| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஸம்மஸஸுத்தவண்ணனா
6. Sammasasuttavaṇṇanā
66. ச²ட்டே² அஸ்ஸாதி ப⁴க³வதோ. ஸண்ஹஸுகு²மத⁴ம்மபரிதீ³பனதோ ஸுகு²மா. தீஹி லக்க²ணேஹி அங்கியத்தா திலக்க²ணாஹதா, அனிச்சாதி³லக்க²ணபரிதீ³பினீதி அத்தோ². அரியத⁴ம்மாதி⁴க³மஸ்ஸ உபனிஸ்ஸயபூ⁴தேன ஹேதுனா ஸஹேதுகா. திஹேதுகபடிஸந்தி⁴பஞ்ஞாய பாடிஹாரியபஞ்ஞாய ச அத்தி²தாய பஞ்ஞவந்தோ ந கேவலங் அஜ்ஜ²த்திகஅங்க³ஸம்பத்தியேவ, பா³ஹிரங்க³ஸம்பத்திபி நேஸமத்தீ²தி த³ஸ்ஸேதுங் ‘‘ஸினித்³தா⁴னீ’’திஆதி³ வுத்தங். அப்³ப⁴ந்தரந்தி அஜ்ஜ²த்தங். பச்சயஸம்மஸனந்தி பச்சயுப்பன்னானங் பச்சயவீமங்ஸங்.
66. Chaṭṭhe assāti bhagavato. Saṇhasukhumadhammaparidīpanato sukhumā. Tīhi lakkhaṇehi aṅkiyattā tilakkhaṇāhatā, aniccādilakkhaṇaparidīpinīti attho. Ariyadhammādhigamassa upanissayabhūtena hetunā sahetukā. Tihetukapaṭisandhipaññāya pāṭihāriyapaññāya ca atthitāya paññavanto na kevalaṃ ajjhattikaaṅgasampattiyeva, bāhiraṅgasampattipi nesamatthīti dassetuṃ ‘‘siniddhānī’’tiādi vuttaṃ. Abbhantaranti ajjhattaṃ. Paccayasammasananti paccayuppannānaṃ paccayavīmaṃsaṃ.
ஆரம்பா⁴னுரூபா அனுஸந்தி⁴ யதா²னுஸந்தி⁴. ந க³தாதி ந ஸம்பத்தா. அஸம்பி⁴ன்னபத³ந்தி அவோமிஸ்ஸகபத³ங், அஞ்ஞத்த² ஏவங் அனாக³தங் வாக்யந்தி அத்தோ². தேனாஹ ‘‘அஞ்ஞத்த² ஹி ஏவங் வுத்தங் நாம நத்தீ²’’தி. ஏவந்தி ‘‘தேனஹானந்தா³’’தி ஏகவசனங், ‘‘ஸுணாத² மனஸி கரோதா²’’தி ப³ஹுவசனங் கத்வா வுத்தங் நாம நத்தீ²தி அத்தோ². கேசி பன ‘‘தேனஹானந்தா³’’தி இதா⁴பி ப³ஹுவசனமேவ கத்வா பட²ந்தி ‘‘ஸாது⁴ அனுருத்³தா⁴’’திஆதீ³ஸு விய. உபதீ⁴தி அதி⁴ப்பேதங் உபதீ⁴யதி எத்த² து³க்க²ந்தி. உப்பஜ்ஜதி உப்பாத³க்க²ணங் உத³யங் படிலப⁴தி ‘‘பாகடபா⁴வோ டி²திகோ, அத்தலாபோ⁴ உத³யோ’’தி. நிவிஸதி நிவேஸங் ஓகாஸங் படிலப⁴தி. ஏகவாரமேவ ஹி உப்பன்னமத்தஸ்ஸ த⁴ம்மஸ்ஸ து³ப்³ப³லத்தேன ஓகாஸே விய பதிட்ட²ஹனங் நத்தி², புனப்புனங் ஆரம்மணே பவத்தமானங் நிவிட்ட²ங் பதிட்டி²தங் நாம ஹோதி. தேனாஹ ‘‘நிவிஸதீதி புனப்புனங் பவத்திவஸேன பதிட்ட²ஹதீ’’தி.
