| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஸணமானஸுத்தவண்ணனா
5. Saṇamānasuttavaṇṇanā
15. டி²தே மஜ்ஜ²ன்ஹிகேதி புப்³ப³த்³த⁴ங் நிக்க²மித்வா அபரத்³த⁴ங் அப்பத்வா டி²தமஜ்ஜ²ன்ஹே. ஸன்னிஸீவேஸூதி பரிஸ்ஸமவினோத³னத்த²ங் ஸப்³ப³ஸோ ஸன்னிஸீத³ந்தேஸு. த³-காரஸ்ஸ ஹி வ-காரங் கத்வா நித்³தே³ஸோ. தேனாஹ ‘‘ஸன்னிஸின்னேஸு விஸ்ஸமமானேஸூ’’தி. ஸப்³ப³ஸத்தானந்தி ஸப்³பே³ஸஞ்ச ஆஹாரூபஜீவிதஸத்தானங் க⁴ம்மதாபனே ஸந்தத்தகாயானங் இரியாபத²து³ப்³ப³ல்யகாலோதி டா²னாதி³இரியாபத²ஸ்ஸ அஸமத்த²காலோ. ஸணதி வியாதி ஸத்³த³ங் கரோதி விய, யதா² தங் அஞ்ஞம்பி மஹாவனங் வக்க²மானநயேன. தேனாஹ ‘‘தப்படிபா⁴க³ங் நாமேத’’ந்தி சி²த்³த³வேணுபப்³பா³னந்தி ரந்த⁴ஜாதகீசகமஹாவேளுபப்³பா³னங். து³தியகங் ஸஹாயங் அலப⁴ந்தீ அனபி⁴ரதிபரிதஸ்ஸனாய ஏவமாஹ. அனப்பகங் ஸுக²ந்தி விபுலங் உளாரங் விவேகஸுக²ங்.
15.Ṭhite majjhanhiketi pubbaddhaṃ nikkhamitvā aparaddhaṃ appatvā ṭhitamajjhanhe. Sannisīvesūti parissamavinodanatthaṃ sabbaso sannisīdantesu. Da-kārassa hi va-kāraṃ katvā niddeso. Tenāha ‘‘sannisinnesu vissamamānesū’’ti. Sabbasattānanti sabbesañca āhārūpajīvitasattānaṃ ghammatāpane santattakāyānaṃ iriyāpathadubbalyakāloti ṭhānādiiriyāpathassa asamatthakālo. Saṇati viyāti saddaṃ karoti viya, yathā taṃ aññampi mahāvanaṃ vakkhamānanayena. Tenāha ‘‘tappaṭibhāgaṃ nāmeta’’nti chiddaveṇupabbānanti randhajātakīcakamahāveḷupabbānaṃ. Dutiyakaṃ sahāyaṃ alabhantī anabhiratiparitassanāya evamāha. Anappakaṃ sukhanti vipulaṃ uḷāraṃ vivekasukhaṃ.
ஏகவிஹாரதாய ஸுஞ்ஞாகா³ரங் பவிட்ட²ஸ்ஸ. தேன காயவிவேகங் த³ஸ்ஸேதி. அனிச்சானுபஸ்ஸனாதீ³ஹி நிச்சஸஞ்ஞாதி³ப்பஹானேன ஸந்தசித்தஸ்ஸ. தேன சித்தவிவேகங் த³ஸ்ஸேதி. ஸங்ஸாரே ப⁴யங் இக்க²னதோ பி⁴க்கு²னோ உப⁴யவிவேகஸம்பன்னஸ்ஸ, ததோ ஏவ உத்தரிங் மனுஸ்ஸத⁴ம்மதோ ரதிங் லாபி⁴னோ. அமானுஸீ ரதீதி பா⁴வனாரதி. புரதோதி புரிமபா⁴கே³. பச்ச²தோதி பச்சி²மபா⁴கே³. அபரோதி அஞ்ஞோ. புரதோதி வா அனாக³தே, அனாக³தங் ஆரப்³பா⁴தி அத்தோ². பச்ச²தோதி அதீதே அதீதங் ஆரப்³ப⁴ படிபத்தியா விபா³த⁴னதோ. பரோதி கோதோ⁴ சித்தபடிது³ஸ்ஸனதாய. ந பரோதி அபரோ, லோபோ⁴, ஸோ சே ந விஜ்ஜதி. ஏதேன அனாக³தப்பஜப்பனாய அதீதானுஸோசனாய ச அபா⁴வங் த³ஸ்ஸேதி. அதீவ பா²ஸு ப⁴வதீதி நீவரணஜெட்ட²கஸ்ஸ காமச்ச²ந்த³ஸ்ஸ விக³மேன விக்க²ம்பி⁴தனீவரணஸ்ஸ ஜா²னஸ்ஸ வஸேன அதிவிய பா²ஸுவிஹாரோ ஹோதி. ஏகஸ்ஸ வஸதோ வனேதி தண்ஹாது³தியிகாபா⁴வேன ஏகஸ்ஸ அரஞ்ஞே விவேகவாஸங் வஸதோ. ஸேஸங் தாதி³ஸமேவாதி ஸேஸமெத்த² யங் வத்தப்³ப³ங், தங் பட²மகா³தா²யங் வுத்தஸதி³ஸமேவ.
Ekavihāratāya suññāgāraṃ paviṭṭhassa. Tena kāyavivekaṃ dasseti. Aniccānupassanādīhi niccasaññādippahānena santacittassa. Tena cittavivekaṃ dasseti. Saṃsāre bhayaṃ ikkhanato bhikkhuno ubhayavivekasampannassa, tato eva uttariṃ manussadhammato ratiṃ lābhino. Amānusī ratīti bhāvanārati. Puratoti purimabhāge. Pacchatoti pacchimabhāge. Aparoti añño. Puratoti vā anāgate, anāgataṃ ārabbhāti attho. Pacchatoti atīte atītaṃ ārabbha paṭipattiyā vibādhanato. Paroti kodho cittapaṭidussanatāya. Na paroti aparo, lobho, so ce na vijjati. Etena anāgatappajappanāya atītānusocanāya ca abhāvaṃ dasseti. Atīva phāsu bhavatīti nīvaraṇajeṭṭhakassa kāmacchandassa vigamena vikkhambhitanīvaraṇassa jhānassa vasena ativiya phāsuvihāro hoti. Ekassa vasato vaneti taṇhādutiyikābhāvena ekassa araññe vivekavāsaṃ vasato. Sesaṃ tādisamevāti sesamettha yaṃ vattabbaṃ, taṃ paṭhamagāthāyaṃ vuttasadisameva.
ஸணமானஸுத்தவண்ணனா நிட்டி²தா.
Saṇamānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஸணமானஸுத்தங் • 5. Saṇamānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸணமானஸுத்தவண்ணனா • 5. Saṇamānasuttavaṇṇanā
