| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
8. ஸங்க⁴பே⁴த³ஸுத்தவண்ணனா
8. Saṅghabhedasuttavaṇṇanā
48. அட்ட²மே ஆயஸ்மந்தங் ஆனந்த³ங் ஏதத³வோசாதி அபி⁴மாரே பயோஜெத்வா நாளாகி³ரிங் விஸ்ஸஜ்ஜாபெத்வா ஸிலங் பவட்டெத்வா ப⁴க³வதோ அனத்த²ங் காதுங் அஸக்கொந்தோ ‘‘ஸங்க⁴ங் பி⁴ந்தி³த்வா சக்கபே⁴த³ங் கரிஸ்ஸாமீ’’தி அதி⁴ப்பாயேன ஏதங் ‘‘அஜ்ஜதக்³கே³’’திஆதி³வசனங் அவோச. அஞ்ஞத்ரேவ ப⁴க³வதாதி வினா ஏவ ப⁴க³வந்தங், ஸத்தா²ரங் அகத்வாதி அத்தோ². அஞ்ஞத்ர பி⁴க்கு²ஸங்கா⁴தி வினா ஏவ பி⁴க்கு²ஸங்க⁴ங். உபோஸத²ங் கரிஸ்ஸாமி ஸங்க⁴கம்மானி சாதி ப⁴க³வதோ ஓவாத³காரகங் பி⁴க்கு²ஸங்க⁴ங் விஸுங் கத்வா மங் அனுவத்தந்தேஹி பி⁴க்கூ²ஹி ஸத்³தி⁴ங் ஆவேணிகங் உபோஸத²ங் ஸங்க⁴கம்மானி ச கரிஸ்ஸாமீதி அத்தோ². தே³வத³த்தோ ஸங்க⁴ங் பி⁴ந்தி³ஸ்ஸதீதி பே⁴த³கரானங் ஸப்³பே³ஸங் தே³வத³த்தேன ஸஜ்ஜிதத்தா ஏகங்ஸேனேவ தே³வத³த்தோ அஜ்ஜ ஸங்க⁴ங் பி⁴ந்தி³ஸ்ஸதி த்³விதா⁴ கரிஸ்ஸதி. ‘‘அத⁴ம்மங் த⁴ம்மோ’’திஆதீ³ஸு ஹி அட்டா²ரஸஸு பே⁴த³கரவத்தூ²ஸு யங்கிஞ்சி ஏகம்பி வத்து²ங் தீ³பெத்வா தேன தேன காரணேன ‘‘இமங் க³ண்ஹத², இமங் ரோசேதா²’’தி ஸஞ்ஞாபெத்வா ஸலாகங் கா³ஹெத்வா விஸுங் ஸங்க⁴கம்மே கதே ஸங்கோ⁴ பி⁴ன்னோ ஹோதி. வுத்தஞ்ஹேதங் –
48. Aṭṭhame āyasmantaṃ ānandaṃ etadavocāti abhimāre payojetvā nāḷāgiriṃ vissajjāpetvā silaṃ pavaṭṭetvā bhagavato anatthaṃ kātuṃ asakkonto ‘‘saṅghaṃ bhinditvā cakkabhedaṃ karissāmī’’ti adhippāyena etaṃ ‘‘ajjatagge’’tiādivacanaṃ avoca. Aññatreva bhagavatāti vinā eva bhagavantaṃ, satthāraṃ akatvāti attho. Aññatra bhikkhusaṅghāti vinā eva bhikkhusaṅghaṃ. Uposathaṃ karissāmi saṅghakammāni cāti bhagavato ovādakārakaṃ bhikkhusaṅghaṃ visuṃ katvā maṃ anuvattantehi bhikkhūhi saddhiṃ āveṇikaṃ uposathaṃ saṅghakammāni ca karissāmīti attho. Devadatto saṅghaṃ bhindissatīti bhedakarānaṃ sabbesaṃ devadattena sajjitattā ekaṃseneva devadatto ajja saṅghaṃ bhindissati dvidhā karissati. ‘‘Adhammaṃ dhammo’’tiādīsu hi aṭṭhārasasu bhedakaravatthūsu yaṃkiñci ekampi vatthuṃ dīpetvā tena tena kāraṇena ‘‘imaṃ gaṇhatha, imaṃ rocethā’’ti saññāpetvā salākaṃ gāhetvā visuṃ saṅghakamme kate saṅgho bhinno hoti. Vuttañhetaṃ –
‘‘பஞ்சஹி, உபாலி, ஆகாரேஹி ஸங்கோ⁴ பி⁴ஜ்ஜதி கம்மேன உத்³தே³ஸேன வோஹரந்தோ அனுஸ்ஸாவனேன ஸலாகக்³கா³ஹேனா’’தி (பரி॰ 458).
‘‘Pañcahi, upāli, ākārehi saṅgho bhijjati kammena uddesena voharanto anussāvanena salākaggāhenā’’ti (pari. 458).
