Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya

    10. ஸங்கா³ரவஸுத்தங்

    10. Saṅgāravasuttaṃ

    61. அத² கோ² ஸங்கா³ரவோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸங்கா³ரவோ ப்³ராஹ்மணோ ப⁴க³வந்தங் ஏதத³வோச – ‘‘மயமஸ்ஸு, போ⁴ கோ³தம, ப்³ராஹ்மணா நாம. யஞ்ஞங் யஜாமபி யஜாபேமபி. தத்ர, போ⁴ கோ³தம, யோ சேவ யஜதி 1 யோ ச யஜாபேதி ஸப்³பே³ தே அனேகஸாரீரிகங் புஞ்ஞப்படிபத³ங் படிபன்னா ஹொந்தி, யதி³த³ங் யஞ்ஞாதி⁴கரணங். யோ பனாயங், போ⁴ கோ³தம, யஸ்ஸ வா தஸ்ஸ வா குலா அகா³ரஸ்மா அனகா³ரியங் பப்³ப³ஜிதோ ஏகமத்தானங் த³மேதி, ஏகமத்தானங் ஸமேதி, ஏகமத்தானங் பரினிப்³பா³பேதி, ஏவமஸ்ஸாயங் ஏகஸாரீரிகங் புஞ்ஞப்படிபத³ங் படிபன்னோ ஹோதி, யதி³த³ங் பப்³ப³ஜ்ஜாதி⁴கரண’’ந்தி.

    61. Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho saṅgāravo brāhmaṇo bhagavantaṃ etadavoca – ‘‘mayamassu, bho gotama, brāhmaṇā nāma. Yaññaṃ yajāmapi yajāpemapi. Tatra, bho gotama, yo ceva yajati 2 yo ca yajāpeti sabbe te anekasārīrikaṃ puññappaṭipadaṃ paṭipannā honti, yadidaṃ yaññādhikaraṇaṃ. Yo panāyaṃ, bho gotama, yassa vā tassa vā kulā agārasmā anagāriyaṃ pabbajito ekamattānaṃ dameti, ekamattānaṃ sameti, ekamattānaṃ parinibbāpeti, evamassāyaṃ ekasārīrikaṃ puññappaṭipadaṃ paṭipanno hoti, yadidaṃ pabbajjādhikaraṇa’’nti.

    ‘‘தேன ஹி, ப்³ராஹ்மண, தஞ்ஞேவெத்த² படிபுச்சி²ஸ்ஸாமி. யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, ப்³ராஹ்மண, இத⁴ ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ ஏவமாஹ – ‘ஏதா²யங் மக்³கோ³ அயங் படிபதா³ யதா²படிபன்னோ அஹங் அனுத்தரங் ப்³ரஹ்மசரியோக³த⁴ங் ஸயங் அபி⁴ஞ்ஞா ஸச்சி²கத்வா பவேதே³மி; ஏத² 3, தும்ஹேபி ததா² படிபஜ்ஜத², யதா²படிபன்னா தும்ஹேபி அனுத்தரங் ப்³ரஹ்மசரியோக³த⁴ங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி. இதி அயஞ்சேவ 4 ஸத்தா² த⁴ம்மங் தே³ஸேதி, பரே ச தத²த்தா²ய படிபஜ்ஜந்தி, தானி கோ² பன ஹொந்தி அனேகானிபி ஸதானி அனேகானிபி ஸஹஸ்ஸானி அனேகானிபி ஸதஸஹஸ்ஸானி.

    ‘‘Tena hi, brāhmaṇa, taññevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, brāhmaṇa, idha tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So evamāha – ‘ethāyaṃ maggo ayaṃ paṭipadā yathāpaṭipanno ahaṃ anuttaraṃ brahmacariyogadhaṃ sayaṃ abhiññā sacchikatvā pavedemi; etha 5, tumhepi tathā paṭipajjatha, yathāpaṭipannā tumhepi anuttaraṃ brahmacariyogadhaṃ sayaṃ abhiññā sacchikatvā upasampajja viharissathā’ti. Iti ayañceva 6 satthā dhammaṃ deseti, pare ca tathatthāya paṭipajjanti, tāni kho pana honti anekānipi satāni anekānipi sahassāni anekānipi satasahassāni.

