| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
9. ஸங்க⁴ஸாமக்³கீ³ஸுத்தவண்ணனா
9. Saṅghasāmaggīsuttavaṇṇanā
19. நவமே ஏகத⁴ம்மோதி ஏகோ குஸலத⁴ம்மோ அனவஜ்ஜத⁴ம்மோ. ‘‘அயங் த⁴ம்மோ, நாயங் த⁴ம்மோ’’திஆதி³னா ஸசே ஸங்கே⁴ விவாதோ³ உப்பஜ்ஜெய்ய, தத்த² த⁴ம்மகாமேன விஞ்ஞுனா இதி படிஸஞ்சிக்கி²தப்³ப³ங் ‘‘டா²னங் கோ², பனேதங் விஜ்ஜதி, யதி³த³ங் விவாதோ³ வட்³ட⁴மானோ ஸங்க⁴ராஜியா வா ஸங்க⁴பே⁴தா³ய வா ஸங்வத்தெய்யா’’தி. ஸசே தங் அதி⁴கரணங் அத்தனா பக்³க³ஹெத்வா டி²தோ, அக்³கி³ங் அக்கந்தேன விய ஸஹஸா ததோ ஓரமிதப்³ப³ங். அத² பரேஹி தங் பக்³க³ஹிதங் ஸயஞ்சேதங் ஸக்கோதி வூபஸமேதுங், உஸ்ஸாஹஜாதோ ஹுத்வா தூ³ரம்பி க³ந்த்வா ததா² படிபஜ்ஜிதப்³ப³ங், யதா² தங் வூபஸம்மதி. ஸசே பன ஸயங் ந ஸக்கோதி, ஸோ ச விவாதோ³ உபரூபரி வட்³ட⁴தேவ, ந வூபஸம்மதி. யே தத்த² பதிரூபா ஸிக்கா²காமா ஸப்³ரஹ்மசாரினோ, தே உஸ்ஸாஹெத்வா யேன த⁴ம்மேன யேன வினயேன யேன ஸத்து²ஸாஸனேன தங் அதி⁴கரணங் யதா² வூபஸம்மதி, ததா² வூபஸமேதப்³ப³ங். ஏவங் வூபஸமெந்தஸ்ஸ யோ ஸங்க⁴ஸாமக்³கி³கரோ குஸலோ த⁴ம்மோ, அயமெத்த² ஏகத⁴ம்மோதி அதி⁴ப்பேதோ. ஸோ ஹி உப⁴தோபக்கி²யானங் த்³வெள்ஹகஜாதானங் பி⁴க்கூ²னங், தேஸங் அனுவத்தனவஸேன டி²தானங் பி⁴க்கு²னீனங் உபாஸகானங் உபாஸிகானங் தேஸங் ஆரக்க²தே³வதானங் யாவதே³வ ப்³ரஹ்மானம்பி உப்பஜ்ஜனாரஹங் அஹிதங் து³க்கா²வஹங் ஸங்கிலேஸத⁴ம்மங் அபனெத்வா மஹதோ புஞ்ஞராஸிஸ்ஸ குஸலாபி⁴ஸந்த³ஸ்ஸ ஹேதுபா⁴வதோ ஸதே³வகஸ்ஸ லோகஸ்ஸ ஹிதஸுகா²வஹோ ஹோதி. தேன வுத்தங் ‘‘ஏகத⁴ம்மோ, பி⁴க்க²வே, லோகே உப்பஜ்ஜமானோ உப்பஜ்ஜதி ப³ஹுஜனஹிதாயா’’திஆதி³. தஸ்ஸத்தோ² அனந்தரஸுத்தே வுத்தவிபரியாயேன வேதி³தப்³போ³. ஸங்க⁴ஸாமக்³கீ³தி ஸங்க⁴ஸ்ஸ ஸமக்³க³பா⁴வோ பே⁴தா³பா⁴வோ ஏககம்மதா ஏகுத்³தே³ஸதா ச.
