| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. ஸனிதா³னஸுத்தவண்ணனா
2. Sanidānasuttavaṇṇanā
96. பா⁴வனபுங்ஸகமேதங் ‘‘விஸமங் சந்தி³மஸூரியா பரிவத்தந்தீ’’திஆதீ³ஸு (அ॰ நி॰ 4.70) விய. ஸனிதா³னந்தி அத்தனோ ப²லங் நித³தா³தீதி நிதா³னங், காரணந்தி ஆஹ ‘‘ஸனிதா³னோ ஸப்பச்சயோ’’தி. காமபடிஸங்யுத்தோதி காமராக³ஸங்கா²தேன காமேன படிஸங்யுத்தோ வா காமபடிப³த்³தோ⁴ வா. தக்கேதீதி தக்கோ. அபூ⁴தகாரங் ஸமாரோபெத்வா கப்பேதீதி ஸங்கப்போ. ஆரம்மணே சித்தங் அப்பேதீதி அப்பனா. விஸேஸேன அப்பேதீதி ப்³யப்பனா. ஆரம்மணே சித்தங் அபி⁴னிரோபெந்தங் விய பவத்ததீதி சேதஸோ அபி⁴னிரோபனா. மிச்சா² விபரீதோ பாபகோ ஸங்கப்போதி மிச்சா²ஸங்கப்போ. அஞ்ஞேஸு ச காமபடிஸங்யுத்தேஸு விஜ்ஜமானேஸு விதக்கோ ஏவ காமதா⁴துஸத்³தே³ன நிருள்ஹோ த³ட்ட²ப்³போ³ விதக்கஸ்ஸ காமபஸங்க³ப்பத்திஸாதிஸயத்தா. ஏஸ நயோ ப்³யாபாத³தா⁴துஆதீ³ஸுபி. ஸப்³பே³பி அகுஸலா த⁴ம்மா காமதா⁴து ஹீனஜ்ஜா²ஸயேஹி காமேதப்³ப³தா⁴துபா⁴வதோ.
96.Bhāvanapuṃsakametaṃ ‘‘visamaṃ candimasūriyā parivattantī’’tiādīsu (a. ni. 4.70) viya. Sanidānanti attano phalaṃ nidadātīti nidānaṃ, kāraṇanti āha ‘‘sanidānosappaccayo’’ti. Kāmapaṭisaṃyuttoti kāmarāgasaṅkhātena kāmena paṭisaṃyutto vā kāmapaṭibaddho vā. Takketīti takko. Abhūtakāraṃ samāropetvā kappetīti saṅkappo. Ārammaṇe cittaṃ appetīti appanā. Visesena appetīti byappanā. Ārammaṇe cittaṃ abhiniropentaṃ viya pavattatīti cetaso abhiniropanā. Micchā viparīto pāpako saṅkappoti micchāsaṅkappo. Aññesu ca kāmapaṭisaṃyuttesu vijjamānesu vitakko eva kāmadhātusaddena niruḷho daṭṭhabbo vitakkassa kāmapasaṅgappattisātisayattā. Esa nayo byāpādadhātuādīsupi. Sabbepi akusalā dhammā kāmadhātu hīnajjhāsayehi kāmetabbadhātubhāvato.
கிலேஸகாமஸ்ஸ ஆரம்மணபா⁴வத்தா ஸப்³பா³குஸலஸங்கா³ஹிகாய காமதா⁴துயா இதரா த்³வே ஸங்க³ஹெத்வா கத²னங் ஸப்³ப³ஸங்கா³ஹிகா. திஸ்ஸன்னங் தா⁴தூனங் அஞ்ஞமஞ்ஞங் அஸங்கரதோ கதா² அஸம்பி⁴ன்னா. இமங் காமாவசரஸஞ்ஞிதங் காமவிதக்கஸஞ்ஞிதஞ்ச காமதா⁴துங். படிச்சாதி பச்சயபூ⁴தங் லபி⁴த்வா. தீஹி காரணேஹீதி தீஹி ஸாரபூ⁴தேஹி காரணேஹி.
Kilesakāmassa ārammaṇabhāvattā sabbākusalasaṃgāhikāya kāmadhātuyā itarā dve saṅgahetvā kathanaṃ sabbasaṅgāhikā. Tissannaṃ dhātūnaṃ aññamaññaṃ asaṅkarato kathā asambhinnā. Imaṃ kāmāvacarasaññitaṃ kāmavitakkasaññitañca kāmadhātuṃ. Paṭiccāti paccayabhūtaṃ labhitvā. Tīhi kāraṇehīti tīhi sārabhūtehi kāraṇehi.