    ‘‘தங் கிங் மஞ்ஞஸி, ப்³ராஹ்மண, இச்சாயங் ஏவங் ஸந்தே ஏகஸாரீரிகா வா புஞ்ஞப்படிபதா³ ஹோதி அனேகஸாரீரிகா வா, யதி³த³ங் பப்³ப³ஜ்ஜாதி⁴கரண’’ந்தி? ‘‘இச்சாயம்பி 7, போ⁴ கோ³தம, ஏவங் ஸந்தே அனேகஸாரீரிகா புஞ்ஞப்படிபதா³ ஹோதி, யதி³த³ங் பப்³ப³ஜ்ஜாதி⁴கரண’’ந்தி.

    ‘‘Taṃ kiṃ maññasi, brāhmaṇa, iccāyaṃ evaṃ sante ekasārīrikā vā puññappaṭipadā hoti anekasārīrikā vā, yadidaṃ pabbajjādhikaraṇa’’nti? ‘‘Iccāyampi 8, bho gotama, evaṃ sante anekasārīrikā puññappaṭipadā hoti, yadidaṃ pabbajjādhikaraṇa’’nti.

    ஏவங் வுத்தே ஆயஸ்மா ஆனந்தோ³ ஸங்கா³ரவங் ப்³ராஹ்மணங் ஏதத³வோச – ‘‘இமாஸங் தே, ப்³ராஹ்மண, த்³வின்னங் படிபதா³னங் கதமா படிபதா³ க²மதி அப்பத்த²தரா ச அப்பஸமாரம்ப⁴தரா ச மஹப்ப²லதரா ச மஹானிஸங்ஸதரா சா’’தி? ஏவங் வுத்தே ஸங்கா³ரவோ ப்³ராஹ்மணோ ஆயஸ்மந்தங் ஆனந்த³ங் ஏதத³வோச – ‘‘ஸெய்யதா²பி ப⁴வங் கோ³தமோ ப⁴வங் சானந்தோ³. ஏதே மே புஜ்ஜா, ஏதே மே பாஸங்ஸா’’தி.

    Evaṃ vutte āyasmā ānando saṅgāravaṃ brāhmaṇaṃ etadavoca – ‘‘imāsaṃ te, brāhmaṇa, dvinnaṃ paṭipadānaṃ katamā paṭipadā khamati appatthatarā ca appasamārambhatarā ca mahapphalatarā ca mahānisaṃsatarā cā’’ti? Evaṃ vutte saṅgāravo brāhmaṇo āyasmantaṃ ānandaṃ etadavoca – ‘‘seyyathāpi bhavaṃ gotamo bhavaṃ cānando. Ete me pujjā, ete me pāsaṃsā’’ti.

    து³தியம்பி கோ² ஆயஸ்மா ஆனந்தோ³ ஸங்கா³ரவங் ப்³ராஹ்மணங் ஏதத³வோச – ‘‘ந கோ² த்யாஹங், ப்³ராஹ்மண, ஏவங் புச்சா²மி – ‘கே வா தே புஜ்ஜா கே வா தே பாஸங்ஸா’தி? ஏவங் கோ² த்யாஹங், ப்³ராஹ்மண, புச்சா²மி – ‘இமாஸங் தே, ப்³ராஹ்மண, த்³வின்னங் படிபதா³னங் கதமா படிபதா³ க²மதி அப்பத்த²தரா ச அப்பஸமாரம்ப⁴தரா ச மஹப்ப²லதரா ச மஹானிஸங்ஸதரா சா’’’தி? து³தியம்பி கோ² ஸங்கா³ரவோ ப்³ராஹ்மணோ ஆயஸ்மந்தங் ஆனந்த³ங் ஏதத³வோச – ‘‘ஸெய்யதா²பி ப⁴வங் கோ³தமோ ப⁴வங் சானந்தோ³. ஏதே மே புஜ்ஜா, ஏதே மே பாஸங்ஸா’’தி.

    Dutiyampi kho āyasmā ānando saṅgāravaṃ brāhmaṇaṃ etadavoca – ‘‘na kho tyāhaṃ, brāhmaṇa, evaṃ pucchāmi – ‘ke vā te pujjā ke vā te pāsaṃsā’ti? Evaṃ kho tyāhaṃ, brāhmaṇa, pucchāmi – ‘imāsaṃ te, brāhmaṇa, dvinnaṃ paṭipadānaṃ katamā paṭipadā khamati appatthatarā ca appasamārambhatarā ca mahapphalatarā ca mahānisaṃsatarā cā’’’ti? Dutiyampi kho saṅgāravo brāhmaṇo āyasmantaṃ ānandaṃ etadavoca – ‘‘seyyathāpi bhavaṃ gotamo bhavaṃ cānando. Ete me pujjā, ete me pāsaṃsā’’ti.