19. Navame ekadhammoti eko kusaladhammo anavajjadhammo. ‘‘Ayaṃ dhammo, nāyaṃ dhammo’’tiādinā sace saṅghe vivādo uppajjeyya, tattha dhammakāmena viññunā iti paṭisañcikkhitabbaṃ ‘‘ṭhānaṃ kho, panetaṃ vijjati, yadidaṃ vivādo vaḍḍhamāno saṅgharājiyā vā saṅghabhedāya vā saṃvatteyyā’’ti. Sace taṃ adhikaraṇaṃ attanā paggahetvā ṭhito, aggiṃ akkantena viya sahasā tato oramitabbaṃ. Atha parehi taṃ paggahitaṃ sayañcetaṃ sakkoti vūpasametuṃ, ussāhajāto hutvā dūrampi gantvā tathā paṭipajjitabbaṃ, yathā taṃ vūpasammati. Sace pana sayaṃ na sakkoti, so ca vivādo uparūpari vaḍḍhateva, na vūpasammati. Ye tattha patirūpā sikkhākāmā sabrahmacārino, te ussāhetvā yena dhammena yena vinayena yena satthusāsanena taṃ adhikaraṇaṃ yathā vūpasammati, tathā vūpasametabbaṃ. Evaṃ vūpasamentassa yo saṅghasāmaggikaro kusalo dhammo, ayamettha ekadhammoti adhippeto. So hi ubhatopakkhiyānaṃ dveḷhakajātānaṃ bhikkhūnaṃ, tesaṃ anuvattanavasena ṭhitānaṃ bhikkhunīnaṃ upāsakānaṃ upāsikānaṃ tesaṃ ārakkhadevatānaṃ yāvadeva brahmānampi uppajjanārahaṃ ahitaṃ dukkhāvahaṃ saṃkilesadhammaṃ apanetvā mahato puññarāsissa kusalābhisandassa hetubhāvato sadevakassa lokassa hitasukhāvaho hoti. Tena vuttaṃ ‘‘ekadhammo, bhikkhave, loke uppajjamāno uppajjati bahujanahitāyā’’tiādi. Tassattho anantarasutte vuttavipariyāyena veditabbo. Saṅghasāmaggīti saṅghassa samaggabhāvo bhedābhāvo ekakammatā ekuddesatā ca.
கா³தா²யங் ஸுகா² ஸங்க⁴ஸ்ஸ ஸாமக்³கீ³தி ஸுக²ஸ்ஸ பச்சயபா⁴வதோ ஸாமக்³கீ³ ஸுகா²தி வுத்தா. யதா² ‘‘ஸுகோ² பு³த்³தா⁴னமுப்பாதோ³’’தி (த⁴॰ ப॰ 194). ஸமக்³கா³னஞ்சனுக்³க³ஹோதி ஸமக்³கா³னங் ஸாமக்³கி³அனுமோத³னேன அனுக்³க³ண்ஹனங் ஸாமக்³கி³அனுரூபங், யதா² தே ஸாமக்³கி³ங் ந விஜஹந்தி, ததா² க³ஹணங் ட²பனங் அனுப³லப்பதா³னந்தி அத்தோ². ஸங்க⁴ங் ஸமக்³க³ங் கத்வானாதி பி⁴ன்னங் ஸங்க⁴ங் ராஜிபத்தங் வா ஸமக்³க³ங் ஸஹிதங் கத்வா. கப்பந்தி ஆயுகப்பமேவ. ஸக்³க³ம்ஹி மோத³தீதி காமாவசரதே³வலோகே அஞ்ஞே தே³வே த³ஸஹி டா²னேஹி அபி⁴ப⁴வித்வா தி³ப்³ப³ஸுக²ங் அனுப⁴வந்தோ இச்சி²தனிப்ப²த்தியாவ மோத³தி பமோத³தி லலதி கீளதீதி.
Gāthāyaṃ sukhā saṅghassa sāmaggīti sukhassa paccayabhāvato sāmaggī sukhāti vuttā. Yathā ‘‘sukho buddhānamuppādo’’ti (dha. pa. 194). Samaggānañcanuggahoti samaggānaṃ sāmaggianumodanena anuggaṇhanaṃ sāmaggianurūpaṃ, yathā te sāmaggiṃ na vijahanti, tathā gahaṇaṃ ṭhapanaṃ anubalappadānanti attho. Saṅghaṃ samaggaṃ katvānāti bhinnaṃ saṅghaṃ rājipattaṃ vā samaggaṃ sahitaṃ katvā. Kappanti āyukappameva. Saggamhi modatīti kāmāvacaradevaloke aññe deve dasahi ṭhānehi abhibhavitvā dibbasukhaṃ anubhavanto icchitanipphattiyāva modati pamodati lalati kīḷatīti.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 9. ஸங்க⁴ஸாமக்³கீ³ஸுத்தங் • 9. Saṅghasāmaggīsuttaṃ
