பவத்தஸங்கா²ரோ, காயத்³வாரே சோபனவஸேன பவத்தானங் காமாவசரகுஸலதோ அட்ட²ன்னங், அகுஸலதோ த்³வாத³ஸன்னந்தி வீஸதியா காயஸஞ்சேதனானமேதங் அதி⁴வசனங். வசீஸங்கா²ரோதி வசிதோ பவத்தஸங்கா²ரோ, வசீத்³வாரே வசனபே⁴த³வஸேன பவத்தானங் வீஸதியா ஏவ வசீஸஞ்சேதனானமேதங் அதி⁴வசனங். சித்தஸங்கா²ரோதி சித்ததோ பவத்தஸங்கா²ரோ, காயவசீத்³வாரே சோபனங் அகத்வா ரஹோ நிஸீதி³த்வா சிந்தயந்தஸ்ஸ பவத்தானங் லோகியகுஸலாகுஸலவஸேன ஏகூனதிங்ஸமனோஸஞ்சேதனானமேதங் அதி⁴வசனங். அவிஜ்ஜாஸமுத³யாதி எத்த² பன குஸலானங் உபனிஸ்ஸயவஸேன அகுஸலானங் ஸஹஜாதாதி³வஸேனாபி அவிஜ்ஜாபச்சயோ ஹோதீதி வேதி³தப்³பா³. ஸேஸங் வுத்தனயமேவாதி.

    102. Saṅkhāravāre abhisaṅkharaṇalakkhaṇo saṅkhāro. Vitthāravāre panassa kāyasaṅkhāroti kāyato pavattasaṅkhāro, kāyadvāre copanavasena pavattānaṃ kāmāvacarakusalato aṭṭhannaṃ, akusalato dvādasannanti vīsatiyā kāyasañcetanānametaṃ adhivacanaṃ. Vacīsaṅkhāroti vacito pavattasaṅkhāro, vacīdvāre vacanabhedavasena pavattānaṃ vīsatiyā eva vacīsañcetanānametaṃ adhivacanaṃ. Cittasaṅkhāroti cittato pavattasaṅkhāro, kāyavacīdvāre copanaṃ akatvā raho nisīditvā cintayantassa pavattānaṃ lokiyakusalākusalavasena ekūnatiṃsamanosañcetanānametaṃ adhivacanaṃ. Avijjāsamudayāti ettha pana kusalānaṃ upanissayavasena akusalānaṃ sahajātādivasenāpi avijjāpaccayo hotīti veditabbā. Sesaṃ vuttanayamevāti.

    ஸங்கா²ரவாரவண்ணனா நிட்டி²தா.

    Saṅkhāravāravaṇṇanā niṭṭhitā.

    அவிஜ்ஜாவாரவண்ணனா

    Avijjāvāravaṇṇanā

    103. அவிஜ்ஜாவாரே து³க்கே² அஞ்ஞாணந்தி து³க்க²ஸச்சே அஞ்ஞாணங், மோஹஸ்ஸேதங் அதி⁴வசனங். ஏஸ நயோ ஸமுத³யே அஞ்ஞாணந்திஆதீ³ஸு. தத்த² சதூஹி காரணேஹி து³க்கே² அஞ்ஞாணங் வேதி³தப்³ப³ங் அந்தோக³த⁴தோ வத்து²தோ ஆரம்மணதோ படிச்சா²த³னதோ ச. ததா² ஹி தங் து³க்க²ஸச்சபரியாபன்னத்தா து³க்கே² அந்தோக³த⁴ங், து³க்க²ஸச்சஞ்சஸ்ஸ நிஸ்ஸயபச்சயபா⁴வேன வத்து², ஆரம்மணபச்சயபா⁴வேன ஆரம்மணங், து³க்க²ஸச்சஞ்ச ஏதங் படிச்சா²தே³தி, தஸ்ஸ யாதா²வலக்க²ணப்படிவேத⁴னிவாரணேன, ஞாணப்பவத்தியா செத்த² அப்பதா³னேன.

    103. Avijjāvāre dukkhe aññāṇanti dukkhasacce aññāṇaṃ, mohassetaṃ adhivacanaṃ. Esa nayo samudaye aññāṇantiādīsu. Tattha catūhi kāraṇehi dukkhe aññāṇaṃ veditabbaṃ antogadhato vatthuto ārammaṇato paṭicchādanato ca. Tathā hi taṃ dukkhasaccapariyāpannattā dukkhe antogadhaṃ, dukkhasaccañcassa nissayapaccayabhāvena vatthu, ārammaṇapaccayabhāvena ārammaṇaṃ, dukkhasaccañca etaṃ paṭicchādeti, tassa yāthāvalakkhaṇappaṭivedhanivāraṇena, ñāṇappavattiyā cettha appadānena.