    ததியம்பி கோ² ஆயஸ்மா ஆனந்தோ³ ஸங்கா³ரவங் ப்³ராஹ்மணங் ஏதத³வோச – ‘‘ந கோ² த்யாஹங், ப்³ராஹ்மண, ஏவங் புச்சா²மி – ‘கே வா தே புஜ்ஜா கே வா தே பாஸங்ஸா’தி? ஏவங் கோ² த்யாஹங், ப்³ராஹ்மண, புச்சா²மி – ‘இமாஸங் தே, ப்³ராஹ்மண, த்³வின்னங் படிபதா³னங் கதமா படிபதா³ க²மதி அப்பத்த²தரா ச அப்பஸமாரம்ப⁴தரா ச மஹப்ப²லதரா ச மஹானிஸங்ஸதரா சா’’’தி? ததியம்பி கோ² ஸங்கா³ரவோ ப்³ராஹ்மணோ ஆயஸ்மந்தங் ஆனந்த³ங் ஏதத³வோச – ‘‘ஸெய்யதா²பி ப⁴வங் கோ³தமோ ப⁴வங் சானந்தோ³. ஏதே மே புஜ்ஜா, ஏதே மே பாஸங்ஸா’’தி.

    Tatiyampi kho āyasmā ānando saṅgāravaṃ brāhmaṇaṃ etadavoca – ‘‘na kho tyāhaṃ, brāhmaṇa, evaṃ pucchāmi – ‘ke vā te pujjā ke vā te pāsaṃsā’ti? Evaṃ kho tyāhaṃ, brāhmaṇa, pucchāmi – ‘imāsaṃ te, brāhmaṇa, dvinnaṃ paṭipadānaṃ katamā paṭipadā khamati appatthatarā ca appasamārambhatarā ca mahapphalatarā ca mahānisaṃsatarā cā’’’ti? Tatiyampi kho saṅgāravo brāhmaṇo āyasmantaṃ ānandaṃ etadavoca – ‘‘seyyathāpi bhavaṃ gotamo bhavaṃ cānando. Ete me pujjā, ete me pāsaṃsā’’ti.

    அத² கோ² ப⁴க³வதோ ஏதத³ஹோஸி – ‘‘யாவ ததியம்பி கோ² ஸங்கா³ரவோ ப்³ராஹ்மணோ ஆனந்தே³ன ஸஹத⁴ம்மிகங் பஞ்ஹங் புட்டோ² ஸங்ஸாதே³தி 9 நோ விஸ்ஸஜ்ஜேதி. யங்னூனாஹங் பரிமோசெய்ய’’ந்தி. அத² கோ² ப⁴க³வா ஸங்கா³ரவங் ப்³ராஹ்மணங் ஏதத³வோச – ‘‘கா ந்வஜ்ஜ, ப்³ராஹ்மண, ராஜந்தேபுரே ராஜபுரிஸானங் 10 ஸன்னிஸின்னானங் ஸன்னிபதிதானங் அந்தராகதா² உத³பாதீ³’’தி? ‘‘அயங் க்²வஜ்ஜ, போ⁴ கோ³தம, ராஜந்தேபுரே ராஜபுரிஸானங் ஸன்னிஸின்னானங் ஸன்னிபதிதானங் அந்தராகதா² உத³பாதி³ – ‘புப்³பே³ ஸுத³ங் அப்பதரா சேவ பி⁴க்கூ² அஹேஸுங் ப³ஹுதரா ச உத்தரி மனுஸ்ஸத⁴ம்மா இத்³தி⁴பாடிஹாரியங் த³ஸ்ஸேஸுங்; ஏதரஹி பன ப³ஹுதரா சேவ பி⁴க்கூ² அப்பதரா ச உத்தரி மனுஸ்ஸத⁴ம்மா இத்³தி⁴பாடிஹாரியங் த³ஸ்ஸெந்தீ’தி. அயங் க்²வஜ்ஜ, போ⁴ கோ³தம, ராஜந்தேபுரே ராஜபுரிஸானங் ஸன்னிஸின்னானங் ஸன்னிபதிதானங் அந்தராகதா² உத³பாதீ³’’தி.