ப்³யாபாத³விதக்கோ ப்³யாபாதோ³ உத்தரபத³லோபேன, ஸோ ஏவ நிஜ்ஜீவட்டே²ன ஸபா⁴வதா⁴ரணட்டே²ன தா⁴தூதி ப்³யாபாத³தா⁴து. ப்³யாபஜ்ஜதி சித்தங் ஏதேனாதி ப்³யாபாதோ³, தோ³ஸோ. ப்³யாபாதோ³பி தா⁴தூதி யோஜனா. ஸஹஜாதபச்சயாதி³வஸேனாதி ஸஹஜாதஅஞ்ஞமஞ்ஞனிஸ்ஸயஸம்பயுத்தஅத்தி²அவிக³தபச்சயவஸேன. விஸேஸேன ஹி பரஸ்ஸ அத்தனோ ச து³க்கா²பனங் விஹிங்ஸா, ஸா ஏவ தா⁴து, அத்த²தோ ரோஸனா பரூபகா⁴தோ, ததா² பவத்தோ வா தோ³ஸஸஹக³தசித்துப்பாதோ³.
Byāpādavitakko byāpādo uttarapadalopena, so eva nijjīvaṭṭhena sabhāvadhāraṇaṭṭhena dhātūti byāpādadhātu. Byāpajjati cittaṃ etenāti byāpādo, doso. Byāpādopi dhātūti yojanā. Sahajātapaccayādivasenāti sahajātaaññamaññanissayasampayuttaatthiavigatapaccayavasena. Visesena hi parassa attano ca dukkhāpanaṃ vihiṃsā, sā eva dhātu, atthato rosanā parūpaghāto, tathā pavatto vā dosasahagatacittuppādo.
திணக³ஹனே அரஞ்ஞேதி திணேஹி க³ஹனபூ⁴தே அரஞ்ஞே. அனயப்³யஸனந்தி அபாயப்³யஸனங், பரிஹரணூபாயரஹிதங் விபத்திந்தி வா அத்தோ². அவட்³டி⁴ங் வினாஸந்தி அவட்³டி⁴ஞ்சேவ வினாஸஞ்சாதி வத³ந்தி ஸப்³ப³ஸோ வட்³டி⁴ரஹிதங். ஸுக்க²திணதா³யோ விய ஆரம்மணங் கிலேஸக்³கி³ஸங்வத்³த⁴னட்டே²ன. திணுக்கா விய அகுஸலஸஞ்ஞா அனுத³ஹனட்டே²ன. திணகட்ட²…பே॰… ஸத்தா அனயப்³யஸனாபத்திதோ. ‘‘இமே ஸத்தா’’தி ஹி அயோனிஸோ படிபஜ்ஜமானா அதி⁴ப்பேதா. தேனாஹ ‘‘யதா² ஸுக்க²திணதா³யே’’திஆதி³.
Tiṇagahane araññeti tiṇehi gahanabhūte araññe. Anayabyasananti apāyabyasanaṃ, pariharaṇūpāyarahitaṃ vipattinti vā attho. Avaḍḍhiṃ vināsanti avaḍḍhiñceva vināsañcāti vadanti sabbaso vaḍḍhirahitaṃ. Sukkhatiṇadāyo viya ārammaṇaṃ kilesaggisaṃvaddhanaṭṭhena. Tiṇukkā viyaakusalasaññā anudahanaṭṭhena. Tiṇakaṭṭha…pe… sattā anayabyasanāpattito. ‘‘Ime sattā’’ti hi ayoniso paṭipajjamānā adhippetā. Tenāha ‘‘yathā sukkhatiṇadāye’’tiādi.
ஸமதாபா⁴வதோ ஸமதாவிரோத⁴தோ விஸமதாஹேதுதோ ச விஸமா ராகா³த³யோதி ஆஹ ‘‘ராக³விஸமாதீ³னி அனுக³த’’ந்தி. இச்சி²தப்³பா³ அவஸ்ஸங்பா⁴வினிபா⁴வேன.
Samatābhāvato samatāvirodhato visamatāhetuto ca visamā rāgādayoti āha ‘‘rāgavisamādīni anugata’’nti. Icchitabbā avassaṃbhāvinibhāvena.