    ஸமுத³யே அஞ்ஞாணங் தீஹி காரணேஹி வேதி³தப்³ப³ங் வத்து²தோ ஆரம்மணதோ படிச்சா²த³னதோ ச. நிரோதே⁴ படிபதா³யஞ்ச அஞ்ஞாணங் ஏகேனேவ காரணேன வேதி³தப்³ப³ங் படிச்சா²த³னதோ. நிரோத⁴படிபதா³ய ஹி படிச்சா²த³கமேவ அஞ்ஞாணங் தேஸங் யாதா²வலக்க²ணப்படிவேத⁴னிவாரணேன, தேஸு ச ஞாணப்பவத்தியா அப்பதா³னேன. ந பன தத்த² அந்தோக³த⁴ங், தஸ்மிங் ஸச்சத்³வயே அபரியாபன்னத்தா. ந தஸ்ஸ தங் ஸச்சத்³வயங் வத்து², அஸஹஜாதத்தா. நாரம்மணங், ததா³ரப்³ப⁴ அப்பவத்தனதோ. பச்சி²மஞ்ஹி ஸச்சத்³வயங் க³ம்பீ⁴ரத்தா து³த்³த³ஸங், ந செத்த² அந்த⁴பூ⁴தங் அஞ்ஞாணங் பவத்ததி. புரிமங் பன வஞ்சனியட்டே²ன ஸபா⁴வலக்க²ணஸ்ஸ து³த்³த³ஸத்தா க³ம்பீ⁴ரங், தத்த² விபல்லாஸக்³கா³ஹவஸேன பவத்ததி.

    Samudaye aññāṇaṃ tīhi kāraṇehi veditabbaṃ vatthuto ārammaṇato paṭicchādanato ca. Nirodhe paṭipadāyañca aññāṇaṃ ekeneva kāraṇena veditabbaṃ paṭicchādanato. Nirodhapaṭipadāya hi paṭicchādakameva aññāṇaṃ tesaṃ yāthāvalakkhaṇappaṭivedhanivāraṇena, tesu ca ñāṇappavattiyā appadānena. Na pana tattha antogadhaṃ, tasmiṃ saccadvaye apariyāpannattā. Na tassa taṃ saccadvayaṃ vatthu, asahajātattā. Nārammaṇaṃ, tadārabbha appavattanato. Pacchimañhi saccadvayaṃ gambhīrattā duddasaṃ, na cettha andhabhūtaṃ aññāṇaṃ pavattati. Purimaṃ pana vañcaniyaṭṭhena sabhāvalakkhaṇassa duddasattā gambhīraṃ, tattha vipallāsaggāhavasena pavattati.

    அபிச து³க்கே²தி எத்தாவதா ஸங்க³ஹதோ வத்து²தோ ஆரம்மணதோ கிச்சதோ ச அவிஜ்ஜா தீ³பிதா. து³க்க²ஸமுத³யேதி எத்தாவதா வத்து²தோ ஆரம்மணதோ கிச்சதோ ச. து³க்க²னிரோதே⁴ து³க்க²னிரோத⁴கா³மினியா படிபதா³யாதி எத்தாவதா கிச்சதோ. அவிஸேஸதோ பன அஞ்ஞாணந்தி ஏதேன ஸபா⁴வதோ நித்³தி³ட்டா²தி ஞாதப்³பா³. ஆஸவஸமுத³யாதி எத்த² பன காமாஸவப⁴வாஸவா ஸஹஜாதாதி³வஸேன அவிஜ்ஜாய பச்சயா ஹொந்தி. அவிஜ்ஜாஸவோ உபனிஸ்ஸயவஸேனேவ. புப்³பு³ப்பன்னா செத்த² அவிஜ்ஜா அவிஜ்ஜாஸவோதி வேதி³தப்³பா³. ஸா அபராபருப்பன்னாய அவிஜ்ஜாய உபனிஸ்ஸயபச்சயோ ஹோதி. ஸேஸங் வுத்தனயமேவாதி.