    Atha kho bhagavato etadahosi – ‘‘yāva tatiyampi kho saṅgāravo brāhmaṇo ānandena sahadhammikaṃ pañhaṃ puṭṭho saṃsādeti 11 no vissajjeti. Yaṃnūnāhaṃ parimoceyya’’nti. Atha kho bhagavā saṅgāravaṃ brāhmaṇaṃ etadavoca – ‘‘kā nvajja, brāhmaṇa, rājantepure rājapurisānaṃ 12 sannisinnānaṃ sannipatitānaṃ antarākathā udapādī’’ti? ‘‘Ayaṃ khvajja, bho gotama, rājantepure rājapurisānaṃ sannisinnānaṃ sannipatitānaṃ antarākathā udapādi – ‘pubbe sudaṃ appatarā ceva bhikkhū ahesuṃ bahutarā ca uttari manussadhammā iddhipāṭihāriyaṃ dassesuṃ; etarahi pana bahutarā ceva bhikkhū appatarā ca uttari manussadhammā iddhipāṭihāriyaṃ dassentī’ti. Ayaṃ khvajja, bho gotama, rājantepure rājapurisānaṃ sannisinnānaṃ sannipatitānaṃ antarākathā udapādī’’ti.

    13 ‘‘தீணி கோ² இமானி, ப்³ராஹ்மண, பாடிஹாரியானி. கதமானி தீணி? இத்³தி⁴பாடிஹாரியங், ஆதே³ஸனாபாடிஹாரியங் , அனுஸாஸனீபாடிஹாரியங். கதமஞ்ச, ப்³ராஹ்மண, இத்³தி⁴பாடிஹாரியங்? இத⁴, ப்³ராஹ்மண, ஏகச்சோ அனேகவிஹிதங் இத்³தி⁴வித⁴ங் பச்சனுபோ⁴தி – ‘ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வங், திரோபா⁴வங்; திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி, ஸெய்யதா²பி ஆகாஸே; பத²வியாபி உம்முஜ்ஜனிமுஜ்ஜங் கரோதி, ஸெய்யதா²பி உத³கே; உத³கேபி அபி⁴ஜ்ஜமானே க³ச்ச²தி, ஸெய்யதா²பி பத²வியங்; ஆகாஸேபி பல்லங்கேன கமதி, ஸெய்யதா²பி பக்கீ² ஸகுணோ; இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பரிமஸதி 14 பரிமஜ்ஜதி, யாவ ப்³ரஹ்மலோகாபி காயேன வஸங் வத்தேதி’. இத³ங் வுச்சதி, ப்³ராஹ்மண, இத்³தி⁴பாடிஹாரியங் .

    15 ‘‘Tīṇi kho imāni, brāhmaṇa, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ , anusāsanīpāṭihāriyaṃ. Katamañca, brāhmaṇa, iddhipāṭihāriyaṃ? Idha, brāhmaṇa, ekacco anekavihitaṃ iddhividhaṃ paccanubhoti – ‘ekopi hutvā bahudhā hoti, bahudhāpi hutvā eko hoti; āvibhāvaṃ, tirobhāvaṃ; tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse; pathaviyāpi ummujjanimujjaṃ karoti, seyyathāpi udake; udakepi abhijjamāne gacchati, seyyathāpi pathaviyaṃ; ākāsepi pallaṅkena kamati, seyyathāpi pakkhī sakuṇo; imepi candimasūriye evaṃmahiddhike evaṃmahānubhāve pāṇinā parimasati 16 parimajjati, yāva brahmalokāpi kāyena vasaṃ vatteti’. Idaṃ vuccati, brāhmaṇa, iddhipāṭihāriyaṃ .

    ‘‘கதமஞ்ச, ப்³ராஹ்மண, ஆதே³ஸனாபாடிஹாரியங்? இத⁴, ப்³ராஹ்மண, ஏகச்சோ நிமித்தேன ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா².

    ‘‘Katamañca, brāhmaṇa, ādesanāpāṭihāriyaṃ? Idha, brāhmaṇa, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati tatheva taṃ hoti, no aññathā.

    ‘‘இத⁴ பன, ப்³ராஹ்மண, ஏகச்சோ ந ஹேவ கோ² நிமித்தேன ஆதி³ஸதி , அபி ச கோ² மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா².