தத்த² கம்மேனாதி அபலோகனகம்மாதீ³ஸு சதூஸு கம்மேஸு அஞ்ஞதரேன கம்மேன. உத்³தே³ஸேனாதி பஞ்சஸு பாதிமொக்கு²த்³தே³ஸேஸு அஞ்ஞதரேன உத்³தே³ஸேன. வோஹரந்தோதி தாஹி தாஹி உப்பத்தீஹி ‘‘அத⁴ம்மங் த⁴ம்மோ’’திஆதீ³னி (அ॰ நி॰ 10.37; சூளவ॰ 352) அட்டா²ரஸபே⁴த³கரவத்தூ²னி தீ³பெந்தோ. அனுஸ்ஸாவனேனாதி ‘‘நனு தும்ஹே ஜானாத² மய்ஹங் உச்சாகுலா பப்³ப³ஜிதபா⁴வங் ப³ஹுஸ்ஸுதபா⁴வஞ்ச, மாதி³ஸோ நாம உத்³த⁴ம்மங் உப்³பி³னயங் கா³ஹெய்யாதி கிங் தும்ஹாகங் சித்தம்பி உப்பாதே³துங் யுத்தங், கிமஹங் அபாயதோ ந பா⁴யாமீ’’திஆதி³னா நயேன கண்ணமூலே வசீபே⁴த³ங் கத்வா அனுஸ்ஸாவனேன. ஸலாகக்³கா³ஹேனாதி ஏவங் அனுஸ்ஸாவெத்வா தேஸங் சித்தங் உபத்த²ம்பெ⁴த்வா அனாவத்தித⁴ம்மே கத்வா ‘‘க³ண்ஹத² இமங் ஸலாக’’ந்தி ஸலாகக்³கா³ஹேன.
Tattha kammenāti apalokanakammādīsu catūsu kammesu aññatarena kammena. Uddesenāti pañcasu pātimokkhuddesesu aññatarena uddesena. Voharantoti tāhi tāhi uppattīhi ‘‘adhammaṃ dhammo’’tiādīni (a. ni. 10.37; cūḷava. 352) aṭṭhārasabhedakaravatthūni dīpento. Anussāvanenāti ‘‘nanu tumhe jānātha mayhaṃ uccākulā pabbajitabhāvaṃ bahussutabhāvañca, mādiso nāma uddhammaṃ ubbinayaṃ gāheyyāti kiṃ tumhākaṃ cittampi uppādetuṃ yuttaṃ, kimahaṃ apāyato na bhāyāmī’’tiādinā nayena kaṇṇamūle vacībhedaṃ katvā anussāvanena. Salākaggāhenāti evaṃ anussāvetvā tesaṃ cittaṃ upatthambhetvā anāvattidhamme katvā ‘‘gaṇhatha imaṃ salāka’’nti salākaggāhena.
எத்த² ச கம்மமேவ உத்³தே³ஸோ வா பமாணங், வோஹாரானுஸ்ஸாவனஸலாகக்³கா³ஹா பன புப்³ப³பா⁴கா³. அட்டா²ரஸவத்து²தீ³பனவஸேன ஹி வோஹரந்தேன தத்த² ருசிஜனநத்த²ங் அனுஸ்ஸாவெத்வா ஸலாகாய கா³ஹிதாயபி அபி⁴ன்னோவ ஹோதி ஸங்கோ⁴. யதா³ பனேவங் சத்தாரோ வா அதிரேகா வா ஸலாகங் கா³ஹெத்வா ஆவேணிகங் உத்³தே³ஸங் வா கம்மங் வா கரொந்தி, ததா³ ஸங்கோ⁴ பி⁴ன்னோ நாம ஹோதி. தே³வத³த்தோ ச ஸப்³ப³ங் ஸங்க⁴பே⁴த³ஸ்ஸ புப்³ப³பா⁴க³ங் நிப்பா²தெ³த்வா ‘‘ஏகங்ஸேனேவ அஜ்ஜ ஆவேணிகங் உபோஸத²ங் ஸங்க⁴கம்மஞ்ச கரிஸ்ஸாமீ’’தி சிந்தெத்வா ‘‘அஜ்ஜதக்³கே³’’திஆதி³வசனங் அவோச. தேனாஹ – ‘‘அஜ்ஜ, ப⁴ந்தே, தே³வத³த்தோ ஸங்க⁴ங் பி⁴ந்தி³ஸ்ஸதீ’’தி. யதோ அவோசும்ஹா ‘‘பே⁴த³கரானங் ஸப்³பே³ஸங் தே³வத³த்தேன ஸஜ்ஜிதத்தா’’தி.