    Apica dukkheti ettāvatā saṅgahato vatthuto ārammaṇato kiccato ca avijjā dīpitā. Dukkhasamudayeti ettāvatā vatthuto ārammaṇato kiccato ca. Dukkhanirodhe dukkhanirodhagāminiyā paṭipadāyāti ettāvatā kiccato. Avisesato pana aññāṇanti etena sabhāvato niddiṭṭhāti ñātabbā. Āsavasamudayāti ettha pana kāmāsavabhavāsavā sahajātādivasena avijjāya paccayā honti. Avijjāsavo upanissayavaseneva. Pubbuppannā cettha avijjā avijjāsavoti veditabbā. Sā aparāparuppannāya avijjāya upanissayapaccayo hoti. Sesaṃ vuttanayamevāti.

    அவிஜ்ஜாவாரவண்ணனா நிட்டி²தா.

    Avijjāvāravaṇṇanā niṭṭhitā.

    ஆஸவவாரவண்ணனா

    Āsavavāravaṇṇanā

    104. ஆஸவவாரே அவிஜ்ஜாஸமுத³யாதி எத்த² அவிஜ்ஜா காமாஸவப⁴வாஸவானங் ஸஹஜாதாதி³வஸேன பச்சயோ ஹோதி. அவிஜ்ஜாஸவஸ்ஸ உபனிஸ்ஸயவஸேனேவ. அபராபருப்பன்னா செத்த² அவிஜ்ஜா அவிஜ்ஜாஸவோதி வேதி³தப்³பா³. புப்³பு³ப்பன்னா அவிஜ்ஜாயேவஸ்ஸ அபராபருப்பன்னஸ்ஸ அவிஜ்ஜாஸவஸ்ஸ உபனிஸ்ஸயபச்சயோ ஹோதி. ஸேஸங் வுத்தனயமேவாதி. அயங் வாரோ யா ஏஸா படிச்சஸமுப்பாத³பதே³ஸு ஜெட்டி²கா அவிஜ்ஜா, தஸ்ஸாபி பச்சயத³ஸ்ஸனவஸேன வுத்தோ. ஏவங் வுத்தேன வாரேன ஸங்ஸாரஸ்ஸ அனமதக்³க³தா ஸாதி⁴தா ஹோதி. கத²ங்? ஆஸவஸமுத³யேன ஹி அவிஜ்ஜாஸமுத³யோ. அவிஜ்ஜாஸமுத³யேனாபி ஆஸவஸமுத³யோ. ஏவங் ஆஸவா அவிஜ்ஜாய அவிஜ்ஜாபி ஆஸவானங் பச்சயோதி கத்வா புப்³ப³கோடி ந பஞ்ஞாயதி அவிஜ்ஜாய, தஸ்ஸா அபஞ்ஞாயனதோ ஸங்ஸாரஸ்ஸ அனமதக்³க³தா ஸித்³தா⁴ ஹோதீதி.

    104. Āsavavāre avijjāsamudayāti ettha avijjā kāmāsavabhavāsavānaṃ sahajātādivasena paccayo hoti. Avijjāsavassa upanissayavaseneva. Aparāparuppannā cettha avijjā avijjāsavoti veditabbā. Pubbuppannā avijjāyevassa aparāparuppannassa avijjāsavassa upanissayapaccayo hoti. Sesaṃ vuttanayamevāti. Ayaṃ vāro yā esā paṭiccasamuppādapadesu jeṭṭhikā avijjā, tassāpi paccayadassanavasena vutto. Evaṃ vuttena vārena saṃsārassa anamataggatā sādhitā hoti. Kathaṃ? Āsavasamudayena hi avijjāsamudayo. Avijjāsamudayenāpi āsavasamudayo. Evaṃ āsavā avijjāya avijjāpi āsavānaṃ paccayoti katvā pubbakoṭi na paññāyati avijjāya, tassā apaññāyanato saṃsārassa anamataggatā siddhā hotīti.

    ஏவங் ஸப்³பே³பிமே இமஸ்மிங் ஸுத்தே கம்மபத²வாரோ ஆஹாரவாரோ து³க்க²வாரோ ஜரா-மரண-ஜாதி-ப⁴வ-உபாதா³ன-தண்ஹா-வேத³னா-ப²ஸ்ஸ-ஸளாயதன-நாமரூப- விஞ்ஞாண-ஸங்கா²ர-அவிஜ்ஜா-ஆஸவவாரோதி ஸோளஸவாரா வுத்தா.

