| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. ஸங்கா³ரவஸுத்தவண்ணனா
10. Saṅgāravasuttavaṇṇanā
473. ஏவங் மே ஸுதந்தி ஸங்கா³ரவஸுத்தங். தத்த² சஞ்சலிகப்பேதி ஏவங்னாமகே கா³மே. அபி⁴ப்பஸன்னாதி அவேச்சப்பஸாத³வஸேன பஸன்னா. ஸா கிர ஸோதாபன்னா அரியஸாவிகா பா⁴ரத்³வாஜகொ³த்தஸ்ஸ ப்³ராஹ்மணஸ்ஸ ப⁴ரியா. ஸோ ப்³ராஹ்மணோ புப்³பே³ காலேன காலங் ப்³ராஹ்மணே நிமந்தெத்வா தேஸங் ஸக்காரங் கரோதி. இமங் பன ப்³ராஹ்மணிங் க⁴ரங் ஆனெத்வா அபி⁴ரூபாய மஹாகுலாய ப்³ராஹ்மணியா சித்தங் கோபேதுங் அஸக்கொந்தோ ப்³ராஹ்மணானங் ஸக்காரங் காதுங் நாஸக்கி². அத² நங் ப்³ராஹ்மணா தி³ட்ட²தி³ட்ட²ட்டா²னே – ‘‘நயிதா³னி த்வங் ப்³ராஹ்மணலத்³தி⁴கோ, ஏகாஹம்பி ப்³ராஹ்மணானங் ஸக்காரங் ந கரோஸீ’’தி நிப்பீளெந்தி. ஸோ க⁴ரங் ஆக³ந்த்வா ப்³ராஹ்மணியா தமத்த²ங் ஆரோசெத்வா – ‘‘ஸசே, போ⁴தி ஏகதி³வஸங் முக²ங் ரக்கி²துங் ஸக்குணெய்யாஸி, ப்³ராஹ்மணானங் ஏகதி³வஸங் பி⁴க்க²ங் த³தெ³ய்ய’’ந்தி ஆஹ. துய்ஹங் தெ³ய்யத⁴ம்மங் ருச்சனகட்டா²னே தே³ஹி, கிங் மய்ஹங் எத்தா²தி. ஸோ ப்³ராஹ்மணே நிமந்தெத்வா அப்போத³கங் பாயாஸங் பசாபெத்வா க⁴ரஞ்ச ஸுஜ்ஜா²பெத்வா ஆஸனானி பஞ்ஞாபெத்வா ப்³ராஹ்மணே நிஸீதா³பேஸி. ப்³ராஹ்மணீ மஹாஸாடகங் நிவாஸெத்வா கடச்சு²ங் க³ஹெத்வா பரிவிஸந்தீ து³ஸ்ஸகண்ணகே பக்க²லித்வா ‘‘ப்³ராஹ்மணே பரிவிஸாமீ’’தி ஸஞ்ஞம்பி அகத்வா ஆஸேவனவஸேன ஸஹஸா ஸத்தா²ரமேவ அனுஸ்ஸரித்வா உதா³னங் உதா³னேஸி.
473.Evaṃme sutanti saṅgāravasuttaṃ. Tattha cañcalikappeti evaṃnāmake gāme. Abhippasannāti aveccappasādavasena pasannā. Sā kira sotāpannā ariyasāvikā bhāradvājagottassa brāhmaṇassa bhariyā. So brāhmaṇo pubbe kālena kālaṃ brāhmaṇe nimantetvā tesaṃ sakkāraṃ karoti. Imaṃ pana brāhmaṇiṃ gharaṃ ānetvā abhirūpāya mahākulāya brāhmaṇiyā cittaṃ kopetuṃ asakkonto brāhmaṇānaṃ sakkāraṃ kātuṃ nāsakkhi. Atha naṃ brāhmaṇā diṭṭhadiṭṭhaṭṭhāne – ‘‘nayidāni tvaṃ brāhmaṇaladdhiko, ekāhampi brāhmaṇānaṃ sakkāraṃ na karosī’’ti nippīḷenti. So gharaṃ āgantvā brāhmaṇiyā tamatthaṃ ārocetvā – ‘‘sace, bhoti ekadivasaṃ mukhaṃ rakkhituṃ sakkuṇeyyāsi, brāhmaṇānaṃ ekadivasaṃ bhikkhaṃ dadeyya’’nti āha. Tuyhaṃ deyyadhammaṃ ruccanakaṭṭhāne dehi, kiṃ mayhaṃ etthāti. So brāhmaṇe nimantetvā appodakaṃ pāyāsaṃ pacāpetvā gharañca sujjhāpetvā āsanāni paññāpetvā brāhmaṇe nisīdāpesi. Brāhmaṇī mahāsāṭakaṃ nivāsetvā kaṭacchuṃ gahetvā parivisantī dussakaṇṇake pakkhalitvā ‘‘brāhmaṇe parivisāmī’’ti saññampi akatvā āsevanavasena sahasā satthārameva anussaritvā udānaṃ udānesi.
