| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. ஸாமுகி³யஸுத்தங்
4. Sāmugiyasuttaṃ
194. ஏகங் ஸமயங் ஆயஸ்மா ஆனந்தோ³ கோலியேஸு விஹரதி ஸாமுக³ங் நாம 1 கோலியானங் நிக³மோ. அத² கோ² ஸம்ப³ஹுலா ஸாமுகி³யா கோலியபுத்தா யேனாயஸ்மா ஆனந்தோ³ தேனுபஸங்கமிங்ஸு; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னே கோ² தே ஸாமுகி³யே கோலியபுத்தே ஆயஸ்மா ஆனந்தோ³ ஏதத³வோச –
194. Ekaṃ samayaṃ āyasmā ānando koliyesu viharati sāmugaṃ nāma 2 koliyānaṃ nigamo. Atha kho sambahulā sāmugiyā koliyaputtā yenāyasmā ānando tenupasaṅkamiṃsu; upasaṅkamitvā āyasmantaṃ ānandaṃ abhivādetvā ekamantaṃ nisīdiṃsu. Ekamantaṃ nisinne kho te sāmugiye koliyaputte āyasmā ānando etadavoca –
‘‘சத்தாரிமானி, ப்³யக்³க⁴பஜ்ஜா, பாரிஸுத்³தி⁴பதா⁴னியங்கா³னி தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸம்மத³க்கா²தானி ஸத்தானங் விஸுத்³தி⁴யா ஸோகபரிதே³வானங் 3 ஸமதிக்கமாய து³க்க²தோ³மனஸ்ஸானங் அத்த²ங்க³மாய ஞாயஸ்ஸ அதி⁴க³மாய நிப்³பா³னஸ்ஸ ஸச்சி²கிரியாய. கதமானி சத்தாரி? ஸீலபாரிஸுத்³தி⁴பதா⁴னியங்க³ங், சித்தபாரிஸுத்³தி⁴பதா⁴னியங்க³ங் , தி³ட்டி²பாரிஸுத்³தி⁴பதா⁴னியங்க³ங், விமுத்திபாரிஸுத்³தி⁴பதா⁴னியங்க³ங்.
‘‘Cattārimāni, byagghapajjā, pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ 4 samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya. Katamāni cattāri? Sīlapārisuddhipadhāniyaṅgaṃ, cittapārisuddhipadhāniyaṅgaṃ , diṭṭhipārisuddhipadhāniyaṅgaṃ, vimuttipārisuddhipadhāniyaṅgaṃ.
‘‘கதமஞ்ச , ப்³யக்³க⁴பஜ்ஜா, ஸீலபாரிஸுத்³தி⁴பதா⁴னியங்க³ங்? இத⁴, ப்³யக்³க⁴பஜ்ஜா, பி⁴க்கு² ஸீலவா ஹோதி…பே॰… ஸமாதா³ய ஸிக்க²தி ஸிக்கா²பதே³ஸு. அயங் வுச்சதி, ப்³யக்³க⁴பஜ்ஜா, ஸீலபாரிஸுத்³தி⁴. இதி ஏவரூபிங் ஸீலபாரிஸுத்³தி⁴ங் அபரிபூரங் வா பரிபூரெஸ்ஸாமி பரிபூரங் வா தத்த² தத்த² பஞ்ஞாய அனுக்³க³ஹெஸ்ஸாமீதி, யோ தத்த² ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச, இத³ங் வுச்சதி, ப்³யக்³க⁴பஜ்ஜா, ஸீலபாரிஸுத்³தி⁴பதா⁴னியங்க³ங்.
‘‘Katamañca , byagghapajjā, sīlapārisuddhipadhāniyaṅgaṃ? Idha, byagghapajjā, bhikkhu sīlavā hoti…pe… samādāya sikkhati sikkhāpadesu. Ayaṃ vuccati, byagghapajjā, sīlapārisuddhi. Iti evarūpiṃ sīlapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, sīlapārisuddhipadhāniyaṅgaṃ.
‘‘கதமஞ்ச, ப்³யக்³க⁴பஜ்ஜா, சித்தபாரிஸுத்³தி⁴பதா⁴னியங்க³ங்? இத⁴, ப்³யக்³க⁴பஜ்ஜா, பி⁴க்கு² விவிச்சேவ காமேஹி…பே॰… சதுத்த²ங் ஜா²னங் உபஸம்பஜ்ஜ விஹரதி. அயங் வுச்சதி, ப்³யக்³க⁴பஜ்ஜா, சித்தபாரிஸுத்³தி⁴. இதி ஏவரூபிங் சித்தபாரிஸுத்³தி⁴ங் அபரிபூரங் வா பரிபூரெஸ்ஸாமி பரிபூரங் வா தத்த² தத்த² பஞ்ஞாய அனுக்³க³ஹெஸ்ஸாமீதி, யோ தத்த² ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச, இத³ங் வுச்சதி, ப்³யக்³க⁴பஜ்ஜா, சித்தபாரிஸுத்³தி⁴பதா⁴னியங்க³ங்.
