| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ஸமுக்³கா⁴தஸாருப்பஸுத்தவண்ணனா
8. Samugghātasāruppasuttavaṇṇanā
30. மஞ்ஞிதங் நாம தண்ஹாமானதி³ட்டீ²ஹி க³ஹேதப்³ப³ங் மஞ்ஞிதங். ஸப்³ப³ஸ்மிங் மஞ்ஞிதந்தி ஸப்³ப³மஞ்ஞிதங், தஸ்ஸ ஸமுக்³கா⁴தோ ஸேதுகா⁴தோ, ததா³வஹங் ஸப்³ப³மஞ்ஞிதஸமுக்³கா⁴தஸாருப்பங். அட்ட²கதா²யங் பன ‘‘மஞ்ஞிதங் நாம சக்கா²தீ³ஸு ஏவ உப்பஜ்ஜதி, நாஞ்ஞஸ்மி’’ந்தி து³தியனயோ வுத்தோ. அனுச்ச²விகந்தி அனுரூபங் அவிலோமங். இதா⁴தி இதே⁴வ ஸாஸனே அஞ்ஞத்த² தத³பா⁴வதோ. ‘‘தண்ஹா-மானதி³ட்டி²மஞ்ஞிதான’’ந்தி வுத்தங் மஞ்ஞிதத்தயங் ஸபரஸந்தானேஸு படிபக்க²வஸேன யோஜெத்வா த³ஸ்ஸேதுங் ‘‘சக்கு²ங் அஹந்தி வா’’திஆதி³ வுத்தங். தத்த² ‘‘சக்கு²ங் அஹ’’ந்தி இமினா அஜ்ஜ²த்தவிஸயங் தி³ட்டி²மஞ்ஞிதஞ்ச த³ஸ்ஸேதி அத்தாபி⁴னிவேஸாஹங்காரதீ³பனதோ. ‘‘மம’’ந்தி இமினா தண்ஹாமஞ்ஞிதங் மானமஞ்ஞிதம்பி வா, பரிக்³க³ஹமுகே²னபி ஸெய்யாதி³தோ மானுப்பஜ்ஜனதோ. ஸேஸபத³த்³வயேபி இமினா நயேன மஞ்ஞிதவிபா⁴கோ³ வேதி³தப்³போ³. அஹந்தி அத்தாவ, ஸோ ச சக்கு²ஸ்மிங் தத³தீ⁴னவுத்தித்தா ‘‘பரோ’’தி ந மஞ்ஞதி. மம கிஞ்சனபலிபோ³தோ⁴ சக்கு²ஸ்மிங் ஸதி லப்³ப⁴னதோ, அஸதி ந மஞ்ஞதி ததா²மஞ்ஞிதஸ்ஸ பச்சயகா⁴ததோ. ஸேஸபத³த்³வயேபி ஏஸேவ நயோ.
30. Maññitaṃ nāma taṇhāmānadiṭṭhīhi gahetabbaṃ maññitaṃ. Sabbasmiṃ maññitanti sabbamaññitaṃ, tassa samugghāto setughāto, tadāvahaṃ sabbamaññitasamugghātasāruppaṃ. Aṭṭhakathāyaṃ pana ‘‘maññitaṃ nāma cakkhādīsu eva uppajjati, nāññasmi’’nti dutiyanayo vutto. Anucchavikanti anurūpaṃ avilomaṃ. Idhāti idheva sāsane aññattha tadabhāvato. ‘‘Taṇhā-mānadiṭṭhimaññitāna’’nti vuttaṃ maññitattayaṃ saparasantānesu paṭipakkhavasena yojetvā dassetuṃ ‘‘cakkhuṃ ahanti vā’’tiādi vuttaṃ. Tattha ‘‘cakkhuṃ aha’’nti iminā ajjhattavisayaṃ diṭṭhimaññitañca dasseti attābhinivesāhaṃkāradīpanato. ‘‘Mama’’nti iminā taṇhāmaññitaṃ mānamaññitampi vā, pariggahamukhenapi seyyādito mānuppajjanato. Sesapadadvayepi iminā nayena maññitavibhāgo veditabbo. Ahanti attāva, so ca cakkhusmiṃ tadadhīnavuttittā ‘‘paro’’ti na maññati. Mama kiñcanapalibodho cakkhusmiṃ sati labbhanato, asati na maññati tathāmaññitassa paccayaghātato. Sesapadadvayepi eseva nayo.
