Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૫. સણમાનસુત્તવણ્ણના
5. Saṇamānasuttavaṇṇanā
૧૫. ઠિતે મજ્ઝન્હિકેતિ પુબ્બદ્ધં નિક્ખમિત્વા અપરદ્ધં અપ્પત્વા ઠિતમજ્ઝન્હે. સન્નિસીવેસૂતિ પરિસ્સમવિનોદનત્થં સબ્બસો સન્નિસીદન્તેસુ. દ-કારસ્સ હિ વ-કારં કત્વા નિદ્દેસો. તેનાહ ‘‘સન્નિસિન્નેસુ વિસ્સમમાનેસૂ’’તિ. સબ્બસત્તાનન્તિ સબ્બેસઞ્ચ આહારૂપજીવિતસત્તાનં ઘમ્મતાપને સન્તત્તકાયાનં ઇરિયાપથદુબ્બલ્યકાલોતિ ઠાનાદિઇરિયાપથસ્સ અસમત્થકાલો. સણતિ વિયાતિ સદ્દં કરોતિ વિય, યથા તં અઞ્ઞમ્પિ મહાવનં વક્ખમાનનયેન. તેનાહ ‘‘તપ્પટિભાગં નામેત’’ન્તિ છિદ્દવેણુપબ્બાનન્તિ રન્ધજાતકીચકમહાવેળુપબ્બાનં. દુતિયકં સહાયં અલભન્તી અનભિરતિપરિતસ્સનાય એવમાહ. અનપ્પકં સુખન્તિ વિપુલં ઉળારં વિવેકસુખં.
15.Ṭhite majjhanhiketi pubbaddhaṃ nikkhamitvā aparaddhaṃ appatvā ṭhitamajjhanhe. Sannisīvesūti parissamavinodanatthaṃ sabbaso sannisīdantesu. Da-kārassa hi va-kāraṃ katvā niddeso. Tenāha ‘‘sannisinnesu vissamamānesū’’ti. Sabbasattānanti sabbesañca āhārūpajīvitasattānaṃ ghammatāpane santattakāyānaṃ iriyāpathadubbalyakāloti ṭhānādiiriyāpathassa asamatthakālo. Saṇati viyāti saddaṃ karoti viya, yathā taṃ aññampi mahāvanaṃ vakkhamānanayena. Tenāha ‘‘tappaṭibhāgaṃ nāmeta’’nti chiddaveṇupabbānanti randhajātakīcakamahāveḷupabbānaṃ. Dutiyakaṃ sahāyaṃ alabhantī anabhiratiparitassanāya evamāha. Anappakaṃ sukhanti vipulaṃ uḷāraṃ vivekasukhaṃ.
એકવિહારતાય સુઞ્ઞાગારં પવિટ્ઠસ્સ. તેન કાયવિવેકં દસ્સેતિ. અનિચ્ચાનુપસ્સનાદીહિ નિચ્ચસઞ્ઞાદિપ્પહાનેન સન્તચિત્તસ્સ. તેન ચિત્તવિવેકં દસ્સેતિ. સંસારે ભયં ઇક્ખનતો ભિક્ખુનો ઉભયવિવેકસમ્પન્નસ્સ, તતો એવ ઉત્તરિં મનુસ્સધમ્મતો રતિં લાભિનો. અમાનુસી રતીતિ ભાવનારતિ. પુરતોતિ પુરિમભાગે. પચ્છતોતિ પચ્છિમભાગે. અપરોતિ અઞ્ઞો. પુરતોતિ વા અનાગતે, અનાગતં આરબ્ભાતિ અત્થો. પચ્છતોતિ અતીતે અતીતં આરબ્ભ પટિપત્તિયા વિબાધનતો. પરોતિ કોધો ચિત્તપટિદુસ્સનતાય. ન પરોતિ અપરો, લોભો, સો ચે ન વિજ્જતિ. એતેન અનાગતપ્પજપ્પનાય અતીતાનુસોચનાય ચ અભાવં દસ્સેતિ. અતીવ ફાસુ ભવતીતિ નીવરણજેટ્ઠકસ્સ કામચ્છન્દસ્સ વિગમેન વિક્ખમ્ભિતનીવરણસ્સ ઝાનસ્સ વસેન અતિવિય ફાસુવિહારો હોતિ. એકસ્સ વસતો વનેતિ તણ્હાદુતિયિકાભાવેન એકસ્સ અરઞ્ઞે વિવેકવાસં વસતો. સેસં તાદિસમેવાતિ સેસમેત્થ યં વત્તબ્બં, તં પઠમગાથાયં વુત્તસદિસમેવ.
Ekavihāratāya suññāgāraṃ paviṭṭhassa. Tena kāyavivekaṃ dasseti. Aniccānupassanādīhi niccasaññādippahānena santacittassa. Tena cittavivekaṃ dasseti. Saṃsāre bhayaṃ ikkhanato bhikkhuno ubhayavivekasampannassa, tato eva uttariṃ manussadhammato ratiṃ lābhino. Amānusī ratīti bhāvanārati. Puratoti purimabhāge. Pacchatoti pacchimabhāge. Aparoti añño. Puratoti vā anāgate, anāgataṃ ārabbhāti attho. Pacchatoti atīte atītaṃ ārabbha paṭipattiyā vibādhanato. Paroti kodho cittapaṭidussanatāya. Na paroti aparo, lobho, so ce na vijjati. Etena anāgatappajappanāya atītānusocanāya ca abhāvaṃ dasseti. Atīva phāsu bhavatīti nīvaraṇajeṭṭhakassa kāmacchandassa vigamena vikkhambhitanīvaraṇassa jhānassa vasena ativiya phāsuvihāro hoti. Ekassa vasato vaneti taṇhādutiyikābhāvena ekassa araññe vivekavāsaṃ vasato. Sesaṃ tādisamevāti sesamettha yaṃ vattabbaṃ, taṃ paṭhamagāthāyaṃ vuttasadisameva.
સણમાનસુત્તવણ્ણના નિટ્ઠિતા.
Saṇamānasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૫. સણમાનસુત્તં • 5. Saṇamānasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫. સણમાનસુત્તવણ્ણના • 5. Saṇamānasuttavaṇṇanā