Ettha ca kammameva uddeso vā pamāṇaṃ, vohārānussāvanasalākaggāhā pana pubbabhāgā. Aṭṭhārasavatthudīpanavasena hi voharantena tattha rucijananatthaṃ anussāvetvā salākāya gāhitāyapi abhinnova hoti saṅgho. Yadā panevaṃ cattāro vā atirekā vā salākaṃ gāhetvā āveṇikaṃ uddesaṃ vā kammaṃ vā karonti, tadā saṅgho bhinno nāma hoti. Devadatto ca sabbaṃ saṅghabhedassa pubbabhāgaṃ nipphādetvā ‘‘ekaṃseneva ajja āveṇikaṃ uposathaṃ saṅghakammañca karissāmī’’ti cintetvā ‘‘ajjatagge’’tiādivacanaṃ avoca. Tenāha – ‘‘ajja, bhante, devadatto saṅghaṃ bhindissatī’’ti. Yato avocumhā ‘‘bhedakarānaṃ sabbesaṃ devadattena sajjitattā’’ti.
ஏதமத்த²ங் விதி³த்வாதி ஏதங் அவீசிமஹானிரயுப்பத்திஸங்வத்தனியங் கப்பட்டி²யங் அதேகிச்ச²ங் தே³வத³த்தேன நிப்³ப³த்தியமானங் ஸங்க⁴பே⁴த³கம்மங் ஸப்³பா³காரதோ விதி³த்வா . இமங் உதா³னந்தி குஸலாகுஸலேஸு யதா²க்கமங் ஸப்புரிஸாஸப்புரிஸஸபா⁴க³விஸபா⁴க³படிபத்திவஸேன பன ஸுகுஸலாதி இத³மத்த²விபா⁴வனங் இமங் உதா³னங் உதா³னேஸி.
Etamatthaṃ viditvāti etaṃ avīcimahānirayuppattisaṃvattaniyaṃ kappaṭṭhiyaṃ atekicchaṃ devadattena nibbattiyamānaṃ saṅghabhedakammaṃ sabbākārato viditvā . Imaṃ udānanti kusalākusalesu yathākkamaṃ sappurisāsappurisasabhāgavisabhāgapaṭipattivasena pana sukusalāti idamatthavibhāvanaṃ imaṃ udānaṃ udānesi.
தத்த² ஸுகரங் ஸாது⁴னா ஸாதூ⁴தி அத்தனோ பரேஸஞ்ச ஹிதங் ஸாதே⁴தீதி ஸாது⁴, ஸம்மாபடிபன்னோ. தேன ஸாது⁴னா ஸாரிபுத்தாதி³னா ஸாவகேன பச்சேகபு³த்³தே⁴ன ஸம்மாஸம்பு³த்³தே⁴ன அஞ்ஞேன வா லோகியஸாது⁴னா ஸாது⁴ ஸுந்த³ரங் ப⁴த்³த³கங் அத்தனோ பரேஸஞ்ச ஹிதஸுகா²வஹங் ஸுகரங் ஸுகே²ன காதுங் ஸக்கா. ஸாது⁴ பாபேன து³க்கரந்தி ததே³வ பன வுத்தலக்க²ணங் ஸாது⁴ பாபேன தே³வத³த்தாதி³னா பாபபுக்³க³லேன து³க்கரங் காதுங் ந ஸக்கா, ந ஸோ தங் காதுங் ஸக்கோதீதி அத்தோ². பாபங் பாபேன ஸுகரந்தி பாபங் அஸுந்த³ரங் அத்தனோ பரேஸஞ்ச அனத்தா²வஹங் பாபேன யதா²வுத்தபாபபுக்³க³லேன ஸுகரங் ஸுகே²ன காதுங் ஸக்குணெய்ய. பாபமரியேஹி து³க்கரந்தி அரியேஹி பன பு³த்³தா⁴தீ³ஹி தங் தங் பாபங் து³க்கரங் து³ரபி⁴ஸம்ப⁴வங். ஸேதுகா⁴தோயேவ ஹி தேஸந்தி ஸத்தா² தீ³பேதி.
Tattha sukaraṃ sādhunā sādhūti attano paresañca hitaṃ sādhetīti sādhu, sammāpaṭipanno. Tena sādhunā sāriputtādinā sāvakena paccekabuddhena sammāsambuddhena aññena vā lokiyasādhunā sādhu sundaraṃ bhaddakaṃ attano paresañca hitasukhāvahaṃ sukaraṃ sukhena kātuṃ sakkā. Sādhu pāpena dukkaranti tadeva pana vuttalakkhaṇaṃ sādhu pāpena devadattādinā pāpapuggalena dukkaraṃ kātuṃ na sakkā, na so taṃ kātuṃ sakkotīti attho. Pāpaṃ pāpena sukaranti pāpaṃ asundaraṃ attano paresañca anatthāvahaṃ pāpena yathāvuttapāpapuggalena sukaraṃ sukhena kātuṃ sakkuṇeyya. Pāpamariyehi dukkaranti ariyehi pana buddhādīhi taṃ taṃ pāpaṃ dukkaraṃ durabhisambhavaṃ. Setughātoyeva hi tesanti satthā dīpeti.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 8. ஸங்க⁴பே⁴த³ஸுத்தங் • 8. Saṅghabhedasuttaṃ