‘‘Katamañca, byagghapajjā, cittapārisuddhipadhāniyaṅgaṃ? Idha, byagghapajjā, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, byagghapajjā, cittapārisuddhi. Iti evarūpiṃ cittapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, cittapārisuddhipadhāniyaṅgaṃ.
‘‘கதமஞ்ச, ப்³யக்³க⁴பஜ்ஜா, தி³ட்டி²பாரிஸுத்³தி⁴பதா⁴னியங்க³ங்? இத⁴, ப்³யக்³க⁴பஜ்ஜா, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. அயங் வுச்சதி, ப்³யக்³க⁴பஜ்ஜா, தி³ட்டி²பாரிஸுத்³தி⁴. இதி ஏவரூபிங் தி³ட்டி²பாரிஸுத்³தி⁴ங் அபரிபூரங் வா…பே॰… தத்த² தத்த² பஞ்ஞாய அனுக்³க³ஹெஸ்ஸாமீதி, யோ தத்த² ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச, இத³ங் வுச்சதி, ப்³யக்³க⁴பஜ்ஜா, தி³ட்டி²பாரிஸுத்³தி⁴பதா⁴னியங்க³ங் .
‘‘Katamañca, byagghapajjā, diṭṭhipārisuddhipadhāniyaṅgaṃ? Idha, byagghapajjā, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Ayaṃ vuccati, byagghapajjā, diṭṭhipārisuddhi. Iti evarūpiṃ diṭṭhipārisuddhiṃ aparipūraṃ vā…pe… tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, diṭṭhipārisuddhipadhāniyaṅgaṃ .
‘‘கதமஞ்ச, ப்³யக்³க⁴பஜ்ஜா, விமுத்திபாரிஸுத்³தி⁴பதா⁴னியங்க³ங்? ஸ கோ² ஸோ, ப்³யக்³க⁴பஜ்ஜா, அரியஸாவகோ இமினா ச ஸீலபாரிஸுத்³தி⁴பதா⁴னியங்கே³ன ஸமன்னாக³தோ இமினா ச சித்தபாரிஸுத்³தி⁴பதா⁴னியங்கே³ன ஸமன்னாக³தோ இமினா ச தி³ட்டி²பாரிஸுத்³தி⁴பதா⁴னியங்கே³ன ஸமன்னாக³தோ ரஜனீயேஸு த⁴ம்மேஸு சித்தங் விராஜேதி, விமோசனீயேஸு த⁴ம்மேஸு சித்தங் விமோசேதி. ஸோ ரஜனீயேஸு த⁴ம்மேஸு சித்தங் விராஜெத்வா, விமோசனீயேஸு த⁴ம்மேஸு சித்தங் விமோசெத்வா ஸம்மாவிமுத்திங் பு²ஸதி. அயங் வுச்சதி, ப்³யக்³க⁴பஜ்ஜா, விமுத்திபாரிஸுத்³தி⁴. இதி ஏவரூபிங் விமுத்திபாரிஸுத்³தி⁴ங் அபரிபூரங் வா பரிபூரெஸ்ஸாமி பரிபூரங் வா தத்த² தத்த² பஞ்ஞாய அனுக்³க³ஹெஸ்ஸாமீதி, யோ தத்த² ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச, இத³ங் வுச்சதி, ப்³யக்³க⁴பஜ்ஜா, விமுத்திபாரிஸுத்³தி⁴பதா⁴னியங்க³ங்.
‘‘Katamañca, byagghapajjā, vimuttipārisuddhipadhāniyaṅgaṃ? Sa kho so, byagghapajjā, ariyasāvako iminā ca sīlapārisuddhipadhāniyaṅgena samannāgato iminā ca cittapārisuddhipadhāniyaṅgena samannāgato iminā ca diṭṭhipārisuddhipadhāniyaṅgena samannāgato rajanīyesu dhammesu cittaṃ virājeti, vimocanīyesu dhammesu cittaṃ vimoceti. So rajanīyesu dhammesu cittaṃ virājetvā, vimocanīyesu dhammesu cittaṃ vimocetvā sammāvimuttiṃ phusati. Ayaṃ vuccati, byagghapajjā, vimuttipārisuddhi. Iti evarūpiṃ vimuttipārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, vimuttipārisuddhipadhāniyaṅgaṃ.
‘‘இமானி கோ², ப்³யக்³க⁴பஜ்ஜா, சத்தாரி பாரிஸுத்³தி⁴பதா⁴னியங்கா³னி தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸம்மத³க்கா²தானி ஸத்தானங் விஸுத்³தி⁴யா ஸோகபரிதே³வானங் ஸமதிக்கமாய து³க்க²தோ³மனஸ்ஸானங் அத்த²ங்க³மாய ஞாயஸ்ஸ அதி⁴க³மாய நிப்³பா³னஸ்ஸ ஸச்சி²கிரியாயா’’தி. சதுத்த²ங்.
‘‘Imāni kho, byagghapajjā, cattāri pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāyā’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ஸாமுகி³யாஸுத்தவண்ணனா • 4. Sāmugiyāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. ஸாமுகி³யஸுத்தவண்ணனா • 4. Sāmugiyasuttavaṇṇanā