ப்³ராஹ்மணா உதா³னங் ஸுத்வா ‘‘உப⁴தோபக்கி²கோ ஏஸ ஸமணஸ்ஸ கோ³தமஸ்ஸ ஸஹாயோ, நாஸ்ஸ தெ³ய்யத⁴ம்மங் க³ண்ஹிஸ்ஸாமா’’தி குபிதா போ⁴ஜனானி ச²ட்³டெ³த்வா நிக்க²மிங்ஸு. ப்³ராஹ்மணோ – ‘‘நனு பட²மங்யேவ தங் அவசங் ‘அஜ்ஜேகதி³வஸங் முக²ங் ரக்கெ²ய்யாஸீ’தி, எத்தகங் தே கீ²ரஞ்ச தண்டு³லாதீ³னி ச நாஸிதானீ’’தி அதிவிய கோபவஸங் உபக³தோ – ‘‘ஏவமேவ பனாயங் வஸலீ யஸ்மிங் வா தஸ்மிங் வா தஸ்ஸ முண்ட³கஸ்ஸ ஸமணஸ்ஸ வண்ணங் பா⁴ஸதி, இதா³னி த்யாஹங் வஸலி தஸ்ஸ ஸத்து²னோ வாத³ங் ஆரோபெஸ்ஸாமீ’’தி ஆஹ. அத² நங் ப்³ராஹ்மணீ ‘‘க³ச்ச² த்வங், ப்³ராஹ்மண, க³ந்த்வா விஜானிஸ்ஸஸீ’’தி வத்வா ‘‘ந க்²வாஹங் தங், ப்³ராஹ்மண, பஸ்ஸாமி ஸதே³வகே லோகே…பே॰… வாத³ங் ஆரோபெய்யா’’திஆதி³மாஹ. ஸோ ஸத்தா²ரங் உபஸங்கமித்வா –
Brāhmaṇā udānaṃ sutvā ‘‘ubhatopakkhiko esa samaṇassa gotamassa sahāyo, nāssa deyyadhammaṃ gaṇhissāmā’’ti kupitā bhojanāni chaḍḍetvā nikkhamiṃsu. Brāhmaṇo – ‘‘nanu paṭhamaṃyeva taṃ avacaṃ ‘ajjekadivasaṃ mukhaṃ rakkheyyāsī’ti, ettakaṃ te khīrañca taṇḍulādīni ca nāsitānī’’ti ativiya kopavasaṃ upagato – ‘‘evameva panāyaṃ vasalī yasmiṃ vā tasmiṃ vā tassa muṇḍakassa samaṇassa vaṇṇaṃ bhāsati, idāni tyāhaṃ vasali tassa satthuno vādaṃ āropessāmī’’ti āha. Atha naṃ brāhmaṇī ‘‘gaccha tvaṃ, brāhmaṇa, gantvā vijānissasī’’ti vatvā ‘‘na khvāhaṃ taṃ, brāhmaṇa, passāmi sadevake loke…pe… vādaṃ āropeyyā’’tiādimāha. So satthāraṃ upasaṅkamitvā –
‘‘கிங்ஸு செ²த்வா ஸுக²ங் ஸேதி, கிங்ஸு செ²த்வா ந ஸோசதி;
‘‘Kiṃsu chetvā sukhaṃ seti, kiṃsu chetvā na socati;
கிஸ்ஸஸ்ஸு ஏகத⁴ம்மஸ்ஸ, வத⁴ங் ரோசேஸி கோ³தமா’’தி. (ஸங்॰ நி॰ 1.187) –
Kissassu ekadhammassa, vadhaṃ rocesi gotamā’’ti. (saṃ. ni. 1.187) –
பஞ்ஹங் புச்சி². ஸத்தா² ஆஹ –
Pañhaṃ pucchi. Satthā āha –
‘‘கோத⁴ங் செ²த்வா ஸுக²ங் ஸேதி, கோத⁴ங் செ²த்வா ந ஸோசதி;
‘‘Kodhaṃ chetvā sukhaṃ seti, kodhaṃ chetvā na socati;
கோத⁴ஸ்ஸ விஸமூலஸ்ஸ, மது⁴ரக்³க³ஸ்ஸ ப்³ராஹ்மண;
Kodhassa visamūlassa, madhuraggassa brāhmaṇa;
வத⁴ங் அரியா பஸங்ஸந்தி, தஞ்ஹி செ²த்வா ந ஸோசதீ’’தி. (ஸங்॰ நி॰ 1.187) –
Vadhaṃ ariyā pasaṃsanti, tañhi chetvā na socatī’’ti. (saṃ. ni. 1.187) –
