| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. ஸங்கா³ரவஸுத்தங்
3. Saṅgāravasuttaṃ
169. 1 அத² கோ² ஸங்கா³ரவோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸங்கா³ரவோ ப்³ராஹ்மணோ ப⁴க³வந்தங் ஏதத³வோச –
169.2 Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho saṅgāravo brāhmaṇo bhagavantaṃ etadavoca –
‘‘கிங் நு கோ², போ⁴ கோ³தம, ஓரிமங் தீரங், கிங் பாரிமங் தீர’’ந்தி? ‘‘பாணாதிபாதோ கோ², ப்³ராஹ்மண, ஓரிமங் தீரங், பாணாதிபாதா வேரமணீ பாரிமங் தீரங். அதி³ன்னாதா³னங் கோ², ப்³ராஹ்மண, ஓரிமங் தீரங், அதி³ன்னாதா³னா வேரமணீ பாரிமங் தீரங். காமேஸுமிச்சா²சாரோ ஓரிமங் தீரங், காமேஸுமிச்சா²சாரா வேரமணீ பாரிமங் தீரங். முஸாவாதோ³ ஓரிமங் தீரங், முஸாவாதா³ வேரமணீ பாரிமங் தீரங். பிஸுணா வாசா ஓரிமங் தீரங், பிஸுணாய வாசாய வேரமணீ பாரிமங் தீரங். ப²ருஸா வாசா ஓரிமங் தீரங், ப²ருஸாய வாசாய வேரமணீ பாரிமங் தீரங். ஸம்ப²ப்பலாபோ ஓரிமங் தீரங், ஸம்ப²ப்பலாபா வேரமணீ பாரிமங் தீரங். அபி⁴ஜ்ஜா² ஓரிமங் தீரங், அனபி⁴ஜ்ஜா² பாரிமங் தீரங். ப்³யாபாதோ³ ஓரிமங் தீரங், அப்³யாபாதோ³ பாரிமங் தீரங். மிச்சா²தி³ட்டி² ஓரிமங் தீரங், ஸம்மாதி³ட்டி² பாரிமங் தீரங். இத³ங் கோ², ப்³ராஹ்மண, ஓரிமங் தீரங், இத³ங் பாரிமங் தீரந்தி.
‘‘Kiṃ nu kho, bho gotama, orimaṃ tīraṃ, kiṃ pārimaṃ tīra’’nti? ‘‘Pāṇātipāto kho, brāhmaṇa, orimaṃ tīraṃ, pāṇātipātā veramaṇī pārimaṃ tīraṃ. Adinnādānaṃ kho, brāhmaṇa, orimaṃ tīraṃ, adinnādānā veramaṇī pārimaṃ tīraṃ. Kāmesumicchācāro orimaṃ tīraṃ, kāmesumicchācārā veramaṇī pārimaṃ tīraṃ. Musāvādo orimaṃ tīraṃ, musāvādā veramaṇī pārimaṃ tīraṃ. Pisuṇā vācā orimaṃ tīraṃ, pisuṇāya vācāya veramaṇī pārimaṃ tīraṃ. Pharusā vācā orimaṃ tīraṃ, pharusāya vācāya veramaṇī pārimaṃ tīraṃ. Samphappalāpo orimaṃ tīraṃ, samphappalāpā veramaṇī pārimaṃ tīraṃ. Abhijjhā orimaṃ tīraṃ, anabhijjhā pārimaṃ tīraṃ. Byāpādo orimaṃ tīraṃ, abyāpādo pārimaṃ tīraṃ. Micchādiṭṭhi orimaṃ tīraṃ, sammādiṭṭhi pārimaṃ tīraṃ. Idaṃ kho, brāhmaṇa, orimaṃ tīraṃ, idaṃ pārimaṃ tīranti.
‘‘அப்பகா தே மனுஸ்ஸேஸு, யே ஜனா பாரகா³மினோ;
‘‘Appakā te manussesu, ye janā pāragāmino;
அதா²யங் இதரா பஜா, தீரமேவானுதா⁴வதி.
Athāyaṃ itarā pajā, tīramevānudhāvati.
‘‘யே ச கோ² ஸம்மத³க்கா²தே, த⁴ம்மே த⁴ம்மானுவத்தினோ;
‘‘Ye ca kho sammadakkhāte, dhamme dhammānuvattino;
தே ஜனா பாரமெஸ்ஸந்தி, மச்சுதெ⁴ய்யங் ஸுது³த்தரங்.
Te janā pāramessanti, maccudheyyaṃ suduttaraṃ.
‘‘கண்ஹங் த⁴ம்மங் விப்பஹாய, ஸுக்கங் பா⁴வேத² பண்டி³தோ;
‘‘Kaṇhaṃ dhammaṃ vippahāya, sukkaṃ bhāvetha paṇḍito;
ஓகா அனோகமாக³ம்ம, விவேகே யத்த² தூ³ரமங்.
Okā anokamāgamma, viveke yattha dūramaṃ.
‘‘தத்ராபி⁴ரதிமிச்செ²ய்ய, ஹித்வா காமே அகிஞ்சனோ;
‘‘Tatrābhiratimiccheyya, hitvā kāme akiñcano;
பரியோத³பெய்ய அத்தானங், சித்தக்லேஸேஹி பண்டி³தோ.
Pariyodapeyya attānaṃ, cittaklesehi paṇḍito.
‘‘யேஸங் ஸம்போ³தி⁴யங்கே³ஸு, ஸம்மா சித்தங் ஸுபா⁴விதங்;
‘‘Yesaṃ sambodhiyaṅgesu, sammā cittaṃ subhāvitaṃ;
ஆதா³னபடினிஸ்ஸக்³கே³, அனுபாதா³ய யே ரதா;
Ādānapaṭinissagge, anupādāya ye ratā;
கீ²ணாஸவா ஜுதிமந்தோ, தே லோகே பரினிப்³பு³தா’’தி. ததியங்;
Khīṇāsavā jutimanto, te loke parinibbutā’’ti. tatiyaṃ;
Footnotes:
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-44. ப்³ராஹ்மணபச்சோரோஹணீஸுத்தாதி³வண்ணனா • 1-44. Brāhmaṇapaccorohaṇīsuttādivaṇṇanā