    ‘‘Idha pana, brāhmaṇa, ekacco na heva kho nimittena ādisati , api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati tatheva taṃ hoti, no aññathā.

    ‘‘இத⁴ பன, ப்³ராஹ்மண, ஏகச்சோ ந ஹேவ கோ² நிமித்தேன ஆதி³ஸதி நபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, அபி ச கோ² விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா².

    ‘‘Idha pana, brāhmaṇa, ekacco na heva kho nimittena ādisati napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati tatheva taṃ hoti, no aññathā.

    ‘‘இத⁴ பன, ப்³ராஹ்மண, ஏகச்சோ ந ஹேவ கோ² நிமித்தேன ஆதி³ஸதி, நபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, நபி விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி, அபி ச கோ² அவிதக்கங் அவிசாரங் ஸமாதி⁴ங் ஸமாபன்னஸ்ஸ சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ சித்தஸ்ஸ அனந்தரா அமுங் நாம விதக்கங் விதக்கெஸ்ஸதீ’தி. ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா². இத³ங் வுச்சதி, ப்³ராஹ்மண, ஆதே³ஸனாபாடிஹாரியங்.

    ‘‘Idha pana, brāhmaṇa, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa cittassa anantarā amuṃ nāma vitakkaṃ vitakkessatī’ti. So bahuṃ cepi ādisati tatheva taṃ hoti, no aññathā. Idaṃ vuccati, brāhmaṇa, ādesanāpāṭihāriyaṃ.

    ‘‘கதமஞ்ச, ப்³ராஹ்மண, அனுஸாஸனீபாடிஹாரியங்? இத⁴, ப்³ராஹ்மண , ஏகச்சோ ஏவமனுஸாஸதி – ‘ஏவங் விதக்கேத², மா ஏவங் விதக்கயித்த²; ஏவங் மனஸி கரோத², மா ஏவங் மனஸாகத்த²; இத³ங் பஜஹத², இத³ங் உபஸம்பஜ்ஜ விஹரதா²’தி. இத³ங் வுச்சதி, ப்³ராஹ்மண, அனுஸாஸனீபாடிஹாரியங். இமானி கோ², ப்³ராஹ்மண, தீணி பாடிஹாரியானி. இமேஸங் தே, ப்³ராஹ்மண, திண்ணங் பாடிஹாரியானங் கதமங் பாடிஹாரியங் க²மதி அபி⁴க்கந்ததரஞ்ச பணீததரஞ்சா’’தி?

    ‘‘Katamañca, brāhmaṇa, anusāsanīpāṭihāriyaṃ? Idha, brāhmaṇa , ekacco evamanusāsati – ‘evaṃ vitakketha, mā evaṃ vitakkayittha; evaṃ manasi karotha, mā evaṃ manasākattha; idaṃ pajahatha, idaṃ upasampajja viharathā’ti. Idaṃ vuccati, brāhmaṇa, anusāsanīpāṭihāriyaṃ. Imāni kho, brāhmaṇa, tīṇi pāṭihāriyāni. Imesaṃ te, brāhmaṇa, tiṇṇaṃ pāṭihāriyānaṃ katamaṃ pāṭihāriyaṃ khamati abhikkantatarañca paṇītatarañcā’’ti?

    ‘‘தத்ர, போ⁴ கோ³தம, யதி³த³ங் 17 பாடிஹாரியங் இதே⁴கச்சோ அனேகவிஹிதங் இத்³தி⁴வித⁴ங் பச்சனுபோ⁴தி…பே॰… யாவ ப்³ராஹ்மலோகாபி காயேன வஸங் வத்தேதி, இத³ங், போ⁴ கோ³தம, பாடிஹாரியங் யோவ 18 நங் கரோதி ஸோவ 19 நங் படிஸங்வேதே³தி, யோவ 20 நங் கரோதி தஸ்ஸேவ 21 தங் ஹோதி. இத³ங் மே, போ⁴ கோ³தம, பாடிஹாரியங் மாயாஸஹத⁴ம்மரூபங் விய கா²யதி.

    ‘‘Tatra, bho gotama, yadidaṃ 22 pāṭihāriyaṃ idhekacco anekavihitaṃ iddhividhaṃ paccanubhoti…pe… yāva brāhmalokāpi kāyena vasaṃ vatteti, idaṃ, bho gotama, pāṭihāriyaṃ yova 23 naṃ karoti sova 24 naṃ paṭisaṃvedeti, yova 25 naṃ karoti tasseva 26 taṃ hoti. Idaṃ me, bho gotama, pāṭihāriyaṃ māyāsahadhammarūpaṃ viya khāyati.