அஹங் சக்கு²தோ நிக்³க³தோதி ‘‘அஹ’’ந்தி வத்தப்³போ³ அயங் ஸத்தோ சக்கு²தோ நிக்³க³தோ தத்த² ஸுகு²மாகாரேன உபலப்³ப⁴னதோ. மம கிஞ்சனபலிபோ³தோ⁴ சக்கு²தோ நிக்³க³தோ தஸ்மிங் ஸதி ஏவ உபலப்³ப⁴னதோ . ஸேஸத்³வயேபி ஏஸேவ நயோ. தத்த² பரோதி பரோ ஸத்தோ. மம சக்கூ²தி ந மஞ்ஞதி யஸ்ஸ தங் சக்கு², தஸ்ஸ ‘‘அஹ’’ந்தி வத்தப்³ப³ஸ்ஸேவ அபா⁴வதோ. மமத்தபூ⁴தந்தி மம காரணங். ஸேஸங் உத்தானமேவ. ஏவமேதஸ்மிங் ஸுத்தே சக்கு²ரூப-சக்கு²விஞ்ஞாண-சக்கு²ஸம்ப²ஸ்ஸ-ஸுக²து³க்கா²து³க்க²மஸுக²வஸேன ஸத்த வாரா சக்கு²த்³வாரே, ததா² ஸோதத்³வாராதீ³ஸூதி ச² ஸத்தகா த்³வேசத்தாலீஸ. புன ஸக்காயவஸேன ‘‘ஸப்³ப³ங் ந மஞ்ஞதீ’’திஆதி³னா வுத்தங், தேன தேசத்தாலீஸ. புன தேபூ⁴மகவட்டங் ‘‘லோகோ’’தி க³ஹெத்வா ‘‘ந கிஞ்சி லோகே உபாதி³யதீ’’தி வுத்தங், தேன சதுசத்தாலீஸ ஹொந்தி. ஏவங் ஸப்³ப³தா²பி சதுசத்தாலீஸாய டா²னேஸு அரஹத்தங் பாபெத்வா விபஸ்ஸனா கதி²தாதி வேதி³தப்³பா³. ‘‘சதுசத்தாலீஸாதி⁴கஸதேஸூ’’தி கேஸுசி பொத்த²கேஸு லிக²ந்தி, ஸா ச பமாத³லேகா².
Ahaṃ cakkhuto niggatoti ‘‘aha’’nti vattabbo ayaṃ satto cakkhuto niggato tattha sukhumākārena upalabbhanato. Mama kiñcanapalibodho cakkhuto niggato tasmiṃ sati eva upalabbhanato . Sesadvayepi eseva nayo. Tattha paroti paro satto. Mama cakkhūti na maññati yassa taṃ cakkhu, tassa ‘‘aha’’nti vattabbasseva abhāvato. Mamattabhūtanti mama kāraṇaṃ. Sesaṃ uttānameva. Evametasmiṃ sutte cakkhurūpa-cakkhuviññāṇa-cakkhusamphassa-sukhadukkhādukkhamasukhavasena satta vārā cakkhudvāre, tathā sotadvārādīsūti cha sattakā dvecattālīsa. Puna sakkāyavasena ‘‘sabbaṃ na maññatī’’tiādinā vuttaṃ, tena tecattālīsa. Puna tebhūmakavaṭṭaṃ ‘‘loko’’ti gahetvā ‘‘na kiñci loke upādiyatī’’ti vuttaṃ, tena catucattālīsa honti. Evaṃ sabbathāpi catucattālīsāya ṭhānesu arahattaṃ pāpetvā vipassanā kathitāti veditabbā. ‘‘Catucattālīsādhikasatesū’’ti kesuci potthakesu likhanti, sā ca pamādalekhā.
ஸமுக்³கா⁴தஸாருப்பஸுத்தவண்ணனா நிட்டி²தா.
Samugghātasāruppasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஸமுக்³கா⁴தஸாருப்பஸுத்தங் • 8. Samugghātasāruppasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸமுக்³கா⁴தஸாருப்பஸுத்தவண்ணனா • 8. Samugghātasāruppasuttavaṇṇanā