    Evaṃ sabbepime imasmiṃ sutte kammapathavāro āhāravāro dukkhavāro jarā-maraṇa-jāti-bhava-upādāna-taṇhā-vedanā-phassa-saḷāyatana-nāmarūpa- viññāṇa-saṅkhāra-avijjā-āsavavāroti soḷasavārā vuttā.

    தேஸு ஏகேகஸ்ஸ வாரஸ்ஸ ஸங்கே²பவித்தா²ரவஸேன த்³விதா⁴ விப⁴த்தா த்³வத்திங்ஸட்டா²னானி ஹொந்தி. இதி இமஸ்மிங் ஸுத்தே இமேஸு த்³வத்திங்ஸட்டா²னேஸு சத்தாரி ஸச்சானி கதி²தானி. ஏதேஸங்யேவ வித்தா²ரவஸேன வுத்தேஸு ஸோளஸஸு டா²னேஸு அரஹத்தங் கதி²தங். தே²ரஸ்ஸ பன மதேன த்³வத்திங்ஸாயபி டா²னேஸு சத்தாரி ஸச்சானி சத்தாரோ ச மக்³கா³ கதி²தாதி. இதி ஸகலேபி பஞ்சமஹானிகாயஸங்க³ஹிதே பு³த்³த⁴வசனே நத்தி² தங் ஸுத்தங், யத்த² த்³வத்திங்ஸக்க²த்துங் சத்தாரி ஸச்சானி த்³வத்திங்ஸக்க²த்துஞ்ச அரஹத்தங் பகாஸிதங் அஞ்ஞத்ர இமம்ஹா ஸம்மாதி³ட்டி²ஸுத்தாதி.

    Tesu ekekassa vārassa saṅkhepavitthāravasena dvidhā vibhattā dvattiṃsaṭṭhānāni honti. Iti imasmiṃ sutte imesu dvattiṃsaṭṭhānesu cattāri saccāni kathitāni. Etesaṃyeva vitthāravasena vuttesu soḷasasu ṭhānesu arahattaṃ kathitaṃ. Therassa pana matena dvattiṃsāyapi ṭhānesu cattāri saccāni cattāro ca maggā kathitāti. Iti sakalepi pañcamahānikāyasaṅgahite buddhavacane natthi taṃ suttaṃ, yattha dvattiṃsakkhattuṃ cattāri saccāni dvattiṃsakkhattuñca arahattaṃ pakāsitaṃ aññatra imamhā sammādiṭṭhisuttāti.

    இத³மவோசாயஸ்மா ஸாரிபுத்தோதி இத³ங் த்³வத்திங்ஸாய சதுஸச்சபரியாயேஹி த்³வத்திங்ஸாய அரஹத்தபரியாயேஹீதி சதுஸட்டி²யா காரணேஹி அலங்கரித்வா ஸம்மாதி³ட்டி²ஸுத்தங் ஆயஸ்மா ஸாரிபுத்தோ அவோச, அத்தமனா தே பி⁴க்கூ² ஆயஸ்மதோ ஸாரிபுத்தஸ்ஸ பா⁴ஸிதங் அபி⁴னந்து³ந்தி.

    Idamavocāyasmāsāriputtoti idaṃ dvattiṃsāya catusaccapariyāyehi dvattiṃsāya arahattapariyāyehīti catusaṭṭhiyā kāraṇehi alaṅkaritvā sammādiṭṭhisuttaṃ āyasmā sāriputto avoca, attamanā te bhikkhū āyasmato sāriputtassa bhāsitaṃ abhinandunti.

    ஆஸவவாரவண்ணனா நிட்டி²தா.

    Āsavavāravaṇṇanā niṭṭhitā.

    பபஞ்சஸூத³னியா மஜ்ஜி²மனிகாயட்ட²கதா²ய

    Papañcasūdaniyā majjhimanikāyaṭṭhakathāya

    ஸம்மாதி³ட்டி²ஸுத்தவண்ணனா நிட்டி²தா.

    Sammādiṭṭhisuttavaṇṇanā niṭṭhitā.




    Next: 10. ஸதிபட்டா²னஸுத்தவண்ணனா • 10. Satipaṭṭhānasuttavaṇṇanā




    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. ஸம்மாதி³ட்டி²ஸுத்தங் • 9. Sammādiṭṭhisuttaṃ

    டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. ஸம்மாதி³ட்டி²ஸுத்தவண்ணனா • 9. Sammādiṭṭhisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact