| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஸங்யோஜனஸுத்தங்
6. Saṃyojanasuttaṃ
6. ‘‘த்³வேமே, பி⁴க்க²வே, த⁴ம்மா. கதமே த்³வே? யா ச ஸங்யோஜனியேஸு த⁴ம்மேஸு அஸ்ஸாதா³னுபஸ்ஸிதா, யா ச ஸங்யோஜனியேஸு த⁴ம்மேஸு நிப்³பி³தா³னுபஸ்ஸிதா. ஸங்யோஜனியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸீ விஹரந்தோ ராக³ங் ந பஜஹதி, தோ³ஸங் ந பஜஹதி, மோஹங் ந பஜஹதி. ராக³ங் அப்பஹாய, தோ³ஸங் அப்பஹாய, மோஹங் அப்பஹாய ந பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ந பரிமுச்சதி து³க்க²ஸ்மாதி வதா³மி.
6. ‘‘Dveme, bhikkhave, dhammā. Katame dve? Yā ca saṃyojaniyesu dhammesu assādānupassitā, yā ca saṃyojaniyesu dhammesu nibbidānupassitā. Saṃyojaniyesu, bhikkhave, dhammesu assādānupassī viharanto rāgaṃ na pajahati, dosaṃ na pajahati, mohaṃ na pajahati. Rāgaṃ appahāya, dosaṃ appahāya, mohaṃ appahāya na parimuccati jātiyā jarāya maraṇena sokehi paridevehi dukkhehi domanassehi upāyāsehi. Na parimuccati dukkhasmāti vadāmi.
‘‘ஸங்யோஜனியேஸு, பி⁴க்க²வே, த⁴ம்மேஸு நிப்³பி³தா³னுபஸ்ஸீ விஹரந்தோ ராக³ங் பஜஹதி, தோ³ஸங் பஜஹதி, மோஹங் பஜஹதி. ராக³ங் பஹாய, தோ³ஸங் பஹாய, மோஹங் பஹாய, பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. பரிமுச்சதி து³க்க²ஸ்மாதி வதா³மி. இமே கோ², பி⁴க்க²வே, த்³வே த⁴ம்மா’’தி. ச²ட்ட²ங்.
‘‘Saṃyojaniyesu, bhikkhave, dhammesu nibbidānupassī viharanto rāgaṃ pajahati, dosaṃ pajahati, mohaṃ pajahati. Rāgaṃ pahāya, dosaṃ pahāya, mohaṃ pahāya, parimuccati jātiyā jarāya maraṇena sokehi paridevehi dukkhehi domanassehi upāyāsehi. Parimuccati dukkhasmāti vadāmi. Ime kho, bhikkhave, dve dhammā’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸங்யோஜனஸுத்தவண்ணனா • 6. Saṃyojanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸங்யோஜனஸுத்தவண்ணனா • 6. Saṃyojanasuttavaṇṇanā