பஞ்ஹங் கதே²ஸி. ஸோ பப்³ப³ஜித்வா அரஹத்தங் பத்தோ. தஸ்ஸேவ கனிட்ட²பா⁴தா அக்கோஸகபா⁴ரத்³வாஜோ நாம ‘‘பா⁴தா மே பப்³ப³ஜிதோ’’தி ஸுத்வா ப⁴க³வந்தங் உபஸங்கமித்வா அக்கோஸித்வா ப⁴க³வதா வினீதோ பப்³ப³ஜித்வா அரஹத்தங் பத்தோ. அபரோ தஸ்ஸ கனிட்டோ² ஸுந்த³ரிகபா⁴ரத்³வாஜோ நாம. ஸோபி ப⁴க³வந்தங் உபஸங்கமித்வா பஞ்ஹங் புச்சி²த்வா விஸ்ஸஜ்ஜனங் ஸுத்வா பப்³ப³ஜித்வா அரஹத்தங் பத்தோ. அபரோ தஸ்ஸ கனிட்டோ² பிங்க³லபா⁴ரத்³வாஜோ நாம. ஸோ பஞ்ஹங் புச்சி²த்வா பஞ்ஹப்³யாகரணபரியோஸானே பப்³ப³ஜித்வா அரஹத்தங் பத்தோ. ஸங்கா³ரவோ மாணவோதி அயங் தேஸங் ஸப்³ப³கனிட்டோ² தஸ்மிங் தி³வஸே ப்³ராஹ்மணேஹி ஸத்³தி⁴ங் ஏகப⁴த்தக்³கே³ நிஸின்னோ. அவபூ⁴தாவாதி அவட்³டி⁴பூ⁴தா அவமங்க³லபூ⁴தாயேவ. பரபூ⁴தாவாதி வினாஸங் பத்தாயேவ. விஜ்ஜமானானந்தி விஜ்ஜமானேஸு. ஸீலபஞ்ஞாணந்தி ஸீலஞ்ச ஞாணஞ்ச ந ஜானாஸி.
Pañhaṃ kathesi. So pabbajitvā arahattaṃ patto. Tasseva kaniṭṭhabhātā akkosakabhāradvājo nāma ‘‘bhātā me pabbajito’’ti sutvā bhagavantaṃ upasaṅkamitvā akkositvā bhagavatā vinīto pabbajitvā arahattaṃ patto. Aparo tassa kaniṭṭho sundarikabhāradvājo nāma. Sopi bhagavantaṃ upasaṅkamitvā pañhaṃ pucchitvā vissajjanaṃ sutvā pabbajitvā arahattaṃ patto. Aparo tassa kaniṭṭho piṅgalabhāradvājo nāma. So pañhaṃ pucchitvā pañhabyākaraṇapariyosāne pabbajitvā arahattaṃ patto. Saṅgāravomāṇavoti ayaṃ tesaṃ sabbakaniṭṭho tasmiṃ divase brāhmaṇehi saddhiṃ ekabhattagge nisinno. Avabhūtāvāti avaḍḍhibhūtā avamaṅgalabhūtāyeva. Parabhūtāvāti vināsaṃ pattāyeva. Vijjamānānanti vijjamānesu. Sīlapaññāṇanti sīlañca ñāṇañca na jānāsi.
474. தி³ட்ட²த⁴ம்மாபி⁴ஞ்ஞாவோஸானபாரமிப்பத்தாதி தி³ட்ட²த⁴ம்மே அபி⁴ஞ்ஞாதே இமஸ்மிஞ்ஞேவ அத்தபா⁴வே அபி⁴ஜானித்வா வோஸிதவோஸானா ஹுத்வா பாரமீஸங்கா²தங் ஸப்³ப³த⁴ம்மானங் பாரபூ⁴தங் நிப்³பா³னங் பத்தா மயந்தி வத்வா ஆதி³ப்³ரஹ்மசரியங் படிஜானந்தீதி அத்தோ². ஆதி³ப்³ரஹ்மசரியந்தி ப்³ரஹ்மசரியஸ்ஸ ஆதி³பூ⁴தா உப்பாத³கா ஜனகாதி ஏவங் படிஜானந்தீதி வுத்தங் ஹோதி. தக்கீதி தக்ககா³ஹீ. வீமங்ஸீதி வீமங்ஸகோ, பஞ்ஞாசாரங் சராபெத்வா ஏவங்வாதீ³. தேஸாஹமஸ்மீதி தேஸங் ஸம்மாஸம்பு³த்³தா⁴னங் அஹமஸ்மி அஞ்ஞதரோ.
474.Diṭṭhadhammābhiññāvosānapāramippattāti diṭṭhadhamme abhiññāte imasmiññeva attabhāve abhijānitvā vositavosānā hutvā pāramīsaṅkhātaṃ sabbadhammānaṃ pārabhūtaṃ nibbānaṃ pattā mayanti vatvā ādibrahmacariyaṃ paṭijānantīti attho. Ādibrahmacariyanti brahmacariyassa ādibhūtā uppādakā janakāti evaṃ paṭijānantīti vuttaṃ hoti. Takkīti takkagāhī. Vīmaṃsīti vīmaṃsako, paññācāraṃ carāpetvā evaṃvādī. Tesāhamasmīti tesaṃ sammāsambuddhānaṃ ahamasmi aññataro.
485. அட்டி²தவதந்தி அட்டி²ததபங், அஸ்ஸ பதா⁴னபதே³ன ஸத்³தி⁴ங் ஸம்ப³ந்தோ⁴, ததா² ஸப்புரிஸபத³ஸ்ஸ. இத³ஞ்ஹி வுத்தங் ஹோதி – போ⁴தோ கோ³தமஸ்ஸ அட்டி²தபதா⁴னவதங் அஹோஸி, ஸப்புரிஸபதா⁴னவதங் அஹோஸீதி. அத்தி² தே³வாதி புட்டோ² ஸமானோதி இத³ங் மாணவோ ‘‘ஸம்மாஸம்பு³த்³தோ⁴ அஜானந்தோவ பகாஸேஸீ’’தி ஸஞ்ஞாய ஆஹ. ஏவங் ஸந்தேதி தும்ஹாகங் அஜானநபா⁴வே ஸந்தே. துச்ச²ங் முஸா ஹோதீதி தும்ஹாகங் கதா² அப²லா நிப்ப²லா ஹோதி. ஏவங் மாணவோ ப⁴க³வந்தங் முஸாவாதே³ன நிக்³க³ண்ஹாதி நாம. விஞ்ஞுனா புரிஸேனாதி பண்டி³தேன மனுஸ்ஸேன. த்வங் பன அவிஞ்ஞுதாய மயா ப்³யாகதம்பி ந ஜானாஸீதி தீ³பேதி. உச்சேன ஸம்மதந்தி உச்சேன ஸத்³தே³ன ஸம்மதங் பாகடங் லோகஸ்மிங். அதி⁴தே³வாதி ஸுஸுதா³ரகாபி ஹி தே³வா நாம ஹொந்தி, தே³வியோ நாம ஹொந்தி தே³வா பன அதி⁴தே³வா நாம, லோகே தே³வோ தே³வீதி லத்³த⁴னாமேஹி மனுஸ்ஸேஹி அதி⁴காதி அத்தோ². ஸேஸங் ஸப்³ப³த்த² உத்தானமேவாதி.
485.Aṭṭhitavatanti aṭṭhitatapaṃ, assa padhānapadena saddhiṃ sambandho, tathā sappurisapadassa. Idañhi vuttaṃ hoti – bhoto gotamassa aṭṭhitapadhānavataṃ ahosi, sappurisapadhānavataṃ ahosīti. Atthidevātipuṭṭho samānoti idaṃ māṇavo ‘‘sammāsambuddho ajānantova pakāsesī’’ti saññāya āha. Evaṃ santeti tumhākaṃ ajānanabhāve sante. Tucchaṃ musā hotīti tumhākaṃ kathā aphalā nipphalā hoti. Evaṃ māṇavo bhagavantaṃ musāvādena niggaṇhāti nāma. Viññunā purisenāti paṇḍitena manussena. Tvaṃ pana aviññutāya mayā byākatampi na jānāsīti dīpeti. Uccena sammatanti uccena saddena sammataṃ pākaṭaṃ lokasmiṃ. Adhidevāti susudārakāpi hi devā nāma honti, deviyo nāma honti devā pana adhidevā nāma, loke devo devīti laddhanāmehi manussehi adhikāti attho. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸங்கா³ரவஸுத்தவண்ணனா நிட்டி²தா.
Saṅgāravasuttavaṇṇanā niṭṭhitā.
பஞ்சமவக்³க³வண்ணனா நிட்டி²தா.
Pañcamavaggavaṇṇanā niṭṭhitā.
மஜ்ஜி²மபண்ணாஸ-அட்ட²கதா² நிட்டி²தா.
Majjhimapaṇṇāsa-aṭṭhakathā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. ஸங்கா³ரவஸுத்தங் • 10. Saṅgāravasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. ஸங்கா³ரவஸுத்தவண்ணனா • 10. Saṅgāravasuttavaṇṇanā