    ‘‘யம்பித³ங் , போ⁴ கோ³தம, பாடிஹாரியங் இதே⁴கச்சோ நிமித்தேன ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி, ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா². இத⁴ பன, போ⁴ கோ³தம, ஏகச்சோ ந ஹேவ கோ² நிமித்தேன ஆதி³ஸதி, அபி ச கோ² மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி…பே॰… நபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, அபி ச கோ² விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி…பே॰… நபி விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி, அபி ச கோ² அவிதக்கங் அவிசாரங் ஸமாதி⁴ங் ஸமாபன்னஸ்ஸ சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ சித்தஸ்ஸ அனந்தரா அம்ஹங் நாம விதக்கங் விதக்கெஸ்ஸதீ’தி, ஸோ ப³ஹுங் சேபி ஆதி³ஸதி ததே²வ தங் ஹோதி, நோ அஞ்ஞதா². இத³ம்பி, போ⁴ கோ³தம, பாடிஹாரியங் யோவ நங் கரோதி ஸோவ நங் படிஸங்வேதே³தி, யோவ நங் கரோதி தஸ்ஸேவ தங் ஹோதி. இத³ம்பி மே, போ⁴ கோ³தம, பாடிஹாரியங் மாயாஸஹத⁴ம்மரூபங் விய கா²யதி.

    ‘‘Yampidaṃ , bho gotama, pāṭihāriyaṃ idhekacco nimittena ādisati – ‘evampi te mano, itthampi te mano, itipi te citta’nti, so bahuṃ cepi ādisati tatheva taṃ hoti, no aññathā. Idha pana, bho gotama, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati…pe… napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati…pe… napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa cittassa anantarā amhaṃ nāma vitakkaṃ vitakkessatī’ti, so bahuṃ cepi ādisati tatheva taṃ hoti, no aññathā. Idampi, bho gotama, pāṭihāriyaṃ yova naṃ karoti sova naṃ paṭisaṃvedeti, yova naṃ karoti tasseva taṃ hoti. Idampi me, bho gotama, pāṭihāriyaṃ māyāsahadhammarūpaṃ viya khāyati.

    ‘‘யஞ்ச கோ² இத³ங், போ⁴ கோ³தம, பாடிஹாரியங் இதே⁴கச்சோ ஏவங் அனுஸாஸதி – ‘ஏவங் விதக்கேத² , மா ஏவங் விதக்கயித்த²; ஏவங் மனஸி கரோத², மா ஏவங் மனஸாகத்த²; இத³ங் பஜஹத², இத³ங் உபஸம்பஜ்ஜ விஹரதா²’தி. இத³மேவ, போ⁴ கோ³தம, பாடிஹாரியங் க²மதி இமேஸங் திண்ணங் பாடிஹாரியானங் அபி⁴க்கந்ததரஞ்ச பணீததரஞ்ச.

    ‘‘Yañca kho idaṃ, bho gotama, pāṭihāriyaṃ idhekacco evaṃ anusāsati – ‘evaṃ vitakketha , mā evaṃ vitakkayittha; evaṃ manasi karotha, mā evaṃ manasākattha; idaṃ pajahatha, idaṃ upasampajja viharathā’ti. Idameva, bho gotama, pāṭihāriyaṃ khamati imesaṃ tiṇṇaṃ pāṭihāriyānaṃ abhikkantatarañca paṇītatarañca.

    ‘‘அச்ச²ரியங், போ⁴ கோ³தம, அப்³பு⁴தங், போ⁴ கோ³தம! யாவஸுபா⁴ஸிதமித³ங் போ⁴தா கோ³தமேன இமேஹி ச மயங் தீஹி பாடிஹாரியேஹி ஸமன்னாக³தங் ப⁴வந்தங் கோ³தமங் தா⁴ரேம. ப⁴வஞ்ஹி கோ³தமோ அனேகவிஹிதங் இத்³தி⁴வித⁴ங் பச்சனுபோ⁴தி…பே॰… யாவ ப்³ரஹ்மலோகாபி காயேன வஸங் வத்தேதி, ப⁴வஞ்ஹி கோ³தமோ அவிதக்கங் அவிசாரங் ஸமாதி⁴ங் ஸமாபன்னஸ்ஸ சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ சித்தஸ்ஸ அனந்தரா அமுங் நாம விதக்கங் விதக்கெஸ்ஸதீ’தி. ப⁴வஞ்ஹி கோ³தமோ ஏவமனுஸாஸதி – ‘ஏவங் விதக்கேத², மா ஏவங் விதக்கயித்த²; ஏவங் மனஸி கரோத², மா ஏவங் மனஸாகத்த²; இத³ங் பஜஹத², இத³ங் உபஸம்பஜ்ஜ விஹரதா²’’’தி.

    ‘‘Acchariyaṃ, bho gotama, abbhutaṃ, bho gotama! Yāvasubhāsitamidaṃ bhotā gotamena imehi ca mayaṃ tīhi pāṭihāriyehi samannāgataṃ bhavantaṃ gotamaṃ dhārema. Bhavañhi gotamo anekavihitaṃ iddhividhaṃ paccanubhoti…pe… yāva brahmalokāpi kāyena vasaṃ vatteti, bhavañhi gotamo avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa cittassa anantarā amuṃ nāma vitakkaṃ vitakkessatī’ti. Bhavañhi gotamo evamanusāsati – ‘evaṃ vitakketha, mā evaṃ vitakkayittha; evaṃ manasi karotha, mā evaṃ manasākattha; idaṃ pajahatha, idaṃ upasampajja viharathā’’’ti.

    ‘‘அத்³தா⁴ கோ² த்யாஹங், ப்³ராஹ்மண, ஆஸஜ்ஜ உபனீய வாசா பா⁴ஸிதா; அபி ச த்யாஹங் ப்³யாகரிஸ்ஸாமி. அஹஞ்ஹி, ப்³ராஹ்மண, அனேகவிஹிதங் இத்³தி⁴வித⁴ங் பச்சனுபோ⁴மி…பே॰… யாவ ப்³ரஹ்மலோகாபி காயேன வஸங் வத்தேமி. அஹஞ்ஹி , ப்³ராஹ்மண, அவிதக்கங் அவிசாரங் ஸமாதி⁴ங் ஸமாபன்னஸ்ஸ சேதஸா சேதோ பரிச்ச பஜானாமி – ‘யதா² இமஸ்ஸ போ⁴தோ மனோஸங்கா²ரா பணிஹிதா, இமஸ்ஸ சித்தஸ்ஸ அனந்தரா அமுங் நாம விதக்கங் விதக்கெஸ்ஸதீ’தி. அஹஞ்ஹி, ப்³ராஹ்மண, ஏவமனுஸாஸாமி – ‘ஏவங் விதக்கேத², மா ஏவங் விதக்கயித்த²; ஏவங் மனஸி கரோத², மா ஏவங் மனஸாகத்த²; இத³ங் பஜஹத², இத³ங் உபஸம்பஜ்ஜ விஹரதா²’’’தி.

    ‘‘Addhā kho tyāhaṃ, brāhmaṇa, āsajja upanīya vācā bhāsitā; api ca tyāhaṃ byākarissāmi. Ahañhi, brāhmaṇa, anekavihitaṃ iddhividhaṃ paccanubhomi…pe… yāva brahmalokāpi kāyena vasaṃ vattemi. Ahañhi , brāhmaṇa, avitakkaṃ avicāraṃ samādhiṃ samāpannassa cetasā ceto paricca pajānāmi – ‘yathā imassa bhoto manosaṅkhārā paṇihitā, imassa cittassa anantarā amuṃ nāma vitakkaṃ vitakkessatī’ti. Ahañhi, brāhmaṇa, evamanusāsāmi – ‘evaṃ vitakketha, mā evaṃ vitakkayittha; evaṃ manasi karotha, mā evaṃ manasākattha; idaṃ pajahatha, idaṃ upasampajja viharathā’’’ti.

    ‘‘அத்தி² பன, போ⁴ கோ³தம, அஞ்ஞோ ஏகபி⁴க்கு²பி யோ இமேஹி தீஹி பாடிஹாரியேஹி ஸமன்னாக³தோ, அஞ்ஞத்ர போ⁴தா கோ³தமேனா’’தி? ‘‘ந கோ², ப்³ராஹ்மண, ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந பஞ்ச ஸதானி, அத² கோ² பி⁴ய்யோவ, யே 27 பி⁴க்கூ² இமேஹி தீஹி பாடிஹாரியேஹி ஸமன்னாக³தா’’தி. ‘‘கஹங் பன, போ⁴ கோ³தம, ஏதரஹி தே பி⁴க்கூ² விஹரந்தீ’’தி? ‘‘இமஸ்மிங்யேவ கோ², ப்³ராஹ்மண, பி⁴க்கு²ஸங்கே⁴’’தி.