ஸங்கிலேஸதோ நிக்க²மனட்டே²ன நெக்க²ம்மோ, ஸோ ஏவ நிஜ்ஜீவட்டே²ன தா⁴தூதி நெக்க²ம்மதா⁴து. ஸ்வாயங் நெக்க²ம்மஸத்³தோ³ பப்³ப³ஜ்ஜாதீ³ஸு குஸலவிதக்கே ச நிருள்ஹோதி ஆஹ ‘‘நெக்க²ம்மவிதக்கோபி நெக்க²ம்மதா⁴தூ’’தி. இதராபி த்³வே தா⁴துயோதி அப்³யாபாத³அவிஹிங்ஸாதா⁴துயோ வத³தி. விஸுங் தீ³பேதப்³பா³ ஸரூபேன ஆக³தத்தா. விதக்காத³யோதி நெக்க²ம்மஸங்கப்பச்ச²ந்த³பரிளாஹபரியேஸனா. யதா²னுரூபங் அத்தனோ அத்தனோ பச்சயானுரூபங். கத²ங் பனெத்த² குஸலத⁴ம்மேஸு பரிளாஹோ வுத்தோதி? ஸங்கா²ரபரிளாஹமத்தங் ஸந்தா⁴யேதங் வுத்தங், ஸோளஸஸு ஆகாரேஸு து³க்க²ஸச்சே ஸந்தாபட்டோ² விய வுத்தோ, யஸ்ஸ விக³மேன அரஹதோ ஸீதிபா⁴வப்பத்தி வுச்சதி.
Saṃkilesato nikkhamanaṭṭhena nekkhammo, so eva nijjīvaṭṭhena dhātūti nekkhammadhātu. Svāyaṃ nekkhammasaddo pabbajjādīsu kusalavitakke ca niruḷhoti āha ‘‘nekkhammavitakkopi nekkhammadhātū’’ti. Itarāpi dve dhātuyoti abyāpādaavihiṃsādhātuyo vadati. Visuṃ dīpetabbā sarūpena āgatattā. Vitakkādayoti nekkhammasaṅkappacchandapariḷāhapariyesanā. Yathānurūpaṃ attano attano paccayānurūpaṃ. Kathaṃ panettha kusaladhammesu pariḷāho vuttoti? Saṅkhārapariḷāhamattaṃ sandhāyetaṃ vuttaṃ, soḷasasu ākāresu dukkhasacce santāpaṭṭho viya vutto, yassa vigamena arahato sītibhāvappatti vuccati.
ஸயங் ந ப்³யாபஜ்ஜதி, தேன வா தங்ஸமங்கீ³புக்³க³லோ ந கிஞ்சி ப்³யாபாதே³தீதி அப்³யாபாதோ³, விஹிங்ஸாய வுத்தவிபரியாயேஹி ஸா வேதி³தப்³பா³. ஹிதேஸிபா⁴வேன மிஜ்ஜதி ஸினிய்ஹதீதி மித்தோ, மித்தஸ்ஸ ஏஸாதி மெத்தி, அப்³யாபாதோ³. மெத்தாயனாதி மெத்தாகாரணங், மெத்தாய வா அயனா பவத்தனா. மெத்தாயிதத்தந்தி மெத்தாயிதஸ்ஸ மெத்தாய பவத்தஸ்ஸ பா⁴வோ. மெத்தாசேதோவிமுத்தீதி மெத்தாயனவஸேன பவத்தோ சித்தஸமாதி⁴. ஸேஸங் வுத்தனயமேவ.
Sayaṃ na byāpajjati, tena vā taṃsamaṅgīpuggalo na kiñci byāpādetīti abyāpādo, vihiṃsāya vuttavipariyāyehi sā veditabbā. Hitesibhāvena mijjati siniyhatīti mitto, mittassa esāti metti, abyāpādo. Mettāyanāti mettākāraṇaṃ, mettāya vā ayanā pavattanā. Mettāyitattanti mettāyitassa mettāya pavattassa bhāvo. Mettācetovimuttīti mettāyanavasena pavatto cittasamādhi. Sesaṃ vuttanayameva.
ஸனிதா³னஸுத்தவண்ணனா நிட்டி²தா.
Sanidānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. ஸனிதா³னஸுத்தங் • 2. Sanidānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. ஸனிதா³னஸுத்தவண்ணனா • 2. Sanidānasuttavaṇṇanā