Ārambhānurūpā anusandhi yathānusandhi. Na gatāti na sampattā. Asambhinnapadanti avomissakapadaṃ, aññattha evaṃ anāgataṃ vākyanti attho. Tenāha ‘‘aññattha hi evaṃ vuttaṃ nāma natthī’’ti. Evanti ‘‘tenahānandā’’ti ekavacanaṃ, ‘‘suṇātha manasi karothā’’ti bahuvacanaṃ katvā vuttaṃ nāma natthīti attho. Keci pana ‘‘tenahānandā’’ti idhāpi bahuvacanameva katvā paṭhanti ‘‘sādhu anuruddhā’’tiādīsu viya. Upadhīti adhippetaṃ upadhīyati ettha dukkhanti. Uppajjati uppādakkhaṇaṃ udayaṃ paṭilabhati ‘‘pākaṭabhāvo ṭhitiko, attalābho udayo’’ti. Nivisati nivesaṃ okāsaṃ paṭilabhati. Ekavārameva hi uppannamattassa dhammassa dubbalattena okāse viya patiṭṭhahanaṃ natthi, punappunaṃ ārammaṇe pavattamānaṃ niviṭṭhaṃ patiṭṭhitaṃ nāma hoti. Tenāha ‘‘nivisatīti punappunaṃ pavattivasena patiṭṭhahatī’’ti.
பியஸபா⁴வந்தி பியாயிதப்³ப³ஜாதிகங். மது⁴ரஸபா⁴வந்தி இட்ட²ஜாதிகங். அபி⁴னிவிட்டா²தி தண்ஹாபி⁴னிவேஸேன ஓதிண்ணா. ஸம்பத்தியந்தி ப⁴வஸம்பத்தியங். நிமித்தக்³க³ஹணானுஸாரேனாதி படிபி³ம்ப³க்³க³ஹணானுஸாரேன. கண்ணஸ்ஸ சி²த்³த³பதே³ஸங் ரஜதனாளிகங் விய, கண்ணப³த்³த⁴ங் பன பாமங்க³ஸுத்தங் விய. துங்கா³ உச்சா தீ³கா⁴ நாஸிகா துங்க³னாஸா. ஏவங் லத்³த⁴வோஹாரங் அத்தனோ கா⁴னங். ‘‘லத்³த⁴வோஹாரா’’தி வா பாடோ². தஸ்மிங் ஸதி துங்கா³ நாஸா யேஸங் தே துங்க³னாஸா. ஏவங் லத்³த⁴வோஹாரா ஸத்தா அத்தனோ கா⁴னந்தி யோஜனா வண்ணஸண்டா²னதோ ரத்தகம்ப³லபடலங் விய. ஸம்ப²ஸ்ஸதோ முது³ஸினித்³த⁴ங் கிச்சதோ ஸினித்³த⁴மது⁴ரரஸத³ங். ஸாலலட்டி²ந்தி ஸாலக்க²ந்த⁴ங்.
Piyasabhāvanti piyāyitabbajātikaṃ. Madhurasabhāvanti iṭṭhajātikaṃ. Abhiniviṭṭhāti taṇhābhinivesena otiṇṇā. Sampattiyanti bhavasampattiyaṃ. Nimittaggahaṇānusārenāti paṭibimbaggahaṇānusārena. Kaṇṇassa chiddapadesaṃ rajatanāḷikaṃ viya, kaṇṇabaddhaṃ pana pāmaṅgasuttaṃ viya. Tuṅgā uccā dīghā nāsikā tuṅganāsā. Evaṃ laddhavohāraṃ attano ghānaṃ. ‘‘Laddhavohārā’’ti vā pāṭho. Tasmiṃ sati tuṅgā nāsā yesaṃ te tuṅganāsā. Evaṃ laddhavohārā sattā attano ghānanti yojanā vaṇṇasaṇṭhānato rattakambalapaṭalaṃ viya. Samphassato mudusiniddhaṃ kiccato siniddhamadhurarasadaṃ. Sālalaṭṭhinti sālakkhandhaṃ.
அத்³த³ஸங்ஸூதி பஸ்ஸிங்ஸு. ஏவங் வுத்தந்தி ‘‘கங்ஸே’’தி ஏவங் வுத்தங் அதி⁴ட்டா²னவோஹாரேன.
Addasaṃsūti passiṃsu. Evaṃ vuttanti ‘‘kaṃse’’ti evaṃ vuttaṃ adhiṭṭhānavohārena.
ஸம்பத்திந்தி வண்ணாதி³கு³ணங். ஆதீ³னவந்தி மரணக்³க³ததோ.
Sampattinti vaṇṇādiguṇaṃ. Ādīnavanti maraṇaggatato.
ஸத்துபானீயேனாதி ஸத்துங் பக்கி²பித்வா ஆலோலிதபானீயேன. சத்தாரி பானானி விய சத்தாரோ மக்³கா³ தண்ஹாபிபாஸாவூபஸமனதோ.
Sattupānīyenāti sattuṃ pakkhipitvā ālolitapānīyena. Cattāri pānāni viya cattāro maggā taṇhāpipāsāvūpasamanato.
ஸம்மஸஸுத்தவண்ணனா நிட்டி²தா.
Sammasasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸம்மஸஸுத்தங் • 6. Sammasasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஸம்மஸஸுத்தவண்ணனா • 6. Sammasasuttavaṇṇanā