    ‘‘Atthi pana, bho gotama, añño ekabhikkhupi yo imehi tīhi pāṭihāriyehi samannāgato, aññatra bhotā gotamenā’’ti? ‘‘Na kho, brāhmaṇa, ekaṃyeva sataṃ na dve satāni na tīṇi satāni na cattāri satāni na pañca satāni, atha kho bhiyyova, ye 28 bhikkhū imehi tīhi pāṭihāriyehi samannāgatā’’ti. ‘‘Kahaṃ pana, bho gotama, etarahi te bhikkhū viharantī’’ti? ‘‘Imasmiṃyeva kho, brāhmaṇa, bhikkhusaṅghe’’ti.

    ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – ‘சக்கு²மந்தோ ரூபானி த³க்க²ந்தீ’தி, ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி, த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. த³ஸமங்.

    ‘‘Abhikkantaṃ, bho gotama, abhikkantaṃ, bho gotama! Seyyathāpi bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘cakkhumanto rūpāni dakkhantī’ti, evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi, dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dasamaṃ.

    ப்³ராஹ்மணவக்³கோ³ பட²மோ.

    Brāhmaṇavaggo paṭhamo.

    தஸ்ஸுத்³தா³னங் –

    Tassuddānaṃ –

    த்³வே ப்³ராஹ்மணா சஞ்ஞதரோ, பரிப்³பா³ஜகேன நிப்³பு³தங்;

    Dve brāhmaṇā caññataro, paribbājakena nibbutaṃ;

    பலோகவச்சோ² திகண்ணோ, ஸோணி ஸங்கா³ரவேன சாதி.

    Palokavaccho tikaṇṇo, soṇi saṅgāravena cāti.







    Footnotes:
    1. யோ சேவ யஞ்ஞங் யஜதி (ஸ்யா॰ கங்॰)
    2. yo ceva yaññaṃ yajati (syā. kaṃ.)
    3. ஏதங் (க॰)
    4. ஸயங் சேவ (க॰)
    5. etaṃ (ka.)
    6. sayaṃ ceva (ka.)
    7. இச்சாயந்தே (க॰)
    8. iccāyante (ka.)
    9. ம॰ நி॰ 1.337
    10. ராஜபரிஸாயங் (ஸீ॰ ஸ்யா॰ கங்॰ பீ॰)
    11. ma. ni. 1.337
    12. rājaparisāyaṃ (sī. syā. kaṃ. pī.)
    13. படி॰ ம॰ 3.30; தீ³॰ நி॰ 1.483
    14. பராமஸதி (தீ³॰ நி॰ 1.484; படி॰ ம॰ 1.102
    15. paṭi. ma. 3.30; dī. ni. 1.483
    16. parāmasati (dī. ni. 1.484; paṭi. ma. 1.102
    17. யமித³ங் (ஸ்யா॰ கங்॰ பீ॰)
    18. யோ ச (ஸ்யா॰ கங்॰ பீ॰ க॰)
    19. ஸோச ச (ஸ்யா॰ கங் பீ॰ க॰)
    20. யோ ச (ஸ்யா॰ கங்॰ பீ॰ க॰)
    21. தஸ்ஸமேவ (ஸீ॰ க॰), தஸ்ஸ சேவ (ஸ்யா॰ கங்॰ பீ॰)
    22. yamidaṃ (syā. kaṃ. pī.)
    23. yo ca (syā. kaṃ. pī. ka.)
    24. soca ca (syā. kaṃ pī. ka.)
    25. yo ca (syā. kaṃ. pī. ka.)
    26. tassameva (sī. ka.), tassa ceva (syā. kaṃ. pī.)
    27. தே (க॰) பஸ்ஸ ம॰ நி॰ 2.195
    28. te (ka.) passa ma. ni. 2.195



    Related texts:



    அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஸங்கா³ரவஸுத்தவண்ணனா • 10. Saṅgāravasuttavaṇṇanā

    டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. ஸங்கா³ரவஸுத்தவண்ணனா • 10. Saṅgāravasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact