| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(25) 5. ஆபத்திப⁴யவக்³கோ³
(25) 5. Āpattibhayavaggo
1. ஸங்க⁴பே⁴த³கஸுத்தங்
1. Saṅghabhedakasuttaṃ
243. ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஆனந்த³ங் ப⁴க³வா ஏதத³வோச – ‘‘அபி நு தங், ஆனந்த³, அதி⁴கரணங் வூபஸந்த’’ந்தி? ‘‘குதோ தங், ப⁴ந்தே, அதி⁴கரணங் வூபஸமிஸ்ஸதி 1! ஆயஸ்மதோ , ப⁴ந்தே, அனுருத்³த⁴ஸ்ஸ பா³ஹியோ நாம ஸத்³தி⁴விஹாரிகோ கேவலகப்பங் ஸங்க⁴பே⁴தா³ய டி²தோ. தத்ராயஸ்மா அனுருத்³தோ⁴ ந ஏகவாசிகம்பி ப⁴ணிதப்³ப³ங் மஞ்ஞதீ’’தி.
243. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘api nu taṃ, ānanda, adhikaraṇaṃ vūpasanta’’nti? ‘‘Kuto taṃ, bhante, adhikaraṇaṃ vūpasamissati 2! Āyasmato , bhante, anuruddhassa bāhiyo nāma saddhivihāriko kevalakappaṃ saṅghabhedāya ṭhito. Tatrāyasmā anuruddho na ekavācikampi bhaṇitabbaṃ maññatī’’ti.
‘‘கதா³ பனானந்த³, அனுருத்³தோ⁴ ஸங்க⁴மஜ்ஜே² அதி⁴கரணேஸு 3 வோயுஞ்ஜதி! நனு, ஆனந்த³, யானி கானிசி அதி⁴கரணானி உப்பஜ்ஜந்தி, ஸப்³பா³னி தானி தும்ஹே சேவ வூபஸமேத² ஸாரிபுத்தமொக்³க³ல்லானா ச.
‘‘Kadā panānanda, anuruddho saṅghamajjhe adhikaraṇesu 4 voyuñjati! Nanu, ānanda, yāni kānici adhikaraṇāni uppajjanti, sabbāni tāni tumhe ceva vūpasametha sāriputtamoggallānā ca.
‘‘சத்தாரோமே, ஆனந்த³, அத்த²வஸே ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தி. கதமே சத்தாரோ? இதா⁴னந்த³, பாபபி⁴க்கு² து³ஸ்ஸீலோ ஹோதி பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ அஸ்ஸமணோ ஸமணபடிஞ்ஞோ அப்³ரஹ்மசாரீ ப்³ரஹ்மசாரிபடிஞ்ஞோ அந்தோபூதி அவஸ்ஸுதோ கஸம்பு³ஜாதோ. தஸ்ஸ ஏவங் ஹோதி – ‘ஸசே கோ² மங் பி⁴க்கூ² ஜானிஸ்ஸந்தி – து³ஸ்ஸீலோ பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ அஸ்ஸமணோ ஸமணபடிஞ்ஞோ அப்³ரஹ்மசாரீ ப்³ரஹ்மசாரிபடிஞ்ஞோ அந்தோபூதி அவஸ்ஸுதோ கஸம்பு³ஜாதோதி, ஸமக்³கா³ மங் ஸந்தா நாஸெஸ்ஸந்தி; வக்³கா³ பன மங் ந நாஸெஸ்ஸந்தீ’தி. இத³ங், ஆனந்த³, பட²மங் அத்த²வஸங் ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தி.
‘‘Cattārome, ānanda, atthavase sampassamāno pāpabhikkhu saṅghabhedena nandati. Katame cattāro? Idhānanda, pāpabhikkhu dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto. Tassa evaṃ hoti – ‘sace kho maṃ bhikkhū jānissanti – dussīlo pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujātoti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, paṭhamaṃ atthavasaṃ sampassamāno pāpabhikkhu saṅghabhedena nandati.
‘‘புன சபரங், ஆனந்த³, பாபபி⁴க்கு² மிச்சா²தி³ட்டி²கோ ஹோதி, அந்தக்³கா³ஹிகாய தி³ட்டி²யா ஸமன்னாக³தோ. தஸ்ஸ ஏவங் ஹோதி – ‘ஸசே கோ² மங் பி⁴க்கூ² ஜானிஸ்ஸந்தி – மிச்சா²தி³ட்டி²கோ அந்தக்³கா³ஹிகாய தி³ட்டி²யா ஸமன்னாக³தோதி, ஸமக்³கா³ மங் ஸந்தா நாஸெஸ்ஸந்தி; வக்³கா³ பன மங் ந நாஸெஸ்ஸந்தீ’தி. இத³ங், ஆனந்த³, து³தியங் அத்த²வஸங் ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தி.
‘‘Puna caparaṃ, ānanda, pāpabhikkhu micchādiṭṭhiko hoti, antaggāhikāya diṭṭhiyā samannāgato. Tassa evaṃ hoti – ‘sace kho maṃ bhikkhū jānissanti – micchādiṭṭhiko antaggāhikāya diṭṭhiyā samannāgatoti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, dutiyaṃ atthavasaṃ sampassamāno pāpabhikkhu saṅghabhedena nandati.
‘‘புன சபரங், ஆனந்த³, பாபபி⁴க்கு² மிச்சா²ஆஜீவோ ஹோதி, மிச்சா²ஆஜீவேன ஜீவிகங் 5 கப்பேதி. தஸ்ஸ ஏவங் ஹோதி – ‘ஸசே கோ² மங் பி⁴க்கூ² ஜானிஸ்ஸந்தி – மிச்சா²ஆஜீவோ மிச்சா²ஆஜீவேன ஜீவிகங் கப்பேதீதி, ஸமக்³கா³ மங் ஸந்தா நாஸெஸ்ஸந்தி; வக்³கா³ பன மங் ந நாஸெஸ்ஸந்தீ’தி. இத³ங், ஆனந்த³, ததியங் அத்த²வஸங் ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தி.
‘‘Puna caparaṃ, ānanda, pāpabhikkhu micchāājīvo hoti, micchāājīvena jīvikaṃ 6 kappeti. Tassa evaṃ hoti – ‘sace kho maṃ bhikkhū jānissanti – micchāājīvo micchāājīvena jīvikaṃ kappetīti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, tatiyaṃ atthavasaṃ sampassamāno pāpabhikkhu saṅghabhedena nandati.
‘‘புன சபரங், ஆனந்த³, பாபபி⁴க்கு² லாப⁴காமோ ஹோதி ஸக்காரகாமோ அனவஞ்ஞத்திகாமோ. தஸ்ஸ ஏவங் ஹோதி – ‘ஸசே கோ² மங் பி⁴க்கூ² ஜானிஸ்ஸந்தி – லாப⁴காமோ ஸக்காரகாமோ அனவஞ்ஞத்திகாமோதி, ஸமக்³கா³ மங் ஸந்தா ந ஸக்கரிஸ்ஸந்தி ந க³ருங் கரிஸ்ஸந்தி ந மானெஸ்ஸந்தி ந பூஜெஸ்ஸந்தி; வக்³கா³ பன மங் ஸக்கரிஸ்ஸந்தி க³ருங் கரிஸ்ஸந்தி மானெஸ்ஸந்தி பூஜெஸ்ஸந்தீ’தி. இத³ங், ஆனந்த³, சதுத்த²ங் அத்த²வஸங் ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தி. இமே கோ², ஆனந்த³, சத்தாரோ அத்த²வஸே ஸம்பஸ்ஸமானோ பாபபி⁴க்கு² ஸங்க⁴பே⁴தே³ன நந்த³தீ’’தி. பட²மங்.
‘‘Puna caparaṃ, ānanda, pāpabhikkhu lābhakāmo hoti sakkārakāmo anavaññattikāmo. Tassa evaṃ hoti – ‘sace kho maṃ bhikkhū jānissanti – lābhakāmo sakkārakāmo anavaññattikāmoti, samaggā maṃ santā na sakkarissanti na garuṃ karissanti na mānessanti na pūjessanti; vaggā pana maṃ sakkarissanti garuṃ karissanti mānessanti pūjessantī’ti. Idaṃ, ānanda, catutthaṃ atthavasaṃ sampassamāno pāpabhikkhu saṅghabhedena nandati. Ime kho, ānanda, cattāro atthavase sampassamāno pāpabhikkhu saṅghabhedena nandatī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸங்க⁴பே⁴த³கஸுத்தவண்ணனா • 1. Saṅghabhedakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ஸங்க⁴பே⁴த³கஸுத்தவண்ணனா • 1. Saṅghabhedakasuttavaṇṇanā
