| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ஸங்க²த⁴மஸுத்தவண்ணனா
8. Saṅkhadhamasuttavaṇṇanā
360. ‘‘யோ கோசி புரிஸோ பாணாதிபாதீ முஸாவாதீ³, ஸப்³போ³ ஸோ ஆபாயிகோ’’தி வத்வா புன ‘‘யங்ப³ஹுலங் யங்ப³ஹுலங் கரோதி, தேன து³க்³க³திங் க³ச்ச²தீ’’தி வத³ந்தோ அத்தனாவ அத்தனோ வாத³ங் பி⁴ந்த³தி. ஏவங் ஸந்தேதி யதி³ ப³ஹுஸோ கதேன பாபகம்மேன ஆபாயிகோ, ‘‘யோ கோசி பாணமதிபாதேதீ’’திஆதி³வசனங் மிச்சா²தி. சத்தாரி பதா³னீதி ‘‘யோ கோசி பாணமதிபாதேதீ’’திஆதி³னா நயேன வுத்தா சத்தாரோ அத்த²கொட்டா²ஸா. தி³ட்டி²யா பச்சயா ஹொந்தி ‘‘அத்தி² கோ² பன மயா’’திஆதி³னா அயோனிஸோ உம்முஜ்ஜந்தஸ்ஸ. ப³லஸம்பன்னோதி ஸமத்தோ². ஸங்க²த⁴மகோதி ஸங்க²ஸ்ஸ த⁴மனகிச்சே சே²கோ. அது³க்கே²னாதி ஸுகே²ன. உபசாரோபி அப்பனாபி வட்டதி உபி⁴ன்னங் ஸாமஞ்ஞவசனபா⁴வதோ. அப்பமாணகதபா⁴வோ லப்³ப⁴தேவ. ததா² ஹி தங் கிலேஸானங் விக்க²ம்ப⁴னஸமத்த²தாய தீ³க⁴ஸந்தானதாய விபுலப²லதாய ச ‘‘மஹக்³க³த’’ந்தி வுச்சதி.
360. ‘‘Yo koci puriso pāṇātipātī musāvādī, sabbo so āpāyiko’’ti vatvā puna ‘‘yaṃbahulaṃ yaṃbahulaṃ karoti, tena duggatiṃ gacchatī’’ti vadanto attanāva attano vādaṃ bhindati. Evaṃ santeti yadi bahuso katena pāpakammena āpāyiko, ‘‘yo koci pāṇamatipātetī’’tiādivacanaṃ micchāti. Cattāri padānīti ‘‘yo koci pāṇamatipātetī’’tiādinā nayena vuttā cattāro atthakoṭṭhāsā. Diṭṭhiyā paccayā honti ‘‘atthi kho pana mayā’’tiādinā ayoniso ummujjantassa. Balasampannoti samattho. Saṅkhadhamakoti saṅkhassa dhamanakicce cheko. Adukkhenāti sukhena. Upacāropi appanāpi vaṭṭati ubhinnaṃ sāmaññavacanabhāvato. Appamāṇakatabhāvo labbhateva. Tathā hi taṃ kilesānaṃ vikkhambhanasamatthatāya dīghasantānatāya vipulaphalatāya ca ‘‘mahaggata’’nti vuccati.
ந ஓஹீயதீதி யஸ்மிங் ஸந்தானே காமாவசரகம்மங், மஹக்³க³தகம்மஞ்ச கதூபசிதங் விபாகதா³னே லத்³தா⁴வஸரங் ஹுத்வா டி²தங், தேஸு காமாவசரகம்மங் இதரங் நீஹரித்வா ஸயங் தத்த² ஓஹீயித்வா அத்தனோ விபாகங் தா³துங் ந ஸக்கோதி, மஹக்³க³தகம்மமேவ பன இதரங் படிபா³ஹித்வா அத்தனோ விபாகங் தா³துங் ஸக்கோதி க³ருபா⁴வதோ. தேனாஹ ‘‘தங் காமாவசரகம்ம’’ந்திஆதி³. கிலேஸவஸேனாதி பாபகம்மஸ்ஸ மூலபூ⁴தகிலேஸவஸேன. பாணாதிபாதாத³யோ ஹி தோ³ஸமோஹலோபா⁴தி³மூலகிலேஸஸமுட்டா²னா. கிலேஸவஸேனாதி வா கம்மகிலேஸவஸேன. வுத்தஞ்ஹேதங் – ‘‘பாணாதிபாதோ கோ², க³ஹபதிபுத்த, கம்மகிலேஸோ’’திஆதி³ (தீ³॰ நி॰ 3.245). யதா²னுஸந்தி⁴னாவ க³தந்தி யதா²னுஸந்தி⁴ஸங்கா²தஅனுஸந்தி⁴னா ஓஸானங் க³தங் ஸங்கிலேஸஸம்முகே²ன உட்டி²தாய வோதா³னத⁴ம்மவஸேன நிட்டா²பிதத்தா.
Na ohīyatīti yasmiṃ santāne kāmāvacarakammaṃ, mahaggatakammañca katūpacitaṃ vipākadāne laddhāvasaraṃ hutvā ṭhitaṃ, tesu kāmāvacarakammaṃ itaraṃ nīharitvā sayaṃ tattha ohīyitvā attano vipākaṃ dātuṃ na sakkoti, mahaggatakammameva pana itaraṃ paṭibāhitvā attano vipākaṃ dātuṃ sakkoti garubhāvato. Tenāha ‘‘taṃ kāmāvacarakamma’’ntiādi. Kilesavasenāti pāpakammassa mūlabhūtakilesavasena. Pāṇātipātādayo hi dosamohalobhādimūlakilesasamuṭṭhānā. Kilesavasenāti vā kammakilesavasena. Vuttañhetaṃ – ‘‘pāṇātipāto kho, gahapatiputta, kammakileso’’tiādi (dī. ni. 3.245). Yathānusandhināva gatanti yathānusandhisaṅkhātaanusandhinā osānaṃ gataṃ saṃkilesasammukhena uṭṭhitāya vodānadhammavasena niṭṭhāpitattā.
ஸங்க²த⁴மஸுத்தவண்ணனா நிட்டி²தா.
Saṅkhadhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஸங்க²த⁴மஸுத்தங் • 8. Saṅkhadhamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸங்க²த⁴மஸுத்தவண்ணனா • 8. Saṅkhadhamasuttavaṇṇanā
